𞤄𞤀𞥄𞤄𞤋𞤈𞤀𞥄𞤏𞤌 𞤖𞤌𞥅𞤈𞤉𞥅𞤔𞤌 𞤑𞤀 𞤋𞤊𞤁𞤘 𞤐𞤌 𞤊𞤉𞤎𞥆𞤋𞤐𞤋
𞤒𞤭𞥅𞤤𞤭𞤪𞤣𞤫 𞤲𞤺𞤫𞤲𞤣𞤭𞤴𞤢𞤲𞤳𞤮𞥅𞤪𞤫 𞤋𞤊𞤁𞤘 (UFDG) 𞤲𞤣𞤫𞤲 𞤸𞤮𞤤𞥆𞤭𞤼𞤭𞥅 𞤱𞤮𞤲𞤣𞤫𞤥𞤢 𞤀𞤤𞤖𞤢𞤶𞥆𞤭 𞤄𞤵𞥅𞤦𞤢𞤳𞤢𞤪 𞤐𞤣𞤢𞤲𞤼𞤢𞤦𞤢 𞤐𞤄𞤀𞤂𞤁𞤉⹁𞤦𞤢𞥄𞤦𞤭𞤪𞤢𞥄𞤱𞤮 𞤅𞤫𞤤𞥆𞤵 𞤐𞤄𞤀𞤂𞤁𞤉 𞤮𞤲 𞤬𞤫𞤰𞥆𞤭𞤲𞤭𞥅 𞤸𞤢𞤲𞤣𞤫 𞤫 𞤢𞥄𞤩𞤵𞤲𞤣𞤫 (𞤼𞤫𞤲𞤫𞤲) 𞤻𞤢𞤤𞤲𞤣𞤫 𞥐𞥕 𞤅𞤫𞥅𞤯𞤼𞤮 𞥒𞥐𞥒𞥑. 𞤐𞤣𞤫𞥅 𞤬𞤢𞥄𞤼𞤵𞤲𞤣𞤫 𞤳𞤮 𞤂𞤢𞤦𞤫 𞤫 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫 𞤱𞤢𞤯𞤭 𞤳𞤢 𞤬𞤫𞤱𞤲𞤣𞤮 𞤰𞤢𞤱𞤢𞤤 (𞤥𞤭𞤣𞤭).
𞤑𞤮 𞤅𞤫𞤤𞥆𞤵 𞤐𞤄𞤢𞤤𞤣𞤫 𞤤𞤢𞥄𞤼𞤭𞤲𞤮𞥅 𞤧𞤢𞤪𞤴𞤮𞥅𞤱𞤮 𞤱𞤢𞤤𞥆𞤢 𞤣𞤫𞤨𞤭𞤼𞤫𞥅𞤶𞤮 𞤂𞤢𞤦𞤫 𞤮𞤲 𞤸𞤢𞥄 𞤲𞤣𞤫 𞤧𞤢𞤪𞤴𞤮𞥅𞤩𞤫 𞤩𞤫𞤲 𞤱𞤢𞤴𞤤𞤢𞤲𞤮𞥅 𞤳𞤢 𞤧𞤵𞤩𞤮 𞥒𞥐𞥒𞥐. 𞤑𞤮𞤲𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤬𞤫𞤣𞥆𞤫 𞤥𞤢𞤳𞥆𞤮 𞤲𞤣𞤫𞤲 𞤶𞤢𞤩𞤢𞥄𞤲𞤮 𞤼𞤢𞤱𞤫𞥅𞤣𞤫 𞤫 𞤲𞤺𞤮𞤲 𞤧𞤵𞤩𞤮⹁ 𞤮 𞤱𞤢𞥄𞤱𞤢𞥄𞤤𞤭 𞤸𞤫𞤲𞤣𞤭𞤼𞤢𞥄𞤲𞤣𞤫 𞤶𞤮𞤲𞤣𞤫 𞤥𞤢𞤳𞥆𞤮 𞤲𞤣𞤫𞤲 𞤳𞤢 𞤧𞤢𞤪𞤴𞤭𞤪𞤣𞤵.
𞤘𞤭𞤤𞤢 𞤲𞤮𞤲 𞤫 𞤔𞤮𞤤𞤮 𞥒𞥐𞥒𞥐⹁ 𞤩𞤢𞥄𞤱𞤮 𞤧𞤵𞤩𞤮 𞤬𞤭𞥅 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲⹁ 𞤅𞤫𞤤𞥆𞤵 𞤐𞤦𞤢𞤤𞤣𞤫 𞤳𞤢𞤻𞤵𞤲 𞤫 𞤸𞤮𞥅𞤪𞤫𞥅𞤩𞤫 𞤯𞤵𞥅𞤯𞤵𞤩𞤫 𞤳𞤢 𞤬𞤫𞤣𞥆𞤫 𞤋𞤊𞤁𞤘 (UFDG) 𞤲𞤮 𞤲𞤢𞤲𞤺𞤢𞥄 𞤧𞤮𞤳𞤢𞥄 𞤑𞤮𞤲𞤢𞥄𞤳𞤭𞤪𞤭. 𞤘𞤭𞤤𞤢 𞤩𞤫 𞤲𞤢𞤲𞤺𞤢𞥄⹁ 𞤯𞤵𞤥 𞤩𞤵𞤪𞤲𞤭𞥅 𞤤𞤫𞤦𞥆𞤭 𞤶𞤮𞤱𞤭 𞤳𞤮𞤲𞤮 𞤸𞤢𞥄 𞤶𞤮𞥅𞤲𞤭 𞤩𞤫 𞤻𞤢𞥄𞤱𞤢𞥄𞤳𞤢 𞤧𞤢𞤳𞤢 𞤩𞤫 𞤢𞤷𞥆𞤭𞤼𞤫𞥅.
𞤐𞤮 𞤼𞤢𞤱𞤢𞥄 𞤫 𞤩𞤫𞤲 𞤲𞤢𞤲𞤺𞤢𞥄𞤩𞤫⹁ 𞤀𞤤𞤸𞤢𞤶𞥆𞤭 𞤡𞤫𞤪𞤭𞥅𞤬𞤵 𞤄𞤢𞥄⹁ 𞤷𞤵𞤳𞥆𞤵 𞤸𞤮𞥅𞤪𞤫𞥅𞤶𞤮 𞤋𞤊𞤁𞤘 𞤮𞤲⹁ 𞤫 𞤓𞤧𞤥𞤢𞥄𞤲𞤭 𞤘𞤢𞥄𞤱𞤢𞥄𞤤 𞤔𞤢𞤤𞥆𞤮⹁ 𞤫 𞤀𞤦𞤣𞤵𞤤𞥆𞤢𞥄𞤸𞤭 𞤄𞤢𞥄 (𞤢𞤪𞤣𞤭𞤲𞤮𞥅𞤯𞤮 𞤮𞤲 𞤧𞤢𞥄𞤪𞤫 𞤑𞤭𞤲𞤣𞤭𞤴𞤢 𞤲𞤣𞤫𞤲)⹁ 𞤳𞤢𞤻𞤵𞤲 𞤫 𞤉𞤼𞤭𞤴𞤫𞤲 𞤅𞤮𞤪𞤮𞤨𞤮𞤺𞤭. 𞤉 𞤩𞤫𞥅 𞤯𞤮𞤮 𞤲𞤢𞤲𞤺𞤢𞥄𞤩𞤫 𞤬𞤮𞤨⹁ 𞤳𞤮 𞤉𞤼𞤭𞤴𞤫𞤲 𞤅𞤮𞤪𞤮𞤨𞤮𞤺𞤭 𞤼𞤢𞤲 𞤱𞤮𞤲𞤭 𞤼𞤢𞤱𞤢𞤲𞤮𞥅𞤳𞤢 𞤫 𞤬𞤫𞤣𞥆𞤫 𞤀𞤤𞤸𞤢𞤶𞥆𞤭 𞤅𞤫𞤤𞥆𞤫 𞤁𞤢𞤤𞤫𞤲 𞤲𞤣𞤫𞤲⹁ 𞤳𞤮𞤲𞤮 𞤮 𞤼𞤮𞤪𞤭𞤲𞤮 𞤴𞤮 𞤴𞤭𞤥𞤩𞤫 𞤩𞤫𞤲 𞤴𞤢𞤤𞤼𞤵 𞤱𞤮𞥅𞤼𞤢𞤲𞤢 𞤅𞤫𞤤𞥆𞤵 𞤳𞤢 𞤧𞤵𞤩𞤮 𞥒𞥐𞥒𞥐. 𞤒𞤮𞤺𞤢 𞤫 𞤲𞤢𞤲𞤺𞤢𞤲𞤮𞥅𞤩𞤫 𞤩𞤫𞤲 𞤦𞤢𞤯𞤼𞤢𞤲𞤫 𞤲𞤺𞤮𞤲 𞤧𞤵𞤩𞤮 𞤥𞤢𞥄𞤴𞤭𞥅 𞤲𞤮 𞤧𞤮𞤳𞤭𞥅⹁ 𞤱𞤢𞤲𞤮 𞤈𞤮𞥅𞥁𞤫𞥅 𞤄𞤢𞤥𞤦𞤢.
𞤄𞤢𞤯𞤼𞤢𞤲𞤫 𞤲𞤺𞤮𞤲 𞤧𞤵𞤩𞤮⹁ 𞤀𞤤𞤸𞤢𞤶𞥆𞤭 𞤅𞤫𞤤𞥆𞤵 𞤁𞤢𞤤𞤫𞤲 𞤫 𞤴𞤭𞤥𞤩𞤫 𞤥𞤢𞤳𞥆𞤮 𞤩𞤫𞤲 𞤱𞤭𞤵𞤲𞤮⹁ 𞤳𞤮 𞤳𞤢𞤥𞤩𞤫 𞤬𞤮𞥅𞤤𞤭. 𞤇𞤫 𞤱𞤫𞥅𞤩𞤭𞤼𞤢𞤲𞤭 𞤴𞤭𞤥𞤩𞤫 𞤩𞤫𞤲 𞤼𞤵𞥅𞤺𞤮𞤪𞤣𞤫 𞤥𞤢𞤩𞥆𞤫 𞤫 𞤱𞤭𞤵𞤺𞤮𞤤 𞤯𞤵𞤥. 𞤑𞤮𞤲𞤮 𞤯𞤵𞤥 𞤸𞤢𞤯𞤢𞥄𞤤𞤭 𞤀𞤤𞤬𞤢𞥄 𞤑𞤮𞤲𞤣𞤫 𞤶𞤮𞥅𞤯𞤭𞤼𞤢𞥄𞤣𞤫 𞤷𞤢𞤺𞥆𞤢𞤤 𞤮 𞤱𞤢𞤪𞤵𞤣𞤫 𞤴𞤭𞤥𞤩𞤫 𞤯𞤵𞥅𞤯𞤵𞤩𞤫.
𞤫 𞤸𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤖𞤢𞤲 𞤶𞤮𞥅𞤲𞤭 𞤴𞤭𞥅𞤤𞤭𞤪𞤣𞤫 𞤋𞤊𞤁𞤘 𞤲𞤣𞤫𞤲 𞤲𞤮 𞤧𞤮𞤳𞤭𞥅. 𞤔𞤮𞥅𞤲𞤭 𞤳𞤮 𞤳𞤢 𞤖𞤢𞥄𞤼𞥆𞤭𞤧𞤵 (𞤫𞤼𞤫𞤪𞤲𞤫𞤼)⹁ 𞤼𞤵𞤥𞤦𞤮𞤲𞤣𞤭𞤪𞤫 𞤋𞤊𞤁𞤘 𞤯𞤫𞤲 𞤱𞤮𞤲𞤭 𞤫 𞤱𞤢𞤯𞤵𞤣𞤫.
𞤐𞤶𞤵𞤩𞥆𞤵𞤤𞤭 𞤱𞤭𞤲𞤣𞤫𞤪𞤫𞤴𞤢𞤲𞤳𞤮𞥅𞤶𞤭 𞤯𞤵𞥅𞤯𞤵𞤯𞤭 𞤴𞤢𞤥𞤭𞤪𞤭𞥅 𞤀𞤤𞤬𞤢𞥄 𞤑𞤮𞤲𞤣𞤫 𞤢𞤷𞥆𞤵𞤼𞤵𞤺𞤮𞤤 𞤲𞤢𞤲𞤺𞤢𞥄𞤩𞤫 𞤩𞤫𞤲⹁ 𞤳𞤮𞤲𞤮 𞤮 𞤶𞤢𞤩𞤢𞥄𞤤𞤭 𞤼𞤢𞤸𞤮.
𞤒𞤮 𞤀𞤤𞤤𞤢 𞤴𞤵𞤪𞤥𞤫 𞤴𞤢𞥄𞤬𞤮𞥅 𞤬𞤢𞥄𞤼𞤭𞥅𞤩𞤫 𞤩𞤫𞤲.
𞤒𞤮𞤼𞥆𞤭𞤲𞤭𞥅 𞤯𞤵𞤥⹁ 𞤀𞤴𞥃𞤢 𞤅𞤮𞥅
𞤌𞤲 𞤶𞤢𞥄𞤪𞤢𞥄𞤥𞤢