𞤃𞤀𞤁𞤀𞤘𞤀𞤅𞤑𞤀𞥄𞤈: 𞤅𞤌𞥅𞤈𞤋𞥅𞤇𞤉 𞤇𞤉𞤐 𞤎𞤉𞤚𞥆𞤋𞥅 𞤂𞤀𞥄𞤃𞤓 𞤐𞤘𞤓𞤐
𞤅𞤮𞥅𞤪𞤭𞥅𞤩𞤫 𞤷𞤭𞤤𞤭𞤳𞤫 𞤤𞤢𞥄𞤥𞤵 𞤲𞤺𞤵𞤲 𞤃𞤢𞤣𞤢𞤺𞤢𞤧𞤳𞤢𞤪 𞤩𞤢𞥄𞤱𞤮 𞤀𞤲𞤣𞤪𞤭𞥅 𞤈𞤢𞤶𞤮𞤤𞤭𞤲𞤢 𞤣𞤮𞤺𞤵𞤣𞤫 𞤴𞤢𞤤𞤼𞤢 𞤤𞤫𞤴𞤣𞤭 𞤲𞤣𞤭𞤲. 𞤑𞤮 𞤳𞤢𞤲𞤳𞤮 𞤤𞤢𞥄𞤼𞤭𞤲𞤮𞥅 𞤖𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤃𞤢𞤣𞤢𞤺𞤢𞤧𞤳𞤢𞥄𞤪 𞤲𞤣𞤭𞤲 𞤸𞤢𞥄 𞤸𞤢𞤲𞤣𞤫.
“𞤃𞤫𞤲 𞤰𞤫𞤼𞥆𞤢𞤴 𞤤𞤢𞥄𞤥𞤵 𞤲𞤺𞤵𞤲 𞤭𞤤𞤢 𞤸𞤢𞤲𞤣𞤫⹁ 𞤥𞤫𞤲 𞤧𞤢𞤴𞤤𞤭𞤲𞤢 𞤼𞤫𞥅𞤳𞤵𞥅𞤪𞤵 𞤲𞤣𞤵𞤲⹁ 𞤫 𞤙𞤢𞥄𞤱𞤭𞤪𞤣𞤵 𞤁𞤮𞤧𞤼𞤫𞤪𞤫 𞤃𞤢𞤱𞤲𞤣𞤵 𞤲𞤣𞤵𞤲. 𞤑𞤮𞤲𞤮 𞤥𞤫𞤲 𞤢𞤷𞥆𞤢𞥄𞤴 𞤐𞤦𞤢𞤼𞤭𞤪𞤣𞤵 𞤲𞤣𞤵𞤲 𞤶𞤮𞤳𞥆𞤢 𞤺𞤮𞤤𞥆𞤫 𞤥𞤵𞥅𞤯𞤵𞤲.”
𞤑𞤮 𞤯𞤵𞤥 𞤚𞤵𞥅𞤺𞤢𞤤𞤶𞤮 𞤃𞤭𞤳𞤢𞤴𞤫𞤤 𞤈𞤢𞤲𞤣𞤪𞤭𞤴𞤢𞤲𞤭𞤪𞤭𞤲𞤢 𞤸𞤮𞤤𞥆𞤭 𞤫 𞤭𞤲𞤣𞤫 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤺𞤭𞤦𞤭 𞤳𞤢 𞤸𞤵𞤩𞤫𞥅𞤪𞤫 𞤤𞤢𞥄𞤥𞤮𞤪𞤣𞤫. 𞤐𞤮 𞤼𞤢𞤱𞤢𞥄 𞤲𞤮𞤲 𞤫 𞤩𞤫𞥅 𞤧𞤮𞤪𞤭𞥅𞤩𞤫 𞤱𞤢𞤴𞤤𞤭𞤼𞤵𞤩𞤫 𞤤𞤢𞥄𞤥𞤵 𞤲𞤺𞤵𞤲⹁ 𞤑𞤀𞤆𞤅𞤀𞤚 (Capsat)⹁ 𞤬𞤫𞤣𞥆𞤫 𞤱𞤢𞤤𞥆𞤵𞤲𞤮𞥅𞤲𞤣𞤫 𞤲𞤣𞤫𞤲 𞤳𞤢𞤲𞤳𞤮 𞤸𞤮𞥅𞤪𞤫𞥅𞤶𞤮 𞤣𞤮𞤺𞤵𞤯𞤮 𞤮𞤲⹁ 𞤸𞤫𞤲𞤣𞤢𞤺𞤮𞤤 𞤤𞤢𞥄𞤥𞤵 𞤲𞤺𞤵𞤲 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥐𞥙. 𞤑𞤮𞤤𞥆𞤭𞤼𞤢𞤤 𞤲𞤺𞤢𞤤 𞤳𞤢𞤣𞤭 𞤬𞤫𞤰𞥆𞤭𞤲𞤢𞥄𞤥𞤢 𞤳𞤢 𞤰𞤫𞤱𞤤𞤢𞤤 𞤺𞤫𞤲𞤣𞤭𞤱𞤢𞤤.
𞤀𞤣𞤮 𞤲𞤺𞤢𞥄𞤤 𞤳𞤮𞤤𞥆𞤭𞤼𞤢𞤤 𞤧𞤮𞥅𞤪𞤭𞥅𞤩𞤫 𞤩𞤫𞤲⹁ 𞤸𞤢𞤪𞤭 𞤐𞤦𞤢𞤼𞤭𞤪𞤣𞤵 𞤺𞤫𞤲𞤣𞤭𞥅𞤪𞤵 𞤲𞤣𞤵𞤲 𞤸𞤮𞤤𞥆𞤭𞥅𞤲𞤮 𞤱𞤮𞤲𞤣𞤫𞤥𞤢 𞤩𞤫 𞤱𞤢𞤯𞤵𞤲𞤮 𞤧𞤵𞤩𞤲𞤺𞤮 𞤩𞤫 𞤭𞤼𞥆𞤭 𞤸𞤮𞥅𞤪𞤫𞥅𞤶𞤮 𞤣𞤮𞤺𞤵𞤯𞤮 𞤮𞤲. 𞤖𞤭𞤲𞤤𞤫 𞤺𞤭𞤦𞤭 𞤳𞤢 𞤮 𞤱𞤮𞤲𞤭 𞤼𞤮𞤲⹁ 𞤀𞤲𞤣𞤪𞤭𞥅 𞤈𞤢𞤶𞤮𞤤𞤭𞤲𞤢𞥄 𞤴𞤢𞤤𞤼𞤭𞤲𞥆𞤮 𞤴𞤢𞤥𞤭𞤪𞤮𞥅𞤪𞤫 𞤧𞤢𞤴𞤤𞤭𞤲𞤣𞤫 𞤲𞤦𞤢𞤼𞤭𞤪𞤣𞤵 𞤲𞤣𞤵𞤲. 𞤑𞤮 𞤧𞤢𞤪𞤯𞤮𞥅𞤩𞤫 𞥑𞥓𞥐 𞤫 𞤲𞤣𞤫𞤪 𞥑𞥖𞥓 𞤱𞤮𞤲𞤭 𞤳𞤮 𞤧𞤵𞤩𞤭𞥅 𞤭𞤼𞥆𞤵𞤺𞤮𞤤 𞤥𞤮. 𞤍𞤵𞤥 𞤲𞤮 𞤩𞤵𞤪𞤭 𞤼𞤢𞤼𞤢𞤩𞤫 𞤯𞤭𞤯𞤭 𞤯𞤫 𞤧𞤢𞤪𞤭𞤴𞤢 𞤳𞤢𞤲 𞤤𞤢𞤲𞤣𞤭𞥅 𞤬𞤭𞥅 𞤭𞤼𞥆𞤵𞤺𞤮𞤤 𞤤𞤢𞥄𞤥𞤯𞤮.
𞤑𞤮 𞤸𞤢𞤲𞤳𞤭 𞤫 𞤢𞥄𞤩𞤵𞤲𞥋𞤣𞤫 𞤻𞤢𞤤𞤲𞤣𞤫 𞥑𞥓 𞤒𞤢𞤪𞤳𞤮⹁ 𞤩𞤢𞤲𞤺𞤭 𞤱𞤮𞤲𞤣𞤫𞤥𞤢 𞤀𞤲𞤣𞤪𞤭𞥅 𞤈𞤢𞤶𞤮𞤤𞤭𞤲𞤢 𞤴𞤢𞤤𞤼𞤭𞥅𞤲𞤮 𞤤𞤫𞤴𞤣𞤭 𞤲𞤣𞤭𞤲⹁ 𞤲𞤣𞤫 𞤴𞤮𞤺𞤢 𞤫 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤼𞤢𞤱𞤼𞤵𞤲𞤮𞥅 𞤧𞤵𞤳𞤢𞥄𞤩𞤫 𞤥𞤵𞤪𞤼𞤵𞤩𞤫 𞤩𞤫𞤲. 𞤑𞤮 𞤤𞤢𞥄𞤱𞤳𞤢 𞤳𞤮𞤲𞤵 𞤊𞤢𞤪𞤢𞤲𞤧𞤭 𞤲𞤺𞤵𞤲 𞤱𞤮𞤲𞤭 𞤳𞤮 𞤱𞤢𞤤𞥆𞤭 𞤥𞤮 𞤴𞤢𞤤𞤼𞤵𞤣𞤫 𞤤𞤫𞤴𞤣𞤭 𞤲𞤣𞤭𞤲 𞤫 𞤈𞤫𞤬𞤦𞤭𞤪𞥆𞤫.
𞤑𞤮 𞤺𞤭𞤦𞤭 𞥒𞥕 𞤅𞤭𞤤𞤼𞤮 𞥒𞥐𞥒𞥕⹁ 𞤧𞤫𞤨𞥆𞤮𞥅𞤶𞤭 𞤯𞤭𞤲 𞤬𞤵𞤯𞥆𞤭𞥅 𞤃𞤢𞤣𞤢𞤺𞤢𞤧𞤳𞤢𞥄𞤪 𞤬𞤭𞥅 𞤲𞤣𞤭𞤴𞤢𞤥 𞤫 𞤲𞤣𞤢𞤴𞤺𞤵. 𞤑𞤮𞤲𞤮 𞤳𞤭𞤧𞤢𞤲⹁ 𞤯𞤵𞤥 𞤱𞤢𞤴𞤤𞤭𞥅 𞤱𞤮𞤲𞤼𞤭 𞤱𞤵𞤤𞥆𞤭𞤼𞤢𞥄𞤪𞤫 𞤸𞤮𞥅𞤪𞤫 𞤽𞤢𞤳𞥆𞤫 𞤯𞤵𞥅𞤯𞤵𞤯𞤫 𞤬𞤫𞤱𞤼𞤵𞤯𞤫 𞤤𞤫𞤴𞤣𞤭 𞤃𞤢𞤣𞤢𞤺𞤢𞤧𞤳𞤢𞥄𞤪 𞤲𞤣𞤭𞤲.
𞤑𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥐𞥙 𞤈𞤢𞤶𞤮𞤤𞤭𞤲𞤢𞥄 𞤰𞤢𞤱𞤭 𞤳𞤢 𞤤𞤢𞥄𞤥𞤵 𞤩𞤢𞥄𞤱𞤮 𞤮 𞤢𞤪𞤣𞤢𞥄𞤣𞤫 𞤧𞤫𞤨𞥆𞤮𞥅𞤶𞤭 𞤱𞤮𞤲𞤵𞤲𞤮𞥅𞤯𞤭 𞤧𞤢𞤦𞤵 𞤸𞤢𞥄𞤲 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤱𞤢𞤴𞤤𞤭𞤼𞤭 𞤤𞤢𞥄𞤥𞤵 𞤃𞤢𞤪𞤳 𞤈𞤢𞤾𞤢𞤤𞤮𞤥𞤢𞤲𞤢. 𞤕𞤢𞤺𞥆𞤢𞤤 𞤯𞤵𞤥⹁ 𞤈𞤢𞤶𞤮𞤤𞤭𞤲𞤢𞥄 𞤢𞤪𞤣𞤭𞤲𞤢𞥄 𞤸𞤮𞥅𞤪𞤫 𞤤𞤢𞥄𞤥𞤵 𞤳𞤫𞤲𞤫𞤲𞤼𞤭𞤸𞤵 𞤸𞤢𞥄 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥔. 𞤑𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥘 𞤮 𞤢𞤪𞤼𞤭 𞤳𞤢 𞤤𞤢𞥄𞤥𞤵 𞤦𞤢𞤯𞤼𞤢𞤲𞤫 𞤧𞤵𞤩𞤲𞤺𞤮 𞤱𞤢𞤯𞤵𞤲𞤮𞥅𞤲𞤺𞤮 𞤲𞤺𞤮𞤲 𞤮𞤲𞤼𞤵𞤥𞤢. 𞤌 𞤤𞤢𞥄𞤥𞤭𞤼𞤭𞥅 𞤳𞤢𞤣𞤭 𞤩𞤢𞥄𞤱𞤮 𞤧𞤵𞤩𞤲𞤺𞤮 𞤲𞤺𞤮𞤲 𞥒𞥐𞥒𞥓. 𞤑𞤮𞤲𞤮 𞤤𞤭𞤣𞥆𞤭𞥅𞤩𞤫 𞤥𞤮 𞤩𞤫𞤲 𞤶𞤢𞤩𞤢𞥄𞤲𞤮 𞤳𞤮 𞤴𞤢𞤤𞤼𞤵𞤲𞤮𞥅 𞤫 𞤲𞤺𞤮𞥅𞤲 𞤧𞤵𞤩𞤲𞤺𞤮.
𞤏𞤢𞤴𞤤𞤭𞤼𞤵𞤲𞤮𞥅𞤯𞤮 𞤱𞤢𞤴𞤤𞤭𞤼𞤢𞥄𞤥𞤢!
𞤃𞤮 𞤦𞤫𞥅 𞤲𞤮 𞤢𞤪𞤣𞤭 𞤲𞤮𞤲 𞤳𞤮 𞤲𞤮𞤲 𞤴𞤢𞤸𞤢𞤪𞤢𞤼𞤢. 𞤌𞤲 𞤱𞤫𞤤𞤼𞤢𞤲𞤢𞥄𞤥𞤢 𞤦𞤢𞤼𞥆𞤫 𞤳𞤵𞤥𞤨𞤭𞤼𞤢𞤤 𞤲𞤺𞤢𞤤.