𞤑𞤀𞤚𞤀𞤈 𞥒𞥐𞥒𞥒⹁ 𞤙𞤀𞤂𞥆𞤀𞤂 𞤔𞤌𞤏𞤀𞤇𞤀𞤂 𞤐𞤘𞤀𞤂

𞤘𞤭𞤤𞤢 𞤲𞤺𞤢𞤤 𞤊𞤮𞥅𞤤𞤮𞤼𞤭𞤪𞤢𞤤 𞤢𞤣𞤵𞤲𞤢𞤴𞤳𞤮𞤱𞤢𞤤 𞤫 𞤤𞤢𞤼𞤮 𞤥𞤵𞤤𞥆𞤫𞤪𞤫 𞤬𞤵𞤯𞥆𞤭⹁ 𞤸𞤢𞤪𞤭 𞤳𞤵𞥅𞤤𞤫 𞤼𞤮𞤩𞤭𞤪𞤢𞥄𞤤𞤭 𞤱𞤢𞤲𞤮 𞤯𞤫 𞤼𞤮𞤩𞤭𞤪𞤭 𞤸𞤢𞤳𞥆𞤵𞤲’𞤣𞤫 𞤉𞤧𞤨𞤢𞤻 𞤫 𞤑𞤮𞤧𞤼𞤢 𞤈𞤭𞤳𞤢. 𞤅𞤢𞤦𞤵𞤲𞤢 𞤉𞤧𞤨𞤢𞤻 𞤪𞤵𞤳𞤵𞤲𞤮 𞤑𞤮𞤧𞤼𞤢 𞤈𞤭𞤳𞤢 𞤸𞤢𞤲𞤳𞤭 𞤳𞤭𞥅𞤳𞤭𞥅𞤯𞤫⹁ 𞤨𞤭𞤴𞤭 𞤩𞤫 𞤨𞤭𞤺𞥆𞤢𞤤 𞤧𞤵𞤥𞤦𞤢𞤤𞤢⹁ 𞤨𞤭𞤴𞤢 𞤶𞤵𞤲𞥆𞤭𞤼𞤢. 𞤑𞤮 𞤳𞤵𞥅𞤤𞤫 𞥗 𞤩𞤫 𞤨𞤭𞤴𞤭𞤪𞤭 𞤩𞤫⹁ 𞤢 𞤱𞤭𞤴𞤢𞤴 𞤑𞤮𞤧𞤼𞤢 𞤈𞤭𞤳𞤢 𞤳𞤢𞤲 𞤳𞤮 𞤸𞤢𞤴𞤤𞤢𞤺𞤮𞤤 𞤢𞤪𞤭𞤪𞤢𞤲𞤭 𞤑𞤢𞤼𞤢𞤪.

𞤀𞤱𞤢 𞤸𞤢𞤲𞤣𞤫 𞤳𞤢𞤣𞤭 𞤳𞤮 𞤬𞤮𞤼𞤭 𞤲𞤮 𞤸𞤢𞤦𞥆𞤢𞤲𞤮𞥅 𞤑𞤢𞤼𞤢𞤪 𞤧𞤢𞤦𞤵𞤲𞤢 𞤤𞤫𞤴𞤯𞤫 𞤀𞤬𞤪𞤭𞤳 𞤯𞤭𞤯𞤭 𞤲𞤮 𞤧𞤢𞥄𞤼𞤭𞤲𞤢𞤲𞤮𞥅.

𞤑𞤮 𞤑𞤢𞤥𞤫𞤪𞤵𞤲 𞤢𞤣𞤭𞥅 𞤬𞤭𞤶𞤵𞤣𞤫. 𞤇𞤫 𞤬𞤮𞤼𞥆𞤭 𞤫 𞤅𞤵𞤱𞤭𞤧. 𞤇𞤫𞤲 𞤨𞤭𞤴𞤭𞤪𞤭 𞤩𞤫 𞤳𞤵𞥅𞤤𞤢𞤤 𞤺𞤮𞥅𞤼𞤢𞤤 𞤨𞤫𞤼 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥔𞥘𞥋. 𞤑𞤮 𞤄𞤪𞤫𞤤 𞤉𞤥𞤦𞤮𞤤𞤮 𞤱𞤮𞤲𞤭 𞤳𞤮 𞤲𞤢𞥄𞤣𞤢𞤲𞤭 𞤩𞤫 𞤳𞤵𞥅𞤤𞤢𞤤 𞤲𞤺𞤢𞤤⹁ 𞤫 𞤸𞤭𞤲𞤤𞤫 𞤮𞤲 𞤳𞤮 𞤶𞤭𞤦𞤭𞤲𞤢𞤲𞤣𞤫 𞤤𞤫𞤴𞤣𞤭 𞤑𞤢𞤥𞤫𞤪𞤵𞤲 𞤳𞤮𞤲𞤮 𞤳𞤮 𞤳𞤭𞤨𞥆𞤮𞤤 𞤅𞤵𞤱𞤭𞤧 𞤲𞤺𞤮𞤤 𞤮 𞤱𞤮𞤲𞤭 𞤬𞤭𞤶𞤢𞤲𞤣𞤫. 𞤏𞤵𞤪𞤭𞤲 𞤲𞤫𞥅𞤩𞤭𞤪𞤢𞥄𞤤𞤭 𞤲𞤮𞤲 𞤬𞤮𞤼𞤢 𞤺𞤭𞤤𞤢 𞤮 𞤱𞤮𞤲𞤼𞤭 𞤅𞤵𞤱𞤭𞤧𞤢𞥄𞤶𞤮. 𞤑𞤮 𞤫 𞤄𞤮𞤱𞤼𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥔 𞤮 𞤸𞤫𞤩𞤭 𞤳𞤢𞤴𞤣𞤭 𞤅𞤵𞤱𞤭𞤧 𞤲𞤣𞤭𞤲.

𞤇𞤢𞥄𞤱𞤼𞤭 𞤲𞤺𞤮𞤲 𞤬𞤭𞤶𞤮 𞤯𞤮𞤲⹁ 𞤳𞤮 𞤓𞤪𞤵𞤺𞤵𞤱𞤢𞤴 𞤫 𞤑𞤮𞥅𞤪𞤫 𞤻𞤢𞤥𞤲𞤢𞥄𞤪𞤭 𞤬𞤮𞤼𞥆𞤭. 𞤇𞤫 𞤧𞤫𞥅𞤣𞤭 𞤸𞤮𞥅𞤪𞤫 𞤩𞤮𞤤𞤢𞤤 𞤢 𞤱𞤭𞤴𞤢𞤴 𞤳𞤮 𞤩𞤫 𞤺𞤮𞤪𞤫𞥅. 𞤖𞤢𞤴 𞤺𞤮𞥅𞤼𞤮 𞤫 𞤥𞤢𞤩𞥆𞤫 𞤲𞤢𞥄𞤣𞤢𞥄𞤲𞤮 𞤳𞤵𞥅𞤤𞤢𞤤.

𞤖𞤭𞤳𞥆𞤭𞤼𞤭𞥅 𞤯𞤮𞤲⹁ 𞤆𞤮𞤪𞤼𞤭𞤺𞤢𞤤⹁ 𞤳𞤭𞤨𞥆𞤮𞤤 𞤈𞤮𞤲𞤢𞤤𞤣𞤮 𞤲𞤺𞤮𞤤⹁ 𞤬𞤮𞤼𞥆𞤵𞤲𞤮 𞤫 𞤘𞤢𞤲𞤢⹁ 𞤳𞤭𞤨𞥆𞤮𞤤 𞤀𞤲𞤣𞤪𞤫 𞤀𞤴𞤵 𞤲𞤺𞤮𞤤. 𞤘𞤢𞤲𞤢 𞤬𞤮𞥅𞤤𞤭𞤪𞤢𞥄 𞤳𞤵𞥅𞤤𞤫 𞤼𞤢𞤼𞤭 𞤬𞤭𞥅 𞤳𞤢𞤤𞤢 𞤩𞤫 𞤱𞤵𞤪𞤼𞤵𞤲𞤮 𞤯𞤫 𞤯𞤭𞤯𞤭. 𞤑𞤮 𞤈𞤮𞤲𞤢𞤤𞤣𞤮 𞤢𞤼𞤭𞥅 𞤲𞤢𞥄𞤣𞤵𞤣𞤫 𞤳𞤵𞥅𞤤𞤢𞤤 𞤦𞤢𞤯𞤼𞤢𞤲𞤫 𞤤𞤢𞤼𞤫𞤪𞤫 𞤲𞤣𞤫 𞤮 𞤸𞤫𞤩𞤭 𞤩𞤢𞥄𞤱𞤮 𞤮 𞤤𞤭𞤩𞤫𞥅𞤣𞤫 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥖𞥔. 𞤑𞤮𞤲𞤤 𞤖𞤢𞤴 𞤼𞤭𞤥𞥆𞤢𞥄𞤲𞤮 𞤸𞤮𞤶𞤮𞤥𞤢𞥄𞤶𞤫 𞥑𞥐⹁ 𞤼𞤢𞤱𞤭 𞤀𞤴𞤵 𞤱𞤵𞤪𞤼𞤭𞥅 𞤳𞤵𞥅𞤤𞤢𞤤 𞤲𞤺𞤢𞤤. 𞤑𞤮𞤲𞤮 𞤲𞤣𞤫 𞤫𞤤𞤼𞤮𞥅𞤱𞤮 𞤮𞤲 𞤴𞤢𞤤𞤼𞤭𞤲𞥆𞤮𞥅 𞤀𞤴𞤵⹁ 𞤆𞤮𞤪𞤼𞤭𞤺𞤢𞤤 𞤩𞤫𞤴𞤣𞤭 𞤳𞤵𞥅𞤤𞤫 𞤯𞤭𞤯𞤭 𞤫 𞤲𞤣𞤫𞤪 𞤸𞤮𞤶𞤮𞤥𞤢𞥄𞤶𞤫 𞤶𞤮𞤱𞤭. 𞤘𞤢𞤲𞤢 𞤱𞤢𞥄𞤱𞤵𞤲𞤮 𞤱𞤵𞤪𞤼𞤵𞤣𞤫 𞤺𞤮𞥅𞤼𞤢𞤤 𞤳𞤢 𞤬𞤭𞤶𞤮 𞤲𞤺𞤮𞤲 𞤸𞤮𞤥𞤦𞤢𞤼𞤢 𞤯𞤮𞤲.

𞤘𞤭𞤦𞤭 𞤲𞤺𞤢𞤤 𞤬𞤮𞥅𞤤𞤮𞤼𞤭𞤪𞤢𞤤 𞤬𞤵𞤯𞥆𞤭⹁ 𞤳𞤮 𞤸𞤢𞤲𞤣𞤫 𞤸𞤫𞤩𞤭𞥅 𞤳𞤭𞤨𞥆𞤮𞤤 𞤀𞤬𞤪𞤭𞤳 𞤲𞤢𞥄𞤣𞤵𞤲’𞤺𞤮𞤤 𞤳𞤵𞥅𞤤𞤫. 𞤑𞤮 𞤘𞤢𞤲𞤢 𞤳𞤢𞤣𞤭 𞤩𞤵𞤪𞤭 𞤬𞤭𞤶𞤵𞤣𞤫 𞤲𞤮 𞤳𞤫𞤤𞤯𞤭𞤪𞤭. 𞤑𞤮𞤲𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤳𞤮 𞤦𞤮𞤼𞤫 𞤯𞤫𞤲 𞤲𞤣𞤢𞥄𞤪𞤫𞤼𞤫𞥅⹁ 𞤳𞤮 𞤘𞤢𞤲𞤢 𞤱𞤮𞤲𞤭 𞤤𞤫𞤴 𞤸𞤢𞥄𞤼𞤭𞤥𞤫𞤪𞤫 𞤣𞤫𞤲𞤼𞤢𞤤 𞤥𞤢𞤩𞥆𞤫 𞤲𞤺𞤢𞤤.

𞤔𞤮𞥅𞤲𞤭 𞤳𞤮 𞤄𞤪𞤢𞤧𞤭𞤤 𞤫 𞤅𞤫𞤪𞤦𞤭𞤴𞤢 𞤸𞤫𞤣𞥆𞤭𞥅 𞤬𞤭𞥅 𞤸𞤮𞤥𞤦𞤵𞤺𞤮𞤤 𞤻𞤢𞤤𞥆𞤢𞤤 𞤲𞤺𞤢𞤤. 𞤄𞤪𞤢𞤧𞤭𞤤 𞤲𞤮 𞤼𞤢𞤱𞤢𞥄 𞤫 𞤶𞤮𞤱𞤼𞤢𞥄𞤩𞤫 𞤩𞤫𞤲 𞤫 𞤰𞤫𞤼𞥆𞤵𞤺𞤮𞤤 𞤬𞤫𞤤𞤺𞤮 𞤢𞤣𞤵𞤲𞤢𞤴𞤢𞤲𞤳𞤮𞤱𞤮 𞤲𞤺𞤮𞤲 𞤸𞤭𞤳𞥆𞤢.

𞤙𞤮𞤺𞥆𞤢𞤲𞤣𞤫 𞤀𞤴𞥃𞤢 𞤅𞤮𞥅. 𞤋𞤥𞥆𞤭𞤲𞤢𞥄𞤯𞤮 𞤫 𞤭𞤲𞤣𞤫 𞤤𞤮𞤱𞤪𞤫 𞤚𞤢𞤦𞤢𞤤𞤣𞤫 𞤲𞤣𞤫𞤲 𞤬𞤭𞥅 𞤸𞤵𞤥𞤨𞤭𞤼𞤵𞤺𞤮𞤤 𞤮𞤲 𞤳𞤮 𞤱𞤮𞤲𞤭 𞤫 𞤬𞤫𞤰𞥆𞤵𞤣𞤫 𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤑𞤢𞤼𞤢𞤪