𞤆𞤌𞥅𞤂𞤘𞤀𞤂 𞤄𞤀𞤒𞤁𞤉𞤐 𞤐𞤘𞤀𞤂 𞤚𞤀𞤄𞤋𞤐𞤚𞤋𞤐𞤀𞥄𞤃𞤀

𞤄𞤭𞤥𞤦𞤭 𞤤𞤢𞤱 𞤸𞤢𞤲𞤣𞤫 𞤫 𞤲𞤢𞥄𞤧𞤢𞥄𞤲𞤣𞤫⹁ 𞤻𞤢𞤤𞤲𞤣𞤫 𞥗 𞤅𞤭𞥅𞤤𞤮 𞥒𞥐𞥒𞥑⹁ 𞤷𞤵𞥅𞤯𞤭 𞤯𞤭𞤲 𞤯𞤭𞤯𞤭 𞤳𞤢 𞤧𞤢𞤤𞤲𞤣𞤵 𞤤𞤢𞥄𞤥𞤵 𞤅𞤢𞤪𞤴𞤭𞤲𞤮𞥅𞤪𞤵 𞤪𞤫𞤲𞤣𞤵𞤲𞤮 𞤼𞤢𞤦𞤭𞤲𞤼𞤭𞤲𞤭 𞤨𞤮𞥅𞤤𞤺𞤢𞤤 𞤔𞤮𞥅 𞤄𞤢𞤴𞤣𞤫𞤲 𞤲𞤺𞤢𞤤 𞤸𞤮𞥅𞤪𞤫 𞤁𞤮𞤲𞤢𞤤 𞤚𞤪𞤮𞤥𞤨 𞤫 𞤧𞤵𞤩𞤮 𞤱𞤢𞤯𞤵𞤲𞤮𞥅𞤲𞤺𞤮 𞤲𞤺𞤮𞤲 𞤪𞤮𞤱𞤢𞤲𞤭  𞤫 𞤥𞤢𞤱𞤦𞤢𞥄𞤪𞤫⹁ 𞤻𞤢𞤤𞤲𞤣𞤫 𞥓 𞤔𞤮𞤤𞤮 𞥒𞥐𞥒𞥐.

𞤚𞤢𞤦𞤭𞤲𞤼𞤭𞤲𞤺𞤮𞤤 𞤨𞤮𞥅𞤤𞤺𞤵 𞤄𞤢𞤴𞤣𞤫𞤲 𞤲𞤺𞤵𞤲 𞤱𞤢𞤯𞤭𞥅 𞤦𞤢𞤯𞤼𞤢𞤲𞤫 𞤶𞤭𞥅𞤩𞤮𞤤𞤣𞤵 𞤫 𞤼𞤢𞤰𞤢𞥄𞤤𞤫 𞤥𞤢𞤱𞤯𞤫 𞤱𞤢𞤯𞤵𞤯𞤫 𞤫 𞤶𞤮𞥅𞤲𞤣𞤫 𞤧𞤢𞤪𞤴𞤭𞤲𞤮𞥅𞤩𞤫 𞤩𞤫𞤲. 𞤑𞤮 𞤴𞤭𞤥𞤩𞤫 𞤁𞤮𞤲𞤢𞤤 𞤚𞤪𞤮𞤥𞤨⹁ 𞤱𞤵𞤪𞤼𞤭𞤲𞤮𞥅 𞤧𞤵𞤨𞥆𞤭𞤼𞤭𞥅 𞤳𞤢 𞤶𞤮𞥅𞤲𞤣𞤫 𞤧𞤢𞤪𞤴𞤭𞤲𞤮𞥅𞤩𞤫 𞤩𞤫𞤲⹁ 𞤩𞤫 𞤤𞤢𞤲𞤷𞤭 𞤦𞤢𞥄𞤬𞤫 𞤫 𞤳𞤫𞤲𞤮𞤪𞤯𞤫⹁ 𞤩𞤫 𞤲𞤢𞥄𞤼𞤭 𞤸𞤮𞥅𞤪𞤫 𞤲𞤦𞤢𞥄𞤼𞤵 𞤲𞤺𞤵𞤲. 𞤖𞤭𞤱𞤮𞥅𞤩𞤫 𞤩𞤫𞤲 𞤫 𞤯𞤢𞤲𞤣𞤮𞤳𞤢𞥄𞤩𞤫 𞤩𞤫𞤲 𞤤𞤢𞥄𞤱𞤭𞤲𞤭 𞤧𞤢𞤪𞤭𞤴𞤭𞤲𞤮𞥅𞤩𞤫 𞤩𞤫𞤲⹁ 𞤲𞤢𞤩𞤭 𞤩𞤫 𞤫 𞤥𞤢𞤪𞤺𞤢 𞤧𞤵𞥅𞤯𞤭𞥅𞤳𞤢.

𞤒𞤭𞤥𞤩𞤫 𞤲𞤢𞤴𞤮 𞤥𞤢𞥄𞤴𞤭 𞤧𞤢𞤦𞤵 𞤲𞤺𞤮𞥅 𞤥𞤵𞤪𞤼𞤮. 𞤘𞤮𞥅𞤼𞤮 𞤫 𞤥𞤢𞤩𞥆𞤫 𞤳𞤮 𞤳𞤵𞤪𞤢𞤤 𞤬𞤫𞤼𞤫𞤤 𞤱𞤮𞤲𞤭 𞤧𞤢𞤦𞤵 𞤥𞤵𞤲. 𞤇𞤫𞤴𞤢 𞤼𞤢𞤼𞤮⹁ 𞤳𞤮 𞤤𞤮𞤫𞤪𞤫 𞤷𞤫𞤤𞥆𞤢𞤤 𞤳𞤢𞤻𞤵𞤲 𞤫 𞤦𞤵𞤩𞥆𞤮𞤲𞥋𞤣𞤭𞤪𞤮 𞤲𞤺𞤮𞤲 𞤱𞤮𞤲𞤭 𞤧𞤢𞤦𞤵 𞤥𞤢𞥄𞤴𞤣𞤫 𞤥𞤢𞤩𞥆𞤫 𞤳𞤢 𞤤𞤢𞤦𞤵𞤼𞤢𞥄𞤲𞤣𞤵.

𞤑𞤮 𞤧𞤢𞤤𞤢𞥄𞤪𞤫 𞤁𞤮𞤲𞤢𞤤 𞤚𞤪𞤮𞤥𞤨 𞤲𞤣𞤫𞤲 𞤶𞤢𞤩𞤵𞤺𞤮𞤤 𞤱𞤮𞤲𞤣𞤫𞤥𞤢 𞤮 𞤬𞤮𞥅𞤤𞤢𞥄𞤥𞤢⹁ 𞤱𞤮𞤲𞤭 𞤧𞤢𞤦𞤵 𞤲𞤺𞤮𞥅 𞤥𞤵𞤪𞤼𞤮 𞤥𞤢𞤱𞤲𞤺𞤮. 𞤘𞤭𞤤𞤢 𞤄𞤢𞤴𞤣𞤫𞤲 𞤨𞤭𞤴𞤭 𞤥𞤮 𞤫 𞤧𞤵𞤩𞤮 𞤲𞤺𞤮𞤲⹁ 𞤮𞤥𞤮 𞤰𞤵𞤪𞤭𞤲𞤣𞤫 𞤴𞤭𞤥𞤩𞤫 𞤥𞤢𞤳𞥆𞤮 𞤩𞤫𞤲 𞤬𞤭𞥅 𞤣𞤢𞤪𞤼𞤢𞤺𞤮𞤤 𞤫 𞤧𞤢𞤤𞤢𞤺𞤮𞤤 𞤦𞤢𞤯𞤼𞤢𞤤 𞤲𞤺𞤮𞥅 𞤧𞤵𞤩𞤮.

𞤑𞤮 𞤯𞤵𞤥 𞤱𞤮𞤲𞤭 𞤧𞤢𞤦𞤵 𞤵𞤶𞤵𞤲𞤢𞥄𞤶𞤫 𞤴𞤭𞤥𞤩𞤫 𞤥𞤢𞤳𞥆𞤮 𞤴𞤮 𞤭𞤱𞤪𞤵 𞤷𞤫𞤲𞤯𞤫 𞤀𞤥𞤫𞤪𞤭𞤳𞤢𞥄 𞤬𞤮𞤨 𞤥𞤮𞥅𞤩𞤼𞤮𞤲𞥋𞤣𞤭𞤪𞤢 𞤳𞤢 𞤤𞤢𞥄𞤥𞤮𞤪𞤣𞤫 𞤏𞤢𞥃𞤭𞤲𞤼𞤮𞤲 𞤸𞤢𞤲𞤳𞤭 𞤫 𞤲𞤶𞤫𞤧𞤤𞤢𞥄𞤪𞤫. 𞤁𞤮𞤲𞤢𞤤 𞤚𞤪𞤮𞤥𞤨  𞤢𞤪𞤭 𞤫 𞤲𞤺𞤢𞤤 𞤥𞤮𞥅𞤩𞤼𞤮𞤲𞥋𞤣𞤭𞤪𞤢𞤤⹁ 𞤮 𞤧𞤵𞤴𞤲𞤭 𞤩𞤫 𞤫 𞤣𞤫𞤲𞤼𞤢𞤤 𞤧𞤢𞤪𞤴𞤭𞤲𞤮𞥅𞤩𞤫 𞤩𞤫 𞤲𞤺𞤢𞤥 𞤦𞤮𞤲𞥆𞤭𞤼𞤵𞤺𞤮𞤤 𞤲𞤦𞤢𞤼𞤵 𞤥𞤢𞤩𞥆𞤫 𞤲𞤺𞤵𞤲. 𞤔𞤮𞥅𞤲𞤣𞤫 𞤲𞤣𞤫𞤲 𞤣𞤢𞤪𞤼𞤭𞤲𞤢𞥄 𞤳𞤮 𞤩𞤵𞤪𞤭 𞤲𞤶𞤢𞤥𞤯𞤭 𞤼𞤢𞤼𞤭. 𞤑𞤮𞤲𞤮 𞤩𞤢𞥄𞤱𞤼𞤭 𞤯𞤵𞤥⹁ 𞤲𞤦𞤢𞤼𞤵 𞤲𞤺𞤵𞤲 𞤪𞤫𞤲𞤣𞤭𞤼𞤭 𞤬𞤭𞥅 𞤺𞤢𞤴𞤲𞤭𞤼𞤢𞤺𞤮𞤤 𞤺𞤮𞤤𞥆𞤫 𞤯𞤫𞤲.

𞤔𞤮𞥅𞤲𞤭 𞤨𞤮𞥅𞤤𞤺𞤵 𞤔𞤮𞥅 𞤄𞤢𞤴𞤣𞤫𞤲 𞤲𞤺𞤵𞤲 𞤼𞤢𞤦𞤭𞤼𞤭𞥅. 𞤙𞤢𞤤𞤲𞤣𞤫 𞥒𞥐 𞤅𞤭𞥅𞤤𞤮⹁ 𞤳𞤢𞤲𞤳𞤮 𞤫 𞤑𞤢𞤥𞤢𞥄𞤤𞤢 𞤖𞤢𞤪𞤭𞤧⹁ 𞤷𞤵𞤳𞥆𞤮 𞤥𞤢𞤳𞥆𞤮 𞤮𞤲⹁ 𞤩𞤫 𞤶𞤮𞤯𞥆𞤭𞤲𞤼𞤫 𞤳𞤢 𞤶𞤵𞤤𞥆𞤫𞤪𞤫 𞤸𞤮𞥅𞤪𞤢𞥄𞤺𞤵 𞤀𞤥𞤫𞤪𞤭𞤳𞤢𞥄 𞤲𞤺𞤵𞤲 𞤬𞤭𞥅 𞤣𞤵𞥅𞤩𞤭 𞤲𞤢𞤴𞤭. 𞤧𞤭 𞤩𞤫 𞤶𞤶𞤮𞤯𞥆𞤭𞤲𞤢𞥄𞤥𞤢  𞤳𞤢 𞤶𞤵𞤤𞥆𞤫𞤪𞤫⹁ 𞤳𞤢𞤥𞤢𞥄𞤤𞤢 𞤖𞤢𞤪𞤭𞤧  𞤤𞤢𞥄𞤼𞤮𞤼𞤮 𞤢𞤪𞤢𞤲𞤮 𞤫 𞤩𞤢𞤤𞤫𞥅𞤩𞤫⹁ 𞤳𞤢𞤻𞤵𞤲 𞤫 𞤢𞤪𞤢𞤲𞤮 𞤫 𞤪𞤫𞤱𞤩𞤫 𞤱𞤮𞤲𞤵𞤺𞤮𞤤  𞤷𞤵𞤳𞥆𞤮-𞤸𞤮𞥅𞤪𞤫𞥅𞤶𞤮 𞤀𞤥𞤫𞤭𞤪𞤳𞤢𞥄⹁ 𞤺𞤭𞤤𞤢 𞤤𞤫𞤴𞤣𞤭 𞤲𞤣𞤭𞤲  𞤧𞤭𞤲𞤷𞤢𞥄 𞤫 𞤸𞤭𞤼𞤢𞥄𞤲𞤣𞤫 𞥑𞥗𞥗𞥖. 𞤍𞤵𞤥 𞤼𞤭𞤥𞥆𞤭𞥅 𞤣𞤵𞥅𞤩𞤭 𞤼𞤫𞥅𞤥𞤫𞤯𞥆𞤫 𞤯𞤭𞤯𞤭 𞤫 𞤷𞤢𞤨𞥆𞤢𞤲𞤯𞤫 𞤲𞤢𞤴𞤭 𞤫 𞤼𞤢𞤼𞤭.

𞤊𞤵𞥅𞤼𞤢 𞤲𞤮 𞤸𞤫𞤷𞥆𞤭𞤪𞤭 𞤀𞤥𞤫𞤪𞤭𞤳𞤢𞥄 𞤣𞤵𞥅𞤩𞤭 𞤷𞤢𞤨𞥆𞤢𞤲𞤯𞤫 𞤶𞤮𞤱𞤭. 𞤅𞤭 𞤀𞤤𞤥𞤢𞤼𞤫𞥅𞤪𞤭 𞤊𞤵𞥅𞤼𞤢 𞤔𞤢𞤤𞤮𞥅 𞤲𞤣𞤭𞤲 𞤤𞤢𞤲𞤷𞤢𞤲𞤮𞥅𞤳𞤢 𞤦𞤢𞤯𞤼𞤢𞤲𞤫 𞤢𞤪𞤣𞤵 𞤊𞤢𞤪𞤢𞤲𞤧𞤭 𞤲𞤣𞤵𞤲 𞤫 𞤥𞤢𞥄𞤴𞤣𞤫  𞤀𞤤𞤥𞤢𞥄𞤥𞤭 𞤄𞤵𞥅𞤦𞤢𞤳𞤢𞤪 𞤄𞤭𞤪𞤮 𞤲𞤣𞤫𞤲⹁ 𞤸𞤢𞤪𞤢𞤴𞤲𞤮  𞤲𞤣𞤭 𞤩𞤢𞤣𞤲𞤭𞥅 𞤣𞤵𞥅𞤩𞤭 𞥓𞥐𞥐.