𞤒𞤉𞤏𞤚𞤉𞤈𞤉 𞤃𞤀𞤈𞤚𞤉𞤐 𞤂𞤓𞤚𞤉𞥅𞤈 𞤑𞤋𞤐𞤘

𞤙𞤢𞤤𞤲𞤣𞤫 𞥒𞥘 𞤔𞤵𞤳𞤮 𞥑𞥙𞥖𞥓⹁ 𞤃𞤢𞤪𞤼𞤫𞤲 𞤂𞤵𞤼𞤫𞥅𞤪 𞤑𞤭𞤲𞤺 𞤱𞤢𞤯𞤵𞤲𞤮𞥅 𞤴𞤫𞤱𞤼𞤫𞤪𞤫 𞤲𞤣𞤫 𞤴𞤫𞤱𞤢𞤼𞤢𞥄 𞤨𞤮𞥅𞤥𞤢𞥄 𞤤𞤮𞤤𞥆𞤭𞤲𞤣𞤫 𞤥𞤮  𞤳𞤢 𞤤𞤫𞤴𞤣𞤭 𞤱𞤢𞤯𞤭 𞤥𞤮 𞤸𞤢𞥄𞤤𞤫𞤼𞤫𞥅𞤯𞤮 𞤬𞤭𞥅 𞤥𞤵𞤲 𞤨𞤮𞥅𞤥𞤢. 

𞤐𞤣𞤫𞥅 𞤴𞤫𞤱𞤼𞤫𞤪𞤫 𞤱𞤢𞤯𞤭 𞤫 𞤦𞤢𞤯𞤼𞤢𞤲𞤫 𞤧𞤫𞤨𞥆𞤮 𞤬𞤭𞥅 𞤩𞤢𞤲𞤺𞤭𞤲𞤺𞤮𞤤 𞤼𞤢𞤥𞤨𞤫𞤪𞤫 𞤲𞤣𞤫 𞤩𞤫𞤤𞤫𞥅𞤩𞤫 𞤩𞤫𞤲 𞤱𞤮𞤲𞤢𞤲𞤮𞥅 𞤬𞤢𞤱𞤫𞥅𞤣𞤫: 𞤱𞤭𞤳𞥆𞤫𞥅𞤲𞤣𞤫⹁ 𞤦𞤵𞤺𞤭𞤼𞤫𞥅𞤣𞤫⹁ 𞤨𞤭𞤴𞤫𞥅𞤣𞤫⹁ 𞤧𞤮𞤳𞤫𞥅𞤣𞤫⹁ 𞤢𞤴𞤦𞤭𞤲𞤫𞥅𞤣𞤫⹁ 𞤭𞤻𞥆𞤭𞤲𞤫𞥅𞤣𞤫⹁ 𞤫𞤳𞤲𞤯. 𞤑𞤮 𞤳𞤢 𞤤𞤢𞥄𞤥𞤮𞤪𞤣𞤫 𞤏𞤢𞥃𞤭𞤲𞤺𞤼𞤮𞤲 𞤮 𞤱𞤢𞤯𞤭 𞤲𞤣𞤫𞥅 𞤴𞤫𞤱𞤼𞤫𞤪𞤫 𞤴𞤫𞥅𞤧𞤮 𞤵𞤶𞤵𞤲𞤫 𞤼𞤫𞥅𞤥𞤫𞤯𞥆𞤫 𞤼𞤢𞤼𞤮 𞤴𞤭𞤥𞤩𞤫. 

𞤒𞤫𞤱𞤼𞤫𞤪𞤫 𞤥𞤢𞤪𞤼𞤫𞤲 𞤤𞤵𞤼𞤫𞥅𞤪 𞤳𞤭𞤲𞤺

𞤃𞤭𞤯𞤮 𞤥𞤢𞤪𞤭 𞤳𞤮𞤴𞤯𞤮𞤤

 𞤃𞤭𞤯𞤮 𞤱𞤫𞤤𞤼𞤮𞤪𞤭 𞤼𞤢𞤱𞤣𞤫𞥅𞤣𞤫 𞤫 𞤥𞤮𞤲 𞤸𞤢𞤲𞤣𞤫⹁ 𞤫 𞤲𞤺𞤢𞤤 𞤥𞤮𞥅𞤩𞤼𞤮𞤲𞤣𞤭𞤪𞤢𞤤 𞤬𞤭𞥅 𞤲𞤣𞤭𞤥𞤢𞥄𞤺𞤵⹁ 𞤲𞤺𞤢𞤤 𞤥𞤢𞤱𞤲𞤵𞤺𞤮𞤤 𞤥𞤵𞤲 𞤤𞤵𞤼𞥆𞤫𞤼𞤫𞥅 𞤬𞤭𞤤𞥆𞤫𞥅𞤣𞤫  𞤫 𞤨𞤫𞤰𞥆𞤮𞤤 𞤲𞤣𞤭𞥅 𞤤𞤫𞤴𞤣𞤭 𞤥𞤫𞤲.

𞤁𞤵𞥅𞤩𞤭 𞤼𞤫𞥅𞤥𞤫𞤣𞤫𞤪𞤫 𞤩𞤢𞥄𞤱𞤮 𞤸𞤢𞤲𞤣𞤫⹁ 𞤢𞤥𞤫𞤪𞤭𞤳𞤢𞤲𞤢𞥄𞤶𞤮 𞤼𞤫𞤣𞥆𞤵𞤯𞤮⹁ 𞤥𞤮 𞤤𞤫𞤴 𞤯𞤮𞤱𞤣𞤭 𞤥𞤵𞤲 𞤫𞤯𞤫𞤲 𞤣𞤢𞤪𞤭𞥅 𞤸𞤢𞤲𞤣𞤫⹁ 𞤥𞤢𞥄𞤲𞤣𞤭𞤲𞥆𞤮 “𞤩𞤢𞤲𞤺𞤭𞤲𞤮𞤤[1] 𞤬𞤭𞥅 𞤲𞤣𞤭𞤥𞤢𞥄𞤺𞤵”. 𞤐𞤣𞤫𞥅 𞤸𞤮𞤣𞥆𞤭𞤪𞤮𞥅𞤪𞤫 𞤥𞤢𞤱𞤲𞤣𞤫 𞤲𞤣𞤫 𞤮 𞤥𞤢𞥄𞤲𞤣𞤭𞤲𞤭⹁ 𞤤𞤢𞥄𞤼𞤭𞥅 𞤨𞤭𞤼𞤭𞤤𞥆𞤮𞤤 𞤼𞤢𞤥𞤰𞤭𞤲𞤢𞥄𞤪𞤫 𞤱𞤮𞤲𞤢𞤲𞤣𞤫 𞤣𞤵𞤶𞤵𞤲𞤫 𞤩𞤢𞤤𞤫𞥅𞤩𞤫 𞤥𞤢𞤷𞥆𞤭𞤲𞤢𞤲𞤮𞥅𞤩𞤫⹁ 𞤱𞤮𞤲𞤢𞤲𞤮𞥅𞤩𞤫 𞤳𞤢𞤣𞤭 𞤧𞤵𞤥𞤲𞤭𞤪𞤫𞥅𞤣𞤫 𞤴𞤭𞥅𞤼𞤫 𞤼𞤮𞥅𞤻𞤫.  𞤐𞤣𞤫𞥅 𞤸𞤮𞤣𞥆𞤭𞤪𞤮𞥅𞤪𞤫 𞤬𞤫𞥅𞤻𞤭𞤪𞤭 𞤱𞤢 𞤱𞤫𞥅𞤲𞤣𞤮𞥅𞤺𞤮 𞤩𞤢𞥄𞤱𞤮 𞤶𞤫𞤥𞥆𞤢𞥄𞤪𞤫 𞤳𞤵𞤪𞤳𞤢𞥄𞤺𞤵 𞤶𞤵𞥅𞤼𞤵𞤲𞤣𞤫.

 𞤑𞤮𞤲𞤮 𞤣𞤵𞥅𞤩𞤭 𞥐𞥐𞥑 𞤩𞤢𞥄𞤱𞤼𞤭 𞤯𞤵𞤥⹁ 𞤸𞤢𞥄 𞤶𞤮𞥅𞤲𞤭 𞤩𞤢𞤤𞤫𞥅𞤶𞤮 𞤸𞤫𞤩𞤼𞤢𞥄𞤳𞤭. 𞤁𞤵𞥅𞤩𞤭 𞥐𞥐𞥑 𞤷𞤢𞤺𞥆𞤢𞤤 𞤯𞤵𞤥⹁ 𞤸𞤢𞥄 𞤶𞤮𞥅𞤲𞤭 𞤲𞤺𞤵𞥅𞤪𞤣𞤢𞤥 𞤩𞤢𞤤𞤫𞥅𞤶𞤮 𞤲𞤮 𞤶𞤵𞤳𞥆𞤭𞤲𞤭𞤪𞤫𞥅𞤣𞤫 𞤷𞤢𞤤𞥆𞤭 𞤦𞤵𞤺𞤭𞤼𞤫𞥅𞤣𞤫 𞤫 𞤶𞤮𞤤𞤮𞤳𞤮𞥅𞤶𞤫 𞤱𞤭𞤳𞥆𞤫𞥅𞤣𞤫⹁ 𞤁𞤵𞥅𞤩𞤭 𞤼𞤫𞥅𞤥𞤫𞤣𞤫𞤪𞤫 𞤩𞤢𞥄𞤱𞤮 𞤯𞤵𞤲⹁ 𞤩𞤢𞤤𞤫𞥅𞤶𞤮 𞤲𞤮 𞤱𞤵𞥅𞤪𞤭 𞤫 𞤣𞤵𞥅𞤲𞤣𞤫𞥅𞤪𞤫 𞤦𞤢𞥄𞤧𞤢𞤤 𞤱𞤫𞤣𞥆𞤭𞥅𞤲𞤣𞤫 𞤫 𞤼𞤵𞤥𞤦𞤮 𞤥𞤢𞥄𞤴𞤮 𞤲𞤺𞤢𞤤𞤵 𞤴𞤢𞥄𞤶𞤵𞤲’𞤺𞤮⁏ 𞤁𞤵𞥅𞤩𞤭 𞥐𞥐𞥑 𞤬𞤫𞤰𞥆𞤭𞥅⹁ 𞤸𞤢𞤲 𞤶𞤮𞥅𞤲𞤭 𞤩𞤢𞤤𞤫𞥅𞤶𞤮 𞤮𞤲 𞤲𞤮 𞤤𞤫𞤼𞥆𞤮𞥅 𞤫 𞤲𞤣𞤫𞤪 𞤷𞤮𞤳𞥆𞤫 𞤱𞤮𞤲𞤣𞤭𞥅𞤺𞤵 𞤢𞤥𞤫𞤪𞤭𞤳𞤢⹁ 𞤮𞤥𞤮 𞤱𞤮𞤲𞤼𞤭 𞤳𞤮𞤯𞤮 𞤫 𞤲𞤣𞤫𞤪 𞤤𞤫𞤴𞤣𞤭 𞤥𞤢𞤳𞥆𞤮.

 𞤀𞤱𞤢⹁ 𞤫𞤲 𞤢𞤪𞤭𞥅 𞤯𞤮𞤮 𞤸𞤢𞤲𞤣𞤫 𞤬𞤭𞥅 𞤴𞤫𞥅𞤩𞤵𞤼𞤵𞤺𞤮𞤤 𞤬𞤫𞤱𞤲𞤣𞤢𞥄𞤪𞤫 𞤸𞤫𞤪𞤧𞤭𞤲𞤭𞥅𞤲𞤣𞤫. 𞤉 𞤥𞤢𞥄𞤲𞤢𞥄⹁ 𞤫𞤲 𞤢𞤪𞤭𞥅 𞤳𞤢 𞤤𞤢𞥄𞤥𞤮𞤪𞤣𞤫 𞤺𞤫𞤲𞤣𞤭 𞤥𞤫𞤲 𞤯𞤮𞤮⹁ 𞤰𞤢𞤥𞤼𞤵𞤺𞤮𞤤 𞤳𞤢𞥄𞤤𞤭𞤧𞤭𞥅𞤶𞤭 𞤥𞤫𞤲 𞤤𞤢𞥄𞤩𞤵𞤯𞤭. 𞤐𞤣𞤫 𞤧𞤭𞤲𞤷𞤵𞤩𞤫 𞤺𞤫𞤲𞤣𞤭 𞤥𞤫𞤲 𞤲𞤣𞤭𞤲 𞤱𞤭𞤲𞤣𞤵𞤲𞤮𞥅 𞤳𞤮𞤲𞤺𞤵𞤯𞤭 𞤣𞤮𞤧𞤼𞤫𞤪𞤫 𞤥𞤫𞤲 𞤤𞤢𞤦𞤢𞥄𞤯𞤭⹁ 𞤳𞤢𞤻𞤵𞤲 𞤫 𞤫𞤱𞤲𞤢𞥄𞤲𞤣𞤵 𞤬𞤭𞥅 𞤶𞤫𞤴𞤼𞤢𞥄𞤪𞤫⹁ 𞤯𞤵𞤥 𞤤𞤢𞥄𞤼𞤭𞥅 𞤧𞤫𞥅𞤳𞤮𞤤 𞤬𞤮𞤣𞤮𞥅𞤪𞤫 𞤲𞤶𞤮𞤩𞤣𞤭 𞤲𞤣𞤭 𞤢𞤥𞤫𞤪𞤭𞤳𞤢𞤲𞤢𞥄𞤶𞤮 𞤳𞤢𞤤𞤢 𞤸𞤢𞥄𞤲𞤭 𞤪𞤮𞤲𞤵𞤣𞤫. 𞤐𞤺𞤮𞤤 𞤧𞤫𞥅𞤳𞤮𞤤⹁ 𞤳𞤮 𞤬𞤮𞤣𞤮𞥅𞤪𞤫 𞤱𞤮𞤲𞤣𞤫𞤥𞤢 𞤴𞤭𞤥𞤩𞤫 𞤩𞤫𞤲 𞤬𞤮𞤱⹁𞤸𞤭𞥅𞤸𞤭⹁ 𞤱𞤮𞤲𞤭 𞤩𞤢𞤤𞤫𞥅𞤩𞤫 𞤥𞤢𞤤𞥆𞤢 𞤪𞤢𞤲𞤫𞥅𞤩𞤫⹁ 𞤲𞤮 𞤼𞤢𞤦𞤭𞤲𞤼𞤭𞤲𞤢𞤲𞤢𞥄 𞤼𞤭𞥅𞤤𞥆𞤭 𞤢𞤧𞤬𞤭𞤪𞤼𞤮𞤼𞤮𞥅𞤯𞤭 𞤲𞤺𞤵𞥅𞤪𞤣𞤢𞤥⹁ 𞤫 𞤲𞤣𞤭𞤥𞤵⹁  𞤫 𞤯𞤢𞤩𞥆𞤫𞤪𞤫 𞤦𞤫𞤤𞤫𞥅𞤯𞤫 𞤥𞤵𞤲.

 𞤇𞤢𞤲𞤺𞤢𞤲𞤭𞥅 𞤫𞤲 𞤸𞤢𞤲𞤣𞤫⹁ 𞤱𞤮𞤲𞤣𞤫𞤥𞤢 𞤀𞤥𞤫𞤪𞤭𞤳𞤢 𞤼𞤮𞤼𞥆𞤢𞥄𞤤𞤭 𞤬𞤮𞤣𞤮𞥅𞤪𞤫 𞤥𞤵𞤲 𞤲𞤣𞤫𞤲 𞤦𞤢𞤽𞥆𞤫 𞤺𞤫𞤲𞤣𞤭𞤴𞤢𞤲𞤳𞤮𞥅𞤩𞤫 𞤢𞤧-𞤪𞤢𞤲𞤫𞥅𞤩𞤫 𞤩𞤫𞤲. 𞤍𞤮𞥅 𞤴𞤮 𞤲𞤣𞤭 𞤸𞤵𞥅𞤩𞤲𞤵 𞤲𞤣𞤫𞥅 𞤬𞤮𞤣𞤮𞥅𞤪𞤫 𞤸𞤮𞤪𞤥𞤭𞥅𞤲𞤣𞤫⹁ 𞤀𞤥𞤫𞤪𞤭𞤳𞤢 𞤴𞤫𞤯𞤭 𞤩𞤢𞤤𞤫𞥅𞤩𞤫 𞤩𞤫𞤲 𞤧𞤫𞥅𞤳𞤮𞤤 𞤩𞤮𞤤𞤮𞤤⹁ 𞤧𞤫𞥅𞤳𞤮𞤤 𞤱𞤵𞤪𞤼𞤢𞥄𞤲𞤺𞤮𞤤 𞤲𞤮 𞤱𞤭𞤲𞤣𞤭𞥅 𞤫 𞤥𞤵𞤲 “𞤳𞤢𞥄𞤤𞤭𞤧𞤭 𞤤𞤫𞤤𞥆𞤭𞥅”

 𞤑𞤮𞤲𞤮 𞤫𞤲 𞤧𞤢𞤤𞤭⹁ 𞤫𞤲 𞤺𞤮𞤥𞤯𞤭𞤲𞤼𞤢𞥄 𞤱𞤮𞤲𞤣𞤫𞤥𞤢 𞤥𞤢𞤲𞤳𞤭𞤪𞤺𞤢𞤤 𞤲𞤵𞤲𞤯𞤢𞤤 𞤲𞤺𞤢𞤤 𞤴𞤫𞤱𞤭𞥅[2]. 𞤉𞤲 𞤧𞤢𞤤𞤭⹁ 𞤫𞤲 𞤺𞤮𞤥𞤯𞤭𞤲𞤼𞤢𞥄 𞤱𞤮𞤲𞤣𞤫𞤥𞤢 𞤶𞤢𞤱𞤣𞤭 𞤤𞤫𞤤𞥆𞤭𞥅 𞤫 𞤥𞤢𞤪𞤺𞤢 𞤣𞤢𞥄𞤥𞤢 𞤲𞤺𞤮𞥅 𞤪𞤫𞤲𞤣𞤮. 𞤀𞤱𞤢 𞤫𞤲 𞤢𞤪𞤭𞥅 𞤬𞤭𞥅 𞤱𞤢𞤯𞤼𞤵𞤺𞤮𞤤 𞤲𞤺𞤮𞤤 𞤧𞤫𞥅𞤳𞤮𞤤 𞤳𞤢𞥄𞤤𞤭𞤧𞤭 𞤤𞤢𞥄𞤩𞤵𞤯𞤭.𞤖𞤢𞤪𞤢 𞤳𞤢𞤣𞤭⹁ 𞤧𞤢𞥄𞤭 𞤳𞤢𞤤𞤢 𞤲𞤣𞤫 𞤤𞤢𞤲𞤣𞤭𞤯𞤫𞤲⹁ 𞤧𞤫𞥅𞤳𞤮𞤤 𞤲𞤺𞤮𞤤 𞤸𞤫𞤲𞤣𞤭𞤲𞤢𞤴 𞤫𞤲 𞤲𞤺𞤢𞤤𞤵𞥅𞤶𞤭 𞤲𞤣𞤭𞤥𞤢𞥄𞤺𞤵 𞤫 𞤳𞤭𞤧𞤭𞤴𞤫𞥅 𞤲𞤵𞤲𞤯𞤢𞤤.

 𞤉𞤲 𞤢𞤪𞤭𞥅 𞤳𞤢𞤣𞤭 𞤫 𞤲𞤣𞤫𞥅 𞤲𞤮𞤳𞥆𞤵𞥅𞤪𞤫 𞤸𞤮𞤱𞤲𞤭𞥅𞤲𞤣𞤫⹁ 𞤢𞤲𞤣𞤭𞤲𞤼𞤭𞤲𞤺𞤮𞤤 𞤀𞤥𞤫𞤪𞤭𞤳𞤢 𞤸𞤭𞤥𞥆𞤵𞤯𞤭 𞤬𞤫𞤱𞤲𞤣𞤭𞥅𞤯𞤭. 𞤔𞤮𞥅𞤲𞤭 𞤱𞤮𞤲𞤢𞥄 𞤬𞤫𞤱𞤲𞤣𞤮 𞤸𞤢𞥄𞤶𞤭𞤼𞤮𞤪𞤺𞤮𞤤 𞤬𞤮𞤱𞤼𞤢𞥄𞤪𞤫 𞤥𞤢𞥄 𞤰𞤫𞤼𞥆𞤵𞤺𞤮𞤤 𞤤𞤫𞤳𞥆𞤭 𞤯𞤢𞥄𞤼𞤭𞤲𞤭𞤪𞤳𞤭.

𞤔𞤮𞥅𞤲𞤭 𞤳𞤮 𞤬𞤫𞤱𞤲𞤣𞤮 𞤺𞤮𞥅𞤲𞤺𞤭𞤲𞤺𞤮𞤤 𞤬𞤮𞥅𞤣𞤮𞥅𞤶𞤫 𞤣𞤫𞤥𞤮𞤳𞤢𞤪𞤢𞥄𞤳𞤵 𞤯𞤫𞤲⁏ 𞤶𞤮𞥅𞤲𞤭 𞤳𞤮 𞤬𞤫𞤱𞤲𞤣𞤮 𞤭𞤱𞤵𞤺𞤮𞤤 𞤫 𞤲𞤣𞤫𞥅 𞤢𞤴𞤲𞤣𞤫 𞤱𞤭𞤳𞥆𞤮𞤲𞥋𞤣𞤭𞤪𞤢𞤤 𞤲𞤭𞤩𞥆𞤵𞤼𞤵𞤲𞥋𞤣𞤫 𞤫 𞤩𞤮𞤤𞤯𞤵𞤲𞥋𞤣𞤫 𞤴𞤢𞤤𞤼𞤢 𞤫 𞤲𞤺𞤮𞤤 𞤤𞤢𞥄𞤱𞤮𞤤 𞤲𞤵𞤲𞤯𞤢𞤤 𞤸𞤢𞤳𞥆𞤵𞤲𞥋𞤣𞤫 𞤤𞤫𞤰𞥆𞤭[3] 𞤔𞤢𞤤𞤦𞤵𞤲’𞤺𞤮𞤤⹁ 𞤶𞤮𞥅𞤲𞤭 𞤳𞤮 𞤬𞤫𞤱𞤲𞤣𞤮 𞤼𞤮𞥅𞤱𞤲𞤵𞤺𞤮𞤤 𞤪𞤫𞤲𞤣𞤮 𞤥𞤫𞤲 𞤲𞤺𞤮𞤲 𞤭𞤼𞥆𞤢 𞤲𞤺𞤮 𞤫 𞤲𞤣𞤭𞥅 𞤲𞤵𞤬𞤪𞤭 𞤼𞤮𞥅𞤻𞤭𞤪𞤺𞤮𞤤 𞤤𞤫𞤰𞥆𞤭  𞤲𞤢𞤩𞤢 𞤲𞤺𞤮 𞤸𞤮𞥅𞤪𞤫 𞤬𞤫𞤼𞤫𞤪𞤫 𞤥𞤵𞤧𞤭𞤣𞤯𞤢𞥄𞤳𞤵⁏ 𞤶𞤮𞥅𞤲𞤭 𞤳𞤮 𞤬𞤫𞤱𞤲𞤣𞤮 𞤼𞤢𞤦𞤭𞤲𞤼𞤭𞤲𞤺𞤮𞤤 𞤲𞤵𞤲𞤯𞤢𞤤 𞤱𞤮𞤲𞤢𞤲𞤣𞤫 𞤴𞤭𞤥𞤩𞤫 𞤀𞤤𞤤𞤢 𞤩𞤫𞤲 𞤬𞤮𞤨.

 𞤧𞤭 𞤸𞤭𞤥𞥆𞤵𞤺𞤮𞤤 𞤳𞤮𞥅 𞤳𞤮 𞤬𞤫𞤱𞤲𞤣𞤭𞥅 𞤣𞤫𞤪𞤬𞤢𞥄𞤥𞤢⹁ 𞤯𞤵𞤥 𞤳𞤮 𞤸𞤢𞤤𞤳𞤢𞥄𞤪𞤫 𞤱𞤮𞤲𞤢𞤲𞤣𞤫 𞤪𞤫𞤲𞤣𞤮 𞤲𞤺𞤮𞤲.

 𞤑𞤭𞥅 𞤲𞤺𞤵𞤤𞤭 𞤷𞤫𞥅𞤯𞤵 𞤭𞤥𞥆𞤮𞤪𞤳𞤭 𞤫 𞤥𞤫𞤼𞥆𞤫𞥅𞤲𞤣𞤫 𞤇𞤢𞤤𞤫𞥅𞤶𞤮 𞤬𞤫𞤰𞥆𞤢𞤼𞤢𞥄 𞤦𞤭𞤲𞥆𞤢𞤥𞤢𞥄 𞤲𞤣𞤭𞤥𞤵 𞤫 𞤬𞤮𞤼𞤲𞤫𞥅𞤣𞤫 𞤣𞤢𞤦𞥆𞤭𞤲𞤢𞥄𞤤𞤭. 𞥑𞥙𞥖𞥓 𞤱𞤮𞤲𞤢𞥄 𞤸𞤢𞥄𞤯𞤼𞤭𞤪𞤣𞤫⹁ 𞤳𞤮𞤲𞤮 𞤳𞤮 𞤬𞤵𞤯𞥆𞤮𞤪𞤣𞤫. 𞤇𞤫𞥅 𞤥𞤭𞥅𞤶𞤭𞥅𞤩𞤫 𞤱𞤮𞤲𞤣𞤫𞤥𞤢 𞤇𞤢𞤤𞤫𞥅𞤶𞤮 𞤮𞤲 𞤸𞤢𞤼𞤮𞤲𞤶𞤭𞤲 𞤫 𞤴𞤢𞤤𞤼𞤭𞤲𞤺𞤮𞤤 𞤳𞤮 𞤱𞤮𞤲𞤭 𞤫 𞤩𞤫𞤪𞤲𞤣𞤫 𞤥𞤵𞤲⹁ 𞤶𞤮𞥅𞤲𞤭 𞤮 𞤣𞤫𞤰𞥆𞤢𞤴⹁ 𞤲𞤮 𞤧𞤢𞥄𞤼𞤭𞤲𞤭 𞤯𞤫𞤲𞤰𞤭𞤲𞤫𞥅𞤣𞤫 𞤧𞤭 𞤈𞤫𞤲𞤣𞤮 𞤲𞤺𞤮𞤲 𞤴𞤭𞤤𞤼𞤭𞤼𞤭𞤳𞤫 𞤫 𞤥𞤵𞤪𞤢𞥄𞤯𞤭  𞤱𞤮𞥅𞤱𞤵𞤯𞤭 𞤯𞤭𞤲. 𞤊𞤮𞤱𞤼𞤢𞥄𞤪𞤫 𞤱𞤢𞤯𞤢𞤼𞤢𞥄⹁ 𞤱𞤮𞤲𞤢𞥄 𞤤𞤫 𞤳𞤢𞤣𞤭 𞤩𞤵𞥅𞤩𞤼𞤵 𞤫 𞤲𞤣𞤫𞤪 𞤀𞤥𞤫𞤪𞤭𞤳𞤢𞥄 𞤸𞤢𞥄 𞤩𞤢𞤤𞤫𞥅𞤶𞤮 𞤮𞤲 𞤶𞤮𞤺𞤲𞤭𞤼𞤫𞥅 𞤸𞤢𞤳𞥆𞤫𞥅𞤶𞤭 𞤺𞤫𞤲𞤣𞤭𞤴𞤢𞤲𞤳𞤮 𞤥𞤢𞤳𞥆𞤮 𞤯𞤭𞤲. 𞤍𞤭𞥅 𞤳𞤫𞤲𞤭 𞤥𞤵𞤪𞤼𞤢𞤤 𞤶𞤮𞤳𞥆𞤢𞤴 𞤲𞤮 𞤴𞤫𞤰𞤵𞤣𞤫 𞤨𞤮𞤲𞤣𞤮𞥅𞤯𞤫 𞤪𞤫𞤲𞤣𞤮 𞤥𞤫𞤲 𞤲𞤺𞤮𞤲 𞤸𞤢𞥄 𞤻𞤢𞤤𞤲𞤣𞤫 𞤲𞤣𞤢𞤴𞤺𞤵 𞤲𞤵𞤲𞤯𞤢𞤤 𞤧𞤵𞤨𞥆𞤭𞤼𞤭𞥅.

 𞤑𞤮𞤲𞤮 𞤲𞤮 𞤱𞤮𞥅𞤣𞤭 𞤳𞤮 𞤱𞤢𞤯𞥆𞤭𞥅 𞤤𞤢𞤲 𞤸𞤢𞥄𞤤𞤢𞤲𞤺𞤮𞤤 𞤴𞤭𞤥𞤩𞤫 𞤢𞤲 𞤩𞤫𞤲⹁ 𞤣𞤢𞤪𞤭𞥅𞤩𞤫 𞤫 𞤲𞤺𞤮𞤤 𞤩𞤮𞤪𞤲𞤺𞤮𞤤 𞤸𞤭𞤯𞥆𞤵𞤲𞥋𞤺𞤮𞤤 𞤲𞤢𞥄𞤣𞤢𞤴𞤲𞤺𞤮𞤤 𞤫 𞤸𞤵𞤩𞤫𞥅𞤪𞤫 𞤲𞤵𞤲𞤯𞤢𞤤. 𞤐𞤣𞤫 𞤫𞤯𞤫𞤲 𞤺𞤫𞤪𞤢 𞤬𞤭𞥅 𞤲𞤮 𞤸𞤫𞤩𞤼𞤭𞤪𞤫𞤲 𞤶𞤮𞤲𞤣𞤫 𞤲𞤣𞤫 𞤸𞤢𞥄𞤲𞤣𞤵𞤯𞤫𞤲 𞤲𞤣𞤫𞤲 𞤫 𞤥𞤵𞤲⹁ 𞤱𞤮𞤼𞤢 𞤫𞤲 𞤬𞤢𞤺𞥆𞤭𞤼𞤮 𞤳𞤵𞥅𞤯𞤫 𞤦𞤮𞤲𞤯𞤫. 𞤏𞤮𞤼𞤢 𞤫𞤲 𞤭𞤼𞥆𞤭𞤪 𞤯𞤮𞤲𞤳𞤢 𞤥𞤫𞤲 𞤬𞤭𞥅 𞤲𞤣𞤭𞤥𞤵 𞤴𞤢𞤪𞤭𞤪𞤺𞤮𞤤 𞤳𞤮𞤪𞤵𞤲 𞤥𞤫𞤼𞥆𞤫𞥅𞤲𞤣𞤫 𞤫 𞤲𞤺𞤢𞤴𞤲𞤺𞤵.

𞤐𞤮 𞤱𞤢𞤯𞥆𞤭𞥅 𞤫𞤲 𞤲𞤣𞤫 𞤢𞤪𞤣𞤭𞤲𞤼𞤫𞤲 𞤨𞤮𞥅𞤥𞤢𞥄⹁ 𞤼𞤫𞤣𞥆𞤵𞤲𞤺𞤢𞤤 𞤫 𞤲𞤫𞥅𞤣𞤭 𞤫 𞤲𞤣𞤫𞥅 𞤸𞤢𞤩𞤪𞤫 𞤥𞤫𞤲 . 𞤉𞤲 𞤸𞤢𞥄𞤲𞤢𞥄 𞤢𞤷𞥆𞤵𞤣𞤫 𞤯𞤫𞥅 𞤥𞤵𞤪𞤼𞤫 𞤥𞤫𞤲 𞤬𞤮𞤼𞤵𞤯𞤫 𞤱𞤢𞤴𞤤𞤮𞥅  𞤱𞤮𞤲𞤢 𞤥𞤵𞤪𞤼𞤫 𞤣𞤮𞥅𞤤𞤫 𞤦𞤮𞤲𞥆𞤫𞤪𞤫. 𞤊𞤢𞤸𞤭𞤲 𞤳𞤢𞤣𞤭⹁ 𞤫𞤯𞤫𞤲 𞤸𞤢𞥄𞤲𞤭 𞤰𞤫𞤤𞥆𞤭𞤼𞤢𞥄𞤣𞤫 𞤳𞤢 𞤩𞤵𞤪𞤭 𞤫 𞤼𞤮𞥅𞤱𞤵𞤣𞤫 𞤬𞤭𞥅 𞤴𞤮 𞤫𞤲 𞤬𞤮𞤼𞥆𞤭𞤲𞤣𞤭𞤲 𞤣𞤮𞥅𞤤𞤫 𞤩𞤢𞤤𞤲𞤣𞤵 𞤫 𞤷𞤫𞤥𞤦𞤫 𞤱𞤮𞤲𞤳𞤭𞥅. 𞤐𞤣𞤫𞥅 𞤣𞤭𞤤𞥆𞤢𞤲𞤣𞤫 𞤥𞤢𞤱𞤲𞤣𞤫 𞤵𞤳𞥆𞤭𞥅𞤲𞤣𞤫 𞤫 𞤥𞤵𞤧𞤭𞤣𞤢𞤤 𞤩𞤢𞤤𞤫 𞤲𞤺𞤢𞤤⹁ 𞤸𞤢𞥄𞤲𞤢𞥄 𞤱𞤢𞤯𞤵𞤣𞤫 𞤸𞤢𞤲 𞤸𞤵𞤼𞤮𞤯𞤫𞤲 𞤴𞤭𞤥𞤩𞤫 𞤪𞤢𞤲𞤫𞥅𞤩𞤫 𞤩𞤫𞤲 𞤬𞤮𞤨. 𞤔𞤮𞥅𞤲𞤭⹁ 𞤩𞤢𞤲𞤺𞤢𞤲𞤭𞥅 𞤥𞤵𞤧𞤭𞤣𞤩𞤫 𞤥𞤫𞤲 𞤪𞤢𞤲𞤫𞥅𞤩𞤫 𞤯𞤵𞥅𞤯𞤵𞤩𞤫⹁  𞤱𞤮𞤲𞤣𞤫𞤥𞤢 𞤲𞤺𞤫𞤯𞤵 𞤥𞤢𞤩𞥆𞤫 𞤲𞤺𞤵𞤲 𞤲𞤮 𞤸𞤵𞤥𞤮𞤲𞥋𞤣𞤭𞤪𞤭 𞤫 𞤲𞤺𞤫𞤯𞤵 𞤥𞤫𞤲 𞤲𞤺𞤵𞤤⹁ 𞤧𞤫𞥅𞤣𞤫𞥅 𞤥𞤵𞤲 𞤳𞤮 𞤼𞤢𞤱𞥆𞤫𞥅𞤣𞤫 𞤥𞤢𞤩𞥆𞤫 𞤯𞤮𞥅 𞤸𞤢𞤲𞤣𞤫. 𞤇𞤢𞤲𞤣𞤺𞤢𞤲𞤭𞥅𞤩𞤫 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤲𞤣𞤭𞤥𞤢𞥄𞤺𞤵 𞤥𞤢𞤩𞥆𞤫 𞤲𞤮 𞤸𞤢𞤩𞥆𞤮𞤲𞥋𞤣𞤭𞤪𞤭 𞤫 𞤲𞤣𞤭𞤥𞤢𞥄𞤺𞤵 𞤥𞤫𞤲 𞤳𞤮 𞤬𞤭𞤪𞤼𞤮𞤼𞤢𞥄𞤳𞤮.

 𞤉𞤲 𞤱𞤢𞥄𞤱𞤢𞤼𞤢𞥄 𞤧𞤫𞤨𞥆𞤵𞤣𞤫 𞤫𞤲𞤫𞤲 𞤼𞤵𞤲. 𞤐𞤣𞤫 𞤫𞤯𞤫𞤲 𞤴𞤢𞤸𞤢⹁ 𞤫𞤯𞤫𞤲 𞤸𞤢𞥄𞤲𞤭 𞤬𞤭𞤩𞤵𞤣𞤫 𞤱𞤮𞤲𞤣𞤫𞤥𞤢 𞤳𞤮 𞤴𞤫𞥅𞤧𞤮 𞤴𞤢𞤸𞤪𞤫𞤼𞤫𞤲. 𞤉𞤲 𞤱𞤢𞥄𞤱𞤢𞤼𞤢𞥄 𞤪𞤵𞤼𞥆𞤢𞥄𞤣𞤫 𞤩𞤢𞥄𞤱𞤮.

 𞤐𞤮 𞤱𞤮𞥅𞤣𞤭 𞤸𞤫𞤲⹁ 𞤩𞤫𞤲 𞤱𞤮𞤲𞤩𞤫 𞤤𞤢𞤲𞤣𞤢𞥄𞤣𞤫 𞤫𞤲𞤫𞤲 𞤩𞤫𞥅 𞤼𞤭𞥅𞤯𞤲𞤭𞥅𞤩𞤫 𞤬𞤭𞥅 𞤼𞤭𞥅𞤤𞥆𞤭 𞤲𞤺𞤫𞤲𞤣𞤭𞤴𞤢𞤲𞤳𞤫⹁ “𞤖𞤮𞤤 𞤲𞤣𞤫 𞤸𞤢𞥄𞤪𞤫𞤼𞤮𞤲؟”

 𞤉𞤲 𞤸𞤢𞥄𞤪𞤢𞤼𞤢𞥄 𞤨𞤮𞥅𞤥𞤢𞥄 𞤦𞤭𞤲𞥆𞤢𞤥𞤢𞥄 𞤩𞤢𞤤𞤫𞥅𞤶𞤮 𞤮𞤲 𞤲𞤮 𞤫 𞤤𞤫𞤴 𞤼𞤢𞤥𞤨𞤫𞤪𞤫 𞤲𞤶𞤢𞤺𞥆𞤵 𞤷𞤮𞤳𞥆𞤮 𞤲𞤺𞤵 𞤬𞤭𞤤𞥆𞤫𞤼𞤢𞥄𞤳𞤫⁏ 𞤫𞤲 𞤥𞤵𞤻𞥆𞤮𞤼𞤢𞥄𞤳𞤮 𞤨𞤮𞥅𞤥𞤢𞥄 𞤦𞤭𞤲𞥆𞤢𞤥𞤢𞥄 𞤩𞤢𞤤𞥆𞤭 𞤥𞤫𞤲 𞤼𞤫𞤣𞥆𞤭𞤪𞤯𞤭 𞤧𞤢𞤦𞤵 𞤪𞤮𞤲𞤳𞤫𞤪𞤫 𞤴𞤢𞤸𞤣𞤵⹁ 𞤱𞤢𞥄𞤱𞤢𞤼𞤢𞥄 𞤸𞤫𞤩𞤵𞤣𞤫 𞤶𞤭𞤨𞥆𞤮𞤪𞤣𞤫 𞤳𞤢 𞤦𞤫𞥅𞤪𞤤𞤫 𞤼𞤢𞤳𞥆𞤮 𞤦𞤢𞤤𞥆𞤢𞤽𞤫 𞤫 𞤳𞤢 𞤦𞤫𞥅𞤪𞤤𞤫 𞤲𞤣𞤫𞤪 𞤷𞤢𞤫.  𞤉𞤲 𞤸𞤢𞥄𞤪𞤢𞤼𞤢𞥄 𞤨𞤮𞥅𞤥𞤢𞥄 𞤬𞤮𞤣𞥆𞤫 𞤇𞤢𞤤𞤫𞥅𞤶𞤮 𞤮𞤲 𞤧𞤭 𞤫𞤺𞥆𞤭𞥅⹁ 𞤳𞤮 𞤴𞤮 𞤮 𞤭𞤱𞤵 𞤫 𞤷𞤮𞤳𞥆𞤵𞤲 𞤮 𞤴𞤢𞤸𞤢 𞤫 𞤷𞤮𞤳𞥆𞤭𞤤. 𞤉𞤲 𞤸𞤢𞥄𞤩𞤢𞤼𞤢𞥄 𞤨𞤮𞥅𞤥𞤢𞥄 𞤬𞤮𞤣𞥆𞤫 𞤲𞤫𞤯𞥆𞤢𞥄𞤳𞤵 𞤩𞤭𞤯𞤩𞤫 𞤥𞤫𞤲 𞤩𞤫𞤲 𞤲𞤮 𞤩𞤮𞥅𞤪𞤫𞥅⹁ 𞤲𞤣𞤭𞤥𞤵 𞤥𞤢𞤩𞥆𞤫 𞤶𞤢𞤩𞤼𞤭𞤪𞤫𞥅 𞤯𞤮𞤱𞤮𞤪𞤯𞤫 𞤯𞤫 𞤱𞤭𞤲𞤣𞤭𞥅 𞤫 𞤥𞤵𞤲 “𞤊𞤭𞥅 𞤈𞤢𞤲𞤫𞥅𞤩𞤫 𞤚𞤢𞤲”. 𞤉𞤲 𞤱𞤢𞥄𞤱𞤢𞤼𞤢𞥄 𞤥𞤵𞤻𞥆𞤢𞥄𞤣𞤫 𞤦𞤭𞤲𞥆𞤢𞤥𞤢𞥄 𞤇𞤢𞤤𞤫𞥅𞤶𞤮 𞤥𞤮 𞤃𞤭𞤧𞤭𞤧𞤭𞤨𞤭 𞤱𞤢𞥄𞤱𞤢𞤼𞤢𞥄 𞤱𞤮𞥅𞤼𞤵𞤣𞤫⹁ 𞤳𞤢𞤣𞤭 𞤮𞥅 𞤥𞤮 𞤐𞤭𞤱𞤴𞤮𞤪𞤳 𞤲𞤮 𞤸𞤮𞥅𞤤𞤭𞥅 𞤶𞤢𞤪𞤢𞥄 𞤳𞤢 𞤮 𞤱𞤮𞥅𞤼𞤢.

 𞤀𞥄 𞤢𞥄! 𞤌𞥅 𞤮𞥅⹁ 𞤫𞤲 𞤸𞤢𞥄𞤪𞤢𞥄𞤤𞤭⹁ 𞤫𞤲 𞤸𞤢𞥄𞤪𞤢𞤼𞤢𞥄 𞤳𞤢𞤣𞤭 𞤸𞤢𞥄 “𞤲𞤵𞤲𞤯𞤢𞤤 𞤭𞤤𞤭𞤪𞤢 𞤱𞤢 𞤲𞤣𞤭𞤴𞤢𞤲⹁ 𞤨𞤫𞥅𞤱𞤢𞤤 𞤱𞤢𞤲𞤮 𞤭𞤤𞤮𞤤 𞤥𞤢𞤱𞤲𞤺𞤮𞤤 𞤲𞤺𞤮𞤤 𞤩𞤫𞥅𞤩𞤢𞤼𞤢𞥄”

𞤃𞤭 𞤥𞤢𞤶𞥆𞤢𞥄𞤳𞤢 𞤱𞤮𞤲𞤣𞤫𞤥𞤢 𞤴𞤮𞤺𞤢𞥄𞤩𞤫 𞤫 𞤥𞤮𞤲 𞤳𞤮 𞤬𞤢𞤲𞤼𞤵𞤺𞤮𞤤 𞤴𞤢𞤲𞤺𞤭 𞤫 𞤼𞤢𞤥𞤨𞤫𞤪𞤫 𞤢𞤪𞤣𞤭𞤪𞤭 𞤯𞤮𞥅. 𞤒𞤮𞤺𞤢𞥄𞤩𞤫 𞤫 𞤥𞤮𞤲 𞤲𞤮 𞤴𞤢𞤤𞤼𞤭 𞤲𞤫𞥅𞤩𞤢𞥄𞤤𞤭 𞤫 𞤶𞤮𞤺𞤫 𞤩𞤭𞤼𞥆𞤵𞤯𞤫. 𞤏𞤮𞥅𞤼𞤩𞤫 𞤫 𞤥𞤮𞤲 𞤲𞤮 𞤭𞤱𞤭 𞤫 𞤲𞤮𞤳𞥆𞤵𞥅𞤤𞤭 𞤳𞤢 𞤯𞤢𞤩𞥆𞤫𞤪𞤫 𞤲𞤣𞤭𞤥𞤢𞥄𞤺𞤵 𞤱𞤮𞤲𞤭 𞤧𞤢𞤦𞤵 𞤮𞤲 𞤤𞤵𞥅𞤦𞤫𞤪𞤫𞥅𞤣𞤫 𞤱𞤢𞥄𞤦𞤭𞤤𞤭𞥅𞤶𞤫 𞤶𞤮𞤳𞥆𞤫⹁ 𞤺𞤭𞥅𞤤𞤭𞤲𞤭𞤪𞤫𞥅 𞤲𞤶𞤢𞤺𞥆𞤵 𞤷𞤮𞤳𞥆𞤮.

 𞤑𞤮 𞤮𞤲𞤮𞤲 𞤱𞤮𞤲𞤭 𞤳𞤢𞥄𞤳𞤢𞤪𞤢𞥄𞤩𞤫 𞤼𞤢𞤥𞤨𞤫𞤪𞤫 𞤥𞤮𞤰𞥆𞤭𞤲𞤭𞤪𞤲𞤣𞤫. 𞤔𞤮𞤳𞥆𞤫𞥅 𞤺𞤮𞤤𞥆𞤫 𞤯𞤫𞤲⹁ 𞤺𞤮𞤥𞤯𞤭𞤲𞤮𞤲 𞤱𞤮𞤲𞤣𞤫𞤥𞤢 𞤼𞤢𞤥𞤨𞤫𞤪𞤫 𞤲𞤣𞤫 𞤬𞤢𞤺𞥆𞤭𞤼𞤢𞥄𞤳𞤢 𞤳𞤮 𞤧𞤮𞤳𞤼𞤢𞥄𞤪𞤭.

 𞤒𞤭𞤤𞤼𞤫𞥅 𞤃𞤭𞤧𞤭𞤧𞤭𞤨𞤭. 𞤈𞤵𞤼𞥆𞤫𞥅 𞤀𞤤𞤢𞤦𞤢𞤥𞤢. 𞤒𞤭𞤤𞤼𞤫𞥅 𞤑𞤢𞤪𞤮𞤤𞤭𞤲𞤢 𞤙𞤢𞤥𞤲𞤢𞥄𞤺𞤫. 𞤈𞤵𞤼𞥆𞤫𞥅 𞤔𞤮𞤪𞤶𞤭𞤴𞤢. 𞤒𞤭𞤤𞤼𞤭𞤼𞤫𞥅 𞤂𞤵𞤱𞤭𞥅𞤧𞤭𞤴𞤢𞤲𞤢. 𞤖𞤮𞥅𞤼𞤫𞥅 𞤳𞤢 𞤷𞤮𞤳𞥆𞤫𞥅𞤶𞤭 𞤷𞤢𞤫 𞤲𞤢𞤲𞥆𞤢𞥄𞤲𞤺𞤫 𞤸𞤢𞤪𞤢 𞤮𞤯𞤮𞤲 𞤢𞤲𞤣𞤭 𞤱𞤮𞤲𞤣𞤫𞤥𞤢 𞤲𞤣𞤫𞥅 𞤬𞤫𞤱𞤲𞤣𞤢𞥄𞤪𞤫 𞤥𞤫𞤲 𞤲𞤮 𞤱𞤢𞤴𞤤𞤮𞥅⹁ 𞤲𞤣𞤫 𞤱𞤢𞤴𞤤𞤮𞤼𞤮 𞤤𞤫 𞤳𞤢𞤣𞤭. 𞤏𞤮𞤼𞤢 𞤫𞤲 𞤰𞤮𞤥𞥆𞤭𞤲𞤮 𞤫 𞤱𞤢𞥄𞤲𞤣𞤫 𞤼𞤢𞤰𞤢𞥄𞤪𞤫.

 𞤃𞤭𞤯𞤮 𞤱𞤭𞤢 𞤮𞤲 𞤸𞤢𞤲𞤣𞤫 𞤴𞤮 𞤱𞤫𞤤𞤣𞤭𞥅𞤩𞤫 𞤢𞤲⹁ 𞤬𞤭𞥅 𞤳𞤢𞤤𞤢 𞤫𞤯𞤫𞤲 𞤬𞤫𞤱𞤼𞤭 𞤯𞤫𞥅 𞤷𞤢𞤯𞤫𞥅𞤤𞤫 𞤸𞤢𞤲𞤣𞤫 𞤫 𞤶𞤢𞤲𞤺𞤮⹁ 𞤸𞤢𞥄 𞤶𞤮𞥅𞤲𞤭 𞤥𞤭𞤯𞤮 𞤱𞤮𞤲𞤣𞤭 𞤫 𞤳𞤮𞤴𞤯𞤮𞤤. 𞤑𞤮 𞤳𞤮𞤴𞤯𞤮𞤤 𞤭𞤪𞤭𞥅𞤲𞤺𞤮𞤤 𞤬𞤮𞤼𞤢 𞤫 𞤴𞤫𞤤𞤢𞥄𞤪𞤫 𞤀𞤥𞤫𞤪𞤭𞤳𞤢𞥄.

𞤃𞤭𞤯𞤮 𞤸𞤮𞤴𞤯𞤢 𞤱𞤮𞤲𞤣𞤫𞤥𞤢⹁ 𞤻𞤢𞤤𞤲𞤣𞤫 𞤺𞤮𞥅⹁ 𞤲𞤣𞤭𞥅 𞤺𞤫𞤲𞤣𞤭 𞤭𞤥𞥆𞤮𞤴𞤼𞤮 𞤥𞤫𞥅𞤯𞤢 𞤬𞤢𞥄𞤲𞤣𞤢𞥄𞤪𞤫 𞤺𞤮𞥅𞤲𞤺𞤢𞥄𞤪𞤫 𞤬𞤭𞤲𞤣𞤫 𞤥𞤢𞤴𞤪𞤭⹁ 𞤲𞤣𞤫𞤲 𞤳𞤮: ” 𞤉𞤯𞤫𞤲 𞤺𞤮𞤥𞤯𞤭𞤲𞤭 𞤯𞤭𞥅 𞤺𞤮𞥅𞤲𞤺𞤢𞥄𞤶𞤭 𞤩𞤢𞤲𞤺𞤵𞤯𞤭 𞤱𞤮𞤲𞤣𞤫𞤥𞤢 𞤴𞤭𞤥𞤩𞤫 𞤩𞤫𞤲 𞤬𞤮𞤨 𞤼𞤢𞤺𞤢𞥄𞤥𞤢 𞤲𞤮 𞤬𞤮𞤼𞤢.”

𞤃𞤭𞤯𞤮 𞤸𞤮𞤴𞤯𞤢 𞤱𞤮𞤲𞤣𞤫𞤥𞤢 𞤻𞤢𞤤𞤲𞤣𞤫 𞤺𞤮𞥅⹁ 𞤣𞤮𞤱 𞤯𞤫𞥅 𞤼𞤵𞤤𞤫 𞤱𞤮𞤯𞤫𞥅𞤶𞤫 𞤔𞤮𞤪𞤶𞤭𞤴𞤢⹁ 𞤩𞤭𞤯𞤩𞤫 𞤥𞤢𞤷𞥆𞤭𞤲𞤯𞤭𞤲𞤢𞤲𞤮𞥅𞤩𞤫 𞤫 𞤩𞤭𞤯𞤩𞤫 𞤥𞤢𞤷𞥆𞤭𞤲𞤯𞤭𞤲𞤢𞤴𞤲𞤮𞥅𞤩𞤫 𞤶𞤮𞥅𞤯𞤮𞤣𞤮𞤴𞤼𞤮 𞤫 𞤼𞤢𞥄𞤦𞤢𞤤 𞤥𞤵𞤧𞤭𞤣𞤯𞤢𞥄𞤳𞤵.

𞤃𞤭𞤯𞤮 𞤸𞤮𞤴𞤯𞤢 𞤱𞤮𞤲𞤣𞤫𞤥𞤢 𞤻𞤢𞤤𞤲𞤣𞤫 𞤺𞤮𞥅⹁ 𞤸𞤢𞤴 𞤤𞤢𞤪𞤢𞤤 𞤃𞤭𞤧𞤭𞤧𞤭𞤨𞤭⹁ 𞤤𞤢𞤪𞤢𞤤 𞤱𞤮𞤲𞤵𞤲𞥋𞤺𞤢𞤤 𞤰𞤢𞥄𞤪𞤵𞤣𞤫 𞤤𞤢𞤳𞥆𞤫𞤪𞤫 𞤧𞤢𞤦𞤵 𞤲𞤺𞤵𞤤𞤭 𞤼𞤮𞥅𞤻𞤫⹁ 𞤲𞤺𞤵𞤤𞤭 𞤲𞤶𞤢𞤺𞥆𞤵⹁ 𞤱𞤢𞤴𞤤𞤮𞤴𞤼𞤮 𞤱𞤮𞤲𞤼𞤢 𞤼𞤵𞤥𞤦𞤫𞤪𞤫 𞤲𞤣𞤭𞤥𞤵 𞤫 𞤲𞤵𞤲𞤯𞤢𞤤.

𞤃𞤭𞤯𞤮 𞤸𞤮𞤴𞤯𞤢 𞤱𞤮𞤲𞤣𞤫𞤥𞤢 𞤻𞤢𞤤𞤲𞤣𞤫 𞤺𞤮𞥅 𞤩𞤭𞤯𞤩𞤫 𞤢𞤲 𞤩𞤫𞤲 𞤲𞤢𞤴𞤮 𞤱𞤵𞥅𞤪𞤮𞤴𞤢𞤴 𞤫 𞤺𞤫𞤲𞤣𞤭 𞤳𞤢 𞤩𞤫 𞤻𞤢𞥄𞤱𞤭𞤪𞤮𞤴𞤼𞤢𞥄𞤳𞤫 𞤧𞤢𞤦𞤵 𞤲𞤮𞥅𞤲𞤣𞤫 𞤺𞤵𞤪𞤭𞤤 𞤥𞤢𞤩𞥆𞤫 𞤲𞤺𞤭𞤤⹁ 𞤳𞤮𞤲𞤮 𞤧𞤢𞤦𞤵 𞤲𞤫𞥅𞤣𞤭 𞤥𞤢𞤩𞥆𞤫 𞤲𞤣𞤭𞤲.

𞤃𞤭𞤯𞤮 𞤸𞤮𞤴𞤯𞤢 𞤸𞤢𞤲𞤣𞤫!

𞤃𞤭𞤯𞤮 𞤸𞤮𞤴𞤯𞤢 𞤱𞤮𞤲𞤣𞤫𞤥𞤢⹁ 𞤸𞤢𞤴 𞤀𞤤𞤢𞤦𞤢𞤥𞤢 𞤼𞤮𞥅 – 𞤫 𞤱𞤭𞤳𞥆𞤮𞤼𞤮𞥅𞤩𞤫 𞤥𞤵𞤲 𞤦𞤮𞤲𞤩𞤫 𞤳𞤢𞤻𞤵𞤲 𞤫 𞤘𞤮𞤦𞤭𞤲𞤢𞥄𞤶𞤮 𞤥𞤮 𞤴𞤵𞤨𞥆𞤮𞤼𞤮𞥅 𞤫 𞤼𞤮𞤲𞤭 𞤥𞤵𞤲 𞤳𞤮𞤲𞤺𞤵𞤯𞤭 𞤣𞤢𞤪𞤼𞤢𞤺𞤮𞤤 𞤫 𞤥𞤫𞤸𞤵𞤺𞤮𞤤 𞤻𞤢𞥄𞤱𞤮𞥅𞤶𞤫 𞤬𞤮𞤼𞤢𞤤 – 𞤻𞤢𞤤𞤲𞤣𞤫 𞤺𞤮𞥅⹁ 𞤀𞤤𞤢𞤦𞤢𞤥𞤢 𞤼𞤮𞤲⹁ 𞤺𞤮𞤪𞤮𞤴 𞤩𞤢𞤤𞤫𞤸𞤮𞤴 𞤫 𞤶𞤭𞤱𞤮𞤴 𞤩𞤢𞤤𞤫𞤸𞤮𞤴 𞤶𞤮𞤺𞤲𞤭𞤲𞥋𞤣𞤭𞤪𞤢𞤴 𞤶𞤵𞥅𞤯𞤫 𞤫 𞤷𞤵𞤳𞤢𞤤𞤮𞤴 𞤪𞤢𞤲𞤫 𞤸𞤮𞤴 𞤳𞤢𞤻𞤵𞤲 𞤫 𞤶𞤭𞤱𞤮𞤴 𞤪𞤢𞤲𞤫𞤸𞤮𞤴 𞤱𞤢 𞤧𞤭 𞤳𞤮 𞤩𞤫 𞤦𞤢𞤲𞤣𞤭𞤪𞤢𞥄𞤩𞤫 𞤫 𞤥𞤵𞤧𞤭𞤣𞤩𞤫.

𞤃𞤭𞤯𞤮 𞤸𞤮𞤴𞤯𞤢 𞤸𞤢𞤲𞤣𞤫!

𞤃𞤭𞤯𞤮 𞤴𞤫𞤤𞤮𞥅 𞤱𞤮𞤲𞤣𞤫𞤥𞤢 𞤻𞤢𞤤𞤲𞤣𞤫 𞤺𞤮𞥅⹁ 𞤢𞤴𞤲𞤣𞤫 𞤳𞤢𞤤𞤢 𞤩𞤢𞤥𞤼𞤫𞤼𞤫⹁ 𞤳𞤢𞤤𞤢 𞤬𞤫𞤤𞥆𞤮 𞤫 𞤧𞤫𞤸𞤪𞤫 𞤶𞤮𞤤𞤭𞤲𞤫𞥅⹁ 𞤲𞤮𞤳𞥆𞤵𞥅𞤤𞤭 𞤻𞤢𞥄𞤯𞤵𞤯𞤭 𞤯𞤫𞤱𞤤𞤭𞤲𞤫𞥅⹁ 𞤩𞤮𞤴𞤤𞤭𞥅𞤯𞤭 𞤯𞤭𞤲 𞤬𞤫𞥅𞤱𞤲𞤫𞥅⹁ “𞤥𞤢𞤲𞤺𞤵𞤪𞤢𞤤 𞤀𞤤𞤤𞤢 𞤲𞤺𞤢𞤤 𞤬𞤫𞥅𞤻𞥆𞤭𞤲𞤫𞥅⹁ 𞤩𞤢𞤤𞤲𞤣𞤭𞤲𞤳𞤫 𞤬𞤮𞤱 𞤼𞤭𞤲𞤭𞤣𞤢 𞤯𞤵𞤥”

𞤑𞤮 𞤯𞤵𞤥 𞤱𞤮𞤲𞤭 𞤶𞤮𞤪𞤼𞤮 𞤥𞤫𞤲. 𞤑𞤮 𞤯𞤵𞤥 𞤱𞤮𞤲𞤭 𞤬𞤭𞤲𞤣𞤫 𞤲𞤣𞤫 𞤥𞤭 𞤴𞤢𞤸𞤣𞤢𞤼𞤢 𞤫 𞤥𞤵𞤲 𞤙𞤢𞥄𞤥𞤲𞤢𞥄𞤲𞤺𞤫. 𞤅𞤢𞤦𞤵 𞤲𞤺𞤢𞤤 𞤺𞤮𞤥𞤯𞤭𞤲𞤢𞤤⹁ 𞤫𞤲 𞤱𞤢𞥄𞤱𞤭 𞤸𞤢𞤴𞤲𞤢𞥄𞤣𞤫 𞤸𞤢𞤴𞤪𞤫 𞤼𞤢𞤥𞤰𞤭𞤲𞤢𞥄𞤪𞤫⹁  𞤸𞤮𞥅𞤪𞤫 𞤬𞤫𞤤𞥆𞤮 𞤼𞤢𞤰𞤢𞥄𞤪𞤫⹁. 𞤏𞤮𞤲𞤣𞤵𞤣𞤫 𞤫 𞤲𞤣𞤫𞤲 𞤬𞤭𞤩𞤲𞤣𞤫⹁ 𞤫𞤯𞤫𞤲 𞤱𞤢𞥄𞤱𞤭 𞤱𞤢𞤴𞤤𞤵𞤼𞤵𞤣𞤫 𞤯𞤫𞥅 𞤴𞤫𞤣𞥆𞤮𞤲𞥋𞤣𞤭𞤪𞤫 𞤬𞤢𞤥𞤼𞤵𞤯𞤫 𞤫 𞤘𞤫𞤲𞤣𞤭 𞤥𞤫𞤲 𞤱𞤢𞤯𞤼𞤫𞤲 𞤯𞤫 𞤬𞤢𞤸𞤥𞤮𞤼𞤭𞤪𞤢𞤤 𞤥𞤵𞤧𞤭𞤣𞤢𞤤 𞤱𞤮𞥅𞤯𞤵𞤲𞥋𞤺𞤢𞤤. 𞤏𞤮𞤲𞤣𞤵𞤣𞤫 𞤫 𞤲𞤣𞤫𞥅 𞤬𞤭𞤲𞤣𞤫⹁ 𞤫 𞤱𞤢𞥄𞤱𞤢𞤴 𞤺𞤮𞤤𞥆𞤵𞤣𞤵𞤣𞤫⹁ 𞤶𞤵𞥅𞤤𞤵𞤣𞤵𞤣𞤫⹁ 𞤴𞤢𞤲𞤺𞤮𞤣𞤵𞤣𞤫⹁ 𞤧𞤮𞤳𞤭𞤣𞤫𞥅𞤣𞤫⹁ 𞤣𞤢𞤪𞤼𞤮𞤼𞤢𞥄𞤣𞤫 𞤬𞤭𞥅 𞤲𞤣𞤭𞤥𞤵 𞤸𞤢𞤪𞤢 𞤫𞤯𞤫𞤲 𞤢𞤲𞤣𞤭 𞤱𞤮𞤲𞤣𞤫𞤥𞤢 𞤫 𞤸𞤫𞤩𞤼𞤢𞤴 𞤸𞤮𞥅𞤪𞤫 𞤻𞤢𞤤𞤲𞤣𞤫 𞤺𞤮𞥅.

𞤑𞤮 𞤲𞤣𞤫𞤲 𞤻𞤢𞤤𞤲𞤣𞤫⹁ 𞤼𞤢𞤺𞤢𞥄𞤩𞤫 𞤀𞤤𞤤𞤢 𞤩𞤫𞤲 𞤬𞤮𞤬⹁ 𞤴𞤭𞤥𞤭𞤣𞤮𞤴𞤼𞤢 𞤲𞤺𞤮𞤤 𞤺𞤭𞤥𞤮𞤤 𞤳𞤮𞤲𞤮 𞤸𞤢𞤪𞤢 𞤸𞤭𞤲𞤺𞤮𞤤 𞤶𞤮𞤺𞤭 𞤬𞤭𞤪𞤮 𞤸𞤫𞤧𞤮: ” 𞤂𞤫𞤴𞤣𞤭 𞤢𞤲⹁ 𞤳𞤮 𞤢𞤲⹁ 𞤤𞤫𞤴𞤣𞤭 𞤲𞤣𞤭𞤥𞤵 𞤱𞤫𞤤𞤲𞤣𞤭⹁ 𞤳𞤮 𞤢𞤲 𞤥𞤭 𞤴𞤭𞤥𞤢𞤼𞤢. 𞤂𞤫𞤴𞤣𞤭 𞤳𞤢 𞤦𞤢𞥄𞤦𞤢 𞤢𞤲 𞤬𞤫𞤰𞥆𞤭𞤲𞤭⹁ 𞤤𞤫𞤴𞤣𞤭 𞤲𞤣𞤭 𞤳𞤭𞤶𞥆𞤮𞥅𞤩𞤫 𞤥𞤢𞤲𞤼𞤮𞤪𞤼𞤢⹁ 𞤭𞤥𞥆𞤮𞤪𞤣𞤫 𞤫 𞤬𞤢𞤤𞤮 𞤳𞤢𞤤𞤢 𞤴𞤮 𞤼𞤢𞤤𞤫𞤲𞤪𞤵 𞤲𞤣𞤭𞤥𞤢𞥄𞤲𞤺𞤵 𞤧𞤫𞤲𞤰𞤭𞤲𞤫.” 𞤅𞤮 𞤀𞤥𞤫𞤪𞤭𞤳𞤢𞥄 𞤱𞤮𞤲𞤢𞤴 𞤈𞤫𞤲𞤣𞤮 𞤥𞤢𞤱𞤲𞤺𞤮⹁ 𞤯𞤵𞤥 𞤯𞤮𞥅 𞤲𞤮 𞤸𞤢𞥄𞤲𞤭 𞤱𞤮𞤲𞤵𞤣𞤫 𞤺𞤮𞥅𞤲𞤺𞤢.

 𞤀𞤱𞤢 𞤴𞤮 𞤼𞤢𞤤𞤫𞤲𞤪𞤵 𞤲𞤣𞤭𞤥𞤢𞥄𞤺𞤵 𞤧𞤫𞤲𞤰𞤭𞤪 𞤺𞤭𞤤𞤢 𞤣𞤮𞤱 𞤼𞤵𞤤𞤫 𞤐𞤭𞤱 𞤖𞤢𞤥𞥃𞤢𞥄𞤴𞤢⹁

𞤒𞤮 𞤼𞤢𞤤𞤫𞤲𞤪𞤵 𞤲𞤣𞤭𞤥𞤵 𞤧𞤫𞤲𞤰𞤭𞤪 𞤧𞤫𞤲𞤺𞤮 𞤯𞤫𞥅 𞤩𞤢𞤥𞤤𞤫 𞤥𞤢𞤱𞤯𞤫 𞤐𞤫𞤱 𞤒𞤮𞤪𞤳⹁

𞤒𞤮 𞤤𞤫𞤲𞤺𞤵 𞤲𞤣𞤭𞤥𞤵 𞤧𞤫𞤲𞤰𞤭𞤪 𞤣𞤮𞤱 𞤼𞤮𞥅𞤱𞤵𞤯𞤫 𞤀𞤤𞤫𞤺𞤢𞤲𞤭𞥅 𞤆𞤫𞤲𞤧𞤭𞤤𞤱𞤢𞤲𞤭⹁

𞤒𞤮 𞤤𞤫𞤲𞤺𞤵 𞤲𞤣𞤭𞤥𞤵 𞤧𞤫𞤲𞤰𞤭𞤪 𞤦𞤢𞤲𞤽𞤫 𞤯𞤫𞥅 𞤷𞤫𞤸𞤫 𞤑𞤮𞤤𞤮𞤪𞤢𞤣𞤮 𞤸𞤭𞤨𞥆𞤮𞤪𞤯𞤫 𞤦𞤵𞤬𞤫⹁

𞤒𞤮 𞤼𞤢𞤤𞤫𞤲𞤪𞤵 𞤲𞤣𞤭𞤥𞤵 𞤧𞤫𞤲𞤰𞤭𞤪 𞤺𞤭𞤤𞤢 𞤨𞤢𞤤𞤫 𞤯𞤫𞤱𞤤𞤵𞤯𞤫 𞤑𞤢𞤤𞤭𞤬𞤮𞤪𞤲𞤭𞤴𞤢.

 𞤑𞤮𞤲𞤮 𞤱𞤮𞤲𞤢𞥄 𞤯𞤵𞤥 𞤼𞤵𞤲.

 𞤒𞤮 𞤼𞤢𞤤𞤫𞤲𞤪𞤵 𞤲𞤣𞤭𞤥𞤵 𞤧𞤫𞤲𞤰𞤭𞤪 𞤳𞤢𞤣𞤭 𞤺𞤭𞤤𞤢 𞤊𞤫𞤤𞥆𞤮 𞤅𞤼𞤮𞤲 𞤱𞤮𞤲𞤺𞤮 𞤔𞤮𞤪𞤶𞤭𞤴𞤢⹁

𞤒𞤮 𞤼𞤢𞤤𞤫𞤲𞤪𞤵 𞤲𞤣𞤭𞤥𞤵 𞤧𞤫𞤲𞤰𞤭𞤪 𞤸𞤫𞤣𞥆𞤫 𞤬𞤫𞤤𞥆𞤮 𞤤𞤮𞤽𞤮𞤪𞤣𞤫 𞤚𞤫𞤲𞤫𞤧𞤭

𞤒𞤮 𞤼𞤢𞤤𞤫𞤲𞤪𞤵 𞤲𞤣𞤭𞤥𞤵 𞤧𞤫𞤲𞤰𞤭𞤪 𞤸𞤮𞥅𞤪𞤫 𞤳𞤢𞤤𞤢 𞤼𞤵𞤤𞤣𞤫 𞤫 𞤥𞤮𞥅𞤱𞤪𞤫 𞤃𞤭𞤧𞤭𞤧𞤭𞤨𞤭.

𞤄𞤢𞤲𞤽𞤫 𞤳𞤢𞤤𞤢 𞤬𞤢𞤤𞤮⹁ 𞤴𞤮 𞤼𞤢𞤤𞤫𞤲𞤪𞤵 𞤲𞤣𞤭𞤥𞤵 𞤭𞥅𞤣𞤭𞤲

𞤅𞤮 𞤯𞤵𞤥 𞤱𞤢𞤯𞤭𞥅⹁ 𞤧𞤭 𞤫𞤲 𞤢𞤷𞥆𞤭𞥅 𞤼𞤢𞤤𞤫𞤲𞤪𞤵 𞤲𞤣𞤭𞤥𞤵 𞤲𞤺𞤵𞤲 𞤧𞤫𞤲𞤰𞤭𞥅 𞤫 𞤱𞤵𞤪𞤮 𞤳𞤢𞤤𞤢⹁ 𞤫 𞤳𞤮𞤯𞤮𞤤𞤵𞤲 𞤳𞤢𞤤𞤢⹁ 𞤫 𞤤𞤢𞤪𞤢𞤤 𞤳𞤢𞤤𞤢⹁ 𞤫 𞤧𞤢𞥄𞤪𞤫 𞤳𞤢𞤤𞤢⹁ 𞤫𞤲 𞤱𞤢𞥄𞤱𞤢𞤴 𞤴𞤢𞥄𞤱𞤭𞤲𞤣𞤫 𞤢𞤪𞤵𞤺𞤮𞤤 𞤻𞤢𞤤𞤢𞥄𞤲𞤣𞤫 𞤸𞤢𞤪𞤢 𞤼𞤢𞤺𞤢𞥄𞤩𞤫 𞤀𞤤𞤤𞤢 𞤩𞤫𞤲 𞤬𞤮𞤨⹁ 𞤩𞤢𞤤𞤫𞥅𞤩𞤫 𞤫 𞤪𞤢𞤲𞤫𞥅𞤩𞤫⹁ 𞤴𞤢𞤸𞤵𞥅𞤣𞤢𞥄𞤩𞤫 𞤫 𞤢𞤧 𞤥𞤢𞤩𞥆𞤫⹁ 𞤆𞤮𞤪𞤼𞤫𞤧𞤼𞤢𞥄𞤩𞤫 𞤫 𞤳𞤢𞤼𞤮𞤤𞤭𞤳𞤭𞥅𞤩𞤫⹁ 𞤱𞤢𞥄𞤱𞤮𞤴𞤢𞤴 𞤶𞤮𞤺𞤲𞤭𞤲𞥋𞤣𞤭𞤪𞤣𞤫 𞤶𞤵𞥅𞤯𞤫 𞤶𞤢𞥄𞤪𞤭𞤣𞤢 𞤯𞤭𞥅 𞤳𞤮𞤲𞤺𞤵𞤯𞤭 𞤶𞤢𞥄𞤪𞤮𞥅𞤪𞤫 𞤇𞤢𞤤𞤫𞥅𞤶𞤮 𞤮𞤲: “𞤔𞤮𞥅𞤲𞤭 𞤫𞤲 𞤪𞤭𞤥𞤯𞤭𞥅⹁ 𞤶𞤮𞥅𞤲𞤭 𞤳𞤮 𞤫𞤲 𞤪𞤭𞤥𞤩𞤫. 𞤒𞤫𞤼𞥆𞤮𞥅𞤪𞤫 𞤱𞤮𞥅𞤣𞤢𞤲𞤭 𞤀𞤤𞤤𞤢 𞤚𞤮𞥅𞤱𞤵𞤯𞤮 𞤮𞤲⹁ 𞤶𞤮𞥅𞤲𞤭 𞤳𞤮 𞤫𞤲 𞤪𞤭𞤥𞤩𞤫.”