𞤃𞤀𞤑𞤋 𞤅𞤀𞤂 𞤚𞤌𞤈𞤋𞤑𞤉 𞤖𞤀𞤒𞤊𞤋𞤐𞤘𞤌𞤂 𞤂𞤉𞤚𞥆𞤉 𞤍𞤉𞤐 𞤖𞤌𞥅𞤈𞤉 𞤃𞤀𞤂𞤋

𞤃𞤢𞤳𞤭 𞤅𞤢𞤤⹁ 𞤖𞤮𞥅𞤪𞤫𞥅𞤶𞤮 𞤤𞤫𞤧𞤣𞤭 𞤅𞤫𞤲𞤫𞤺𞤢𞤤 𞤲𞤣𞤭𞤲 𞤼𞤮𞤪𞤭𞤳𞤫 𞤴𞤫𞤪𞤮𞤲𞥋𞤣𞤭𞤪𞤢𞥄𞤩𞤫 𞤥𞤢𞤳𞥆𞤮 𞤩𞤫𞤲 𞤳𞤢 𞤁𞤫𞤲𞤼𞤢𞤤 𞤖𞤭𞤪𞤲𞤢 𞤀𞤬𞤪𞤭𞤳𞤢𞥄 𞤼𞤢𞤧𞤳𞤭𞤼𞤢𞤺𞤮𞤤 𞤨𞤫𞤸𞤫 𞤯𞤫 𞤩𞤫 𞤫𞤩𞥆𞤵𞤲𞤮𞥅 𞤯𞤫𞤲 𞤤𞤫𞤼𞥆𞤭𞤪𞤣𞤫 𞤧𞤮𞥅𞤪𞤭𞥅𞤩𞤫 𞤬𞤮𞤤𞥆𞤵𞤩𞤫 𞤋𞤄𞤑 𞤩𞤫𞤲 𞤬𞤭𞥅 𞤱𞤮𞤼𞤢 𞤩𞤫 𞤼𞤢𞤥𞤨𞤭𞤲𞤮𞤪 𞤴𞤭𞤥𞤩𞤫 𞤃𞤢𞤤𞤭 𞤩𞤫𞤥.

𞤌 𞤼𞤮𞤪𞤭𞥅 𞤭𞤼𞥆𞤭𞤲𞤼𞤭𞤲𞤺𞤮𞤤 𞤻𞤢𞤥𞤯𞤭 𞤸𞤭𞤼𞥆𞤵𞤯𞤭⹁ 𞤫 𞤳𞤵𞤩𞥆𞤢𞤲 𞤳𞤢𞤻𞤵𞤲 𞤫 𞤤𞤫𞤳𞥆𞤫𞥅𞤤𞤫 𞤻𞤢𞤱𞤲𞤣𞤭𞤪𞤯𞤫 𞤯𞤫𞤲 𞤫 𞤨𞤭𞥅𞤶𞤭 𞤸𞤢𞤯𞤢𞤲𞤮𞥅𞤯𞤭 𞤯𞤭𞤲 𞤲𞤢𞥄𞤼𞤵𞤺𞤮𞤤 𞤃𞤢𞤤𞤭. 𞤸𞤮𞥅𞤪𞤫𞥅𞤩𞤫 𞤣𞤢𞤲𞤼𞤢𞤤 𞤲𞤺𞤢𞤤 𞤶𞤢𞤩𞤢𞤲𞤭𞥅 𞤥𞤮 𞤲𞤣𞤫𞥅 𞤬𞤫𞤸𞤪𞤫. 𞤇𞤫 𞤼𞤢𞤱𞤲𞤮𞤪𞤢𞤴 𞤲𞤣𞤫 𞤳𞤢 𞤣𞤢𞤣𞤭𞤼𞤮𞤤 𞤲𞤺𞤮𞤤 𞤩𞤫 𞤴𞤢𞤤𞤼𞤭𞤲𞤼𞤢 𞤷𞤢𞤺𞥆𞤢𞤤 𞤼𞤵𞤥𞤦𞤮𞤲𞥋𞤣𞤭𞤪𞤢𞤤 𞤥𞤢𞤩𞥆𞤫 𞤸𞤢𞤲𞤣𞤫 𞤫 𞤲𞤢𞥄𞤧𞤢𞥄𞤲𞤣𞤫⹁ 𞥒𞥐 𞤔𞤵𞤳𞤮 𞥒𞥐𞥒𞥐.

𞤄𞤢𞤯𞤼𞤢𞤲𞤫 𞤬𞤮𞤤𞥆𞤮 𞤲𞤺𞤮𞤲 𞤃𞤢𞤤𞤭⹁ 𞤸𞤮𞥅𞤪𞤫𞥅𞤩𞤫 𞤁𞤫𞤐𞤘𞤖𞤀 𞤩𞤫𞤲 𞤼𞤭𞤲𞤼𞤵𞤣𞤵𞤲𞤮⹁ 𞤩𞤫 𞤴𞤢𞤤𞤼𞤭𞤲𞤭 𞤳𞤮𞤲𞤺𞤮𞤤 𞤦𞤢𞤥𞤦𞤢𞤲𞤺𞤮𞤤 𞤋𞤄𞤑⹁ 𞤽𞤭𞤻𞤵𞤲𞤺𞤮𞤤 𞤬𞤮𞤤𞥆𞤮 𞤲𞤺𞤮 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤱𞤢𞤯𞤭⹁ 𞤴𞤢𞤥𞤭𞤪𞤲𞤺𞤮𞤤 𞤳𞤢𞤣𞤭 𞤴𞤮 𞤤𞤫𞤴𞤯𞤫 𞤸𞤭𞤪𞤲𞤢 𞤀𞤬𞤪𞤭𞤳𞤢𞥄 𞤯𞤫𞤲 𞤬𞤮𞤬 𞤥𞤢𞤩𞥆𞤢𞤲 𞤃𞤢𞤤𞤭 𞤳𞤫𞥅𞤪𞤭 𞤥𞤢𞤩𞥆𞤫 𞤯𞤭𞤲. 𞤇𞤫 𞤬𞤫𞤱𞤶𞤭 𞤳𞤢𞤣𞤭 𞤤𞤫𞤼𞥆𞤵𞤺𞤮𞤤 𞤳𞤢𞤤𞤢 𞤼𞤢𞤱𞤢𞥄𞤯𞤮 𞤫 𞤱𞤮𞤲𞤢𞤲𞤯𞤮 𞤬𞤮𞤤𞥆𞤮 𞤲𞤺𞤮𞤲.

𞤑𞤮𞤲𞤮 𞤢𞤤𞤢𞥄 𞤳𞤮 𞤩𞤫𞥅 𞤸𞤮𞥅𞤪𞤫𞥅𞤩𞤫 𞤖𞤭𞤪𞤲𞤢 𞤀𞤬𞤪𞤭𞤳𞤢𞥄 𞤱𞤢𞥄𞤱𞤭 𞤱𞤢𞤯𞤵𞤣𞤫 𞤶𞤮𞥅𞤲𞤭⹁ 𞤲𞤣𞤫 𞤼𞤢𞤱𞤲𞤮𞥅 𞤸𞤮𞥅𞤪𞤫𞥅𞤶𞤮 𞤊𞤢𞤪𞤢𞤲𞤧𞤭 𞤥𞤮 𞤩𞤫 𞤻𞤫𞤥𞤼𞤭𞤲𞤼𞤢 𞤮𞤲 𞤰𞤫𞤼𞥆𞤢𞥄𞤤𞤭 𞤨𞤫𞤸𞤫 𞤤𞤫𞤼𞥆𞤭𞤪𞤯𞤫 𞤧𞤮𞥅𞤪𞤭𞥅𞤩𞤫 𞤃𞤢𞤤𞤭 𞤩𞤫𞤲⹁ 𞤫 𞤲𞤣𞤫 𞤼𞤢𞤱𞤲𞤮𞥅 𞤳𞤢𞤣𞤭 𞤮 𞤤𞤢𞤲𞤣𞤢𞥄𞤳𞤭 𞤢𞤪𞤼𞤭𞤪𞤺𞤮𞤤 𞤋𞤄𞤑 𞤸𞤮𞥅𞤪𞤫 𞤃𞤢𞤤𞤭. 𞤑𞤮 𞤮 𞤤𞤢𞤲𞤣𞤭𞤲𞤮𞥅 𞤼𞤢𞤲⹁ 𞤳𞤮 𞤴𞤮 𞤋𞤄𞤑 𞤫 𞤴𞤭𞤥𞤩𞤫 𞤲𞤢𞤲𞤺𞤢𞥄𞤩𞤫 𞤩𞤫𞤲 𞤢𞤷𞥆𞤭𞤼𞤫. 𞤉 𞤸𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤕𞤢𞤴𞤲𞤢 𞤫 𞤈𞤮𞥅𞤧𞤭𞤴𞤢 𞤧𞤢𞤤𞤭𞤳𞤫 𞤴𞤮 𞤐𞤔𞤵𞤩𞥆𞤵𞤣𞤭 𞤘𞤫𞤲𞤯𞤭 𞤊𞤮𞤼𞥆𞤵𞤯𞤭 (ONU – UN) 𞤰𞤫𞤼𞥆𞤵 𞤨𞤫𞤸𞤫 𞤤𞤫𞤼𞥆𞤭𞤪𞤯𞤫 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤃𞤢𞤤𞤭.

𞤑𞤮 𞤥𞤢𞥄𞤨𞤭𞤲𞤭 𞤴𞤮𞤺𞤢 𞤫 𞤸𞤮𞥅𞤪𞤫𞥅𞤩𞤫 𞤖𞤭𞤪𞤲𞤢 𞤀𞤬𞤪𞤭𞤳𞤢𞥄 𞤩𞤫𞤲⹁ 𞤳𞤮 𞤱𞤮𞤼𞤢 𞤧𞤮𞥅𞤪𞤭𞥅𞤩𞤫 𞤥𞤢𞤩𞥆𞤫 𞤩𞤫𞤲 𞤻𞤫𞤥𞤦𞤵 𞤩𞤫𞥅 𞤩𞤫 𞤃𞤢𞤤𞤭. 𞤅𞤢𞤦𞤵𞤲𞤢 𞤧𞤮 𞤬𞤮𞤤𞥆𞤮 𞤲𞤺𞤮𞤲 𞤃𞤢𞤤𞤭 𞤼𞤢𞤦𞤭𞤼𞤭𞥅⹁ 𞤸𞤢𞤪𞤢 𞤳𞤢𞤣𞤭 𞤲𞤺𞤮 𞤤𞤮𞤪𞥆𞤢𞥄𞤤𞤭 𞤧𞤮𞥅𞤪𞤭𞥅𞤩𞤫 𞤩𞤫𞤲⹁ 𞤯𞤵𞤥 𞤲𞤮 𞤱𞤢𞥄𞤱𞤭 𞤧𞤵𞥅𞤧𞤭𞤲𞤣𞤫 𞤩𞤫 𞤬𞤢𞥄𞤤𞤢𞥄𞤩𞤫 𞤻𞤫𞤥𞤦𞤵𞤺𞤮𞤤 𞤩𞤫.