𞤑𞤀𞤚𞤀𞤈 𞥒𞥐𞥒𞥒: 𞤀𞤊𞤈𞤋𞤑 𞤅𞤀𞥄𞤎𞤋𞤐𞤋𞥅 𞤑𞤓𞥅𞤂𞤉 𞤖𞤀𞤐𞤁𞤉

𞤉𞤥𞤦𞤢 𞤲𞤺𞤮𞥅 𞤊𞤭𞤶𞤮 𞤲𞤮 𞤱𞤵𞤤𞤵𞤲𞤮𞥅 𞤸𞤢𞤲𞤣𞤫.

𞤑𞤀𞤃𞤉𞤈𞤓𞤐 🇨🇲 𞥓 – 𞥓 🇷🇸 𞤅𞤉𞤈𞤄𞤋𞤒𞤀

𞤖𞤢𞤲𞤣𞤫 𞤳𞤮 𞤑𞤢𞤥𞤫𞤪𞤵𞤲 𞤫 𞤅𞤫𞤪𞤦𞤭𞤴𞤢 𞤵𞤣𞥆𞤭𞤼𞤭 𞤻𞤢𞤤𞥆𞤢𞤤 𞤬𞤮𞥅𞤤𞤮𞤼𞤭𞤪𞤮 𞤲𞤺𞤮𞤲 𞤑𞤢𞤼𞤢𞤪.

𞤐𞤢𞤲𞤣𞤭 𞤆𞤌𞤂 𞤄𞤋𞤒𞤀 𞤲𞤫𞤤𞤣𞤵𞤲𞤮 𞤲𞤺𞤢𞤴𞤵𞥅𞤶𞤭 𞤑𞤢𞤥𞤫𞤪𞤵𞤲 𞤯𞤭𞤲 𞤼𞤮𞥅𞤪𞤭 𞤲𞤣𞤭 𞤩𞤫 𞤭𞤲𞥆𞤢𞤼𞤢 𞤲𞤣𞤮𞥅𞤤𞤫𞥊. 𞤑𞤮 𞤯𞤵𞤥 𞤯𞤭 𞤥𞤮𞤯𞤭 𞤸𞤢𞥄 𞤽𞤮𞤽𞤪𞤫 𞤬𞤭𞤯𞤭 𞤯𞤭 𞤧𞤭 𞤯𞤭 𞤬𞤵𞤯𞥆𞤭 𞤨𞤭𞤴𞤪𞤵𞤣𞤵𞤣𞤫 𞤫 𞤅𞤫𞤪𞤦𞤭𞤴𞤢. 𞤅𞤭 𞤱𞤮𞤲𞤢𞥄𞤲𞤮 𞤯𞤵𞤥 𞤲𞤮 𞤺𞤢𞤧𞤢 𞤑𞤀𞤃𞤉𞤈𞤓𞤃 𞤱𞤢𞥄𞤱𞤢𞤴𞤲𞤮 𞤨𞤭𞤴𞤵𞤣𞤫 𞤅𞤫𞤪𞤦𞤭𞤴𞤢 𞤳𞤮 𞤯𞤵𞥅𞤯𞤭. 𞤑𞤮 𞤳𞤢𞤥𞤩𞤫 𞤢𞤣𞤭𞤲𞤮𞥅 𞤲𞤢𞥄𞤣𞤵𞤣𞤫 𞤳𞤵𞥅𞤤𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥒𞥙. 𞤑𞤮 𞤟𞤀𞤐 𞤡𞤀𞤈𞤂 𞤲𞤢𞥄𞤣𞤭 𞤲𞤺𞤢𞤤.

𞤑𞤮𞤲𞤮 𞤳𞤢 𞤬𞤫𞤷𞥆𞤫𞤪𞤫 𞤢𞤪𞤢𞤲𞤫𞤪𞤫 𞤲𞤣𞤫𞤲 𞤼𞤭𞤥𞥆𞤢𞤼𞤢 𞤯𞤮𞤲⹁ 𞤧𞤢𞤦𞤵 𞤨𞤢𞤤𞤶𞤫 𞤩𞤢𞥄𞤱𞤮-𞤩𞤢𞥄𞤱𞤮𞥅𞤩𞤫 𞤑𞤢𞤥𞤢𞤪𞤵𞤲 𞤩𞤫𞤲⹁ 𞤅𞤫𞤪𞤦𞤭𞤴𞤢 𞤭𞤼𞥆𞤭 𞤳𞤵𞥅𞤤𞤢𞤤 𞤲𞤺𞤢𞤤 𞤩𞤫𞤴𞤣𞤭𞤼𞤭 𞤳𞤢𞤣𞤭 𞤺𞤮𞥅𞤼𞤢𞤤. 𞤇𞤢𞥄𞤱𞤮 𞤬𞤫𞤷𞥆𞤫𞤪𞤫 𞤯𞤭𞤯𞤢𞤩𞤫𞤪𞤫 𞤲𞤣𞤫𞤲 𞤬𞤵𞤯𞥆𞤢𞥄𞤣𞤫⹁ 𞤅𞤫𞤪𞤦𞤭𞤴𞤢 𞤩𞤫𞤴𞤣𞤭 𞤬𞤢𞥄𞤸𞤭𞤲 𞤳𞤵𞥅𞤤𞤢𞤤 𞤺𞤮𞥅𞤼𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥕𞥓. 𞤚𞤭𞤥𞥆𞤭 𞤳𞤵𞥅𞤤𞤫 𞤼𞤢𞤼𞤭.

𞤇𞤢𞥄𞤱𞤼𞤭 𞤯𞤵𞤥⹁ 𞤉𞤤𞤼𞤮𞥅𞤱𞤮 𞤑𞤢𞤥𞤫𞤪𞤵𞤲 𞤮𞤲 𞤲𞤢𞥄𞤣𞤭 𞤜𞤉𞤐𞤅𞤀𞤐 𞤀𞤄𞤓𞥅𞤄𞤀𞤑𞤀𞤈 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥕𞥕.
𞤑𞤮 𞤮𞤲𞤼𞤵𞤥𞤢 𞤑𞤀𞤃𞤉𞤈𞤓𞤐 𞤴𞤭𞥅𞤼𞤭 𞤤𞤢𞥄𞤱𞤮𞤤. 𞤇𞤢𞥄𞤱𞤮 𞤮 𞤲𞤢𞥄𞤼𞤵𞤣𞤫⹁ 𞤜𞤉𞤐𞤅𞤀𞤐 𞤀𞤄𞤓𞥅𞤄𞤀𞤑𞤀𞤈 𞤲𞤢𞥄𞤣𞤭 𞤳𞤵𞥅𞤤𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥖𞥓. 𞤖𞤮𞤶𞤮𞤥𞤢𞥄𞤶𞤫 𞤼𞤢𞤼𞤭 𞤩𞤢𞥄𞤱𞤮 𞤯𞤵𞤥⹁ 𞤮 𞤬𞤫𞤰𞥆𞤭𞤲𞤢𞤲𞤭 𞤉𞤈𞤋𞤑 𞤃𞤀𞤑𞤅𞤋𞤃 𞤥𞤵𞤤𞥆𞤫𞤪𞤫 𞤲𞤣𞤫𞤲⹁ 𞤮𞤲 𞤯𞤮𞤲 𞤱𞤫𞤪𞤲𞤮𞤴𞤭 𞤲𞤣𞤫 𞤳𞤢 𞤲𞤣𞤫𞤪 𞤧𞤢𞤲𞤳𞤫 𞤅𞤉𞤈𞤄𞤋𞤒𞤀. 𞤏𞤮𞤲𞤭 𞤧𞤫𞤲𞤺𞤮 𞤳𞤢𞤤𞤢 𞤳𞤵𞥅𞤤𞤫 𞤼𞤢𞤼𞤭. 𞤑𞤮 𞤲𞤭𞥅 𞤬𞤭𞤶𞤮 𞤲𞤺𞤮𞤲 𞤧𞤢𞤳𞥆𞤭𞤼𞤮𞤪𞤭 𞤳𞤮𞤲𞤮 𞤱𞤵𞤤𞤭𞤪𞤲𞤮 𞤲𞤺𞤢𞤴𞤵𞥅𞤶𞤭 𞤑𞤢𞤥𞤫𞤪𞤵𞤲 𞤬𞤮𞤼𞤢. 𞤀𞤨𞤫𞤱 𞤯𞤭 𞤱𞤮𞤲𞤼𞤢 𞤥𞤵𞥅𞤧𞤵𞤸𞤮𞤴.

𞤐𞤣𞤫 𞤼𞤢𞤱𞤵𞤲𞤮𞥅 𞤑𞤢𞤥𞤫𞤪𞤵𞤲 𞤥𞤢𞤪𞤢𞥄 𞤬𞤮𞤼𞤢𞤴𞤯𞤮 𞤫 𞤜𞤉𞤐𞤅𞤀𞤐 𞤀𞤄𞤓𞥅𞤄𞤀𞤑𞤀𞤈 𞤳𞤢 𞤳𞤭𞤨𞥆𞤮𞤤 𞤥𞤢𞤩𞥆𞤫⹁ 𞤴𞤭𞤥𞤩𞤫 𞤦𞤵𞤴 𞤲𞤮 𞤤𞤢𞤲𞤣𞤮𞤲’𞤣𞤭𞤪𞤣𞤫 𞤸𞤮𞤤 𞤳𞤮 𞤱𞤢𞤯𞤭 𞤮 𞤬𞤵𞤯𞥆𞤭𞤲𞤢𞥄𞤳𞤢 𞤬𞤭𞤶𞤮 𞤲𞤺𞤮𞤲 𞤸𞤢𞤲𞤣𞤫؟ 𞤸𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤌𞤐𞤀𞤐𞤀⹁ 𞤸𞤭𞤱𞤮𞥅𞤱𞤮 𞤥𞤢𞤩𞥆𞤫 𞤥𞤮 𞤩𞤫 𞤸𞤮𞥅𞤤𞤮𞤪𞤭 𞤮𞤲 𞤬𞤭𞤶𞤭𞤲𞤢𞤲𞤮𞥅𞤳𞤢 𞤸𞤢𞤲𞤣𞤫 𞤬𞤭𞥅 𞤮𞤥𞤮 𞤺𞤢𞥄𞤤𞤣𞤭 𞤫 𞤸𞤮𞥅𞤪𞤫𞥅𞤩𞤫 𞤳𞤭𞤨𞥆𞤮𞤤 𞤲𞤺𞤮𞤤.

𞤐𞤮 𞤱𞤮𞤲𞤭𞤪𞤭 𞤱𞤮𞥅⹁ 𞤫𞤤𞤼𞤮𞥅𞤱𞤮 𞤮𞤲 𞤲𞤮 𞤸𞤫𞤯𞤢𞥄 𞤩𞤢𞤴𞤼𞤭 𞤳𞤮 𞤦𞤫𞥅 𞤑𞤢𞤥𞤫𞤪𞤵𞤲 𞤨𞤭𞤴𞤢 𞤄𞤢𞤪𞤢𞤧𞤭𞤤 𞤧𞤭 𞤩𞤫 𞤬𞤫𞤰𞥆𞤢. 𞤃𞤮𞤲𞤮 𞤢𞤲𞤣𞤭 𞤄𞤢𞤪𞤢𞤧𞤭𞤤⹁ 𞤲𞤮 𞤢𞤲𞤣𞤭 𞤯𞤵𞤥 𞤱𞤮𞤲𞤢𞥄 𞤳𞤮 𞤱𞤫𞤤𞤭 𞤬𞤭𞥅 𞤲𞤮𞤲.

𞤅𞤫𞤪𞤦𞤭𞤴𞤢 𞤫 𞤑𞤢𞤥𞤢𞤪𞤵𞤲 𞤨𞤭𞤴𞤢𞤲𞤮 𞤳𞤢 𞤬𞤭𞤶𞤮 𞤥𞤢𞤩𞥆𞤫 𞤢𞤪𞤢𞤲𞤮. 𞤔𞤮𞥅𞤲𞤭 𞤥𞤮 𞤦𞤫𞥅 𞤫 𞤥𞤢𞤩𞥆𞤫 𞤲𞤮 𞤸𞤢𞥄𞤲𞤭 𞤬𞤮𞥅𞤤𞤵𞤣𞤫 𞤫 𞤬𞤭𞤶𞤮 𞤥𞤵𞤵𞤲 𞤧𞤢𞤳𞥆𞤭𞤼𞤭𞥅𞤲𞤺𞤮 𞤲𞤺𞤮𞤲 𞤧𞤭 𞤼𞤢𞤥𞤰𞤭𞤲𞤮𞥅 𞤬𞤫𞤰𞥆𞤵𞤺𞤮𞤤. 𞤑𞤮𞤲𞤮 𞤧𞤭 𞤼𞤢𞤱𞤭𞥅 𞤑𞤢𞤥𞤢𞤪𞤵𞤲 𞤳𞤮 𞤄𞤢𞤪𞤢𞤧𞤭𞤤 𞤼𞤵𞤯𞤢𞤲𞤼𞤮𞥅⹁ 𞤅𞤫𞤪𞤦𞤭𞤴𞤢 𞤳𞤢𞤻𞤵𞤲 𞤬𞤮𞤼𞥆𞤢𞤴 𞤫 𞤅𞤵𞤱𞤭𞤧𞤢𞥄𞤩𞤫⹁ 𞤩𞤫 𞤄𞤢𞤪𞤢𞤧𞤭𞤤 𞤨𞤭𞤴𞤭𞤪𞤭 𞤳𞤢𞤪𞤢𞤸𞤢𞤲 𞤸𞤢𞤲𞤣𞤫.

𞤑𞤌𞥅𞤈𞤉𞥅 𞤙𞤀𞥄𞤃𞤐𞤀🇰🇷 𞥒 – 𞥓 🇬🇭 𞤘𞤀𞤐𞤀

𞤇𞤢𞥄𞤱𞤮 𞤑𞤀𞤃𞤀𞤈𞤓𞤐 𞤫 𞤅𞤉𞤈𞤄𞤋𞤒𞤀 𞤧𞤫𞥅𞤣𞤵𞤣𞤫 𞤸𞤮𞥅𞤪𞤫 𞥓-𞥓⹁ 𞤘𞤀𞤐𞤀 𞤫 𞤑𞤌𞥅𞤈𞤉𞥅 𞤙𞤀𞥄𞤃𞤐𞤀𞥄𞤈𞤋 𞤲𞤢𞤲𞤺𞤮𞤲’𞤣𞤭𞤪𞤲𞤮 𞤸𞤮𞥅𞤪𞤫 𞤳𞤮 𞤻𞤢𞥄𞤯𞤭 𞤻𞤢𞤧 𞤧𞤢𞤦𞤵𞤲𞤢 𞤲𞤺𞤮𞤲 𞤬𞤭𞤶𞤮 𞤯𞤮𞤲 𞤱𞤵𞤤𞤵𞤲𞤮 𞤬𞤮𞤼𞤢.

𞤑𞤮𞥅𞤪𞤫𞤴𞤢𞥄𞤩𞤫 𞤩𞤫𞤲 𞤲𞤭𞤥𞤧𞤢𞤴 𞤬𞤭𞥅 𞤳𞤮 𞤩𞤫 𞤱𞤫𞤤𞤧𞤭𞤲’𞤣𞤢𞤲𞤭𞥅 𞤸𞤢𞥄 𞤘𞤀𞤐𞤀 𞤱𞤢𞤯𞤭 𞤩𞤫 𞤳𞤵𞥅𞤤𞤫 𞤯𞤭𞤯𞤭 𞤫 𞤲𞤣𞤫𞤪 𞤸𞤮𞤶𞤮𞤥𞤢𞥄𞤶𞤫 𞤧𞤢𞤨𞥆𞤮. 𞤚𞤢𞤱𞤭 𞤤𞤫⹁ 𞤤𞤢𞥄𞤦𞤭 𞤼𞤢𞤼𞤭 𞤬𞤮𞤨 𞤸𞤭𞤩𞤫 𞤸𞤫𞤩𞤵𞤣𞤫 𞤬𞤫𞤸𞤪𞤫 𞤲𞤢𞥄𞤣𞤵𞤺𞤮𞤤 𞤳𞤵𞥅𞤤𞤫 𞤳𞤮𞤲𞤮 𞤩𞤫 𞤱𞤮𞥅𞤨𞤢. 𞤑𞤮 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥒𞥔⹁ 𞤃𞤓𞤖𞤀𞤃𞥆𞤉𞤁 𞤅𞤀𞥄𞤂𞤋𞤅𞤓 𞤵𞤣𞥆𞤭𞤼𞤢𞤲𞤭 𞤘𞤀𞤐𞤀 𞤦𞤢𞤪𞤢 𞤮𞤲⹁ 𞤮𞤲𞤼𞤵𞤥𞤢 𞤃𞤓𞤖𞤀𞤃𞤉𞤁 𞤗𞤓𞤁𞥆𞤓𞥅𞤅 𞤩𞤫𞤴𞤣𞤭 𞤳𞤵𞥅𞤤𞤢𞤤 𞤯𞤭𞤯𞤢𞤩𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥓𞥔. 𞤑𞤮 𞤯𞤮𞤲 𞤩𞤫 𞤸𞤢𞥄𞤯𞤭 𞤸𞤢𞥄 𞤬𞤭𞤶𞤮 𞤲𞤺𞤮𞤲 𞤬𞤫𞤷𞥆𞤭 𞤫 𞤼𞤵𞤥𞤦𞤮.

𞤑𞤮𞤲𞤮 𞤩𞤢𞤴𞤼𞤭 𞤬𞤭𞤶𞤮 𞤲𞤺𞤮𞤲 𞤬𞤵𞤯𞥆𞤭𞤼𞤢𞥄𞤥𞤢⹁ 𞤑𞤮𞥅𞤪𞤫𞤴𞤢𞥄𞤩𞤫 𞤩𞤫𞤲 𞤪𞤵𞤼𞥆𞤮𞤣𞤭 𞤫 𞤣𞤵𞥅𞤣𞤫𞤪𞤫 𞤴𞤮𞤩𞤼𞤢𞤺𞤮𞤤. 𞤉 𞤲𞤣𞤫𞤪 𞤸𞤮𞤶𞤮𞤥𞤢𞥄𞤶𞤫 𞤼𞤢𞤼𞤭 𞤨𞤫𞤼⹁ 𞤩𞤫 𞤱𞤵𞤪𞤼𞤭 𞤳𞤵𞥅𞤤𞤫 𞤯𞤫𞤲 𞤯𞤭𞤯𞤭 𞤳𞤢𞤤𞤢. 𞤑𞤢 𞤸𞤮𞤶𞤮𞤥𞤢𞥄𞤪𞤫 𞥕𞥘⹁ 𞤘𞤉-𞤅𞤓𞤐 𞤕𞤌𞤏 𞤬𞤵𞤪𞤼𞤭𞥅 𞤩𞤢𞥄𞤱𞤮 𞤐𞤢𞤴𞤭𞥅𞤶𞤮 𞤘𞤀𞤐𞤀 𞤮𞤲⹁ 𞤦𞤮𞥅𞤼𞤭 𞤥𞤵𞤤𞥆𞤫𞤪𞤫 𞤲𞤣𞤫𞤲⹁ 𞤲𞤣𞤫 𞤬𞤫𞤰𞥆𞤮𞤴𞤭 𞤸𞤭𞤱𞤮𞥅𞤱𞤮 𞤮𞤲. 𞤖𞤢𞤴 𞤸𞤮𞤶𞤮𞤥𞤢𞥄𞤶𞤫 𞤼𞤢𞤼𞤭 𞤼𞤭𞤥𞥆𞤢𞥄𞤤𞤭⹁ 𞤳𞤮 𞤳𞤢𞤲𞤳𞤮 𞤳𞤢𞤣𞤭 𞤘𞤉-𞤅𞤓𞤐 𞤕𞤌𞤏 𞤷𞤮𞤱𞤼𞤭𞥅 𞤦𞤮𞥅𞤼𞤭 𞤥𞤵𞤤𞥆𞤫𞤪𞤫 𞤲𞤣𞤫𞤲⹁ 𞤼𞤭𞤥𞥆𞤭𞤲𞤢𞤲𞤭 𞤑𞤌𞥅𞤈𞤉𞤒𞤀 𞤳𞤵𞥅𞤤𞤫 𞤯𞤭𞤯𞤭.

𞤑𞤮𞤲𞤮 𞤳𞤢 𞤸𞤮𞤶𞤮𞤥𞤢𞥄𞤶𞤫 𞥖𞥘⹁ 𞤘𞤀𞤐𞤀 𞤤𞤫𞤤𞤲𞤭 𞤥𞤵𞤪𞤢𞥄𞤣𞤵 𞤲𞤣𞤵𞤲 𞤲𞤣𞤫 𞤃𞤓𞤖𞤀𞤃𞤀𞤁 𞤗𞤓𞤁𞥆𞤓𞥅𞤅 𞤯𞤭𞤯𞤥𞤭𞤼𞤭 𞤳𞤵𞥅𞤤𞤫 𞤥𞤵𞤵𞤲 𞤯𞤫𞤲. 𞤏𞤮𞤲𞤭 𞤘𞤀𞤐𞤀 𞥓⹁ 𞤑𞤌𞥅𞤈𞤉𞤒𞤀 𞥒. 𞤊𞤭𞥅 𞤳𞤢𞤤𞤢 𞤑𞤮𞥅𞤪𞤫𞤴𞤢 𞤫𞤼𞤭𞤲𞤮 𞤬𞤮𞤼𞤢 𞤲𞤮 𞤩𞤫 𞤭𞤼𞥆𞤭𞤪𞤢 𞤧𞤢𞤳𞥆𞤭𞤼𞤭𞥅𞤲𞤺𞤢𞤤 𞤲𞤺𞤢𞤤⹁ 𞤩𞤫 𞤸𞤵𞥅𞤩𞤲𞤢𞤲𞤢𞥄𞤤𞤭.

𞤔𞤮𞥅𞤲𞤭 𞤘𞤀𞤐𞤀 𞤲𞤮 𞤥𞤢𞤪𞤭 𞤼𞤮𞤩𞥆𞤫 𞤼𞤢𞤼𞤭⹁ 𞤑𞤌𞤈𞤉𞤒𞤀 𞤲𞤮 𞤥𞤢𞤪𞤭 𞤼𞤮𞤩𞥆𞤫𞤪𞤫. 𞤑𞤮𞤲𞤮 𞤧𞤭 𞤘𞤀𞤐𞤀 𞤤𞤵𞤥𞤦𞤢𞤴⹁ 𞤳𞤮 𞤦𞤫𞥅 𞤩𞤫 𞤨𞤭𞤴𞤢 𞤓𞤈𞤓𞤘𞤌𞤒. 𞤘𞤀𞤐𞤀 𞤸𞤫𞤩𞤭𞤣𞤭𞥅𞤲𞤮 𞤫 𞤓𞤈𞤓𞤘𞤌𞤒 𞤼𞤢𞥄𞤪𞤭𞥅𞤳𞤢⹁ 𞤧𞤢𞤦𞤵𞤲𞤢 𞤳𞤮 𞤩𞤫𞤲 𞤸𞤢𞤯𞤵𞤲𞤮𞥅 𞤩𞤫 𞤱𞤮𞤲𞤵𞤺𞤮𞤤 𞤢𞤪𞤢𞤲𞤮 𞤫 𞤤𞤫𞤴𞤯𞤫 𞤀𞤬𞤪𞤭𞤳 𞤯𞤫𞤲 𞤼𞤢𞤱𞤫𞤺𞤮𞤤 𞤬𞤫𞤷𞥆𞤫𞤪𞤫 𞤼𞤭𞤥𞥆𞤭𞤲𞤮𞤤 𞤬𞤮𞥅𞤤𞤮𞤼𞤭𞤪𞤢𞤤 𞤢𞤣𞤵𞤲𞤢𞤴𞤢𞤲𞤳𞤮𞤱𞤢𞤤 𞤫 𞤤𞤢𞤼𞤮 𞤥𞤵𞤤𞥆𞤫𞤪𞤫 𞤱𞤢𞤯𞤵𞤲𞤮𞥅𞤲𞤺𞤢𞤤 𞥒𞥐𞥑𞥐.

𞤄𞤀𞤈𞤀𞤅𞤋𞤂 🇧🇷 𞥑 – 𞥐 🇨🇭 𞤅𞤓𞤏𞤋𞤅

𞤉 𞤣𞤫𞤲𞤼𞤢𞤤 𞤶𞤫𞥅𞤯𞤭𞤯𞤢𞤩𞤢𞤤 𞤲𞤺𞤢𞤤⹁ 𞤳𞤮 𞤳𞤢𞤪𞤢𞤸𞤢𞤲 𞤄𞤀𞤈𞤀𞤅𞤋𞤂 𞤨𞤭𞤴𞤭𞤪𞤭 𞤅𞤓𞤏𞤋𞤅.

𞤔𞤢𞤳𞤢 𞤐𞤉𞥅𞤃𞤀𞤈 𞤳𞤮 𞤼𞤵𞤺𞤢𞤤𞤢𞤤 𞤥𞤢𞤱𞤲𞤺𞤢𞤤 𞤫 𞤳𞤭𞤨𞥆𞤮𞤤 𞤄𞤀𞤈𞤀𞥄𞤅𞤋𞤂 𞤲𞤺𞤮𞤤 𞤧𞤢𞤦𞤵𞤲𞤢 𞤩𞤫 𞤸𞤢𞥄𞤯𞤼𞤭𞤲𞤮 𞤥𞤮 𞤬𞤮𞤼𞤢 𞤸𞤢𞤲𞤣𞤫. 𞤑𞤮𞤴𞤲𞤺𞤢𞤤 𞤥𞤢𞤳𞥆𞤮 𞤲𞤮 𞤸𞤵𞤩𞤭 𞤳𞤢 𞤬𞤫𞤱𞤲𞤣𞤮 𞤸𞤮𞤤𞤩𞤵𞤲’𞤣𞤫𞤪𞤫.

𞤅𞤭 𞤱𞤮𞤲𞤢𞥄𞤲𞤮 𞤧𞤢𞤦𞤵 𞤳𞤵𞥅𞤤𞤢𞤤 𞤑𞤀𞤅𞤀𞤃𞤋𞤈𞤌 𞤲𞤺𞤢𞤤 𞤳𞤢 𞤸𞤮𞤶𞤢𞤥𞤢𞥄𞤪𞤫 𞥘𞥓⹁ 𞤸𞤢𞤪𞤢𞤴𞤲𞤮 𞤸𞤢𞥄 𞤶𞤮𞥅𞤲𞤭 𞤄𞤀𞤈𞤀𞤅𞤋𞤂 𞤲𞤮 𞤫 𞤶𞤭𞤩𞤭-𞤤𞤭𞤩𞤭. 𞤑𞤮𞤲𞤮 𞤶𞤮𞥅𞤲𞤭 𞤼𞤢𞤦𞤭𞤼𞤭𞥅 𞤱𞤮𞤲𞤣𞤫𞤥𞤢 𞤩𞤫 𞤤𞤵𞤥𞤦𞤭𞥅. 𞤖𞤢𞤴 𞤅𞤭 𞤑𞤀𞤃𞤀𞤈𞤓𞤐 𞤨𞤭𞤴𞤭𞥅 𞤩𞤫 𞤫 𞤃𞤢𞤱𞤲𞤣𞤫 𞤢𞤪𞤮𞥅𞤪𞤫⹁ 𞤯𞤵𞤥 𞤴𞤭𞤤𞤼𞤢𞤼𞤢𞥄 𞤩𞤫. 𞤔𞤮𞥅𞤲𞤭 𞤫𞤲 𞤼𞤮𞤪𞤮𞤼𞤮 𞤩𞤫 𞤴𞤮 𞤩𞤫 𞤢𞤷𞥆𞤢𞤲 𞤫𞤲. 𞤑𞤢𞥄؟؟

𞤆𞤌𞤈𞤚𞤋𞤘𞤀𞤂 🇵🇹 𞥒 – 𞥐 🇺🇾 𞤓𞤈𞤓𞤘𞤌𞤒

𞤉 𞤸𞤮𞤥𞤦𞤵𞤺𞤮𞤤 𞤻𞤢𞤤𞥆𞤢𞤤 𞤶𞤫𞥅𞤲𞤢𞤴𞤢𞤩𞤢𞤤 𞤲𞤺𞤢𞤤⹁ 𞤓𞤈𞤓𞤘𞤌𞤒 𞤫𞤼𞤮𞤪𞤲𞤮 𞤲𞤮 𞤱𞤢𞥄𞤱𞤭𞤪𞤭⹁ 𞤳𞤮𞤲𞤮 𞤸𞤢𞤴 𞤅𞤏𞤀𞤈𞤉𞤟⹁ 𞤽𞤢𞤼𞤮𞥅𞤱𞤮 𞤮𞤲⹁ 𞤱𞤢𞥄𞤱𞤢𞥄𞤤𞤭 𞤱𞤢𞤤𞥆𞤵𞤣𞤫 𞤩𞤫 𞤣𞤢𞤪𞤼𞤢𞤺𞤮𞤤 𞤳𞤭𞤨𞥆𞤮𞤤 𞤈𞤌𞤐𞤀𞤂𞤁𞤌 𞤲𞤺𞤮𞤤.

𞤔𞤮𞥅𞤲𞤭 𞤆𞤌𞤈𞤚𞤋𞤘𞤀𞤂 𞤼𞤢𞤱𞤼𞤭𞥅 𞤊𞤀𞤈𞤀𞤐𞤅𞤋 𞤫 𞤄𞤀𞤈𞤀𞤅𞤋𞤂 𞤳𞤢 𞤤𞤵𞤥𞤦𞤵𞤩𞤫 𞤩𞤢𞥄𞤱𞤮 𞤩𞤫 𞤨𞤭𞤴𞤵𞤣𞤫 𞤓𞤈𞤓𞤘𞤌𞤒 𞤳𞤵𞥅𞤤𞤫 𞤯𞤭𞤯𞤭. 𞤑𞤮 𞤄𞤓𞤈𞤓𞤐𞤌 𞤊𞤉𞤈𞤐𞤀𞤐𞤁𞤉𞤅 𞤲𞤢𞥄𞤣𞤢𞤲𞤭 𞤆𞤌𞤈𞤚𞤋𞤘𞤀𞤂 𞤳𞤵𞥅𞤤𞤫 𞤯𞤫𞤲 𞤯𞤭𞤯𞤭 𞤳𞤢𞤤𞤢. 𞤑𞤮 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥕𞥔 𞤮 𞤲𞤢𞥄𞤣𞤭 𞤢𞤪𞤢𞤲𞤢𞤤 𞤲𞤺𞤢𞤤 𞤬𞤭𞥅 𞤳𞤢𞤤𞤢 𞤈𞤌𞤐𞤀𞤂𞤊𞤌 𞤫 𞤴𞤭𞤯𞤫𞤪𞤫 𞤥𞤵𞤵𞤲 𞤳𞤵𞥅𞤳𞤫 𞤧𞤭𞤳𞥆𞤵𞤲𞤮 𞤳𞤮 𞤳𞤢𞤻𞤵𞤲 𞤲𞤢𞥄𞤣𞤭𞥅 𞤲𞤺𞤢𞤤. 𞤑𞤮𞤲𞤮 𞤢𞤣𞤮 𞤲𞤺𞤢𞤤 𞤳𞤵𞥅𞤤𞤢𞤤 𞤲𞤢𞥄𞤼𞤵𞤣𞤫⹁ 𞤼𞤢𞤱𞤭 𞤈𞤌𞤁𞤋𞤈𞤋𞤘𞤌 𞤄𞤉𞤚𞤀𞤐𞤑𞤓𞤈⹁ 𞤶𞤫𞥅𞤺𞤮𞥅𞤶𞤮 𞤓𞤈𞤓𞤘𞤌𞤒 𞤮𞤲⹁ 𞤱𞤮𞥅𞤨𞤭𞥅𞤲𞤮 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥓𞥒 𞤸𞤢𞤪𞤭 𞤤𞤫 𞤳𞤮 𞤳𞤢𞤲𞤳𞤮 𞤼𞤵𞤲 𞤫 𞤸𞤭𞤱𞤮𞥅𞤱𞤮 𞤆𞤌𞤈𞤚𞤋𞤘𞤀𞤂 𞤮𞤲. 𞤌 𞤩𞤮𞥅𞤴𞤢𞤴 𞤽𞤢𞤼𞤭𞤼𞤢𞥄𞤣𞤫 𞤸𞤮𞤤𞤲𞤣𞤵 𞤬𞤭𞥅 𞤯𞤵𞤥.

𞤇𞤢𞥄𞤱𞤮 𞤳𞤵𞥅𞤤𞤢𞤤 𞤢𞤪𞤢𞤲𞤢𞤤 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥕𞥔⹁ 𞤄𞤈𞤓𞤐𞤌 𞤊𞤉𞤈𞤐𞤀𞤐𞤁𞤉𞤅 𞤩𞤫𞤴𞤣𞤢𞤲𞥆𞤮 𞤆𞤌𞤈𞤚𞤋𞤘𞤀𞤂 𞤺𞤮𞥅𞤼𞤢𞤤 𞤲𞤣𞤫 𞤵𞤪𞤵𞤺𞤮𞤴𞤲𞤢𞥄𞤶𞤮 𞤬𞤢𞤴𞤼𞤭𞤲’𞤣𞤭𞤪𞤲𞤮 𞤶𞤵𞥅𞤯𞤫 𞤫 𞤳𞤮𞤴𞤯𞤫⹁ 𞤮 𞤣𞤢𞤪𞤲𞤭𞤪𞤭 𞤥𞤵𞤤𞥆𞤫𞤪𞤫 𞤲𞤣𞤫𞤲 𞤶𞤵𞤲𞤺𞤮 𞤥𞤢𞤳𞥆𞤮 𞤲𞤺𞤮𞤲. 𞤖𞤢𞤴 𞤬𞤭𞥅 𞤮 𞤼𞤫𞤱𞤢𞥄𞤳𞤭⹁ 𞤳𞤮𞤲𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤧𞤭 𞤄𞤈𞤓𞤐𞤌 𞤬𞤫𞤰𞥆𞤵𞤲𞤮 𞤥𞤮 ⹁𞤳𞤮 𞤧𞤢𞤲𞤳𞤫 𞤯𞤫𞤲 𞤮 𞤸𞤢𞤥𞥆𞤢𞤲𞥆𞤮⹁ 𞤧𞤫𞤪𞤲𞤣𞤮𞥅𞤱𞤮 𞤮𞤲 𞤴𞤫𞤯𞤭 𞤆𞤌𞤈𞤚𞤋𞤘𞤀𞤂 𞤤𞤢𞤼𞤫𞤪𞤫 𞤳𞤢 𞤸𞤵𞥅𞤤𞤮𞥅𞤣𞤫.
𞤄𞤈𞤓𞤐𞤌 𞤲𞤢𞥄𞤣𞤭𞥅 𞤳𞤵𞥅𞤤𞤢𞤤 𞤲𞤺𞤢𞤤⹁ 𞤱𞤮𞤲𞤭 𞤯𞤭𞤯𞤭.

𞤔𞤮𞥅𞤲𞤮 𞤓𞤈𞤓𞤘𞤌𞤒 𞤧𞤫𞤩𞤭𞤼𞤭𞤳𞤫 𞤬𞤮𞤼𞤢. 𞤑𞤮 𞤼𞤮𞤩𞥆𞤫𞤪𞤫 𞤱𞤮𞥅𞤼𞤫𞤪𞤫 𞤨𞤫𞤼 𞤩𞤫 𞤥𞤢𞤪𞤭. 𞤅𞤭 𞤩𞤫 𞤬𞤫𞤰𞥆𞤢𞤴 𞤳𞤮 𞤦𞤫𞥅 𞤨𞤭𞤴𞤢 𞤘𞤀𞤐𞤀 𞤫 𞤸𞤭𞤲𞤤𞤫 𞤩𞤫𞤲 𞤯𞤮𞤲 𞤲𞤮 𞤢𞥄𞤣𞤭𞥅 𞤳𞤮 𞤱𞤢𞤯𞤵𞤲𞤮𞥅 𞤳𞤮𞤲 𞥒𞥐𞥑𞥐 𞤱𞤢𞤯𞤼𞤢𞤼𞤢𞥄.

𞤙𞤮𞤺𞥆𞤢𞤲𞤣𞤫 𞤀𞤴𞥃𞤢 𞤅𞤮𞥅. 𞤋𞤥𞥆𞤭𞤲𞤢𞥄𞤯𞤮 𞤫 𞤭𞤲𞤣𞤫 𞤤𞤮𞤱𞤪𞤫 𞤚𞤢𞤦𞤢𞤤𞤣𞤫 𞤲𞤣𞤫𞤲 𞤬𞤭𞥅 𞤸𞤵𞤥𞤨𞤭𞤼𞤵𞤺𞤮𞤤 𞤮𞤲 𞤳𞤮 𞤱𞤮𞤲𞤭 𞤫 𞤬𞤫𞤰𞥆𞤵𞤣𞤫 𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤑𞤢𞤼𞤢𞤪.