𞤑𞤮 𞤻𞤢𞤤𞤲𞤣𞤫 𞤺𞤮𞤮 𞤤𞤫𞤱𞤪𞤵 𞤲𞤦𞤮𞥅𞤴𞤮⹁ 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥖𞥐⹁ 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲 𞤧𞤭𞤲𞤷𞤢𞤲𞤭 𞤸𞤮𞥅𞤪𞤫 𞤥𞤵𞤲 𞤳𞤢𞥄𞤤𞤭𞤧𞤭 𞤳𞤮 𞤸𞤵𞥅𞤱𞤼𞤮𞤪𞤫𞥅 𞤫 𞤥𞤢𞤴𞤪𞤭. 𞤑𞤮 𞤸𞤢𞤲𞤣𞤫 𞤫 𞤺𞤮𞤮 𞤲𞤦𞤮𞥅𞤴𞤮 𞥒𞥐𞥒𞥑 𞤼𞤭𞤥𞥆𞤭 𞤣𞤵𞥅𞤩𞤭 𞥖𞥑 (𞤷𞤢𞤨𞥆𞤢𞤲𞤯𞤫 𞤶𞤫𞥅𞤺𞤮𞤮 𞤫 𞤺𞤮𞤮) 𞤺𞤭𞤤𞤢 𞤯𞤭 𞤧𞤭𞤲𞤷𞤢𞥄.

𞤂𞤢𞥄𞤥𞤵 𞤺𞤭𞤲𞤫 𞤲𞤺𞤵𞤲 𞤭𞤲𞥆𞤭 𞤯𞤭𞤲 𞤲𞤦𞤵𞥅𞤯𞤭 “𞤊𞤢𞤪𞤢𞤲 𞤘𞤭𞤲𞤫“. 𞤇𞤫 𞤴𞤫𞤪𞤭𞤲𞥋𞤣𞤭𞤪𞤭 𞤊𞤢𞤪𞤢𞤲 𞤘𞤭𞤲𞤫 𞤺𞤮𞥅𞤼𞤮 𞤉 𞤬𞤢𞤪𞤢𞤲 𞤅𞤫𞥅𞤬𞤢𞥄 𞤺𞤮𞥅𞤼𞤮 𞤥𞤢𞤤𞥆𞤢 𞤫 𞤬𞤫𞥅𞤷𞥆𞤫𞤪𞤫 𞤊𞤢𞤪𞤢𞤲 𞤊𞤢𞤪𞤢𞤲𞤧𞤭. (𞥑 FG = 𞥑 FCFA). 𞤑𞤮 𞤢𞤣𞤭𞥅 𞤯𞤭𞥅 𞤳𞤢𞥄𞤤𞤭𞤧𞤭𞥅𞤶𞤭 𞤧𞤭𞤲𞤷𞤫𞥅𞤲𞤣𞤫⹁ 𞤸𞤢𞤪𞤭 𞤘𞤭𞤲𞤫 𞤳𞤮 𞤊𞤢𞤪𞤢𞤲 𞤅𞤫𞥅𞤬𞤢𞥄 (FCFA) 𞤸𞤵𞥅𞤱𞤼𞤮𞤪𞤢𞤴𞤲𞤮𞥅 𞤱𞤢𞤲𞤮 𞤯𞤫𞤴𞤢 𞤤𞤫𞤴𞤯𞤫 𞤖𞤢𞥄𞤤𞤭-𞤬𞤢𞤪𞤢𞤲𞤧𞤫𞥅𞤶𞤫 𞤖𞤭𞤪𞤲𞤢 𞤀𞤬𞤪𞤭𞤳𞤢𞥄.

𞤊𞤭𞥅 𞤳𞤮 𞤣𞤢𞤱𞤪𞤢 𞤥𞤢𞤤𞥆𞤢 𞤳𞤮 𞤸𞤫𞤩𞥆𞤭𞤼𞤮𞥅 𞤯𞤭𞥅 𞤲𞤦𞤵𞥅𞤯𞤭 𞤧𞤭𞤲𞤷𞤢𞥄𞤯𞤭⹁ 𞤤𞤢𞥄𞤥𞤵 𞤲𞤺𞤵𞤲 𞤵𞤣𞥆𞤭𞤼𞤭 𞤃𞤢𞤲𞤳𞤭𞤪𞤺𞤢𞤤 𞤂𞤢𞤪𞤢𞤲𞤳𞤮𞤱𞤢𞤤 (Banque d’État)⹁ 𞤪𞤫𞤬𞤼𞤭 𞤩𞤫 𞤥𞤢𞤩𞥆𞤭 𞤥𞤢𞤲𞤳𞤭𞤪𞤯𞤫 𞤸𞤫𞤪𞤼𞤮𞤪𞤢𞥄𞤯𞤫 𞤯𞤫𞤲 𞤬𞤮𞤬 𞤫 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲. 𞤇𞤫 𞤼𞤮𞤽𞤭 𞤳𞤢𞤣𞤭 𞤵𞤣𞥆𞤵𞤼𞤵𞤺𞤮𞤤 𞤥𞤢𞤲𞤳𞤭𞤪𞤯𞤫 𞤳𞤫𞤧𞤫 𞤺𞤮𞤮. 𞤑𞤮 𞤱𞤮𞤲𞤭 𞤥𞤢𞤲𞤳𞤭𞤪𞤯𞤫 𞤸𞤢𞤤𞤮𞤪𞤢𞤤𞤶𞤫 𞤥𞤢𞤤𞥆𞤢 𞤸𞤫𞤪𞤼𞤮𞤪𞤢𞥄𞤯𞤫⹁ 𞤳𞤮 𞤥𞤢𞤲𞤳𞤭𞤪𞤯𞤫 𞤯𞤫 𞤤𞤢𞥄𞤥𞤵 𞤲𞤺𞤵𞤲 𞤶𞤫𞤴𞤢𞥄. 𞤘𞤭𞤤𞤢 𞤮𞤲𞤼𞤵𞤥𞤢 𞤸𞤢𞥄 𞤲𞤣𞤫 𞤅𞤫𞥅𞤳𞤵 𞤚𞤵𞥅𞤪𞤫𞥅 𞤥𞤢𞥄𞤴𞤭⹁ 𞤤𞤢𞥄𞤥𞤵 𞤘𞤭𞤲𞤫 𞤲𞤺𞤵𞤲 𞤲𞤫𞤱𞤲𞤢𞤲𞤢𞥄𞤤𞤭 𞤸𞤢𞤴 𞤺𞤮𞥅𞤼𞤮 𞤵𞤣𞥆𞤭𞤼𞤵𞤺𞤮𞤤 𞤥𞤢𞤲𞤳𞤭𞤪𞤺𞤢𞤤 𞤫 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲.

𞤑𞤮𞤲𞤮 𞤩𞤢𞥄𞤱𞤮 𞤯𞤭𞥅 𞤳𞤢𞥄𞤤𞤭𞤧𞤫𞥅𞤶𞤭 𞤴𞤤𞤢𞤼𞤭𞤲𞤫𞥅𞤣𞤫⹁ 𞤯𞤭 𞤸𞤫𞤩𞤵𞤲𞤮 𞤷𞤢𞤯𞤫𞥅𞤤𞤫 𞤯𞤵𞥅𞤯𞤵𞤯𞤫. 𞤐𞤮 𞤶𞤫𞤴𞤢𞥄 𞤫 𞤯𞤫𞤲⹁ 𞤲𞤣𞤫 𞤼𞤢𞤱𞤵𞤲𞤮𞥅⹁ 𞤊𞤢𞤪𞤢𞤲 𞤘𞤭𞤲𞤫⹁ 𞤳𞤮 𞤫 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲 𞤼𞤢𞤲 𞤸𞤵𞥅𞤱𞤼𞤫𞤪𞤼𞤫𞥅 𞤬𞤭𞥅 𞤧𞤵𞥅𞤣𞤵𞤺𞤮𞤤. 𞤐𞤣𞤫 𞤼𞤢𞤱𞤵𞤲𞤮𞥅 𞤶𞤢𞤲𞤢𞤲𞤩𞤫 𞤩𞤫𞤲 𞤧𞤭 𞤸𞤫𞤩𞤭𞥅 𞤳𞤢𞥄𞤤𞤭𞤧𞤭 𞤘𞤭𞤲𞤫⹁ 𞤩𞤫 𞤱𞤢𞥄𞤱𞤢𞤼𞤢𞥄 𞤲𞤢𞤼𞥆𞤵𞤣𞤫 𞤯𞤭 𞤳𞤢 𞤥𞤢𞤩𞥆𞤫⹁ 𞤯𞤵𞤥 𞤱𞤮𞤲𞤭 𞤧𞤢𞤦𞤵 𞤸𞤢𞥄 𞤊𞤢𞤪𞤢𞤲𞤧𞤭𞥅𞤩𞤫 𞤫 𞤶𞤢𞤲𞤢𞤲𞤩𞤫 𞤸𞤫𞤣𞥆𞤭𞤲𞤮𞥅𞤩𞤫 𞤘𞤭𞤲𞤫 𞤩𞤢𞥄𞤱𞤮 𞤲𞤣𞤭 𞤶𞤫𞤴𞤼𞤢𞥄𞤪𞤫 𞤲𞤣𞤫𞤲 𞤫 𞥑𞥙𞥕𞥘⹁ 𞤴𞤮 𞤥𞤢𞤩𞥆𞤵 𞤸𞤢𞥄𞤶𞤵𞥅𞤶𞤭 𞤥𞤵𞤲⹁ 𞤩𞤫 𞤪𞤵𞤼𞥆𞤮𞥅 𞤳𞤢 𞤥𞤢𞤩𞥆𞤫.

𞤐𞤣𞤫 𞤘𞤭𞤲𞤫 𞤸𞤫𞤩𞤼𞤵𞤲𞤮 𞤸𞤮𞥅𞤪𞤫 𞤥𞤵𞤲⹁ 𞤊𞤢𞤢𞤪𞤢𞤲𞤧𞤭 𞤼𞤮𞤽𞤵𞤲𞤮 𞤳𞤢𞤣𞤭 𞤭𞤼𞥆𞤵𞤺𞤮𞤤 𞤨𞤭𞥅𞤶𞤭 𞤊𞤢𞤪𞤢𞤲𞤧𞤭 𞤢𞤣𞥆𞤢 𞤯𞤭 𞤘𞤭𞤲𞤫 𞤥𞤢𞤤𞥆𞤢 𞤭𞤼𞥆𞤵𞤺𞤮𞤤 𞤳𞤢𞥄𞤤𞤭𞤧𞤭 𞤊𞤢𞤪𞤢𞤲𞤶𞤭 𞤲𞤢𞥄𞤣𞤢 𞤘𞤭𞤲𞤫. 𞤍𞤵𞤥 𞤱𞤮𞤲𞤭 𞤧𞤢𞤦𞤵 𞤸𞤢𞥄 𞤳𞤢𞥄𞤤𞤭𞤧𞤭𞥅𞤶𞤭 𞤤𞤫𞤴𞤯𞤫 𞤶𞤢𞤲𞤢𞤲𞤫 𞤯𞤫𞤲 𞤧𞤢𞤯𞤭 𞤫 𞤲𞤣𞤫𞤪 𞤘𞤭𞤲𞤫. 𞤉 𞤸𞤭𞤲𞤤𞤫 𞤳𞤮 𞤯𞤭𞤲 𞤴𞤭𞤥𞤩𞤫 𞤩𞤫𞤲 𞤸𞤵𞥅𞤱𞤼𞤮𞤪𞤼𞤢 𞤬𞤭𞥅 𞤧𞤮𞥅𞤣𞤮𞤴𞤺𞤮𞤤 𞤨𞤭𞥅𞤶𞤭 𞤳𞤢 𞤤𞤫𞤴𞤯𞤫 𞤶𞤢𞤲𞤢𞤲𞤫 𞤢𞤣𞥆𞤢 𞤘𞤭𞤲𞤫. 𞤐𞤣𞤫 𞤲𞤦𞤵𞥅𞤯𞤭 𞤶𞤢𞤲𞤢𞤲𞤭 𞤯𞤭𞤲 𞤧𞤢𞤯𞤵𞤲𞤮𞥅⹁ 𞤷𞤮𞤺𞥆𞤵 𞤥𞤢𞤶𞥆𞤭 𞤰𞤢𞤱𞤭 𞤬𞤮𞤼𞤢⹁ 𞤊𞤢𞤪𞤢𞤲 𞤘𞤭𞤲𞤫 𞤶𞤭𞤨𞥆𞤭𞥅 𞤬𞤮𞤼𞤢. 𞤐𞤣𞤫 𞤼𞤢𞤱𞤵𞤲𞤮𞥅 𞤨𞤭𞥅𞤶𞤭 𞤯𞤵𞥅𞤯𞤵𞤯𞤭 𞤳𞤮 𞤶𞤢𞤲𞤢𞤲𞤭𞤪𞤭 𞤭𞤱𞤢𞤴𞤲𞤮𞥅 𞤫 𞤸𞤭𞤲𞤤𞤫 𞤊𞤢𞤪𞤢𞤲 𞤘𞤭𞤲𞤫 𞤴𞤢𞤲𞤭𞥅⹁ 𞤷𞤮𞤺𞥆𞤵 𞤲𞤺𞤵𞤲 𞤰𞤢𞤱𞤭 𞤬𞤮𞤼𞤢 𞤳𞤢 𞤤𞤵𞥅𞤥𞤮𞥅𞤶𞤭.

𞤐𞤮 𞤨𞤭𞥅𞤶𞤭 𞤧𞤢𞤯𞤭𞤪𞤭 𞤱𞤮𞥅⹁ 𞤳𞤮 𞤲𞤮𞤲 𞤳𞤢𞤣𞤭 𞤳𞤢𞥄𞤤𞤭𞥅𞤧𞤭𞥅𞤶𞤭 𞤘𞤭𞤲𞤫 𞤩𞤵𞤪𞤼𞤭 𞤶𞤢𞥄𞤧𞤭𞤪𞤣𞤫.

𞤊𞤭𞥅 𞤲𞤮 𞤩𞤫 𞤸𞤫𞤩𞥆𞤭𞤼𞤮𞤪𞤢 𞤯𞤫𞤲 𞤷𞤢𞤯𞤫𞥅𞤤𞤫 𞤫 𞤲𞤮 𞤩𞤫 𞤶𞤵𞤺𞥆𞤭𞤲𞤭𞤪𞤢 𞤲𞤦𞤵𞥅𞤯𞤭 𞤯𞤭𞤲⹁ 𞤅𞤫𞥅𞤳𞤵 𞤚𞤵𞥅𞤪𞤫 𞤧𞤮𞤳𞤭 𞤳𞤫𞥅𞤪𞤭 𞤯𞤭𞤲. 𞤌 𞤼𞤮𞤽𞤢𞤲𞤭 𞤳𞤢𞤣𞤭 𞤴𞤭𞤥𞤩𞤫 𞤩𞤫𞤲 𞤴𞤫𞥅𞤴𞤵𞤺𞤮𞤤 𞤨𞤭𞥅𞤶𞤭 𞤯𞤵𞥅𞤯𞤵𞤯𞤭 𞤭𞤱𞤢𞤴𞤯𞤭 𞤳𞤢 𞤶𞤢𞤲𞤢𞤲𞤭𞤪𞤭⹁ 𞤱𞤢𞤲𞤮 𞤥𞤢𞥄𞤪𞤮⹁ 𞤧𞤵𞤳𞥆𞤢𞤪 𞤫 𞤳𞤮 𞤲𞤢𞤲𞤣𞤭 𞤫 𞤯𞤵𞤥.

𞤐𞤣𞤫 𞤻𞤢𞤯𞤫𞥅𞤤𞤫 𞤯𞤫𞤲 𞤯𞤵𞥅𞤯𞤵𞤲𞤮𞥅 𞤫 𞤬𞤭𞥅 𞤲𞤮 𞤩𞤫 𞤤𞤭𞤩𞤭𞤪𞤢 𞤴𞤫𞥅𞤴𞤮𞥅𞤩𞤫 𞤩𞤫𞤲⹁ 𞤻𞤢𞤤𞤲𞤣𞤫 𞥒 𞤒𞤢𞤪𞤳𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥗𞥒⹁ 𞤤𞤢𞥄𞤥𞤵 𞤲𞤺𞤵𞤲 𞤭𞤼𞥆𞤭 𞤊𞤢𞤪𞤢𞤲𞤶𞤭 𞤘𞤭𞤲𞤫 𞤯𞤭𞤲⹁ 𞤤𞤮𞤲𞤼𞤭𞤪𞤭𞤯𞤭 𞤯𞤭 𞤳𞤢𞥄𞤤𞤭𞤧𞤭𞥅𞤶𞤭 𞤳𞤫𞤧𞤭 𞤭𞤲𞥆𞤫𞤼𞤫𞥅𞤯𞤭 𞤅𞤭𞤤𞤭𞥅 (𞤻𞤭𞥅𞤱𞤢 𞤥𞤢𞤤𞥆𞤢 𞤥𞤢𞤱𞤦𞤢 𞤳𞤢 𞤧𞤮𞥅𞤧𞤮𞥅𞤪𞤫). 𞤊𞤢𞤪𞤢𞤲𞤶𞤭 𞤧𞤢𞤨𞥆𞤮⹁ 𞤤𞤮𞤲𞤼𞤭𞤲𞤭𞤪𞤢𞥄 𞤅𞤭𞤤𞤭𞥅𞤪𞤵 𞤱𞤮𞥅𞤼𞤵𞤪𞤵.

𞤋𞤼𞥆𞤵𞤺𞤮𞤤 𞤲𞤮𞤲 𞤊𞤢𞤪𞤢𞤲 𞤢𞤣𞥆𞤢 𞤅𞤭𞤤𞤭𞥅⹁ 𞤧𞤫𞤲𞤣𞤢𞥄𞤲𞤮 𞤘𞤭𞤲𞤫 𞤫 𞤷𞤢𞤯𞤫𞥅𞤤𞤫⹁ 𞤩𞤢𞤴𞤼𞤭 𞤳𞤫𞥅𞤪𞤭 𞤯𞤭𞤲 𞤧𞤮𞤳𞤼𞤢𞤲𞤮𞥅𞤳𞤢 𞤬𞤭𞥅 𞤲𞤮 𞤴𞤭𞤥𞤩𞤫 𞤩𞤫𞤲 𞤧𞤮𞥅𞤣𞤭𞤪𞤮𞤴𞤢 𞤨𞤭𞥅𞤶𞤭 𞤢𞤣𞥆𞤢 𞤺𞤭𞤲𞤫⹁ 𞤥𞤢𞤲𞤳𞤭𞤪𞤯𞤫 𞤯𞤫𞤲 𞤫 𞤴𞤫𞥅𞤴𞤭𞤪𞤤𞤫 𞤥𞤢𞤱𞤯𞤫 𞤯𞤫𞤲 𞤣𞤵𞤽𞤢𞤲𞤢𞤲𞤮𞥅𞤳𞤢 𞤳𞤢𞤣𞤭 𞤵𞤣𞥆𞤭𞤼𞤵𞤺𞤮𞤤.

𞤑𞤮𞤲𞤮 𞤫 𞤸𞤮𞥅𞤪𞤫 𞤯𞤵𞤥⹁ 𞤳𞤮 𞤅𞤭𞤤𞤭𞥅 𞤤𞤢𞥄𞤼𞤭𞤲𞤮𞥅 𞤲𞤦𞤵𞥅𞤯𞤭 𞤘𞤭𞤲𞤫 𞤯𞤭𞤲 𞤸𞤢𞥄 𞤤𞤢𞥄𞤥𞤵 𞤅𞤫𞥅𞤳𞤵 𞤚𞤵𞥅𞤪𞤫𞥅 𞤲𞤺𞤵𞤲 𞤬𞤫𞤰𞥆𞤭. 𞤑𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥘𞥔⹁ 𞤩𞤢𞥄𞤱𞤮 𞤥𞤢𞥄𞤴𞤣𞤫 𞤅𞤫𞥅𞤳𞤵 𞤚𞤵𞥅𞤪𞤫 𞤲𞤣𞤫𞤲⹁ 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤼𞤮𞤽𞤼𞤭 𞤲𞤺𞤫𞤴𞤺𞤵 𞤥𞤫 𞤣𞤵𞤽𞤭𞤲𞤭 𞤳𞤢𞤣𞤭 𞤥𞤢𞤩𞥆𞤭𞤼𞤵𞤺𞤮𞤤 𞤥𞤢𞤲𞤳𞤭𞤪𞤯𞤫 𞤸𞤢𞤤𞤮𞤪𞤢𞤤𞤶𞤫 𞤯𞤫𞤲. 𞤉 𞤸𞤭𞤼𞤢𞥄𞤲𞤣𞤫𞥑𞥙𞥘𞥕⹁ 𞤩𞤫 𞤭𞤼𞥆𞤭 𞤅𞤭𞤤𞤭⹁ 𞤩𞤫 𞤢𞤪𞤼𞤭𞤪𞤭 𞤊𞤢𞤪𞤢𞤲 𞤘𞤭𞤲𞤫 𞤯𞤭𞤲. 𞤅𞤭𞤤𞤭𞥅𞤪𞤵 𞤱𞤮𞥅𞤼𞤵𞤪𞤵 𞤤𞤮𞤲𞤼𞤭𞤲𞤭𞤪𞤢𞥄 𞤬𞤢𞤪𞤢𞤲𞤪𞤵 𞤱𞤮𞥅𞤼𞤵𞤪𞤵. 𞤙𞤢𞤤𞤲𞤣𞤫 𞤯𞤭 𞤴𞤢𞤤𞤼𞤭𞤲𞤢𞤲𞤮𞥅⹁ 𞤸𞤢𞤪𞤭 𞤬𞤢𞤪𞤢𞤲 𞤘𞤭𞤲𞤫 𞤲𞤮 𞤬𞤮𞤼𞤢 𞤫 𞤊𞤢𞤪𞤢𞤲 𞤅𞤫𞥅𞤬𞤢𞥄 𞤺𞤮𞥅𞤼𞤮. 𞤑𞤮𞤲𞤮 𞤸𞤢𞤲𞤣𞤫 𞤊𞤢𞤪𞤢𞤲 𞤅𞤫𞥅𞤬𞤢 𞤺𞤮𞥅𞤼𞤮 𞤲𞤮 𞤬𞤮𞤼𞤢 𞤫 𞤊𞤢𞤪𞤢𞤲𞤶𞤭 𞤘𞤭𞤲𞤫  𞥑𞥙.        

𞤄𞤋𞤅𞤋𞤘𞤋 𞤘𞤋𞤐𞤉 BICIGUI

𞤑𞤮 𞤵𞤣𞥆𞤭𞤼𞤵𞤺𞤮𞤤 𞤤𞤫𞤴𞤣𞤭 𞤲𞤣𞤭𞤲 𞤫 𞤣𞤵𞤽𞤭𞤲𞤺𞤮𞤤 𞤲𞤺𞤫𞤴𞤲𞤺𞤵⹁ 𞤱𞤮𞤲𞤭 𞤧𞤢𞤦𞤵 𞤴𞤮 𞤥𞤢𞤲𞤳𞤭𞤪𞤺𞤢𞤤 𞤤𞤫𞤴𞤣𞤭 𞤊𞤢𞤪𞤢𞤲𞤧𞤭 𞤭𞤲𞥆𞤫𞤼𞤫𞥅𞤲𞤺𞤢𞤤   𞤄𞤫𞥅-𞤉𞤲-𞤆𞤫𞥅 𞤆𞤢𞤪𞤭𞤦𞤢𞥄 BNP Paribas 𞤢𞤪𞤵 𞤘𞤭𞤲𞤫 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥘𞥕⹁ 𞤵𞤣𞥆𞤭𞤼𞤢 𞤧𞤢𞤤𞤲𞤣𞤵 𞤱𞤭𞤫𞤼𞤫𞥅𞤲𞤣𞤵 𞤄𞤭𞤧𞤭𞤺𞤭 (BICIGUI). 𞤘𞤭𞤲𞤫 𞤸𞤫𞤩𞤭  𞤶𞤫𞤴𞤢𞤤 𞤫 𞤲𞤣𞤵𞤲 𞤧𞤢𞤤𞤲𞤣𞤵⹁ 𞤳𞤮𞤲𞤮 𞤳𞤮 𞤄𞤫𞥅-𞤉𞤲-𞤆𞤫𞥅 𞤆𞤢𞤪𞤭𞤦𞤢𞥄 𞤩𞤵𞤪𞤵𞤲𞤮𞥅. 𞤖𞤭𞤩𞤫 𞤶𞤫𞤴𞤵𞤲𞤮𞥅 𞤳𞤮 𞤴𞤢𞤱𞤼𞤭 𞥕𞥕% (𞤆𞤫𞤷𞥆𞤫 𞥕𞥕 𞤫 𞤲𞤣𞤫𞤪 𞤼𞤫𞥅𞤥𞤫𞤣𞤫𞤪𞤫). 𞤘𞤭𞤲𞤫 𞤳𞤮 𞥗% 𞤼𞤢𞤲 𞤶𞤫𞤴𞤵𞤲𞤮𞥅 𞤫 𞤄𞤭𞤧𞤭𞤺𞤭.

𞤑𞤮𞤲𞤮 𞤫 𞤴𞤢𞤪𞤳𞤮 𞥒𞥐𞥒𞥐⹁ 𞤄𞤫𞥅-𞤉𞤲-𞤆𞤫𞥅 𞤆𞤢𞤪𞤭𞤦𞤢𞥄 (BNP Paribas)⹁ 𞤴𞤫𞥅𞤴𞤵𞤼𞤵𞤲𞤮 𞤶𞤫𞤴𞤢𞤤 𞤥𞤵𞤲 𞤲𞤺𞤢𞤤 𞤫 𞤄𞤋𞤅𞤋𞤘𞤋. 𞤑𞤮 𞤥𞤢𞤲𞤳𞤭𞤪𞤺𞤢𞤤 𞤭𞤲𞥆𞤫𞤼𞤫𞥅𞤲𞤺𞤢𞤤 𞤏𞤭𞤧𞤼𞤢 𞤄𞤢𞤲𞤳 (Vista Bank) 𞤱𞤮𞤲𞤭 𞤳𞤮 𞤀𞤤𞤬𞤢𞥄 𞤑𞤮𞤲𞤣𞤫 𞤧𞤵𞤩𞤭𞤲𞤮𞥅 𞤳𞤮 𞤧𞤮𞥅𞤣𞤭𞤼𞤢 𞤄𞤋𞤅𞤋𞤘𞤋 𞤬𞤭𞥅 𞤳𞤢𞤤𞤢 𞤱𞤮𞤲𞤢𞥄 𞤩𞤫𞤲 𞤄𞤉.𞤉𞤐.𞤆𞤉 (BNP) 𞤬𞤢𞥄𞤤𞤢𞥄𞤲𞤮𞥅. 𞤅𞤢𞤺𞤮 𞤄𞤉.𞤉𞤐.𞤆𞤉 (BNP)⹁ 𞤳𞤮 𞤑𞤮𞤼𞤣𞤭𞤱𞤢𞤪𞤲𞤢𞥄𞤶𞤮 𞤭𞤲𞥆𞤫𞤼𞤫𞥅𞤯𞤮 𞤄𞤫𞤪𞤲𞤢𞥄𞤪 𞤁𞤮𞤧𞤮𞤲𞤺𞤭𞥅 𞤑𞤮𞤲𞤫⹁ 𞤶𞤫𞤴𞤯𞤮 𞤀𞤼𞤤𞤢𞤲𞤼𞤭𞤳 𞤊𞤢𞤲𞤢𞤧𞤭𞤴𞤮𞤤 𞤘𞤪𞤵𞤨 (Atlantic Financial Group) 𞤧𞤮𞥅𞤣𞤭𞤼𞤢𞤴𞤲𞤮𞥅 𞤧𞤢𞤤𞤲𞤣𞤵 𞤥𞤢𞤩𞥆𞤫 𞤲𞤣𞤵𞤲 𞤘𞤭𞤲𞤫.

𞤜𞤭𞤧𞤼𞤢 𞤄𞤢𞤲𞤳 𞤲𞤮 𞤶𞤮𞤺𞤭𞤲𞤮𞥅 𞤧𞤢𞤤𞤲𞤺𞤵 𞤫 𞤲𞤣𞤫𞤪 𞤘𞤭𞤲𞤫. 𞤅𞤮𞥅𞤣𞤵𞤼𞤵𞤺𞤮𞤤 𞤄𞤋𞤅𞤋𞤘𞤋 𞤱𞤢𞤯𞤭𞥅 𞤜𞤋𞤅𞤚𞤀 𞤥𞤢𞤲𞤳𞤭𞤪𞤺𞤢𞤤 𞤩𞤵𞤪𞤵𞤲𞥋𞤺𞤢𞤤 𞤥𞤢𞤱𞤲𞤵𞤣𞤫 𞤫 𞤶𞤢𞥄𞤤𞤢𞥄𞤣𞤫 𞤲𞤣𞤫𞤪 𞤘𞤭𞤲𞤫. 𞤏𞤭𞤧𞤼𞤢 𞤲𞤮 𞤥𞤢𞤪𞤭 𞤳𞤢𞤣𞤭 𞤷𞤢𞤤𞤯𞤭 𞤫 𞤲𞤣𞤫𞤪 𞤅𞤢𞤪𞤤𞤮𞤲⹁ 𞤘𞤢𞤥𞤦𞤭𞤴𞤢 𞤫 𞤄𞤵𞤪𞤳𞤭𞤲𞤢.