𞤀𞤈𞤔𞤀𞤐𞤚𞤋𞤐𞤀 𞤉 𞤃𞤉𞥅𞤅𞤋 𞤂𞤓𞤃𞤄𞤋𞥅

𞤀𞤈𞤔𞤀𞤐𞤚𞤋𞤐𞤀 🇦🇷 𞥒 – 𞥐 🇵🇱 𞤆𞤌𞤂𞤌𞤙

𞤑𞤮 𞤀𞤈𞤔𞤀𞤐𞤚𞤋𞤐 𞤫 𞤆𞤌𞤂𞤌𞤐 𞤤𞤵𞤥𞤦𞤭.
𞤊𞤭𞥅 𞤳𞤢𞤤𞤢 𞤀𞤈𞤔𞤀𞤐𞤚𞤋𞤐𞤀 𞤨𞤭𞤴𞤵𞤲𞤮 𞤩𞤫 𞤳𞤵𞥅𞤤𞤫 𞤯𞤭𞤯𞤭⹁ 𞤳𞤮 𞤳𞤢𞤥𞤩𞤫 𞤯𞤮𞤮 𞤯𞤭𞤯𞤭 𞤱𞤮𞤲𞤭 𞤫 𞤤𞤵𞤥𞤦𞤵𞤣𞤫 𞤬𞤭𞥅 𞤶𞤫𞥅𞤼𞤢𞤼𞤢𞤩𞤢𞤤 𞤲𞤺𞤢𞤤 𞤲𞤣𞤫 𞤼𞤢𞤱𞤵𞤲𞤮𞥅 𞤅𞤀𞤏𞤓𞤁𞤋 𞤨𞤭𞤴𞤢𞥄𞤥𞤢.
𞤖𞤢𞤪𞤭 𞤦𞤵𞤴 𞤲𞤮 𞤸𞤵𞤤𞤢𞤲𞤭 𞤀𞤈𞤔𞤀𞤐𞤚𞤋𞤐𞤀 𞤩𞤢𞥄𞤱𞤮 𞤅𞤀𞤏𞤓𞤁𞤋 𞤸𞤫𞤪𞤧𞤭𞤲𞤣𞤫 𞤩𞤫 𞤫 𞤬𞤭𞤶𞤮 𞤥𞤢𞤩𞥆𞤫 𞤢𞤪𞤢𞤲𞤮 𞤲𞤺𞤮𞤲. 𞤌𞤲𞤼𞤵𞤥𞤢⹁ 𞤬𞤮𞤨 𞤽𞤢𞤤𞤯𞤵𞤲𞤮 𞤸𞤵𞤼𞤭𞥅 𞤩𞤫 𞤳𞤢𞤣𞤭. 𞤐𞤢𞤲𞤣𞤭 𞤳𞤮 𞤲𞤺𞤢𞤤 𞤨𞤭𞤺𞥆𞤢𞤤 𞤬𞤭𞤲𞤣𞤭𞤲𞤭 𞤩𞤫 𞤧𞤢𞤦𞤵𞤲𞤢 𞤺𞤭𞤤𞤢 𞤮𞤲𞤼𞤵𞤥𞤢⹁ 𞤥𞤮 𞤩𞤫 𞤬𞤮𞤼𞥆𞤭 𞤱𞤮𞥅 𞤫 𞤥𞤵𞤵𞤲⹁ 𞤸𞤭𞤩𞤫 𞤧𞤮𞤰𞤵𞤣𞤫.

𞤖𞤢𞤲𞤣𞤫 𞤳𞤮 𞤆𞤌𞤂𞤌𞤙 𞤩𞤫 𞤸𞤢𞤱𞤪𞤭 𞤫 𞤥𞤵𞤵𞤲. 𞤇𞤫 𞤶𞤭𞤲𞤣𞤭𞤲𞤭 𞤩𞤫𞤲 𞤸𞤢𞥄 𞤩𞤫𞤲 𞤺𞤭𞥅𞤤𞤢𞥄. 𞤖𞤢𞤪𞤭 𞤩𞤫 𞤢𞤤𞤢𞥄 𞤴𞤭𞤵𞤣𞤫 𞤥𞤵𞤤𞥆𞤫𞤪𞤫 𞤲𞤣𞤫𞤲 𞤧𞤢𞤳𞤢 𞤩𞤫 𞤤𞤢𞤼𞤢 𞤲𞤣𞤫𞤲. 𞤐𞤢𞤲𞤣𞤭 𞤴𞤭𞤥𞤩𞤫 𞤂𞤉𞤏𞤀𞤐𞤁𞤌𞤅𞤑𞤋 𞤩𞤫𞤲 𞤳𞤮 𞤲𞤣𞤢𞥄𞤪𞤵𞤺𞤮𞤤 𞤃𞤉𞤅𞤋 𞤳𞤢𞤥𞤩𞤫 𞤳𞤢𞤣𞤭 𞤩𞤫 𞤢𞤪𞤵𞤲𞤮𞥅. 𞤑𞤮 𞤧𞤭 𞤀𞤈𞤔𞤀𞤐𞤚𞤋𞤐𞤀 𞤬𞤭𞤶𞤭𞥅 𞤫𞤥𞤦𞤫𞤪𞤫 𞤸𞤮𞤶𞤮𞤥𞤢𞥄𞤶𞤫 𞥔⹁ 𞤧𞤭 𞤆𞤌𞤂𞤌𞤙 𞤬𞤭𞤶𞤢 𞤸𞤮𞤶𞤮𞤥𞤢𞥄𞤪𞤫 𞤱𞤮𞥅𞤼𞤫𞤪𞤫. 𞤑𞤢 𞤬𞤫𞤷𞥆𞤢𞤼𞤢 𞤯𞤮𞤲⹁ 𞤸𞤢𞤪𞤭 𞤆𞤌𞤂𞤌𞤙 𞤲𞤮 𞤣𞤢𞤪𞤼𞤢𞥄𞤣𞤫 𞤦𞤫𞤼𞤫 𞤧𞤫𞥅𞤯𞤢 𞤩𞤢𞤴𞤼𞤭 𞤳𞤮 𞤫 𞤫 𞤸𞤮𞥅𞤪𞤮 𞤩𞤮𞤤𞤮 𞤩𞤫 𞤧𞤫𞥅𞤪𞤼𞤭 𞤳𞤢 𞤬𞤫𞤱𞤲𞤣𞤮 𞤬𞤮𞤱𞤼𞤢𞤺𞤮𞤤. 𞤬𞤭𞥅 𞤳𞤢𞤤𞤢 𞤃𞤉𞤅𞤋 𞤥𞤢𞤰𞤭𞤲𞥆𞤮 𞤩𞤫 𞤲𞤣𞤫 𞤮 𞤸𞤫𞤩𞤵𞤲𞤮𞥅 𞤤𞤢𞤼𞤫𞤪𞤫 𞤳𞤢 𞤲𞤣𞤫𞤪 𞤸𞤵𞥅𞤤𞤮𞥅𞤣𞤵 𞤆𞤌𞤂𞤌𞤙. 𞤑𞤮𞤲𞤮 𞤸𞤭𞤱𞤮𞥅𞤱𞤮 𞤆𞤌𞤂𞤌𞤙 𞤮𞤲 𞤦𞤵𞤺𞤭𞤼𞤭𞤲𞤮 𞤲𞤣𞤫.

𞤇𞤢𞤴𞤼𞤭 𞤲𞤮𞤲 𞤩𞤫 𞤬𞤵𞤯𞥆𞤭𞤼𞤭𞤳𞤫⹁ 𞤀𞤈𞤔𞤀𞤐𞤚𞤋𞤐𞤀 𞤱𞤢𞤯𞤵𞤲𞤮 𞤳𞤵𞥅𞤤𞤫 𞤯𞤭𞤯𞤭. 𞤑𞤮 𞤀𞤂𞤉𞤑𞤅𞤋𞤅 𞤲𞤢𞥄𞤣𞤭 𞤳𞤵𞥅𞤤𞤢𞤤 𞤢𞤪𞤢𞤲𞤢𞤤 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥔𞥖⹁ 𞤀𞤂𞤜𞤀𞤈𞤉𞤅 𞤯𞤭𞤯𞤥𞤭𞤼𞤭 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥖𞥗𞥋.

𞤑𞤮𞤲𞤮 𞤬𞤭𞥅 𞤳𞤢𞤤𞤢 𞤆𞤌𞤂𞤌𞤙 𞤨𞤭𞤴𞤢𞤲𞤮⹁ 𞤳𞤮 𞤳𞤢𞤥𞤩𞤫 𞤫 𞤀𞤈𞤔𞤀𞤐𞤚𞤋𞤐𞤀 𞤤𞤵𞤥𞤦𞤭.

𞤑𞤢 𞤶𞤫𞥅𞤼𞤢𞤼𞤢𞤩𞤢𞤤⹁ 𞤳𞤮 𞤆𞤌𞤂𞤌𞤙 𞤬𞤮𞤼𞥆𞤮𞤴𞤼𞤢 𞤫 𞤊𞤀𞤈𞤀𞤐𞤅𞤋⹁ 𞤀𞤈𞤔𞤀𞤐𞤚𞤋𞤐𞤀 𞤬𞤭𞤶𞤮𞤴𞤢 𞤌𞤅𞤚𞤀𞤈𞤀𞤂𞤋𞤒𞤀. 𞤐𞤮 𞤼𞤵𞥅𞤥𞤢𞥄 𞤳𞤢 𞤴𞤭𞤥𞤩𞤫 𞤃𞤉𞤅𞤋 𞤩𞤫𞤲⹁ 𞤱𞤢𞤯𞤢 𞤩𞤫𞤲 𞤧𞤢𞤴𞤪𞤫.

𞤃𞤉𞤑𞤅𞤋𞤑 🇲🇽 𞥒-𞥐 🇸🇦 𞤅𞤀𞤏𞤓𞤁𞤋

𞤅𞤢𞤱𞤵𞤣𞤭 𞤬𞤫𞥅𞤼𞤵𞤲𞤮 𞤬𞤫𞤲 𞤲𞤣𞤫 𞤩𞤫 𞤨𞤭𞤴𞤵𞤲𞤮𞥅 𞤀𞤈𞤔𞤀𞤐𞤚𞤋𞤐𞤀. 𞤐𞤢𞤲𞤣𞤭 𞤩𞤫 𞤧𞤭𞤳𞥆𞤵𞤲𞤮 𞤶𞤮𞥅𞤲𞤭 𞤳𞤮 𞤳𞤢𞤥𞤩𞤫 𞤸𞤫𞤲𞤣𞤮𞤼𞤮𞥅 𞤬𞤫𞤤𞤲𞤺𞤮 𞤲𞤺𞤮𞤲. 𞤀 𞤱𞤭𞤴𞤢𞤴 𞤳𞤮 𞤯𞤵𞤥 𞤼𞤵𞤲 𞤩𞤫 𞤢𞤪𞤵𞤲𞤮𞥅 𞤯𞤢𞤩𞥆𞤵𞤺𞤮𞤤 𞤑𞤀𞤚𞤀𞤈. 𞤘𞤭𞤦𞤭 𞤮𞤲𞤼𞤵𞤥𞤢⹁ 𞤸𞤫𞤲𞤣𞤭𞥅𞤯𞤮 𞤩𞤫 𞤱𞤮𞥅 𞤲𞤮 𞤸𞤢𞤴𞤤𞤵𞤣𞤫 𞤨𞤭𞤴𞤼𞤢. 𞤆𞤌𞤂𞤌𞤙 𞤩𞤫 𞤀𞤈𞤔𞤀𞤐𞤚𞤋𞤐𞤀 𞤨𞤭𞤴𞤭 𞤩𞤫𞤲 𞤸𞤢𞤲𞤣𞤫 𞤳𞤵𞥅𞤤𞤫 𞤯𞤭𞤯𞤭⹁ 𞤨𞤭𞤴𞤵𞤲𞤮 𞤩𞤫 𞤳𞤢𞤥𞤩𞤫 𞤅𞤀𞤏𞤓𞤁𞤋 𞤳𞤵𞥅𞤤𞤫 𞤯𞤭𞤯𞤭. 𞤉 𞤸𞤭𞤲𞤮 𞤤𞤫⹁ 𞤸𞤢𞤪𞤭 𞤩𞤫 𞤨𞤭𞤴𞤭𞥅𞤲𞤮 𞤀𞤈𞤔𞤀𞤐𞤚𞤋𞤐𞤀.

𞤖𞤢𞤲𞤣𞤫 𞤩𞤫 𞤢𞤪𞤵 𞤫 𞤲𞤺𞤮𞥅 𞤬𞤭𞤶𞤮 𞤸𞤭𞤩𞤫 𞤥𞤢𞤪𞤭 𞤼𞤮𞤩𞥆𞤫 𞤼𞤢𞤼𞤭. 𞤑𞤮 𞤼𞤮𞤩𞥆𞤫𞤪𞤫 𞤱𞤮𞥅𞤼𞤫𞤪𞤫 𞤨𞤫𞤼 𞤩𞤫 𞤯𞤢𞤩𞥆𞤢𞤴𞤲𞤮𞥅⹁ 𞤳𞤮𞤲𞤮 𞤩𞤫 𞤱𞤫𞤤𞤧𞤭𞤲𞤣𞤭𞥅 𞤸𞤢𞥄 𞤃𞤫𞤳𞤧𞤭𞤳𞤢𞥄𞤩𞤫 𞤩𞤫𞤲 𞤱𞤵𞤶𞤭𞤩𞤫 𞤷𞤮𞤲𞤣𞤭 𞤫 𞤻𞤢𞤥𞤢𞤳𞤵.

𞤖𞤢𞥄 𞤳𞤢 𞤬𞤭𞤶𞤮 𞤲𞤺𞤮𞤲 𞤬𞤫𞤷𞥆𞤢𞤼𞤢 𞤯𞤮𞤲 𞤸𞤢𞤪𞤭 𞤸𞤭𞤩𞤫 𞤥𞤢𞤪𞤭 𞤼𞤢𞤥𞤢𞤱𞤵. 𞤑𞤮𞤲𞤮 𞤩𞤢𞥄𞤱𞤼𞤭 𞤢𞤪𞤼𞤢𞥄𞤥𞤢⹁ 𞤃𞤉𞤑𞤅𞤋𞤑 𞤱𞤢𞤯𞤭 𞤩𞤫 𞤳𞤵𞥅𞤤𞤫 𞤯𞤭𞤯𞤭. 𞤑𞤮 𞤖𞤀𞤐𞤈𞤋 𞤃𞤀𞤈𞤚𞤉𞤐 𞤱𞤮𞤲𞤭 𞤳𞤮 𞤲𞤢𞥄𞤣𞤭 𞤳𞤵𞥅𞤤𞤢𞤤 𞤢𞤪𞤢𞤲𞤢𞤤 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥔𞥗𞥋 ⹁𞤧𞤭 𞤂𞤓𞤏𞤋 𞤡𞤀𞤏𞤉𞤟 𞤯𞤭𞤯𞤥𞤭𞤼𞤭 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥕𞥒𞥋.

𞤇𞤢𞥄𞤱𞤼𞤭 𞤯𞤵𞤥⹁ 𞤃𞤉𞤑𞤅𞤋𞤑 𞤸𞤫𞤩𞤭 𞤶𞤮𞤱𞤪𞤫 𞤬𞤫𞤰𞥆𞤵𞤺𞤮𞤤. 𞤖𞤢𞤪𞤭 𞤳𞤮 𞤳𞤵𞥅𞤤𞤢𞤤 𞤺𞤮𞥅𞤼𞤢𞤤 𞤨𞤫𞤼 𞤸𞤫𞤣𞥆𞤢𞤲𞤭𞥅 𞤩𞤫 𞤬𞤭𞥅 𞤤𞤵𞤥𞤦𞤵𞤺𞤮𞤤. 𞤇𞤫 𞤫𞤼𞤭𞥅 𞤬𞤮𞤼𞤢 𞤬𞤭𞥅 𞤲𞤮 𞤩𞤫 𞤩𞤫𞤴𞤣𞤭𞤪𞤢 𞤳𞤵𞥅𞤤𞤫. 𞤏𞤵𞤪𞤭𞤲 𞤩𞤫 𞤸𞤫𞤩𞤵𞤲𞤮 𞤯𞤫 𞤯𞤭𞤯𞤭⹁ 𞤳𞤮𞤲𞤮 𞤸𞤢𞤪𞤭 𞤯𞤫𞤲 𞤣𞤢𞤺𞤢𞥄𞤳𞤭. 𞤉 𞤲𞤣𞤫𞤪 𞤫𞤼𞤢𞥄𞤪𞤫 𞤥𞤢𞤩𞥆𞤫⹁ 𞤩𞤫 𞤴𞤫𞤶𞥆𞤭𞤼𞤭 𞤸𞤭𞤱𞤵𞤺𞤮𞤤 𞤩𞤢𞥄𞤱𞤮 𞤥𞤢𞤩𞥆𞤫 𞤸𞤢𞥄 𞤅𞤀𞤏𞤓𞤁𞤋 𞤱𞤵𞤪𞤼𞤭 𞤳𞤵𞥅𞤤𞤢𞤤. 𞤔𞤮𞤱𞤪𞤫 𞤥𞤢𞤤𞥆𞤢 𞤼𞤢𞤥𞤢𞤱𞤵 𞤥𞤢𞥄𞤴𞤭 𞤯𞤮𞤲.

𞤊𞤭𞥅 𞤳𞤢𞤤𞤢 𞤃𞤉𞤑𞤅𞤋𞤑 𞤨𞤭𞤴𞤭𞥅 𞤅𞤀𞤏𞤓𞤁𞤋⹁ 𞤳𞤢𞤥𞤩𞤫 𞤳𞤢𞤣𞤭 𞤩𞤫 𞤴𞤢𞤤𞤼𞤭𞥅 𞤸𞤢𞤲𞤣𞤫 𞤲𞤣𞤫 𞤼𞤢𞤱𞤵𞤲𞤮𞥅 𞤩𞤫 𞤱𞤢𞤯𞤢𞥄𞤥𞤢 𞤳𞤵𞥅𞤤𞤫 𞤩𞤵𞤪𞤭 𞤆𞤌𞤂𞤌𞤙.

𞤙𞤮𞤺𞥆𞤢𞤲𞤣𞤫 𞤀𞤴𞥃𞤢 𞤅𞤮𞥅. 𞤋𞤥𞥆𞤭𞤲𞤢𞥄𞤯𞤮 𞤫 𞤭𞤲𞤣𞤫 𞤤𞤮𞤱𞤪𞤫 𞤚𞤢𞤦𞤢𞤤𞤣𞤫 𞤲𞤣𞤫𞤲 𞤬𞤭𞥅 𞤸𞤵𞤥𞤨𞤭𞤼𞤵𞤺𞤮𞤤 𞤮𞤲 𞤳𞤮 𞤱𞤮𞤲𞤭 𞤫 𞤬𞤫𞤰𞥆𞤵𞤣𞤫 𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤑𞤢𞤼𞤢𞤪.