𞤂𞤋𞤁𞥆𞤌 𞤃𞤀𞤏𞤍𞤌 𞤌𞤐 𞤑𞤌𞤐𞤘𞤌 𞤊𞤉𞤎𞥆𞤋𞤐𞤋𞥅 𞤄𞤋𞤃𞤄𞤋 𞤅𞤓𞤇𞤌 𞤐𞤘𞤌𞤐
𞤘𞤭𞥅 𞤄𞤪𞤭𞤧 𞤑𞤮𞤤𞤫𞤤𞤢⹁ 𞤣𞤢𞤪𞤭𞤲𞤮𞥅𞤯𞤮 𞤮𞤲 𞤤𞤭𞤣𞥆𞤵 𞤁𞤫𞤲𞤭 𞤅𞤢𞤧𞤵 𞤐𞤺𞤫𞤧𞤮 𞤬𞤭𞥅 𞤱𞤮𞤲𞤵𞤺𞤮𞤤 𞤸𞤮𞥅𞤪𞤫𞥅𞤶𞤮 𞤑𞤮𞤲𞤺𞤮-𞤄𞤪𞤢𞤧𞤢𞤱𞤭𞤤 𞤬𞤫𞤰𞥆𞤭𞤲𞤭𞥅 𞤸𞤢𞤲𞤣𞤫 𞤫 𞤢𞥄𞤩𞤵𞤲𞥋𞤣𞤫 (𞤼𞤫𞤲𞤫𞤲) 𞤻𞤢𞤤𞤲𞤣𞤫 𞥒𞥒 𞤐𞤦𞤮𞥅𞤴𞤮 𞥒𞥐𞥒𞥑. 𞤑𞤮 𞤫 𞤲𞤣𞤫𞤪 𞤱𞤭𞥅𞤪𞤱𞤢𞤤 𞤥𞤢𞤤𞥆𞤢 𞤱𞤫𞥅𞤴𞤮𞤲𞤳𞤫𞤱𞤢𞤤 𞤻𞤢𞤱𞤲𞤣𞤭𞥅𞤺𞤵 𞤮 𞤬𞤫𞤰𞥆𞤭𞤲𞤭𞥅 𞤸𞤢𞤪𞤭 𞤮𞤥𞤮 𞤲𞤢𞤩𞤫𞥅𞤣𞤫 𞤊𞤢𞤪𞤢𞤲𞤧𞤭 𞤻𞤢𞤱𞤲𞤣𞤫𞤺𞤮𞤤.
𞤖𞤢𞤪𞤭 𞤲𞤮𞤲 𞤼𞤢𞤦𞤭𞤼𞤭𞥅 𞤺𞤭𞤤𞤢 𞤫 𞤥𞤢𞤱𞤲𞤣𞤫 𞤱𞤮𞤲𞤣𞤫𞤥𞤢 𞤮𞤥𞤮 𞤱𞤮𞤲𞤣𞤭 𞤫 𞤻𞤢𞤱𞤵 𞤑𞤮𞤾𞤭𞤣-𞥑𞥙⹁ 𞤫 𞤸𞤮𞥅𞤪𞤫 𞤯𞤵𞤥⹁ 𞤸𞤢𞤪𞤭 𞤮𞤥𞤮 𞤱𞤮𞤲𞤣𞤵𞤲𞤮𞥅 𞤳𞤢𞤣𞤭 𞤫 𞤻𞤢𞤱𞤵 𞤤𞤫𞤱𞤻𞤵 (𞤶𞤢𞤦𞤫𞤼).
𞤘𞤭𞥅 𞤄𞤪𞤭𞤧 𞤥𞤢𞥄𞤴𞤭𞤪𞤭 𞤣𞤵𞥅𞤩𞤭 𞥖𞥑⹁ 𞤮𞤥𞤮 𞤼𞤢𞤱𞤢𞤲𞤮𞥅 𞤫 𞤤𞤭𞤣𞥆𞤭𞥅𞤩𞤫 𞤁𞤫𞤲𞤭 𞤅𞤢𞤧𞤵 𞤐𞤺𞤫𞤧𞤮 𞤩𞤫𞤲 𞤫 𞤧𞤵𞤩𞤮 𞤬𞤫𞤰𞥆𞤵𞤲𞥋𞤺𞤮 𞤲𞤺𞤮𞤲 𞤫 𞤪𞤫𞤬𞤦𞤭𞤪𞥆𞤫. 𞤑𞤮𞤲𞤮 𞤳𞤮 𞤳𞤢𞤲𞤳𞤮 𞤤𞤢𞥄𞤼𞤭𞤲𞤮𞥅 𞤤𞤭𞤣𞥆𞤮 𞤥𞤢𞤱𞤯𞤮 𞤮𞤲. 𞤉 𞤧𞤵𞤩𞤮 𞤬𞤫𞤰𞥆𞤵𞤲𞤮𞥅𞤲𞤺𞤮 𞤲𞤺𞤮𞤲 𞤫 𞥒𞥐𞥑𞥖⹁ 𞤳𞤮 𞤳𞤢𞤲𞤳𞤮 𞤱𞤮𞤲𞤵𞤲𞤮𞥅 𞤯𞤭𞤯𞤢𞤩𞤮 𞤮𞤲.
𞤉 𞤥𞤢𞤱𞤲𞤣𞤫⹁ 𞤯𞤮𞤱𞤤𞤵 𞤶𞤭𞤲𞤣𞤭𞤲𞤢𞤲𞤮 𞤳𞤢 𞤲𞤶𞤵𞤩𞥆𞤵𞤤𞤭 𞤼𞤮𞤳𞥆𞤮𞤲𞥋𞤣𞤭𞤪𞤢𞤤 𞤸𞤮𞤤𞥆𞤵𞤲𞥋𞤺𞤵 𞤘𞤭𞥅 𞤄𞤪𞤭𞤧 𞤲𞤮 𞤱𞤢𞤯𞤢𞤲𞤢𞥄 𞤬𞤮𞥅𞤬𞤭𞤪𞤺𞤢𞤤 𞤮𞤥𞤮 𞤱𞤢𞥄𞤤𞤭𞥅 𞤫 𞤣𞤢𞤲𞤳𞤭 𞤫 𞤧𞤢𞤬𞤪𞤮𞤪𞤣𞤵 𞤄𞤪𞤢𞤧𞤢𞤱𞤭𞤤. 𞤉 𞤲𞤺𞤵𞤲 𞤯𞤮𞤱𞤤𞤵⹁ 𞤮 𞤭𞤼𞥆𞤭 𞤬𞤮𞥅𞤬𞤭𞤪𞤺𞤢𞤤 𞤥𞤢𞤳𞥆𞤮 𞤲𞤺𞤢𞤤 𞤮 𞤸𞤢𞥄𞤤𞤭 𞤧𞤫𞥅𞤯𞤢⹁ 𞤳𞤮𞤲𞤮 𞤸𞤢𞤪𞤭 𞤸𞤭𞤼𞤮 𞤲𞤺𞤮𞤲 𞤲𞤮 𞤤𞤮𞤭 𞤬𞤮𞤼𞤢. 𞤌 𞤱𞤭𞤭: “𞤃𞤭𞤯𞤮 𞤱𞤮𞤲𞤣𞤭 𞤫 𞤢𞥄𞤲𞤣𞤫 𞤥𞤢𞤱𞤲𞤣𞤫 𞤧𞤢𞤦𞤵 𞤥𞤭𞤯𞤮 𞤸𞤢𞤩𞤵𞤣𞤵𞤣𞤫 𞤫 𞤥𞤢𞥄𞤴𞤣𞤫⹁ 𞤳𞤮𞤲𞤮 𞤥𞤭𞤯𞤮 𞤼𞤮𞤪𞤮𞥅 𞤮𞤲 𞤭𞤥𞥆𞤢𞤺𞤮𞤤 𞤴𞤢𞤸𞤢 𞤧𞤵𞤩𞤮𞥅 𞤲𞤦𞤢𞤼𞥆𞤵𞤣𞤭 𞤬𞤭𞥅 𞤱𞤮𞤼𞤢 𞤴𞤢𞤲𞤺𞤭 𞤢𞤲 𞤱𞤮𞤲𞤵 𞤥𞤫𞤸𞤪𞤫.” 𞤖𞤮𞥅𞤪𞤫𞥅𞤩𞤫 𞤬𞤫𞤣𞥆𞤫 𞤥𞤢𞤳𞥆𞤮 𞤲𞤣𞤫𞤲 𞤼𞤮𞤪𞤭𞤳𞤫 𞤴𞤭𞤥𞤩𞤫 𞤱𞤮𞤲𞤢𞤥𞤩𞤫 𞤥𞤮 𞤩𞤫𞤲 𞤥𞤮𞥅𞤩𞤮𞤲𞥋𞤣𞤭𞤪𞤺𞤮𞤤 𞤸𞤢𞤲𞤣𞤫.
𞤀𞤲𞤣𞤫𞤼𞤢𞥄𞤳𞤫 𞤳𞤮 𞤸𞤮𞤥𞤦𞤮 𞤬𞤮𞥅𞤤𞤭 𞤫 𞤲𞤺𞤮𞥅 𞤧𞤵𞤩𞤮 𞤢𞤣𞤮 𞤴𞤮𞤲𞤼𞤫𞤪𞤫 𞤼𞤭𞤥𞥆𞤵𞤣𞤫. 𞤑𞤮𞤲𞤮 𞤲𞤮 𞤼𞤭𞤶𞥆𞤢𞥄⹁ 𞤁𞤫𞤲𞤭 𞤅𞤢𞤧𞤵 𞤐𞤺𞤫𞤧𞤮⹁ 𞤸𞤮𞥅𞤪𞤫𞥅𞤶𞤮 𞤮𞤲 𞤬𞤫𞤱𞤲𞤣𞤮 𞤯𞤮𞤮⹁ 𞤳𞤢 𞤮 𞤶𞤮𞥅𞤯𞤭𞤼𞤭𞥅. 𞤌 𞤼𞤭𞤥𞥆𞤭𞤲𞤭𞥅 𞤣𞤵𞥅𞤩𞤭 𞥓𞥖 (𞤷𞤢𞤨𞥆𞤢𞤲𞤯𞤫 𞤼𞤢𞤼𞤭 𞤫 𞤶𞤫𞥅𞤺𞤮𞤮) 𞤳𞤢 𞤤𞤢𞥄𞤥𞤵. 𞤑𞤮 𞤺𞤭𞤤𞤢 𞥑𞥙𞥗𞥙 𞤮 𞤬𞤵𞤯𞥆𞤭 𞤤𞤢𞥄𞤥𞤢𞥄𞤣𞤫.
𞤐𞤣𞤫 𞤼𞤢𞤱𞤵𞤲𞤮𞥅 𞤲𞤺𞤵𞥅 𞤻𞤢𞤱𞤵 𞤑𞤮𞤾𞤭𞤣 𞤢𞤤𞤢𞥄 𞤤𞤫𞤳𞥆𞤭⹁ 𞤨𞤢𞤣𞥆𞤵𞤤𞤫 𞤯𞤫𞤲 (𞤱𞤢𞤳𞤧𞤫𞤲) 𞤳𞤢𞤣𞤭 𞤱𞤫𞥅𞤩𞤢𞤲𞤢𞥄𞤤𞤭 𞤴𞤭𞤥𞤩𞤫 𞤩𞤫𞤲 𞤬𞤮𞤱 𞤼𞤢𞤸𞤮⹁ 𞤳𞤮 𞤪𞤫𞤲𞤼𞤢𞤺𞤮𞤤 𞤫 𞤪𞤢𞥄𞤩𞤭𞤲𞤢𞤴𞤯𞤭 𞤯𞤭𞤲 𞤩𞤵𞤪𞤭 𞤫 𞤥𞤵𞤰𞥆𞤵𞤣𞤫.
𞤍𞤭𞤲 𞤳𞤮:
𞥑 – 𞤔𞤓𞥅𞤍𞤉 𞤍𞤉𞤐, 𞤤𞤮𞥅𞤼𞤢 𞤯𞤫 𞤧𞤮𞥅𞤲𞤮 𞤳𞤢𞤤𞤢. 𞤌𞤲𞤼𞤭𞤺𞤭 𞤧𞤮𞥅𞤯𞤮𞤪𞤢 𞤧𞤢𞥄𞤦𞤵𞤲𞤣𞤫 𞤫 𞤲𞤣𞤭𞤴𞤢𞤲 𞤤𞤢𞥄𞤩𞤵𞤯𞤢𞤲
𞥒 – 𞤅𞤌𞤇𞥆𞤓𞤐𞥋𞤁𞤓 𞤐𞤁𞤓𞤐⹁ 𞤯𞤮𞤶𞥆𞤢 𞤥𞤢𞥄 𞤭𞥅𞤤𞤢 𞤫 𞤲𞤣𞤫𞤪 𞤥𞤢𞤴𞤪𞤵.
𞥓 – 𞤒𞤉𞥅𞤅𞤌 𞤐𞤘𞤌𞤐⹁ 𞤱𞤮𞤼𞤢 𞤮𞤲𞤼𞤭𞤺𞤭 𞤥𞤫𞥅𞤥𞤵 𞤲𞤺𞤮⹁ 𞤼𞤫𞤲𞤼𞤭𞤲𞤭𞥅 𞤧𞤮 𞤶𞤵𞥅𞤯𞤫 𞤯𞤫𞤲 𞤤𞤢𞥄𞤩𞤢𞥄.
𞥔 – 𞤚𞤉𞤆𞥆𞤉 𞤚𞤀𞤚𞤋⹁ 𞤴𞤮 𞤯𞤵𞤥 𞤱𞤮𞤲𞤵 𞤸𞤢𞤳𞥆𞤵𞤲’𞤣𞤫 𞤮𞤲𞤼𞤭𞤺𞤭 𞤫 𞤴𞤭𞤥𞤩𞤫 𞤩𞤫𞤲.
𞥕 – 𞤃𞤌 𞤅𞤌𞤋𞥅 𞤲𞤢𞤱𞤲𞤵𞤣𞤫⹁ 𞤴𞤮 𞤤𞤵𞤼𞥆𞤵 𞤳𞤢 𞤧𞤵𞥅𞤣𞤵 𞤥𞤵𞤵𞤲.
𞥖 – 𞤅𞤓𞥅𞤃𞤀 𞤳𞤭𞤲𞤢𞤤 𞤲𞤺𞤢𞤤 𞤫 𞤸𞤵𞤲𞤣𞤵𞤳𞤮 𞤳𞤮𞤲 𞤧𞤮 𞤼𞤢𞤱𞤭𞥅 𞤮𞤲𞤼𞤭𞤺𞤭 𞤴𞤢𞤤𞤼𞤢𞤴.
𞤏𞤫𞤤𞥆𞤼𞤢𞥄𞤪𞤫 𞤫 𞤲𞤮 𞤭𞤲𞥆𞤫𞥅 𞤳𞤢 𞤼𞤢𞤦𞤢𞤤𞤣𞤫