𞤅𞤉𞤐𞤉𞤘𞤀𞤂 𞤏𞤀𞤒𞤂𞤋𞤚𞤋 𞤉𞤑𞤏𞤀𞤚𞤉𞤈 𞤂𞤓𞤃𞤄𞤋

𞤑𞤮 𞤸𞤢𞤲𞤣𞤫 𞤱𞤮𞤲𞤭 𞤻𞤢𞤤𞥆𞤢𞤤 𞤧𞤢𞤳𞥆𞤭𞤼𞤮𞤪𞤢𞤤 𞤲𞤺𞤢𞤤 𞤱𞤮𞤲𞤢𞤲𞤣𞤫 𞤣𞤫𞤲𞤼𞤫 𞤢𞤪𞤢𞤲𞤫 𞤯𞤫𞤲 𞤯𞤭𞤯𞤭.

𞤅𞤉𞤐𞤉𞤘𞤀𞤂 🇸🇳 𞥒-𞥑 🇪🇨 𞤉𞤑𞤏𞤀𞤚𞤉𞤈

𞤂𞤢𞤲𞥆𞤭𞥅!!!!! 𞤑𞤮 𞤴𞤫𞤤𞤢𞤲𞤮𞥅 𞤳𞤮𞤲 𞤼𞤵𞤤𞤼𞤢𞥄𞤤𞤭. 𞤐𞤺𞤢𞤴𞤵𞥅𞤶𞤭 𞤯𞤭𞤲 𞤸𞤫𞤪𞤧𞤭𞤲𞤢𞥄𞤤𞤭 𞤀𞤊𞤈𞤋𞤑. 𞤅𞤉𞤐𞤉𞤘𞤀𞤂 𞤱𞤮𞤲𞤭𞥅 𞤢𞤪𞤢𞤲𞤩𞤫 𞤫 𞤤𞤫𞤴𞤯𞤫 𞤀𞤬𞤪𞤭𞤳 𞤯𞤫𞤲 𞤤𞤵𞤥𞤦𞤵𞤺𞤮𞤤 𞤬𞤭𞥅 𞤼𞤢𞤱𞤫𞤺𞤮𞤤 𞤶𞤫𞥅𞤼𞤢𞤼𞤢𞤩𞤢𞤤 𞤲𞤺𞤢𞤤 𞤳𞤢 𞤤𞤢𞤼𞤮 𞤥𞤵𞤤𞥆𞤫𞤪𞤫 𞤑𞤀𞤚𞤀𞤈 𞥒𞥐𞥒𞥒.

𞤐𞤮 𞤢𞤲𞤣𞤢𞤲𞤮𞥅⹁ 𞤳𞤮 𞤦𞤫𞥅 𞤲𞤺𞤢𞤴𞤵𞥅𞤶𞤭 𞤯𞤭𞤲 𞤨𞤭𞤴𞤢 𞤉𞤑𞤏𞤀𞤚𞤉𞤈 𞤧𞤭 𞤅𞤉𞤐𞤉𞤘𞤀𞤂 𞤤𞤵𞤥𞤦𞤢. 𞤑𞤮 𞤯𞤵𞤥 𞤤𞤫 𞤯𞤭 𞤱𞤢𞤯𞤭. 𞤍𞤭 𞤨𞤭𞤴𞤭 𞤉𞤑𞤏𞤀𞤚𞤉𞤈 𞤳𞤵𞥅𞤤𞤫 𞥒⹁ 𞤩𞤫𞤲 𞤭𞤼𞥆𞤭 𞤺𞤮𞥅𞤼𞤢𞤤. 𞤑𞤮 𞤋𞤅𞤃𞤀𞤒𞤋𞤂𞤀 𞤅𞤀𞥄𞤈 𞤢𞤣𞤭𞥅 𞤲𞤢𞥄𞤣𞤵𞤣𞤫 𞤲𞤣𞤫 𞤮 𞤴𞤫𞤯𞤢𞤲𞤮𞥅 𞤤𞤢𞤼𞤫𞤪𞤫 𞤳𞤢 𞤸𞤵𞥅𞤤𞤮𞥅𞤲𞤣𞤫 𞤩𞤢𞥄𞤱𞤮 𞤮 𞤤𞤭𞤩𞤫𞥅𞤣𞤫 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥔𞥔.

𞤉𞤑𞤏𞤀𞤚𞤉𞤈 𞤭𞤼𞥆𞤵𞤲𞤮 𞤳𞤵𞥅𞤤𞤢𞤤 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥖𞥘. 𞤅𞤭 𞤩𞤫 𞤤𞤵𞤼𞥆𞤵𞤲𞤮 𞤯𞤮𞤲⹁ 𞤸𞤢𞤪𞤢𞤴𞤲𞤮 𞤅𞤉𞤐𞤉𞤘𞤀𞤂 𞤴𞤢𞤤𞤼𞤭𞥅. 𞤑𞤮𞤲𞤮 𞤑𞤀𞥄𞤂𞤋𞤁𞤓 𞤑𞤓𞤂𞤓𞤄𞤀𞤂𞤋⹁ 𞤲𞤺𞤢𞤴𞤵𞥅𞤪𞤭 𞤶𞤢𞤥𞤦𞤢𞥄𞤪𞤭 𞤊𞤓𞥅𞤚𞤀 𞤲𞤣𞤭𞤲 𞤱𞤭𞤴𞤭 𞤯𞤵𞤥 𞤱𞤢𞤯𞤢𞤼𞤢𞥄. 𞤖𞤢𞤴 𞤼𞤭𞤥𞥆𞤢𞥄𞤤𞤭 𞤸𞤮𞤶𞤮𞤥𞤢𞥄𞤶𞤫 𞤼𞤢𞤼𞤭 𞤩𞤢𞥄𞤱𞤮 𞤉𞤑𞤏𞤀𞤚𞤉𞤈 𞤲𞤢𞥄𞤣𞤵𞤣𞤫 𞤳𞤵𞥅𞤤𞤢𞤤 𞤥𞤵𞤵𞤲 𞤲𞤺𞤢𞤤 ⹁ 𞤸𞤢𞤪𞤭 𞤑𞤀𞥄𞤂𞤋𞤁𞤓 𞤩𞤫𞤴𞤣𞤭𞤼𞤢𞤲𞤭𞥅 𞤅𞤉𞤐𞤉𞤘𞤀𞤂 𞤳𞤵𞥅𞤤𞤢𞤤. 𞤑𞤮 𞤲𞤺𞤢𞤤 𞤱𞤢𞤯𞤭 𞤩𞤫 𞤯𞤭𞤯𞤢𞤩𞤮 𞤳𞤢 𞤣𞤫𞤲𞤼𞤢𞤤 𞤥𞤢𞤩𞥆𞤫. 𞤑𞤮 𞤳𞤢𞤲𞤺𞤢𞤤 𞤱𞤮𞤲𞤭 𞤧𞤢𞤦𞤵 𞤩𞤫 𞤤𞤵𞤥𞤦𞤵𞤣𞤫.

𞤂𞤢𞤳𞥆𞤫𞤪𞤫 𞤰𞤢𞥄𞤪𞤵𞤲𞤮 𞤬𞤮𞤼𞤢 𞤲𞤮𞤲. 𞤑𞤮𞤲𞤮 𞤢 𞤱𞤭𞤴𞤢𞤴 𞤧𞤫𞤪𞤭𞤲𞤩𞤫 𞤥𞤢𞤩𞥆𞤫 𞤩𞤫𞤲 𞤢𞥄𞤥𞤢𞥄𞤲𞤮 𞤨𞤮𞥅𞤯𞤵𞤺𞤮𞤤 𞤶𞤭𞤳𞤭𞤪𞤭𞥅𞤶𞤫 𞤯𞤫𞤲 𞤼𞤮𞤪𞤮𞥅 𞤘𞤉𞤐𞤌 𞤃𞤮𞤰𞥆𞤮 𞤈𞤮𞤳𞥆𞤮𞥅𞤱𞤮 𞤮𞤲. 𞤖𞤢𞤪𞤭 𞤼𞤭𞤥𞥆𞤭𞥅 𞤣𞤵𞥅𞤩𞤭 𞤲𞤮𞥅𞤺𞤢𞤴 𞤺𞤭𞤤𞤢 𞤩𞤫 𞤱𞤢𞤴𞤪𞤵𞤲𞤮𞥅 𞤼𞤢𞤱𞤫𞥅𞤣𞤫 𞤫 𞤶𞤫𞥅𞤼𞤢𞤼𞤢𞤩𞤢𞤤 𞤬𞤮𞥅𞤤𞤮𞤼𞤭𞤪𞤢𞤤 𞤬𞤭𞥅 𞤬𞤫𞤤𞤲𞤺𞤮 𞤢𞤣𞤵𞤲𞤢𞤴𞤢𞤲𞤳𞤮𞤱𞤮 𞤲𞤺𞤮𞤲.
𞤕𞤫𞤦𞤪𞤭 𞤲𞤣𞤭𞤲 𞤥𞤫𞥅𞤥𞤫𞤼𞤫 𞤸𞤢𞤲𞤣𞤫 𞤳𞤢𞤣𞤭.

𞤖𞤌𞤂𞤀𞤐𞤁 🇳🇱 𞥒 – 𞥐 🇶🇦 𞤑𞤀𞤚𞤀𞤈

𞤑𞤢𞤼𞤢𞤪 𞤸𞤫𞤩𞤭𞥅 𞤳𞤮 𞤴𞤵𞤪𞤥𞤭. 𞤖𞤫𞤲𞤣𞤭𞥅𞤯𞤮 𞤩𞤫 𞤱𞤮𞥅 𞤲𞤮 𞤧𞤮𞤰𞤵𞤣𞤫. 𞤊𞤭𞥅 𞤳𞤢𞤤𞤢 𞤳𞤮 𞤳𞤢𞤥𞤩𞤫 𞤼𞤮𞥅𞤤𞤲𞤭 𞤬𞤮𞥅𞤤𞤮𞤼𞤭𞤪𞤢𞤤 𞤲𞤺𞤢𞤤⹁ 𞤸𞤢𞤴 𞤲𞤣𞤫 𞤱𞤮𞥅𞤼𞤫𞤪𞤫 𞤩𞤫 𞤬𞤮𞥅𞤤𞤢𞥄𞤤𞤭. 𞤑𞤮 𞤯𞤵𞤥 𞤱𞤮𞤲𞤭 𞤪𞤫𞤥𞤢 𞤸𞤢𞥄 𞤺𞤢𞤴𞤲𞤢⹁ 𞤱𞤮𞥅𞤼𞤩𞤫 𞤢𞤪𞤢 𞤧𞤮𞤻𞤢 𞤻𞤢𞥄𞤥𞤢. 𞤑𞤮 𞤴𞤢𞤱𞤼𞤭 𞤣𞤵𞤶𞤵𞤲𞤫 𞥒𞥒𞥐 𞤣𞤢𞤤𞤢⹁ 𞤩𞤫 𞤲𞤢𞥄𞤣𞤭𞥅 𞤫 𞤲𞤺𞤢𞤤 𞤬𞤮𞥅𞤤𞤮𞤼𞤭𞤪𞤢𞤤. 𞤑𞤮𞤲𞤮 𞤯𞤵𞤥 𞤸𞤢𞤯𞤢𞥄𞤤𞤭 𞤩𞤫 𞤱𞤮𞤲𞤣𞤫 𞤢𞤪𞤢𞤥𞤩𞤫 𞤫 𞤴𞤢𞤤𞤼𞤭𞤲𞤫𞥅𞤣𞤫.

𞤖𞤌𞤂𞤀𞤐𞤁 𞤳𞤢𞤣𞤭 𞤢𞤤𞤢𞥄 𞤴𞤵𞤪𞤥𞤫𞥅𞤲𞤣𞤫. 𞤊𞤭𞥅 𞤳𞤢𞤤𞤢 𞤩𞤫 𞤤𞤵𞤥𞤦𞤭𞥅⹁ 𞤯𞤵𞤥 𞤸𞤢𞤯𞤢𞥄𞤲𞤮 𞤩𞤫 𞤸𞤫𞤪𞤧𞤭𞤲𞤭𞤪𞤣𞤫 𞤑𞤀𞤚𞤀𞤈 𞤳𞤵𞥅𞤤𞤫 𞤯𞤭𞤯𞤭. 𞤑𞤮 𞤑𞤌𞤁𞤋 𞤘𞤀𞤑𞤆𞤌 𞤲𞤢𞥄𞤣𞤭 𞤳𞤵𞥅𞤤𞤢𞤤 𞤢𞤪𞤢𞤲𞤢𞤤 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥒𞥖𞥋 𞤧𞤭 𞤊𞤈𞤀𞤐𞤑𞤋 𞤣𞤫 𞤔𞤌𞤐𞤘 𞤯𞤭𞤯𞤥𞤭𞤼𞤢𞤲𞤭 𞤩𞤫 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥔𞥙. 𞤔𞤮𞥅𞤲𞤭 𞤳𞤮 𞤖𞤌𞤂𞤀𞤐𞤁 𞤫 𞤼𞤮𞤩𞥆𞤫 𞤥𞤵𞤵𞤲 𞤶𞤫𞥅𞤯𞤭𞤯𞤭 𞤱𞤮𞤲𞤭 𞤸𞤮𞥅𞤪𞤫 𞤣𞤫𞤲𞤼𞤢𞤤 𞤢𞤪𞤢𞤲𞤢𞤤 𞤲𞤺𞤢𞤤. 𞤔𞤮𞥅𞤲𞤭 𞤴𞤮 𞤑𞤀𞤚𞤀𞤈 𞤢𞤪𞤵 𞤳𞤫𞤤𞥆𞤢𞤲𞤢 𞤸𞤫𞤣𞥆𞤭𞥅𞤩𞤫 𞤩𞤫𞤲. 𞤑𞤮 𞤸𞤫𞤩𞤭𞤩𞤫 𞤳𞤮𞤲 𞤲𞤮 𞤽𞤢𞤤𞤯𞤭𞤲𞤭 𞤲𞤣𞤫 𞤼𞤢𞤱𞤵𞤲𞤮𞥅 𞤳𞤮 𞤳𞤢𞤥𞤩𞤫 𞤰𞤫𞤼𞥆𞤵𞤲𞤮𞥅 𞤬𞤫𞤤𞤲𞤺𞤮 𞤀𞥄𞤅𞤋𞤒𞤀 𞤲𞤺𞤮𞤲.

𞤀𞤃𞤉𞤈𞤋𞤑 🇺🇸 𞥑 – 𞥐 🇮🇷 𞤋𞤈𞤀𞤐

𞤑𞤢 𞤳𞤭𞥅𞤳𞤭𞥅𞤯𞤫⹁ 𞤳𞤮 𞤤𞤫𞤴𞤯𞤫 𞤯𞤭𞤯𞤭 𞤢𞤴𞤪𞤵𞤯𞤫 𞤬𞤮𞤼𞤢 𞤬𞤮𞤼𞥆𞤭. 𞤍𞤫𞤲 𞤳𞤮 𞤀𞤃𞤀𞤉𞤈𞤋𞤑 𞤫 𞤋𞤈𞤀𞤐.
𞤅𞤭 𞤋𞤈𞤀𞤐 𞤨𞤭𞤴𞤵𞤲𞤮 𞤀𞤃𞤉𞤈𞤋𞤑⹁ 𞤸𞤢𞤪𞤢𞤴 𞤯𞤵𞤥 𞤴𞤮𞤲𞤭𞥅𞤲𞤮 𞤩𞤫 𞤸𞤢𞤴 𞤧𞤭 𞤩𞤫 𞤬𞤫𞤰𞥆𞤢𞤼𞤢𞥄𞤲𞤮. 𞤑𞤮𞤲𞤮 𞤀𞤃𞤉𞤈𞤋𞤑 𞤳𞤢𞤻𞤵𞤲 𞤳𞤢𞤣𞤭 𞤱𞤭𞤴𞤭 𞤢𞤷𞥆𞤢𞤼𞤢𞥄 𞤯𞤵𞤥 𞤱𞤢𞤯𞤢 𞤬𞤭𞥅 𞤳𞤢𞤤𞤢 𞤩𞤫 𞤱𞤮𞥅𞤱𞤢𞥄 𞤨𞤭𞤴𞤵𞤣𞤫 𞤋𞤈𞤀𞤐 𞤫 𞤤𞤢𞤼𞤮 𞤥𞤵𞤤𞥆𞤫𞤪𞤫.

𞤑𞤮𞤲𞤮 𞤸𞤢𞤲𞤣𞤫 𞤀𞤃𞤉𞤈𞤋𞤑 𞤱𞤢𞤳𞥆𞤭𞤤𞤭𞤲𞤮 𞤸𞤢𞥄 𞤻𞤢𞤥𞥆𞤭𞤲𞤭 𞤋𞤈𞤀𞤐 𞤸𞤢𞤥𞤦𞤵𞤪𞤺𞤫𞥅𞤪𞤫. 𞤑𞤮 𞤑𞤋𞤈𞤋𞤅𞤚𞤋𞤒𞤀𞤐 𞤆𞤓𞤂𞤋𞤅𞤋𞤑 𞤲𞤢𞥄𞤣𞤭 𞤳𞤵𞥅𞤤𞤢𞤤 𞤦𞤢𞤶𞥆𞤢𞤤 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥓𞥘𞥋. 𞤋𞤪𞤢𞤲 𞤫𞤼𞤭𞤲𞤮𞥅 𞤸𞤢𞥄 𞤲𞤮 𞤭𞤼𞥆𞤭𞤪𞤢 𞤲𞤺𞤢𞤤⹁ 𞤳𞤮𞤲𞤮 𞤩𞤫 𞤱𞤢𞥄𞤱𞤢𞥄𞤲𞤮. 𞤑𞤢𞤥𞤩𞤫 𞤳𞤢𞤣𞤭⹁ 𞤩𞤫 𞤥𞤮𞥅𞤩𞤢𞤴 𞤨𞤢𞤱𞤤𞤮𞤴 𞤥𞤢𞤩𞥆𞤫 𞤩𞤫 𞤱𞤢𞤯𞥆𞤮𞥅 𞤤𞤢𞥄𞤳𞤮𞤴 𞤥𞤢𞤩𞥆𞤫⹁ 𞤩𞤫 𞤤𞤵𞤥𞤦𞤮𞤴𞤢 𞤺𞤢𞤯𞤢. 𞤑𞤢𞤥𞤩𞤫 𞤫 𞤑𞤀𞤚𞤀𞤈 𞤳𞤮 𞤲𞤣𞤭𞤴𞤢𞤲 𞤱𞤮𞤲𞤭 𞤸𞤢𞤳𞥆𞤵𞤲’𞤣𞤫 𞤥𞤢𞤩𞥆𞤫.

𞤔𞤮𞥅𞤲𞤭 𞤀𞤃𞤉𞤈𞤋𞤑 𞤲𞤮 𞤥𞤢𞤪𞤭 𞤼𞤮𞤩𞥆𞤫 𞥕. 𞤇𞤫 𞤤𞤵𞤥𞤦𞤭𞥅 𞤳𞤢𞤥𞤩𞤫 𞤳𞤢𞤣𞤭. 𞤑𞤮 𞤳𞤢𞤥𞤩𞤫 𞤫 𞤖𞤌𞤂𞤀𞤐 𞤬𞤭𞤶𞤮𞤴𞤼𞤢 𞤳𞤢 𞤶𞤫𞥅𞤼𞤢𞤼𞤢𞤩𞤢𞤤.

𞤉𞤐𞤘𞤉𞤂𞤉 🏴󠁧󠁢󠁥󠁮󠁧󠁿 𞥓-𞥐 🏴󠁧󠁢󠁷󠁬󠁳󠁿 𞤏𞤉𞤂𞤅

𞤊𞤭𞥅 𞤳𞤢𞤤𞤢 𞤳𞤮 𞤩𞤫 𞤳𞤢𞤱𞤼𞤢𞤤⹁ 𞤳𞤮 𞤳𞤢𞤥𞤩𞤫 𞤳𞤢𞤣𞤭 𞤳𞤢𞤬𞤭 𞤤𞤫𞤴𞤣𞤭⹁ 𞤉𞤐𞤘𞤉𞤂𞤉 𞤢𞤷𞥆𞤢𞤲𞤢𞥄𞤤𞤭 𞤥𞤭𞤻𞥆𞤵 𞤥𞤵𞤵𞤲. 𞤉 𞤸𞤭𞤲𞤤𞤫 𞤸𞤢𞤪𞤭 𞤩𞤫 𞤤𞤵𞤥𞤦𞤭𞥅 𞤳𞤮𞤲𞤮 𞤯𞤵𞤥 𞤸𞤢𞤯𞤢𞥄𞤤𞤭 𞤩𞤫 𞤧𞤮𞤰𞤭𞤪𞤣𞤫 𞤤𞤫𞤴𞤣𞤭 𞤘𞤀𞤈𞤉𞤊 𞤄𞤉𞤂 𞤲𞤣𞤭𞤲 𞤳𞤵𞥅𞤤𞤫 𞤼𞤢𞤼𞤭. 𞤍𞤫 𞤬𞤮𞤨 𞤳𞤮 𞤳𞤢 𞤬𞤫𞤷𞥆𞤫𞤪𞤫 𞤯𞤭𞤯𞤢𞤩𞤫𞤪𞤫 𞤯𞤫 𞤲𞤢𞥄𞤣𞤢𞥄.

𞤑𞤮 𞤃𞤀𞤈𞤑𞤋𞤅 𞤈𞤀𞤡𞤊𞤌𞤈𞤁⹁ 𞤬𞤭𞤶𞤢𞤲𞤮𞥅𞤱𞤮 𞤃𞤀𞤐 𞤒𞤓𞤐𞤀𞤒𞤚𞤉𞤁 𞤱𞤮𞤲𞤭 𞤳𞤮 𞤲𞤢𞥄𞤣𞤭 𞤳𞤵𞥅𞤤𞤫 𞤯𞤭𞤯𞤭. 𞤀𞤪𞤢𞤲𞤢𞤤 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥕𞥐⹁ 𞤯𞤭𞤯𞤢𞤩𞤢𞤤 𞤥𞤢𞤳𞥆𞤮 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥖𞥘. 𞤑𞤮𞤲𞤮 𞤸𞤢𞤳𞥆𞤵𞤲’𞤣𞤫 𞤯𞤫𞤲 𞤯𞤭𞤯𞤭⹁ 𞤊𞤋𞤂 𞤊𞤌𞤁𞤉𞤐 𞤲𞤢𞥄𞤣𞤵𞤲𞤮 𞤺𞤮𞥅𞤼𞤢𞤤 𞤫 𞤲𞤣𞤫𞤪 𞤸𞤮𞤶𞤮𞤥𞤢𞥄𞤪𞤫 𞤱𞤮𞥅𞤼𞤫𞤪𞤫 𞤩𞤢𞥄𞤱𞤮 𞤳𞤵𞥅𞤤𞤢𞤤 𞤈𞤀𞤡𞤊𞤌𞤈𞤁 𞤲𞤺𞤢𞤤. 𞤐𞤢𞤲𞤣𞤭 𞤸𞤢𞤪𞤭 𞤏𞤫𞤤𞤧𞤩𞤫 𞤩𞤫𞤲 𞤲𞤮 𞤥𞤵𞤺𞤢𞥄 𞤼𞤢𞤸𞤮.

𞤔𞤮𞥅𞤲𞤭 𞤳𞤮 𞤉𞤐𞤘𞤉𞤂𞤉 𞤱𞤮𞤲𞤭 𞤸𞤮𞥅𞤪𞤫 𞤣𞤫𞤲𞤼𞤢𞤤 𞤯𞤭𞤯𞤢𞤩𞤢𞤤 𞤲𞤺𞤢𞤤. 𞤑𞤮 𞤳𞤢𞤥𞤩𞤫 𞤫 𞤅𞤉𞤐𞤉𞤘𞤀𞤂 𞤬𞤭𞤶𞤮𞤴𞤼𞤢 𞤶𞤫𞥅𞤼𞤢𞤼𞤢𞤩𞤢𞤤 𞤲𞤺𞤢𞤤 𞤫 𞤈𞤫𞤬𞤦𞤭𞤪𞥆𞤫 𞤻𞤢𞤤𞤲𞤣𞤫 𞥔 𞤄𞤮𞤱𞤼𞤮 𞥒𞥐𞥒𞥒.

𞤙𞤮𞤺𞥆𞤢𞤲𞤣𞤫 𞤀𞤴𞥃𞤢 𞤅𞤮𞥅. 𞤋𞤥𞥆𞤭𞤲𞤢𞥄𞤯𞤮 𞤫 𞤭𞤲𞤣𞤫 𞤤𞤮𞤱𞤪𞤫 𞤚𞤢𞤦𞤢𞤤𞤣𞤫 𞤲𞤣𞤫𞤲 𞤬𞤭𞥅 𞤸𞤵𞤥𞤨𞤭𞤼𞤵𞤺𞤮𞤤 𞤮𞤲 𞤳𞤮 𞤱𞤮𞤲𞤭 𞤫 𞤬𞤫𞤰𞥆𞤵𞤣𞤫 𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤑𞤢𞤼𞤢𞤪.