𞤓𞤃𞤀𞤈𞤓 𞤐𞤄𞤀𞤂𞥆𞤌 𞤊𞤌𞤂𞥆𞤀𞥄𞤃𞤀
𞤘𞤋𞤐𞤉 𞤄𞤋𞤅𞤀𞤏𞤌𞥅: 𞤓𞤃𞤀𞤈𞤓 𞤅𞤋𞥅𞤅𞤌𞤑𞤌 𞤐𞤄𞤀𞤂𞥆𞤌 𞤬𞤮𞤤𞥆𞤢𞥄𞤥𞤢
𞤑𞤮 𞤬𞤫𞤱𞤲𞤣𞤮 𞤳𞤢 𞤬𞤮𞤨 𞤸𞤢𞤦𞥆𞤭𞤲𞤮𞥅 𞤦𞤢𞤯𞤼𞤢𞤲𞤫 𞤷𞤵𞤩𞤤𞤫 𞤱𞤢𞤯𞤵𞤯𞤫 𞤫 𞤈𞤫𞤬𞤦𞤭𞥅𞤪𞤫 (𞤢𞤤𞤢𞤼) 𞤻𞤢𞤤𞤲𞤣𞤫 𞥒𞥓 𞤔𞤮𞤤𞤮 𞥒𞥐𞥒𞥕⹁⹁ 𞤬𞤫𞤣𞥆𞤫 𞤧𞤮𞥅𞤪𞤭 𞤸𞤮𞤤𞥆𞤭𞤼𞤭 𞤱𞤮𞤲𞤣𞤫𞤥𞤢 𞤩𞤫 𞤸𞤵𞤩𞤭𞤲𞥋𞤣𞤭𞤳𞤫 𞤤𞤫𞤴𞤣𞤭 𞤘𞤭𞤲𞤫 𞤄𞤭𞤧𞤢𞤱𞤮𞥅 𞤲𞤣𞤭𞤲. 𞤑𞤮 𞤸𞤢𞤲𞤳𞤭 𞤫 𞤐𞤔𞤫𞤧𞤤𞤢𞥄𞤪𞤫⹁ 𞤻𞤢𞤤𞤲𞤣𞤫 𞥒𞥖 𞤔𞤮𞤤𞤮⹁ 𞤯𞤵𞤥 𞤱𞤢𞤯𞤭 𞤩𞤢𞥄𞤱𞤮 𞤤𞤮𞥅𞤱𞤢𞤲𞤯𞤫 𞤬𞤫𞤼𞥆𞤭𞤲𞤫𞥅𞤣𞤫 𞤼𞤮 𞤦𞤢𞤲𞤽𞤫 𞤸𞤵𞤩𞤫𞥅𞤪𞤫 𞤤𞤢𞥄𞤥𞤮𞤪𞤣𞤫.
𞤓𞤥𞤢𞤪𞤵 𞤅𞤭𞥅𞤧𞤮𞤳𞤮 𞤐𞤄𞤢𞤤𞥆𞤮 𞤺𞤮𞥅𞤲𞤺𞤭𞤲𞥆𞤮 𞤳𞤢𞤲𞤳𞤮 𞤼𞤭𞤺𞤭 𞤱𞤮𞤲𞤣𞤫𞤥𞤢 𞤮 𞤬𞤮𞤤𞥆𞤢𞥄𞤥𞤢⹁⹁ 𞤳𞤢𞤣𞤭 𞤮𞤥𞤮 𞤶𞤮𞤺𞤢𞤲𞤮𞥅 𞤳𞤢 𞤴𞤭𞥅𞤤𞤭𞤪𞤣𞤫 𞤳𞤮𞤲𞤵 𞤲𞤺𞤵𞤲.
𞤖𞤮𞤤 𞤳𞤮 𞤱𞤢𞤯𞤵𞤲𞤮𞥅 𞤫 𞤲𞤣𞤫𞥅 𞤻𞤢𞤤𞤢𞥄𞤲𞤣𞤫 𞤐𞤔𞤫𞤧𞤤𞤢𞥄𞤪𞤫 (𞤢𞤤𞤢𞤪𞤦𞤢)؟
𞤑𞤮 𞤫 𞤐𞤔𞤫𞤧𞤤𞤢𞥄𞤪𞤫⹁ 𞤳𞤢 𞤩𞤢𞥄𞤱𞤮 𞤰𞤢𞤱𞤢𞤤 𞤬𞤫𞤣𞥆𞤫 𞤭𞤲𞥆𞤭𞤼𞤭𞥅𞤲𞤣𞤫 “𞤀𞤪𞤣𞤵𞤽𞤢𞤤 𞤚𞤮𞥅𞤱𞤵𞤲𞥋𞤺𞤢𞤤 𞤅𞤮𞥅𞤪𞤭 𞤬𞤭𞥅 𞤀𞤪𞤼𞤭𞤪𞤺𞤮𞤤 𞤑𞤭𞤧𞤢𞤤 𞤘𞤫𞤲𞤣𞤭 𞤫 𞤖𞤫𞤶𞥆𞤫𞤪𞤫 𞤔𞤢𞤥𞤢𞥄” 𞤸𞤮𞤤𞥆𞤭𞤼𞤭 𞤱𞤮𞤲𞤣𞤫𞤥𞤢 𞤲𞤣𞤫 𞤱𞤢𞤴𞤤𞤭𞤼𞤭𞥅 𞤓𞤥𞤢𞤪𞤵 𞤅𞤭𞥅𞤧𞤮𞤳𞤮 𞤐𞤄𞤢𞤤𞥆𞤮⹁ 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤩𞤫 𞤸𞤮𞤤𞥆𞤭𞤼𞤭 𞤱𞤮𞤲𞤣𞤫𞤥𞤢 𞤩𞤫 𞤣𞤢𞤪𞤼𞤭𞤲𞤭𞥅 𞤥𞤵𞤪𞤢𞥄𞤯𞤭 𞤴𞤮𞤱𞤭𞤼𞤭𞥅𞤯𞤭 𞤫 𞤷𞤵𞤩𞤤𞤫 𞤯𞤫𞤲⹁⹁ 𞤪𞤫𞤬𞤼𞤭 𞤩𞤫 𞤥𞤢𞤩𞥆𞤭𞥅 𞤳𞤫𞥅𞤪𞤭 𞤯𞤭𞤲 𞤳𞤢 𞤤𞤫𞤴𞤣𞤭 𞤫 𞤳𞤢 𞤱𞤫𞥅𞤴𞤮.
𞤉 𞤲𞤣𞤫𞤪 𞤻𞤢𞤤𞥆𞤢𞤤 𞤲𞤺𞤢𞤤⹁ 𞤳𞤢𞤲𞤳𞤮 𞤼𞤭𞤺𞤭 𞤓𞤥𞤢𞤪𞤵 𞤐𞤄𞤢𞤤𞥆𞤮⹁ 𞤮 𞤸𞤮𞤤𞥆𞤭𞤼𞤵𞤲𞤮 𞤸𞤫𞤧𞤤𞤢𞤤 “𞤟𞤉𞥅𞤐 𞤀𞤊𞤈𞤋𞤑𞤋” 𞤲𞤺𞤢𞤤 𞤱𞤮𞤲𞤣𞤫𞤥𞤢 𞤼𞤫𞤤𞤫𞤲 𞤳𞤢 𞤲𞤶𞤢𞤥𞤣𞤭 𞥑𞥒𞤩𞤭𞤪𞤭⹁ 𞤧𞤮𞥅𞤪𞤭𞥅𞤩𞤫 𞤧𞤵𞤨𞥆𞤭𞤼𞤭𞤲𞤮 𞤳𞤢 𞤸𞤵𞤩𞤫𞥅𞤪𞤫 𞤤𞤢𞥄𞤥𞤮𞤪𞤣𞤫⹁⹁ 𞤩𞤫 𞤲𞤢𞤲𞤺𞤭 𞤥𞤮⹁ 𞤳𞤢𞤲𞤳𞤮 𞤫 𞤸𞤮𞥅𞤪𞤫𞥅𞤶𞤮 𞤳𞤮𞤲𞤭 𞤯𞤭𞤲 𞤫 𞤷𞤵𞤳𞥆𞤮 𞤥𞤵𞥅𞤯𞤵𞤲 𞤮𞤲⹁ 𞤳𞤢𞤻𞤵𞤲 𞤫 𞤶𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤥𞤵𞤪𞤢𞥄𞤯𞤭 𞤲𞤣𞤫𞤪𞤶𞤭. 𞤉 𞤦𞤭𞤴𞤮𞤤 𞤊𞤢𞤪𞤢𞤲𞤧𞤵𞤱𞤢𞥄 𞤅𞤵𞤣𞤢𞤲⹁ 𞤸𞤫𞤧𞤤𞤮𞥅𞤱𞤮 𞤳𞤢 𞤟𞤉𞥅𞤐 𞤀𞤊𞤈𞤋𞤑⹁⹁ 𞤓𞤥𞤢𞤪𞤵 𞤅𞤭𞥅𞤧𞤮𞤳𞤮 𞤐𞤄𞤢𞤤𞥆𞤮 𞤢𞤲𞤣𞤭𞤲𞥆𞤮 𞤥𞤮 𞤱𞤮𞤲𞤣𞤫𞤥𞤢 𞤳𞤮 𞤄𞤢𞤤𞤢𞤲𞤼𞤮𞥅𞤩𞤫 𞤩𞤫𞤲 𞤱𞤮𞤲𞤭 𞤩𞤢𞥄𞤱𞤮 𞤲𞤣𞤵𞥅 𞤬𞤮𞤤𞥆𞤵𞤪𞤵. 𞤑𞤮 𞤴𞤭𞤥𞤩𞤫 𞤲𞤺𞤮𞥅𞤤 𞤤𞤫𞤻𞤮𞤤 𞤄𞤢𞤤𞤢𞤲𞤼𞤮 𞤩𞤵𞤪𞤭 𞤯𞤵𞥅𞤯𞤵𞤣𞤫 𞤫 𞤲𞤣𞤫𞤪 𞤳𞤮𞤲𞤭 𞤘𞤭𞤲𞤫 𞤄𞤭𞤧𞤢𞤱𞤮𞥅 𞤯𞤭𞤲. 𞤊𞤭𞥅 𞤳𞤢𞤤𞤢 𞤮 𞤢𞤲𞤣𞤢𞥄 𞤳𞤮 𞤸𞤮𞤥𞤦𞤮𞥅 𞤱𞤮𞤲𞤭 𞤸𞤮𞥅𞤪𞤫 𞤬𞤮𞤤𞥆𞤵𞤪𞤵 𞤲𞤣𞤵𞤲⹁⹁ 𞤲𞤮 𞤸𞤫𞤲𞤢𞤲𞤭 𞤥𞤮 𞤳𞤮 𞤢𞤪𞤭𞥅𞤯𞤮 𞤳𞤮𞤲𞤵 𞤤𞤫𞤴𞤣𞤭𞤱𞤵 𞤲𞤺𞤵𞤲. 𞤉 𞤲𞤣𞤫𞤪 𞤴𞤫𞤱𞤼𞤫𞤪𞤫 𞤲𞤣𞤫𞤲⹁ 𞤮 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤮 𞤲𞤢𞤲𞤺𞤢𞥄𞤥𞤢 𞤬𞤫𞤱𞤲𞤣𞤮 𞤳𞤢 𞤤𞤭𞤥𞤼𞤮 𞤥𞤢𞤳𞥆𞤮 𞤲𞤺𞤮𞤲 𞤸𞤮𞤤𞥆𞤭 𞤮𞤥𞤮 𞤸𞤫𞤩𞤭 𞤳𞤮 𞤴𞤢𞤱𞤼𞤭 𞥖𞥕%. 𞤐𞤣𞤫 𞤼𞤢𞤱𞤵𞤲𞤮𞥅 𞤲𞤮𞤲⹁ 𞤳𞤢𞤲𞤳𞤮 𞤬𞤮𞤤𞥆𞤢𞥄𞤯𞤮 𞤮𞤲⹁ 𞤮𞤥𞤮 𞤱𞤮𞤲𞤣𞤵𞤲𞤮𞥅 𞤫 𞤫𞤱𞤲𞤮𞤪𞤯𞤫 𞤥𞤢𞤳𞥆𞤮 𞤯𞤫𞤲⹁ 𞤮𞤥𞤮 𞤱𞤢𞥄𞤱𞤵𞤣𞤫 𞤲𞤮𞤣𞥆𞤵𞤣𞤫 𞤳𞤢𞤤𞤢 𞤥𞤮 𞤮 𞤴𞤭𞤯𞤭 𞤲𞤮𞤣𞥆𞤵𞤣𞤫⹁⹁ 𞤱𞤮𞥅𞤣𞤭𞥅 𞤧𞤭𞤳𞥆𞤭𞤼𞤭𞥅𞤩𞤫 𞤧𞤮 𞤼𞤢𞤱𞤭𞥅 𞤲𞤺𞤢𞥄𞤤 𞤱𞤢𞤴𞤤𞤭𞤼𞤢𞤤 𞤤𞤢𞥄𞤥𞤵⹁ 𞤱𞤮𞤲𞤢𞥄 𞤳𞤢𞥄𞤤𞤣𞤭𞤺𞤢𞤤 𞤸𞤢𞤳𞥆𞤵𞤲𞥋𞤣𞤫 𞤓𞤥𞤢𞤪𞤵 𞤅𞤭𞥅𞤧𞤮𞤳𞤮 𞤐𞤄𞤢𞤤𞥆𞤮 𞤫 𞤧𞤮𞥅𞤪𞤭𞥅𞤩𞤫 𞤩𞤫𞤲.
𞤐𞤄𞤢𞤤𞥆𞤮 𞤸𞤵𞤥𞤨𞤮𞤲𞥋𞤣𞤭𞤪𞤲𞤮 𞤫 𞤸𞤮𞥅𞤪𞤫𞥅𞤩𞤫 𞤑𞤮𞤲𞤺𞤮⹁⹁ 𞤕𞤢𞥄𞤣⹁ 𞤐𞤢𞤶𞤫𞤪𞤭𞤴𞤢𞥄⹁ 𞤅𞤫𞤲𞤫𞤺𞤢𞤤 𞤫 𞤅𞤢𞤪𞤤𞤮𞤲. 𞤑𞤮 𞤸𞤮𞥅𞤪𞤫𞥅𞤶𞤮 𞤅𞤢𞤪𞤤𞤮𞤲 𞤮𞤲 𞤢𞤪𞤣𞤭𞥅 𞤁𞤉𞤐𞤘𞤖𞤀 𞤬𞤫𞤱𞤲𞤣𞤮 𞤯𞤮𞥅. 𞤑𞤮 𞤳𞤢𞤲𞤳𞤮 𞤴𞤫𞤱𞤼𞤭𞤣𞤭 𞤫 𞤧𞤮𞥅𞤪𞤭𞥅𞤩𞤫 𞤷𞤭𞤤𞤭𞥅𞤩𞤫 𞤤𞤢𞥄𞤥𞤵 𞤲𞤺𞤵𞤲 𞤬𞤭𞥅 𞤲𞤮 𞤐𞤄𞤢𞤤𞥆𞤮 𞤫 𞤩𞤫𞤴𞤲𞤺𞤵𞥅𞤪𞤫 𞤥𞤵𞥅𞤯𞤵𞤲 𞤲𞤣𞤫𞤲 𞤴𞤢𞤤𞤼𞤭𞤪𞤢 𞤄𞤭𞤧𞤢𞤱𞤮𞥅.
𞤐𞤄𞤢𞤤𞥆𞤮 𞤫 𞤩𞤫𞤴𞤲𞤺𞤵𞥅𞤪𞤫 𞤥𞤵𞥅𞤯𞤵𞤲 𞤲𞤣𞤫𞤲 𞤸𞤫𞤱𞤼𞤭𞥅 𞤁𞤢𞤳𞤢𞤪 𞤸𞤢𞤲𞤣𞤫 𞤳𞤭𞥅𞤳𞤭𞥅𞤯𞤫.
𞤑𞤮 𞤑𞤵𞥅𞤩𞤢𞤤𞥆𞤮 𞤭𞤲𞥆𞤫𞤼𞤫𞥅𞤯𞤮 𞤖𞤮𞤪𞤼𞤢 𞤚𞤢𞤥⹁ 𞤤𞤮𞤲𞤼𞤭𞥅 𞤐𞤄𞤢𞤤𞥆𞤮 𞤳𞤢 𞤤𞤢𞥄𞤥𞤵. 𞤌 𞤶𞤮𞤺𞤮𞤼𞤮 𞤤𞤢𞥄𞤥𞤵 𞤲𞤺𞤵𞤲 𞤫 𞤲𞤣𞤫𞤪 𞤸𞤭𞤼𞤢𞥄𞤲𞤣𞤫. 𞤑𞤮 𞤸𞤮𞥅𞤤𞤢𞤲𞤮𞥅𞤯𞤮 𞤓𞤥𞤢𞤪𞤵 𞤅𞤭𞥅𞤧𞤮𞤳𞤮 𞤐𞤄𞤢𞤤𞥆𞤮 𞤸𞤢𞥄 𞤮𞤲 𞤼𞤮𞤯𞥆𞤭𞥅 𞤥𞤮 𞤢𞤪𞤣𞤢𞤺𞤮𞤤 𞤳𞤮𞤲𞤵 𞤤𞤫𞤴𞤣𞤭𞤱𞤵 𞤲𞤺𞤵𞤲.
𞤓𞤥𞤢𞤪𞤵 𞤅𞤭𞥅𞤧𞤮𞤳𞤮 𞤐𞤄𞤢𞤤𞥆𞤮 𞤱𞤮𞤲𞤭 𞤸𞤮𞥅𞤪𞤫𞥅𞤶𞤮 𞤶𞤫𞥅𞤺𞤢𞤩𞤮 𞤤𞤫𞤴𞤣𞤭 𞤘𞤭𞤲𞤫 𞤄𞤭𞤧𞤢𞤱𞤮𞥅 𞤲𞤣𞤭𞤲. 𞤑𞤮 𞤫 𞥒𞥐𞥒𞥐 𞤮 𞤰𞤢𞤱𞤭 𞤳𞤢 𞤤𞤢𞥄𞤥𞤵. 𞤑𞤮 𞤬𞤭𞥅 𞤸𞤢𞤨𞥆𞤵 𞤯𞤭𞤯𞤢𞤩𞤵 𞤮 𞤣𞤢𞤪𞤭𞤲𞤮𞥅 𞤢𞤣𞤮 𞤮 𞤬𞤮𞤤𞥆𞤫𞥅𞤣𞤫. 𞤌𞤥𞤮 𞤥𞤢𞤪𞤭 𞤣𞤵𞥅𞤩𞤭 𞥕𞥓. 𞤑𞤮 𞤻𞤢𞤤𞤲𞤣𞤫 𞥒𞥓 𞤅𞤭𞤤𞤼𞤮 𞥑𞥙𞥗𞥒 𞤮 𞤶𞤭𞤦𞤭𞤲𞤢𞥄 𞤳𞤢 𞤤𞤢𞥄𞤥𞤮𞤪𞤣𞤫 𞤄𞤭𞤧𞤢𞤱𞤮𞥅.
𞤌𞤲 𞤶𞤢𞥄𞤪𞤢𞥄𞤥𞤢