𞤏𞤀𞤚𞤀𞤈𞤀𞥄! 𞤌 𞤁𞤀𞤈𞤌𞤚𞤌 𞤑𞤀𞥄 𞤌 𞤁𞤀𞤈𞤌𞤚𞤀𞥄𞤑𞤌؟
𞤖𞤮𞤤 𞤮𞤲 𞤣𞤢𞤪𞤮𞤼𞤮𞥅𞤯𞤮 𞤫 𞤭𞤲𞤣𞤫 𞤬𞤫𞤣𞥆𞤫 𞤀𞤤𞤸𞤢𞤧𞤢𞥄𞤲 𞤏𞤢𞤼𞤢𞤪𞤢𞥄 𞤲𞤣𞤫𞤲؟
𞤄𞤢𞤯𞤼𞤢𞤲𞤫 𞤥𞤢𞥄𞤴𞤣𞤫 𞤀𞤸𞤥𞤢𞤣𞤵 𞤘𞤮𞤲 𞤑𞤵𞤤𞤭𞤦𞤢𞤤𞤭 𞤲𞤣𞤫𞤲⹁ 𞤯𞤵𞥅𞤯𞤵𞤩𞤫 𞤲𞤮 𞤤𞤢𞤲𞤣𞤭𞤼𞤢𞥄𞤣𞤫 𞤸𞤮𞤤 𞤱𞤮𞤲𞤭 𞤮𞤲 𞤤𞤮𞤲𞤼𞤮𞤼𞤮𞥅𞤯𞤮 𞤥𞤮 𞤳𞤢 𞤧𞤵𞤩𞤮 𞤧𞤢𞥄𞤼𞤭𞥅𞤲𞤺𞤮 𞤑𞤮𞤼𞤣𞤭𞤾𞤢𞥄𞤪 𞤫 𞤒𞤢𞤪𞤳𞤮 𞥒𞥐𞥒𞥐. 𞤀𞤤𞤸𞤢𞤧𞤢𞥄𞤲 𞤏𞤢𞤼𞤢𞤪𞤢𞥄 𞤳𞤮 𞤳𞤢𞤲𞤳𞤮 𞤼𞤮𞤯𞥆𞤭𞤲𞤮𞥅 𞤳𞤮 𞤣𞤢𞤪𞤮𞥅 𞤫 𞤭𞤲𞤣𞤫 𞤬𞤫𞤣𞥆𞤫 𞤥𞤢𞤤𞥆𞤢 𞤸𞤫𞤪𞤼𞤮 (RHDP) 𞤲𞤺𞤮𞤲.
𞤘𞤭𞤤𞤢 𞤮 𞤥𞤢𞥄𞤴𞤭 𞤻𞤢𞤤𞤲𞤣𞤫 𞥘 𞤃𞤮𞤪𞤧𞤮 𞥒𞥐𞥒𞥐⹁ 𞤱𞤫𞤲𞤶𞤮𞤲𞥋𞤣𞤭𞤪𞤮 𞤸𞤮𞥅𞤪𞤫 𞤮𞤲 𞤤𞤮𞤲𞤼𞤮𞤼𞤮𞥅𞤯𞤮 𞤥𞤮 𞤯𞤵𞥅𞤯𞤭𞥅. 𞤏𞤮𞥅𞤣𞤭𞥅 𞤬𞤫𞤤𞥆𞤵𞤼𞤵𞤩𞤫 𞤱𞤮𞤲𞤣𞤫 𞤏𞤢𞤼𞤢𞤪𞤢𞥄 𞤻𞤭𞥅𞤩𞤲𞤢𞤴 𞤳𞤮 𞤮 𞤬𞤮𞤣𞤭 𞤳𞤮𞤲⹁ 𞤮 𞤧𞤵𞤩𞤮𞥅 𞤣𞤢𞤪𞤮𞤼𞤮𞥅𞤯𞤮 𞤺𞤮𞥅. 𞤑𞤮𞤲𞤮 𞤸𞤮𞥅𞤪𞤫𞥅𞤩𞤫 𞤬𞤫𞤣𞥆𞤫 𞤥𞤢𞤳𞥆𞤮 𞤲𞤣𞤫𞤲 𞤼𞤭𞤲𞤼𞤵𞤣𞤵𞤲𞤮 𞤫 𞤈𞤫𞤬𞤦𞤭𞥅𞤪𞥆𞤫 (𞤢𞤤𞤢𞤼)⹁ 𞤩𞤫 𞤬𞤮𞤼𞥆𞤭 𞤱𞤮𞤲𞤣𞤫 𞤩𞤫 𞤼𞤮𞤯𞥆𞤭𞤳𞤫 𞤀𞤤𞤸𞤢𞤧𞤢𞥄𞤲 𞤏𞤢𞤼𞤢𞤪𞤢𞥄 𞤳𞤮 𞤣𞤢𞤪𞤮𞥅 𞤫 𞤭𞤲𞤣𞤫 𞤥𞤢𞤩𞥆𞤫.
𞤏𞤢𞤼𞤢𞤪𞤢𞥄 𞤼𞤭𞤥𞥆𞤭𞤲𞤭𞥅 𞤣𞤵𞥅𞤩𞤭 𞥗𞥘 (𞤷𞤢𞤨𞥆𞤢𞤲𞤯𞤫 𞤶𞤫𞥅𞤯𞤭𞤯𞤭 𞤫 𞤶𞤫𞥅𞤼𞤢𞤼𞤭). 𞤌 𞤱𞤭𞤵𞤲𞤮 𞤮 𞤬𞤫𞤰𞥆𞤭𞤲𞤢𞤴 𞤤𞤢𞥄𞤥𞤵 𞤲𞤺𞤵𞤲 𞤫 𞤶𞤵𞥅𞤯𞤫 𞤧𞤵𞤳𞤢𞥄𞤩𞤫 𞤩𞤫𞤲. 𞤑𞤮𞤲𞤮 𞤥𞤢𞥄𞤴𞤣𞤫 𞤘𞤮𞤲 𞤑𞤵𞤤𞤭𞤦𞤢𞤤𞤭 𞤲𞤣𞤫𞤲 𞤢𞤣𞥆𞤭𞥅 𞤶𞤭𞤩𞤭-𞤤𞤭𞤩𞤭. 𞤀𞤣𞤮 𞤏𞤢𞤼𞤢𞤪𞤢𞥄 𞤼𞤮𞤯𞥆𞤢𞥄𞤣𞤫 𞤘𞤮𞤲 𞤑𞤵𞤤𞤭𞤦𞤢𞤤𞤭⹁ 𞤮 𞤱𞤭𞤵𞤲𞤮 𞤧𞤭 𞤄𞤫𞤣𞤭𞤴𞤫𞥅 𞤣𞤢𞤪𞤭𞤳𞤫 𞤬𞤭𞥅 𞤱𞤮𞤲𞤵 𞤸𞤮𞥅𞤪𞤫 𞤤𞤫𞤧𞤣𞤭 𞤲𞤣𞤭𞤲⹁ 𞤮 𞤣𞤢𞤪𞤮𞤼𞤮 𞤳𞤢𞤲𞤳𞤮 𞤳𞤢𞤣𞤭. 𞤄𞤫𞤣𞤭𞤴𞤫𞥅 𞤤𞤫 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤮 𞤣𞤢𞤪𞤮𞤼𞤮 𞤬𞤭𞥅 𞤳𞤢𞤤𞤢 𞤮 𞤼𞤭𞤥𞥆𞤭𞤲𞤭𞥅 𞤣𞤵𞥅𞤩𞤭 𞥘𞥖 𞤫 𞤸𞤭𞤲𞤮 𞤤𞤫 𞤳𞤢𞤣𞤭⹁ 𞤮 𞤤𞤢𞥄𞤥𞤭𞤲𞤮𞤳𞤫 𞤣𞤵𞥅𞤩𞤭 𞤶𞤫𞥅𞤺𞤮𞥅 𞤧𞤭 𞤮 𞤬𞤮𞤤𞥆𞤢𞥄.
𞤒𞤭𞤥𞤩𞤫 𞤏𞤢𞤼𞤢𞤪𞤢𞥄 𞤩𞤫𞤲 𞤲𞤮 𞤸𞤵𞤤𞤭 𞤶𞤮𞥅𞤲𞤭 𞤱𞤮𞤼𞤢 𞤩𞤫 𞤬𞤮𞥅𞤤𞤫𞥅 𞤧𞤭 𞤺𞤮𞥅𞤼𞤯𞤮 𞤺𞤮𞥅 𞤣𞤢𞤪𞤭𞤳𞤫 𞤫 𞤭𞤲𞤣𞤫 𞤥𞤢𞤩𞥆𞤫. 𞤉𞤩𞤫 𞤸𞤵𞤤𞤭 𞤳𞤢𞤣𞤭 𞤱𞤮𞤼𞤢 𞤧𞤵𞤩𞤢𞤺𞤮𞤤 𞤲𞤺𞤮𞤤 𞤺𞤮𞥅𞤼𞤯𞤮 𞤺𞤮𞥅 𞤢𞤣𞥆𞤵 𞤬𞤭𞤼𞤲𞤢 𞤫 𞤲𞤣𞤫𞤪 𞤬𞤫𞤣𞥆𞤫 𞤥𞤢𞤩𞥆𞤫 𞤲𞤣𞤫𞤲. 𞤉 𞤥𞤭𞥅𞤶𞤮 𞤥𞤢𞤩𞥆𞤫⹁ 𞤳𞤮 𞤏𞤢𞤼𞤢𞤪𞤢 𞤼𞤢𞤲 𞤱𞤢𞥄𞤱𞤭 𞤼𞤢𞤦𞤭𞤲𞤼𞤭𞤲𞤣𞤫 𞤲𞤢𞤲𞤮𞤲𞥋𞤣𞤭𞤪𞤢𞤤 𞤸𞤢𞤳𞥆𞤵𞤲𞥋𞤣𞤫 𞤥𞤢𞤩𞥆𞤫⹁ 𞤬𞤫𞤤𞥆𞤭𞤲𞤼𞤭𞤲𞤢𞤲𞤢 𞤩𞤫 𞤨𞤮𞥅𞤤𞤺𞤢𞤤 𞤳𞤢 𞤧𞤵𞤩𞤮 𞤧𞤢𞥄𞤼𞤭𞥅𞤲𞤺𞤮.
𞤖𞤫𞥅𞤱𞤵𞤩𞤫 𞤲𞤮𞤲 𞤲𞤮 𞤢𞥄𞤲𞤭 𞤧𞤭 𞤏𞤢𞤼𞤢𞤪𞤢𞥄 𞤣𞤢𞤪𞤭𞤳𞤫⹁ 𞤱𞤮𞤼𞤢 𞤯𞤵𞤥 𞤭𞤥𞥆𞤭𞤲𞤼𞤭𞤲 𞤸𞤢𞤩𞤪𞤫 𞤳𞤢 𞤲𞤣𞤫𞤪 𞤤𞤫𞤴𞤣𞤭. 𞤏𞤮𞥅𞤣𞤭𞥅 𞤱𞤭𞤵𞤩𞤫⹁ 𞤬𞤭𞥅 𞤳𞤢𞤤𞤢 𞤮 𞤧𞤭𞤲𞤷𞤭𞥅 𞤧𞤢𞤪𞤭𞤴𞤢 𞤥𞤢𞤱𞤳𞤢 𞤥𞤢𞤤𞥆𞤢 𞤣𞤮𞤧𞤼𞤫𞤪𞤫 𞤸𞤫𞤧𞤪𞤫⹁ 𞤯𞤵𞤥 𞤣𞤵𞤽𞤭𞤲𞤢𞤲𞤢𞥄 𞤥𞤮 𞤣𞤢𞤪𞤢𞤺𞤮𞤤 𞤧𞤢𞤦𞤵 𞤮 𞤼𞤭𞤥𞥆𞤭𞤲𞤭𞥅 𞤶𞤮𞥅𞤯𞤢𞤲𞤯𞤫 𞤯𞤭𞤯𞤭 𞤳𞤢 𞤶𞤵𞤤𞥆𞤫𞤪𞤫. 𞤉 𞤸𞤭𞤲𞤤𞤫⹁ 𞤼𞤮𞤯𞥆𞤫𞤪𞤫 𞥑𞥘𞥓𞤩𞤫𞤪𞤫 𞤳𞤢 𞤣𞤮𞤧𞤼𞤫𞤪𞤫 𞤸𞤫𞤧𞤪𞤫 𞤲𞤮 𞤱𞤭𞤭 𞤱𞤮𞤲𞤣𞤫𞤥𞤢 𞤻𞤢𞥄𞤱𞤮𞥅𞤶𞤫 𞤬𞤫𞤱𞤲𞤣𞤭𞤲𞤮𞥅𞤯𞤫 𞤯𞤫𞤲 𞤢𞤣𞤮 𞥒𞥐𞥑𞥖 𞤲𞤮 𞤱𞤢𞤯𞥆𞤭𞥅 𞤳𞤢𞤣𞤭 𞤸𞤢𞤲𞤣𞤫. 𞤁𞤮𞤧𞤼𞤫𞤪𞤫 𞤬𞤫𞤱𞤲𞤣𞤭𞤲𞤮𞥅𞤲𞤣𞤫 𞤲𞤣𞤫𞤲 𞤮𞤲𞤼𞤵𞤥𞤢 𞤤𞤫⹁ 𞤳𞤮 𞤶𞤮𞥅𞤯𞤢𞤲𞤯𞤫 𞤯𞤭𞤯𞤭 𞤼𞤢𞤲 𞤲𞤫𞤱𞤲𞤭. 𞤉 𞤸𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤲𞤣𞤫 𞤏𞤢𞤼𞤢𞤪𞤢𞥄 𞤬𞤮𞥅𞤤𞤵𞤲𞤮𞥅 𞤳𞤢 𞤧𞤵𞤩𞤮 𞥒𞥐𞥑𞥐⹁ 𞤄𞤢𞤺𞤦𞤮 𞤧𞤢𞤤𞤭𞤲𞤮 𞤭𞤥𞥆𞤢𞥄𞤣𞤫. 𞤍𞤵𞤥 𞤱𞤮𞤲𞤭 𞤧𞤢𞤦𞤵 𞤸𞤢𞤪𞤫 𞤥𞤢𞤱𞤲𞤣𞤫 𞤬𞤵𞤯𞥆𞤭𞤼𞤢𞥄𞤣𞤫 𞤫 𞤤𞤫𞤴𞤣𞤭 𞤲𞤣𞤭𞤲. 𞤑𞤮 𞤴𞤢𞤱𞤼𞤭 𞤴𞤭𞤥𞤩𞤫 𞤵𞤶𞤵𞤲𞤫 𞤼𞤢𞤼𞤮 𞤸𞤫𞤣𞥆𞤭𞤲𞤮 𞤫 𞤲𞤣𞤫𞤲 𞤸𞤢𞤪𞤫.
𞤑𞤮 𞤫 𞤯𞤫𞥅 𞤦𞤢𞤤𞤯𞤫 𞤧𞤢𞥄𞤼𞤭𞥅𞤯𞤫 𞤯𞤮𞥅⹁ 𞤀𞤤𞤢𞤧𞤢𞥄𞤲 𞤏𞤢𞤼𞤢𞤪𞤢𞥄 𞤩𞤢𞤲𞤺𞤭𞤲𞤼𞤢 𞤥𞤭𞥅𞤶𞤮 𞤥𞤢𞤳𞥆𞤮 𞤲𞤺𞤮𞤲. 𞤑𞤮 𞤻𞤢𞤤𞤲𞤣𞤫 𞥓𞥑 𞤤𞤫𞤱𞤪𞤵 𞤔𞤵𞤳𞤮 𞤱𞤮𞤲𞤭 𞤳𞤮 𞤸𞤢𞤨𞥆𞤢𞥄 𞤬𞤭𞥅 𞤲𞤢𞥄𞤣𞤵𞤺𞤮𞤤 𞤭𞤲𞤯𞤫 𞤣𞤢𞤪𞤮𞤼𞤮𞥅𞤩𞤫 𞤩𞤫𞤲 𞤳𞤢 𞤘𞤮𞥅𞤥𞤵 𞤅𞤵𞤩𞤮 𞤬𞤭𞥅 𞤧𞤵𞤩𞤮 𞤲𞤺𞤮𞤲 𞥒𞥐𞥒𞥐.
𞤍𞤮𞤲 𞤫 𞤘𞤭𞤲𞤫 𞤫 𞤃𞤢𞤤𞤭⹁ 𞤯𞤫𞥅 𞤯𞤮𞤮 𞤤𞤫𞤴𞤯𞤫 𞤬𞤭𞥅 𞤥𞤢𞤶𞥆𞤫 𞤱𞤮𞤲𞤢𞥄 𞤳𞤮 𞤱𞤫𞤤𞤭 𞤬𞤭𞥅⹁ 𞤳𞤮 𞤴𞤭𞤥𞤩𞤫 𞤴𞤭𞤯𞤵𞤩𞤫 𞤂𞤢𞥄𞤥𞤵 𞤱𞤮𞤲𞤭 𞤯𞤮𞤲.
𞤇𞤫 𞤱𞤢𞤪𞤭𞥅 𞤮𞤴𞤢 𞤬𞤭𞥅 𞤴𞤮 𞤩𞤫 𞤱𞤮𞤲𞤭𞤼𞤵 𞤳𞤢 𞤂𞤢𞥄𞤥𞤵.
𞤑𞤮 𞤺𞤮𞥅𞤲𞤺𞤢. 𞤍𞤫𞥅 𞤤𞤫𞤴𞤯𞤫 𞤯𞤮𞥅 𞤼𞤢𞤼𞤭 𞤥𞤢𞥄 𞤤𞤫𞤴𞤯𞤫 𞤯𞤫 𞤊𞤢𞤪𞤢𞤲𞤧𞤭 𞤸𞤭𞤨𞥆𞤭𞤲𞤮𞥅 𞤯𞤫𞤲 𞤬𞤮𞤬 𞤴𞤭𞤢𞥄𞤤𞤭 𞤤𞤢𞥄𞤱𞤮𞤤 𞤼𞤢𞤸𞤮..
𞤉 𞤥𞤭𞥅𞤶𞤮 𞤢𞤲 𞤮⹁ 𞤣𞤢𞤪𞤮𞤼𞤮 𞤧𞤭 𞤩𞤫 𞤥𞤫𞤼𞥆𞤭𞤳𞤫 𞤤𞤢𞥄𞤥𞤵 𞤲’𞤺𞤵𞤲 𞤩𞤫 𞤬𞤢𞥄𞤤𞤫𞤼𞤢𞥄𞤳𞤫 𞤭𞤥𞥆𞤢𞥄𞤣𞤫.