📘 𞤂𞤀𞥄𞤃𞤓 𞤄𞤌𞤐𞤘𞤓 : 𞤅𞤢𞤦𞤢𞤦𞤵𞥅𞤶𞤭 𞤥𞤵𞤵𞤲⹁ 𞤦𞤢𞤯𞤼𞤢𞤲𞤫 𞤥𞤵𞤵𞤲 𞤫 𞤴𞤮𞤺𞤢 𞤫 𞤨𞤫𞤸𞤫 𞤳𞤮 𞤯𞤵𞤴𞤼𞤢𞤼𞤢 𞤥𞤢𞤤𞥆𞤢 𞤥𞤫𞤸𞤢𞤼𞤢 𞤲𞤺𞤵.

𞤊𞤭𞤪𞤼𞤵𞤺𞤮𞤤 𞤳𞤮𞥅 𞤳𞤮 𞤱𞤭𞤴𞤫𞤼𞤫𞥅 𞤤𞤢𞥄𞤥𞤵 𞤦𞤮𞤲𞤺𞤵⹁ 𞤱𞤮𞤲𞤢𞥄 𞤳𞤮 𞤧𞤢𞤯𞤼𞤭 𞤼𞤫𞤽𞤼𞤭𞤲𞤭𞥅 𞤱𞤮𞤲𞤢𞤲𞤣𞤫 𞤮𞥅𞤲 𞤱𞤵𞥅𞤪𞤵𞤯𞤮 𞤫 𞤥𞤵𞥅𞤯𞤵𞤲 𞤻𞤢𞤤𞤲𞤣𞤫 𞤱𞤮𞥅. 𞤑𞤮 𞤱𞤮𞤲𞤭 𞤤𞤢𞥄𞤥𞤵 𞤦𞤮𞤲𞤺𞤵⹁ 𞤳𞤮 𞤲𞤣𞤫 𞤸𞤮𞥅𞤪𞤫𞥅𞤩𞤫 𞤤𞤫𞤧𞤣𞤭 𞤲𞤣𞤭𞤲 𞤢𞤪𞤣𞤮𞤪𞤭 𞤲𞤣𞤭 𞤲𞤺𞤫𞥅𞤲𞤢𞥄𞤪𞤭⹁ 𞤢𞤲𞤺𞤢𞤤 𞤲𞤵𞤲𞤯𞤢𞤤 𞤥𞤢𞤤𞥆𞤢 𞤼𞤮𞥅𞤻𞤫⹁ 𞤲𞤶𞤢𞤺𞥆𞤵⹁ 𞤧𞤫𞥅𞤪𞤲𞤣𞤵𞤺𞤮𞤤 𞤲𞤺𞤫𞤲𞤣𞤭𞥅𞤩𞤫 𞤩𞤫𞤲 𞤫 𞤢𞤲𞤺𞤢𞤤 𞤬𞤮𞤼𞤲𞤵𞤺𞤮𞤤 𞤴𞤭𞤥𞤩𞤫 𞤩𞤫𞤲 𞤫 𞤶𞤢𞤱𞤤𞤫 𞤥𞤢𞤤𞥆𞤢 𞤫 𞤤𞤢𞥄𞤪𞤧𞤭𞥅𞤶𞤭 𞤤𞤫𞤧𞤣𞤭 𞤲𞤣𞤭𞤲 𞤲𞤮 𞤸𞤢𞥄𞤲𞤭𞤪𞤭.

𞤃𞤢𞥄𞤲𞤣𞤫 𞤥𞤵𞤵𞤲 𞤲𞤮 𞤩𞤢𞤲𞤺𞤢 𞤲𞤣𞤫 𞤤𞤢𞥄𞤥𞤩𞤫 𞤩𞤫𞤲 𞤸𞤵𞥅𞤼𞤮𞤪𞤭 𞤤𞤢𞥄𞤥𞤵 𞤲𞤺𞤵𞤲 𞤬𞤭𞥅 𞤸𞤮𞥅𞤪𞤫 𞤥𞤵𞤵𞤲⹁ 𞤫 𞤬𞤭𞥅 𞤩𞤫𞤴𞤲𞤺𞤵𞥅𞤪𞤫 𞤥𞤵𞤵𞤲 𞤫 𞤢𞤲𞤣𞤭𞤲𞤣𞤭𞤪𞤢𞥄𞤩𞤫 𞤥𞤵𞤵𞤲. 𞤇𞤫 𞤢𞤷𞥆𞤭 𞤧𞤵𞤩𞤢𞤺𞤮𞤤 𞤴𞤭𞤥𞤩𞤫 𞤳𞤫𞤤𞤯𞤵𞤩𞤫 𞤳𞤮 𞤺𞤮𞤤𞥆𞤢𞤲𞤢 𞤤𞤫𞤧𞤣𞤭 𞤲𞤣𞤭𞤲 𞤲𞤮 𞤸𞤢𞥄𞤲𞤭𞤪𞤭. 𞤉 𞤬𞤭𞤪𞤼𞤢𞤲𞤣𞤫 𞤺𞤮𞥅⹁ 𞤤𞤢𞥄𞤥𞤵 𞤦𞤮𞤲𞤺𞤵 𞤳𞤮 𞤤𞤭𞤣𞥆𞤵 𞤤𞤢𞥄𞤥𞤵 𞤨𞤫𞥅𞤱𞤢𞤤 𞤥𞤢𞤤𞥆𞤢 𞤤𞤢𞥄𞤥𞤵 𞤥𞤮𞤰𞥆𞤵.

📓 𞤒𞤌𞤘𞤀 𞤉 𞤅𞤀𞤄𞤀𞤄𞤓𞥅𞤔𞤋 𞤃𞤓𞤓𞤐

𞤐𞤣𞤫 𞤼𞤢𞤱𞤵𞤲𞤮𞥅 𞤳𞤢𞤤𞤢 𞤸𞤵𞥅𞤲𞤣𞤫 𞤲𞤮 𞤥𞤢𞤪𞤭 𞤧𞤢𞤦𞤢𞤦𞤵𞥅𞤶𞤭 𞤥𞤵𞤵𞤲 𞤯𞤭𞤲⹁ 𞤲𞤮 𞤱𞤮𞤲𞤭𞤪𞤭 𞤲𞤮𞤲 𞤷𞤵𞤪𞤳𞤭 𞤧𞤵𞥅𞤪𞤢𞤼𞤢𞥄 𞤩𞤢𞥄𞤱𞤮 𞤴𞤭𞥅𞤼𞤫⹁ 𞤳𞤮 𞤲𞤮𞤲 𞤳𞤢𞤣𞤭 𞤱𞤮𞤲𞤭𞤪𞤭 𞤤𞤢𞥄𞤥𞤵 𞤦𞤮𞤲𞤺𞤵 𞤬𞤵𞤲𞤼𞤭𞤪𞤼𞤢𞥄 𞤲𞤭𞥅 𞤼𞤵𞤲. 𞤐𞤮 𞤼𞤢𞤱𞤢𞥄 𞤫 𞤳𞤮 𞤧𞤢𞤦𞤭𞤲𞤼𞤢 𞤲𞤺𞤵 :

➖ 𞤔𞤀𞥄𞤅𞤓𞤘𞤌𞤂 𞤚𞤋𞤃𞤆𞤓𞤂𞤉 𞤍𞤉𞤐

𞥑- 𞤂𞤫𞤧𞤣𞤭 𞤳𞤢𞤤𞤢 𞤧𞤭 𞤼𞤭𞤥𞤨𞤵𞤤𞤫 𞤯𞤫𞤲 𞤶𞤢𞥄𞤧𞤭𞥅 𞤲𞤣𞤭 𞤶𞤭𞥅𞤩𞤮𞤼𞤮⹁ 𞤲𞤮 𞤼𞤢𞤱𞤢𞥄 𞤫 𞤥𞤢𞤶𞥆𞤫 𞤼𞤭𞤥𞤨𞤵𞤤𞤫 𞤧𞤢𞤪𞤯𞤭𞤴𞤢𞤲𞤳𞤮𞥅𞤶𞤫 𞤯𞤫𞤲⹁ 𞤣𞤮𞤱𞤤𞤢𞤤 𞤲𞤺𞤢𞤤⹁ 𞤶𞤢𞥄𞤺𞤮𞤪𞤢𞤤 𞤲𞤺𞤢𞤤⹁ 𞤻𞤢𞥄𞤱𞤭𞤪𞤯𞤭 𞤯𞤭𞤲 𞤫 𞤲𞤦𞤢𞤼𞤭𞤪𞤣𞤫 𞤲𞤣𞤫𞤲.

𞥒- 𞤍𞤭𞤯𞤢𞤩𞤵𞤲 𞤯𞤵𞤲 𞤫 𞤥𞤵𞤵𞤲 𞤳𞤮 𞤲𞤺𞤫𞥅𞤲𞤢𞥄𞤪𞤭 𞤲𞤣𞤭𞤲 𞤫 𞤥𞤮𞥅𞤩𞤭𞤪𞤺𞤮𞤤 𞤶𞤢𞤱𞤤𞤫 𞤼𞤵𞥅𞤲𞤵𞤯𞤫 𞤤𞤢𞥄𞤱𞤮𞤤 𞤲𞤺𞤵𞤴𞤢𞥄𞤤𞤫. 𞤀𞤪𞤣𞤮𞤼𞤮𞥅𞤩𞤫 𞤸𞤫𞥅𞤱𞤵𞤩𞤫 𞤤𞤫𞤧𞤯𞤫 𞤀𞤬𞤪𞤭𞤳 𞤢𞤪𞤢𞤴 𞤫 𞤤𞤢𞥄𞤥𞤵 𞤼𞤢𞤱𞤢 𞤸𞤢𞤴 𞤸𞤵𞥅𞤲𞤣𞤫 𞤩𞤫 𞤶𞤮𞤺𞤢𞥄𞤳𞤭⹁ 𞤳𞤮𞤲𞤮 𞤩𞤫 𞤲𞤢𞤱𞤴𞤢 𞤳𞤮 𞤩𞤫 𞤢𞤤𞤯𞤵𞤩𞤫 𞤸𞤢𞤪𞤢 𞤱𞤮𞤲𞤢𞥄 𞤤𞤫 𞤧𞤢𞤦𞤵 𞤼𞤭𞥅𞤯𞤲𞤢𞥄𞤪𞤫 𞤥𞤢𞤩𞥆𞤫⹁  𞤸𞤢𞤪𞤢 𞤳𞤮 𞤦𞤮𞤼𞤫 𞤲𞤺𞤵𞤴𞤢𞥄𞤤𞤫 𞤯𞤫 𞤩𞤫 𞤧𞤵𞥅𞤯𞤭 𞤫 𞤲𞤮𞤳𞥆𞤵𞥅𞤼𞤫 𞤧𞤫𞥅𞤪𞤼𞤵𞤯𞤫 𞤫 𞤱𞤭𞤲𞤣𞤫𞤪𞤫 𞤲𞤣𞤫𞤲. 𞤑𞤢𞤤𞤢 𞤬𞤢𞥄𞤤𞤢𞥄𞤯𞤮 𞤳𞤢𞤣𞤭 𞤺𞤮𞤤𞥆𞤵𞤣𞤫 𞤫 𞤤𞤫𞤧𞤣𞤭 𞤲𞤣𞤭𞤲⹁ 𞤩𞤫 𞤸𞤫𞥅𞤱𞤭 𞤤𞤢𞤲𞤣𞤢𞥄𞤣𞤫 𞤥𞤢𞤤𞥆𞤢 𞤶𞤢𞤩𞤵𞤣𞤫 𞤲𞤺𞤫𞥅𞤲𞤢𞥄𞤶𞤫 𞤧𞤭 𞤲𞤫𞤱𞤭𞤲𞤢𞤲𞤢 𞤮𞤲𞤼𞤭𞤺𞤭. 𞤑𞤮 𞤯𞤵𞤥 𞤱𞤢𞤯𞤭 𞤆𞤵𞤤𞥆𞤮 𞤲𞤮 𞤱𞤭𞤴𞤢 𞤲𞤺𞤫𞥅𞤲𞤢𞥄𞤪𞤭 𞤳𞤮 𞤺𞤢𞤻𞤮 𞤩𞤢𞤥𞤼𞤢𞤤.

𞥓- 𞤀𞤲𞤺𞤢𞤤 𞤺𞤢𞤲𞤣𞤢𞤤⹁ 𞤨𞤭𞤲𞤢𞤤 𞤫 𞤲𞤫𞥅𞤣𞤭 𞤳𞤫𞤤𞤯𞤵𞤲’𞤣𞤭 𞤫 𞤤𞤫𞤧𞤣𞤭 𞤲𞤣𞤭𞤲 𞤲𞤮 𞤼𞤢𞤱𞤢𞥄 𞤫 𞤳𞤮 𞤧𞤢𞤦𞤭𞤲𞤼𞤢 𞤤𞤢𞥄𞤥𞤵 𞤦𞤮𞤲𞤺𞤵. 𞤐𞤣𞤫 𞤼𞤢𞤱𞤵𞤲𞤮𞥅⹁ 𞤲𞤺𞤫𞤲𞤣𞤭𞥅𞤩𞤫 𞤩𞤫𞤲 𞤢𞤲𞤣𞤢𞥄 𞤳𞤮 𞤸𞤢𞥄𞤲𞤭 𞤱𞤢𞤯𞤵𞤣𞤫 𞤫 𞤳𞤮 𞤩𞤫 𞤸𞤢𞥄𞤲𞤢𞥄 𞤱𞤢𞤯𞤢𞤲𞤫𞥅𞤣𞤫⹁ 𞤢𞤪𞤣𞤭𞥅𞤩𞤫 𞤩𞤫𞤲 𞤸𞤭𞥅𞤤𞤢𞤴 𞤩𞤫 𞤪𞤫𞤬𞤼𞤭 𞤦𞤢𞤺𞤮𞥅 𞤩𞤫. 𞤑𞤮 𞤯𞤵𞤥 𞤱𞤢𞤯𞤭 𞤧𞤭 𞤴𞤭𞤥𞤩𞤫 𞤱𞤫𞤤𞤭𞥅 𞤤𞤢𞥄𞤥𞤢𞥄𞤲𞤣𞤫⹁ 𞤶𞤢𞤲𞤬𞤢𞤺𞤮𞤤 𞤩𞤫 𞤧𞤢𞤼𞥆𞤢𞤼𞤢𞥄.

𞥔- 𞤇𞤭𞤯𞤤𞤢𞥄𞤪𞤫 𞤫 𞤢𞤲𞤺𞤢𞤤 𞤺𞤮𞤤𞥆𞤫 𞤴𞤫𞥅𞤧𞤮 𞤢𞤪𞤣𞤭𞥅𞤩𞤫 𞤩𞤫 𞤲𞤵𞤲𞤯𞤢𞥄 𞤲𞤮 𞤸𞤵𞤤𞤩𞤭𞤲𞤭𞥅 𞤧𞤢𞤦𞤵 𞤼𞤵𞤥𞤢 𞤳𞤢𞤤𞤢 𞤧𞤵𞤩𞤲𞤺𞤮 𞤸𞤫𞤱𞤼𞤭⹁ 𞤩𞤫 𞤱𞤢𞤳𞥆𞤭𞤤𞤮𞤼𞤮 𞤴𞤫𞥅𞤴𞤵𞤺𞤮𞤤 𞤲𞤣𞤭𞤥𞤵 𞤥𞤢𞤩𞥆𞤫 𞤲𞤺𞤵𞤲 𞤷𞤮𞤺𞥆𞤫𞤤𞤮𞤴 𞤶𞤢𞥄𞤧𞤵𞤳𞤮𞤴 𞤤𞤮𞤲𞤼𞤮 𞤸𞤵𞥅𞤱𞤵𞤺𞤮𞤤 𞤳𞤮 𞤲𞤢𞤬𞤢𞤼𞤢 𞤥𞤢𞤤𞥆𞤢 𞤳𞤮 𞤥𞤮𞤰𞥆𞤢𞤲𞤭 𞤤𞤫𞤧𞤣𞤭 𞤲𞤣𞤭𞤲.

𞥕- 𞤀𞤲𞤺𞤢𞤤 𞤻𞤭𞥅𞤩𞤵𞤺𞤮𞤤 𞤧𞤢𞤪𞤭𞤴𞤢⹁ 𞤯𞤵𞤥 𞤳𞤮 𞤧𞤢𞤤𞤣𞤵 𞤼𞤢𞤱𞤢𞥄𞤲𞤣𞤵 𞤫 𞤳𞤮 𞤧𞤢𞤦𞤭𞤲𞤼𞤢 𞤤𞤢𞥄𞤥𞤵 𞤦𞤮𞤲𞤺𞤵. 𞤖𞤮𞤤 𞤲𞤮 𞤯𞤵𞤥 𞤱𞤮𞤲𞤭𞤪𞤼𞤢 ؟ 𞤅𞤭 𞤼𞤢𞤱𞤭𞥅 𞤢𞤪𞤣𞤭𞥅𞤯𞤮 𞤮𞤲 𞤲𞤮𞤳𞥆𞤵 𞤳𞤢𞤤𞤢 𞤳𞤢 𞤮 𞤢𞤪𞤣𞤮𞤪𞤭 𞤫 𞤤𞤢𞥄𞤥𞤢𞤼𞤫𞥅𞤪𞤭 𞤲𞤣𞤭𞤲 𞤦𞤮𞤲𞥆𞤭𞥅 𞤥𞤢𞤤𞥆𞤢 𞤺𞤮𞥅𞤼𞤮 𞤫 𞤴𞤭𞤥𞤩𞤫 𞤥𞤢𞤳𞥆𞤮 𞤦𞤮𞤲𞥆𞤭𞥅⹁ 𞤮 𞤻𞤢𞥄𞤱𞤫𞤼𞤢𞥄𞤳𞤫 𞤱𞤢𞤲𞤮 𞤸𞤫𞤣𞥆𞤭𞥅𞤩𞤫 𞤩𞤫𞤲 𞤻𞤢𞥄𞤱𞤭𞤪𞤼𞤫𞥅 𞤲𞤮𞤲⹁ 𞤯𞤵𞤥 𞤦𞤮𞤲𞥆𞤢𞤴 𞤬𞤭𞥅 𞤤𞤫𞤧𞤣𞤭. 𞤅𞤭 𞤼𞤢𞤱𞤭𞥅 𞤸𞤮𞥅𞤪𞤫𞥅𞤩𞤫 𞤩𞤫𞤲 𞤱𞤵𞤶𞥆𞤢𞤴 𞤣𞤵𞤶𞤵𞤲𞤫 𞤲𞤦𞤵𞥅𞤯𞤭⹁ 𞤸𞤢𞤴 𞤲𞤺𞤭𞤴𞤪𞤵 𞤽𞤢𞥄𞤻𞤢𞥄𞤤𞤭⹁ 𞤳𞤮𞤲𞤮 𞤺𞤮𞥅𞤼𞤯𞤮 𞤺𞤮𞥅 𞤱𞤵𞤶𞥆𞤢𞤴 𞤼𞤵𞤲 𞤨𞤢𞤯𞤢𞤤⹁ 𞤥𞤢𞤤𞥆𞤢 𞤺𞤫𞤪𞤼𞤮𞤺𞤢𞤤⹁ 𞤥𞤢𞤤𞥆𞤢 𞤤𞤫𞥅𞤥𞤵𞤲𞥆𞤫𞥅𞤪𞤫 𞤮𞤲𞤼𞤭𞤺𞤭 𞤧𞤵𞤥𞤲𞤫𞥅⹁ 𞤥𞤢𞤤𞥆𞤢 𞤮 𞤧𞤮𞤳𞤫𞥅 𞤸𞤢𞤪𞤢 𞤸𞤢𞤴 𞤳𞤢𞤴𞤣𞤭 𞤮 𞤢𞤤𞤢𞥄 𞤧𞤢𞤳𞥆𞤮𞤲𞤢 𞤮 𞤻𞤢𞥄𞤱𞤫𞥅⹁  𞤯𞤵𞤥 𞤲𞤮 𞤸𞤵𞤤𞤩𞤭𞤲𞤭𞥅.

📓 𞤑𞤌 𞤂𞤀𞥄𞤃𞤓 𞤄𞤌𞤐𞤘𞤓 𞤄𞤀𞤍𞤚𞤋𞤐𞤚𞤀

𞤄𞤢𞤯𞤼𞤢𞤲𞤫 𞤤𞤢𞥄𞤥𞤵 𞤦𞤮𞤲𞤺𞤵 𞤲𞤮 𞤯𞤵𞥅𞤯𞤭⹁ 𞤲𞤮 𞤥𞤢𞤱𞤲𞤭 𞤧𞤢𞤦𞤵 𞤲𞤮 𞤸𞤢𞤯𞤢 𞤩𞤢𞤥𞤼𞤢𞤤 𞤤𞤫𞤧𞤣𞤭.

𞥑- 𞤀𞤪𞤢𞤲𞤵𞤲 𞤯𞤵𞤲⹁ 𞤤𞤢𞥄𞤥𞤵 𞤦𞤮𞤲𞤺𞤵 𞤲𞤮 𞤦𞤢𞤯𞤼𞤭𞤲𞤭𞤪𞤢 𞤬𞤫𞥅𞤻𞤵𞤺𞤮𞤤 𞤦𞤢𞥄𞤧𞤢𞤤 𞤲𞤺𞤢𞤤 𞤫 𞤤𞤫𞤧𞤣𞤭 𞤲𞤣𞤭𞤲. 𞤐𞤣𞤫 𞤼𞤢𞤱𞤵𞤲𞤮𞥅 𞤳𞤮 𞤴𞤮𞤺𞤢𞥄𞤩𞤫 𞤱𞤮𞤲𞤭 𞤧𞤫𞤲𞤣𞤵𞤣𞤫 𞤲𞤺𞤢𞤤𞤵𞥅𞤶𞤭 𞤥𞤢𞤴𞤪𞤭⹁ 𞤸𞤢𞤪𞤢 𞤩𞤵𞤪𞤵𞤩𞤫 𞤯𞤵𞥅𞤯𞤵𞤣𞤫 𞤫 𞤸𞤫𞤣𞥆𞤭𞥅𞤩𞤫 𞤩𞤫𞤲 𞤢𞤤𞤢𞥄 𞤸𞤢𞤴 𞤳𞤮 𞤻𞤢𞥄𞤥𞤢 𞤳𞤮 𞤴𞤮𞤲𞤭⹁ 𞤧𞤢𞤳𞥆𞤮 𞤧𞤢𞤬𞤪𞤮𞥅 𞤥𞤢𞤤𞥆𞤢 𞤶𞤢𞤲𞤺𞤢.

𞥒- 𞤀𞤪𞤣𞤮 𞤦𞤮𞤲𞤺𞤮 𞤥𞤢𞤤𞥆𞤢 𞤤𞤢𞥄𞤥𞤵 𞤦𞤮𞤲𞤺𞤵 𞤲𞤮 𞤬𞤵𞤲𞤼𞤭𞤲𞤢 𞤢𞤲𞤺𞤢𞤤 𞤸𞤮𞥅𞤤𞤢𞥄𞤪𞤫 𞤸𞤢𞤳𞥆𞤵𞤲’𞤣𞤫 𞤤𞤢𞥄𞤥𞤭𞥅𞤩𞤫 𞤫 𞤤𞤢𞥄𞤥𞤢𞥄𞤩𞤫. 𞤑𞤮 𞤯𞤵𞤥 𞤱𞤢𞤯𞤢𞤼𞤢 𞤧𞤭 𞤩𞤫 𞤲𞤮𞤣𞥆𞤭𞤼𞤭𞥅 𞤧𞤵𞤩𞤲𞤺𞤮⹁ 𞤩𞤢𞤴𞤼𞤭 𞤴𞤭𞤥𞤩𞤫 𞤩𞤫𞤲 𞤲𞤮 𞤢𞤲𞤣𞤭 𞤱𞤮𞤲𞤢𞥄 𞤧𞤮𞥅𞤦𞤫𞥅 𞤶𞤮𞤳𞥆𞤢𞥄⹁ 𞤩𞤫 𞤯𞤵𞥅𞤪𞤮𞤼𞤮⹁ 𞤥𞤮 𞤳𞤢𞤤𞤢 𞤶𞤮𞤳𞥆𞤢 𞤸𞤢𞥄𞤶𞤵 𞤥𞤵𞤵𞤲. 𞤍𞤵𞤲𞤥 𞤲𞤮 𞤴𞤢𞤤𞤼𞤭𞤼𞤢 𞤫 𞤤𞤮𞤱𞤫 𞤧𞤫𞥅𞤪𞤼𞤵𞤯𞤫.

𞥓- 𞤂𞤢𞥄𞤥𞤵 𞤦𞤮𞤲𞤺𞤵 𞤲𞤮 𞤦𞤢𞤯𞤼𞤭𞤲𞤭𞤪𞤢 𞤢𞤲𞤺𞤢𞤤 𞤩𞤵𞥅𞤩𞤼𞤵 𞤫 𞤤𞤫𞤧𞤣𞤭. 𞤅𞤢𞤦𞤵 𞤧𞤭 𞤧𞤢𞤯𞤼𞤭𞥅 𞤸𞤢𞥄 𞤧𞤢𞤯𞤼𞤭𞥅⹁ 𞤴𞤭𞤥𞤩𞤫 𞤩𞤫𞤲 𞤼𞤭𞤳𞥆𞤢𞤴⹁ 𞤧𞤭 𞤼𞤭𞤳𞥆𞤫 𞤯𞤫𞤲 𞤣𞤫𞤱𞤼𞤮𞤲’𞤣𞤭𞤪𞤭𞥅⹁ 𞤱𞤢𞤯𞤢𞤴 𞤸𞤢𞥄 𞤧𞤭 𞤢𞤪𞤣𞤭𞥅𞤩𞤫 𞤩𞤫𞤲 𞤱𞤭𞤴𞤭𞥅 𞤀⹁ 𞤢𞤪𞤣𞤢𞥄𞤩𞤫 𞤩𞤫𞤲 𞤱𞤭𞤴𞤢 𞤌. 𞤍𞤵𞤥 𞤲𞤮 𞤢𞤣𞥆𞤢 𞤷𞤢𞤯𞤫𞥅𞤤𞤫 𞤥𞤢𞤱𞤯𞤫⹁ 𞤳𞤢𞤻𞤵𞤲 𞤫 𞤢𞤲𞤺𞤢𞤤 𞤲𞤢𞤲𞤼𞤮𞤲’𞤣𞤭𞤪𞤢𞤤.

𞥔- 𞤐𞤮 𞤼𞤢𞤱𞤢𞥄 𞤫 𞤲𞤮 𞤯𞤵𞤥 𞤦𞤢𞤯𞤼𞤭𞤲𞤭𞤪𞤼𞤢: 𞤣𞤮𞤺𞤵𞤺𞤮𞤤 𞤴𞤢𞤤𞤼𞤢 𞤶𞤮𞥅𞤥𞤭𞤪𞤢𞥄𞤩𞤫 𞤺𞤢𞤲𞤣𞤫 𞤩𞤫𞤲. 𞤉 𞤲𞤣𞤫𞤪 𞤤𞤫𞤧𞤣𞤭 𞤳𞤢𞤤𞤢⹁ 𞤧𞤭 𞤳𞤮 𞤺𞤭𞤯𞤢𞥄𞤤𞤫 𞤫 𞤤𞤫𞤰𞥆𞤭-𞤤𞤫𞤰𞥆𞤭𞤴𞤢𞥄𞤺𞤢𞤤 𞤤𞤢𞥄𞤥𞤮𞤪𞤢𞥄⹁ 𞤼𞤢𞤱𞤢 𞤲𞤦𞤢𞥄𞤱𞤣𞤭 𞤫 𞤺𞤢𞤲𞤣𞤢𞤤 𞤼𞤫𞤣𞥆𞤭𞤲𞤢𞥄𞤳𞤢⹁ 𞤯𞤵𞤥 𞤲𞤮 𞤣𞤮𞤺𞤭𞤲𞤢 𞤶𞤢𞤲𞤺𞤵𞤩𞤫⹁  𞤸𞤢𞤥𞥆𞤭𞤲𞤭𞤪𞤢 𞤩𞤫 𞤫 𞤤𞤫𞤧𞤯𞤫 𞤳𞤢 𞤩𞤫 𞤸𞤢𞤼𞤮𞤲𞤶𞤭𞤲𞤢𞥄 𞤫 𞤥𞤵𞤵𞤲 𞤬𞤭𞥅 𞤱𞤮𞤼𞤢 𞤩𞤫 𞤲𞤢𞤱𞤴𞤭𞤣𞤵 𞤫 𞤺𞤢𞤲𞤣𞤢𞤤 𞤥𞤢𞤩𞥆𞤫 𞤸𞤢𞤪𞤢 𞤩𞤪 𞤲𞤢𞤬𞤭𞤼𞤮𞤪𞤢𞥄𞤤𞤭⹁ 𞤩𞤫 𞤲𞤢𞤬𞤭𞤪𞤢𞥄𞤤𞤭 𞤲𞤺𞤢𞤤.

📓 𞤒𞤌𞤘𞤀 𞤉 𞤆𞤉𞤖𞤉 𞤑𞤌 𞤍𞤓𞤒𞤚𞤀𞤚𞤀 𞤃𞤀𞥄 𞤈𞤋𞥅𞤏𞤀 𞤍𞤓𞤐

𞤒𞤮𞤺𞤢 𞤫 𞤨𞤫𞤸𞤫 𞤯𞤵𞤴𞤼𞤢𞤴𞤯𞤫 𞤥𞤢𞤤𞥆𞤢 𞤪𞤭𞥅𞤱𞤢𞤴𞤯𞤫 𞤤𞤢𞥄𞤥𞤵 𞤦𞤮𞤲𞤺𞤵 𞤲𞤮 𞤤𞤢𞤲𞤣𞤭𞥅 𞤣𞤢𞤪𞤢𞤲𞤣𞤫 𞤤𞤢𞥄𞤥𞤵 𞤲𞤺𞤵𞤲 𞤫 𞤴𞤭𞤥𞤩𞤫 𞤸𞤫𞤣𞥆𞤭𞥅𞤩𞤫 𞤩𞤫𞤲.

𞥑- 𞤀𞤪𞤢𞤲𞤵𞤲 𞤯𞤵𞤲 𞤳𞤮 𞤻𞤭𞥅𞤩𞤲𞤵𞤺𞤮𞤤 𞤧𞤢𞤪𞤭𞤴𞤢 𞤫 𞤤𞤫𞤧𞤣𞤭 𞤲𞤣𞤭𞤲 𞤳𞤮 𞤢𞤤𞤣𞤢𞥄 𞤫 𞤩𞤵𞤪𞤣𞤭𞤲’𞤣𞤭𞤲𞤵𞤺𞤮𞤤. 𞤃𞤮𞤲𞤼𞤧𞤳𞤭𞤴𞤫𞥅 𞤲𞤮 𞤱𞤭𞤴𞤭: ” 𞤐𞤣𞤭𞤥𞤵 𞤺𞤢𞤧𞤢𞤼𞤢𞥄 𞤩𞤢𞥄𞤱𞤮 𞤧𞤢𞤪𞤭𞤴𞤢 𞤳𞤢𞤻𞤵𞤲 𞤫 𞤷𞤫𞥅𞤪𞤼𞤢𞤤 𞤼𞤭𞤥𞤨𞤵𞤤𞤫 𞤯𞤫𞤲”

𞥒- 𞤊𞤢𞤣𞥆𞤢𞤺𞤮𞤤 𞤲𞤺𞤫𞥅𞤲𞤢𞥄𞤪𞤭 : 𞤐𞤺𞤫𞥅𞤲𞤢𞥄𞤪𞤭 𞤳𞤮 𞤸𞤵𞥅𞤲𞤣𞤫 𞤦𞤮𞤲𞤣𞤫 𞤫 𞤲𞤣𞤫𞤪 𞤤𞤫𞤧𞤣𞤭 𞤧𞤢𞤦𞤵 𞤲𞤣𞤭 𞤸𞤢𞤯𞤢𞤴 𞤺𞤮𞥅𞤼𞤯𞤮 𞤸𞤵𞥅𞤱𞤵𞤺𞤮𞤤 𞤳𞤮 𞤮 𞤸𞤢𞥄𞤲𞤭 𞤱𞤢𞤯𞤵𞤣𞤫 𞤬𞤭𞥅 𞤱𞤫𞤤𞤼𞤭𞤲𞤺𞤮𞤤 𞤺𞤮𞥅𞤼𞤯𞤮⹁ 𞤼𞤮𞥅𞤻𞤢 𞤸𞤢𞤲𞤣𞤵𞤯𞤮 𞤮𞤲. 𞤊𞤭𞥅 𞤬𞤢𞤣𞥆𞤢𞤺𞤮𞤤 𞤯𞤵𞤥⹁ 𞤼𞤭𞤥𞤨𞤵𞤤𞤢𞤤 𞤬𞤢𞤣𞥆𞤮𞤼𞤮𞥅𞤲𞤺𞤢𞤤 𞤲𞤺𞤫𞥅𞤲𞤢𞥄𞤪𞤭 𞤲𞤮 𞤸𞤢𞥄𞤲𞤢𞥄 𞤱𞤢𞤯𞤫𞥅𞤣𞤫⹁ 𞤸𞤢𞤪𞤢 𞤳𞤢𞤤𞤢 𞤲𞤢𞤲𞤺𞤢𞥄𞤯𞤮 𞤫 𞤯𞤵𞤥⹁ 𞤮 𞤢𞤷𞥆𞤢𞤲𞤼𞤢𞥄𞤳𞤫.

𞥓- 𞤚𞤢𞤦𞤭𞤲𞤼𞤭𞤲𞤵𞤺𞤮𞤤 𞤲𞤵𞤲𞤯𞤢𞤤 𞤲𞤺𞤢𞤤 𞤫 𞤤𞤢𞥄𞤩𞤢𞤤 𞤲𞤺𞤢𞤤 𞤸𞤢𞤳𞥆𞤵𞤲𞤣𞤫 𞤢𞤪𞤣𞤭𞥅𞤩𞤫 𞤩𞤫𞤲 𞤫 𞤢𞤪𞤣𞤢𞥄𞤩𞤫 𞤩𞤫𞤲⹁ 𞤶𞤢𞤲𞤺𞤭𞤲𞤵𞤺𞤮𞤤 𞤫 𞤫𞤤𞤼𞤵𞤺𞤮𞤤 𞤺𞤫𞤲𞤣𞤭𞥅𞤩𞤫 𞤩𞤫𞤲 𞤬𞤢𞥄𞤣𞤫 𞤫 𞤸𞤢𞤲𞤤𞤫 𞤥𞤢𞤩𞥆𞤫 𞤯𞤫𞤲⹁ 𞤼𞤢𞤱𞤲𞤮𞤪𞤢 𞤩𞤫 𞤫 𞤲𞤺𞤵𞥅𞤪𞤣𞤢𞤥 𞤤𞤫𞤧𞤣𞤭 𞤲𞤣𞤭𞤲. 𞤖𞤵𞥅𞤱𞤭𞤼𞤮𞤪𞤺𞤮𞤤 𞤧𞤢𞤪𞤰𞤵𞥅𞤶𞤭 𞤯𞤭𞤲 𞤬𞤭𞥅 𞤱𞤫𞥅𞤩𞤭𞤼𞤵𞤺𞤮𞤤 𞤺𞤮𞤤𞥆𞤫 𞤯𞤫𞤲 𞤲𞤮 𞤤𞤢𞥄𞤩𞤭𞤪𞤭⹁ 𞤳𞤮 𞤬𞤫𞤰𞥆𞤭⹁ 𞤳𞤮 𞤬𞤫𞤱𞤲𞤣𞤭𞥅 𞤫 𞤳𞤮 𞤧𞤢𞥄𞤼𞤭𞥅 𞤱𞤢𞤯𞤫𞥅𞤣𞤫. 𞤚𞤫𞤣𞥆𞤭𞤲𞤢 𞤸𞤢𞥄𞤤𞤣𞤭𞤤𞤫 𞤯𞤫𞤲.

𞤉𞤲 𞤸𞤮𞤥𞤦𞤭𞤪𞤢𞤴 𞤲𞤣𞤫𞥅 𞤼𞤮𞤩𞥆𞤫𞤪𞤫 𞤯𞤮𞥅 𞤢𞤲𞤣𞤭𞤲𞤼𞤭𞤲𞤵𞤺𞤮𞤤 𞤱𞤮𞤲𞤣𞤫𞤥𞤢 𞤲𞤮 𞤼𞤢𞤱𞤢𞥄 𞤫 𞤳𞤮 𞤸𞤢𞤯𞤢𞤼𞤢 𞤩𞤢𞤥𞤼𞤢𞤤 𞤫 𞤤𞤫𞤧𞤯𞤫 𞤸𞤫𞥅𞤱𞤵𞤯𞤫⹁ 𞤳𞤮𞥅 𞤳𞤮 𞤱𞤭𞤫𞤴𞤼𞤫𞥅 𞤤𞤢𞥄𞤥𞤵 𞤦𞤮𞤲𞤺𞤵 𞤥𞤢𞤤𞥆𞤢 𞤢𞤪𞤣𞤮 𞤦𞤮𞤲𞤺𞤮. 𞤅𞤢𞤦𞤵𞥅𞤶𞤭 𞤥𞤵𞤵𞤲 𞤯𞤭𞤲 𞤱𞤢𞤲𞤮 𞤢𞤲𞤺𞤢𞤤 𞤻𞤭𞥅𞤩𞤲𞤵𞤺𞤮𞤤 𞤧𞤢𞤪𞤭𞤴𞤢 𞤫 𞤳𞤮 𞤱𞤮𞤲𞤢𞥄 𞤯𞤵𞤥⹁ 𞤲𞤮 𞤢𞤷𞥆𞤢 𞤦𞤢𞤯𞤼𞤢𞤲𞤫 𞤦𞤮𞤲𞤯𞤫 𞤫 𞤤𞤫𞤧𞤣𞤭 𞤱𞤢𞤲𞤮 𞤲𞤺𞤫𞥅𞤲𞤢𞥄𞤪𞤭 𞤫 𞤳𞤮 𞤲𞤢𞤲𞤣𞤭𞤼𞤢𞤼𞤢 𞤫 𞤥𞤵𞤵𞤲. 𞤐𞤣𞤫 𞤼𞤢𞤱𞤵𞤲𞤮𞥅 𞤲𞤢𞤱𞤲𞤢𞥄𞤪𞤫 𞤳𞤢𞤤𞤢 𞤲𞤮 𞤥𞤢𞤪𞤭 𞤤𞤫𞤳𞥆𞤭⹁ 𞤧𞤭 𞤤𞤢𞥄𞤥𞤵 𞤲𞤺𞤵𞤲 𞤫 𞤴𞤭𞤥𞤩𞤫 𞤩𞤫𞤲 𞤭𞤥𞥆𞤢𞤲𞤭𞤳𞤫 𞤬𞤭𞥅 𞤥𞤵𞤵𞤲⹁ 𞤲𞤮 𞤱𞤢𞥄𞤱𞤢 𞤯𞤵𞤴𞤼𞤮𞤪𞤢𞥄𞤣𞤫 𞤧𞤫𞥅𞤯𞤢 𞤧𞤫𞥅𞤯𞤢.

𞤅𞤀𞥄𞤈𞤀 𞤁𞤉𞤄𞤉𞤐 ✒️

Adlam

Thème : La Mauvaise gouvernance
Telegram ⬇️ 𞤚𞤫𞤤𞤫𞤺𞤪𞤢𞤥
https://t.me/Adlamsaradeben

N’oubliez pas ! RDV le 08 Février 2026 au Palais du Peuple – ADLaM Pulaaku