𞤅𞤉𞤂𞥆𞤓 𞤉 𞤅𞤋𞤁𞤋𞤒𞤀 𞤒𞤀𞤂𞤚𞤋𞥅 𞤑𞤀 𞤑𞤓𞤇𞤉𞥅𞤔𞤉 𞤃𞤀𞤇𞥆𞤉
𞤑𞤮 𞤸𞤢𞤲𞤣𞤫 𞤫 𞤀𞥄𞤩𞤲𞤣𞤫 𞤻𞤢𞤤𞤲𞤣𞤫 𞥒𞥘 𞤕𞤮𞤤𞤼𞤮 𞥒𞥐𞥒𞥒⹁ 𞤩𞤫 𞤸𞤢𞤨𞥆𞤢𞤲𞤢𞤲𞤮𞥅 𞤴𞤮 𞤩𞤫 𞤶𞤮𞤺𞤲𞤵𞤼𞤵 𞤺𞤢𞤤𞥆𞤫𞥅𞤶𞤭 𞤥𞤢𞤩𞥆𞤫 𞤯𞤭𞤲. 𞤇𞤫𞤲 𞤳𞤮 𞤅𞤫𞤤𞥆𞤵 𞤁𞤢𞤤𞤫𞤲 𞤔𞤢𞤤𞥆𞤮⹁ 𞤸𞤮𞥅𞤪𞤫𞥅𞤶𞤮 𞤬𞤫𞤣𞥆𞤫 𞤆𞤮𞤼𞥆𞤢𞤤 𞤁𞤮𞥅𞤤𞤫 𞤁𞤫𞤥𞤮𞤳𞤢𞤪𞤢𞤲𞤳𞤮𞥅𞤶𞤫 𞤘𞤭𞤲𞤫 𞤯𞤫𞤲 (UFDG-𞤆𞤁𞤁𞤘) 𞤳𞤢𞤻𞤵𞤲 𞤫 𞤅𞤭𞤣𞤭𞤴𞤢 𞤚𞤵𞥅𞤪𞤫⹁ 𞤸𞤮𞥅𞤪𞤫𞥅𞤶𞤮 𞤊𞤫𞤣𞥆𞤫 𞤁𞤮𞥅𞤤𞤫 𞤘𞤫𞤲𞤣𞤭𞤴𞤢𞤲𞤳𞤮𞥅𞤶𞤫 𞤯𞤫𞤲 (UFR – 𞤊𞤁𞤘).
𞤇𞤫𞥅 𞤯𞤭𞤯𞤮 𞤳𞤢𞤤𞤢 𞤱𞤵𞤤𞥆𞤭𞤼𞤭𞤲𞤮 𞤳𞤢 𞤙𞤢𞥄𞤱𞤭𞤪𞤣𞤵 𞤁𞤭𞤳𞤧𞤭𞤲. 𞤇𞤢𞥄𞤱𞤮 𞤸𞤮 𞤬𞤢𞤩𞥆𞤭𞤲𞤣𞤫 𞤳𞤭𞥅𞤼𞤮𞤤 𞤲𞤺𞤮𞤤⹁ 𞤻𞤢𞥄𞤱𞤮𞥅𞤸𞤮 𞤮𞤲 𞤬𞤮𞤣𞤵𞤲𞤮 𞤼𞤢𞤰𞤵𞤺𞤮𞤤 𞤻𞤢𞥄𞤱𞤮𞥅𞤪𞤫 𞤲𞤣𞤫𞤲 𞤸𞤢𞤲𞤣𞤫 𞤦𞤭𞤥𞤦𞤭 𞤳𞤢 𞤲𞤶𞤢𞤥𞤣𞤭 𞤧𞤢𞤨𞥆𞤢𞤩𞤭𞤪𞤭. 𞤀𞤣𞤮 𞤯𞤵𞤥 𞤸𞤫𞤱𞤼𞤵𞤣𞤫⹁ 𞤸𞤢𞤪𞤭 𞤅𞤫𞤤𞥆𞤵 𞤁𞤢𞤤𞤫𞤲 𞤫 𞤅𞤭𞤣𞤭𞤴𞤢 𞤚𞤵𞥅𞤪𞤫 𞤧𞤢𞥄𞤦𞤭𞤲𞤭𞥅 𞤺𞤢𞤤𞥆𞤫𞥅𞤶𞤭 𞤥𞤢𞤩𞥆𞤫 𞤯𞤭𞤲.
𞤄𞤢𞤲𞥆𞤭 𞤩𞤫 𞤸𞤢𞤦𞥆𞤢𞤲𞤮𞥅𞤳𞤭 𞤳𞤭𞥅𞤼𞤮𞤤 𞤲𞤺𞤮𞤤. 𞤅𞤢𞤦𞤵𞤲𞤢 𞤦𞤭𞤥𞤦𞤭 𞤯𞤮𞥅⹁ 𞤻𞤢𞥄𞤱𞤮𞥅𞤸𞤮 𞤮𞤲 𞤱𞤭𞤭𞥅 𞤱𞤮𞤲𞤣𞤫𞤥𞤢 𞤻𞤢𞥄𞤱𞤵𞤳𞤭 𞤸𞤢𞤳𞥆𞤮 𞤳𞤭𞤲 𞤸𞤵𞤩𞤭𞤲’𞤣𞤢𞥄𞤳𞤭 𞤲𞤣𞤵𞥅 𞤥𞤵𞤪𞤢𞥄𞤣𞤵.
𞤄𞤭𞤥𞤦𞤭 𞤤𞤢𞤱⹁ 𞤸𞤢𞤪𞤭 𞤤𞤢𞥄𞤥𞤵 𞤲𞤺𞤵𞤲 𞤭𞤥𞥆𞤭𞤲𞤭𞥅 𞤣𞤢𞤣𞤼𞤭𞥅𞤩𞤫 𞤩𞤫𞤲 𞤳𞤮 𞤴𞤢𞤸𞤢 𞤻𞤭𞥅𞤩𞤲𞤢 𞤴𞤢𞤥𞤭𞤪𞤮𞥅𞤪𞤫 𞤥𞤢𞤺𞥆𞤵 𞤲𞤣𞤫𞤲 𞤳𞤢 𞤅𞤫𞤤𞥆𞤵. 𞤂𞤢𞥄𞤱𞤮𞤤 𞤴𞤢𞤸𞤵𞤲’𞤺𞤮𞤤 𞤳𞤢 𞤸𞤵𞤩𞤫𞥅𞤪𞤫 𞤅𞤫𞤤𞥆𞤵 𞤲𞤮 𞤸𞤫𞥅𞤱𞤵𞤲𞤮𞥅 𞤼𞤫𞤬 𞤨𞤮𞤤𞤭𞥅𞤧𞤢 𞤫 𞤧𞤢𞤲𞤣𞤢𞤪𞤥𞤢.
𞤇𞤢𞥄𞤱𞤮 𞤅𞤫𞤤𞥆𞤵 𞤁𞤢𞤤𞤫𞤲 𞤴𞤢𞤤𞤼𞤵𞤣𞤫 𞤳𞤢 𞤺𞤢𞤤𞥆𞤫 𞤥𞤵𞤵𞤲⹁ 𞤅𞤢𞤣𞤭𞤦𞤢𞥄 𞤑𞤵𞤤𞤵𞤦𞤢𞤤𞤭⹁ 𞤸𞤮𞥅𞤪𞤫𞥅𞤶𞤮 𞤳𞤮𞤲𞤭 𞤘𞤭𞤲𞤫 𞤯𞤭𞤲⹁ 𞤫 𞤄𞤢𞤤𞤢𞥄 𞤅𞤢𞤥𞤵𞤪𞤢𞥄⹁ 𞤸𞤮𞥅𞤪𞤫𞥅𞤶𞤮 𞤧𞤢𞤲𞤣𞤢𞤪𞤥𞤢𞥄𞤩𞤫 𞤩𞤫𞤲⹁ 𞤴𞤢𞤸𞤵𞤲𞤮 𞤲𞤢𞥄𞤼𞤭𞥅 𞤳𞤢 𞤺𞤢𞤤𞥆𞤫 𞤅𞤫𞤤𞥆𞤵 𞤁𞤢𞤤𞤫𞤲⹁ 𞤲𞤢𞤲𞤣𞤭 𞤬𞤭𞥅 𞤬𞤫𞤤𞥆𞤭𞤲𞤼𞤭𞤲𞤺𞤮𞤤 𞤱𞤮𞤲𞤣𞤫𞤥𞤢 𞤩𞤫 𞤸𞤫𞤩𞤼𞤭𞥅 𞤸𞤮𞤲𞤢𞤲𞤣𞤭 𞤲𞤣𞤭𞤲.
𞤑𞤢 𞤣𞤮𞤱𞤪𞤭 𞤑𞤮𞤲𞤢𞥄𞤳𞤭𞤪𞤭 𞤫 𞤲𞤣𞤫𞤪 𞤈𞤢𞤼𞤮𞥅𞤥𞤢⹁ 𞤧𞤵𞤳𞤢𞥄𞤩𞤫 𞤩𞤫𞤲 𞤴𞤢𞤤𞤼𞤵𞤲𞤮 𞤸𞤵𞤩𞥆𞤭 𞤼𞤢𞤤𞥆𞤭𞥅𞤶𞤫⹁ 𞤵𞤣𞥆𞤭 𞤤𞤢𞥄𞤱𞤭 𞤯𞤭𞤲. 𞤁𞤢𞤣𞤼𞤭𞥅𞤩𞤫 𞤩𞤫𞤲 𞤴𞤢𞤸𞤵𞤲𞤮 𞤼𞤮𞤲 𞤬𞤫𞤼𞥆𞤭𞤲𞤭 𞤷𞤵𞥅𞤪𞤣𞤭 𞤱𞤵𞤤𞥆𞤭𞤲𞤭𞤪𞤲𞤣𞤭 𞤫 𞤧𞤵𞤳𞤢𞥄𞤩𞤫 𞤩𞤫𞤲. 𞤇𞤫𞤲 𞤳𞤢𞤣𞤭 𞤬𞤫𞤪𞤭𞥅 𞤫 𞤥𞤢𞤩𞥆𞤫 𞤳𞤢𞥄𞤰𞤫.
𞤂𞤢𞥄𞤱𞤭 𞤯𞤭𞤲 𞤸𞤫𞤣𞥆𞤫 𞤼𞤮𞤲⹁ 𞤲𞤮 𞤤𞤢𞥄𞤩𞤭⹁ 𞤣𞤵𞤯𞤫 𞤯𞤫𞤲 𞤫 𞤺𞤫𞤴𞤤𞤫 𞤯𞤫𞤲 (𞤴𞤫𞥅𞤴𞤭𞤪𞤯𞤫 𞤯𞤫𞤲) 𞤳𞤢𞤣𞤭 𞤥𞤢𞤩𞥆𞤭𞥅 𞤦𞤢𞥄𞤬𞤫 𞤥𞤵𞤵𞤲.
𞤐𞤮 𞤸𞤵𞤤𞤢𞥄 𞤱𞤮𞤼𞤢 𞤳𞤮 𞤱𞤮𞥅𞤱𞤵𞤲𞤮𞥅 𞤳𞤮𞤲 𞤬𞤫𞤱𞤲𞤣𞤮 𞤳𞤮𞥅𞤪𞤢𞥄𞤺𞤵 𞤀𞤤𞤬𞤢𞥄 𞤑𞤮𞤲𞤣𞤫 𞤬𞤵𞤯𞥆𞤭𞤼𞤮 𞤳𞤢𞤣𞤭 𞤧𞤢𞤦𞤵𞤲𞤢 𞤲𞤶𞤢𞤺𞥆𞤵 𞤲𞤺𞤵𞤲 𞤬𞤮𞤱𞤼𞤭 𞤼𞤵𞤲⹁ 𞤶𞤢𞤳𞤢 𞤐𞤺𞤵 𞤢𞤷𞥆𞤢𞥄𞤤𞤭.
𞤘𞤭𞤲𞤫 𞤳𞤮 𞤤𞤫𞤧𞤣𞤭 𞤽𞤢𞤤𞤢𞤱𞤵 𞤻𞤢𞤤𞤲𞤣𞤫 𞤱𞤮𞥅 𞤳𞤮 𞤽𞤢𞤤𞤢𞤱𞤵 𞤸𞤫𞤧𞤮. 𞤃𞤭𞤲 𞤥𞤭𞤯𞤮 𞤬𞤫𞤤𞥆𞤭𞤼𞤭 𞤳𞤮 𞤶𞤢𞤲𞤬𞤢 𞤀𞤤𞤬𞤢𞥄 𞤳𞤮𞤲𞤣𞤫 𞤁𞤵𞤥𞤦𞤵𞤴𞤢𞥄 𞤸𞤫𞤩𞤼𞤭𞤪𞤭 𞤤𞤢𞥄𞤥𞤵 𞤘𞤭𞤲𞤫; 𞤳𞤮𞤲𞤮 𞤬𞤫𞥅𞤻𞤮𞤴𞤢𞤴 𞤴𞤫𞥅𞤧𞤮 𞤼𞤮𞥅𞤣𞤭𞤲𞤢 𞤬𞤫𞥅𞤻𞤢𞤲𞤭𞥅𞤲𞤮 𞤱𞤮𞤩𞥆𞤫 𞤺𞤮𞥅. 𞤒𞤮 𞤣𞤢𞤪𞤼𞤭𞥅𞤩𞤫 𞤩𞤫𞤲 𞤩𞤵𞤪𞤼𞤵 𞤱𞤢𞤳𞥆𞤭𞤤𞤢𞤺𞤮𞤤 𞤩𞤫 𞤢𞤲𞤣𞤢 𞤧𞤭 𞤘𞤭𞤲𞤫 𞤩𞤢𞤲𞤼𞤮𞤼𞤮 𞤳𞤮 𞤥𞤢𞥄 𞤩𞤫 𞤬𞤮𞤼𞥆𞤢 𞤬𞤭𞥅 𞤣𞤢𞤪𞤼𞤢𞤺𞤮𞤤 𞤩𞤫𞥅 𞤥𞤵𞤪𞤼𞤢𞤤𞤣𞤵𞥅𞤩𞤫. 𞤌𞤲 𞤶𞤢𞥄𞤪𞤢𞥄𞤥𞤢.