𞤐𞤘𞤓𞤔𞥆𞤌 𞤐𞤌 𞤆𞤋𞤒𞤀𞥄 𞤖𞤀𞤐 𞤃𞤀𞥄𞤒𞤋

𞤑𞤮 𞤸𞤢𞤲𞤳𞤭 𞤶𞤫𞤥𞥆𞤢 𞤫 𞤥𞤢𞤱𞤦𞤢𞥄𞤪𞤫 𞤻𞤢𞤤𞤲𞤣𞤫 𞥑𞥒 𞤅𞤭𞥅𞤤𞤮 𞤯𞤵𞤥 𞤱𞤢𞤯𞤭⹁ 𞤫 𞤧𞤢𞥄𞤪𞤫 𞤭𞤲𞥆𞤫𞤼𞤫𞥅𞤲𞤣𞤫 𞤑𞤢𞤲𞤳𞤢𞤲⹁ 𞤱𞤮𞤲𞤣𞤫 𞤼𞤮 𞤁𞤮𞤱𞤪𞤭 𞤘𞤭𞤲𞤫.

𞤑𞤮 𞤨𞤵𞤼𞥆𞤢𞤤𞤭𞥅𞤪𞤵 (𞤥𞤮𞤼𞤮𞥅𞤪𞤵) 𞤮 𞤬𞤢𞥄𞤤𞤢𞤲𞤮𞥅 𞤱𞤵𞤶𞥆𞤵𞤣𞤫 𞤫 𞤣𞤢𞤥𞤦𞤵𞤺𞤢𞤤 𞤴𞤫𞥅𞤴𞤭𞤪𞤣𞤫 𞤱𞤮𞤲𞤣𞤫 𞤄𞤢𞤲𞤢𞤲𞤳𞤮𞤪𞤮𞤣𞤢𞥄⹁ 𞤼𞤢𞤳𞥆𞤮 𞤤𞤵𞥅𞤥𞤮 𞤁𞤭𞤦𞤭𞤣𞤢𞥄 𞤲𞤺𞤮𞤲. 𞤖𞤢𞤪𞤭 𞤮𞤥𞤮 𞤱𞤮𞤲𞤣𞤵𞤲𞤮𞥅 𞤫 𞤦𞤢𞤤𞥆𞤮 𞤥𞤢𞤳𞥆𞤮⹁ 𞤳𞤮𞤲𞤮 𞤮𞤲𞤯𞤮𞤲 𞤣𞤮𞤺𞤭 𞤤𞤢𞥄𞤱𞤭𞥅.

𞤉 𞤬𞤭𞤤𞥆𞤢𞤴𞤫𞥅 𞤼𞤢𞤱𞤢𞤲𞤮𞥅𞤯𞤮 𞤯𞤮𞤲⹁ “𞤳𞤮 𞤫 𞤨𞤵𞤼𞥆𞤢𞤤𞤭𞥅𞤪𞤵 𞤩𞤫 𞤢𞤪𞤭⹁ 𞤩𞤫 𞤣𞤢𞤪𞤮𞤴𞤭𞥅 𞤳𞤢 𞤺𞤢𞤯𞤢 𞤤𞤢𞥄𞤱𞤮𞤤⹁ 𞤫𞤩𞤫 𞤢𞤴𞤲𞤭𞤼𞤢 𞤨𞤵𞤼𞥆𞤢𞤤𞤭𞥅𞤪𞤵 𞤣𞤢𞤪𞤭𞤲𞤮𞥅𞤲𞤣𞤵 𞤫 𞤣𞤢𞤥𞤦𞤵𞤺𞤢𞤤 𞤴𞤫𞥅𞤴𞤭𞤪𞤣𞤫 𞤣𞤫𞤦𞥆𞤮 𞤺𞤮𞥅. 𞤖𞤢𞤪𞤭 𞤲𞤮𞤲⹁ 𞤱𞤢𞤯𞤭𞥅 𞤴𞤮𞤲𞤼𞤫𞤪𞤫 𞤫𞤩𞤫 𞤢𞤪𞤢 𞤰𞤫𞥅𞤱𞤵𞤺𞤮𞤤 𞤨𞤵𞤼𞥆𞤢𞤤𞤭𞥅𞤶𞤭 𞤳𞤢 𞤤𞤢𞥄𞤱𞤮𞤤 𞤯𞤮𞤮. 𞤐𞤣𞤫 𞤣𞤫𞤦𞥆𞤮 𞤶𞤮𞥅𞤥𞤢 𞤲𞤣𞤵𞥅 𞤨𞤵𞤼𞥆𞤢𞤤𞤭𞥅𞤪𞤵 𞤱𞤮𞤯𞥆𞤭𞤼𞤮𞤪𞤲𞤮𞥅 𞤴𞤫𞥅𞤴𞤭𞤪𞤣𞤫 𞤥𞤵𞤲 𞤲𞤣𞤫𞤲⹁ 𞤺𞤮𞥅𞤼𞤮 𞤫 𞤩𞤫𞥅 𞤱𞤵𞤴𞤩𞤫 𞤼𞤭𞤨𞥆𞤭𞥅⹁ 𞤮 𞤴𞤢𞤸𞤭 𞤮 𞤲𞤣𞤢𞥄𞤪𞤮𞤴𞤭 𞤧𞤭 𞤧𞤢𞥄𞤦𞤭𞤱𞤢𞤤 𞤥𞤢𞤳𞥆𞤮 𞤲𞤺𞤢𞤤 𞤸𞤵𞤩𞥆𞤭𞤲𞤢𞤴 𞤨𞤵𞤼𞥆𞤢𞤤𞤭𞥅𞤪𞤵 𞤲𞤣𞤵𞤲.

𞤇𞤢𞤴 𞤲𞤣𞤵 𞤸𞤵𞤩𞥆𞤭𞥅⹁ 𞤮 𞤰𞤢𞤱𞤭 𞤸𞤮𞥅𞤪𞤫 𞤥𞤢𞤴𞤪𞤵 𞤮 𞤬𞤢𞥄𞤤𞤢𞥄 𞤣𞤮𞤺𞤵𞤣𞤫. 𞤃𞤭 𞤧𞤮𞤲𞤳𞤭 𞤲𞤺𞤵𞤶𞥆𞤮⹁ 𞤯𞤭𞤯𞤥𞤮 𞤥𞤢𞤳𞥆𞤮 𞤸𞤢𞤦𞥆𞤭𞤲𞤮𞥅𞤯𞤮 𞤥𞤮 𞤮𞤲 𞤣𞤮𞤺𞤭⹁ 𞤳𞤢𞤲𞤳𞤮 𞤳𞤢𞤣𞤭 𞤮 𞤬𞤵𞤯𞥆𞤭 𞤣𞤮𞤺𞤵𞤣𞤫. 𞤃𞤭 𞤰𞤫𞤼𞥆𞤭 𞤥𞤮𞤼𞤮𞥅𞤪𞤵 𞤢𞤲 𞤲𞤣𞤵𞤲 𞤥𞤭 𞤶𞤮𞤳𞥆𞤭 𞤥𞤮. 𞤐𞤣𞤫 𞤥𞤭 𞤸𞤫𞤱𞤼𞤭𞤼𞤮𞤪𞤲𞤮𞥅 𞤥𞤮⹁ 𞤥𞤭 𞤲𞤢𞤲𞤺𞤭 𞤨𞤵𞤼𞥆𞤢𞤤𞤭𞥅𞤪𞤵 𞤲𞤣𞤵𞤲⹁ 𞤥𞤭 𞤬𞤫𞤼𞥆𞤭 𞤲𞤺𞤵𞤶𞥆𞤮 𞤲𞤺𞤵𞤶𞥆𞤮. 𞤌 𞤸𞤵𞤤𞤭⹁ 𞤮 𞤼𞤭𞤨𞥆𞤭𞥅 𞤬𞤵𞤯𞥆𞤭 𞤣𞤮𞤺𞤵𞤣𞤫. 𞤒𞤭𞤥𞤩𞤫 𞤩𞤫𞤲 𞤶𞤮𞤳𞥆𞤭𞤼𞤭 𞤥𞤮. 𞤇𞤢𞤴 𞤩𞤫 𞤲𞤢𞤲𞤺𞤭𞥅 𞤥𞤮⹁ 𞤩𞤫 𞤨𞤭𞤴𞤭 𞤥𞤮 𞤸𞤢𞥄 𞤮 𞤤𞤢𞤸𞤭. “

𞤐𞤮 𞤱𞤮𞥅𞤱𞤭𞤪𞤭 𞤲𞤮𞤲⹁ 𞤨𞤮𞤤𞤭𞥅𞤧𞤢𞥄𞤩𞤫 𞤩𞤫𞤲 𞤶𞤢𞤩𞤢𞥄𞤤𞤭 𞤵𞤳𞥆𞤭𞤼𞤢𞥄𞤣𞤫⹁ 𞤶𞤮𞥅𞤲𞤭 𞤲𞤮𞤲⹁ 𞤲𞤺𞤵𞤶𞥆𞤮 𞤮 𞤥𞤢𞥄𞤴𞤭𞥅 𞤸𞤢𞤲𞤳𞤭 𞤦𞤭𞤥𞤦𞤭 𞤫 𞤲𞤶𞤫𞤧𞤤𞤢𞥄𞤪𞤫 𞤦𞤢𞤯𞤼𞤢𞤲𞤫 𞤨𞤭𞤺𞥆𞤢𞤤 𞤲𞤺𞤢𞤤 𞤮 𞤸𞤫𞤩𞤭 𞤲𞤺𞤢𞤤.

𞤍𞤭𞤯𞤥𞤮 𞤥𞤢𞤳𞥆𞤮 𞤮𞤲 𞤲𞤢𞤲𞤺𞤢𞥄𞤳𞤢 𞤼𞤢𞤸𞤮⹁ 𞤳𞤮𞤲𞤮 𞤧𞤵𞤳𞤢𞥄𞤩𞤫 𞤳𞤢𞤱𞤼𞤢𞤤 𞤄𞤢𞤲𞤢𞤲𞤳𞤮𞤪𞤮𞤣𞤢𞥄 𞤲𞤺𞤢𞤤 𞤲𞤮 𞤯𞤢𞤩𞥆𞤵𞤼𞤮𞤣𞤫 𞤥𞤮.

𞤏𞤢𞤪𞤵𞤺𞤮𞤤 𞤲𞤺𞤵𞤶𞥆𞤮⹁ 𞤳𞤮 𞤳𞤮 𞤱𞤮𞥅𞤱𞤭 𞤑𞤢𞤲𞤳𞤢𞤲 𞤳𞤢𞤻𞤵𞤲 𞤫 𞤷𞤢𞤫 𞤸𞤭𞤳𞥆𞤮𞤪𞤯𞤫 𞤼𞤮𞤲 𞤫 𞤳𞤢 𞤤𞤢𞥄𞤥𞤮𞤪𞤣𞤫 𞤑𞤮𞤲𞤢𞥄𞤳𞤭𞤪𞤭 𞤳𞤢𞤣𞤭. 𞤑𞤮 𞤱𞤮𞤲𞤭 𞤧𞤮𞤲 𞤧𞤢𞤦𞤵 𞤯𞤵𞤥⹁ 𞤳𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤤𞤢𞥄𞤥𞤵 𞤲𞤺𞤵𞤲 𞤲𞤵𞤲𞤯𞤢𞥄⹁ 𞤧𞤭 𞤱𞤵𞤴𞤩𞤫 𞤲𞤢𞤲𞤺𞤢𞥄𞤥𞤢 𞤲𞤢𞤩𞤢𞥄𞤥𞤢 𞤻𞤢𞥄𞤱𞤮𞥅𞤪𞤫⹁ 𞤩𞤫 𞤢𞤷𞥆𞤵𞤼𞤫𞤼𞤫. 𞤖𞤢𞤴 𞤧𞤭 𞤩𞤫 𞤧𞤮𞤳𞤢𞥄 𞤥𞤢⹁ 𞤩𞤫 𞤲𞤫𞥅𞤩𞤢𞤼𞤢𞥄 𞤳𞤢 𞤲𞤦𞤢𞤦𞥆𞤢. 

𞤑𞤮 𞤽𞤢𞤤𞤯𞤭𞤲𞤭 𞤲𞤮 𞤱𞤢𞤯𞤢 𞤘𞤭𞤲𞤫. 𞤃𞤮 𞤱𞤵𞤶𞥆𞤭𞥅 𞤳𞤮 𞤬𞤢𞤥𞤯𞤭⹁ 𞤮𞤲𞤼𞤭𞤺𞤭 𞤣𞤢𞤯𞤢𞤼𞤢𞥄 𞤨𞤭𞤴𞤫𞥅𞤣𞤫⹁ 𞤳𞤮𞤲𞤮 𞤧𞤭 𞤮𞤲𞤼𞤭𞤺𞤭 𞤱𞤵𞤶𞥆𞤭𞥅 𞤳𞤮 𞤯𞤵𞥅𞤯𞤭⹁ 𞤮 𞤳𞤫𞤤𞥆𞤢𞤲𞤼𞤫. 𞤖𞤢𞤴 𞤲𞤫𞥅𞤩𞤢𞥄𞤤𞤭⹁ 𞤔𞤫𞤴𞤲𞤢𞤦𞤵 𞤁𞤢𞤪𞤢𞥄𞤥𞤫⹁ 𞤶𞤢𞥄𞤺𞤮𞤪𞤢𞥄𞤯𞤮 𞤮𞤲 𞤳𞤢 𞤶𞤢𞤲𞤺𞤣𞤫 𞤻𞤫𞥅𞤻𞤢𞤤⹁ 𞤲𞤮 𞤼𞤵𞥅𞤥𞤢𞤲𞤮𞥅 𞤱𞤵𞤶𞥆𞤵𞤺𞤮𞤤 𞤳𞤮 𞤴𞤢𞤱𞤼𞤭 𞤣𞤵𞤦𞤵𞤲𞤫 𞤲𞤮𞥅𞤺𞤢𞤴 (𞤥𞤭𞤤𞤭𞤴𞤮𞤲 𞥒𞥐 𞤣𞤢𞤤𞤢)⹁ 𞤳𞤮𞤲𞤮 𞤸𞤢𞤲 𞤶𞤮𞥅𞤲𞤭 𞤸𞤮 𞤭𞤼𞥆𞤢𞥄𞤳𞤢⹁ 𞤸𞤮 𞤲𞤢𞤩𞤢𞥄𞤳𞤢 𞤻𞤢𞥄𞤱𞤮𞥅𞤪𞤫. 𞤑𞤮 𞤱𞤢𞤲𞤮 𞤲𞤭𞥅 𞤳𞤢𞤣𞤭⹁ 𞤆𞤮𞤤 𞤃𞤵𞥅𞤧𞤢𞥄 𞤔𞤢𞥄𞤱𞤢𞤪𞤢⹁ 𞤻𞤢𞥄𞤱𞤢𞤲𞤮⹁ 𞤮 𞤸𞤢𞤨𞥆𞤢𞤲𞤢𞥄 𞤧𞤮𞤳𞤫𞥅𞤣𞤫 𞤣𞤵𞥅𞤩𞤭 𞤶𞤮𞤱𞤭 𞤧𞤢𞤦𞤵 𞤱𞤵𞤶𞥆𞤵𞤺𞤮𞤤 𞤳𞤮 𞤩𞤢𞤣𞤭𞥅 𞤣𞤵𞤶𞤵𞤲𞤫 (𞤥𞤭𞤤𞤭𞤴𞤢𞤪) 𞤷𞤢𞤨𞥆𞤢𞤲𞤯𞤫 𞥔𞥐 𞤊𞤢𞤪𞤢𞤲 𞤥𞤢𞤤𞥆𞤢 𞤣𞤵𞤦𞤵𞤲𞤫 𞤲𞤢𞤴𞤭 𞤁𞤢𞤤𞤢⹁ 𞤸𞤢𞤴 𞤤𞤫𞤦𞥆𞤭 𞤼𞤢𞤼𞤭 𞤮 𞤼𞤭𞤥𞥆𞤭𞤲𞤢𞥄𞤤𞤭 𞤳𞤢 𞤶𞤮𞥅𞤳𞤪𞤫⹁ 𞤸𞤢𞤪𞤭 𞤮 𞤢𞤷𞥆𞤭𞤼𞤢𞥄𞤥𞤢.