𞤃𞤀𞤑𞤌𞤈𞤌𞤐: 𞤑𞤌 𞤊𞤀𞤈𞤀𞤐𞤅𞤉 𞤏𞤌𞤐𞤋 𞤍𞤉𞤃𞤘𞤀𞤂 𞤆𞤋𞤐𞤀𞤂

𞤉𞤥𞤢𞤲𞤵𞤴𞤫𞤤 𞤃𞤢𞤳𞤮𞤪𞤮𞤲⹁ 𞤸𞤮𞥅𞤪𞤫𞥅𞤶𞤮 𞤊𞤢𞤪𞤢𞤲𞤧𞤭 𞤮𞤲 𞤲𞤮 𞤱𞤭𞤴𞤭 𞤳𞤮 𞤬𞤢𞤪𞤢𞤲𞤧𞤫𞥅𞤪𞤫 𞤲𞤣𞤫𞤲 𞤱𞤮𞤲𞤭 𞤯𞤫𞤥𞤺𞤢𞤤 𞤢𞤬𞤪𞤭𞤳𞤲𞤢𞥄𞤳𞤵. 𞤌 𞤱𞤭𞤴𞤭 𞤳𞤢𞤣𞤭 𞤳𞤮 𞤳𞤢𞤲𞤺𞤢𞤤 𞤱𞤮𞤲𞤭 𞤯𞤫𞤥𞤺𞤢𞤤 𞤱𞤮𞥅𞤼𞤭𞤲𞤯𞤭𞤪𞤲𞤺𞤢𞤤 𞤸𞤢𞤳𞥆𞤵𞤲𞤣𞤫 𞤀𞤬𞤪𞤭𞤳𞤲𞤢𞥄𞤩𞤫 𞤥𞤮𞤬𞤼𞤵𞤲’𞤺𞤢𞤤 𞤨𞤭𞤲𞤫 𞤢𞤣𞤵𞤲𞤢𞤴𞤢𞤲𞤳𞤮𞥅𞤶𞤫.

𞤉 𞤥𞤭𞥅𞤶𞤮 𞤥𞤢𞤳𞥆𞤮⹁ 𞤯𞤫𞤥𞤯𞤫 𞤥𞤫𞤫𞤲 𞤯𞤫𞤲 𞤀𞤬𞤪𞤭𞤳 𞤴𞤮𞤲𞤢𞥄 𞤬𞤭𞤲𞤣𞤭𞤲𞤭𞤪𞤯𞤫.  𞤅𞤭 𞤮𞤲 𞤼𞤭𞤲𞤭𞥅⹁ 𞤮𞤥𞤮 𞤭𞤱𞤢 𞤳𞤢 𞤥𞤢𞤳𞥆𞤮 𞤊𞤢𞤪𞤢𞤲𞤧𞤭 𞤮 𞤢𞤪𞤢 𞤀𞤬𞤪𞤭𞤳 𞤮 𞤸𞤢𞥄𞤤𞤢 𞤳𞤮𞥅 𞤳𞤮 𞤮 𞤸𞤢𞥄𞤤𞤭⹁ 𞤳𞤮 𞤼𞤢𞤱𞤵𞤣𞤫 𞤲𞤮 𞤸𞤫𞤲𞤢𞤲𞤭 𞤥𞤮  𞤱𞤮𞤲𞤣𞤫𞤥𞤢 𞤧𞤭 𞤮 𞤸𞤮𞤴𞤲𞤭𞥅 𞤢𞤬𞤪𞤭𞤳𞤲𞤢𞥄𞤩𞤫 𞤩𞤫𞤲⹁ 𞤳𞤮 𞤶𞤢𞤥 𞤱𞤢𞥄𞤤𞤮𞤼𞤮𞥅 𞤼𞤢𞤤𞥆𞤮𞥅. 𞤀𞤲𞤣𞤢 𞤤𞤫⹁ 𞤥𞤮 𞤸𞤢𞤴𞤬𞤭𞤲𞤭𞥅 𞤯𞤫𞤥𞤺𞤢𞤤 𞤥𞤢𞥄𞤯𞤢⹁ 𞤸𞤢𞤪𞤢𞤴 𞤮𞤲𞤼𞤭𞤺𞤭 𞤸𞤮𞤴𞤲𞤭𞥅 𞤨𞤭𞤲𞤫 𞤥𞤢𞥄𞤯𞤢⹁ 𞤧𞤢𞤦𞤵𞤲𞤢 𞤳𞤮 𞤯𞤫𞤲𞤺𞤢𞤤 𞤱𞤮𞤲𞤭 𞤱𞤮𞤲𞤳𞤭𞥅 𞤨𞤭𞤲𞤫 𞤤𞤫𞤻𞤮𞤤. 

𞤑𞤮 𞤦𞤢𞤯𞤼𞤢𞤲𞤫 𞤼𞤵𞤥𞤦𞤮𞤲’𞤣𞤭𞤪𞤢𞤤 𞤧𞤢𞤨𞥆𞤮-𞤫-𞤶𞤫𞥅𞤼𞤢𞤼𞤢𞤩𞤢𞤤 (𞥑𞥘𞤢𞤩𞤢𞤤) 𞤥𞤮𞤶𞤮𞤦𞤫𞤪𞤫 𞤤𞤫𞤴𞤯𞤫 𞤸𞤢𞥄𞤤𞤭-𞤬𞤢𞤪𞤢𞤲𞤧𞤫 𞤱𞤢𞤯𞤵𞤲𞤺’𞤢𞤤 𞤚𞤵𞤲𞤭𞥅𞤧𞤭𞤴𞤢⹁ 𞤮 𞤸𞤢𞥄𞤤𞤭 𞤯𞤵𞤥.

𞤐𞤣𞤫𞥅 𞤥𞤮𞤶𞤮𞤦𞤫𞤪𞤫 𞤢𞤲𞤣𞤭𞤪𞤢𞥄𞤲𞤣𞤫 𞤊𞤢𞤪𞤢𞤲𞤳𞤮𞤬𞤮𞤲𞤭 𞤲𞤮 𞤥𞤮𞤬𞤼𞤭 𞤤𞤫𞤴𞤯𞤫 𞥘𞥘. 𞤊𞤢𞥄𞤲𞤣𞤢𞥄𞤪𞤫 𞤥𞤢𞤴𞤪𞤫 𞤳𞤮 𞤩𞤢𞤥𞤼𞤵𞤺𞤮𞤤 𞤯𞤫𞤲𞤺𞤢𞤤 𞤊𞤢𞤪𞤢𞤲𞤧𞤭 𞤲𞤺𞤢𞤤 𞤫 𞤻𞤭𞥅𞤩𞤲𞤵𞤺𞤮𞤤 𞤸𞤵𞥅𞤱𞤮𞤲’𞤣𞤭𞤪𞤢𞤤 𞤸𞤢𞤳𞥆𞤵𞤲’𞤣𞤫 𞤤𞤫𞤴𞤯𞤫 𞤼𞤢𞤱𞤢𞥄𞤯𞤫 𞤢 𞤥𞤮𞤶𞤮𞤦𞤫𞤪𞤫 𞤲𞤣𞤫𞤲.

𞤑𞤮𞤲𞤮 𞤳𞤮 𞤩𞤵𞤪𞤭 𞤮𞤳𞥆𞤵𞤣𞤫 𞤲𞤣𞤫𞥅 𞤥𞤮𞤶𞤮𞤦𞤫𞤪𞤫 𞤣𞤮𞥅𞤤𞤫⹁ 𞤳𞤮 𞤤𞤫𞤴𞤯𞤫 𞤀𞤬𞤪𞤭𞤳 𞤯𞤫𞤲. 𞤅𞤢𞤦𞤵𞤲𞤢 𞤳𞤮 𞤤𞤫𞤴𞤯𞤫 𞤀𞤬𞤪𞤭𞤳 𞤯𞤫𞤲 𞤩𞤵𞤪𞤭 𞤼𞤭𞥅𞤯𞤲𞤮𞤪𞤣𞤫 𞤬𞤢𞤪𞤢𞤲𞤧𞤫𞥅𞤪𞤫 𞤲𞤣𞤫𞤲. 𞤂𞤫𞤴𞤯𞤫 𞤯𞤵𞥅𞤯𞤵𞤯𞤫⹁ 𞤯𞤫 𞤼𞤢𞤱𞤭 𞤸𞤢𞤴 𞤳𞤮𞤲𞤺𞤮𞤤 𞤺𞤮𞥅𞤼𞤮𞤤 𞤬𞤢𞤪𞤢𞤲𞤧𞤫 𞤸𞤢𞥄𞤤𞤫𞤼𞤢𞥄𞤳𞤫 𞤫 𞤥𞤵𞤵𞤲 𞤲𞤮 𞤼𞤢𞤱𞤢𞥄 𞤫 𞤲𞤣𞤫𞥅 𞤥𞤮𞤶𞤮𞤦𞤫𞤪𞤫. 𞤍𞤵𞤥 𞤲𞤮 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢 𞤲𞤣𞤫𞥅 𞤥𞤮𞤶𞤮𞤦𞤫𞤪𞤫 𞤳𞤮 𞤼𞤵𞥅𞤺𞤮𞤪𞤲𞤣𞤫 𞤱𞤮𞤲𞤢𞤲𞤣𞤫 𞤤𞤢𞥄𞤥𞤩𞤫 𞤊𞤢𞤪𞤢𞤲𞤧𞤭 𞤩𞤫𞤲 𞤬𞤭𞥅 𞤲𞤮 𞤩𞤫 𞤴𞤢𞥄𞤻𞥆𞤭𞤪𞤢 𞤣𞤮𞥅𞤤𞤫 𞤥𞤢𞤩𞥆𞤫 𞤫 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲. 𞤐𞤮 𞤸𞤫𞤲𞤢𞤲𞤭 𞤩𞤫 𞤱𞤮𞤲𞤣𞤫𞤥𞤢 𞤯𞤵𞤥 𞤺𞤢𞤧𞤭𞥅 𞤱𞤮𞥅⹁ 𞤧𞤭 𞤯𞤫𞤥𞤺𞤢𞤤 𞤥𞤢𞤩𞥆𞤫 𞤲𞤺𞤢𞤤 𞤤𞤢𞤴𞤭𞥅 𞤫 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲 𞤺𞤮𞤨. 

𞤒𞤢𞤳𞤢 𞤧𞤫𞥅𞤣𞤫𞥅 𞤥𞤫𞤫𞤲⹁ 𞤧𞤮 𞤫𞤲 𞤭𞤥𞥆𞤢𞥄𞤳𞤭 𞤣𞤢𞤪𞤭 𞤯𞤫𞤲⹁ 𞤻𞤢𞤤𞤢𞥄𞤲𞤣𞤫 𞤢𞤪𞤮𞤴𞤢𞤴 𞤼𞤢𞤱𞤢 𞤯𞤫𞤥𞤯𞤫 𞤥𞤫𞤫𞤲 𞤫 𞤨𞤭𞤲𞤫 𞤥𞤫𞤫𞤲 𞤥𞤵𞤤𞤭𞥅⹁ 𞤅𞤢𞤦𞤵𞤲𞤢 𞤳𞤮 𞤫𞤲𞤫𞤲 𞤼𞤢𞤲 𞤱𞤫𞤤𞤧𞤭𞤲’𞤣𞤢𞤲𞤭 𞤯𞤫𞤥𞤯𞤫 𞤥𞤫𞤫𞤲.