𞤄𞤈𞤀𞤅𞤋𞤂 𞤅𞤌𞤎𞤋𞥅 𞤅𞤉𞤈𞤄𞤋𞤒𞤀

𞤑𞤮 𞤼𞤭𞤶𞥆𞤢𞤲𞤮𞥅 𞤳𞤮𞤲 𞤼𞤵𞤤𞤼𞤢𞥄𞤤𞤭. 

𞤄𞤪𞤢𞤧𞤭𞤤 𞤴𞤢𞤤𞤼𞤢𞤲𞤭𞥅 𞤴𞤭𞤯𞤵𞤩𞤫 𞤤𞤢𞤼𞤮 𞤥𞤵𞤤𞥆𞤫𞤪𞤫 𞤩𞤫𞤲 𞤳𞤢 𞤩𞤫 𞤸𞤢𞤦𞥆𞤢𞤲𞤮𞥅 𞤯𞤮𞤲. 

𞤇𞤫 𞤨𞤭𞤴𞤭 𞤅𞤫𞤪𞤦𞤭𞤴𞤢 𞤸𞤢𞤲𞤣𞤫 𞤳𞤭𞥅𞤳𞤭𞥅𞤯𞤫 𞤳𞤵𞥅𞤤𞤫 𞤯𞤭𞤯𞤭. 𞤑𞤮𞤲𞤮 𞤱𞤮𞤲𞤢𞥄 𞤨𞤭𞤺𞥆𞤢𞤤 𞤲𞤺𞤢𞤤 𞤼𞤵𞤲 𞤱𞤫𞤤𞤭 𞤴𞤭𞤯𞤵𞤩𞤫 𞤄𞤪𞤢𞤧𞤭𞤤 𞤩𞤫𞤲⹁ 𞤳𞤮 𞤲𞤮 𞤩𞤫 𞤨𞤭𞤴𞤭𞤪𞤭 𞤅𞤫𞤪𞤦𞤭𞤴𞤢 𞤲𞤮𞤲. 𞤖𞤢𞤳𞥆𞤫𞤪𞤫𞤲 𞤲𞤮 𞤩𞤫 𞤬𞤭𞤶𞤭𞤪𞤭 𞤲𞤮𞤲 𞤲𞤮 𞤬𞤮𞤼𞤭⹁ 𞤲𞤮 𞤱𞤮𞥅𞤯𞤭. 𞤏𞤮𞤲𞤢𞥄 𞤥𞤫𞤸𞤪𞤫 𞤱𞤢𞤯𞤭 𞤳𞤮 𞤥𞤵𞤤𞥆𞤫𞤪𞤫 𞤱𞤮𞤲𞤭 𞤳𞤢 𞤤𞤭𞥅𞤤𞤭𞤱𞤢𞤤 𞤥𞤢𞤩𞥆𞤫. 

𞤅𞤮 𞤢𞤪𞤭𞥅 𞤫 𞤤𞤢𞤼𞤮 𞤥𞤵𞤤𞥆𞤫𞤪𞤵⹁ 𞤩𞤫 𞤢𞤤𞤢𞥄 𞤴𞤫𞤪𞤵. 𞤇𞤫 𞤰𞤫𞤼𞥆𞤭 𞤬𞤫𞤤𞤺𞤮 𞤲𞤺𞤮𞤲 𞤩𞤵𞤪𞤭 𞤬𞤮𞤨. 𞤀𞤤𞤢𞥄 𞤳𞤢𞤣𞤭 𞤤𞤫𞤴𞤣𞤭 𞤲𞤣𞤭 𞤩𞤫 𞤬𞤮𞤼𞤢𞤼𞤢 𞤫 𞤲𞤢𞥄𞤣𞤵𞤺𞤮𞤤 𞤳𞤵𞥅𞤤𞤫. 

𞤑𞤮 𞤩𞤵𞤪𞤭 𞤸𞤵𞤤𞤩𞤭𞤲𞤢𞥄𞤣𞤫 𞤫 𞤥𞤢𞤩𞥆𞤫⹁ 𞤳𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤳𞤢𞤤𞤢 𞤬𞤭𞤶𞤢𞤲𞤮𞥅𞤱𞤮 𞤩𞤫⹁ 𞤲𞤮 𞤱𞤢𞥄𞤱𞤭 𞤸𞤵𞥅𞤤𞤵𞤣𞤫 𞤸𞤢𞥄 𞤲𞤢𞥄𞤼𞤲𞤢. 𞤊𞤮𞤼𞤭 𞤮𞤲𞤼𞤭𞤺𞤭 𞤳𞤮 𞤩𞤢𞥄𞤱𞤮 𞤬𞤭𞤶𞤢𞤼𞤢 𞤥𞤢𞤤𞥆𞤢 𞤼𞤵𞤥𞤦𞤮⹁ 𞤩𞤫𞥅 𞤴𞤫𞥅𞤧𞤮 𞤳𞤢𞤲 𞤸𞤢𞥄𞤤𞤢𞥄𞤳𞤢.

𞤏𞤢𞤲𞤮 𞤸𞤢𞤲𞤣𞤫 𞤱𞤮𞤲𞤢𞥄 𞤸𞤢𞤴 𞤩𞤵𞤪𞤵𞤯𞤮 𞤮𞤲 𞤤𞤮𞤤𞥆𞤵𞤣𞤫 𞤫 𞤥𞤢𞤩𞥆𞤫 𞤲𞤢𞥄𞤣𞤭 𞤳𞤵𞥅𞤤𞤫 𞤯𞤫𞤲 𞤯𞤭𞤯𞤭. 𞤌𞤲 𞤳𞤮 𞤈𞤭𞤷𞤢𞤤𞤭𞤧𞤮𞤲⹁ 𞤬𞤭𞤶𞤢𞤲𞤮𞥅𞤱𞤮 𞤚𞤮𞤼𞤫𞤲𞤢𞤥 𞤫 𞤲𞤣𞤫𞤪 𞤤𞤫𞤴𞤣𞤭 𞤉𞤲𞤺𞤫𞤤𞤫. 𞤑𞤮 𞤳𞤢 𞤲𞤶𞤢𞤥𞤣𞤭 𞤱𞤮𞥅𞤼𞤭𞤪𞤭 𞤲𞤣𞤭𞤲 𞤼𞤭𞤥𞥆𞤢𞤼𞤢 𞤯𞤮𞤲⹁ 𞤮 𞤸𞤢𞤱𞤪𞤭 𞤫 𞤥𞤵𞤤𞥆𞤫𞤪𞤫 𞤲𞤣𞤫 𞤸𞤭𞤱𞤮𞥅𞤱𞤮 𞤅𞤫𞤪𞤦𞤭𞤴𞤢 𞤮𞤲 𞤦𞤵𞤺𞤭𞤼𞤭𞥅. 𞤖𞤢𞤪𞤭 𞤲𞤮𞤲 𞤑𞤢𞤧𞤫𞤥𞤭𞤪𞤮⹁ 𞤩𞤢𞥄𞤱𞤮𞥅𞤶𞤮 𞤄𞤪𞤢𞤧𞤭𞤤 𞤮𞤲 𞤲𞤮 𞤬𞤭𞤯𞤭 𞤼𞤵𞤲 𞤺𞤮𞥅𞤼𞤢𞤹 𞤫 𞤼𞤵𞤺𞤢𞥄𞤤𞤫 𞤧𞤫𞤪𞤦𞤭𞤴𞤢 𞤯𞤫𞤲.

𞤑𞤮 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥗𞥓⹁ 𞤈𞤭𞤷𞤢𞤤𞤭𞤧𞤮𞤲 𞤯𞤭𞤯𞤥𞤭𞤼𞤭 𞤳𞤵𞥅𞤤𞤫 𞤯𞤫𞤲 𞤩𞤢𞥄𞤱𞤮 𞤜𞤭𞤲𞤭𞤧𞤭𞤴𞤮𞤧 𞤪𞤮𞤼𞥆𞤢𞤲𞤣𞤫 𞤥𞤮 𞤸𞤢𞤪𞤭 𞤮𞤥𞤮 𞤸𞤵𞤷𞥆𞤭. 𞤑𞤮 𞤳𞤢 𞤮 𞤸𞤵𞤷𞥆𞤭 𞤯𞤮𞤲⹁ 𞤮 𞤸𞤮𞤷𞥆𞤭𞥅 𞤮𞤥𞤮 𞤢𞤶𞥆𞤭𞥅⹁ 𞤩𞤢𞤤𞤲𞤣𞤵 𞤥𞤢𞤳𞥆𞤮 𞤬𞤮𞤨 𞤲𞤮 𞤱𞤫𞤲𞤺𞤭𞤤𞤭⹁  𞤮𞤲𞤼𞤵𞤥𞤢 𞤮 𞤤𞤢𞥄𞤰𞤭 𞤥𞤵𞤤𞥆𞤫𞤪𞤫 𞤲𞤣𞤫𞤲 𞤼𞤫𞤨𞥆𞤫𞤪𞤫⹁ 𞤲𞤣𞤫 𞤣𞤢𞤪𞤮𞤴𞤢𞥄𞤣𞤫 𞤱𞤮𞥅 𞤩𞤢𞥄𞤱𞤮 𞤸𞤭𞤱𞤮𞥅𞤱𞤮 𞤮𞤲.

𞤏𞤢 𞤲𞤺𞤢𞤤 𞤳𞤵𞥅𞤤𞤢𞤤 𞤫 𞤬𞤮𞤼𞤵𞤣𞤫 𞤲𞤢𞥄𞤣𞤢𞥄𞤳𞤢 𞤼𞤢𞤸𞤮 𞤺𞤭𞤤𞤢 𞤬𞤮𞥅𞤤𞤮𞤼𞤭𞤪𞤢𞤤 𞤲𞤺𞤢𞤤 𞤬𞤵𞤯𞥆𞤭 𞤸𞤭𞤳𞥆𞤢 𞤑𞤢𞤼𞤢𞤪.

𞤄𞤪𞤢𞤧𞤭𞤤 𞤲𞤮 𞤥𞤢𞤪𞤭 𞤬𞤮𞤼𞥆𞤵𞤺𞤮𞤤 𞤫 𞤑𞤢𞤥𞤫𞤪𞤵𞤲 𞤫 𞤥𞤢𞤱𞤲𞤣𞤫 𞤻𞤢𞤤𞤲𞤣𞤫 𞥒 𞤄𞤮𞤱𞤼𞤮. 𞤑𞤮 𞤯𞤵𞤥 𞤱𞤮𞤲𞤭 𞤲𞤣𞤢𞤲𞤺𞤵 𞤲𞤮 𞤱𞤫𞤲𞤺𞤭𞤤𞤢𞤲𞤭𞥅 𞤑𞤢𞤥𞤫𞤪𞤵𞤲 𞤩𞤢𞥄𞤱𞤮 𞤅𞤵𞤱𞤭𞤧 𞤨𞤭𞤴𞤭𞤣𞤫 𞤩𞤫 𞤳𞤢𞤥𞤩𞤫 𞤳𞤢𞤣𞤭 𞤸𞤢𞤣𞤭. 

𞤙𞤮𞤺𞥆𞤢𞤲𞤣𞤫 𞤀𞤴𞥃𞤢 𞤅𞤮𞥅. 𞤋𞤥𞥆𞤭𞤲𞤢𞥄𞤯𞤮 𞤫 𞤭𞤲𞤣𞤫 𞤤𞤮𞤱𞤪𞤫 𞤚𞤢𞤦𞤢𞤤𞤣𞤫 𞤲𞤣𞤫𞤲 𞤬𞤭𞥅 𞤸𞤵𞤥𞤨𞤭𞤼𞤵𞤺𞤮𞤤 𞤮𞤲 𞤳𞤮 𞤱𞤮𞤲𞤭 𞤫 𞤬𞤫𞤰𞥆𞤵𞤣𞤫 𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤑𞤢𞤼𞤢𞤪