𞤋𞤅𞤃𞤀𞥄𞤒𞤋𞥅𞤂𞤀 𞤅𞤋𞥅𞤅𞤉 𞤊𞤉𞤎𞥆𞤋𞤐𞤋𞥅

𞤋𞤧𞤥𞤢𞥄𞤴𞤭𞥅𞤤𞤢 𞤅𞤭𞥅𞤧𞤫⹁ 𞤸𞤮𞥅𞤪𞤫𞥅𞤶𞤮 𞤤𞤭𞤣𞥆𞤮 𞤤𞤢𞥄𞤥𞤵 𞤲𞤺𞤵𞤲 𞤃𞤢𞤤𞤭⹁ 𞤤𞤢𞥄𞤼𞤭𞤲𞤮𞥅𞤯𞤮 𞤳𞤢𞤣𞤭 𞤸𞤮𞥅𞤪𞤫𞥅𞤶𞤮 𞤬𞤫𞤣𞥆𞤫 URD 𞤲𞤣𞤫𞤲 𞤬𞤫𞤰𞥆𞤭𞤲𞤭𞥅 𞤸𞤢𞤲𞤣𞤫 𞤆𞤢𞤪𞤭⹁ 𞤤𞤢𞥄𞤥𞤮𞤪𞤣𞤫 𞤊𞤢𞤪𞤢𞤲𞤧𞤭. 𞤑𞤮 𞤻𞤢𞤱𞤵 𞤑𞤮𞤾𞤭𞤣-𞥑𞥙 𞤱𞤮𞤲𞤭 𞤧𞤢𞤦𞤵 𞤥𞤢𞤳𞥆𞤮. 𞤑𞤮 𞤣𞤵𞥅𞤩𞤭 𞤷𞤢𞤨𞥆𞤢𞤲𞤯𞤫 𞤶𞤫𞥅𞤯𞤭𞤯𞤭 𞤫 𞤺𞤮𞤮 (𞥗𞥑) 𞤮 𞤬𞤫𞤰𞥆𞤭𞤲𞤭𞤪𞤭. 𞤏𞤵𞤪𞤭𞤲 𞤼𞤭𞤥𞥆𞤢𞥄𞤤𞤭 𞤸𞤢𞤴 𞤤𞤫𞤦𞥆𞤭 𞤲𞤢𞤴 𞤺𞤭𞤤𞤢 𞤮 𞤸𞤫𞤩𞤼𞤭 𞤸𞤮𞥅𞤪𞤫 𞤥𞤢𞤳𞥆𞤮. 𞤑𞤮 𞤻𞤢𞤤𞤲𞤣𞤫 𞥖 𞤒𞤢𞤪𞤳𞤮 𞥒𞥐𞥒𞥐⹁ 𞤮 𞤸𞤫𞤩𞤼𞤭 𞤸𞤮𞥅𞤪𞤫 𞤥𞤢𞤳𞥆𞤮 𞤶𞤵𞥅𞤯𞤫 𞤥𞤮𞤶𞤮𞤦𞤫𞤪𞤫 𞤔𞤢𞤥𞤢𞥄𞤼 𞤐𞤢𞤧𞤢𞤪𞤢𞤤 𞤋𞤧𞤤𞤢𞥄𞤥 𞤏𞤢𞤤 𞤃𞤵𞤧𞤤𞤭𞤥𞤭𞥅𞤲. 𞤖𞤢𞤪𞤭 𞤺𞤭𞤤𞤢 𞥒𞥖 𞤐𞤦𞤮𞥅𞤴𞤮⹁ 𞤲𞤣𞤫𞥅 𞤬𞤫𞤣𞥆𞤫 𞤲𞤮 𞤶𞤮𞤺𞤭𞥅 𞤥𞤮.

𞤀𞤣𞤮 𞤮 𞤧𞤭𞤲𞤷𞤵𞤣𞤫 URD 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥐𞥓⹁ 𞤳𞤮 𞤫 ADEMA (𞤀𞤁𞤉𞤃𞤀)⹁ 𞤬𞤫𞤣𞥆𞤫 𞤀𞤤𞤬𞤢𞥄 𞤓𞤥𞤢𞤪𞤵 𞤑𞤮𞤲𞤢𞥄𞤪𞤫 𞤲𞤣𞤫𞤲⹁ 𞤮 𞤶𞤫𞤴𞤢𞤲𞤮𞥅. 𞤐𞤣𞤫 𞤑𞤮𞤲𞤢𞥄𞤪𞤫 𞤤𞤢𞥄𞤥𞤭𞤲𞤮𞥅 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥙𞥒⹁ 𞤮 𞤤𞤢𞥄𞤼𞤭𞥅 𞤄𞤭𞤲𞤣𞤮 𞤃𞤢𞤱𞤯𞤮 𞤖𞤮𞥅𞤪𞤫𞥅𞤺𞤵 𞤃𞤢𞤤𞤭 𞤲𞤺𞤵𞤲. 𞤇𞤢𞥄𞤱𞤮 𞤯𞤵𞤥⹁ 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥙𞥓⹁ 𞤮 𞤼𞤮𞤯𞥆𞤢𞥄 𞤱𞤮𞤲𞤵𞤺𞤮𞤤 𞤶𞤢𞥄𞤺𞤮𞤪𞤢𞥄𞤯𞤮 𞤮𞤲 𞤳𞤢 𞤐𞤺𞤢𞤤𞤵. 𞤁𞤵𞥅𞤩𞤭 𞤶𞤫𞥅𞤯𞤭𞤯𞤭 𞤮𞤥𞤮 𞤫 𞤲𞤺𞤢𞤤 𞤶𞤢𞥄𞤺𞤮𞤪𞤢𞤤 𞤸𞤢𞥄 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥐𞥐. 𞤐𞤣𞤫𞤲⹁ 𞤮 𞤱𞤢𞤯𞤢𞥄 𞤶𞤢𞥄𞤺𞤮𞤪𞤢𞥄𞤯𞤮 𞤬𞤭𞥅 𞤸𞤵𞥅𞤲𞤣𞤢𞥄𞤪𞤭 𞤫 𞤬𞤭𞥅 𞤷𞤢𞤫. 𞤑𞤮𞤲𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥐𞥒⹁ 𞤮 𞤶𞤮𞤺𞤲𞤭𞤼𞤭 𞤶𞤢𞥄𞤺𞤮𞤪𞤢𞤤 𞤲𞤺𞤢𞤤 𞤬𞤭𞥅 𞤲𞤮 𞤸𞤭𞤤𞤲𞤮𞤪𞤢 𞤬𞤭𞥅 𞤧𞤵𞤩𞤮 𞤧𞤢𞥄𞤼𞤭𞥅𞤲𞤮𞥅𞤲𞤺𞤮 𞤲𞤺𞤮𞤲 𞤬𞤭𞥅 𞤤𞤮𞤲𞤼𞤢𞤺𞤮𞤤 𞤀𞤤𞤬𞤢𞥄 𞤓𞤥𞤢𞤪𞤵 𞤑𞤮𞤲𞤢𞥄𞤪𞤫. 𞤐𞤣𞤫𞤲⹁ 𞤬𞤫𞤣𞥆𞤫 𞤀𞤁𞤉𞤃𞤀 𞤲𞤣𞤫𞤲 𞤧𞤵𞤩𞤭𞥅 𞤥𞤮 𞤳𞤮 𞤣𞤢𞤪𞤮𞥅 𞤫 𞤭𞤲𞤣𞤫 𞤥𞤢𞤩𞥆𞤫. 𞤑𞤮𞤲𞤮 𞤚𞤵𞤥𞤢𞥄𞤲𞤭 𞤚𞤵𞥅𞤪𞤫 𞤬𞤮𞥅𞤤𞤭𞥅 𞤥𞤮. 𞤑𞤮 𞤷𞤢𞤺𞥆𞤢𞤤 𞤯𞤵𞤥 𞤮 𞤴𞤢𞤤𞤼𞤭 𞤫 𞤀𞤁𞤉𞤃𞤀⹁ 𞤮 𞤧𞤭𞤲𞤷𞤭 URD.

𞤇𞤢𞥄𞤱𞤼𞤭 𞤯𞤵𞤥⹁ 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥐𞥔⹁ 𞤮 𞤱𞤢𞤯𞤢𞥄 𞤸𞤮𞥅𞤪𞤫𞥅𞤶𞤮 𞤆𞤮𞤼𞥆𞤢𞤤 𞤐𞤺𞤢𞤤𞤵 𞤫 𞤑𞤢𞥄𞤤𞤭𞤧𞤭 𞤖𞤭𞤪𞤲𞤢 𞤀𞤊𞤪𞤭𞤳𞤢𞥄 (UEMOA).

𞤃𞤢𞥄𞤴𞤣𞤫 𞤋𞤧𞤥𞤢𞥄𞤴𞤭𞥅𞤤𞤢 𞤅𞤭𞥅𞤧𞤫𞥅 𞤲𞤮 𞤶𞤮𞤳𞥆𞤮𞤲𞥋𞤣𞤭𞤪𞤭 𞤫 𞤥𞤢𞥄𞤴𞤣𞤫 𞤀𞤸𞤥𞤢𞤣𞤵 𞤚𞤵𞤥𞤢𞥄𞤲𞤭 𞤚𞤵𞥅𞤪𞤫⹁ 𞤤𞤢𞥄𞤼𞤭𞥅𞤲𞤮𞥅𞤯𞤮 𞤮𞤲 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤃𞤢𞤤𞤭 𞤲𞤣𞤭𞤲 𞤺𞤭𞤤𞤢 𞥒𞥐𞥐𞥒 𞤸𞤢𞥄 𞤫 𞥒𞥐𞥑𞥒. 𞤚𞤵𞤥𞤢𞥄𞤲𞤭 𞤚𞤵𞥅𞤪𞤫⹁ 𞤳𞤮 𞤫 𞤤𞤫𞤱𞤪𞤵 𞤔𞤮𞤤𞤮 𞤬𞤫𞤰𞥆𞤵𞤲𞥋𞤣𞤵 𞤯𞤮𞥅⹁ 𞤻𞤢𞤤𞤲𞤣𞤫 𞥙 𞤥𞤢𞤴𞤪𞤵 𞤮 𞤬𞤫𞤰𞥆𞤭𞤲𞤭. 𞤑𞤮 𞤣𞤵𞥅𞤩𞤭 𞤷𞤢𞤨𞥆𞤢𞤲𞤯𞤫 𞤶𞤫𞥅𞤯𞤭𞤯𞤭 𞤫 𞤯𞤭𞤯𞤭 (𞥗𞥒) 𞤮 𞤬𞤫𞤰𞥆𞤭𞤲𞤭𞤪𞤭. 𞤑𞤢𞤲𞤳𞤮 𞤳𞤮 𞤻𞤢𞤱𞤵 𞤩𞤫𞤪𞤲𞤣𞤫 𞤱𞤮𞤲𞤭 𞤧𞤢𞤦𞤵 𞤥𞤢𞤳𞥆𞤮.

𞤑𞤮 𞤫 𞥑𞥙𞥙𞥑⹁ 𞤚𞤵𞤥𞤢𞥄𞤲𞤭 𞤚𞤵𞥅𞤪𞤫 𞤢𞤣𞤭𞤲𞤮𞥅 𞤤𞤢𞥄𞤥𞤢𞥄𞤣𞤫 𞤃𞤢𞤤𞤭. 𞤑𞤮 𞤃𞤵𞥅𞤧𞤢 𞤚𞤢𞤪𞤢𞤱𞤮𞤪𞤫 𞤮 𞤬𞤮𞤤𞥆𞤵𞤲𞤮𞥅. 𞤌𞤲 𞤯𞤮𞤲 𞤳𞤢𞤣𞤭 𞤳𞤮 𞤸𞤭𞤳𞥆𞤢 𞤯𞤮𞥅 𞤮 𞤬𞤫𞤰𞥆𞤭𞤲𞤭𞥅⹁ 𞤻𞤢𞤤𞤲𞤣𞤫 𞥑𞥕 𞤅𞤭𞤤𞤼𞤮 𞥒𞥐𞥒𞥐. 𞤑𞤮 𞤣𞤵𞥅𞤩𞤭 𞤷𞤢𞤨𞥆𞤢𞤲𞤯𞤫 𞤶𞤫𞥅𞤼𞤢𞤼𞤭 𞤫 𞤼𞤢𞤼𞤭 (𞥘𞥓) 𞤮 𞤬𞤫𞤰𞥆𞤭𞤲𞤭𞤪𞤭.

𞤐𞤺𞤵𞥅 𞤻𞤢𞤱𞤵 𞤑𞤮𞤾𞤭𞤣-𞥑𞥙 𞤱𞤮𞤲𞤵𞤲𞥋𞤺𞤵 𞤧𞤢𞤦𞤵 𞤋𞤧𞤥𞤢𞥄𞤴𞤭𞥅𞤤𞤢 𞤅𞤭𞥅𞤧𞤫⹁ 𞤸𞤮𞤤𞥆𞤭𞥅 𞤱𞤮𞤲𞤣𞤫 𞤲𞤺𞤵 𞤢𞤷𞥆𞤭𞤪𞤼𞤢𞥄 𞤺𞤮𞥅𞤼𞤮 𞤧𞤢𞤦𞤵 𞤣𞤢𞤪𞤲𞤣𞤫 𞤮𞤲𞤼𞤭𞤺𞤭⹁ 𞤥𞤢𞥄 𞤶𞤢𞤱𞤣𞤭 𞤮𞤲𞤼𞤭𞤺𞤭. 𞤐𞤺𞤵 𞤢𞤤𞤢𞥄 𞤤𞤫 𞤳𞤢𞤣𞤭 𞤤𞤫𞤳𞥆𞤭 𞤼𞤢𞤸𞤮. 𞤃𞤮 𞤳𞤢𞤤𞤢 𞤲𞤮 𞤸𞤢𞥄𞤲𞤭 𞤪𞤫𞥅𞤲𞤼𞤢𞥄𞤣𞤫. 𞤌𞤲𞤼𞤭𞤺𞤭 𞤲𞤮 𞤸𞤢𞥄𞤲𞤭 𞤻𞤫𞤥𞤼𞤭𞤲𞤣𞤫 𞤴𞤢𞤥𞤭𞤪𞤮𞥅𞤶𞤮 𞤣𞤢𞤯𞤲𞤭𞤼𞤮𞤪𞤯𞤫 𞤯𞤫𞤲. 𞤍𞤫𞤲 𞤳𞤮:
𞥑 – 𞤔𞤓𞥅𞤍𞤉 𞤍𞤉𞤐, 𞤤𞤮𞥅𞤼𞤢 𞤯𞤫 𞤧𞤮𞥅𞤲𞤮 𞤳𞤢𞤤𞤢. 𞤌𞤲𞤼𞤭𞤺𞤭 𞤧𞤮𞥅𞤯𞤮𞤪𞤢 𞤧𞤢𞥄𞤦𞤵𞤲𞤣𞤫 𞤫 𞤲𞤣𞤭𞤴𞤢𞤲 𞤤𞤢𞥄𞤩𞤵𞤯𞤢𞤲
𞥒 – 𞤅𞤌𞤇𞥆𞤓𞤐𞥋𞤁𞤓 𞤐𞤁𞤓𞤐⹁ 𞤯𞤮𞤶𞥆𞤢 𞤥𞤢𞥄 𞤭𞥅𞤤𞤢 𞤫 𞤲𞤣𞤫𞤪 𞤥𞤢𞤴𞤪𞤵.
𞥓 – 𞤒𞤉𞥅𞤅𞤌 𞤐𞤘𞤌𞤐⹁ 𞤱𞤮𞤼𞤢 𞤮𞤲𞤼𞤭𞤺𞤭 𞤥𞤫𞥅𞤥𞤵 𞤲𞤺𞤮⹁ 𞤼𞤫𞤲𞤼𞤭𞤲𞤭𞥅 𞤧𞤮 𞤶𞤵𞥅𞤯𞤫 𞤯𞤫𞤲 𞤤𞤢𞥄𞤩𞤢𞥄.
𞥔 – 𞤚𞤉𞤆𞥆𞤉 𞤚𞤀𞤚𞤋⹁ 𞤴𞤮 𞤯𞤵𞤥 𞤱𞤮𞤲𞤵 𞤸𞤢𞤳𞥆𞤵𞤲’𞤣𞤫 𞤮𞤲𞤼𞤭𞤺𞤭 𞤫 𞤴𞤭𞤥𞤩𞤫 𞤩𞤫𞤲.
𞥕 – 𞤃𞤌 𞤅𞤌𞤋𞥅 𞤲𞤢𞤱𞤲𞤵𞤣𞤫⹁ 𞤴𞤮 𞤤𞤵𞤼𞥆𞤫𞥅 𞤳𞤢 𞤧𞤵𞥅𞤣𞤵 𞤥𞤵𞤲.
𞥖 – 𞤅𞤓𞥅𞤃𞤀 𞤳𞤭𞤲𞤢𞤤 𞤲𞤺𞤢𞤤 𞤫 𞤸𞤵𞤲𞤣𞤵𞤳𞤮 𞤳𞤮𞤲 𞤧𞤮 𞤼𞤢𞤱𞤭𞥅 𞤮𞤲𞤼𞤭𞤺𞤭 𞤴𞤢𞤤𞤼𞤢𞤴.