𞤑𞤮 𞤫 𞤺𞤮𞤮 𞤤𞤫𞤱𞤪𞤵 𞤐𞤦𞤮𞥅𞤴𞤮⹁ 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥖𞥐⹁ 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲 𞤧𞤭𞤲𞤷𞤢𞤲𞤭 𞤸𞤮𞥅𞤪𞤫 𞤥𞤵𞥅𞤯𞤵𞤲 𞤲𞤦𞤵𞥅𞤯𞤭 𞤯𞤭 𞤲𞤮 𞤸𞤵𞥅𞤱𞤼𞤮𞤪𞤫𞥅 𞤫 𞤥𞤢𞤴𞤪𞤭. 𞤑𞤮 𞤸𞤢𞤲𞤳𞤭 𞤫 𞤺𞤮𞤮 𞤲𞤦𞤮𞥅𞤴𞤮 𞤸𞤭𞤼𞤢𞥄𞤲𞤣𞤫 𞥒𞥐𞥒𞥕⹁ 𞤷𞤫𞥅𞤣𞤫 𞤘𞤭𞤲𞤫 𞤯𞤫𞤲 𞤣𞤵𞥅𞤩𞤭𞤼𞤭 𞥖𞥕 (𞤷𞤢𞤨𞥆𞤢𞤲𞤯𞤫 𞤶𞤫𞥅𞤺𞤮𞤮 𞤫 𞤶𞤮𞤱𞤭) 𞤺𞤭𞤤𞤢 𞤯𞤫 𞤧𞤭𞤲𞤷𞤢𞥄.

𞤂𞤢𞥄𞤥𞤵 𞤺𞤭𞤲𞤫 𞤲𞤺𞤵𞤲 𞤭𞤲𞥆𞤭𞤪𞤭 𞤲𞤦𞤵𞥅𞤯𞤭 𞤯𞤭𞤲 “𞤊𞤢𞤪𞤢𞤲 𞤘𞤭𞤲𞤫“. 𞤇𞤫 𞤴𞤫𞤪𞤭𞤲𞥋𞤣𞤭𞤪𞤭 𞤊𞤢𞤪𞤢𞤲 𞤘𞤭𞤲𞤫 𞤺𞤮𞥅𞤼𞤮 𞤉 𞤬𞤢𞤪𞤢𞤲 𞤅𞤫𞥅𞤬𞤢𞥄 𞤺𞤮𞥅𞤼𞤮. (𞥑 FG = 𞥑 FCFA).

𞤀𞤣𞤮 𞤯𞤭𞥅 𞤳𞤢𞥄𞤤𞤭𞤧𞤭𞥅𞤶𞤭 𞤧𞤭𞤲𞤷𞤫𞥅𞤲𞤣𞤫⹁ 𞤸𞤢𞤪𞤭 𞤘𞤭𞤲𞤫 𞤳𞤢𞤣𞤭 𞤳𞤮 𞤊𞤢𞤪𞤢𞤲 𞤅𞤫𞥅𞤬𞤢𞥄 (FCFA) 𞤸𞤵𞥅𞤱𞤼𞤮𞤪𞤢𞤴𞤲𞤮𞥅 𞤱𞤢𞤲𞤮 𞤯𞤫𞤴𞤢 𞤤𞤫𞤴𞤯𞤫 𞤖𞤢𞥄𞤤𞤭-𞤬𞤢𞤪𞤢𞤲𞤧𞤭𞥅𞤶𞤫 𞤖𞤭𞤪𞤲𞤢𞥄𞤲𞤺𞤫 𞤀𞤬𞤪𞤭𞤳.

 

𞤊𞤭𞥅 𞤸𞤢𞤱𞤶𞤢𞤺𞤮𞤤 𞤥𞤢𞤤𞥆𞤢 𞤸𞤫𞤩𞥆𞤭𞤼𞤢𞤺𞤮𞤤 𞤯𞤭𞥅 𞤲𞤦𞤵𞥅𞤯𞤭 𞤳𞤫𞤧𞤭⹁ 𞤤𞤢𞥄𞤥𞤩𞤫 𞤘𞤭𞤲𞤫 𞤩𞤫𞤲 𞤵𞤣𞥆𞤭𞤼𞤭 𞤃𞤢𞤲𞤳𞤭𞤪𞤺𞤢𞤤 𞤂𞤢𞤪𞤢𞤤𞤱𞤢𞤤 (Banque d’État)⹁ 𞤪𞤫𞤬𞤼𞤭 𞤩𞤫 𞤥𞤢𞤩𞥆𞤭 𞤥𞤢𞤲𞤳𞤭𞤪𞤯𞤫 𞤸𞤫𞤪𞤼𞤮𞤪𞤢𞥄𞤯𞤫 𞤯𞤫𞤲 𞤬𞤮𞤨 𞤫 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲. 𞤇𞤫 𞤼𞤮𞤽𞤭 𞤳𞤢𞤣𞤭 𞤵𞤣𞥆𞤭𞤼𞤵𞤺𞤮𞤤 𞤥𞤢𞤲𞤳𞤭𞤪𞤯𞤫 𞤸𞤢𞤤𞤮𞤪𞤢𞤤𞤶𞤫 𞤳𞤫𞤧𞤫 . 𞤑𞤮 𞤱𞤮𞤲𞤭 𞤥𞤢𞤲𞤳𞤭𞤪𞤯𞤫 𞤸𞤢𞤤𞤮𞤪𞤢𞤤𞤶𞤫 𞤥𞤢𞤤𞥆𞤢 𞤸𞤫𞤪𞤼𞤮𞤪𞤢𞥄𞤯𞤫⹁ 𞤳𞤮 𞤥𞤢𞤲𞤳𞤭𞤪𞤯𞤫 𞤯𞤫 𞤴𞤭𞤥𞤩𞤫 𞤩𞤫𞤲 𞤶𞤫𞤴𞤢𞤲𞤭 𞤸𞤮𞥅𞤪𞤫 𞤥𞤵𞤵𞤲⹁ 𞤸𞤢𞤪𞤢 𞤤𞤢𞥄𞤥𞤵 𞤱𞤢𞤯𞤢𞥄 𞤶𞤵𞥅𞤯𞤫 𞤶𞤫𞤴𞤢𞤤 𞤫 𞤥𞤢𞤶𞥆𞤫. 𞤘𞤭𞤤𞤢 𞤮𞤲𞤼𞤵𞤥𞤢 𞤸𞤢𞥄 𞤲𞤣𞤫 𞤅𞤫𞥅𞤳𞤵 𞤚𞤵𞥅𞤪𞤫𞥅 𞤥𞤢𞥄𞤴𞤵𞤲𞤮𞥅⹁ 𞤤𞤢𞥄𞤥𞤵 𞤘𞤭𞤲𞤫 𞤲𞤺𞤵𞤲 𞤣𞤵𞤽𞤭𞤲𞤢𞤲𞤢𞥄𞤤𞤭 𞤸𞤢𞤴 𞤺𞤮𞥅𞤼𞤮 𞤵𞤣𞥆𞤭𞤼𞤵𞤺𞤮𞤤 𞤥𞤢𞤲𞤳𞤭𞤪𞤺𞤢𞤤 𞤫 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲.

𞤇𞤢𞥄𞤱𞤮 𞤯𞤭𞥅 𞤊𞤢𞤪𞤢𞤲𞤶𞤭 𞤴𞤤𞤢𞤼𞤭𞤲𞤫𞥅𞤣𞤫⹁ 𞤯𞤭 𞤸𞤫𞤩𞤵𞤲𞤮 𞤷𞤢𞤯𞤫𞥅𞤤𞤫 𞤯𞤵𞥅𞤯𞤵𞤯𞤫. 𞤐𞤮 𞤶𞤫𞤴𞤢𞥄 𞤫 𞤯𞤫𞥅𞤲⹁ 𞤲𞤣𞤫 𞤱𞤮𞤲𞤵𞤲𞤮𞥅 𞤳𞤮 𞤫 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲 𞤼𞤢𞤲 𞤊𞤢𞤪𞤢𞤲 𞤘𞤭𞤲𞤫 𞤱𞤢𞥄𞤱𞤫𞤼𞤫𞥅 𞤸𞤵𞥅𞤱𞤼𞤮𞤪𞤫𞥅𞤣𞤫 𞤬𞤭𞥅 𞤧𞤮𞥅𞤣𞤵𞤺𞤮𞤤. 𞤚𞤢𞤱𞤼𞤭 𞤳𞤢𞤣𞤭⹁ 𞤧𞤮 𞤶𞤢𞤲𞤢𞤲𞤮 𞤸𞤫𞤩𞤭𞥅 𞤳𞤢𞥄𞤤𞤭𞤧𞤭 𞤫 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲⹁ 𞤮 𞤱𞤢𞥄𞤱𞤢𞤼𞤢𞥄 𞤲𞤢𞤩𞤵𞤣𞤫 𞤯𞤭 𞤳𞤢 𞤥𞤢𞤳𞥆𞤮. 𞤍𞤵𞤥 𞤱𞤢𞤯𞤭 𞤸𞤢𞥄 𞤊𞤢𞤪𞤢𞤲𞤧𞤭𞥅𞤩𞤫 𞤩𞤫𞤲 𞤫 𞤶𞤢𞤲𞤢𞤲𞤩𞤫 𞤸𞤫𞤣𞥆𞤭𞤲𞤮𞥅𞤩𞤫 𞤩𞤫𞤲 𞤘𞤭𞤲𞤫 𞤣𞤢𞤪𞤼𞤭𞤲𞤭 𞤥𞤵𞤪𞤢𞥄𞤯𞤭 𞤥𞤢𞤩𞥆𞤫 𞤯𞤭𞤲⹁ 𞤩𞤫 𞤪𞤵𞤼𞥆𞤭𞥅 𞤳𞤢 𞤥𞤢𞤩𞥆𞤫.

 

𞤐𞤣𞤫 𞤘𞤭𞤲𞤫 𞤸𞤫𞤩𞤼𞤭𞤼𞤭𞤲𞤮𞥅⹁ 𞤊𞤢𞤪𞤢𞤲𞤧𞤭 𞤼𞤮𞤽𞤵𞤲𞤮 𞤭𞤼𞥆𞤵𞤺𞤮𞤤 𞤺𞤭𞤲𞤫𞥅𞤶𞤭 (𞤨𞤮𞤪𞤮𞤣𞤵𞤱𞤭𞥅) 𞤤𞤢𞤴𞤣𞤭 𞤊𞤢𞤪𞤢𞤲𞤧𞤭 𞤲𞤢𞤩𞤢 𞤯𞤭 𞤘𞤭𞤲𞤫. 𞤊𞤢𞤪𞤢𞤲𞤧𞤭 𞤼𞤮𞤽𞤭 𞤳𞤢𞤣𞤭 𞤭𞤼𞥆𞤵𞤺𞤮𞤤 𞤊𞤢𞤪𞤢𞤲𞤶𞤭 𞤊𞤢𞤪𞤢𞤲𞤧𞤭 𞤯𞤭𞤲 𞤲𞤢𞤩𞤢 𞤯𞤭 𞤘𞤭𞤲𞤫. 𞤑𞤢𞥄𞤤𞤭𞤧𞤭𞥅𞤶𞤭 𞤤𞤫𞤴𞤯𞤫 𞤶𞤢𞤲𞤢𞤲𞤫 𞤯𞤫𞤲 𞤧𞤢𞤯𞤭 𞤬𞤮𞤼𞤢 𞤫 𞤲𞤣𞤫𞤪 𞤘𞤭𞤲𞤫. 𞤑𞤮 𞤯𞤭𞤲 𞤳𞤢𞥄𞤳𞤭 𞤶𞤢𞤲𞤢𞤲𞤭 𞤤𞤫⹁ 𞤨𞤭𞥅𞤶𞤭 𞤧𞤮𞥅𞤣𞤭𞤪𞤼𞤫𞥅 𞤳𞤢 𞤤𞤫𞤴𞤯𞤫 𞤶𞤢𞤲𞤢𞤲𞤫 𞤢𞤣𞥆𞤫𞥅 𞤘𞤭𞤲𞤫.

 

𞤐𞤣𞤫 𞤲𞤦𞤵𞥅𞤯𞤭 𞤶𞤢𞤲𞤢𞤲𞤭 𞤯𞤭𞤲 𞤧𞤢𞤯𞤵𞤲𞤮𞥅 𞤘𞤭𞤲𞤫⹁ 𞤷𞤮𞤺𞥆𞤵 𞤥𞤢𞤶𞥆𞤭 𞤰𞤢𞤱𞤭 𞤬𞤮𞤼𞤢⹁ 𞤊𞤢𞤪𞤢𞤲𞤶𞤭 𞤘𞤭𞤲𞤫 𞤯𞤭𞤲 𞤼𞤭𞤨𞥆𞤭𞥅 𞤬𞤮𞤼𞤢. 𞤐𞤣𞤫 𞤼𞤢𞤱𞤵𞤲𞤮𞥅 𞤤𞤫 𞤨𞤭𞥅𞤶𞤭 𞤯𞤵𞥅𞤯𞤵𞤯𞤭 𞤳𞤮 𞤳𞤢 𞤶𞤢𞤲𞤢𞤲𞤭𞤪𞤭 𞤭𞤱𞤢𞤴𞤲𞤮𞥅⹁ 𞤼𞤢𞤱𞤼𞤭 𞤳𞤢𞤣𞤭 𞤊𞤢𞤪𞤢𞤲𞤶𞤭 𞤘𞤭𞤲𞤫 𞤯𞤭𞤲 𞤴𞤢𞤲𞤭𞥅⹁ 𞤷𞤮𞤺𞥆𞤵 𞤨𞤭𞥅𞤶𞤭 𞤯𞤭𞤲 𞤰𞤢𞤱𞤭 𞤬𞤮𞤼𞤢 𞤳𞤢 𞤶𞤫𞤸𞤫 𞤘𞤭𞤲𞤫. 𞤐𞤮 𞤨𞤭𞥅𞤶𞤭 𞤧𞤢𞤯𞤭𞤪𞤭 𞤱𞤮𞥅⹁ 𞤳𞤮 𞤲𞤮𞥅𞤲 𞤷𞤮𞤺𞥆𞤵 𞤥𞤢𞤶𞥆𞤭 𞤩𞤫𞤴𞤣𞤮𞤪𞤼𞤢⹁ 𞤳𞤮 𞤲𞤮𞥅𞤲 𞤳𞤢𞤣𞤭 𞤳𞤢𞥄𞤤𞤭𞥅𞤧𞤭𞥅𞤶𞤭 𞤯𞤭𞤲 𞤶𞤢𞥄𞤧𞤭𞤪𞤼𞤢.

𞤊𞤭𞥅 𞤸𞤵𞤩𞤭𞤲’𞤣𞤢𞤺𞤮𞤤 𞤯𞤫𞥅 𞤷𞤢𞤯𞤫𞥅𞤤𞤫 𞤫 𞤬𞤭𞥅 𞤶𞤵𞤺𞥆𞤭𞤲𞤺𞤮𞤤 𞤲𞤦𞤵𞥅𞤯𞤭 𞤘𞤭𞤲𞤫 𞤯𞤭𞤲⹁ 𞤅𞤫𞥅𞤳𞤵 𞤚𞤵𞥅𞤪𞤫 𞤧𞤮𞤳𞤭 𞤳𞤫𞥅𞤪𞤭 𞤘𞤭𞤲𞤫 𞤯𞤭𞤲 𞤬𞤮𞤨. 𞤌 𞤼𞤮𞤽𞤢𞤲𞤭 𞤴𞤭𞤥𞤩𞤫 𞤩𞤫𞤲 𞤴𞤫𞥅𞤴𞤵𞤺𞤮𞤤 𞤺𞤭𞤲𞤫𞥅𞤶𞤭 𞤯𞤵𞥅𞤯𞤵𞤯𞤭 𞤭𞤱𞤢𞤴𞤯𞤭 𞤳𞤢 𞤶𞤢𞤲𞤢𞤲𞤭𞤪𞤭⹁ 𞤱𞤢𞤲𞤮 𞤥𞤢𞥄𞤪𞤮⹁ 𞤤𞤫𞤱𞤻𞤭 (𞤧𞤵𞤳𞥆𞤢𞤪)⹁ 𞤲𞤫𞤦𞥆𞤢𞤥 𞤫 𞤳𞤮 𞤲𞤢𞤲𞤣𞤭 𞤫 𞤯𞤭𞥅. 𞤚𞤢𞤱𞤭 𞤶𞤮𞥅𞤲𞤭⹁ 𞤳𞤮 𞤤𞤢𞥄𞤥𞤵 𞤲𞤺𞤵𞤲 𞤴𞤫𞥅𞤴𞤢𞤼𞤢 𞤯𞤭.

 

𞤐𞤣𞤫 𞤷𞤢𞤯𞤫𞥅𞤤𞤫 𞤯𞤫𞤲 𞤯𞤵𞥅𞤯𞤭𞤪𞤲𞤮𞥅 𞤤𞤢𞥄𞤥𞤩𞤫 𞤘𞤭𞤲𞤫 𞤩𞤫𞤲⹁ 𞤻𞤢𞤤𞤲𞤣𞤫 𞥒 𞤒𞤢𞤪𞤳𞤮 𞥑𞥙𞥗𞥒⹁ 𞤩𞤫 𞤱𞤢𞤴𞤤𞤭 𞤊𞤢𞤪𞤢𞤲𞤶𞤭 𞤘𞤭𞤲𞤫 𞤯𞤭𞤲. 𞤇𞤫 𞤤𞤮𞤲𞤼𞤭𞤲𞤭𞤪𞤭 𞤯𞤭 𞤳𞤫𞤧𞤭⹁ 𞤯𞤭 𞤩𞤫 𞤭𞤲𞥆𞤭 𞤅𞤋𞤂𞤋 (𞤻𞤭𞥅𞤱𞤢 𞤥𞤢𞤤𞥆𞤢 𞤥𞤢𞤱𞤦𞤢 𞤳𞤢 𞤧𞤮𞥅𞤧𞤮𞥅𞤪𞤫). 𞤊𞤢𞤪𞤢𞤲𞤶𞤭 𞤧𞤢𞤨𞥆𞤮⹁ 𞤤𞤮𞤲𞤼𞤭𞤲𞤭𞤪𞤢𞥄 𞤅𞤭𞤤𞤭𞥅𞤪𞤵 𞤱𞤮𞥅𞤼𞤵𞤪𞤵. 𞤍𞤵𞤥 𞤱𞤮𞤲𞤭 𞤧𞤢𞤦𞤵 𞤴𞤫𞥅𞤦𞤢𞤺𞤮𞤤 𞤶𞤢𞤱𞤤𞤫 𞤯𞤵𞥅𞤯𞤵𞤯𞤫. 𞤐𞤮 𞤼𞤢𞤱𞤢𞤲𞤮𞥅 𞤫 𞤬𞤢𞥄𞤲𞤣𞤢𞥄𞤪𞤫 𞤤𞤢𞥄𞤥𞤩𞤫 𞤩𞤫𞤲 𞤱𞤢𞤴𞤤𞤵𞤺𞤮𞤤 𞤲𞤦𞤵𞥅𞤯𞤭 𞤯𞤭𞤲⹁  𞤤𞤭𞤩𞤵𞤺𞤮𞤤 𞤴𞤫𞥅𞤴𞤮𞥅𞤩𞤫 𞤩𞤫𞤲. 𞤔𞤮𞤺𞤭𞤲𞤮𞥅𞤯𞤮 𞤼𞤫𞥅𞤥𞤫𞤣𞤫𞤪𞤫 𞤢𞤣𞤮 𞤅𞤭𞤤𞤭⹁ 𞤶𞤮𞥅𞤲𞤭 𞤳𞤮 𞤧𞤢𞤨𞥆𞤮 𞤸𞤫𞤣𞥆𞤮𞤪𞤭. 𞤍𞤵𞤥 𞤤𞤫⹁ 𞤳𞤮 𞤱𞤢𞤴𞤤𞤭𞤲𞤮𞥅 𞤼𞤢𞤲⹁ 𞤳𞤮 𞤭𞤲𞤣𞤫 𞤲𞤦𞤵𞥅𞤯𞤭 𞤯𞤭𞤲. 𞤏𞤮𞤲𞤢𞥄 𞤱𞤢 𞤧𞤭 𞤳𞤮 𞤲𞤦𞤵𞥅𞤯𞤭 𞤶𞤢𞤲𞤢𞤲𞤭 𞤢𞤣𞥆𞤢𞤲𞤮𞥅.

𞤋𞤼𞥆𞤵𞤺𞤮𞤤 𞤊𞤢𞤪𞤢𞤲 𞤢𞤣𞥆𞤢 𞤅𞤭𞤤𞤭⹁ 𞤭𞤼𞥆𞤢𞥄𞤲𞤮 𞤘𞤭𞤲𞤫 𞤫 𞤷𞤢𞤯𞤫𞥅𞤤𞤫. 𞤚𞤢𞤥𞤨𞤫𞤪𞤫 𞤲𞤣𞤫𞤲 𞤫 𞤼𞤮𞤪𞥆𞤢 𞤳𞤢𞤲 𞤩𞤵𞤪𞤼𞤵 𞤩𞤫𞤴𞤣𞤢𞥄𞤣𞤫. 𞤑𞤮 𞤱𞤢𞤯𞤭 𞤯𞤵𞤥⹁ 𞤳𞤮 𞤼𞤢𞤱𞤣𞤫 𞤳𞤫𞥅𞤪𞤭 𞤯𞤭𞤲 𞤧𞤮𞤳𞤼𞤢𞤲𞤮𞥅𞤳𞤢 𞤬𞤭𞥅 𞤲𞤮 𞤴𞤭𞤥𞤩𞤫 𞤩𞤫𞤲 𞤧𞤮𞥅𞤣𞤭𞤪𞤮𞤴𞤢 𞤨𞤭𞥅𞤶𞤭 𞤢𞤣𞥆𞤢 𞤺𞤭𞤲𞤫. 𞤈𞤫𞤬𞤼𞤭 𞤳𞤢𞤣𞤭⹁ 𞤥𞤢𞤲𞤳𞤭𞤪𞤯𞤫 𞤯𞤫𞤲 𞤫 𞤴𞤫𞥅𞤴𞤭𞤪𞤤𞤫 𞤥𞤢𞤱𞤯𞤫 𞤯𞤫𞤲 𞤣𞤵𞤽𞤭𞤲𞤢𞤲𞤢𞤲𞤮𞥅𞤳𞤢 𞤳𞤢𞤣𞤭 𞤵𞤣𞥆𞤭𞤼𞤵𞤺𞤮𞤤.

𞤀𞤪𞤼𞤵𞤺𞤮𞤤 𞤊𞤢𞤪𞤢𞤲 𞤘𞤭𞤲𞤫
𞤑𞤮 𞤅𞤭𞤤𞤭 𞤤𞤢𞥄𞤼𞤭𞤲𞤮𞥅 𞤲𞤦𞤵𞥅𞤯𞤭 𞤘𞤭𞤲𞤫 𞤯𞤭𞤲 𞤸𞤢𞥄 𞤲𞤣𞤫 𞤤𞤢𞥄𞤥𞤵 𞤅𞤫𞥅𞤳𞤵 𞤚𞤵𞥅𞤪𞤫𞥅 𞤲𞤺𞤵𞤲 𞤬𞤫𞤰𞥆𞤵𞤲𞤮𞥅 𞤩𞤢𞥄𞤱𞤮 𞤥𞤢𞥄𞤴𞤣𞤫 𞤥𞤢𞤳𞥆𞤮 𞤻𞤢𞤤𞤲𞤣𞤫 𞥒𞥖 𞤐𞤦𞤮𞥅𞤴𞤮 𞥑𞥙𞥘𞥔.

 

𞤐𞤣𞤫 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤷𞤭𞤤𞤭𞤲𞤮𞥅 𞤤𞤢𞥄𞤥𞤵 𞤲𞤺𞤵𞤲 𞤻𞤢𞤤𞤲𞤣𞤫 𞥓 𞤅𞤫𞥅𞤯𞤼𞤮 𞥑𞥙𞥘𞥔⹁ 𞤩𞤫 𞤼𞤮𞤽𞤼𞤭 𞤺𞤫𞤴𞤲𞤺𞤵 𞤲𞤺𞤵𞤲⹁ 𞤩𞤫 𞤣𞤵𞤽𞤭𞤲𞤭 𞤳𞤢𞤣𞤭 𞤵𞤣𞥆𞤭𞤼𞤵𞤺𞤮𞤤 𞤥𞤢𞤲𞤳𞤭𞤪𞤯𞤫 𞤸𞤢𞤤𞤮𞤪𞤢𞤤𞤶𞤫 𞤯𞤫𞤲.
𞤉 𞤸𞤭𞤼𞤢𞥄𞤲𞤣𞤫 𞥑𞥙𞥘𞥕⹁ 𞤩𞤫 𞤱𞤮𞤨𞥆𞤭 𞤅𞤭𞤤𞤭⹁ 𞤩𞤫 𞤢𞤪𞤼𞤭𞤪𞤭 𞤊𞤢𞤪𞤢𞤲𞤶𞤭 𞤘𞤭𞤲𞤫 𞤳𞤫𞤧𞤭. 𞤅𞤭𞤤𞤭𞥅𞤪𞤵 𞤱𞤮𞥅𞤼𞤵𞤪𞤵 𞤤𞤮𞤲𞤼𞤭𞤲𞤭𞤪𞤢𞥄 𞤬𞤢𞤪𞤢𞤲𞤪𞤵 𞤱𞤮𞥅𞤼𞤵𞤪𞤵. 𞤙𞤢𞤤𞤲𞤣𞤫 𞤯𞤭 𞤴𞤢𞤤𞤼𞤭𞤲𞤢𞤲𞤮𞥅⹁ 𞤸𞤢𞤪𞤭 𞤬𞤢𞤪𞤢𞤲 𞤘𞤭𞤲𞤫 𞤺𞤮𞥅𞤼𞤮 𞤲𞤮 𞤬𞤮𞤼𞤢 𞤫 𞤊𞤢𞤪𞤢𞤲 𞤅𞤫𞥅𞤬𞤢𞥄 𞤺𞤮𞥅𞤼𞤮. 𞤑𞤮𞤲𞤮 𞤸𞤢𞤲𞤣𞤫⹁ 𞤊𞤢𞤪𞤢𞤲 𞤅𞤫𞥅𞤬𞤢𞥄 𞤲𞤮 𞤶𞤢𞤪𞤭 𞤳𞤮 𞤴𞤢𞤱𞤼𞤭 𞤊𞤢𞤪𞤢𞤲𞤶𞤭 𞤘𞤭𞤲𞤫 𞥑𞥕 (𞤧𞤢𞤨𞥆𞤮 𞤫 𞤶𞤮𞤱𞤭). 𞤏𞤵𞤪𞤭𞤲 𞤢𞤪𞤭𞥅 𞤫 𞤧𞤢𞥄𞤴𞤭⹁ 𞤊𞤢𞤪𞤢𞤲 𞤅𞤫𞥅𞤬𞤢𞥄 𞤺𞤮𞥅𞤼𞤮 𞤴𞤢𞤸𞤵𞤲𞤮 𞤸𞤢𞥄 𞤬𞤮𞤼𞤭 𞤫 𞤊𞤢𞤪𞤢𞤲𞤶𞤭 𞤘𞤭𞤲𞤫 𞤲𞤮𞥅𞤺𞤢𞤴.

 

𞤊𞤫𞤱𞤲𞤣𞤮 𞤀𞤤𞤬𞤢𞥄 𞤑𞤮𞤲𞤣𞤫 𞤬𞤮𞤤𞥆𞤢𞥄⹁ 𞤷𞤫𞤥𞤦𞤫 𞤊𞤢𞤪𞤢𞤲𞤶𞤭 𞤘𞤭𞤲𞤫 𞤯𞤭𞤲 𞤰𞤢𞤱𞤵𞤲𞤮 𞤧𞤫𞥅𞤯𞤢. 𞤕𞤮𞤺𞥆𞤵 𞤁𞤢𞤤𞤢⹁ 𞤉𞤪𞤮 𞤫 𞤅𞤫𞥅𞤬𞤢𞥄 𞤵𞤧𞤼𞤭𞥅 𞤬𞤭𞥅 𞤳𞤢𞤤𞤢 𞤷𞤮𞤺𞥆𞤭 𞤯𞤭𞤲 𞤳𞤢 𞤶𞤫𞤸𞤪𞤫 𞤼𞤭𞤨𞥆𞤢𞤲𞤮𞥅𞤳𞤭. 𞤘𞤢𞥄𞤲𞤭𞤲𞤼𞤭𞤲 𞤺𞤢𞥄⹁ 𞤣𞤮𞥅𞤤𞤫 𞤊𞤢𞤪𞤢𞤲 𞤘𞤭𞤲𞤫 𞤲𞤮 𞤵𞤧𞤼𞤢𞥄𞤣𞤫⹁ 𞤷𞤮𞤺𞥆𞤭 𞤲𞤮 𞤩𞤫𞤴𞤣𞤢𞥄𞤣𞤫 𞤼𞤢𞤲.

 

𞤍𞤵𞥅𞤯𞤵𞤩𞤫 𞤲𞤮 𞤤𞤢𞤲𞤣𞤭𞤼𞤢𞥄𞤣𞤫 𞤳𞤮 𞤱𞤮𞤲𞤭 𞤧𞤮𞤥𞤦𞤵 𞤯𞤵𞤥؟

𞤐𞤺𞤵𞥅 𞤻𞤢𞤱𞤵 𞤑𞤮𞤱𞤭𞤣-𞥑𞥙 𞤫 𞤸𞤢𞤪𞤫 𞤲𞤣𞤫𞤲 𞤓𞤑𞤈𞤀𞤒𞤐𞤀 𞤲𞤮 𞤶𞤫𞤴𞤢𞥄 𞤫 𞤳𞤮 𞤧𞤢𞤦𞤭𞤲𞤭 𞤩𞤫𞤴𞤣𞤢𞤺𞤮𞤤 𞤷𞤮𞤺𞥆𞤵 𞤨𞤭𞥅𞤶𞤭 𞤯𞤵𞥅𞤯𞤵𞤯𞤭 𞤫 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲 𞤱𞤮𞤲𞤢𞥄 𞤘𞤭𞤲𞤫 𞤼𞤵𞤲. 𞤑𞤮𞤲𞤮 𞤲𞤮 𞤼𞤢𞤱𞤢𞥄 𞤸𞤫𞤲 𞤳𞤢𞤣𞤭⹁ 𞤧𞤢𞤯𞤵𞤺𞤮𞤤 𞤷𞤫𞥅𞤣𞤫 𞤥𞤢𞤱𞤯𞤫 𞤯𞤫𞤲 𞤫 𞤲𞤣𞤫𞤪 𞤤𞤫𞤴𞤣𞤭 𞤲𞤣𞤭𞤲.

 

𞤐𞤦𞤵𞥅𞤯𞤭 𞤸𞤭𞤼𞥆𞤭𞥅 𞤱𞤮𞥅 𞤧𞤮 𞤼𞤢𞤱𞤭𞥅 𞤨𞤭𞥅𞤶𞤭 𞤴𞤢𞤤𞤼𞤢𞤴𞤯𞤭 𞤫 𞤤𞤫𞤴𞤣𞤭 𞤲𞤣𞤭𞤲 𞤲𞤮 𞤩𞤵𞤪𞤭 𞤳𞤮 𞤢𞤣𞥆𞤫𞤼𞤫𞥅 𞤲𞤢𞥄𞤣𞤫𞥅 𞤫 𞤥𞤢𞤴𞤪𞤭 𞤬𞤭𞥅 𞤴𞤫𞥅𞤴𞤵𞤼𞤵𞤺𞤮𞤤.
𞤅𞤮 𞤼𞤢𞤱𞤭𞥅 𞤨𞤭𞥅𞤶𞤭 𞤯𞤭 𞤶𞤢𞤲𞤢𞤲𞤭𞤪𞤭 𞤲𞤣𞤭𞤲 𞤸𞤢𞤼𞤮𞤲𞤶𞤭𞤲𞤭 𞤫 𞤥𞤵𞥅𞤯𞤵𞤲⹁ 𞤲𞤮 𞤥𞤮𞤰𞥆𞤭𞤲𞤫𞥅𞤣𞤫 𞤫 𞤤𞤫𞤴𞤣𞤭 𞤲𞤣𞤭𞤲⹁ 𞤳𞤢𞥄𞤤𞤭𞤧𞤭𞥅𞤶𞤭 𞤶𞤢𞤲𞤢𞤲𞤭 𞤯𞤭𞤲 𞤲𞤢𞥄𞤼𞤢𞤴 𞤬𞤮𞤼𞤢 𞤧𞤫𞤥𞤦𞤭𞤲𞤢 𞤷𞤫𞥅𞤣𞤫 𞤤𞤫𞤴𞤣𞤭 𞤲𞤣𞤭𞤲. 𞤑𞤮𞤲𞤮 𞤧𞤮 𞤼𞤢𞤱𞤭𞥅 𞤸𞤢𞤼𞤮𞤲𞤶𞤭𞤲𞤢𞥄𞤯𞤭 𞤯𞤭𞤲 𞤳𞤮 𞤳𞤢 𞤶𞤢𞤲𞤢𞤲𞤭𞤪𞤭 𞤭𞤱𞤢𞤼𞤢⹁ 𞤲𞤦𞤵𞥅𞤯𞤭 𞤤𞤫𞤴𞤣𞤭 𞤲𞤣𞤭𞤲 𞤶𞤢𞥄𞤧𞤢𞤴 𞤼𞤢𞤲.

 

𞤊𞤫𞤱𞤲𞤣𞤮 𞤊𞤢𞤪𞤢𞤲 𞤘𞤭𞤲𞤫 𞤢𞤪𞤼𞤭𞤪𞤢𞤲𞤮𞥅 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥘𞥕⹁ 𞤸𞤢𞤪𞤭 𞤱𞤵𞥅𞤲𞤣𞤵 𞤫 𞤲𞤦𞤵𞥅𞤯𞤭 𞤯𞤭𞤯𞤭 𞤬𞤮𞤨 𞤲𞤮 𞤱𞤮𞥅𞤣𞤵𞤲𞤮𞥅. 𞤑𞤮 𞤸𞤢𞥄 𞤫 𞤺𞤵𞤤𞤵𞥅𞤶𞤫 𞤶𞤮𞤱𞤭⹁ 𞤳𞤢𞥄𞤳𞤭 𞤯𞤭𞤲 𞤸𞤢𞥄𞤯𞤵𞤲𞤮𞥅. 𞤑𞤮 𞤻𞤢𞤤𞤲𞤣𞤫 𞥑𞥑 𞤑𞤮𞤪𞤧𞤮 𞥒𞥐𞥐𞥗⹁ 𞤲𞤣𞤫 𞤬𞤭𞥅𞤪𞤢 𞤥𞤢𞤤𞥆𞤢 𞤣𞤮𞥅𞤤𞤫 𞤵𞤧𞤼𞤭𞤲𞤮𞥅 𞤫 𞤊𞤢𞤪𞤢𞤲⹁ 𞤺𞤵𞤤𞤵𞥅𞤶𞤫 𞤧𞤢𞤨𞥆𞤮 𞤳𞤢𞥄𞤳𞤮𞤤 𞤩𞤫𞤴𞤣𞤭𞤼𞤢𞥄. 𞤁𞤵𞥅𞤩𞤭 𞤶𞤫𞥅𞤼𞤢𞤼𞤭 𞤩𞤢𞥄𞤱𞤮 𞤯𞤵𞤥⹁ 𞤳𞤢𞥄𞤳𞤮𞤤 𞤺𞤵𞤤𞤵𞥅𞤶𞤫 𞤲𞤮𞥅𞤺𞤢𞤴 𞤩𞤫𞤴𞤣𞤭𞤼𞤢𞥄 𞤳𞤢𞤣𞤭.

 

𞤐𞤮 𞤬𞤭𞥅𞤪𞤢 𞤱𞤮𞤲𞤭 𞤵𞤧𞤼𞤮𞤪𞤣𞤫 𞤲𞤮𞤲 𞤫 𞤲𞤦𞤵𞥅𞤯𞤭 𞤯𞤭𞤲⹁ 𞤤𞤭𞤥𞤮𞥅𞤶𞤫 𞤥𞤢𞤶𞥆𞤭 𞤱𞤮𞤲𞤭 𞤩𞤫𞤴𞤣𞤮𞤪𞤣𞤫. 𞤔𞤮𞥅𞤲𞤭 𞤷𞤫𞤱𞤯𞤭 𞤯𞤭𞤲 𞤥𞤵𞤼𞤭𞥅𞤲𞤮 𞤱𞤢𞤲𞤮 𞥑⹁ 𞥒⹁ 𞥕⹁ 𞥑𞥐⹁ 𞥒𞥕⹁ 𞥕𞥐 𞤫 𞥑𞥐𞥐. 𞤑𞤮 𞤴𞤭𞤴𞤫𞤼𞤫𞥅 𞤼𞤢𞤲 𞤶𞤮𞥅𞤲𞤭 𞤳𞤮 𞤺𞤭𞤦𞤭 𞥕𞥐𞥐 𞤸𞤢𞥄 𞤣𞤮𞤱.