𞤃𞤀𞤂𞤋: 𞤖𞤌𞤂 𞤏𞤌𞤐𞤋 𞤇𞤉𞤐 𞤊𞤌𞤂𞥆𞤓𞤇𞤉 𞤋𞤄𞤑؟
𞤃𞤢𞤤𞤭: 𞤖𞤮𞤤 𞤱𞤮𞤲𞤭 𞤩𞤫𞤲 𞤬𞤫𞤱𞤶𞤵𞤩𞤫 𞤬𞤮𞤤𞥆𞤵𞤺𞤮𞤤 𞤋𞤦𞤪𞤢𞥄𞤸𞤭𞥅𞤥𞤢 𞤄𞤵𞥅𞤦𞤢𞤳𞤢𞤪 𞤑𞤫𞤴𞤼𞤢؟
𞤇𞤢𞥄𞤱𞤮 𞤋𞤄𞤑 𞤨𞤮𞤼𞥆𞤭𞤲𞤫𞥅𞤣𞤫 𞤳𞤢 𞤤𞤢𞥄𞤥𞤵 𞤸𞤢𞤲𞤳𞤭⹁ 𞤸𞤢𞤲𞤣𞤫 𞤦𞤭𞤥𞤦𞤭 𞤤𞤢𞤱 𞤫 𞤲𞤶𞤫𞤧𞤤𞤢𞥄𞤪𞤫 (𞤢𞤤𞤢𞤪𞤦𞤢) 𞤸𞤫𞤣𞥆𞤫 𞤲𞤶𞤢𞤥𞤣𞤭 𞤼𞤢𞤼𞤭 𞤫 𞤬𞤫𞤷𞥆𞤫𞤪𞤫⹁ 𞤧𞤮𞥅𞤪𞤭𞥅𞤩𞤫 𞤬𞤮𞤤𞥆𞤵𞤩𞤫 𞤥𞤮 𞤩𞤫𞤲 𞤴𞤢𞤤𞤼𞤵𞤲𞤮 𞤳𞤢 𞤰𞤫𞤱𞤤𞤵 (𞤼𞤫𞤤𞤫) 𞤃𞤢𞤤𞤭 𞤩𞤫 𞤸𞤮𞤤𞥆𞤭𞤼𞤭 𞤱𞤮𞤲𞤣𞤫 𞤩𞤫 𞤧𞤭𞤲𞤷𞤭𞥅 𞤣𞤫𞤲𞤼𞤢𞤤 𞤳𞤮 𞤢𞤪𞤣𞤮𞥅 𞤳𞤫𞤲𞤫 𞤤𞤫𞤧𞤣𞤭 𞤃𞤢𞤤𞤭 𞤲𞤣𞤭𞤲.
𞤑𞤮 𞤋𞤧𞤥𞤢𞥄𞤴𞤭𞥅𞤤𞤢 𞤏𞤢𞤺𞤫⹁ 𞤼𞤵𞤺𞤢𞤤𞥆𞤮 𞤥𞤢𞤱𞤯𞤮 (𞤳𞤮𞤤𞤮𞤲𞤫𞤤 𞤥𞤢𞤶𞤮𞤪) 𞤳𞤢 𞤳𞤮𞤲𞤵 𞤱𞤮𞤲𞤭 𞤳𞤮 𞤸𞤢𞤤𞤬𞤭𞤲𞤢𞥄 𞤳𞤮𞤲𞤺𞤮𞤤 𞤣𞤫𞤲𞤼𞤢𞤤 𞤧𞤮𞥅𞤪𞤭𞥅𞤩𞤫 𞤭𞤲𞥆𞤭𞤼𞤭𞥅𞤲𞤺𞤢𞤤 𞤘𞤮𞥅𞤥𞤵 𞤘𞤫𞤲𞤣𞤭𞤲𞤳𞤫𞤸𞤵 𞤊𞤭𞥅 𞤑𞤭𞤧𞤢𞤤 𞤈𞤫𞤲𞤣𞤮 (𞤘𞤘𞤑𞤈). 𞤌 𞤸𞤮𞤤𞥆𞤭𞤼𞤭 𞤫 𞤭𞤲𞤣𞤫 𞤲𞤺𞤵𞥅 𞤘𞤮𞥅𞤥𞤵 𞤱𞤮𞤲𞤣𞤫 𞤩𞤫 𞤶𞤮𞥅𞤯𞥆𞤭𞤲𞤢𞤴 𞤶𞤢𞥄𞤺𞤮𞤪𞤢𞤤 𞤸𞤭𞤤𞤲𞤮𞤼𞤮𞥅𞤲𞤺𞤢𞤤 𞤲𞤮 𞤧𞤵𞤩𞤮 𞤥𞤢𞤱𞤲𞤺𞤮 𞤤𞤢𞥄𞤼𞤮𞤪𞤢 𞤫 𞤲𞤣𞤫𞤪 𞤤𞤫𞤧𞤣𞤭 𞤃𞤢𞤤𞤭. 𞤌 𞤴𞤢𞤥𞤭𞤪𞤭 𞤺𞤮𞤤𞥆𞤮𞥅𞤩𞤫 𞤩𞤫𞤲 𞤬𞤮𞤨 𞤪𞤵𞤼𞥆𞤢𞤺𞤮𞤤 𞤳𞤢 𞤺𞤮𞤤𞥆𞤫 𞤥𞤵𞤲. 𞤌 𞤬𞤮𞤣𞤭 𞤳𞤢𞤣𞤭 𞤱𞤮𞤲𞤣𞤫 𞤺𞤮𞥅𞤥𞤵 𞤲𞤺𞤵𞤲 𞤸𞤵𞤩𞤲𞤢𞤴⹁ 𞤻𞤫𞤥𞤼𞤭𞤲𞤢 𞤳𞤢𞤤𞤢 𞤸𞤢𞤤𞤣𞤭𞤺𞤢𞤤 𞤲𞤺𞤢𞤤 𞤃𞤢𞤤𞤭 𞤼𞤢𞤱𞤢𞥄 𞤫 𞤥𞤵𞤲. 𞤌 𞤸𞤮𞤤𞥆𞤭𞤼𞤭 𞤳𞤢𞤣𞤭 𞤱𞤮𞤲𞤣𞤫 𞤳𞤫𞥅𞤪𞤭 𞤯𞤭𞤲 𞤳𞤢 𞤤𞤫𞤴𞤣𞤭⹁ 𞤳𞤢 𞤲𞤣𞤭𞤴𞤢𞤥 𞤫 𞤳𞤢 𞤱𞤫𞥅𞤴𞤮 𞤬𞤮𞤨 𞤥𞤢𞤩𞥆𞤢𞥄𞤥𞤢. 𞤌 𞤴𞤢𞤥𞤭𞤪𞤭 𞤴𞤭𞤥𞤩𞤫 𞤩𞤫𞤲 𞤬𞤮𞤬 𞤸𞤫𞤰𞤵𞤺𞤮𞤤 𞤫 𞤺𞤢𞤤𞥆𞤫 𞤥𞤵𞤲 𞤸𞤢𞤳𞥆𞤵𞤲𞥋𞤣𞤫 𞤲𞤶𞤢𞤥𞤣𞤭 𞤶𞤫𞥅𞤲𞤢𞤴 (𞥙) 𞤳𞤭𞥅𞤳𞤭𞥅𞤯𞤫 𞤸𞤢𞥄 𞤲𞤶𞤢𞤥𞤣𞤭 𞤶𞤮𞤱𞤭 𞤦𞤭𞤥𞤦𞤭.
𞤌 𞤸𞤮𞤤𞥆𞤭 𞤳𞤢𞤣𞤭 𞤳𞤮 𞤱𞤮𞤲𞤭 𞤧𞤢𞤦𞤵 𞤩𞤫 𞤬𞤮𞤤𞥆𞤵𞤣𞤫 𞤋𞤄𞤑. 𞤌 𞤱𞤭𞤭: “𞤆𞤮𞥅𞤯𞤮𞤲𞥋𞤣𞤭𞤪𞤢𞤤 𞤲𞤺𞤢𞤤 𞤳𞤢 𞤣𞤢𞤱𞤪𞤮 𞤫 𞤳𞤢 𞤪𞤫𞤲𞤣𞤮 𞤤𞤮𞤭𞤲𞤭𞥅 𞤴𞤭𞥅𞤤𞤮𞥅𞤣𞤫 𞤤𞤫𞤧𞤣𞤭 𞤃𞤢𞤤𞤭 𞤳𞤮 𞤩𞤮𞥅𞤴𞤭. 𞤙𞤢𞤤𞤲𞤣𞤫 𞤦𞤫𞥅 𞤻𞤢𞤤𞤲𞤣𞤫⹁ 𞤃𞤢𞤤𞤭 𞤲𞤮 𞤩𞤵𞤪𞤼𞤵𞤣𞤫 𞤴𞤢𞤲𞤵𞤣𞤫 𞤫 𞤶𞤭𞥅𞤩𞤮𞤤𞤣𞤵 𞤫 𞤢𞤲𞤺𞤢𞤤 𞤳𞤭𞤧𞤢𞤤 𞤧𞤢𞤦𞤵 𞤴𞤭𞤥𞤩𞤫 𞤸𞤢𞤤𞤬𞤭𞤲𞤢𞥄𞤩𞤫 𞤩𞤫𞤲 𞤢𞤪𞤣𞤢𞤺𞤮𞤤 𞤤𞤫𞤧𞤣𞤭 𞤲𞤣𞤭. 𞤁𞤫𞤥𞤮𞤳𞤢𞤪𞤢𞥄𞤳𞤵 𞤼𞤭𞤺𞤭 𞤼𞤭𞤺𞤭 𞤴𞤢𞤸𞤣𞤢𞤼𞤢𞥄 𞤫 𞤱𞤫𞤤𞤧𞤭𞤲𞤣𞤢𞥄𞤪𞤫 𞤥𞤢𞥄 𞤤𞤮𞤫𞤪𞤫 𞤤𞤢𞥄𞤥𞤵 𞤸𞤢𞥄𞤲𞤵𞤲𞥋𞤺𞤵 𞤼𞤢𞤦𞤭𞤲𞤼𞤭𞤲𞤣𞤫 𞤲𞤣𞤭𞤥𞤵 𞤫 𞤳𞤭𞤧𞤢𞤤 𞤪𞤫𞤲𞤣𞤮 𞤲𞤺𞤮𞤲.”
𞤑𞤮𞤲𞤮 𞤮 𞤴𞤫𞤱𞤼𞤢𞥄𞤤𞤭 𞤸𞤵𞥅𞤱𞤲𞤣𞤫 𞤳𞤮 𞤬𞤢𞤯𞥆𞤭𞥅 𞤫 𞤱𞤮𞤲𞥆𞤮𞥅𞤯𞤮 𞤮𞤲 𞤸𞤮𞥅𞤪𞤫 𞤃𞤢𞤤𞤭 𞤬𞤢𞥄 𞤸𞤢𞤲𞤳𞤭.
𞤑𞤮 𞤧𞤮𞥅𞤪𞤭𞥅𞤩𞤫 𞤧𞤢𞤨𞥆𞤮𞤴-𞤫-𞤲𞤶𞤮𞤱𞤮 (𞥑𞥕) 𞤱𞤮𞤲𞤭 𞤳𞤮 𞤼𞤢𞤱𞤢𞥄 𞤫 𞤲𞤺𞤵𞥅 𞤘𞤮𞥅𞤥𞤵 (𞤘𞤘𞤑𞤈). 𞤑𞤮𞤲𞤮 𞤬𞤫𞤱𞤶𞤵𞤩𞤫 𞤩𞤫𞤲 𞤬𞤭𞥅 𞤬𞤮𞤤𞥆𞤵𞤺𞤮𞤤 𞤋𞤦𞤪𞤢𞥄𞤸𞤭𞥅𞤥𞤢 𞤄𞤵𞥅𞤦𞤢𞤳𞤢𞤪 𞤑𞤫𞤴𞤼𞤢 𞤳𞤮 𞤩𞤫 𞤼𞤢𞤼𞤮. 𞤇𞤫𞤲 𞤳𞤮 𞤚𞤵𞤺𞤢𞤤𞥆𞤮 𞤃𞤢𞥄𞤤𞤭𞤳 𞤔𞤢𞥄𞤱⹁ 𞤫 𞤚𞤵𞤺𞤢𞤤𞥆𞤮 𞤅𞤢𞥄𞤶𞤮 𞤑𞤢𞤥𞤢𞤪𞤢𞥄 𞤳𞤢𞤻𞤵𞤲 𞤫 𞤑𞤵𞥅𞤩𞤢𞤤𞥆𞤮 𞤑𞤮𞤲𞤵 𞤅𞤢𞤴𞤳𞤵 𞤊𞤢𞤲𞤼𞤢 𞤥𞤢𞤣𞤭 𞤁𞤫𞤥𞤦𞤫𞤤𞤫.
𞤑𞤮 𞤼𞤵𞤺𞤢𞤤𞥆𞤮 𞤔𞤢𞥄𞤱 𞤱𞤮𞤲𞤭 𞤳𞤮 𞤬𞤵𞤯𞥆𞤭 𞤥𞤵𞤪𞤼𞤢𞤤 𞤲𞤺𞤢𞤤 𞤳𞤢 𞤣𞤢𞥄𞤳𞤮𞤪𞤣𞤫 𞤑𞤢𞤼𞤭. 𞤑𞤮 𞤳𞤢𞤲𞤳𞤮 𞤳𞤢𞤣𞤭 𞤱𞤮𞤲𞤭 𞤳𞤮 𞤴𞤢𞤥𞤭𞤪𞤭 𞤋.𞤄.𞤑 𞤴𞤮 𞤮 𞤭𞤱𞤵 𞤳𞤢 𞤤𞤢𞥄𞤥𞤵. 𞤑𞤮 𞤳𞤢𞤲𞤳𞤮 𞤤𞤢𞥄𞤼𞤭𞤲𞤮𞥅 𞤷𞤵𞤳𞥆𞤮 𞤸𞤮𞥅𞤪𞤫𞥅𞤶𞤮 𞤣𞤢𞥄𞤳𞤮𞤪𞤣𞤫 𞤑𞤢𞤼𞤭 𞤲𞤣𞤫𞤲.
𞤚𞤵𞤺𞤢𞤤𞥆𞤮 𞤅𞤢𞥄𞤶 𞤑𞤢𞤥𞤢𞤪𞤢𞥄 𞤤𞤢𞥄𞤼𞤭𞤲𞤮𞥅 𞤴𞤭𞥅𞤤𞤮𞥅𞤱𞤮 𞤮𞤲 𞤳𞤢 𞤫𞤤𞤼𞤭𞤪𞤣𞤫 𞤳𞤮𞤲𞤵 𞤑𞤢𞤼𞤭 𞤸𞤢𞥄 𞤲𞤣𞤫 𞤮 𞤲𞤢𞤩𞤭𞤪𞤢𞤲𞤮𞥅 𞤈𞤮𞥅𞤧𞤭𞤴𞤢 𞤬𞤭𞥅 𞤫𞤤𞤼𞤢𞤺𞤮𞤤. 𞤑𞤮 𞤫 𞥑𞥙𞥗𞥙 𞤮 𞤶𞤭𞤦𞤭𞤲𞤢𞥄.
𞤑𞤵𞥅𞤩𞤢𞤤𞥆𞤮 𞤅𞤢𞤴𞤳𞤵 𞤊𞤢𞤲𞤼𞤢𞤥𞤢𞤣𞤭 𞤁𞤫𞤥𞤦𞤫𞤤𞤫 𞤱𞤮𞤲𞤭 𞤴𞤭𞥅𞤤𞤮𞥅𞤱𞤮 𞤐𞤶𞤵𞤩𞥆𞤵𞤣𞤭 𞤀𞤤𞤭𞤱𞤵𞥅𞤲 𞤄𞤤𞤮𞤲𞤣𞤫𞤲 𞤄𞤫𞤴 𞤬𞤭𞥅 𞤩𞤵𞤩𞤼𞤵. 𞤑𞤮 𞤫 𞤣𞤵𞥅𞤶𞤮 𞥒𞥐𞥑𞥘 𞤮 𞤩𞤫𞤴𞤣𞤢𞤲𞤢𞥄 𞤣𞤢𞤪𞤲𞤣𞤫 𞤳𞤢 𞤳𞤮𞤲𞤵⹁ 𞤮 𞤱𞤢𞤯𞤢𞥄 𞤳𞤵𞥅𞤩𞤢𞤤𞥆𞤮. 𞤑𞤮 𞤮 𞤶𞤢𞤲𞤺𞤵𞤯𞤮 𞤼𞤢𞥄𞤪𞤭𞥅𞤳𞤢 𞤫 𞤻𞤫𞥅𞤻𞤮 𞤫 𞤶𞤢𞥄𞤩𞤭-𞤸𞤢𞤼𞥆𞤭𞤪𞤤𞤫 𞤊𞤢𞤪𞤢𞤲𞤧𞤭 𞤫 𞤔𞤢𞤪𞤥𞤢𞤲𞤭𞥅 (𞤀𞤤𞤥𞤢𞤲).
𞤌𞤲 𞤱𞤫𞤤𞤼𞤢𞤲𞤢𞥄𞤥𞤢 𞤧𞤢𞤲𞥆𞤫
𞤇𞤫𞥅 𞤶𞤢𞥄𞤪𞤢𞥄𞤥𞤢