𞤀𞤂𞤋𞥅 𞤄𞤌𞤐𞤘𞤌⹁ 𞤖𞤌𞥅𞤈𞤉𞥅𞤔𞤌 𞤘𞤀𞤄𞤌𞤐 𞤌𞤐 𞤊𞤌𞤂𞥆𞤀𞥄𞤃𞤀

𞤖𞤮𞥅𞤪𞤫𞥅𞤶𞤮 𞤘𞤢𞤥𞤦𞤮𞤲 𞤮𞤲 𞤬𞤮𞤤𞥆𞤢𞥄𞤥𞤢. 𞤑𞤮 𞤯𞤵𞤥 𞤧𞤮𞥅𞤪𞤭𞥅𞤩𞤫 𞤳𞤮𞤲𞤵 𞤘𞤢𞤦𞤮𞤲 𞤲𞤺𞤵𞤲 𞤸𞤮𞤤𞥆𞤭 𞤸𞤢𞤲𞤳𞤭 𞤫 𞤲𞤶𞤫𞤧𞤤𞤢𞥄𞤪𞤫⹁ 𞤻𞤢𞤤𞤲𞤣𞤫 𞥓𞥐 𞤔𞤵𞤳𞤮 𞥒𞥐𞥒𞥓. 𞤇𞤫 𞤸𞤮𞤤𞥆𞤭 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤧𞤵𞤩𞤮 𞤲𞤺𞤮𞤲 𞤦𞤮𞤪𞤼𞤢𞥄𞤥𞤢⹁ 𞤳𞤫𞥅𞤪𞤭 𞤯𞤭𞤲 𞤥𞤢𞤩𞥆𞤢𞥄𞤥𞤢⹁ 𞤲𞤶𞤵𞤩𞥆𞤵𞤤𞤫 𞤤𞤢𞥄𞤥𞤵 𞤯𞤭𞤲 𞤬𞤮𞤨 𞤧𞤢𞤴𞤲𞤢𞥄𞤥𞤢.

𞤑𞤮 𞤄𞤪𞤭𞤧 𞤌𞤤𞤭𞤺𞤭 𞤐𞤺𞤫𞥅𞤥𞤢⹁ 𞤳𞤵𞥅𞤩𞤢𞤤𞤶𞤮 𞤤𞤢𞥄𞤼𞤭𞤲𞤮𞥅𞤯𞤮 𞤢𞤪𞤣𞤭𞥅𞤯𞤮 𞤬𞤫𞤣𞥆𞤫 𞤳𞤭𞤱𞤢𞤤 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤮𞤲 𞤱𞤮𞤲𞤭 𞤳𞤮 𞤩𞤫 𞤼𞤮𞤯𞥆𞤭𞥅 𞤳𞤮 𞤢𞤪𞤣𞤮𞥅 𞤤𞤫𞤴𞤣𞤭 𞤲𞤣𞤭𞤲 𞤳𞤫𞤲𞤫𞤲𞤼𞤭. 𞤌𞥅 𞤳𞤢𞤣𞤭 𞤤𞤫 𞤲𞤮 𞤶𞤫𞤴𞤣𞤭 𞤫 𞤀𞤤𞤭𞥅 𞤄𞤮𞤲𞤺𞤮⹁ 𞤤𞤢𞥄𞤥𞤯𞤮 𞤬𞤮𞤤𞥆𞤢𞥄𞤯𞤮 𞤮𞤲⹁ 𞤲𞤣𞤫 𞤼𞤢𞤱𞤲𞤮𞥅 𞤳𞤮 𞤩𞤫 𞤣𞤫𞤲𞤯𞤭𞤪𞤢𞥄𞤩𞤫.

𞤀𞤤𞤭𞥅 𞤄𞤮𞤲𞤺𞤮 𞤬𞤮𞤤𞥆𞤢𞥄𞤥𞤢 𞤸𞤢𞤪𞤭 𞤮𞤥𞤮 𞤬𞤮𞤳𞥆𞤭𞤲𞤼𞤭𞤲𞤭 𞤸𞤢𞤨𞥆𞤵 𞤲𞤺𞤵 𞤣𞤵𞥅𞤩𞤭 𞤶𞤮𞤱𞤭 𞤦𞤢𞤯𞤼𞤢𞤲𞤫 𞤧𞤵𞤩𞤮 𞤱𞤢𞤯𞤲𞤮𞥅𞤲𞤺𞤮 𞤲𞤺𞤮𞤲 𞤻𞤢𞤤𞤲𞤣𞤫 𞥒𞥖 𞤔𞤵𞤳𞤮 𞥒𞥐𞥒𞥓. 𞤑𞤮 𞤲𞤺𞤵𞥅 𞤸𞤢𞤨𞥆𞤵 𞤱𞤮𞤲𞤢𞤴𞤲𞤮𞥅 𞤼𞤢𞤼𞤢𞤩𞤵 𞤲𞤺𞤵𞤲 𞤺𞤭𞤦𞤭 𞤮 𞤤𞤢𞥄𞤥𞤭𞥅⹁ 𞤫 𞤸𞤭𞤲𞤮 𞤤𞤫 𞤮 𞤱𞤢𞤯𞤭𞥅𞤲𞤮 𞤣𞤵𞥅𞤩𞤭 𞥑𞥔 𞤳𞤢 𞤤𞤢𞥄𞤥𞤵.

𞤑𞤮𞤲𞤮 𞤀𞤤𞤦𞤫𞤪 𞤌𞤲𞤣𞤮 𞤌𞤧𞤢⹁ 𞤤𞤭𞤣𞥆𞤮 𞤥𞤢𞤳𞥆𞤮 𞤮𞤲⹁ 𞤶𞤢𞤩𞤢𞥄𞤤𞤭 𞤼𞤢𞤦𞤭𞤲𞤼𞤭𞤲𞤣𞤫 𞤨𞤮𞥅𞤤𞤢𞤤 𞤄𞤮𞤲𞤺𞤮 𞤲𞤺𞤢𞤤. 𞤉 𞤱𞤭𞤴𞤭 𞤥𞤢𞤳𞥆𞤮 𞤳𞤢𞤲𞤳𞤮 𞤳𞤢𞤣𞤭⹁ 𞤳𞤮 𞤳𞤢𞤲𞤳𞤮 𞤬𞤮𞥅𞤤𞤭. 𞤌 𞤼𞤮𞤪𞤭𞥅 𞤴𞤮 𞤀𞤤𞤭𞥅 𞤄𞤮𞤲𞤺𞤮 𞤲𞤫𞤱𞤭𞤲 𞤶𞤢𞥄𞤩𞤮𞤼𞤭𞤪𞤢𞤤 𞤸𞤢𞤳𞥆𞤵𞤲𞥋𞤣𞤫 𞤥𞤢𞤩𞥆𞤫. 𞤑𞤮𞤲𞤮 𞤼𞤵𞤥𞤦𞤫𞤪𞤫 𞤶𞤫𞤥𞥆𞤢⹁ 𞤫 𞤥𞤢𞤱𞤦𞤢𞥄𞤪𞤫 𞤲𞤮 𞤱𞤫𞥅𞤼𞤵𞤣𞤫 𞤲𞤶𞤫𞤧𞤤𞤢𞥄𞤪𞤫⹁ 𞤦𞤮𞤼𞤫 𞤧𞤵𞤩𞤮 𞤲𞤺𞤮𞤲 𞤬𞤫𞤻𞥆𞤭𞤲𞤢𞥄. 𞤖𞤢𞤪𞤭 𞤸𞤢𞤳𞤼𞤭𞤧𞤵 𞤲𞤺𞤵𞤲 𞤼𞤢𞤰𞤢𞥄𞤥𞤢. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤸𞤫𞤧𞤤𞤮𞥅𞤩𞤫 𞤤𞤫𞤴𞤯𞤫 𞤶𞤢𞤲𞤢𞤲𞤫 𞤯𞤫𞤲 𞤬𞤮𞤨 𞤼𞤮𞤽𞤢𞤲𞤢𞥄𞤥𞤢 𞤸𞤵𞤥𞤨𞤭𞤼𞤵𞤺𞤮𞤤 𞤲𞤮 𞤷𞤮𞤬𞤼𞤫 𞤯𞤫𞤲 𞤬𞤫𞤰𞥆𞤭𞤪𞤭.

𞤏𞤵𞤪𞤭𞤲 𞤼𞤭𞤥𞥆𞤢𞥄𞤤𞤭 𞤸𞤢𞤴 𞤲𞤶𞤢𞤥𞤣𞤭 𞤱𞤮𞥅𞤼𞤭𞤪𞤭 𞤩𞤢𞥄𞤱𞤮 𞤱𞤭𞤴𞤫𞥅𞤣𞤫 𞤳𞤮 𞤀𞤤𞤭𞥅 𞤄𞤮𞤲𞤺𞤮 𞤬𞤮𞥅𞤤𞤭⹁ 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤱𞤢𞤴𞤤𞤭𞤼𞤭 𞤤𞤢𞥄𞤥𞤵 𞤲𞤺𞤵𞤲.

𞤘𞤭𞤦𞤭 𞤮𞤲𞤼𞤵𞤥𞤢⹁ 𞤀𞤤𞤭𞥅 𞤄𞤮𞤲𞤺𞤮 𞤲𞤮 𞤥𞤢𞤪𞤢𞥄 𞤫 𞤧𞤵𞥅𞤣𞤵. 𞤌 𞤱𞤢𞤯𞤵𞤲𞤮 𞤯𞤮𞤱𞤤𞤵 𞤮𞤥𞤮 𞤲𞤮𞤣𞥆𞤢 𞤴𞤭𞤥𞤩𞤫 𞤴𞤮 𞤧𞤮𞥅𞤰𞤢𞤲 𞤥𞤮 𞤲𞤮 𞤮 𞤸𞤫𞤩𞤼𞤭𞤼𞤭𞤪𞤢 𞤤𞤢𞥄𞤥𞤵 𞤲𞤺𞤵𞤲.

𞤑𞤮 𞤫 𞥒𞥐𞥐𞥙 𞤮 𞤰𞤫𞤼𞥆𞤭 𞤤𞤢𞥄𞤥𞤵 𞤲𞤺𞤵𞤲 𞤷𞤢𞤺𞥆𞤢𞤤 𞤥𞤢𞥄𞤴𞤣𞤫 𞤦𞤢𞥄𞤦𞤢 𞤥𞤢𞤳𞥆𞤮 𞤓𞤥𞤢𞤪 𞤄𞤮𞤲𞤺𞤮. 𞤖𞤢𞤪𞤭 𞤮𞤲 𞤳𞤢𞤣𞤭 𞤩𞤵𞤪𞤲𞤭𞥅 𞤣𞤵𞥅𞤩𞤭 𞥔𞥒 𞤸𞤮𞥅𞤪𞤫 𞤤𞤫𞤴𞤣𞤭 𞤘𞤢𞤦𞤮𞤲 𞤲𞤣𞤭𞤲. 𞤖𞤢𞤳𞥆𞤵𞤲𞥋𞤣𞤫 𞤩𞤫𞥅 𞤯𞤭𞤯𞤮⹁ 𞤧𞤵𞥅𞤣𞤵 𞤄𞤮𞤲𞤺𞤮 𞤲𞤣𞤵𞤲 𞤤𞤢𞥄𞤥𞤭𞤳𞤫 𞤣𞤵𞥅𞤩𞤭 𞥕𞥖 (𞤷𞤢𞤨𞥆𞤢𞤲𞤯𞤫 𞤶𞤮𞤱𞤭 𞤫 𞤶𞤫𞥅𞤺𞤮𞤮).

𞤀𞤤𞤭𞥅 𞤄𞤮𞤲𞤺𞤮 𞤳𞤮 𞤻𞤢𞤤𞤲𞤣𞤫 𞥙 𞤕𞤮𞤤𞤼𞤮 𞥑𞥙𞥕𞥙⹁ 𞤮 𞤶𞤭𞤦𞤭𞤲𞤢𞥄. 𞤌 𞤭𞤲𞥆𞤢𞥄 𞤀𞤤𞤫𞤲 𞤄𞤫𞤪𞤲𞤢𞤪 𞤄𞤮𞤲𞤺𞤮. 𞤑𞤮 𞤲𞤣𞤫 𞤦𞤢𞥄𞤦𞤢 𞤥𞤢𞤳𞥆𞤮 𞤧𞤭𞤤𞤥𞤵𞤲𞤮𞥅 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥗𞥓⹁ 𞤩𞤫 𞤭𞤲𞥆𞤭 𞤥𞤮 𞤀𞤤𞤭𞥅 𞤄𞤮𞤲𞤺𞤮. 𞤄𞤢𞥄𞤦𞤢 𞤥𞤢𞤳𞥆𞤮 𞤱𞤢𞤴𞤤𞤭 𞤭𞤲𞤣𞤫 𞤥𞤵𞥅𞤯𞤵𞤲 𞤲𞤣𞤫𞤲 𞤭𞤼𞥆𞤭 𞤀𞤤𞤦𞤫𞤪 𞤦𞤫𞤪𞤲𞤢𞤪 𞤄𞤮𞤲𞤺𞤮 𞤱𞤢𞤯𞤭 𞤓𞤥𞤢𞤪 𞤄𞤮𞤲𞤺𞤮

𞤀𞤤𞤭𞥅 𞤄𞤮𞤲𞤺𞤮 𞤫 𞤩𞤫𞤴𞤲𞤺𞤵 𞤥𞤵𞤵𞤲 𞤅𞤭𞤤𞤾𞤭𞤴𞤢 𞤜𞤢𞤤𞤢𞤲𞤼𞤫𞤲⹁ 𞤳𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥘𞥙 𞤩𞤫 𞤶𞤮𞤥𞤦𞤭𞤲𞥋𞤣𞤭𞤪𞤭. 𞤖𞤭𞤩𞤫 𞤶𞤮𞤺𞤮𞤣𞤭 𞤩𞤭𞤩𞥆𞤫 𞤲𞤢𞤴𞤮⹁ 𞤣𞤫𞤦𞥆𞤮 𞤺𞤮𞥅𞤼𞤮 𞤫 𞤱𞤮𞤪𞤩𞤫 𞤼𞤢𞤼𞤮. 𞤉 𞤩𞤫𞤲 𞤩𞤭𞤩𞥆𞤫 𞤱𞤮𞤪𞤩𞤫⹁ 𞤳𞤮 𞤼𞤢𞤼𞤮 𞤩𞤫 𞤸𞤫𞤩𞤭𞤣𞤭⹁ 𞤺𞤮𞥅𞤼𞤮 𞤮𞤲⹁ 𞤄𞤭𞤤𞤢𞥄𞤤 𞤄𞤮𞤲𞤺𞤮⹁ 𞤱𞤮𞤲𞤢𞥄 𞤩𞤭𞤯𞥆𞤮 𞤥𞤢𞤩𞥆𞤫 𞤼𞤭𞤺𞤭⹁ 𞤳𞤮 𞤩𞤢𞤣𞤲𞤭𞤼𞤢𞥄𞤯𞤮.

𞤑𞤮 𞤲𞤣𞤵𞥅 𞤬𞤮𞤤𞥆𞤵𞤪𞤵 𞤯𞤮𞤮 𞤼𞤭𞤥𞥆𞤭𞤲𞤭 𞤶𞤫𞥅𞤼𞤢𞤼𞤭 𞤨𞤮𞤤𞥆𞤭 𞤯𞤭𞤲 𞤫 𞤲𞤣𞤫𞤪 𞤀𞤬𞤪𞤭𞤳 𞤺𞤭𞤦𞤭 𞥒𞥐𞥒𞥐.