𞤑𞤌 𞤕𞤀𞥄𞤖𞤓 𞤐𞤉𞤋𞤈𞤚𞤉𞥅

𞤑𞤮 𞤻𞤢𞤤𞤲𞤣𞤫 𞤺𞤮𞥅 𞤲𞤵𞤲⹁ 𞤧𞤵𞤳𞤢 𞤲𞤮 𞤴𞤢𞤸𞤢 𞤫 𞤤𞤢𞥄𞤱𞤮𞤤⹁ 𞤮 𞤬𞤮𞤼𞥆𞤭 𞤫 𞤥𞤢𞤱𞤯𞤮. 𞤌 𞤸𞤭𞤱𞤪𞤭𞥅 𞤥𞤢𞤱𞤯𞤮 𞤮𞤲 𞤸𞤢𞥄 𞤥𞤮𞤰𞥆𞤭. 𞤌 𞤤𞤢𞤲𞤣𞤭𞥅 𞤥𞤢𞤱𞤯𞤮 𞤮𞤲 𞤧𞤭 𞤮𞤲 𞤢𞤲𞤣𞤭𞤼𞤭𞥅 𞤥𞤮. 𞤃𞤢𞤱𞤯𞤮 𞤮𞤲 𞤱𞤭𞤭 𞤢𞤲𞤣𞤭𞤼𞤢𞥄𞤤𞤭 𞤮𞥅 𞤧𞤵𞤳𞤢.

𞤅𞤵𞤳𞤢 𞤮𞤲 𞤱𞤭𞤭: “𞤖𞤢𞤪𞤭 𞤳𞤮 𞤥𞤭 𞤶𞤢𞤲𞤺𞤢𞤲𞤢𞥄𞤳𞤵𞥅𞤶𞤮 (𞤨𞤵𞤳𞤢𞤪𞤢𞥄𞤶𞤮) 𞤥𞤮𞤮𞤲”. 𞤲𞤣𞤫𞤲 𞤥𞤢𞤱𞤯𞤮 𞤮 𞤤𞤢𞤲𞤣𞤭𞥅 𞤧𞤵𞤳𞤢 𞤺𞤮𞤤𞥆𞤫 𞤥𞤢𞤳𞥆𞤮 𞤶𞤮𞥅𞤲𞤭.

𞤅𞤵𞤳𞤢 𞤮𞤲 𞤱𞤭𞤭: “𞤔𞤮𞥅𞤲𞤭 𞤳𞤮 𞤥𞤭 𞤶𞤢𞤲𞤺𞤲𞤮𞥅𞤱𞤮”

“𞤏𞤢𞤲𞤮 𞤲𞤮 𞤥𞤭 𞤱𞤮𞤲𞤭𞤪𞤲𞤮𞥅 𞤲𞤮𞤲 𞤶𞤢𞤺𞤲𞤮𞥅𞤱𞤮؟” 𞤃𞤢𞤱𞤯𞤮 𞤮𞤲 𞤤𞤢𞤲𞤣𞤭𞥅.

𞤅𞤵𞤳𞤢 𞤮𞤲 𞤱𞤭𞤭: “𞤉𞤴𞥆𞤮! 𞤏𞤵𞤪𞤭𞤲 𞤳𞤮 𞤮𞤲𞤮𞤲 𞤱𞤮𞤲𞤭 𞤧𞤢𞤦𞤵 𞤸𞤢𞥄 𞤥𞤭 𞤱𞤮𞤲𞤭 𞤶𞤢𞤲𞤺𞤭𞤲𞤮𞥅𞤱𞤮.”

“𞤉𞤥𞤦𞤢 𞤍𞤵𞤥 𞤥𞤮𞤰𞥆𞤭𞥅 𞤲𞤫𞥅. 𞤸𞤮𞤤 𞤲𞤮 𞤥𞤭 𞤱𞤮𞤲𞤭𞤪𞤭 𞤧𞤢𞤦𞤵 𞤢 𞤱𞤮𞤲𞤵𞤣𞤫 𞤶𞤢𞤲𞤺𞤲𞤮𞥅𞤱𞤮؟” 𞤃𞤢𞤱𞤯𞤮 𞤮𞤲 𞤤𞤢𞤲𞤣𞤭𞥅.

𞤐𞤣𞤫𞤲⹁ 𞤧𞤵𞤳𞤢 𞤮𞤲 𞤬𞤭𞤤𞥆𞤭𞥅 𞤲𞤺𞤮𞤤 𞤨𞤫𞤰𞥆𞤮𞤤 𞤯𞤮𞤮:

“𞤙𞤢𞤤𞤲𞤣𞤫 𞤺𞤮𞥅𞤪𞤫⹁ 𞤺𞤮𞤪𞤫𞥅𞤶𞤮 𞤢𞤲⹁ 𞤱𞤫𞤤𞤣𞤭𞥅𞤯𞤮 𞤢𞤲 𞤥𞤮 𞤥𞤭 𞤶𞤢𞤲𞤺𞤭𞤣𞤢𞤴𞤲𞤮𞥅⹁ 𞤢𞤣𞥆𞤮𞤪𞤲𞤮 𞤥𞤵𞤤𞥆𞤮 𞤥𞤢𞤤𞥆𞤢 𞤶𞤢𞤱𞤮 𞤳𞤢𞥄𞤤𞤭𞤧𞤭 𞤸𞤫𞤧𞤮⹁ 𞤤𞤢𞤦𞤢𞥄𞤲𞤺𞤮 𞤳𞤢 𞤣𞤵𞤯𞤢𞤤. 𞤐𞤺𞤮𞥅 𞤶𞤢𞤱𞤮 𞤱𞤫𞤤𞤭 𞤤𞤢𞤥 𞤬𞤮𞤼𞤢 𞤸𞤢𞥄 𞤥𞤭 𞤬𞤢𞥄𞤤𞤢𞤲𞤢𞥄 𞤲𞤺𞤮 𞤸𞤮𞥅𞤪𞤫 𞤢𞤥.  𞤐𞤣𞤫 𞤺𞤮𞤪𞤫𞥅 𞤢𞤥 𞤱𞤫𞤤𞤧𞤭𞤲’𞤣𞤭𞤲𞤮𞥅⹁ 𞤥𞤭 𞤲𞤢𞥄𞤣𞤭 𞤶𞤵𞤲𞤺𞤮 𞤢𞤥 𞤲𞤺𞤮𞤲 𞤳𞤢 𞤺𞤭𞥅𞤦𞤢 𞤥𞤢𞤳𞥆𞤮⹁ 𞤥𞤭 𞤱𞤵𞤶𞥆𞤭 𞤶𞤢𞤱𞤮 𞤲𞤺𞤮𞤲.

𞤇𞤢𞥄𞤴𞤼𞤭 𞤲𞤫𞥅𞤩𞤼𞤭𞥅 𞤧𞤫𞥅𞤯𞤢⹁ 𞤮 𞤸𞤢𞤼𞥆𞤭𞤳𞤫 𞤶𞤢𞤱𞤮 𞤲𞤺𞤮𞤲. 𞤌 𞤯𞤢𞤩𞥆𞤭𞤼𞤭 𞤲𞤺𞤮 𞤲𞤮𞤳𞥆𞤵 𞤳𞤢𞤤𞤢⹁ 𞤳𞤮𞤲𞤮 𞤮 𞤴𞤭𞤢𞥄𞤤𞤭 𞤲𞤺𞤮. 𞤐𞤣𞤫𞤲⹁ 𞤮 𞤴𞤢𞤸𞤭 𞤮 𞤱𞤵𞤤𞥆𞤭𞤼𞤭𞥅 𞤳𞤢 𞤶𞤢𞤲𞤺𞤲𞤮𞥅𞤱𞤮 𞤮𞤲. 𞤖𞤢𞤪𞤭 𞤳𞤮 𞤮𞤲𞤮𞤲 𞤱𞤮𞤲𞤵𞤲𞤮𞥅 𞤮𞤲 𞤶𞤢𞤲𞤺𞤭𞤲𞤮𞥅𞤱𞤮.

𞤇𞤢𞥄𞤴𞤼𞤭 𞤮 𞤴𞤫𞥅𞤼𞤭𞤳𞤫 𞤮𞤲⹁ 𞤬𞤫𞤱𞤼𞤵𞤯𞤮𞤲 𞤥𞤫𞤲⹁ 𞤱𞤭𞤵 𞤯𞤮𞤲: “𞤥𞤵𞤤𞥆𞤮 𞤮𞥅 𞤶𞤢𞤲𞤺𞤢𞤲𞤢𞥄𞤳𞤵𞥅𞤶𞤮 𞤯𞤭𞤥𞥆𞤮𞥅𞤶𞤮 𞤥𞤮𞥅𞤯𞤮𞤲 𞤲𞤮 𞤥𞤢𞤶𞥆𞤭⹁ 𞤳𞤢𞤤𞤢 𞤰𞤫𞤼𞥆𞤵𞤯𞤮 𞤲𞤺𞤮⹁ 𞤲𞤮 𞤼𞤮𞤪𞤢𞥄 𞤶𞤮𞤺𞤲𞤵𞤼𞤵𞤺𞤮𞤤 𞤥𞤮 𞤲𞤺𞤮.

𞤃𞤭 𞤧𞤢𞤤𞤭𞥅 𞤶𞤮𞤺𞤲𞤵𞤼𞤵𞤣𞤫 𞤲𞤺𞤮 𞤸𞤢𞤳𞥆𞤫𞤪𞤫𞤲 𞤥𞤭𞤯𞤮 𞤴𞤭𞤯𞤭 𞤲𞤺𞤮. 

𞤇𞤢𞤴 𞤲𞤫𞥅𞤩𞤼𞤭𞥅 𞤧𞤫𞥅𞤯𞤢 𞤱𞤢𞤭 𞤱𞤢 𞤧𞤭 𞤬𞤭𞥅 𞤶𞤢𞤱𞤮 𞤲𞤺𞤮𞤲 𞤴𞤫𞤶𞥆𞤭𞤼𞤢𞥄𞤥𞤢⹁ 𞤴𞤢𞤸𞤵𞤯𞤮𞤲⹁ 𞤧𞤮𞤳𞤵𞤯𞤮𞤲 𞤦𞤢𞥄𞤬𞤢𞤤 𞤲𞤺𞤢𞤤. 𞤐𞤣𞤫𞤲⹁ 𞤱𞤭𞤵𞤯𞤮𞤲 𞤴𞤮 𞤥𞤫𞤲 𞤬𞤮𞤱 𞤴𞤮 𞤥𞤫𞤲 𞤭𞤥𞥆𞤮⹁ 𞤥𞤫𞤲 𞤣𞤢𞤪𞤮𞥅⹁ 𞤥𞤫𞤲 𞤱𞤢𞤯𞤢 𞤳𞤵𞤪𞤵𞤲𞤱𞤮𞤤 𞤬𞤭𞥅 𞤲𞤮 𞤱𞤭𞤯𞤮𞤪𞤮𞤯𞤮𞤲 𞤶𞤭𞥅𞤦𞤢𞥄𞤶𞤭 𞤢𞤥𞤫𞤲 𞤯𞤭𞤲 𞤫 𞤧𞤢𞤧𞤢𞥄𞤶𞤭 𞤢𞤥𞤫𞤲 𞤯𞤭𞤲. 𞤑𞤮𞤲𞤮 𞤫 𞤸𞤮𞥅𞤪𞤫 𞤯𞤵𞤥⹁ 𞤱𞤭𞤵𞤯𞤮𞤲 𞤴𞤮 𞤥𞤫𞤲 𞤮𞤥𞤦𞤵 𞤺𞤭𞤼𞤫 𞤢𞤥𞤫𞤲 𞤯𞤫𞤲.

𞤃𞤫𞤲 𞤱𞤢𞤯𞤭 𞤲𞤮 𞤱𞤭𞤭𞤪𞤢𞤲𞤯𞤮𞤲 𞤥𞤫𞤲 𞤲𞤮𞤲. 𞤂𞤭𞤻𞤵𞤯𞤮𞤲 𞤺𞤭𞤤𞤢 𞤺𞤭𞥅𞤦𞤢 𞤸𞤫𞤩𞤭 𞤺𞤭𞥅𞤦𞤢 𞤸𞤢𞥄 𞤸𞤫𞤱𞤼𞤵𞤯𞤮𞤲 𞤫 𞤺𞤭𞥅𞤦𞤢 𞤢𞤲 𞤲𞤦𞤢𞤲⹁ 𞤼𞤢𞤱𞤵𞤯𞤮𞤲 𞤶𞤢𞤳𞤢 𞤳𞤮 𞤥𞤭𞤲 𞤰𞤫𞤼𞥆𞤭 𞤥𞤵𞤤𞥆𞤮 𞤲𞤺𞤮𞤲. 𞤒𞤢𞤤𞤼𞤭𞤲𞤯𞤮𞤲 𞤲𞤺𞤮 𞤳𞤮𞤲𞤮 𞤮𞤲 𞤸𞤢𞥄𞤤𞤢𞥄𞤤𞤭 𞤸𞤢𞤴 𞤸𞤵𞥅𞤲𞤣𞤫. 𞤔𞤮𞤳𞥆𞤵𞤯𞤮𞤲 𞤫 𞤤𞤭𞤻𞤵𞤺𞤮𞤤 𞤺𞤭𞥅𞤦𞤢𞥄𞤶𞤭 𞤶𞤢𞤲𞤺𞤮𞥅𞤩𞤫 𞤸𞤫𞤣𞥆𞤭𞥅𞤩𞤫 𞤩𞤫𞤲 𞤱𞤢 𞤧𞤭 𞤮 𞤴𞤭𞤢𞥄𞤤𞤭 𞤲𞤺𞤮 𞤼𞤢𞤸𞤮⹁ 𞤸𞤢𞥄 𞤸𞤵𞥅𞤩𞤵𞤼𞤵𞤯𞤮𞤲 𞤳𞤵𞤪𞤵𞤲𞤱𞤮𞤤 𞤲𞤺𞤮𞤤. 𞤈𞤫𞤬𞤼𞤭 𞤳𞤢𞤣𞤭⹁ 𞤱𞤭𞤯𞤭𞤯𞤮𞤲 𞤲𞤣𞤫𞤪 𞤧𞤢𞤧𞤢𞥄𞤶𞤭 𞤢𞤥𞤫𞤲 𞤯𞤭𞤲 𞤬𞤮𞤱. 

𞤇𞤢𞥄𞤴𞤼𞤭 𞤮𞤲 𞤺𞤢𞤴𞤲𞤭𞥅⹁ 𞤱𞤭𞤵𞤯𞤮𞤲 𞤴𞤮 𞤥𞤫𞤲 𞤵𞤣𞥆𞤭𞤼𞤵 𞤺𞤭𞤼𞤫 𞤢𞤥𞤫𞤲 𞤯𞤫𞤲⹁ 𞤮𞤲 𞤴𞤭𞥅𞤼𞤭𞥅 𞤶𞤢𞤱𞤮 𞤲𞤺𞤮𞤲. 𞤑𞤮𞤲𞤮 𞤮𞤲 𞤸𞤢𞥄𞤤𞤢𞥄𞤤𞤭 𞤳𞤮 𞤫 𞤺𞤭𞥅𞤦𞤢 𞤸𞤮𞤥𞤦𞤮 𞤫 𞤢𞤥𞤫𞤲 𞤴𞤭𞤵𞤯𞤮𞤲 𞤲𞤺𞤮. 𞤌𞤲 𞤱𞤭𞤪𞤼𞤢𞥄𞤤𞤭 𞤤𞤢𞤲⹁  𞤸𞤢𞤴 𞤮𞤲 𞤲𞤮𞤣𞥆𞤢𞥄𞤤𞤭 𞤤𞤢𞤲 𞤫 𞤧𞤫𞤪𞤢⹁ 𞤻𞤢𞥄𞤯𞤢𞤲𞤯𞤮𞤲 𞤤𞤢𞤲 𞤥𞤢𞤤𞥆𞤢 𞤬𞤫𞤤𞤮𞤲 𞤤𞤢𞤲. 𞤖𞤢𞤴 𞤬𞤵𞤧 𞤮𞤲 𞤸𞤢𞥄𞤤𞤢𞥄𞤤𞤭.

𞤐𞤣𞤫𞤲 𞤻𞤢𞤤𞤲𞤣𞤫⹁ 𞤮𞤲 𞤧𞤵𞤪𞥆𞤭𞥅 𞤤𞤢𞤲⹁ 𞤮𞤲 𞤣𞤢𞤲𞤣𞤭𞥅 𞤤𞤢𞤲 𞤸𞤫𞤪𞤧𞤢 𞤱𞤭𞤪𞤼𞤫𞥅𞤣𞤫.

𞤑𞤮 𞤺𞤭𞤤𞤢 𞤲𞤣𞤫𞤲 𞤻𞤢𞤤𞤲𞤣𞤫⹁ 𞤥𞤭 𞤬𞤭𞤩𞤭 𞤱𞤮𞤲𞤣𞤫𞤥𞤢 𞤥𞤭 𞤱𞤵𞤶𞥆𞤭𞤼𞤢𞤼𞤢𞥄 𞤨𞤮𞥅𞤥𞤢𞥄. 𞤃𞤭 𞤬𞤭𞤩𞤭 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤥𞤭 𞤱𞤢𞤯𞤭𞤼𞤢𞤼𞤢𞥄 𞤳𞤮 𞤦𞤮𞤲𞤭 𞤦𞤭𞤲𞥆𞤢𞤥𞤢 𞤥𞤭𞤯𞤮 𞤱𞤵𞥅𞤪𞤭. 𞤊𞤭𞥅 𞤳𞤢𞤤𞤢 𞤮𞤲 𞤻𞤢𞥄𞤯𞤢𞤲𞤢𞥄𞤤𞤭 𞤤𞤢𞤲⹁ 𞤮𞤲 𞤧𞤮𞤲𞤳𞤢𞤲𞤢𞥄𞤤𞤭 𞤤𞤢𞤲⹁ 𞤮𞤲 𞤨𞤮𞥅𞤯𞤢𞥄𞤤𞤭 𞤤𞤢𞤲 𞤫 𞤧𞤫𞤪𞤢 𞤱𞤢𞥄𞤶𞤭𞤯𞤮𞤲 𞤤𞤢𞤲⹁ 𞤳𞤢𞤣𞤭 𞤮𞤲 𞤸𞤢𞥄𞤤𞤭𞤲𞤢𞥄𞤤𞤭 𞤸𞤢𞤴 𞤺𞤮𞥅𞤼𞤮 𞤬𞤭𞥅 𞤥𞤵𞥅𞤯𞤵𞤲⹁ 𞤸𞤢𞤪𞤭 𞤥𞤭 𞤲𞤢𞤲𞤭𞥅 𞤱𞤢𞥄𞤶𞤵 𞤥𞤮𞥅𞤯𞤮𞤲 𞤲𞤺𞤵𞤲 𞤬𞤮𞤼𞤢.

𞤃𞤭 𞤶𞤢𞤲𞤺𞤭 𞤫 𞤥𞤮𞥅𞤯𞤮𞤲 𞤸𞤮𞤤 𞤲𞤮 𞤶𞤢𞤲𞤺𞤭𞤲𞤮𞥅𞤱𞤮 𞤸𞤢𞥄𞤲𞤭 𞤲𞤫𞤭𞤪𞤣𞤫 𞤶𞤢𞤲𞤺𞤮𞥅𞤩𞤫. 𞤔𞤢𞤳𞤢 𞤲𞤮 𞤱𞤮𞥅𞤣𞤭 𞤳𞤮 𞤩𞤵𞤪𞤭 𞤨𞤭𞤺𞥆𞤢𞤤 𞤫 𞤸𞤮𞤴𞤪𞤫. 

𞤌𞤲 𞤢𞤲𞤣𞤭𞤼𞤭𞥅 𞤲𞤣𞤫𞤲 𞤻𞤢𞤤𞤲𞤣𞤫 𞤕𞤫𞤪𞤲𞤮𞥅𞤩𞤫؟” 𞤅𞤵𞤳𞤢 𞤤𞤲 𞤤𞤢𞤲𞤣𞤭𞥅.

𞤃𞤢𞤱𞤯𞤮 𞤮𞤲 𞤱𞤭𞤭: “𞤃𞤭 𞤢𞤲𞤣𞤭𞤼𞤭𞥅 𞤻𞤢𞤤𞤲𞤣𞤫 𞤲𞤺𞤮𞤲 𞤶𞤢𞤱𞤮 𞤱𞤵𞤶𞥆𞤢𞤲𞤮𞥅. 𞤃𞤭𞤯𞤮 𞤥𞤢𞥄𞤲𞤣𞤭𞤼𞤭𞥅 𞤳𞤢𞤣𞤭 𞤲𞤣𞤫 𞤥𞤭 𞤱𞤭𞤯𞤭𞤲𞤮𞥅 𞤫 𞤺𞤭𞥅𞤦𞤢𞥄𞤶𞤭 𞤶𞤢𞤲𞤺𞤢𞤲𞤢𞥄𞤳𞤵𞥅𞤩𞤫 𞤩𞤫𞤲 𞤬𞤮𞤱. 𞤑𞤮 𞤱𞤢𞤯𞤭 𞤲𞤮𞤲 𞤥𞤭 𞤢𞤲𞤣𞤭𞤼𞤢𞥄𞤤𞤭 𞤥𞤢⹁ 𞤸𞤢𞤪𞤭 𞤥𞤭𞤲 𞤳𞤢𞤣𞤭 𞤥𞤭𞤯𞤮 𞤮𞤥𞤦𞤵𞤲𞤮𞥅 𞤺𞤭𞤼𞤫 𞤢𞤲 𞤯𞤫𞤲 𞤬𞤫𞤱𞤲𞤣𞤮 𞤥𞤭 𞤯𞤢𞤩𞥆𞤭𞤼𞤢𞤴𞤲𞤮𞥅 𞤥𞤵𞤤𞥆𞤮 𞤲𞤺𞤮𞤲 𞤫 𞤲𞤣𞤫𞤪 𞤺𞤭𞥅𞤦𞤢𞥄𞤶𞤭 𞤥𞤮𞤲 𞤯𞤭𞤲.”

𞤅𞤮 𞤼𞤢𞤱𞤭𞥅 𞤢 𞤱𞤢𞥄𞤱𞤢𞤼𞤢𞥄 𞤲𞤫𞤵𞤣𞤫 𞤲𞤫𞤯𞥆𞤮 𞤸𞤢𞤪𞤢 𞤢 𞤱𞤭𞤪𞤼𞤢𞥄𞤤𞤭 𞤥𞤮⹁ 𞤸𞤢𞤪𞤢 𞤸𞤵𞥅𞤱𞤼𞤮𞤪𞤢𞥄𞤤𞤭 𞤨𞤭𞤺𞥆𞤢𞤤 𞤫 𞤸𞤮𞤴𞤪𞤫⹁ 𞤴𞤮 𞤢 𞤢𞤲𞤣𞤵 𞤢 𞤼𞤭𞤥𞥆𞤢𞥄𞤤𞤭 𞤷𞤫𞤪𞤲𞤮𞥅𞤶𞤮 𞤼𞤢𞤸𞤮.

𞤃𞤮 𞤶𞤢𞤲𞤺𞤭𞥅⹁ 𞤴𞤮 𞤧𞤢𞥄𞤳𞤵𞤼𞤵 𞤱𞤮𞤼𞤢 𞤮 𞤱𞤵𞤣𞥆𞤭𞤪!