𞤌 𞤏𞤀𞤈𞤋 𞤒𞤓𞤃𞥆𞤀 𞤃𞤀𞤑𞥆𞤌 𞤊𞤋𞥅 𞤊𞤉𞤂𞤌𞥅𞤈𞤉

𞤃𞤵𞥅𞤧𞤢 𞤑𞤢𞤥𞤢𞤪𞤢⹁ 𞤥𞤮 𞤣𞤵𞥅𞤩𞤭 𞥒𞥒⹁ 𞤸𞤮𞤯𞤵𞤯𞤮 𞤖𞤢𞤪𞤤𞤫𞤥 𞤫 𞤲𞤣𞤫𞤪 𞤐𞤭𞤱 𞤒𞤮𞤪𞤳 𞤲𞤮 𞤱𞤢𞤪𞤭 𞤴𞤵𞤥𞥆𞤢 𞤥𞤵𞤲  𞤬𞤭𞥅 𞤮𞤲 𞤲𞤮 𞤱𞤭𞤭 𞤴𞤮 𞤮 𞤢𞤷𞥆𞤵 𞤨𞤵𞥅𞤴𞤲𞤣𞤢𞤲 𞤮 𞤯𞤢𞤩𞥆𞤢 𞤺𞤮𞤤𞥆𞤫          

𞤣𞤫𞤦𞥆𞤮 𞤮𞤲 𞤳𞤮 𞤊𞤢𞥄𞤼𞤵𞤥𞤢𞤼𞤢 𞤁𞤢𞤲𞤧𞤮 𞤔𞤢𞤴𞤼𞤫 𞤭𞤲𞥆𞤫𞤼𞤫𞥅⹁ 𞤳𞤮 𞤥𞤮 𞤣𞤵𞥅𞤩𞤭 𞤷𞤢𞤨𞥆𞤢𞤲𞤯𞤫 𞤲𞤢𞤴𞤭. 𞤖𞤮𞤥𞤮 𞤥𞤢𞤪𞤭 𞤩𞤭𞤯𞤩𞤫 𞤲𞤶𞤫𞥅𞤼𞤢𞤼𞤮.  𞤑𞤮 𞤳𞤢 𞤸𞤮𞥅𞤪𞤫 𞤃𞤵𞥅𞤧𞤢𞥄 𞤬𞤫𞤼𞤤𞤭 𞤥𞤮 𞤩𞤢𞥄𞤱𞤮  𞤩𞤫 𞤴𞤫𞤣𞥆𞤮𞤲𞥋𞤣𞤭𞤪𞤣𞤫 𞤬𞤭𞥅 𞤧𞤢𞤤𞤢𞥄𞤪𞤫 𞤃𞤵𞥅𞤧𞤢 𞤯𞤢𞤩𞥆𞤵𞤺𞤮𞤤 𞤺𞤮𞤤𞥆𞤫. 𞤍𞤵𞤥 𞤳𞤮 𞤸𞤢𞤲𞤳𞤭 𞤫 𞤥𞤢𞤱𞤦𞤢𞥄𞤪𞤫⹁ 𞤻𞤢𞤤𞤲𞤣𞤫 𞥒𞥖 𞤧𞤭𞥅𞤤𞤮 𞤱𞤢𞤯𞤭 𞤳𞤢 𞤩𞤢𞥄𞤱𞤮 𞤺𞤫𞥅𞤰𞤫.

𞤂𞤫𞤦𞥆𞤭 𞤶𞤫𞥅𞤺𞤮𞥅 𞤩𞤢𞥄𞤱𞤮 𞤲𞤺𞤮𞥅 𞤱𞤢𞤪𞤲𞤺𞤮⹁ 𞤸𞤢𞤪𞤭 𞤃𞤵𞥅𞤧𞤢 𞤳𞤢𞤥𞤦𞤢𞤲𞤭𞥅𞤲𞤮 𞤴𞤵𞤥𞥆𞤢 𞤥𞤵𞤲⹁ 𞤮 𞤢𞥄𞤣𞤭𞥅 𞤮 𞤱𞤢𞤪𞤢𞤴 𞤥𞤮. 𞤑𞤮𞤲𞤮 𞤴𞤵𞤥𞥆𞤢 𞤥𞤢𞤳𞥆𞤮 𞤱𞤵𞤤𞥆𞤭𞤼𞤮𞤴𞤭𞥅 𞤳𞤢 𞤧𞤢𞤪𞤭𞤴𞤢 𞤪𞤮𞤱𞤢𞤲𞤭 𞤫 𞤔𞤵𞤳𞤮 𞥒𞥐𞥒𞥐. 𞤐𞤣𞤫𞤲 𞤼𞤵𞤥𞤢𞥄𞤪𞤫⹁ 𞤻𞤢𞥄𞤱𞤮𞥅𞤱𞤮 𞤮𞤲 𞤼𞤮𞤽𞤢𞤲𞤭 𞤃𞤵𞥅𞤧𞤢𞥄 𞤩𞤢𞤣𞤢𞤺𞤮𞤤 𞤴𞤵𞤥𞥆𞤢 𞤥𞤵𞤲. 𞤑𞤮𞤲𞤮 𞤲𞤣𞤫 𞤴𞤵𞤥𞥆𞤢 𞤥𞤢𞤳𞥆𞤮 𞤧𞤢𞤤𞤭𞤲𞤮𞥅 𞤧𞤫𞥅𞤣𞤭𞤼𞤮𞤴𞤢𞥄𞤣𞤫 𞤻𞤢𞤤𞤲𞤣𞤫 𞤻𞤢𞥄𞤱𞤮𞤪𞤫 𞤲𞤣𞤫𞤲 𞤸𞤢𞤲𞤳𞤭⹁ 𞤨𞤢𞤱𞤫 𞤃𞤵𞥅𞤧𞤢𞥄 𞤯𞤫𞤲 𞤱𞤮𞤨𞥆𞤢𞥄.

𞤑𞤮 𞤸𞤢𞤲𞤳𞤭 𞤳𞤭𞥅𞤳𞤭𞥅𞤯𞤫 𞤳𞤢𞤣𞤭 𞤮 𞤱𞤢𞤪𞤭 𞤴𞤵𞤥𞥆𞤢 𞤥𞤢𞤳𞥆𞤮. 𞤘𞤮𞥅𞤼𞤮 𞤫 𞤦𞤢𞤲𞤣𞤭𞤪𞤢𞥄𞤩𞤫 𞤊𞤢𞥄𞤼𞤵𞤥𞤢𞤼𞤢 𞤩𞤫𞤲 𞤱𞤭𞤭⹁ 𞤩𞤫 𞤢𞤲𞤣𞤢𞥄 𞤲𞤮 𞤃𞤵𞥅𞤧𞤢𞥄 𞤲𞤢𞥄𞤼𞤭𞤪𞤭 𞤳𞤢 𞤧𞤵𞥅𞤣𞤵 𞤧𞤢𞤦𞤵 𞤮 𞤸𞤢𞤪𞤭 𞤮 𞤼𞤮𞤽𞤢𞤲𞤮𞥅𞤥𞤢 𞤢𞤪𞤵𞤺𞤮𞤤 𞤳𞤢 𞤧𞤵𞥅𞤣𞤵. 𞤐𞤮 𞤺𞤢𞤧𞤢 𞤲𞤮𞤲⹁ 𞤮 𞤳𞤮𞤲𞤳𞤵 𞤳𞤢 𞤦𞤢𞥄𞤬𞤢𞤤⹁ 𞤴𞤵𞤥𞥆𞤢 𞤥𞤢𞤳𞥆𞤮 𞤵𞤣𞥆𞤭𞤼𞤢𞤲𞤭 𞤥𞤮.

𞤊𞤢𞥄𞤼𞤵𞤥𞤢𞤼𞤢 𞤸𞤢𞤪𞤭 𞤩𞤵𞤪𞤲𞤭𞥅 𞤣𞤵𞥅𞤩𞤭 𞤲𞤮𞥅𞤺𞤢𞤴 𞤀𞤥𞤫𞤪𞤭𞤳𞤢. 𞤑𞤮 𞤘𞤢𞤥𞤦𞤭𞤴𞤢 𞤱𞤮𞤲𞤭 𞤭𞤱𞤣𞤭 𞤥𞤢𞤳𞥆𞤮.

𞤀𞤣𞤮 𞤸𞤮 𞤬𞤫𞤤𞥆𞤫𞥅𞤣𞤫⹁ 𞤊𞤢𞥄𞤼𞤵𞤥𞤢𞤼𞤢 𞤯𞤭𞤦𞥆𞤵𞤲𞤮 𞤸𞤵𞤪𞤵𞥅𞤪𞤫 (𞤦𞤵𞤼𞤮𞤲𞤪𞤫) 𞤲𞤮𞤣𞥆𞤭𞤪𞤲𞤣𞤫 𞤬𞤢𞥄𞤦𞤮⹁ 𞤳𞤮𞤲𞤮 𞤯𞤮𞥅 𞤴𞤮 𞤴𞤭𞤥𞤩𞤫 𞤷𞤮𞤳𞥆𞤮 𞤲𞤺𞤮𞤲 𞤸𞤫𞤱𞤼𞤵⹁ 𞤸𞤢𞤪𞤭 𞤃𞤵𞥅𞤧𞥆𞤢𞥄 𞤣𞤮𞤺𞤭𞥅. 𞤇𞤫 𞤸𞤫𞤱𞤼𞤭𞤼𞤭𞥅 𞤥𞤮 𞤧𞤢𞤦𞤵𞤲𞤢 𞤸𞤢𞤪𞤭 𞤮 𞤱𞤮𞤯𞥆𞤢𞥄𞤳𞤭. 𞤌 𞤬𞤢𞥄𞤤𞤢𞥄𞤩𞤫 𞤬𞤫𞤼𞤤𞤵𞤣𞤫⹁ 𞤳𞤮𞤲𞤮 𞤩𞤫 𞤤𞤭𞤩𞤭 𞤥𞤮 𞤢𞤣𞤮 𞤮 𞤴𞤢𞤤𞤼𞤭𞤲𞤣𞤫 𞤨𞤭𞤲𞤳𞤢𞤸𞤵𞤲 𞤥𞤢𞤳𞥆𞤮 𞤳𞤵𞤲. 𞤇𞤫 𞤰𞤫𞤼𞥆𞤭 𞤥𞤮 𞤩𞤫 𞤲𞤢𞤩𞤭 𞤳𞤢 𞤴𞤭𞥅𞤤𞤭𞤪𞤣𞤫 𞤥𞤢𞤩𞥆𞤫 𞤩𞤫 𞤵𞤣𞥆𞤭.

𞤑𞤮𞤲𞤮 𞤮 𞤬𞤮𞤯𞥆𞤭 𞤬𞤫𞥅𞤼𞤭𞤲𞤳𞤭𞤲𞤢𞥄𞤣𞤫⹁ 𞤸𞤢𞤴 𞤷𞤮𞤲𞤷𞤭 𞤥𞤢𞤳𞥆𞤮 𞤯𞤭𞤲⹁ 𞤮 𞤭𞤼𞥆𞤭.  𞤐𞤣𞤫𞤲⹁ 𞤩𞤫 𞤰𞤫𞤼𞥆𞤭𞤥𞤮 𞤩𞤫 𞤲𞤢𞤩𞤭 𞤥𞤮 𞤳𞤢 𞤤𞤢𞤦𞤵𞤼𞤢𞥄𞤲𞤭𞥅𞤪𞤵 𞤲𞤣𞤢𞥄𞤪𞤵𞤺𞤮𞤤 𞤧𞤭 𞤮 𞤸𞤢𞥄𞤲𞤺𞤢𞥄𞤳𞤢. 𞤑𞤮𞤲𞤮 𞤳𞤢𞥄𞤱𞤭𞤪𞤢𞥄𞤱𞤮 𞤥𞤢𞤳𞥆𞤮 𞤮𞤲 𞤱𞤭𞤭 𞤱𞤮𞤲𞤣𞤫𞤥𞤢 𞤮 𞤧𞤭𞤳𞥆𞤢𞥄 𞤃𞤵𞥅𞤧𞤢𞥄 𞤲𞤮 𞤲𞤢𞤱𞤲𞤭⹁ 𞤸𞤢𞤪𞤢𞤴 𞤳𞤮 𞤻𞤮𞥅𞤺𞤫 𞤮 𞤻𞤢𞥄𞤥𞤭𞥅 𞤥𞤢𞥄 𞤮 𞤵𞤪𞤭𞥅.