𞤅𞤌𞥅𞤈𞤋𞥅𞤇𞤉 𞤊𞤌𞤂𞥆𞤓𞤇𞤉 𞤋𞤄𞤑 𞤇𞤉𞤐 𞤐𞤌 𞤊𞤀𞥄𞤂𞤀 𞤂𞤀𞥄𞤃𞤀𞥄𞤁𞤉 𞤁𞤓𞥅𞤇𞤋 𞤚𞤀𞤚𞤋

𞤃𞤢𞤤𞤭: 𞤅𞤮𞥅𞤪𞤭𞥅𞤩𞤫 𞤬𞤮𞤤𞥆𞤵𞤩𞤫 𞤋𞤦𞤪𞤢𞥄𞤸𞤭𞤥𞥆𞤢 𞤄𞤵𞥅𞤦𞤢𞤳𞤢𞤪 𞤑𞤫𞤴𞤼𞤢 𞤲𞤮 𞤬𞤢𞥄𞤤𞤢𞥄 𞤶𞤮𞤺𞤢𞥄𞤣𞤫 𞤤𞤢𞥄𞤥𞤵 𞤲𞤺𞤵𞤲 𞤬𞤭𞥅 𞤣𞤵𞥅𞤩𞤭 𞤼𞤢𞤼𞤭. 𞤇𞤫 𞤲𞤫𞤱𞤲𞤭𞥅 𞤳𞤢𞤣𞤭 𞤢𞤷𞥆𞤭𞤼𞤵𞤺𞤮𞤤 𞤋.𞤄.𞤑. 𞤑𞤮 𞤯𞤵𞤥 𞤩𞤫 𞤩𞤢𞤲𞤺𞤭𞤲𞤢𞤲𞤭 𞤲𞤭𞤤𞥆𞤢𞥄𞤩𞤫 𞤁𞤫𞤐𞤘𞤀 𞤩𞤫𞤲 (𞤁𞤫𞤲𞤼𞤢𞤤 𞤐𞤺𞤢𞤤𞤵𞤲𞤳𞤫𞤱𞤢𞤤 𞤖𞤭𞤪𞤲𞤢 𞤀𞤬𞤪𞤭𞤳𞤢𞥄).

𞤘𞤭𞤤𞤢 𞤸𞤮𞤪𞤦𞤭𞥅𞤪𞥆𞤫⹁ 𞤻𞤢𞤤𞤲𞤣𞤫 𞥒𞥒 𞤔𞤵𞤳𞤮⹁ 𞤘𞤵𞤣𞤤𞤮𞤳 𞤔𞤮𞤲𞤢𞤼𞤢𞤲 𞤲𞤮 𞤄𞤢𞤥𞤢𞤳𞤮 𞤫 𞤭𞤲𞤣𞤫 𞤁𞤫𞤐𞤘𞤖𞤀 𞤲𞤺𞤢𞤥 𞤼𞤭𞤲𞤼𞤵𞤣𞤵𞤺𞤮𞤤 𞤫 𞤧𞤮𞥅𞤪𞤭𞥅𞤩𞤫 𞤩𞤫𞤲.

𞤅𞤮𞥅𞤪𞤭𞥅𞤩𞤫 𞤩𞤫𞤲 𞤳𞤮 𞤬𞤢𞥄𞤤𞤭𞤪𞤢𞤲𞤢𞥄 𞤤𞤢𞥄𞤥𞤢𞥄𞤣𞤫 𞤣𞤵𞥅𞤩𞤭 𞤼𞤢𞤼𞤭⹁ 𞤳𞤮 𞤲𞤮 𞤩𞤫 𞤼𞤢𞤧𞤳𞤮𞤪𞤮𞥅 𞤬𞤮𞤲𞤣𞤮𞥅𞤣𞤫 𞤤𞤢𞤪𞤢𞤤 𞤃𞤢𞤤𞤭 𞤲𞤺𞤢𞤤. 𞤉 𞤫𞤩𞥆𞤮𞥅𞤪𞤫 𞤥𞤢𞤩𞥆𞤫 𞤲𞤣𞤫 𞤩𞤫 𞤢𞤪𞤣𞤭𞤲𞤭⹁ 𞤫𞤩𞤫 𞤬𞤢𞥄𞤤𞤢𞥄 𞤳𞤢𞤣𞤭 𞤴𞤮 𞤶𞤢𞥄𞤺𞤮𞤪𞤢𞤤 𞤲𞤺𞤢𞤤 𞤯𞤵𞤯𞥆𞤭𞤲𞤮𞤪 𞤧𞤮𞥅𞤪𞤭𞥅𞤩𞤫 𞤩𞤫𞤲. 𞤖𞤢𞤴 𞤧𞤮 𞤩𞤫 𞤤𞤢𞥄𞤼𞤢𞥄𞤳𞤭 𞤩𞤫𞤲 𞤧𞤮𞥅𞤪𞤭 𞤼𞤢𞤱𞤢𞥄𞤥𞤢⹁ 𞤩𞤫 𞤯𞤵𞥅𞤯𞤢𞤼𞤢𞥄.

𞤸𞤢𞤲𞤳𞤭 𞤻𞤢𞤤𞥆𞤢𞤲𞤺𞤢𞤤 𞤬𞤮𞤬⹁ 𞤘𞤵𞤣𞤤𞤮𞤳 𞤔𞤮𞤲𞤢𞤼𞤢𞤲 𞤼𞤭𞤲𞤼𞤵𞤣𞤵𞤲𞤮 𞤫 𞤖𞤢𞥄𞤧𞤭𞤥𞤭𞤴𞥆𞤵 𞤘𞤮𞤴𞤼𞤢⹁ 𞤢𞤪𞤣𞤭𞥅𞤯𞤮 𞤣𞤫𞤲𞤼𞤢𞤤 𞤧𞤮𞥅𞤪𞤭𞥅𞤩𞤫 𞤩𞤫𞤲. 𞤉𞤩𞤫 𞤧𞤢𞥄𞤼𞤭𞥅 𞤴𞤭𞥅𞤣𞤵𞤺𞤮𞤤 𞤸𞤢𞤲𞤣𞤫 𞤳𞤢𞤣𞤭.

𞤅𞤮𞥅𞤪𞤭𞥅𞤩𞤫 𞤩𞤫𞤲 𞤣𞤵𞤽𞤢𞤲𞤭𞤳𞤫 𞤋.𞤄.𞤑 𞤸𞤮𞥅𞤼𞤵𞤺𞤮𞤤 𞤳𞤢 𞤺𞤢𞤤𞥆𞤫 𞤥𞤢𞤳𞥆𞤮. 𞤇𞤫 𞤶𞤢𞤩𞤭𞥅 𞤳𞤢𞤣𞤭 𞤲𞤫𞤱𞤲𞤢𞤲𞤺𞤮𞤤 𞤄𞤵𞥅𞤦𞤵 𞤅𞤭𞥅𞤧𞤫⹁ 𞤢𞤪𞤣𞤮 𞤳𞤭𞤯𞥆𞤮 𞤮𞤲⹁ 𞤱𞤮𞤲𞤵𞤺𞤮𞤤 𞤫 𞤺𞤢𞤤𞥆𞤫 𞤢𞤴𞤲𞤢𞥄𞤯𞤫.

𞤊𞤭𞥅 𞤳𞤢𞤤𞤢 𞤁𞤫𞤐𞤘𞤖𞤀 𞤲𞤮 𞤱𞤢𞤯𞥆𞤭𞤲𞥆𞤮𞥅 𞤢𞤪𞤼𞤭𞤪𞤺𞤮𞤤 𞤋.𞤄.𞤑 𞤳𞤢 𞤤𞤢𞥄𞤥𞤵⹁ 𞤪𞤵𞤼𞥆𞤢𞤺𞤮𞤤 𞤥𞤢𞤳𞥆𞤮 𞤳𞤢 𞤶𞤵𞤤𞥆𞤫𞤪𞤫 𞤼𞤢𞤱𞤢𞥄𞤳𞤢 𞤫 𞤼𞤮𞤩𞥆𞤫 𞤱𞤮𞤲𞤢𞥄𞤯𞤫 𞤯𞤫𞤲 𞤴𞤫𞤱𞤼𞤫𞥅𞤣𞤫 𞤬𞤭𞥅 𞤥𞤵𞤲 𞤸𞤢𞤲𞤣𞤫 𞤳𞤢𞤣𞤭.