𞤅𞤌𞥅𞤈𞤋 𞤉 𞤅𞤉𞤂𞥆𞤓 𞤉 𞤅𞤋𞤁𞤋𞤒𞤀⹁ 𞤖𞤌𞤂 𞤑𞤌 𞤇𞤉 𞤒𞤉𞤏𞤚𞤋؟

𞤅𞤮𞥅𞤪𞤭𞥅𞤩𞤫 𞤤𞤢𞥄𞤥𞤭𞥅𞤩𞤫 𞤩𞤫𞤲 𞤫 𞤣𞤢𞤱𞤪𞤮𞥅𞤩𞤫 𞤩𞤫𞤲 𞤼𞤭𞤲𞤼𞤵𞤣𞤵𞤲𞤮 𞤸𞤢𞤲𞤳𞤭 𞤫 𞤢𞥄𞤩𞤵𞤲𞤣𞤫 𞤻𞤢𞤤𞤲𞤣𞤫 𞥒𞥑 𞤕𞤮𞤤𞤼𞤮 𞤳𞤢 𞤣𞤢𞥄𞤳𞤢 𞤅𞤢𞥄𞤥𞤮𞤪𞤭.

𞤏𞤮𞤲𞤢𞥄 𞤸𞤢𞤴 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲 𞤃𞤢𞥄𞤥𞤢𞤣𞤭 𞤁𞤵𞤥𞤦𞤵𞤴𞤢 𞤴𞤭𞥅𞤼𞤭𞤣𞤭 𞤫 𞤥𞤢𞤩𞥆𞤫. 𞤑𞤮 𞤅𞤢𞤣𞤭𞤦𞤢𞥄 𞤑𞤵𞤤𞤵𞤦𞤢𞤤𞤭⹁ 𞤸𞤮𞥅𞤪𞤫𞥅𞤶𞤮 𞤥𞤢𞤱𞤯𞤮 𞤳𞤮𞤲𞤭 𞤺𞤭𞤲𞤫 𞤯𞤭𞤲 𞤼𞤵𞤥𞤦𞤮𞤲’𞤣𞤭𞤪𞤭 𞤫 𞤥𞤢𞤩𞥆𞤫. 𞤉 𞤸𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤱𞤮𞤲𞤢𞥄 𞤅𞤫𞤤𞥆𞤵 𞤁𞤢𞤤𞤫𞤲 𞤫 𞤅𞤭𞤣𞤭𞤴𞤢 𞤼𞤵𞤲 𞤲𞤮𞤣𞥆𞤭𞤼𞤢𞤲𞤮𞥅. 𞤖𞤢𞤴 𞤸𞤮𞥅𞤪𞤫𞥅𞤩𞤫 𞤨𞤫𞤣𞤤𞤮𞤴 𞤨𞤢𞤥𞤢𞤪𞤮𞤴 𞤼𞤢𞤱𞤢𞤲𞤮 𞤳𞤮 𞤧𞤫𞤤𞤦𞤭𞤲𞤢 𞤶𞤮𞥅𞤯𞤲𞤣𞤫 𞤲𞤣𞤫𞤲 𞤱𞤮𞤲𞤢𞥄 𞤣𞤮𞥅 𞤳𞤮 𞤧𞤫𞤥𞤦𞤭𞤲𞤢 𞤼𞤵𞤥𞤦𞤮𞤲’𞤣𞤭𞤪𞤢𞤤 𞤲𞤺𞤢𞤤.

𞤖𞤮𞥅𞤪𞤫𞥅𞤶𞤮 𞤧𞤮𞥅𞤪𞤭 𞤮𞤲 𞤱𞤭𞤭⹁ 𞤯𞤫𞥅 𞤺𞤮𞤤𞥆𞤫 𞤯𞤫 𞤩𞤫 𞤬𞤵𞤯𞥆𞤭⹁ 𞤣𞤢𞤪𞤼𞤭𞤲𞤼𞤢𞥄𞤳𞤫 𞤸𞤢𞥄 𞤯𞤫 𞤺𞤢𞤧𞤢. 𞤑𞤮 𞤯𞤵𞤥 𞤬𞤭𞤪𞤼𞤭⹁ 𞤱𞤭𞤢𞥄𞤩𞤫 𞤩𞤫𞤲 𞤴𞤮 𞤴𞤢𞤤𞤼𞤵 𞤫 𞤳𞤵𞤩𞤫𞥅𞤶𞤫 𞤥𞤵𞤵𞤲⹁ 𞤴𞤮 𞤩𞤫 𞤴𞤢𞤤𞤼𞤵. 𞤌 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢 𞤸𞤢𞤴 𞤃𞤢𞤥𞤢𞤣𞤭 𞤁𞤵𞤥𞤦𞤵𞤴𞤢 𞤶𞤮𞤺𞤲𞤭𞤼𞤭𞥅 𞤲𞤮𞤳𞥆𞤵𞥅𞤪𞤫 𞤁𞤭𞤳𞤧𞤭𞤲 𞤲𞤣𞤫 𞤮 𞤻𞤢𞤱𞤤𞤭𞤲𞤮𞥅 𞤤𞤢𞥄𞤥𞤵 𞤲𞤺𞤵𞤲. 𞤅𞤢𞤣𞤭𞤦𞤢𞥄 𞤱𞤭𞤭 𞤳𞤢𞤣𞤭 𞤯𞤫𞥅 𞤺𞤮𞤤𞥆𞤫 𞤯𞤫 𞤩𞤫 𞤶𞤮𞤳𞥆𞤭⹁ 𞤤𞤢𞤥𞤯𞤮 𞤶𞤮𞥅𞤯𞥆𞤭𞤲𞤭𞤪𞤢𞥄𞤯𞤮 𞤧𞤵𞤩𞤮 𞤱𞤢𞥄𞤱𞤢𞤼𞤢𞥄 𞤯𞤫 𞤺𞤮𞤤𞥆𞤵𞤣𞤫. 𞤑𞤮 𞤳𞤢𞤥𞤩𞤫 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤼𞤢𞤲 𞤱𞤢𞥄𞤱𞤭 𞤯𞤫 𞤱𞤢𞤯𞤵𞤣𞤫.

𞤌 𞤱𞤭𞤭 𞤩𞤫 𞤲𞤮𞤲⹁ 𞤮 𞤸𞤵𞤥𞤨𞤭𞤼𞤭𞤳𞤫 𞤴𞤮𞤺𞤢 𞤫 𞤸𞤮𞥅𞤪𞤫𞥅𞤩𞤫 𞤩𞤫𞤲 𞤳𞤢 𞤣𞤢𞤱𞤪𞤮 𞤲𞤮 𞤧𞤫𞤲𞤣𞤭𞤼𞤵𞤣𞤫 𞤳𞤢𞥄𞤤𞤭𞤧𞤭 𞤳𞤢 𞤳𞤢𞤱𞤼𞤫 𞤲𞤺𞤢𞤥 𞤴𞤢𞤤𞤼𞤭𞤲𞤺𞤮𞤤 𞤧𞤵𞤳𞤢𞥄𞤩𞤫 𞤩𞤫𞤲 𞤳𞤢 𞤤𞤢𞥄𞤱𞤭. 𞤅𞤭 𞤩𞤫𞤲⹁ 𞤢𞤷𞥆𞤢𞥄𞤤𞤭 𞤯𞤵𞤥⹁ 𞤴𞤭𞥅𞤤𞤭𞤪𞤯𞤫 𞤥𞤢𞤩𞥆𞤫 𞤯𞤫𞤲 𞤧𞤮𞤳𞤫𞤼𞤫⹁ 𞤩𞤫 𞤼𞤮𞤽𞤢𞤲𞤫𞥅𞤦𞤳𞤢𞤣𞤭 𞤴𞤢𞤤𞤼𞤵𞤺𞤮𞤤 𞤺𞤭𞤲𞤫.

𞤑𞤮𞤲𞤮 𞤣𞤢𞤱𞤪𞤮𞥅𞤩𞤫 𞤩𞤫𞤲 𞤢𞤲𞤣𞤭𞤲𞤼𞤭𞤲𞤭 𞤥𞤮⹁ 𞤱𞤮𞤲𞤣𞤫𞤥𞤢 𞤲𞤣𞤫 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤬𞤮𞤤𞥆𞤵𞤲𞤮𞥅 𞤀𞤤𞤬𞤢𞥄 𞤑𞤮𞤲𞤣𞤫 𞤩𞤫 𞤰𞤫𞤼𞥆𞤭 𞤤𞤢𞥄𞤥𞤵 𞤲𞤺𞤵𞤲⹁ 𞤩𞤫 𞤬𞤵𞤣𞤵𞤲𞤮 𞤯𞤮𞤱𞤮𞤪𞤺𞤮𞤤 𞤲𞤵𞤲𞤯𞤢𞤤 𞤫 𞤧𞤢𞤪𞤭𞤴𞤢. 𞤔𞤮𞥅𞤲𞤭⹁ 𞤴𞤮 𞤩𞤫 𞤻𞤭𞥅𞤩𞤲𞤵 𞤲𞤣𞤫𞤲 𞤬𞤮𞤣𞤮𞥅𞤪𞤫 𞤥𞤢𞤩𞥆𞤫 𞤩𞤫 𞤢𞤷𞥆𞤢 𞤥𞤵𞤪𞤢𞥄𞤯𞤭 𞤯𞤭𞤲 𞤶𞤭𞤩𞤼𞤭𞤪𞤫𞥅 𞤧𞤢𞤪𞤭𞤴𞤢 𞤳𞤢𞤲. 𞤉 𞤸𞤮𞥅𞤪𞤫 𞤯𞤵𞤲 𞤳𞤢𞤣𞤭 𞤩𞤫 𞤼𞤮𞤪𞤭𞥅 𞤴𞤮 𞤶𞤵𞤲𞤼𞤢𞤤 𞤲𞤺𞤢𞤤 𞤶𞤢𞤩𞤵 𞤼𞤭𞥅𞤥𞤼𞤵𞤣𞤵𞤣𞤫 𞤫 𞤥𞤢𞤩𞥆𞤫 𞤧𞤮𞥅𞤲𞤣𞤮 𞤳𞤢𞤤𞤢. 𞤑𞤮 𞤯𞤵𞤥 𞤭𞤼𞥆𞤢𞤼𞤢 𞤢𞤲𞤺𞤢𞤤 𞤬𞤢𞥄𞤥𞤮𞤲’𞤣𞤭𞤪𞤢𞤤 𞤫 𞤤𞤵𞤪𞥆𞤫 𞤸𞤢𞤳𞥆𞤵𞤲’𞤣𞤫 𞤥𞤢𞤩𞥆𞤫.

𞤅𞤢𞤣𞤭𞤦𞤢𞥄 𞤑𞤵𞤤𞤵𞤦𞤢𞤤𞤭 𞤬𞤮𞤣𞤭𞥅 𞤩𞤫 𞤴𞤮𞤼𞥆𞤭𞤲𞤺𞤮𞤤 𞤸𞤢𞥄 𞤳𞤢 𞤸𞤢𞥄𞤲𞤣𞤵𞤯𞤮 𞤫 𞤴𞤮𞤼𞥆𞤭𞤲𞤫𞥅𞤣𞤫 𞤫 𞤥𞤵𞤵𞤲.