𞤘𞤀𞤅𞤀𞤃𞤀 𞤔𞤀𞥄𞤄𞤋 𞤅𞤋𞤐𞤕𞤋𞥅 𞤃𞤌𞤔𞤌𞤄𞤉𞤈𞤉 𞤖𞤉𞤅𞤉𞤈𞤉
𞤑𞤢𞤤𞤭𞤬𞤢 𞤘𞤢𞤧𞤢𞤥𞤢 𞤔𞤢𞥄𞤦𞤭⹁ 𞤤𞤢𞥄𞤼𞤭𞤲𞤮𞥅𞤯𞤮 𞤮𞤲 𞤶𞤢𞥄𞤺𞤮𞤪𞤢𞥄𞤯𞤮 𞤬𞤭𞥅 𞤸𞤢𞤳𞥆𞤫𞥅𞤶𞤭 𞤴𞤭𞤥𞤩𞤫 𞤘𞤭𞤲𞤫 𞤺𞤭𞤤𞤢 𞥒𞥐𞥑𞥒 𞤸𞤢𞥄 𞥒𞥐𞥑𞥘⹁ 𞤧𞤭𞤲𞤷𞤭𞥅 𞤬𞤫𞤣𞥆𞤫 𞤲𞤣𞤫 𞤮 𞤭𞤲𞥆𞤭 𞥋𞥋𞤁𞤭𞤤𞥆𞤢𞤲𞤣𞤫 𞤐𞤣𞤭𞤥𞤵 𞤫 𞤚𞤫𞤣𞥆𞤵𞤲𞥋𞤺𞤢𞤤 𞤬𞤭𞥅 𞤈𞤫𞤲𞤣𞤮 𞤘𞤭𞤲𞤫“. 𞤊𞤢𞥄𞤲𞤣𞤢𞥄𞤪𞤫 𞤥𞤢𞤳𞥆𞤮 𞤳𞤮 𞤻𞤭𞥅𞤩𞤲𞤵𞤺𞤮𞤤 𞤻𞤢𞥄𞤱𞤮𞥅𞤶𞤫 𞤤𞤫𞤴𞤣𞤭 𞤲𞤣𞤭𞤲 𞤫 𞤸𞤢𞤩𞤵𞤺𞤮𞤤 𞤀𞤤𞤬𞤢𞥄 𞤑𞤮𞤲𞤣𞤫 𞤬𞤭𞥅 𞤱𞤮𞤼𞤢 𞤮 𞤶𞤮𞥅𞤯𞤭𞤼𞤮 𞤳𞤢 𞤤𞤢𞥄𞤥𞤵.
𞤉 𞤥𞤭𞥅𞤶𞤮 𞤘𞤢𞤧𞤢𞤥𞤢 𞤔𞤢𞥄𞤦𞤭⹁ 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲⹁ 𞤲𞤮 𞤸𞤢𞥄𞤲𞤣𞤭 𞤫 𞤤𞤢𞥄𞤥𞤵 𞤸𞤢𞤳𞥆𞤭𞤼𞤮𞤪𞤵. 𞤉 𞤴𞤫𞤱𞤼𞤫𞤪𞤫 𞤲𞤣𞤫 𞤮 𞤱𞤢𞤯𞤭 𞤳𞤢 𞤳𞤭𞤦𞤭𞤪𞤺𞤢𞤤 𞤖𞤢𞤣𞤢𞤬𞤮𞥅 (HADAFO) 𞤸𞤢𞤲𞤳𞤭 𞤫 𞤢𞥄𞤩𞤵𞤲𞥋𞤣𞤫 𞤮 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢:
“𞤥𞤭𞥅𞤶𞤮𞥅𞤶𞤭 𞤲𞤮 𞤸𞤢𞥄𞤲𞤢𞥄 𞤴𞤢𞥄𞤶𞤭𞤲𞤫𞥅𞤣𞤫. 𞤂𞤫𞤴𞤣𞤭 𞤲𞤣𞤭𞤲 𞤲𞤮 𞤸𞤢𞥄𞤲𞤭𞤣𞤭 𞤫 𞤣𞤢𞤪𞤮𞤪𞤣𞤫. 𞤑𞤮 𞤦𞤫𞥅 𞤸𞤢𞤳𞥆𞤭𞤼𞤮𞤪𞤣𞤫 𞤸𞤫𞤩𞤮𞥅. 𞤄𞤫𞥅 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲 𞤧𞤫𞤤𞤢 𞤬𞤢𞥄𞤤𞤫 𞤶𞤮𞥅𞤯𞤭𞤼𞤢𞤺𞤮𞤤 𞤳𞤢 𞤤𞤢𞥄𞤥𞤵. 𞤌 𞤸𞤢𞥄𞤲𞤢𞥄 𞤢𞥄𞤣𞤢𞤲𞤢𞥄𞤣𞤫 𞤤𞤫𞤴𞤣𞤭 𞤲𞤣𞤭𞤲 𞤳𞤮 𞤲𞤢𞤩𞤢𞤼𞤢 𞤲𞤣𞤭 𞤫 𞤤𞤢𞤲𞤷𞤵𞤪𞤵. 𞤃𞤭𞤲 𞤥𞤭 𞤶𞤢𞤩𞤢𞤼𞤢𞥄 𞤯𞤵𞤥 𞤸𞤢𞤴 𞤧𞤭 𞤯𞤵𞤥 𞤱𞤮𞤲𞤢𞥄 𞤧𞤢𞤦𞤵 𞤢𞤲. 𞤐𞤣𞤭𞥅 𞤤𞤫𞤴𞤣𞤭 𞤲𞤮 𞤸𞤢𞥄𞤲𞤭 𞤼𞤫𞤣𞥆𞤭𞤲𞤫𞥅𞤣𞤫. 𞤉𞤲 𞤱𞤢𞥄𞤱𞤢𞤼𞤢𞥄 𞤶𞤢𞤩𞤵𞤣𞤫 𞤴𞤮 𞤴𞤮𞤺𞤢𞥄𞤩𞤫 𞤫 𞤥𞤫𞤲 𞤰𞤫𞤼𞥆𞤢𞤲 𞤤𞤫𞤴𞤣𞤭 𞤬𞤮𞤨 𞤨𞤫𞤸𞤫 𞤬𞤭𞥅 𞤸𞤢𞤲𞤣𞤫 𞤳𞤮 𞤳𞤢𞤥𞤩𞤫 𞤸𞤫𞥅𞤪𞤼𞤮𞤣𞤭 𞤫 𞤤𞤢𞥄𞤥𞤵 𞤫 𞤣𞤮𞥅𞤤𞤫 𞤳𞤢𞤻𞤵𞤲 𞤫 𞤶𞤢𞤱𞤤𞤫 𞤤𞤫𞤴𞤣𞤭 𞤲𞤣𞤭𞤲. 𞤊𞤫𞤰𞥆𞤭𞥅 𞤳𞤫𞥅𞤪𞤮𞤤”
𞤉 𞤥𞤭𞥅𞤶𞤮 𞤥𞤢𞤳𞥆𞤮 𞤲𞤺𞤵𞥅 𞤤𞤢𞥄𞤥𞤵 𞤺𞤢𞤴𞤲𞤢𞤲𞤼𞤢𞥄 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲 𞤳𞤮 𞤲𞤢𞤬𞤢𞤼𞤢 𞤲𞤣𞤭 𞤦𞤢𞤲𞤽𞤫 𞤶𞤢𞤥𞤵⹁ 𞤩𞤵𞤩𞤼𞤵⹁ 𞤩𞤢𞤲𞤼𞤢𞤤 𞤫 𞤥𞤢𞤤𞤢𞤤.
𞤉 𞤥𞤭𞥅𞤶𞤮 𞤘𞤢𞤧𞤢𞤥𞤢⹁ 𞤲𞤺𞤮𞥅 𞤧𞤵𞤩𞤮 𞤧𞤢𞥄𞤼𞤭𞤲𞤢𞥄𞤲𞤺𞤫 𞤻𞤢𞤤𞤲𞤣𞤫 𞥑𞥘 𞤒𞤢𞤪𞤳𞤮⹁ 𞤸𞤢𞥄𞤲𞤢𞥄𞤲𞤮 𞤱𞤢𞤯𞤣𞤫 𞤧𞤢𞤦𞤵𞤲𞤢 𞤲𞤺𞤮 𞤱𞤢𞤴𞤤𞤢𞤲𞤼𞤢𞥄 𞤤𞤫𞤴𞤣𞤭 𞤲𞤣𞤭𞤲 𞤸𞤢𞤴 𞤬𞤵𞤧. 𞤅𞤢𞤺𞤮 𞤥𞤢𞤳𞥆𞤮⹁ 𞤴𞤭𞤥𞤩𞤫 𞤤𞤫𞤴𞤣𞤭 𞤲𞤣𞤭𞤲 𞤭𞤥𞥆𞤮𞤼𞤮 𞤸𞤮𞤤𞥆𞤢 𞤤𞤢𞥄𞤥𞤵 𞤲𞤺𞤵𞤲 𞤱𞤮𞤲𞤣𞤫 𞤩𞤫 𞤸𞤢𞥄𞤩𞤭𞥅 𞤲𞤣𞤫𞥅 𞤼𞤢𞤥𞤨𞤫𞤪𞤫⹁ 𞤲𞤺𞤵𞥅 𞤲𞤶𞤢𞤺𞥆𞤵 𞤫 𞤲𞤣𞤫𞥅 𞤦𞤫𞤱𞤪𞤫.
𞤑𞤮𞤲𞤮 𞤫 𞤲𞤣𞤫𞤪 𞤴𞤫𞤱𞤼𞤫𞤪𞤫 𞤲𞤣𞤫 𞤮 𞤱𞤢𞤯𞤭 𞤲𞤣𞤫𞤲⹁ 𞤮 𞤩𞤢𞤲𞤺𞤭𞤲𞤢𞥄𞤤𞤭 𞤲𞤮 𞤤𞤢𞥄𞤩𞤭𞤪𞤭 𞤨𞤫𞤸𞤫 𞤯𞤫 𞤮 𞤢𞤪𞤣𞤭𞤲𞤼𞤢 𞤯𞤫𞤲 𞤬𞤭𞥅 𞤣𞤢𞤪𞤼𞤢𞤺𞤮𞤤 𞤀𞤤𞤬𞤢𞥄 𞤑𞤮𞤲𞤣𞤫 𞤫 𞤤𞤢𞥄𞤥𞤵 𞤥𞤵𞤲.
𞤒𞤮 𞤴𞤭𞤥𞤩𞤫 𞤅𞤫𞤤𞥆𞤵 𞤁𞤢𞤤𞤫𞤲 𞤔𞤢𞤤𞥆𞤮 𞤩𞤫𞤲⹁ 𞤴𞤮 𞤩𞤫 𞤶𞤮𞤳𞥆𞤵 𞤳𞤮 𞤩𞤫 𞤶𞤮𞤳𞥆𞤭𞥞 𞤩𞤫 𞤧𞤫𞤤𞤢 𞤘𞤢𞤧𞤢𞤥𞤢 𞤔𞤢𞥄𞤦𞤭⹁ 𞤫 𞤫𞤩𞥆𞤮𞥅𞤶𞤫 𞤱𞤢𞤳𞥆𞤮 𞤧𞤢𞤬𞤪𞤮𞥅𞤱𞤮 𞤩𞤢𞥄𞤱𞤮 𞤥𞤢𞤴𞤣𞤫𞥞
𞤐𞤮 𞤤𞤢𞤦𞤢𞥄⹁ 𞤮𞤲 𞤶𞤢𞥄𞤪𞤢𞥄𞤥𞤢 𞤬𞤮𞤼𞤢.