𞤀𞤂𞤊𞤀𞥄 𞤑𞤌𞤐𞤁𞤉 𞤚𞤀𞤏𞤀𞥄𞤑𞤀 𞤉 𞤒𞤀𞥄𞤑𞤌𞤈𞤀𞤂 𞤐𞤘𞤀𞤂 𞤊𞤋𞥅 𞤃𞤀𞤂𞤋

 𞤀𞤤𞤬𞤢𞥄 𞤑𞤮𞤲𞤣𞤫  𞤼𞤢𞤱𞤢𞥄𞤳𞤢 𞤫 𞤴𞤢𞥄𞤳𞤮𞤪𞤢𞤤 𞤸𞤮𞥅𞤪𞤫𞥅𞤩𞤫 𞤤𞤫𞤧𞤯𞤫 𞤁𞤫𞤲𞤺𞤸𞤢 ( ECOWAS – CEDEAO) 𞤼𞤭𞤶𞥆𞤢𞥄𞤩𞤫 𞤶𞤢𞤲𞤺𞤮 𞤼𞤮 𞤤𞤢𞥄𞤥𞤮𞤪𞤣𞤫 𞤄𞤢𞤥𞤢𞤳𞤮.

𞤖𞤮𞥅𞤪𞤫𞥅𞤩𞤫 𞤤𞤫𞤧𞤯𞤫 𞤲𞤶𞤮𞤱𞤮 𞤲𞤮 𞤧𞤢𞥄𞤼𞤭𞤲𞤢𞥄 𞤫 𞤼𞤵𞤥𞤦𞤮𞤲𞤣𞤭𞤪𞤢𞤤 𞤥𞤢𞤱𞤲𞤺𞤢𞤤 𞤫𞤩𞥆𞤢𞥄𞤲𞤺𞤢𞤤 𞤶𞤢𞤲𞤺𞤮 𞤫 𞤐𞤢𞥄𞤧𞤢𞥄𞤲𞤣𞤫 𞤻𞤢𞤤𞤲𞤣𞤫 𞥒𞥓 𞤃𞤮𞤪𞤧𞤮 𞤬𞤭𞥅 𞤴𞤫𞤱𞤼𞤵𞤺𞤮𞤤 𞤸𞤢𞤳𞥆𞤵𞤲𞥋𞤣𞤫 𞤁𞤭𞤤𞥆𞤢𞤲𞤣𞤫 M5 𞤲𞤣𞤫𞤲 𞤫 𞤋𞤦𞤪𞤢𞥄𞤸𞤭𞥅𞤥𞤢 𞤄𞤵𞥅𞤦𞤢𞤳𞤢𞤪 𞤑𞤫𞤴𞤼𞤢⹁ 𞤸𞤮𞥅𞤪𞤫𞥅𞤶𞤮 𞤤𞤫𞤧𞤣𞤭 𞤃𞤢𞤤𞤭 𞤲𞤣𞤭𞤲.

𞤖𞤮𞥅𞤪𞤫𞥅𞤩𞤫 𞤲𞤢𞤴𞤮 𞤼𞤢𞤦𞤭𞤲𞤼𞤭𞤲𞤭 𞤼𞤢𞤱𞤫𞤺𞤮𞤤 𞤫 𞤼𞤵𞤥𞤦𞤮𞤲𞥋𞤣𞤭𞤪𞤢𞤤 𞤲𞤺𞤢𞤤. 𞤇𞤫𞤲 𞤳𞤮:

• 𞤃𞤢𞤳𞤭 𞤅𞤢𞥄𞤤 𞤥𞤮 𞤤𞤫𞤧𞤣𞤭 𞤅𞤫𞤲𞤫𞤺𞤢𞤤
• 𞤃𞤵𞤸𞤢𞤥𞥆𞤢𞤣𞤵 𞤒𞤵𞥅𞤧𞤵𞤬𞤵 𞤥𞤮 𞤤𞤫𞤧𞤣𞤭 𞤐𞤭𞥅𞤶𞤫𞤪
• 𞤀𞤤𞤸𞤢𞤧𞤢𞥄𞤲 𞤏𞤢𞤼𞤢𞤪𞤢𞥄 𞤥𞤮 𞤑𞤮𞤼𞤣𞤭𞤾𞤢𞥄𞤪
• 𞤐𞤢𞤲𞤢 𞤀𞤳𞤵𞤬𞤮-𞤀𞤣𞥆𞤮⹁ 𞤸𞤮𞥅𞤪𞤫𞥅𞤶𞤮 𞤘𞤢𞤲𞤢 𞤮𞤲.

𞤐𞤮 𞤼𞤢𞤱𞤢𞥄 𞤫 𞤲𞤺𞤢𞤤 𞤴𞤢𞥄𞤳𞤮𞤪𞤢𞤤 𞤳𞤢𞤣𞤭 𞤴𞤭𞤥𞤩𞤫 𞤼𞤫𞤣𞥆𞤵𞤩𞤫 𞤱𞤢𞤲𞤮 𞤘𞤵𞤣𞤤𞤮𞤳 𞤔𞤮𞤲𞤢𞤼𞤢𞤲⹁ 𞤸𞤮𞥅𞤪𞤫𞥅𞤶𞤮 𞤳𞤭𞤯𞥆𞤮 𞤐𞤭𞤶𞤫𞥅𞤪𞤭𞤴𞤢𞥄 𞤮𞤲⹁ 𞤳𞤢𞤻𞤵𞤲 𞤫 𞤟𞤢𞤲 𞤑𞤵𞤤𞤮𞤣 𞤑𞤢𞤧𞤭 𞤄𞤪𞤵⹁ 𞤸𞤮𞥅𞤪𞤫𞥅𞤶𞤮 𞤘𞤮𞥅𞤥𞤵 𞤁𞤫𞤲𞤺𞤸𞤢 𞤲𞤺𞤵𞤲.

𞤃𞤵𞤸𞤢𞤥𞥆𞤢𞤣𞤵 𞤄𞤵𞤸𞤢𞥄𞤪𞤭 𞤥𞤮 𞤐𞤭𞤶𞤫𞥅𞤪𞤭𞤴𞤢𞥄 𞤲𞤮 𞤼𞤢𞤱𞤢𞤲𞤮𞥅 𞤫 𞤧𞤢𞥄𞤼𞤭𞤲𞤢𞤲𞤮𞥅𞤩𞤫 𞤩𞤫𞤲⹁ 𞤳𞤮𞤲𞤮 𞤫 𞤸𞤫𞤩𞤭𞥅 𞤲𞤺𞤢𞤲𞤼𞤮. 𞤖𞤢𞤳𞥆𞤵𞤲𞤣𞤫 𞤸𞤮𞥅𞤪𞤫𞥅𞤩𞤫 𞤤𞤫𞤧𞤯𞤫 𞤸𞤵𞥅𞤩𞤵𞤼𞤵𞤯𞤫 𞤯𞤫𞤲 𞤃𞤢𞤤𞤭⹁ 𞤳𞤮 𞤀𞤤𞤬𞤢𞥄 𞤑𞤮𞤲𞤣𞤫 𞤥𞤮 𞤘𞤭𞤲𞤫 𞤫 𞤃𞤢𞤪𞤳 𞤑𞤢𞤦𞤮𞥅𞤪𞤫 𞤥𞤮 𞤄𞤵𞤪𞤳𞤭𞤲𞤢 𞤱𞤮𞤲𞤭 𞤼𞤢𞤱𞤢𞥄𞤳𞤢 𞤫 𞤴𞤢𞥄𞤳𞤮𞤪𞤢𞤤 𞤭𞤥𞥆𞤭𞤲𞤢𞥄𞤲𞤺𞤢𞤤 𞤲𞤺𞤢𞤤.

𞤂𞤭𞤣𞥆𞤭𞥅𞤩𞤫 𞤤𞤢𞥄𞤥𞤵 𞤲𞤺𞤵𞤲 𞤃𞤢𞤤𞤭 𞤸𞤮𞤤𞥆𞤭𞥅𞤲𞤮 𞤱𞤮𞤲𞤣𞤫 𞤩𞤫 𞤸𞤮𞥅𞤤𞤢𞥄𞤳𞤭 𞤀𞤤𞤬𞤢𞥄 𞤑𞤮𞤲𞤣𞤫 𞤧𞤢𞤦𞤵 𞤮 𞤲𞤵𞤲𞤯𞤢𞥄. 𞤉 𞤼𞤵𞤥𞤦𞤮𞤲𞤣𞤭𞤪𞤢 𞤸𞤮𞥅𞤪𞤫𞥅𞤩𞤫 𞤤𞤫𞤧𞤯𞤫 𞤅𞤢𞤸𞤫𞤤 𞤯𞤫𞤲⹁ 𞤀𞤤𞤬𞤢𞥄 𞤑𞤮𞤲𞤣𞤫 𞤩𞤢𞤲𞤺𞤭𞤲𞥆𞤮 𞤱𞤮𞤲𞤣𞤫𞤥𞤢 𞤮𞤥𞤮 𞤱𞤮𞤲𞤢𞤲𞤭 𞤋𞤦𞤪𞤢𞥄𞤸𞤭𞥅𞤥𞤢 𞤄𞤵𞥅𞤦𞤢𞤳𞤢𞤪 𞤑𞤫𞤴𞤼𞤢 𞤳𞤢𞤻𞤵𞤲 𞤫 𞤻𞤫𞤥𞤼𞤭𞤲𞤺𞤮𞤤 𞤁𞤮𞤧𞤼𞤫𞤪𞤫 𞤃𞤢𞤤𞤭. 𞤌 𞤱𞤭𞤭 𞤳𞤢𞤣𞤭 𞤺𞤭𞤤𞤢 𞥒𞥐𞥑𞥔⹁ 𞤘𞤭𞤲𞤫 𞤲𞤮 𞤲𞤢𞤩𞤭𞥅 𞤧𞤮𞥅𞤪𞤭𞥅𞤩𞤫 𞥘𞥐𞥐 𞤫 𞤲𞤣𞤫𞤪 𞤤𞤫𞤧𞤣𞤭 𞤃𞤢𞤤𞤭.

𞤐𞤮 𞤱𞤮𞥅𞤣𞤭 𞤱𞤭𞤵𞤩𞤫 𞤱𞤮𞤲𞤣𞤫 𞤶𞤵𞥅𞤯𞤫 𞤀𞤤𞤬𞤢𞥄 𞤑𞤮𞤲𞤣𞤫 𞤲𞤮 𞤼𞤢𞤱𞤢𞥄 𞤫 𞤱𞤢𞤪𞤲𞤺𞤮 𞤱𞤢𞤯𞤵𞤲𞥋𞤺𞤮 𞤲𞤺𞤮𞤲 𞤃𞤢𞤤𞤭 𞤦𞤢𞤯𞤼𞤢𞤲𞤫 𞤧𞤫𞤨𞥆𞤵𞤪𞤵 𞤧𞤢𞤳𞥆𞤭𞤼𞤭𞥅𞤲𞤣𞤵 𞤱𞤢𞤯𞤵𞤲𞥋𞤣𞤵 𞤲𞤣𞤵𞤲 𞤄𞤢𞤥𞤢𞤳𞤮.