𞤖𞤀𞤔𞥆𞤓 𞤐𞤘𞤓𞤐 𞥒𞥐𞥒𞥐 𞤊𞤓𞤍𞥆𞤋𞤑𞤉 𞤃𞤀𞤑𞥆𞤀
𞤑𞤮 𞤸𞤢𞤲𞤳𞤭 𞤫 𞤀𞥄𞤩𞤵𞤲𞥋𞤣𞤫 𞤻𞤢𞤤𞤲𞤣𞤫 𞥒𞥙 𞤃𞤮𞤪𞤧𞤮⹁ 𞤸𞤢𞤶𞥆𞤵 𞤲𞤺𞤵𞤲 𞤬𞤵𞤯𞥆𞤭 𞤼𞤮 𞤧𞤢𞤸𞤪𞤫 𞤃𞤢𞤳𞥆𞤢.
𞤖𞤢𞤶𞥆𞤵 𞤳𞤮 𞤺𞤮𞥅𞤼𞤢𞤤 𞤫 𞤼𞤵𞤺𞤢𞥄𞤤𞤫 𞤋𞤧𞤤𞤢𞥄𞤥𞤵 𞤯𞤫𞤲 𞤶𞤮𞤱𞤭. 𞤔𞤵𞥅𞤤𞤯𞤮 𞤳𞤢𞤤𞤢⹁ 𞤲𞤮 𞤱𞤢𞤯𞥆𞤭𞤲𞤢𞥄 𞤴𞤢𞤸𞤵𞤺𞤮𞤤 𞤶𞤵𞥅𞤪𞤮𞥅 𞤧𞤵𞥅𞤣𞤵 𞤑𞤢𞥄𞤦𞤢 𞤲𞤣𞤵𞤲 𞤧𞤮 𞤼𞤢𞤱𞤭𞥅 𞤮𞤥𞤮 𞤥𞤢𞤪𞤭 𞤲𞤦𞤢𞤱𞤳𞤭 𞤥𞤵𞤲. 𞤍𞤫𞤴𞤢 𞤼𞤵𞤺𞤢𞥄𞤤𞤫 𞤲𞤢𞤴𞤭 𞤳𞤮:
- 𞤼𞤢𞤦𞤭𞤲𞤼𞤭𞤲𞤺𞤮𞤤 𞤱𞤮𞤲𞤣𞤫𞤥𞤢 𞤸𞤢𞥄𞤲𞤣𞤵𞤯𞤮 𞤫 𞤪𞤫𞤱𞤫𞥅𞤣𞤫 𞤢𞤤𞤢𞥄 𞤧𞤭 𞤱𞤮𞤲𞤢𞥄 𞤀𞤤𞤤𞤢⹁ 𞤫 𞤼𞤢𞤦𞤭𞤲𞤼𞤭𞤲𞤺𞤮𞤤 𞤱𞤮𞤲𞤣𞤫 𞤃𞤵𞤸𞤢𞤥𞥆𞤢𞤣𞤵 (𞤶𞤳𞤥) 𞤳𞤮 𞤲𞤵𞤤𞤢𞥄𞤯𞤮 𞤥𞤢𞤳𞥆𞤮.
- 𞤻𞤭𞥅𞤩𞤲𞤵𞤺𞤮𞤤 𞤶𞤵𞥅𞤤𞤣𞤫 𞤲𞤣𞤫𞤲 𞤤𞤢𞥄𞤦𞤭 𞤶𞤮𞤱𞤭 𞤻𞤢𞤤𞤲𞤣𞤫 𞤳𞤢𞤤𞤢 𞤻𞤢𞤤𞤲𞤣𞤫
- 𞤭𞤼𞤵𞥅𞤺𞤮𞤤 𞤶𞤢𞤳𞥆𞤢
- 𞤸𞤮𞥅𞤪𞤵𞤺𞤮𞤤 𞤤𞤫𞤱𞤪𞤵 𞤳𞤮𞥅𞤪𞤳𞤢 (𞤧𞤵𞥅𞤥𞤢𞤴𞤫𞥅𞤪𞤵) 𞤲𞤣𞤵𞤲
𞤑𞤮 𞤸𞤢𞤶𞥆𞤵 𞤲𞤺𞤵𞤲 𞤱𞤮𞤲𞤭 𞤼𞤵𞤺𞤢𞤤𞤢𞤤 𞤶𞤮𞤱𞤢𞤩𞤢𞤤 𞤲𞤺𞤢𞤤. 𞤑𞤮𞤲𞤮 𞤲𞤺𞤵𞥅 𞤸𞤢𞤶𞥆𞤵 𞤯𞤮𞥅 𞤸𞤭𞤳𞥆𞤢⹁ 𞤲𞤮 𞤧𞤫𞥅𞤪𞤼𞤭 𞤬𞤮𞤼𞤢 𞤫 𞤳𞤮 𞤱𞤮𞥅𞤱𞤭 𞤳𞤮𞤲.
𞤑𞤮 𞤱𞤮𞥅𞤱𞤭⹁ 𞤩𞤵𞤪𞤭 𞤴𞤭𞤥𞤩𞤫 𞤣𞤵𞤦𞤵𞤲𞤫 𞤯𞤭𞤯𞤮 𞤫 𞤬𞤫𞤷𞥆𞤫𞤪𞤫 (𞤥𞤭𞤤𞤭𞤴𞤮𞤲𞤶𞤭 𞤯𞤭𞤯𞤭 𞤫 𞤬𞤫𞤷𞥆𞤫𞤪𞤫) 𞤭𞤱𞤪𞤵𞤩𞤫 𞤷𞤮𞤩𞥆𞤭 𞤯𞤭𞤲 𞤬𞤮𞤨 𞤳𞤢 𞤸𞤮𞥅𞤪𞤫 𞤤𞤫𞤴𞤣𞤭 𞤬𞤮𞤼𞥆𞤢𞤴𞤲𞤮 𞤃𞤢𞤳𞥆𞤢 𞤲𞤺𞤢𞤥 𞤻𞤭𞥅𞤩𞤲𞤵𞤺𞤮𞤤 𞤲𞤺𞤢𞤤 𞤼𞤵𞤺𞤢𞤤𞤢𞤤 𞤧𞤢𞤳𞥆𞤭𞤼𞤮𞤪𞤢𞤤 𞤋𞤧𞤤𞤢𞥄𞤥𞤵.
𞤑𞤮𞤲𞤮 𞤸𞤭𞤳𞥆𞤢 𞤯𞤮𞥅⹁ 𞤳𞤮 𞤴𞤭𞤥𞤩𞤫 𞤵𞤶𞤵𞤲𞤫𞥅𞤪𞤫 (𞤱𞤵𞤤𞤵𞥅𞤪𞤫) 𞤱𞤮𞥅𞤼𞤫𞤪𞤫 𞤼𞤢𞤲 𞤲𞤫𞤱𞤲𞤢𞤲𞤢𞤲𞤮𞥅 𞤼𞤢𞤱𞤫𞤺𞤮𞤤 𞤫 𞤸𞤢𞤶𞥆𞤵 𞤲𞤺𞤵𞤲. 𞤑𞤮𞤲𞤮 𞤸𞤫𞤧𞤤𞤮𞥅𞤩𞤫 (𞤸𞤵𞤥𞤨𞤭𞤼𞤮𞥅𞤩𞤫) 𞤩𞤫𞤲 𞤧𞤫𞥅𞤣𞤭𞤼𞤭𞤳𞤫 𞤱𞤮𞤲𞤣𞤫𞤥𞤢 𞤩𞤫 𞤴𞤭𞤭𞥅 𞤳𞤮 𞤩𞤢𞤣𞤭𞥅 𞤵𞤶𞤵𞤲𞤫 (𞤺𞤵𞤤𞤵𞥅𞤶𞤫) 𞤧𞤢𞤨𞥆𞤮 𞤸𞤢𞤶𞥆𞤮𞥅𞤩𞤫. 𞤇𞤫𞥅 𞤬𞤮𞤨 𞤳𞤢𞤣𞤭 𞤳𞤮 𞤧𞤵𞤩𞤢𞥄𞤩𞤫 𞤸𞤢𞤳𞥆𞤵𞤲𞥋𞤣𞤫 𞤴𞤭𞤥𞤩𞤫 𞤱𞤮𞤲𞥆𞤮𞥅𞤩𞤫 𞤫 𞤲𞤣𞤫𞤪 𞤤𞤫𞤧𞤣𞤭 𞤅𞤢𞤵𞤣𞤭𞥅 𞤲𞤣𞤭𞤲 𞤢𞤣𞤮 𞤸𞤢𞤶𞥆𞤵 𞤲𞤺𞤵𞤲 𞤸𞤫𞤱𞤼𞤵𞤣𞤫. 𞤇𞤢𞥄𞤱𞤮 𞤩𞤫 𞤧𞤵𞤩𞤫𞥅𞤣𞤫⹁ 𞤩𞤢𞤤𞥆𞤭 𞤥𞤢𞤩𞥆𞤫 𞤱𞤭𞤯𞤼𞤢𞤲𞤮 𞤲𞤺𞤢𞤥 𞤼𞤢𞤦𞤭𞤲𞤼𞤭𞤲𞤺𞤮𞤤 𞤩𞤫 𞤱𞤮𞤲𞤣𞤢𞥄 𞤫 𞤻𞤢𞤱𞤵 𞤑𞤮𞤾𞤭𞤣-𞥑𞥙. 𞤇𞤢𞥄𞤱𞤮 𞤯𞤵𞤥⹁ 𞤩𞤫 𞤬𞤮𞤨 𞤩𞤫 𞤵𞤬𞤭𞤲𞤢𞥄 𞤦𞤢𞥄𞤤𞤯𞤫 𞤯𞤵𞥅𞤯𞤵𞤯𞤫.
𞤀𞤣𞤮 𞤩𞤫 𞤬𞤵𞤯𞥆𞤢𞥄𞤣𞤫 𞤸𞤢𞤶𞥆𞤵 𞤲𞤺𞤵𞤲 𞤸𞤢𞤲𞤳𞤭⹁ 𞤲𞤺𞤵𞤤𞤫𞥅𞤳𞤭 𞤩𞤢𞤤𞥆𞤭 𞤥𞤢𞤩𞥆𞤫 𞤯𞤭𞤲 𞤰𞤫𞤼𞥆𞤢𞤲𞤮. 𞤇𞤫 𞤬𞤮𞤨 𞤳𞤢𞤣𞤭⹁ 𞤩𞤫 𞤴𞤢𞤥𞤭𞤪𞤢𞥄 𞤩𞤮𞤪𞤲𞤢𞤺𞤮𞤤 𞤧𞤵𞥅𞤥𞤭𞤪𞤯𞤵𞤲 𞤸𞤵𞤲𞤣𞤵𞤳𞤮 𞤫 𞤳𞤭𞤲𞤢𞤤⹁ 𞤫 𞤱𞤮𞤯𞥆𞤮𞤲𞥋𞤣𞤭𞤪𞤺𞤮𞤤. 𞤇𞤫 𞤩𞤮𞤪𞤲𞤢𞥄 𞤳𞤢𞤣𞤭 𞤥𞤵𞤤𞥆𞤫 𞤥𞤢𞤤𞥆𞤢 𞤶𞤢𞤱𞤫 𞤤𞤫𞤳𞤼𞤮𞤪𞤮𞤲𞤭𞤳𞥆𞤭 𞤢𞤲𞤣𞤭𞤲𞤢𞤴𞤯𞤫 𞤤𞤢𞥄𞤥𞤵 𞤲𞤺𞤵𞤲 𞤲𞤮𞤳𞥆𞤵 𞤳𞤢𞤤𞤢 𞤳𞤢 𞤩𞤫 𞤴𞤢𞤸𞤪𞤭.
𞤅𞤮 𞤶𞤵𞥅𞤤𞤵𞤺𞤮𞤤 𞤸𞤫𞤱𞤼𞤭𞥅⹁ 𞤫𞤩𞤫 𞤴𞤢𞤥𞤭𞤪𞤢𞥄 𞤱𞤢𞤯𞤵𞤺𞤮𞤤 𞤫𞤥𞤦𞤫𞤪𞤫 𞤼𞤫𞤨𞥆𞤫 𞤶𞤮𞤱𞤭 𞤸𞤢𞤳𞥆𞤵𞤲𞥋𞤣𞤫 𞤥𞤢𞤩𞥆𞤫. 𞤖𞤭𞤳𞥆𞤢 𞤯𞤮𞥅⹁ 𞤸𞤢𞤴 𞤺𞤮𞥅𞤼𞤮 𞤫 𞤸𞤢𞤶𞥆𞤮𞥅𞤩𞤫 𞤩𞤫𞤲 𞤲𞤫𞤱𞤲𞤢𞤲𞤢𞥄𞤳𞤢 𞤥𞤫𞥅𞤥𞤵𞤺𞤵𞤤 𞤥𞤢𞥄 𞤩𞤵𞥅𞤷𞤢𞤺𞤮𞤤 𞤸𞤢𞤴𞤪𞤫 𞤩𞤢𞤤𞤫𞥅𞤪𞤫 𞤲𞤣𞤫𞤲.
𞤅𞤮 𞤸𞤢𞤶𞥆𞤵 𞤲𞤺𞤵𞤲 𞤼𞤭𞤥𞥆𞤭𞥅⹁ 𞤩𞤫 𞤬𞤮𞤨 𞤩𞤫 𞤵𞤬𞤭𞤲𞤮𞤼𞤮 𞤦𞤢𞤤𞤯𞤫 𞤧𞤮 𞤩𞤫 𞤲𞤫𞤱𞤲𞤢𞤲𞤫𞥅 𞤪𞤵𞤼𞥆𞤢𞤺𞤮𞤤 𞤫 𞤺𞤵𞤪𞤫 𞤥𞤢𞤩𞥆𞤫.
𞤅𞤢𞤵𞤣𞤭𞥅 𞤲𞤮 𞤼𞤢𞤱𞤢𞥄 𞤫 𞤤𞤫𞤧𞤯𞤫 𞤳𞤢 𞤑𞤮𞤾𞤭𞤣-𞥑𞥙 𞤩𞤵𞤪𞤭 𞤫 𞤶𞤢𞥄𞤤𞤢𞥄𞤣𞤫 𞤯𞤮𞤲 𞤳𞤢 𞤸𞤮𞥅𞤪𞤫 𞤤𞤫𞤴𞤣𞤭 𞤸𞤢𞤲𞤣𞤫. 𞤐𞤺𞤵𞥅 𞤻𞤢𞤱𞤵 𞤪𞤢𞥄𞤩𞤭𞥅 𞤳𞤮 𞤴𞤢𞤱𞤼𞤭 𞤴𞤭𞤥𞤩𞤫 𞤵𞤶𞤵𞤲𞤫 𞤼𞤫𞥅𞤥𞤫𞤯𞥆𞤫 𞤯𞤭𞤯𞤮 𞤫 𞤵𞤶𞤵𞤲𞤫 𞤷𞤢𞤨𞥆𞤢𞤲𞤯𞤫 𞤶𞤫𞥅𞤯𞤭𞤯𞤮 (𞥒𞥗𞥐 𞥐𞥐𞥐). 𞤐𞤺𞤵 𞤱𞤢𞤪𞤭𞥅 𞤳𞤮 𞤩𞤵𞤪𞤭 𞤵𞤶𞤵𞤲𞤫 𞤯𞤭𞤯𞤭 𞤫 𞤼𞤫𞥅𞤥𞤫𞤯𞥆𞤫 𞤶𞤫𞥅𞤼𞤢𞤼𞤮 (𞥒𞥘𞥐𞥐).
𞤐𞤺𞤵 𞤢𞤤𞤢𞥄 𞤤𞤫𞤳𞥆𞤭 𞤻𞤢𞤱𞤲𞤣𞤭𞤪𞤲𞤺𞤵 𞤼𞤢𞤸𞤮. 𞤃𞤮 𞤳𞤢𞤤𞤢 𞤲𞤮 𞤸𞤢𞥄𞤲𞤭 𞤪𞤫𞥅𞤲𞤼𞤢𞥄𞤣𞤫. 𞤌𞤲𞤼𞤭𞤺𞤭 𞤻𞤫𞤥𞤼𞤭𞤲𞤢 𞤴𞤢𞤥𞤭𞤪𞤮𞥅𞤶𞤮 𞤣𞤢𞤯𞤲𞤭𞤼𞤮𞤪𞤯𞤫 𞤯𞤫𞤲. 𞤍𞤫𞤲 𞤳𞤮:
𞥑 – 𞤔𞤓𞥅𞤍𞤉 𞤍𞤉𞤐, 𞤤𞤮𞥅𞤼𞤢 𞤯𞤫 𞤧𞤮𞥅𞤲𞤮 𞤳𞤢𞤤𞤢. 𞤌𞤲𞤼𞤭𞤺𞤭 𞤧𞤮𞥅𞤯𞤮𞤪𞤢 𞤧𞤢𞥄𞤦𞤵𞤲𞤣𞤫 𞤫 𞤲𞤣𞤭𞤴𞤢𞤲 𞤤𞤢𞥄𞤩𞤵𞤯𞤢𞤲
𞥒 – 𞤅𞤌𞤇𞥆𞤓𞤐𞥋𞤁𞤓 𞤐𞤁𞤓𞤐⹁ 𞤯𞤮𞤶𞥆𞤢 𞤥𞤢𞥄 𞤭𞥅𞤤𞤢 𞤫 𞤲𞤣𞤫𞤪 𞤥𞤢𞤴𞤪𞤵.
𞥓 – 𞤒𞤉𞥅𞤅𞤌 𞤐𞤘𞤌𞤐⹁ 𞤱𞤮𞤼𞤢 𞤮𞤲𞤼𞤭𞤺𞤭 𞤥𞤫𞥅𞤥𞤵 𞤲𞤺𞤮⹁ 𞤼𞤫𞤲𞤼𞤭𞤲𞤭𞥅 𞤧𞤮 𞤶𞤵𞥅𞤯𞤫 𞤯𞤫𞤲 𞤤𞤢𞥄𞤩𞤢𞥄.
𞥔 – 𞤚𞤉𞤆𞥆𞤉 𞤚𞤀𞤚𞤋⹁ 𞤴𞤮 𞤯𞤵𞤥 𞤱𞤮𞤲𞤵 𞤸𞤢𞤳𞥆𞤵𞤲’𞤣𞤫 𞤮𞤲𞤼𞤭𞤺𞤭 𞤫 𞤴𞤭𞤥𞤩𞤫 𞤩𞤫𞤲.
𞥕 – 𞤃𞤌 𞤅𞤌𞤋𞥅 𞤲𞤢𞤱𞤲𞤵𞤣𞤫⹁ 𞤴𞤮 𞤤𞤵𞤼𞥆𞤫𞥅 𞤳𞤢 𞤧𞤵𞥅𞤣𞤵 𞤥𞤵𞤲.
𞥖 – 𞤅𞤓𞥅𞤃𞤀 𞤳𞤭𞤲𞤢𞤤 𞤲𞤺𞤢𞤤 𞤫 𞤸𞤵𞤲𞤣𞤵𞤳𞤮 𞤳𞤮𞤲 𞤧𞤮 𞤼𞤢𞤱𞤭𞥅 𞤮𞤲𞤼𞤭𞤺𞤭 𞤴𞤢𞤤𞤼𞤢𞤴.
𞤒𞤮 𞤀𞤤𞤤𞤢𞥄𞤸𞤵 𞤮𞤲 𞤸𞤭𞤧𞤭𞤲 𞤫𞤲
𞤌𞤯𞤮𞤲 𞤶𞤢𞥄𞤪𞤲𞤢 𞤱𞤫𞤤𞤼𞤢𞤲𞤢𞥄
𞤄𞤢𞤳𞤢 𞤥𞤮𞤲
𞤐𞤣𞤫𞥅 𞤸𞤭𞤼𞤢𞥄𞤲𞤣𞤫 𞤯𞤮𞥅 𞤳𞤮 𞤢𞤤𞤤𞤢𞤸𞤵 𞤮𞤲 𞤼𞤵𞤲 𞤢𞤲𞤣𞤭 𞤳𞤮 𞤸𞤮𞤲𞤯𞤵𞤲 𞤫 𞤽𞤢𞤤𞤢𞤱𞤵 𞤧𞤮𞥅𞤥𞤭𞥅 𞤫 𞤥𞤢𞤴𞤪𞤫 𞤴𞤮 𞤢𞤤𞤤𞤢𞤸𞤵 𞤮𞤲 𞤸𞤭𞤧𞤭𞤲 𞤫𞤲.
𞤌𞤲𞤮𞤲 𞤳𞤢𞤣𞤭 𞤮𞤲 𞤦𞤫𞤤𞤼𞤢𞤲𞤢𞥄𞤥𞤢 𞤫 𞤯𞤫𞥅 𞤳𞤵𞤥𞤨𞤭𞤼𞤫 𞤥𞤢𞤱𞤯𞤫⹁ 𞤴𞤮 𞤢𞤤𞤤𞤢𞤸𞤵 𞤮𞤲 𞤲𞤢𞤱𞤪𞤵 𞤀𞤁𞤂𞤢𞤃 𞤆𞤵𞤤𞤢𞤪 𞤴𞤫𞥅𞤧𞤮.
𞤐𞤮 𞤴𞤫𞤱𞤼𞤭𞥅 𞤬𞤮𞤼𞤢