𞤃𞤵𞥅𞤴𞤲𞤯𞤫 𞤦𞤮𞤲𞤯𞤫 𞤱𞤮𞤲𞤢𞤲𞤣𞤫 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭: 𞤬𞤭𞤤𞥆𞤢𞥄𞤴𞤫𞥅 𞤸𞤮𞥅𞤪𞤫 𞤥𞤢𞥄𞤴𞤣𞤫 𞤬𞤫𞤤𞥆𞤭𞤼𞤢𞥄𞤲𞤣𞤫

𞤉 𞤲𞤣𞤫𞤪 𞤲𞤺𞤮𞥅𞤤 𞤬𞤭𞤤𞥆𞤢𞤱𞤮𞤤 𞤯𞤮𞥅⹁ 𞤫𞤯𞤫𞤲 𞤫𞤼𞤢𞥄𞤣𞤫 𞤲𞤮 𞤱𞤢𞤯𞤭𞤪𞤫𞤲 𞤳𞤭𞥅𞤻𞤮 𞤲𞤣𞤫𞥅 𞤥𞤢𞥄𞤴𞤣𞤫 𞤦𞤮𞤲𞤣𞤫 𞤴𞤢𞤲𞤵𞤲’𞤣𞤫 𞤫 𞤸𞤮𞥅𞤪𞤫𞥅𞤶𞤮 𞤥𞤢𞤱𞤯𞤮 𞤳𞤭𞤯𞥆𞤮 𞤳𞤮𞤲𞤵 𞤘𞤭𞤲𞤫 𞤲𞤺𞤵𞤲⹁ 𞤤𞤢𞥄𞤼𞤭𞤲𞤮𞥅𞤯𞤮 “𞤯𞤭𞤯𞤢𞤩𞤮” 𞤶𞤵𞤲𞥆𞤭𞤼𞤢𞤤 𞤲𞤺𞤢𞤤⹁ 𞤳𞤮𞤲𞤮 𞤳𞤢 𞤧𞤢𞤳𞥆𞤭𞤼𞤮𞤪𞤵𞤲 𞤮𞤥𞤮 𞤸𞤢𞤤𞤬𞤢𞤲𞤮𞥅 𞤥𞤵𞤪𞤢𞥄𞤯𞤭 𞤴𞤢𞥄𞤳𞤮𞤪𞤣𞤫 𞤘𞤭𞤲𞤫 𞤲𞤣𞤫𞤲 𞤖𞤢𞤾𞤢𞥄𞤲⹁ 𞤼𞤮 𞤤𞤫𞤴𞤣𞤭 𞤑𞤓𞤄𞤀𞥄.

𞤕𞤫𞥅𞤪𞤺𞤢𞤤 𞤲𞤺𞤢𞤤

𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭⹁ 𞤬𞤢𞥄𞤼𞤭𞥅𞤯𞤮 𞤮𞤲 𞤼𞤮𞤯𞥆𞤢𞤲𞤮 𞤖𞤮𞥅𞤪𞤫𞥅𞤶𞤮 𞤃𞤢𞤱𞤯𞤮 𞤑𞤮𞤲𞤵 𞤲𞤺𞤵𞤲 𞤫 𞤴𞤢𞤪𞤳𞤮 𞥒𞥐𞥒𞥑⹁ 𞤳𞤮𞤲𞤮 𞤮 𞤧𞤢𞥄𞤴𞤲𞤢𞥄 𞤫 𞤅𞤫𞥅𞤯𞤼𞤮 𞥒𞥐𞥒𞥓⹁ 𞤪𞤫𞤬𞤼𞤭 𞤮 𞤱𞤢𞤯𞤢𞥄 𞤶𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤘𞤢𞤤𞥆𞤵𞥅𞤶𞤫⹁ 𞤫 𞤳𞤢 𞤳𞤮𞤯𞤢𞤲𞤯𞤫 𞤫 𞤸𞤫𞤩𞤼𞤭𞤼𞤵𞤺𞤮𞤤 𞤼𞤵𞤥𞤦𞤫 𞤤𞤢𞥄𞤥𞤵 𞤴𞤢𞤲𞤢𞥄𞤯𞤫 𞤫 𞤥𞤵𞥅𞤲. 𞤐𞤣𞤫 𞤼𞤢𞤱𞤵𞤲𞤮𞥅 𞤸𞤭𞤲𞤮 𞤥𞤫𞤼𞥆𞤭 𞤥𞤮⹁ 𞤣𞤢𞤪𞤲𞤣𞤫 𞤲𞤣𞤫 𞤸𞤮𞥅𞤪𞤫𞥅𞤶𞤮 𞤶𞤵𞤲𞥆𞤭𞤼𞤢𞤤 𞤲𞤺𞤢𞤤⹁ 𞤃𞤢𞤥𞤢𞤣𞤭 𞤁𞤵𞤥𞤦𞤵𞤴𞤢⹁ 𞤰𞤫𞤼𞥆𞤭 𞤲𞤣𞤫𞤲 𞤬𞤢𞥄𞤣𞤫 𞤫 𞤸𞤢𞤩𞤪𞤫 𞤸𞤢𞤳𞥆𞤵𞤲𞥋𞤣𞤫 𞤥𞤢𞤳𞥆𞤮 𞤫 𞤋𞤣𞤭 𞤀𞤥𞤭𞥅𞤲⹁ 𞤔𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤐𞤣𞤫𞥅𞤲𞤳𞤢⹁ 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤧𞤢𞤤𞤭𞥅 𞤺𞤮𞤤𞥆𞤫 𞤯𞤫𞤲⹁ 𞤮 𞤧𞤵𞤩𞤭𞥅 𞤪𞤵𞤼𞥆𞤢𞤺𞤮𞤤 𞤳𞤢 𞤺𞤢𞤤𞥆𞤫 𞤥𞤢𞤳𞥆𞤮. 𞤉 𞤱𞤭𞤴𞤢𞤲𞤯𞤫 𞤸𞤵𞤥𞤨𞤭𞤼𞤮𞥅𞤩𞤫 𞤯𞤵𞥅𞤯𞤵𞤩𞤫 𞤭𞤥𞥆𞤮𞤪𞤣𞤫 𞤳𞤢 𞤳𞤮𞤲𞤵⹁ 𞤮 𞤼𞤮𞤪𞤭𞤲𞤮 𞤸𞤮𞥅𞤪𞤫𞥅𞤶𞤮 𞤶𞤵𞤲𞥆𞤭𞤼𞤢𞤤 𞤲𞤺𞤢𞤤 𞤴𞤮 𞤮 𞤭𞤼𞥆𞤵 𞤋𞤣𞤭 𞤀𞤥𞤭𞥅𞤲 𞤸𞤮𞥅𞤪𞤫 𞤳𞤮𞤲𞤵 𞤲𞤺𞤵𞤲⹁ 𞤮 𞤲𞤢𞤩𞤢 𞤥𞤮 𞤫 𞤶𞤢𞥄𞤺𞤮𞤪𞤺𞤢𞤤 𞤺𞤮𞥅⹁ 𞤧𞤢𞤦𞤵 𞤨𞤮𞥅𞤯𞤮𞤲𞥋𞤣𞤭𞤪𞤢𞤤 𞤬𞤢𞤲𞤼𞤵𞤲𞥋𞤺𞤢𞤤 𞤱𞤮𞤲𞤵𞤲𞥋𞤺𞤢𞤤 𞤸𞤢𞤳𞥆𞤵𞤲𞥋𞤣𞤫 𞤥𞤢𞤳𞥆𞤮 𞤫 𞤮𞤲⹁ 𞤼𞤢𞤱𞤣𞤫 𞤳𞤢𞤣𞤭 𞤸𞤵𞥅𞤱𞤮𞤲𞥋𞤣𞤭𞤪𞤢𞤤 𞤸𞤢𞤳𞥆𞤵𞤲𞥋𞤣𞤫 𞤥𞤢𞤳𞥆𞤮 𞤫 𞤮𞤲 𞤯𞤮𞤲 𞤲𞤮 𞤧𞤢𞤯𞤼𞤭.

𞤑𞤮𞤲𞤮 𞤩𞤢𞤴𞤼𞤭 𞤮 𞤸𞤫𞤩𞤢𞥄𞤤𞤭 𞤳𞤵𞤼𞤵⹁ 𞤱𞤢𞤴𞤼𞤢𞤲𞤭 𞤥𞤮 𞤱𞤢 𞤧𞤭 𞤤𞤢𞥄𞤥𞤯𞤮 𞤶𞤵𞤲𞥆𞤭𞤼𞤢𞤤 𞤲𞤺𞤢𞤤 𞤲𞤮 𞤱𞤭𞤳𞥆𞤢𞥄𞤣𞤫 𞤥𞤮⹁ 𞤫 𞤸𞤭𞤲𞤤𞤫 𞤸𞤢𞤪𞤭 𞤮𞤥𞤮 𞤰𞤫𞤼𞥆𞤭𞤼𞤮𞤪𞤭 𞤱𞤢 𞤱𞤮𞤲𞤵𞤲𞤮𞥅𞤯𞤮 𞤮𞤲 𞤧𞤢𞤦𞤵 𞤸𞤢𞥄 𞤳𞤮𞤲𞤵 𞤘𞤭𞤲𞤫 𞤲𞤺𞤵𞤲 𞤼𞤢𞤱𞤼𞤭 𞤫 𞤱𞤢𞤤𞥆𞤭𞤼𞤢𞤺𞤮𞤤 𞤲𞤮 𞤬𞤮𞤤𞥆𞤵𞤪𞤵 𞤲𞤣𞤵𞤲 𞤻𞤢𞤤𞤲𞤣𞤫 𞥕 𞤅𞤭𞤤𞤼𞤮 𞥒𞥐𞥒𞥑 𞤺𞤢𞤧𞤭𞤪𞤢⹁ 𞤸𞤢𞤪𞤢 𞤨𞤫𞤤𞥆𞤫 𞤧𞤮𞥅𞤪𞤭 𞤯𞤫𞤲 𞤵𞤳𞥆𞤮𞤲𞥋𞤣𞤭𞤪𞤣𞤫.

𞤚𞤵𞤽𞤭𞤲𞤭𞤪𞤫𞥅𞤣𞤫 𞤣𞤮𞥅𞤤𞤫

𞤉 𞤒𞤢𞥄𞤪𞤳𞤮 𞥒𞥐𞥒𞥓⹁ 𞤮 𞤼𞤮𞤯𞥆𞤢𞥄 𞤫 𞤺𞤵𞤲𞤣𞤮𞥅 𞤱𞤮𞤲𞤵𞤺𞤮𞤤 𞤖𞤢𞤤𞤬𞤢𞥄𞤯𞤮 𞤥𞤵𞤪𞤢𞥄𞤯𞤭 𞤒𞤢𞥄𞤳𞤮𞤪𞤣𞤫 𞤘𞤭𞤲𞤫 𞤲𞤣𞤫𞤲 𞤫 𞤤𞤫𞤴𞤣𞤭 𞤑𞤵𞤦𞤢𞥄 𞤲𞤣𞤭𞤲. 𞤐𞤣𞤫𞥅𞤲 𞤻𞤢𞤤𞤲𞤣𞤫⹁ 𞤮 𞤴𞤢𞤥𞤭𞤪𞤢𞥄 𞤴𞤢𞤤𞤼𞤵𞤺𞤮𞤤 𞤫 𞤤𞤫𞤴𞤣𞤭 𞤲𞤣𞤭𞤲 𞤳𞤭𞤧𞤢𞤲 𞤮 𞤼𞤢𞤱𞤼𞤮𞤴𞤢 𞤺𞤮𞤤𞥆𞤭𞤪𞤣𞤫 𞤳𞤢 𞤮 𞤲𞤢𞤩𞤭𞤪𞤢𞥄 𞤼𞤮𞤲. 𞤌 𞤬𞤮𞤳𞥆𞤭𞤼𞤢𞤲𞤭 𞤖𞤀𞤜𞤀𞥄𞤐⹁ 𞤸𞤢𞤪𞤭 𞤤𞤫 𞤸𞤢𞤴 𞤸𞤵𞥅𞤲𞥋𞤣𞤫 𞤮 𞤸𞤫𞤦𞤤𞤢𞥄𞤤𞤭 𞤬𞤭𞥅 𞤴𞤢𞤸𞤣𞤵 𞤥𞤢𞤳𞥆𞤮 𞤲𞤣𞤵𞤲. 𞤐𞤣𞤫 𞤮 𞤸𞤫𞤱𞤼𞤮𞤴𞤲𞤮𞥅 𞤳𞤢 𞤺𞤮𞤤𞥆𞤭𞤪𞤣𞤫 𞤥𞤢𞤳𞥆𞤮 𞤸𞤫𞤧𞤪𞤫⹁ 𞤳𞤢𞤲𞤳𞤮 𞤤𞤢𞥄𞤼𞤭𞤲𞤮𞥅𞤯𞤮 𞤸𞤮𞥅𞤪𞤫𞥅𞤶𞤮 𞤥𞤢𞤱𞤯𞤮 𞤳𞤮𞤲𞤵 𞤲𞤺𞤵𞤲⹁ 𞤸𞤢𞤱𞤪𞤭 𞤫 𞤷𞤢𞤯𞤫𞥅𞤤𞤫 𞤭𞤥𞥆𞤮𞤪𞤣𞤫 𞤫 𞤺𞤮𞤤𞥆𞤮𞥅𞤩𞤫 𞤩𞤫𞤲 𞤼𞤢𞤱𞤣𞤫 𞤩𞤫𞤲 𞤲𞤮 𞤧𞤭𞤳𞥆𞤵𞤣𞤫 𞤩𞤫 𞤸𞤫𞤩𞤭𞥅 𞤲𞤮 𞤩𞤫 𞤬𞤮𞥅𞤬𞤭𞤪𞤢 𞤶𞤮𞥅𞤲𞤭 𞤧𞤢𞤦𞤵 𞤳𞤮 𞤮 𞤼𞤢𞤱𞤣𞤢𞥄𞤯𞤮 “𞤣𞤮𞥅𞤤𞤲𞤵𞤯𞤮” 𞤫 𞤶𞤵𞤲𞥆𞤭𞤼𞤢𞤤 𞤤𞤢𞥄𞤥𞤭𞥅𞤲𞤺𞤢𞤤 𞤲𞤺𞤢𞤤.

𞤑𞤮 𞤩𞤵𞤪𞤭 𞤯𞤵𞥅𞤯𞤵𞤣𞤫 𞤫 𞤥𞤢𞤩𞥆𞤫 𞤲𞤮 𞤧𞤭𞤳𞥆𞤵𞤲𞤮𞥅 𞤤𞤵𞤪𞥆𞤫 𞤸𞤢𞤳𞥆𞤵𞤲𞥋𞤣𞤫 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤫 𞤤𞤢𞥄𞤥𞤵 𞤲𞤺𞤵𞤲 𞤳𞤮 𞤤𞤵𞤪𞥆𞤫 𞤱𞤢𞥄𞤱𞤢𞥄𞤯𞤫 𞤬𞤫𞤱𞤲𞤭𞤼𞤫𞥅𞤣𞤫 𞤲𞤮 𞤴𞤢𞥄𞤱𞤭𞤪𞤭 𞤧𞤢𞤦𞤵𞤲𞤢 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤬𞤫𞤤𞤢𞥄 𞤁𞤵𞤥𞤦𞤵𞤴𞤢. 𞤑𞤮 𞤀𞤦𞤵𞥅𞤦𞤢𞤳𞤢𞤪 𞤅𞤭𞤣𞤭𞤳𞤭 𞤑𞤢𞤥𞤢𞤪𞤢 (𞤋𞤣𞤭 𞤀𞤥𞤭𞥅𞤲) 𞤶𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤐𞤣𞤫𞥅𞤳𞤢⹁ 𞤮 𞤬𞤫𞤤𞤭. 𞤉 𞤥𞤭𞥅𞤶𞤮 𞤥𞤢𞤳𞥆𞤮⹁ 𞤋𞤣𞤭 𞤀𞤥𞤭𞤲 𞤲𞤮 𞤯𞤮𞤱𞤭𞤪𞤣𞤫 𞤅𞤉𞥅-𞤉𞤐-𞤉𞤈-𞤁𞤉 𞤬𞤢𞥄𞤣𞤫 𞤫 𞤦𞤢𞤯𞤼𞤢𞤲𞤫 𞤶𞤭𞥅𞤤𞤩𞤵𞤯𞤫. 𞤃𞤵𞤪𞤢𞥄𞤣𞤵 𞤲𞤣𞤵𞤲 𞤸𞤮𞤴𞤢𞤲𞤢𞥄𞤤𞤭 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤫 𞤺𞤮𞤤𞥆𞤮𞥅𞤩𞤫 𞤥𞤢𞤳𞥆𞤮 𞤩𞤫𞤲 𞤑𞤵𞤦𞤢𞥄. 𞤒𞤢𞥄𞤳𞤮𞤪𞤣𞤫 𞤲𞤣𞤫𞤲 𞤯𞤢𞤱𞤢𞥄. 𞤑𞤢𞤤𞤢 𞤳𞤮 𞤮𞥅 𞤳𞤵𞥅𞤩𞤢𞤤𞤶𞤮 𞤥𞤫𞥅𞤥𞥆𞤭𞤲𞤭 𞤥𞤢𞤤𞥆𞤢 𞤳𞤢 𞤮 𞤥𞤫𞥅𞤥𞥆𞤭𞤲𞤮𞤪𞤭⹁ 𞤲𞤮 𞤸𞤫𞤱𞤼𞤭𞤲𞤫𞥅𞤣𞤫 𞤫 𞤔𞤢𞥄𞤺𞤮𞤪𞤯𞤮 𞤐𞤣𞤫𞥅𞤲𞤳𞤢 𞤮𞤲. 𞤚𞤢𞤥𞤨𞤫𞤪𞤫 𞤳𞤮 𞤸𞤢𞥄 𞤯𞤮𞥅.

 

𞤔𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤥𞤵𞤪𞤢𞥄𞤯𞤭 𞤶𞤢𞤲𞤢𞤲𞤭 𞤧𞤢𞤤𞤭𞥅 𞤸𞤵𞥅𞤱𞤮𞤲𞥋𞤣𞤭𞤪𞤣𞤫 𞤫 𞤥𞤢𞤳𞥆𞤮. 𞤐𞤵𞤤𞤫 𞤯𞤵𞥅𞤯𞤵𞤯𞤫 𞤬𞤭𞥅 𞤲𞤫𞤱𞤭𞤲𞤺𞤮𞤤 𞤲𞤺𞤵𞥅𞤪𞤫𞥅 𞤺𞤮𞤤𞥆𞤮𞥅𞤩𞤫 𞤥𞤢𞤳𞥆𞤮 𞤩𞤫𞤲 𞤯𞤵𞥅𞤪𞤢𞥄. 𞤇𞤢𞤼𞤢𞥄𞤳𞤭 𞤫 𞤫𞤱𞤲𞤢𞥄𞤤𞤭 𞤧𞤢𞤤𞤢𞥄 𞤶𞤢𞥄𞤦𞤫𞥅𞤣𞤫. 𞤌 𞤫𞤼𞤭𞥅 𞤸𞤢𞥄 𞤮 𞤸𞤵𞤥𞤨𞤮𞤲𞥋𞤣𞤭𞤪𞤭 𞤫 𞤴𞤭𞤥𞤩𞤫 𞤤𞤢𞥄𞤥𞤮𞤪𞤣𞤵 𞤲𞤣𞤵𞤲⹁ 𞤳𞤮 𞤮𞤲𞤼𞤵𞤥𞤢 𞤣𞤮𞥅 𞤬𞤵𞤯𞥆𞤭 𞤲𞤫𞤱𞤢𞥄𞤣𞤫.  𞤑𞤮𞤲𞤮 𞤯𞤵𞤥 𞤩𞤮𞥅𞤴𞤢𞥄𞤤𞤭.

 

𞤁𞤢𞤥𞤫 𞤯𞤫𞤲 𞤬𞤮𞤨 𞤵𞤣𞥆𞤢𞥄⹁ 𞤯𞤵𞤥 𞤱𞤮𞤲𞤢𞤲𞤭 𞤶𞤭𞤩𞤭-𞤤𞤭𞤩𞤭 𞤱𞤮𞤲𞤢𞤲𞤣𞤫 𞤮𞥅 𞤤𞤢𞥄𞤼𞤭𞤲𞤮𞥅𞤯𞤮 𞤯𞤭𞤯𞤢𞤩𞤮 𞤶𞤵𞤲𞥆𞤭𞤼𞤢𞤤 𞤲𞤺𞤢𞤤⹁ 𞤧𞤭𞤳𞥆𞤵𞤯𞤮 𞤼𞤢𞤥𞤨𞤭𞥅 𞤬𞤮𞤼𞤢. 𞤌 𞤬𞤭𞤩𞤭 𞤪𞤵𞤼𞥆𞤢𞤺𞤮𞤤 𞤑𞤮𞤲𞤢𞥄𞤳𞤭𞤪𞤭 𞤱𞤮𞤲𞤣𞤵𞤣𞤫 𞤫 𞤼𞤢𞤥𞤰𞤭𞤲𞤢𞥄𞤪𞤫 𞤴𞤭𞤴𞤣𞤵𞤺𞤮𞤤 𞤫 𞤃𞤢𞤥𞤢𞤣𞤭 𞤁𞤵𞤥𞤦𞤵𞤴𞤢⹁ 𞤢𞤪𞤣𞤭𞥅𞤯𞤮 𞤔𞤵𞤲𞥆𞤭𞤼𞤢𞤤 𞤮𞤲. 𞤘𞤮𞤤𞥆𞤮𞥅𞤩𞤫 𞤩𞤫𞤲 𞤳𞤢 𞤴𞤢𞥄𞤳𞤮𞤪𞤣𞤫 𞤱𞤢𞤯𞤢𞤲𞤢𞥄 𞤳𞤵𞤥𞤨𞤭𞤼𞤢𞤤⹁ 𞤳𞤢𞤣𞤭 𞤶𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤥𞤵𞤪𞤢𞥄𞤯𞤭 𞤶𞤢𞤲𞤢𞤲𞤭 𞤸𞤮𞤤𞥆𞤭𞤼𞤢𞥄. 𞤇𞤢𞤴𞤼𞤭 𞤶𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤐𞤣𞤫𞥅𞤲𞤳𞤢 𞤲𞤢𞤲𞤭𞥅 𞤯𞤵𞤥⹁ 𞤸𞤢𞤪𞤭 𞤮 𞤸𞤫𞤩𞤭𞥅 𞤴𞤮𞤤𞤲𞤣𞤫 𞤲𞤮 𞤮 𞤱𞤢𞤯𞤭𞤪𞤢 𞤶𞤵𞥅𞤯𞤫 𞤫 “𞤲𞤢𞤱𞤤𞤭𞥅𞤶𞤮” 𞤥𞤢𞤳𞥆𞤮 𞤮𞤲.

 

𞤐𞤣𞤫 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤸𞤫𞤦𞤤𞤮𞤼𞤮𞤲𞤮𞥅 𞤬𞤭𞥅 𞤪𞤵𞤼𞥆𞤢𞤺𞤮𞤤 𞤑𞤮𞤲𞤢𞥄𞤳𞤭𞤪𞤭⹁ 𞤋𞤣𞤭 𞤀𞤥𞤭𞥅𞤲 𞤫 𞤬𞤫𞤱𞤶𞤮𞤣𞤭𞥅𞤩𞤫 𞤥𞤵𞥅𞤯𞤵𞤲 𞤩𞤫𞤲 𞤳𞤢 𞤤𞤫𞤥𞤭 𞤸𞤵𞥅𞤩𞤵𞤯𞤭 (𞤪𞤢𞤲𞤧𞤫𞤻𞤫𞤥𞤢𞤲) 𞤸𞤫𞤻𞤭𞥅 𞤱𞤭𞤲𞤣𞤭 𞤳𞤢𞤴𞤣𞤭 𞤬𞤭𞥅 𞤼𞤵𞥅𞤥𞤵𞤺𞤮𞤤 𞤅𞤢𞤣𞤭𞤦𞤢 𞤑𞤵𞤤𞤭𞤦𞤢𞤤𞤭. 𞤫 𞤲𞤣𞤫𞤪 𞤲𞤣𞤭𞥅𞤲 𞤳𞤢𞤴𞤣𞤭 𞤤𞤮𞤤𞥆𞤵𞤲𞥋𞤣𞤭⹁ 𞤩𞤫 𞤼𞤵𞥅𞤥𞤭 𞤮𞥅 𞤸𞤮𞥅𞤪𞤫𞥅𞤶𞤮 𞤥𞤢𞤱𞤯𞤮 𞤳𞤭𞤯𞥆𞤮 𞤳𞤮𞤲𞤵 𞤲𞤺𞤵𞤲 𞤶𞤮𞤳𞥆𞤮𞤲𞥋𞤣𞤭𞤪𞤺𞤮𞤤 𞤫 𞤀𞤤𞤬𞤢𞥄 𞤑𞤮𞤲𞤣𞤫⹁ 𞤤𞤢𞥄𞤥𞤯𞤮 𞤬𞤮𞤤𞥆𞤢𞥄𞤯𞤮 𞤮𞤲⹁ 𞤳𞤢𞤻𞤵𞤲 𞤫 𞤐𞤢𞥄𞤥𞤮𞤪𞤭 𞤚𞤢𞤪𞤢𞤱𞤮𞤪𞤫⹁ 𞤴𞤢𞥄𞤳𞤮𞤪𞤢𞥄𞤯𞤮 𞤘𞤭𞤲𞤫 𞤮𞤲 𞤃𞤢𞤪𞤮𞤳⹁ 𞤤𞤢𞥄𞤼𞤭𞤲𞤮𞥅𞤯𞤮 𞤳𞤢𞤻𞤵𞤲 𞤳𞤢𞤣𞤭 𞤸𞤮𞥅𞤪𞤫𞥅𞤶𞤮 𞤥𞤢𞤱𞤯𞤮 𞤳𞤮𞤲𞤵⹁ 𞤼𞤢𞤱𞤼𞤭 𞤫 𞤴𞤮𞤺𞤢 𞤫 𞤧𞤮𞤬𞤼𞤵𞤩𞤫 𞤪𞤫𞤲𞤣𞤮 𞤦𞤫𞤯𞥆𞤵𞤲𞥋𞤺𞤮. 𞤉 𞤱𞤭𞤴𞤭 𞤥𞤢𞤩𞥆𞤫 𞤲𞤣𞤫𞤪 𞤲𞤣𞤭𞤲 𞤳𞤢𞤴𞤣𞤭⹁ 𞤅𞤢𞤣𞤭𞤦𞤢 𞤑𞤵𞤤𞤭𞤦𞤢𞤤𞤭 𞤲𞤮 𞤱𞤮𞤲𞤭𞤪𞤭 “𞤬𞤫𞥅𞤱𞤲𞤵𞤼𞤵𞤺𞤮𞤤” 𞤤𞤵𞤥𞤦𞤭𞤲𞤢𞤤 𞤲𞤺𞤢𞤤 𞤱𞤮𞤲𞤣𞤵𞤣𞤫 𞤫 𞤬𞤢𞥄𞤥𞤮𞤲𞥋𞤣𞤭𞤪𞤢𞤤 𞤫 𞤣𞤫𞤲𞤼𞤢𞤤 𞤧𞤮𞥅𞤪𞤭𞥅𞤩𞤫 𞤱𞤮𞤲𞤢𞤲𞤩𞤫 𞤥𞤮⹁ 𞤳𞤢𞤻𞤵𞤲 𞤫 𞤴𞤮𞤺𞤢 𞤫 𞤩𞤫𞥅 𞤶𞤫𞤴𞤢𞥄𞤩𞤫 𞤳𞤢 𞤬𞤫𞤣𞥆𞤫 𞤄𞤀𞤚𞤀 𞤱𞤮𞤲𞤢𞤲𞤩𞤫 𞤀𞤤𞤬𞤢𞥄 𞤑𞤮𞤲𞤣𞤫⹁ 𞤸𞤮𞥅𞤪𞤫𞥅𞤶𞤮 𞤬𞤮𞤤𞥆𞤢𞥄𞤯𞤮 𞤮𞤲.

 

𞤈𞤵𞤼𞥆𞤢𞤤 𞤅𞤢𞤳𞥆𞤭𞤼𞤮𞤪𞤢𞤤 𞤳𞤢 𞤤𞤫𞤴𞤣𞤭

𞤉 𞤲𞤢𞥄𞤧𞤢𞥄𞤲𞤣𞤫⹁ 𞤻𞤢𞤤𞤲𞤣𞤫 𞥒𞥓 𞤅𞤫𞥅𞤯𞤼𞤮 𞥒𞥐𞥒𞥔⹁ 𞤑𞤵𞥅𞤩𞤢𞤤𞤶𞤮 𞤅𞤢𞤣𞤭𞤦𞤢 𞤑𞤵𞤤𞤭𞤦𞤢𞤤𞤭 𞤶𞤭𞤨𞥆𞤭𞥅 𞤳𞤢 𞤼𞤫𞤤𞥆𞤮𞤪𞤣𞤫 𞤤𞤢𞥄𞤱𞤯𞤫 𞤑𞤮𞤲𞤢𞥄𞤳𞤭𞤪𞤭⹁ 𞤮 𞤬𞤫𞥅𞤱𞤲𞤭𞤪𞤭 𞤳𞤢 𞤺𞤢𞤤𞥆𞤫 𞤥𞤢𞤳𞥆𞤮 𞤑𞤵𞤲𞤼𞤭𞤴𞤢𞥄. 𞤌 𞤺𞤫𞤪𞤭 𞤮 𞤸𞤮𞤤𞥆𞤭𞤼𞤭 𞤔𞤢𞥄𞤺𞤮𞤪𞤯𞤮 𞤃𞤮𞤪𞤭𞤧𞤢𞤲𞤣𞤢 𞤑𞤵𞤴𞤢𞥄𞤼𞤫 𞤢𞤪𞤣𞤵 𞤥𞤢𞤳𞥆𞤮 𞤑𞤮𞤲𞤢𞥄𞤳𞤭𞤪𞤭. 𞤇𞤢𞥄𞤱𞤮 𞤩𞤫 𞤴𞤫𞤱𞤼𞤵𞤣𞤫 𞤧𞤫𞥅𞤯𞤢⹁ 𞤮𞤲𞤯𞤮𞤲 𞤸𞤮𞤤𞥆𞤭𞤼𞤭 𞤥𞤮 𞤬𞤭𞥅 𞤶𞤵𞥅𞤪𞤢𞤤 𞤤𞤢𞥄𞤥𞤵𞤱𞤢𞤤 𞤄𞤢𞤧𞤭𞥅𞤪𞤵 𞤐𞤶𞤢𞥄𞤴 𞤲𞤺𞤢𞤤⹁ 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤅𞤫𞤲𞤫𞤺𞤢𞤤 𞤲𞤣𞤭𞤲⹁ 𞤧𞤢𞥄𞤼𞤭𞥅𞤲𞤺𞤢𞤤 𞤦𞤭𞤥𞤦𞤭 𞤲𞤣𞤫𞤲 𞤻𞤢𞤤𞤲𞤣𞤫 𞤫 𞤃𞤢𞤱𞤲𞤣𞤫 𞥒𞥔 𞤅𞤫𞥅𞤯𞤼𞤮. 𞤚𞤭𞤨𞥆𞤵𞤣𞤫 𞤫 𞤯𞤵𞤥⹁ 𞤮 𞤬𞤮𞤣𞤭 𞤼𞤮𞥅𞤤𞤲𞤵𞤺𞤮𞤤 𞤥𞤮 𞤷𞤢𞤺𞥆𞤢𞤤 𞤲𞤺𞤢𞥄𞤤 𞤶𞤵𞥅𞤪𞤢𞤤 𞤤𞤢𞤱𞤯𞤢𞤱𞤢𞤤.

 

𞤉 𞤦𞤢𞥄𞤤𞤯𞤫 𞤸𞤭𞤳𞥆𞤭𞥅𞤯𞤫 𞤯𞤫𞤲⹁ 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤶𞤢𞤩𞥆𞤢𞥄 𞤳𞤢 𞤶𞤢𞥄𞤺𞤮𞤪𞤣𞤫 𞤥𞤵𞤪𞤢𞥄𞤯𞤫 𞤶𞤢𞤲𞤢𞤲𞤭 𞤱𞤮𞤲𞤣𞤫 𞤑𞤮𞥅𞤤𞤮𞥅𞤥𞤢. 𞤇𞤢𞥄𞤱𞤮 𞤳𞤮𞤬𞤤𞤫 𞤯𞤫𞤲⹁ 𞤮 𞤱𞤫𞥅𞤩𞤭𞤼𞤢𞤲𞤭 𞤶𞤢𞥄𞤺𞤮𞤪𞤯𞤮 𞤮𞤲 𞤷𞤢𞤯𞤫𞥅𞤤𞤫 𞤺𞤮𞤤𞥆𞤮𞥅𞤩𞤫 𞤥𞤢𞤳𞥆𞤮 𞤩𞤫𞤲⹁ 𞤮 𞤩𞤢𞤲𞤺𞤭𞤲𞤭 𞤼𞤭𞤳𞥆𞤫𞤪𞤫 𞤬𞤭𞥅 𞤲𞤵𞤤𞤫 𞤫 𞤲𞤮𞤣𞥆𞤢𞥄𞤤𞤭 𞤯𞤭 𞤮 𞤲𞤫𞤤𞤣𞤵𞤲𞤮𞥅 𞤶𞤢𞥄𞤺𞤮𞤪𞤯𞤮 𞤮𞤲 𞤳𞤮𞤲𞤮 𞤯𞤭 𞤶𞤢𞥄𞤦𞤢𞤲𞤮𞥅𞤳𞤢. 𞤚𞤫𞤽𞤼𞤭𞤲𞤭𞥅 𞤲𞤣𞤫 𞤼𞤢𞤱𞤵𞤲𞤮𞥅 𞤫 𞤥𞤭𞥅𞤶𞤮 𞤥𞤢𞤳𞥆𞤮⹁ 𞤺𞤭𞤦𞤭 𞤳𞤢 𞤬𞤵𞤯𞥆𞤮𞥅𞤣𞤫 𞤅𞤉𞥅-𞤉𞤐-𞤉𞤈-𞤁𞤉⹁ 𞤳𞤮 𞤳𞤢𞤲𞤳𞤮 𞤩𞤢𞤣𞤲𞤭𞤼𞤭 𞤶𞤢𞥄𞤺𞤮𞤪𞤯𞤮 𞤮𞤲 𞤱𞤮𞤲𞤭 𞤳𞤢𞤣𞤭 𞤧𞤢𞤦𞤵 𞤮𞤲 𞤼𞤮𞤯𞥆𞤫𞥅𞤣𞤫. 𞤑𞤮 𞤮 𞤱𞤢𞤯𞤭𞤪𞤢𞤲𞤭 𞤯𞤵𞤥⹁  𞤳𞤮 𞤼𞤫𞤣𞥆𞤭𞤲𞤺𞤮𞤤 𞤧𞤫𞤸𞤭𞤤𞤢𞥄𞤳𞤵 𞤲𞤺𞤵 𞤩𞤫 𞤬𞤭𞤩𞤵𞤣𞤵𞤲𞤮𞥅 𞤺𞤭𞤦𞤭 𞤬𞤫𞤱𞤲𞤣𞤵 𞤣𞤵𞥅𞤩𞤭  𞤶𞤢𞤲𞤺𞤣𞤫 (𞤫𞤤𞤼𞤮) 𞤥𞤢𞤩𞥆𞤫 𞤳𞤢 𞤤𞤫𞤴𞤣𞤭 𞤁𞤫𞤲𞤼𞤢𞤤 𞤂𞤢𞤪𞤫 𞤀𞤥𞤫𞤪𞤭𞤳. 𞤉 𞤲𞤣𞤫𞤪 𞤶𞤫𞤱𞤼𞤫 𞤥𞤢𞤩𞥆𞤫 𞤯𞤫𞤲⹁ 𞤔𞤢𞥄𞤺𞤮 𞤃𞤮𞤪𞤧𞤢𞤲𞤣𞤢 𞤑𞤵𞤴𞤢𞥄𞤼𞤫⹁ 𞤤𞤢𞤲𞤣𞤭𞥅 𞤥𞤮 𞤧𞤭 𞤮 𞤢𞤲𞤣𞤭𞤲𞤭𞥅 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲 𞤢𞤪𞤣𞤵 𞤥𞤢𞤳𞥆𞤮 𞤲𞤣𞤵𞤲. 𞤌 𞤶𞤢𞥄𞤦𞤭𞥅 “𞤌𞥅 𞤮𞥅”⹁ 𞤳𞤮𞤲𞤮 𞤮 𞤱𞤭𞤴𞤭 𞤮𞤥𞤮 𞤴𞤫𞤤𞤭𞥅 𞤴𞤭𞤴𞤣𞤵𞤺𞤮𞤤 𞤫 𞤥𞤢𞤳𞥆𞤮 𞤧𞤢𞤦𞤵𞤲𞤢 𞤶𞤮𞥅𞤲𞤭 𞤳𞤢𞤴⹁ 𞤳𞤮 𞤳𞤢𞤲𞤳𞤮 𞤼𞤢𞤲 𞤶𞤮𞤺𞤭𞥅 𞤬𞤫𞤸𞤪𞤫 𞤬𞤭𞥅 𞤧𞤢𞤯𞤼𞤫𞥅𞤲𞤣𞤫 𞤥𞤢𞤳𞥆𞤮 𞤲𞤣𞤭𞤲. 𞤔𞤢𞥄𞤺𞤮𞤪𞤯𞤮 𞤮𞤲 𞤬𞤮𞤣𞤭 𞤥𞤮 𞤸𞤵𞤤𞥆𞤭𞤼𞤵𞤺𞤮𞤤 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤮𞤲.

 

𞤑𞤭𞥅𞤳𞤭𞥅𞤯𞤫⹁ 𞤶𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤥𞤵𞤪𞤢𞥄𞤯𞤭 𞤶𞤢𞤲𞤢𞤲𞤭 𞤲𞤮𞤣𞥆𞤭𞤼𞤢𞥄 𞤳𞤢 𞤤𞤢𞥄𞤥𞤮𞤪𞤣𞤵 𞤤𞤫𞤴𞤣𞤭. 𞤌 𞤤𞤢𞤲𞤣𞤢𞥄 𞤳𞤮 𞤴𞤮𞤱𞤭𞤼𞤭𞥅 𞤫 𞤢𞤪𞤣𞤵 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤳𞤢 𞤤𞤢𞥄𞤥𞤮𞤪𞤣𞤫 𞤑𞤮𞤲𞤢𞥄𞤳𞤭𞤪𞤭⹁ 𞤮 𞤶𞤢𞥄𞤦𞤭𞥅 𞤮 𞤢𞤲𞤣𞤢𞥄. 𞤒𞤢𞤥𞤭𞤪𞤢𞥄 𞤴𞤮 𞤑𞤵𞥅𞤩𞤢𞤤𞤶𞤮 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤲𞤮𞤣𞥆𞤫. 𞤌𞤲 𞤲𞤮𞤣𞥆𞤢𞥄⹁ 𞤮 𞤯𞤮𞤬𞤼𞤭𞥅⹁ 𞤸𞤭𞤼𞤮 𞤫𞤱𞤲𞤮𞤪𞤺𞤢𞤤 𞤲𞤺𞤢𞤤 𞤼𞤮𞥅𞤱𞤲𞤢𞥄. 𞤌𞥅 𞤖𞤮𞥅𞤪𞤫𞥅𞤶𞤮 𞤥𞤢𞤱𞤯𞤮 𞤳𞤭𞤯𞥆𞤮 𞤳𞤮𞤲𞤵 𞤲𞤺𞤵𞤲 𞤱𞤮𞤲𞤭 𞤫 𞤲𞤺𞤮𞤴𞤢 𞤧𞤫𞤲𞤺𞤮⹁ 𞤮𞤥𞤮 𞤽𞤢𞤤𞤯𞤭𞤪𞤭 𞤼𞤭𞤳𞥆𞤫𞤪𞤫 𞤶𞤢𞥄𞤺𞤮𞤪𞤯𞤮 𞤮𞤲 𞤧𞤢𞤦𞤵 𞤮𞤲 𞤲𞤮 𞤫𞤼𞤢𞥄𞤣𞤫 𞤬𞤢𞤸𞤥𞤭𞤲𞤳𞤭𞤲𞤮𞥅 𞤱𞤢 𞤧𞤭 𞤳𞤮 𞤶𞤮𞥅𞤲𞤭 𞤮 𞤸𞤵𞤥𞤨𞤭𞤼𞤢𞥄 𞤬𞤭𞥅 𞤢𞤪𞤣𞤵 𞤥𞤢𞤳𞥆𞤵 𞤲𞤣𞤵𞤲. 𞤖𞤮𞥅𞤪𞤫𞥅𞤶𞤮 𞤔𞤵𞤲𞥆𞤭𞤼𞤢𞤤 𞤲𞤺𞤢𞤤 𞤤𞤢𞤲𞤣𞤭𞥅 𞤴𞤫𞤱𞤼𞤵𞤣𞤵𞤺𞤮𞤤 𞤫 𞤥𞤢𞤳𞥆𞤵. 𞤖𞤢𞤴 𞤩𞤫 𞤸𞤭𞤱𞤪𞤮𞤲𞥋𞤣𞤭𞤪𞤢𞥄𞤤𞤭⹁ 𞤮 𞤤𞤢𞤲𞤣𞤭𞥅 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤸𞤮𞤤 𞤳𞤮 𞤱𞤮𞤲𞤭 𞤧𞤢𞤦𞤵 𞤢𞤪𞤣𞤵 𞤥𞤢𞤳𞥆𞤮 𞤫 𞤲𞤣𞤫𞤪 𞤤𞤫𞤴𞤣𞤭 𞤺𞤫𞤲𞤣𞤭𞤴𞤢𞤲𞤳𞤮𞥅𞤪𞤭 𞤮 𞤢𞤤𞤢𞥄 𞤣𞤵𞤽𞤢𞤴𞤫𞥅. 𞤌𞥅 𞤳𞤢𞤣𞤭 𞤶𞤢𞥄𞤦𞤭𞥅 𞤱𞤮𞤲𞤣𞤫𞤥𞤢 𞤮 𞤼𞤮𞤽𞤢𞤲𞤢𞥄𞤳𞤢 𞤢𞤪𞤼𞤵𞤺𞤮𞤤 𞤘𞤭𞤲𞤫⹁ 𞤳𞤢𞤣𞤭 𞤸𞤢𞤪𞤭 𞤮𞤥𞤮 𞤴𞤫𞤤𞤭𞥅 𞤴𞤭𞤴𞤣𞤵𞤺𞤮𞤤 𞤫 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲 𞤬𞤭𞥅 𞤴𞤫𞥅𞤩𞤭𞤼𞤢𞤲𞤺𞤮𞤤 𞤥𞤮 𞤷𞤢𞤯𞤫𞥅𞤤𞤫 𞤬𞤫𞤱𞤼𞤵𞤯𞤫 𞤥𞤮. 𞤚𞤭𞤳𞥆𞤫𞤪𞤫 𞤩𞤢𞤤𞤫𞥅𞤪𞤫 𞤬𞤭𞤯𞤭 𞤃𞤢𞤥𞤢𞤣𞤭 𞤁𞤵𞤥𞤦𞤵𞤴𞤢⹁ 𞤮 𞤦𞤵𞤺𞤭𞥅 𞤫𞤱𞤲𞤮𞤪𞤺𞤢𞤤 𞤲𞤺𞤢𞤤 𞤳𞤢 𞤸𞤮𞥅𞤪𞤫 𞤼𞤢𞥄𞤦𞤢𞤤. 𞤃𞤮𞤪𞤭𞤧𞤢𞤲𞤣𞤢 𞤑𞤵𞤴𞤢𞥄𞤼𞤫 𞤰𞤫𞤼𞥆𞤭𞤼𞤭 𞤫𞤱𞤲𞤮𞤪𞤺𞤢𞤤 𞤲𞤺𞤢𞤤 𞤶𞤮𞤳𞥆𞤭𞤲𞤼𞤭𞤲𞤭 𞤳𞤢𞤻𞤵𞤲 𞤳𞤢𞤣𞤭 “𞤽𞤭𞤻𞤮𞥅𞤶𞤫” 𞤬𞤢𞥄𞤣𞤫 𞤫 𞤅𞤢𞤣𞤭𞤦𞤢 𞤑𞤵𞤤𞤭𞤦𞤢𞤤𞤭. 𞤌𞤲 𞤳𞤢𞤣𞤭 𞤼𞤭𞤳𞥆𞤭𞤪𞤢𞤲𞤭 𞤥𞤮 𞤧𞤢𞤦𞤵 𞤶𞤭𞤳𞥆𞤵 𞤲𞤺𞤵 𞤮 𞤱𞤮𞤲𞤭 𞤫 𞤸𞤮𞤤𞥆𞤵𞤣𞤫. 𞤍𞤵𞤥 𞤱𞤮𞤲𞤭 𞤴𞤫𞤣𞥆𞤮𞤼𞤭𞤪𞤢𞤤 𞤥𞤵𞥅𞤥𞤩𞤫 𞤸𞤢𞤳𞥆𞤵𞤲𞤣𞤫 𞤥𞤢𞤩𞥆𞤫 𞤯𞤭𞤯𞤮.

 

𞤃𞤢𞥄𞤴𞤣𞤫 𞤅𞤢𞤣𞤭𞤦𞤢 𞤑𞤵𞤤𞤭𞤦𞤢𞤤𞤭

𞤉 𞤃𞤢𞤱𞤦𞤢𞥄𞤪𞤫 𞤻𞤢𞤤𞤲𞤣𞤫 𞥔 𞤑𞤮𞤪𞤧𞤮 𞥒𞥐𞥒𞥔⹁ 𞤸𞤢𞤳𞥆𞤵𞤲𞥋𞤣𞤫 𞤶𞤢𞤥𞤤𞤫 𞥑𞥘 𞤫 𞥒𞥑⹁ 𞤴𞤭𞤥𞤩𞤫 𞤑𞤮𞤲𞤵 𞤁𞤮𞥅𞤤𞤫 𞤣𞤭𞥅𞤺𞤭𞤥𞥆𞤢𞥄𞤶𞤫 𞤯𞤫𞤲 𞤴𞤢𞤲𞤭 𞤫 𞤺𞤢𞤤𞥆𞤫 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤯𞤫𞤲. 𞤇𞤢𞥄𞤱𞤮 𞤩𞤫 𞤬𞤫𞤤𞥆𞤵𞤣𞤫 𞤤𞤮𞥅𞤱𞤢𞤲𞤯𞤫 𞤯𞤵𞥅𞤯𞤵𞤯𞤫 𞤫 𞤺𞤢𞤤𞥆𞤫 𞤯𞤫𞤲⹁ 𞤩𞤫 𞤧𞤵𞤨𞥆𞤭𞤼𞤭𞥅 𞤳𞤢 𞤼𞤢𞤲𞤣𞤫𞥅𞤪𞤫⹁ 𞤩𞤫 𞤲𞤢𞤲𞤺𞤭 𞤢𞤴𞤲𞤵𞤩𞤫 𞤲𞤮𞤳𞥆𞤵𞥅𞤪𞤫 𞤲𞤣𞤫𞤲⹁ 𞤩𞤫 𞤶𞤭𞥅𞤩𞤭𞤼𞤭 𞤳𞤢𞤣𞤭 𞤲𞤣𞤫𞤪 𞤧𞤵𞥅𞤣𞤵 𞤲𞤣𞤵𞤲 𞤬𞤮𞤨.

 

𞤇𞤢𞥄𞤱𞤮 𞤯𞤵𞤥⹁ 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤬𞤭𞤩𞤭 𞤴𞤢𞤸𞤵𞤺𞤮𞤤 𞤳𞤢 𞤤𞤢𞥄𞤥𞤮𞤪𞤣𞤵 𞤱𞤮𞤲𞤣𞤵𞤣𞤫 𞤫 𞤼𞤢𞤥𞤰𞤭𞤲𞤢𞥄𞤪𞤫 𞤴𞤭𞤴𞤣𞤵𞤺𞤮𞤤 𞤫 𞤸𞤮𞥅𞤪𞤫𞥅𞤶𞤮 𞤶𞤵𞤲𞥆𞤭𞤼𞤢𞤤 𞤲𞤺𞤢𞤤. 𞤌 𞤯𞤮𞤱𞤮𞤪𞤭 𞤺𞤮𞥅𞤼𞤮 𞤫 𞤢𞤴𞤲𞤮𞥅𞤩𞤫 𞤥𞤢𞤳𞥆𞤮 𞤩𞤫𞤲⹁ 𞤩𞤫 𞤱𞤢𞤯𞥆𞤮𞤣𞤭 𞤨𞤵𞤼𞥆𞤢𞥄𞤪𞤵 (𞤥𞤮𞤼𞤢𞥄𞤪𞤵)⹁ 𞤩𞤫 𞤸𞤢𞤥𞥆𞤢𞤲𞤭 𞤑𞤢𞤤𞤵𞤥. 𞤑𞤮𞤲𞤮 𞤮 𞤲𞤮𞤣𞥆𞤭 𞤄𞤢𞤤𞤢 𞤅𞤢𞤥𞤵𞤪𞤢𞥄⹁ 𞤸𞤮𞥅𞤪𞤫𞥅𞤶𞤮 𞤼𞤮𞥅𞤱𞤵𞤯𞤮 𞤔𞤮𞤺𞤮𞤥𞤢𞤤 𞤲𞤺𞤢𞤤⹁ 𞤮 𞤢𞤲𞤣𞤭𞤲𞤭 𞤮𞤲 𞤱𞤮𞤲𞤣𞤫𞤥𞤢 𞤮𞤥𞤮 𞤴𞤢𞤸𞤵𞤣𞤫 𞤳𞤢 𞤤𞤢𞥄𞤥𞤮𞤪𞤣𞤵 𞤬𞤭𞥅 𞤴𞤭𞤴𞤣𞤵𞤺𞤮𞤤 𞤫 𞤃𞤢𞤥𞤢𞤣𞤭 𞤁𞤵𞤥𞤦𞤵𞤴𞤢. 𞤌𞤲 𞤳𞤢𞤣𞤭 𞤸𞤮𞤤𞥆𞤭𞤼𞤢𞥄⹁ 𞤲𞤣𞤫𞤲⹁ 𞤨𞤫𞤸𞤫 𞤰𞤫𞤼𞥆𞤢𞥄 𞤬𞤭𞥅 𞤲𞤢𞤲𞤺𞤵𞤺𞤮𞤤 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤳𞤢 𞤲𞤢𞥄𞤼𞤭𞤪𞤺𞤢𞤤⹁ 𞤳𞤢𞤲𞤳𞤮 𞤫 𞤯𞤮𞤱𞤼𞤵𞤯𞤮 𞤥𞤮 𞤮𞤲.

 

𞤃𞤵𞤲𞤣𞤮𞤤 (𞤤𞤢𞥄𞤬𞤢𞥄𞤪𞤵) 𞤳𞤢 𞤸𞤮𞥅𞤪𞤫⹁ 𞤩𞤫 𞤶𞤭𞤲𞤣𞤭𞤲𞤢𞥄 𞤼𞤢𞤸𞤮 𞤲𞤣𞤫𞤪 𞤑𞤢𞤤𞤵𞤥 𞤧𞤭 𞤩𞤫 𞤲𞤢𞤩𞤢𞥄 𞤫 𞤤𞤫𞤴 𞤻𞤭𞤩𞤪𞤫 𞤧𞤵𞥅𞤣𞤵 𞤤𞤢𞥄𞤥𞤮𞤪𞤣𞤵 𞤲𞤣𞤵𞤲. 𞤔𞤢𞤲𞤺𞤮 𞤥𞤵𞥅𞤥⹁ 𞤩𞤫 𞤰𞤫𞤼𞥆𞤭𞤪𞤢𞥄 𞤧𞤮𞥅𞤪𞤭⹁ 𞤩𞤫 𞤲𞤢𞤩𞤢𞥄 𞤳𞤢 𞤀𞤪𞤣𞤮𞤪𞤣𞤫 𞤚𞤮𞥅𞤱𞤵𞤲𞥋𞤣𞤫 𞤔𞤮𞤺𞤮𞤥𞤢𞤤 𞤘𞤫𞤲𞤣𞤭𞥅𞤱𞤢𞤤 𞤬𞤭𞥅 𞤴𞤮 𞤩𞤫 𞤸𞤫𞤯𞤫. 𞤇𞤢𞥄𞤱𞤮 𞤻𞤢𞥄𞤱𞤮𞥅𞤪𞤫 𞤴𞤢𞥄𞤱𞤵𞤲𞥋𞤣𞤫⹁ 𞤫 𞤬𞤢𞤱𞤫𞥅𞤣𞤫 𞤢𞤷𞥆𞤵𞤼𞤵𞤺𞤮𞤤 𞤺𞤮𞤤𞥆𞤫 𞤪𞤫𞤬𞤼𞤭 𞤫 𞤣𞤮𞤺𞤵𞤺𞤮𞤤 𞤳𞤢 𞤶𞤢𞤲𞤢𞤲𞤭𞤪𞤭⹁ 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤶𞤵𞤳𞥆𞤭𞤲𞤭𞤪𞤢𞥄 𞤧𞤮𞤳𞤫𞥅𞤣𞤫 𞤣𞤵𞥅𞤩𞤭 𞤶𞤮𞤱𞤭 𞤼𞤵𞥅𞤥𞤫 𞤶𞤢𞤲𞤬𞤢𞤺𞤮𞤤 𞤫 𞤶𞤮𞤺𞤢𞤺𞤮𞤤 𞤶𞤮𞤺𞤫 𞤳𞤮 𞤢𞤤𞤣𞤢𞥄 𞤫 𞤧𞤢𞤪𞤭𞤴𞤢. 𞤐𞤣𞤫𞥅𞤲 𞤻𞤢𞤤𞤲𞤣𞤫⹁ 𞤮 𞤪𞤭𞥅𞤱𞤢𞥄 𞤫 𞤤𞤭𞤥𞤼𞤮𞤤 𞤳𞤮𞤲𞤵 𞤲𞤺𞤵𞤲 𞤲𞤺𞤢𞤥 “𞤴𞤭𞤪𞤦𞤵𞤺𞤮𞤤 𞤳𞤭𞤧𞤢𞤤 𞤂𞤢𞤪𞤢𞤤⹁ 𞤦𞤮𞤲𞥆𞤵𞤺𞤮𞤤 𞤶𞤭𞤳𞥆𞤵⹁ 𞤶𞤢𞤲𞤬𞤢 𞤫 𞤱𞤮𞤨𞥆𞤵𞤺𞤮𞤤 𞤺𞤮𞤤𞥆𞤫”⹁ 𞤧𞤢𞤦𞤵𞤲𞤯𞤫 𞤤𞤫 𞤤𞤵𞤲𞤣𞤭𞥅𞤯𞤫 𞤯𞤫𞥅 𞤨𞤢𞤱𞤫 𞤯𞤫 𞤻𞤢𞥄𞤱𞤮𞥅𞤱𞤮 𞤮𞤲 𞤢𞤪𞤣𞤭𞤲𞥆𞤮𞥅 𞤻𞤢𞤤𞤲𞤣𞤫 𞤶𞤵𞤳𞥆𞤭𞤲𞤢𞤤 𞤥𞤢𞤳𞥆𞤮 𞤲𞤺𞤢𞤤.

 

𞤐𞤮 𞤼𞤭𞤶𞥆𞤮𞤪𞤢𞤲𞤮𞥅 𞤲𞤮𞤲⹁ 𞤑𞤵𞥅𞤩𞤢𞤤𞤶𞤮 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤧𞤫𞥅𞤲𞤣𞤭𞤲𞤣𞤭𞤪𞤢𞥄 𞤫 𞤧𞤮𞥅𞤪𞤭𞥅𞤩𞤫 𞤲𞤶𞤫𞥅𞤯𞤭𞤯𞤮𞥅𞤩𞤫 𞤩𞤫𞤲⹁ 𞤶𞤫𞥅𞤺𞤮𞥅𞤩𞤫 𞤲𞤢𞤲𞤺𞤢𞤲𞤮𞥅𞤩𞤫 𞤩𞤫𞤲 𞤳𞤢 𞤥𞤢𞤳𞥆𞤮⹁ 𞤼𞤢𞤱𞤼𞤭 𞤯𞤮𞤱𞤼𞤵𞤲𞤮𞥅𞤯𞤮 𞤥𞤮 𞤮𞤲. 𞤑𞤢𞤲𞤳𞤮 𞤮 𞤥𞤵𞤲𞤣𞤢𞥄 𞤮 𞤲𞤢𞤩𞤢𞥄 𞤳𞤢 𞤸𞤵𞤩𞤫𞥅𞤪𞤫 𞤤𞤢𞥄𞤥𞤮𞤪𞤣𞤫 𞤤𞤫𞤴𞤣𞤭⹁ 𞤸𞤫𞤣𞥆𞤭𞥅𞤩𞤫 𞤩𞤫𞤲 𞤳𞤢𞤣𞤭 𞤥𞤵𞤲𞤣𞤢𞥄 𞤲𞤢𞤩𞤭𞤪𞤢𞥄 𞤳𞤢 𞤴𞤭𞥅𞤤𞤭𞤪𞤣𞤫 𞤳𞤮𞤲𞤵 𞤣𞤮𞥅𞤤𞤫 𞤣𞤭𞤺𞤭𞤥𞥆𞤢𞥄𞤶𞤫 𞤱𞤮𞤲𞤵𞤲’𞤣𞤫 𞤳𞤢 𞤐𞤦𞤢𞤼𞤭𞤪𞤣𞤵 𞤈𞤫𞤲𞤣𞤮. 𞤇𞤢𞥄𞤱𞤮 𞤮 𞤤𞤫𞤼𞥆𞤫𞥅𞤣𞤫 𞤫 𞤲𞤣𞤫𞤪 𞤦𞤢𞥄𞤤𞤯𞤫 𞤧𞤫𞥅𞤯𞤢𞥄𞤶𞤫 𞤳𞤢 𞤤𞤢𞥄𞤥𞤮𞤪𞤣𞤵 𞤤𞤫𞤴𞤣𞤭 𞤬𞤭𞥅 𞤸𞤫𞤩𞤭𞤪𞤺𞤮𞤤 𞤥𞤮 𞤹𞤭𞤪𞥆𞤭 𞤲𞤮 𞤩𞤫 𞤶𞤮𞤳𞥆𞤭𞤪𞤢 𞤪𞤭𞥅𞤱𞤵𞤺𞤮𞤤 𞤴𞤭𞤥𞤩𞤫 𞤩𞤫𞤲 𞤳𞤢 𞤳𞤮𞤲𞤵⹁ 𞤫 𞤢𞤣𞤮 𞤮 𞤥𞤢𞥄𞤴𞤵𞤣𞤫⹁  𞤮 𞤲𞤢𞤩𞤢𞥄 𞤫 𞤧𞤵𞥅𞤣𞤵 𞤳𞤢 𞤀𞤤𞤬𞤢 𞤑𞤮𞤲𞤣𞤫 𞤧𞤮𞤳𞤢𞤲𞤮𞥅 𞤯𞤮𞤲 𞤩𞤢𞥄𞤱𞤮 𞤲𞤢𞤲𞤺𞤫𞥅𞤣𞤫 𞤥𞤢𞤳𞥆𞤮. 𞤑𞤮 𞤫 𞤲𞤣𞤫𞤪 𞤲𞤣𞤵𞥅 𞤧𞤵𞥅𞤣𞤵 𞤮 𞤧𞤢𞤳𞥆𞤭𞤼𞤮𞤪𞤭 𞤬𞤫𞤰𞥆𞤭𞤲𞤺𞤮𞤤 𞤦𞤢𞥄𞤤𞤯𞤫 𞤥𞤢𞤳𞥆𞤮 𞤸𞤫𞤣𞥆𞤭𞥅𞤯𞤫 𞤯𞤫𞤲 𞤱𞤮𞤲𞤣𞤵𞤣𞤫 𞤫 𞤱𞤢𞤳𞥆𞤭𞤤𞤢𞥄𞤪𞤫 𞤸𞤢𞥄𞤱𞤲𞤭𞥅𞤲𞤣𞤫⹁ 𞤮𞤥𞤮 𞤥𞤭𞤴𞤢 𞤸𞤢𞥄 𞤮 𞤥𞤢𞥄𞤴𞤭: “𞤒𞤮 𞤀𞤤𞤤𞤢 𞤻𞤢𞥄𞤱𞤵 𞤸𞤢𞤳𞥆𞤵𞤲𞥋𞤣𞤫 𞤥𞤫𞥅𞤯𞤫𞤲”

 

𞤃𞤢𞤴𞤯𞤮 𞤐𞤦𞤭𞥅𞤣𞤭𞤲𞤯𞤮

𞤇𞤢𞥄𞤱𞤮 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤥𞤢𞥄𞤴𞤵𞤣𞤫 𞤳𞤢 𞤶𞤫𞥅𞤥𞥆𞤢𞥄𞤪𞤫 𞤖𞤮𞥅𞤪𞤦𞤭𞤪𞥆𞤫 𞤲𞤮 𞤱𞤫𞥅𞤼𞤵𞤣𞤫 𞤈𞤫𞤬𞤦𞤭𞤪𞥆𞤫⹁ 𞤻𞤤𞤢𞤲𞤣𞤫 𞥒𞥓 𞤑𞤮𞤪𞤧𞤮 𞥒𞥐𞥒𞥔⹁ 𞤃𞤢𞤥𞤢𞤣𞤭 𞤁𞤵𞤥𞤦𞤵𞤴𞤢 𞤸𞤵𞤥𞤨𞤭𞤼𞤢𞥄⹁ 𞤮 𞤶𞤭𞤩𞤭𞥅⹁ 𞤸𞤮𞥅𞤼𞤭 𞤮 𞤴𞤢𞤥𞤭𞤪𞤭 𞤴𞤮 𞤮 𞤵𞤦𞥆𞤫 𞤳𞤭𞤧𞤢𞤲. 𞤑𞤮𞤲𞤮 𞤮 𞤸𞤵𞤥𞤨𞤭𞤼𞤭 𞤀𞤦𞤵𞥅𞤦𞤢𞤳𞤢𞤪 𞤅𞤭𞤣𞤭𞤳𞤭 𞤑𞤢𞤥𞤢𞤪𞤢 (𞤋𞤣𞤭 𞤀𞤥𞤭𞥅𞤲)⹁ 𞤶𞤢𞥄𞤺𞤮𞤪𞤯𞤮 𞤥𞤢𞤳𞥆𞤮 𞤮𞤲 𞤳𞤢 𞤲𞤣𞤫𞥅𞤲𞤳𞤢. 𞤌𞤲 𞤬𞤫𞤱𞤶𞤭 𞤴𞤮 𞤳𞤵𞤥𞤨𞤭𞤼𞤢𞤤 𞤬𞤭𞥅 𞤥𞤢𞥄𞤴𞤣𞤫 𞤲𞤣𞤫𞤲 𞤴𞤢𞤤𞤼𞤭𞤲𞤫 𞤬𞤭𞥅 𞤸𞤢𞤯𞤵𞤺𞤮𞤤 𞤸𞤢𞥄𞤤𞤢-𞤸𞤢𞥄𞤤𞤼𞤢𞥄𞤶𞤫 𞤦𞤮𞤲𞥆𞤵𞤣𞤫 “𞤲𞤢𞤲𞤮𞤲𞥋𞤣𞤭𞤪𞤢𞤤” 𞤫 𞤲𞤣𞤫𞤪 𞤳𞤮𞤲𞤵 𞤲𞤺𞤵𞤲 𞤧𞤭 𞤯𞤫 𞤣𞤵𞥅𞤥𞤭𞤳𞤫. 𞤇𞤢𞤤𞤲𞤣𞤵 𞤥𞤢𞥄𞤴𞤯𞤮 𞤮𞤲 𞤱𞤢𞤤𞥆𞤭𞤲𞤮𞤴𞤢𞥄 𞤳𞤢 𞤅𞤢𞤬𞤪𞤮𞤪𞤣𞤫 𞤋𞤻𞤢𞥄𞤧 𞤁𞤭𞥅𞤲⹁ 𞤪𞤫𞤬𞤼𞤭 𞤔𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤐𞤣𞤫𞥅𞤳𞤢 𞤸𞤫𞤩𞥆𞤭𞤼𞤭𞥅 𞤬𞤭𞥅 𞤳𞤮𞤤𞥆𞤭𞤼𞤢𞤤 𞤲𞤺𞤢𞤤. 𞤀𞤪𞤣𞤮𞤪𞤣𞤫 𞤚𞤮𞥅𞤱𞤵𞤲𞥋𞤣𞤫 𞤔𞤮𞤺𞤮𞤥𞤢𞤤 𞤘𞤫𞤲𞤣𞤭𞥅𞤱𞤢𞤤 𞤲𞤺𞤢𞤤 𞤸𞤮𞤤𞥆𞤭𞤼𞤢𞥄⹁ 𞤳𞤢𞤻𞤵𞤲 𞤳𞤢𞤣𞤭 𞤫 𞤒𞤢𞤸𞤴𞤢𞥄 𞤑𞤢𞤴𞤪𞤢𞤦𞤢𞥄 𞤑𞤢𞤦𞤢𞥄⹁ 𞤶𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤙𞤢𞥄𞤱𞤮. 𞤐𞤦𞤢𞥄𞤣𞤭 𞤸𞤫𞥅𞤩𞤢𞥄 𞤲𞤮 𞤺𞤭𞤲𞤫𞤲𞤢𞥄𞤩𞤫 𞤩𞤫𞤲 𞤸𞤮𞤤𞥆𞤭𞤼𞤭𞤪𞤫𞥅 𞤫 𞤃𞤢𞤱𞤦𞤢𞥄𞤪𞤫 𞤶𞤫𞤥𞥆𞤢⹁ 𞤻𞤢𞤤𞤲𞤣𞤫 𞥒𞥕 𞤑𞤮𞤪𞤧𞤮 𞥒𞥐𞥒𞥔 𞤬𞤢𞥄𞤼𞤵𞤲𞤣𞤫 𞤑𞤵𞥅𞤩𞤢𞤤𞤶𞤮 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭.

 

𞤅𞤮 𞤼𞤢𞤱𞤭𞥅 𞤷𞤮𞤤𞥆𞤭 𞤯𞤭𞤲 𞤧𞤵𞥅𞤯𞤮𞤼𞤮 𞤥𞤢𞥄𞤴𞤢⹁ 𞤳𞤵𞥅𞤩𞤢𞤤𞤶𞤮 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭⹁ 𞤸𞤫𞤲𞤢𞤲𞤢𞤲𞤮𞥅𞤯𞤮 𞤥𞤢𞥄𞤴𞤣𞤫 𞤥𞤵𞥅𞤯𞤵𞤲 𞤫 𞤨𞤫𞤤𞥆𞤭𞤼𞤢𞤤 𞤩𞤢𞥄𞤱𞤮 𞤩𞤫 𞤴𞤢𞤲𞤵𞤣𞤫 𞤫 𞤺𞤢𞤤𞥆𞤫 𞤥𞤢𞤳𞥆𞤮 𞤯𞤫𞤲⹁ 𞤬𞤭𞤩𞤭 𞤥𞤢𞥄𞤴𞤵𞤺𞤮𞤤 𞤫 “𞤶𞤵𞥅𞤯𞤫” 𞤃𞤢𞤥𞤢𞤣𞤭 𞤁𞤵𞤦𞤥𞤵𞤴𞤢. 𞤑𞤮 𞤲𞤭𞥅 𞤱𞤮𞤲𞤭𞤪𞤭 𞤼𞤭𞤥𞥆𞤮𞥅𞤣𞤫 𞤥𞤢𞤳𞥆𞤮 𞤲𞤣𞤫𞤲⹁ 𞤳𞤮 𞤲𞤭𞥅 𞤮 𞤥𞤵𞥅𞤴𞤭𞤪𞤢𞤲𞤢𞤲𞤮𞥅. 𞤙𞤢𞥄𞤱𞤭𞤲𞥋𞤣𞤮𞤼𞤮𞥅𞤩𞤫 𞤩𞤫𞤲 𞤸𞤫𞤱𞤼𞤭𞤲𞤭 𞤳𞤮𞤤𞥆𞤭𞤼𞤢𞤤 𞤥𞤵𞤻𞥆𞤭𞤲𞤼𞤭𞤲𞤢𞤤 𞤸𞤢𞥄 𞤫 𞤩𞤫𞤴𞤲𞤺𞤵𞥅𞤪𞤫 𞤥𞤢𞤳𞥆𞤮 𞤲𞤣𞤫𞤲 𞤼𞤢𞤲. 𞤏𞤮𞤲𞤢𞥄 𞤣𞤮𞥅 𞤫 𞤈𞤫𞤲𞤣𞤮 𞤘𞤭𞤲𞤫 𞤲𞤺𞤮𞤲⹁ 𞤧𞤢𞤳𞤢 𞤳𞤮𞤲𞤵 𞤲𞤺𞤵 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤤𞤢𞥄𞤼𞤭𞤲𞤮𞥅 𞤸𞤮𞥅𞤪𞤫𞥅𞤶𞤮 𞤥𞤵𞥅𞤯𞤵𞤲 𞤥𞤢𞤱𞤯𞤮 𞤱𞤵𞤪𞤭𞤲 𞤲𞤫𞤩𞤼𞤢𞥄𞤤𞤭.

𞤑𞤢 𞤧𞤢𞤳𞥆𞤭𞤼𞤮𞤪𞤵𞤲⹁ 𞤅𞤢𞤣𞤭𞤦𞤢 𞤑𞤵𞤤𞤭𞤦𞤢𞤤𞤭 𞤵𞤦𞥆𞤭𞤪𞤢𞥄 𞤱𞤢 𞤲𞤭𞥅𞤲𞤢 𞤳𞤢𞤤𞤢 𞤲𞤭𞥅𞤶𞤮.

 

𞤑𞤮 𞤃𞤢𞤲𞤶𞤢𞥄𞤲𞤢⹁ 𞤧𞤢𞤸𞤪𞤫 𞤱𞤮𞤲𞤼𞤭𞤪𞤲𞤣𞤫 𞤳𞤢 𞤁𞤮𞤱𞤪𞤭 𞤘𞤭𞤲𞤫⹁ 𞤅𞤢𞤣𞤭𞤦𞤢𞥄 𞤑𞤵𞤤𞤭𞤦𞤢𞤤𞤭 𞤶𞤫𞤴𞤢𞥄. 𞤑𞤮 𞤫 𞥑𞥙𞥙𞥙 𞤮 𞤲𞤢𞥄𞤼𞤭𞥅 𞤧𞤮𞤪𞤭𞤴𞤢𞥄𞤺𞤢𞤤. 𞤌 𞤲𞤢𞤩𞤢𞥄 𞤃𞤢𞤪𞤮𞤳 𞤫𞤤𞤼𞤢𞤺𞤮𞤤. 𞤌 𞤪𞤵𞤼𞥆𞤭𞥅 𞤘𞤭𞤲𞤫 𞤫 𞥒𞥐𞥐𞥓⹁ 𞤮 𞤩𞤫𞤴𞤣𞤢𞤲𞤢𞥄 𞤣𞤢𞤪𞤲𞤣𞤫. 𞤁𞤵𞥅𞤩𞤭 𞤼𞤢𞤼𞤭 𞤩𞤢𞥄𞤱𞤮 𞤯𞤵𞤥⹁ 𞤮 𞤲𞤢𞤩𞤢𞥄 𞤀𞤥𞤫𞤪𞤭𞤳 𞤩𞤫𞤴𞤣𞤭𞤼𞤢𞤺𞤮𞤤. 𞤇𞤢𞥄𞤱𞤼𞤭 𞤯𞤵𞤥⹁ 𞤮 𞤫𞤤𞤼𞤮𞤴𞤭𞤲𞤮 𞤫 𞤤𞤫𞤴𞤯𞤫 𞤯𞤵𞥅𞤯𞤵𞤯𞤫 𞤱𞤢𞤲𞤮 𞤘𞤢𞤦𞤮𞤲⹁ 𞤊𞤢𞤪𞤢𞤲𞤧𞤭⹁ 𞤃𞤭𞤧𞤪𞤢⹁…

𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭 𞤮 𞤸𞤫𞤩𞤵𞤲𞤮 𞤫 𞥒𞥐𞥑𞥙 𞤅𞤫𞥅𞤣𞤫𞥅 𞤸𞤵𞤩𞤭𞤲𞥋𞤣𞤢𞤤 𞤭𞤥𞥆𞤮𞤪𞤣𞤫 𞤫 𞤶𞤢𞥄𞤩𞤭𞥅𞤪𞤫 𞤆𞤫𞤲𞤧𞤭𞤤𞤾𞤢𞤲𞤭𞤴𞤢𞥄⹁ 𞤲𞤣𞤫𞤪 𞤤𞤫𞤴𞤣𞤭 𞤀𞤥𞤫𞤪𞤭𞤳.

𞤒𞤮𞤼𞥆𞤭𞤲𞤢𞤲𞤣𞤫 𞤬𞤭𞤪𞤼𞤢𞥄𞤲𞤣𞤫 𞤫 𞤆𞤵𞤤𞤢𞤪 𞤭𞤥𞥆𞤮𞤪𞤣𞤫 𞤫 𞤳𞤵𞤯𞤮𞤤 𞤲𞤺𞤮𞤤 𞤀𞤦𞤣𞤵𞤤𞥆𞤢𞥄𞤸𞤭 𞤓𞤥𞥆𞤵 𞤅𞤮𞥅 𞤱𞤭𞤲𞤣𞤭 𞤳𞤢 𞤸𞤫𞤤𞥆𞤮 𞤊𞤫𞤧𞤦𞤵𞤳 𞤥𞤢𞤳𞥆𞤮.