𞤕𞤀𞥄𞤖𞤓 𞤅𞤋𞤈𞤀: 𞤐𞤄𞤀𞥄𞤏𞤁𞤋 𞤖𞤓𞥅𞤏𞤌𞤐’𞤁𞤋𞤈𞤀𞤂
𞤕𞤢𞥄𞤸𞤵 𞤅𞤭𞤪𞤢: 𞤐𞤦𞤢𞥄𞤱𞤣𞤭 𞤸𞤵𞥅𞤱𞤮𞤲𞥋𞤣𞤭𞤪𞤢𞤤
𞤙𞤢𞤤𞤲𞤣𞤫 𞤺𞤮𞥅 𞤲𞤵𞤲⹁ 𞤧𞤮𞤲𞥆𞤢𞥄𞤶𞤮 𞤲𞤢𞤴𞤫𞥅𞤶𞤮 𞤭𞤲𞥆𞤫𞤼𞤫𞥅𞤯𞤮 𞤅𞤭𞤪𞤢 𞤲𞤮 𞤸𞤮𞤯𞤵𞤲𞤮𞥅 𞤫 𞤳𞤮𞤯𞤮𞤤𞤵𞤲 𞤫 𞤲𞤣𞤫𞤪 𞤀𞤬𞤪𞤭𞤳. 𞤖𞤮𞤥𞤮 𞤢𞤲𞤣𞤭𞤪𞤢𞤲𞤮𞥅 𞤫 𞤲𞤣𞤫𞤪 𞤦𞤢𞤽𞥆𞤫𞥅𞤪𞤭 𞤲𞤣𞤭𞤲 𞤷𞤢𞥄𞤸𞤵 𞤫 𞤲𞤵𞤲𞤯𞤢𞤤 𞤸𞤢𞤳𞥆𞤮. 𞤑𞤮𞤯𞤣𞤭𞥅𞤩𞤫 𞤩𞤫𞤲 𞤢𞤪𞤢𞤴𞤲𞤮 𞤣𞤭𞥅𞤧𞤭𞤲𞤢𞤺𞤮𞤤 𞤥𞤮 𞤼𞤵𞤥𞤢 𞤳𞤢𞤤𞤢 𞤲𞤣𞤫 𞤩𞤫 𞤸𞤫𞤩𞤭 𞤷𞤢𞤯𞤫𞥅𞤤𞤫. 𞤅𞤭𞤪𞤢 𞤸𞤫𞤯𞤭𞤼𞤮𞥅 𞤬𞤭𞤤𞥆𞤢𞤴𞤫𞥅 𞤥𞤮 𞤳𞤢𞤤𞤢. 𞤖𞤮 𞤢𞤣𞥆𞤢𞤲𞤢 𞤩𞤢 𞤳𞤢𞤣𞤭 𞤬𞤫𞤸𞤪𞤫 𞤬𞤮𞤼𞤵𞤲𞥋𞤣𞤫.
𞤙𞤢𞤤𞤲𞤣𞤫 𞤺𞤮𞥅𞤪𞤫⹁ 𞤴𞤫𞤣𞥆𞤮𞤲𞥋𞤣𞤭𞤪𞤢𞤤 𞤱𞤢𞤯𞤭 𞤸𞤢𞤳𞥆𞤵𞤲𞥋𞤣𞤫 𞤳𞤮𞤯𞤣𞤭𞥅𞤩𞤫 𞤯𞤭𞤯𞤮⹁ 𞤘𞤢𞤤𞤮 𞤫 𞤘𞤢𞤲𞤣𞤮. 𞤑𞤮 𞤬𞤭𞥅 𞤲𞤺𞤫𞤧𞤢 𞤩𞤫 𞤱𞤮𞤲𞤵𞤲𞤮𞥅 𞤫 𞤴𞤫𞤣𞥆𞤵𞤲𞥋𞤣𞤭𞤪𞤣𞤫. 𞤘𞤮𞥅𞤼𞤮 𞤳𞤢𞤤𞤢 𞤱𞤭𞤴𞤭 𞤳𞤮 𞤳𞤢𞤻𞤵𞤲 𞤶𞤫𞤴𞤭. 𞤑𞤮𞤯𞤣𞤢𞤭𞥅𞤩𞤫 𞤸𞤫𞤣𞥆𞤭𞥅𞤩𞤫 𞤩𞤫𞤲 𞤼𞤢𞤱𞤭 𞤢𞤲𞤣𞤢𞥄 𞤳𞤮 𞤸𞤮𞤥𞤦𞤮 𞤫 𞤩𞤫𞥅 𞤯𞤭𞤯𞤮 𞤩𞤫 𞤬𞤮𞤼𞤭 𞤶𞤮𞤺𞤲𞤭𞤼𞤵𞤣𞤫 𞤺𞤮𞥅𞤲𞤺𞤢. 𞤇𞤫 𞤬𞤭𞤩𞤭 𞤬𞤫𞤱𞤼𞤵𞤺𞤮𞤤 𞤅𞤭𞤪𞤢 𞤲𞤺𞤢𞤥 𞤲𞤣𞤢𞥄𞤪𞤵𞤺𞤮𞤤 𞤧𞤮 𞤼𞤢𞤱𞤭𞥅 𞤸𞤮 𞤱𞤢𞥄𞤱𞤢𞤴 𞤶𞤭𞥅𞤩𞤼𞤢𞤲𞤣𞤫 𞤩𞤫 𞤲𞤣𞤫𞥅 𞤸𞤢𞤩𞤪𞤫.
𞤅𞤭𞤪𞤢 𞤸𞤫𞤯𞤭𞤼𞤭𞥅 𞤧𞤭𞤬𞤢𞤲𞤯𞤫 𞤱𞤮𞤪𞤩𞤫 𞤩𞤫𞤲 𞤯𞤭𞤯𞤮. 𞤇𞤢𞥄𞤱𞤼𞤭 𞤯𞤵𞤥⹁ 𞤸𞤮 𞤰𞤫𞤼𞥆𞤭 𞤬𞤮𞥅𞤬𞤢𞥄𞤲𞤺𞤮 𞤥𞤢𞤱𞤲𞤺𞤮⹁ 𞤸𞤮 𞤱𞤭𞤴𞤭: “𞤏𞤫𞤤𞤣𞤭𞥅𞤩𞤫 𞤢𞤥⹁ 𞤥𞤭 𞤬𞤭𞤤𞥆𞤢𞤲𞤼𞤮 𞤮𞤲 𞤨𞤫𞤰𞥆𞤮𞤤 𞤱𞤢𞤤𞥆𞤭𞤼𞤮𞤼𞤮𞥅𞤲𞤺𞤮𞤤 𞤫𞤲 𞤸𞤫𞤩𞤵𞤺𞤮𞤤 𞤬𞤫𞤸𞤪𞤫.”
𞤑𞤮 𞤻𞤢𞤤𞤲𞤣𞤫 𞤺𞤮𞥅𞤪𞤫⹁ 𞤲𞤺𞤢𞤴𞤵𞥅𞤪𞤭 𞤥𞤢𞤱𞤲𞤣𞤭 𞤫 𞤶𞤢𞤱𞤪𞤫 𞤲𞤮 𞤧𞤫𞤲𞤣𞤮𞤣𞤢𞤴𞤲𞤮𞥅 𞤲𞤮𞤳𞥆𞤵𞥅𞤪𞤫. 𞤐𞤺𞤢𞤴𞤵𞥅𞤪𞤭 𞤲𞤣𞤭𞤲 𞤲𞤮 𞤥𞤢𞤪𞤵𞤲𞤮𞥅 𞤷𞤫𞤥𞤦𞤫 𞤫 𞤣𞤮𞥅𞤤𞤫. 𞤔𞤢𞤱𞤪𞤫 𞤲𞤣𞤫𞤲 𞤲𞤮𞤲⹁ 𞤲𞤮 𞤴𞤢𞥄𞤱𞤵𞤲𞤮𞥅 𞤫 𞤲𞤮 𞤧𞤮𞤬𞤼𞤵𞤲𞤮𞥅 𞤬𞤮𞤼𞤢. 𞤑𞤮𞤲𞤮⹁ 𞤯𞤭 𞤴𞤫𞤣𞥆𞤮𞤲𞥋𞤣𞤭𞤪𞤼𞤢𞥄𞤲𞤮 𞤨𞤮𞥅𞤥𞤢𞥄⹁ 𞤲𞤺𞤢𞤥𞤵 𞤭𞤯𞤭 𞤢𞤲𞤣𞤵𞤲𞤮𞥅 𞤱𞤮𞤲𞤣𞤫𞤥𞤢 𞤯𞤭 𞤯𞤭𞥅𞤯𞤭 𞤲𞤮𞥅𞤲 𞤲𞤮 𞤸𞤭𞤼𞥆𞤭 𞤫 𞤦𞤵𞤪𞤵𞥅𞤪𞤫 𞤲𞤣𞤫𞤲.
𞤙𞤢𞤤𞤲𞤣𞤫 𞤺𞤮𞥅𞤪𞤫⹁ 𞤴𞤮𞥅𞤪𞤵 𞤢𞤪𞤭 𞤫 𞤦𞤢𞤽𞥆𞤫𞥅𞤪𞤭 𞤲𞤣𞤭𞤲. 𞤑𞤵𞤤𞥆𞤫 𞤯𞤫𞤲 𞤼𞤢𞤥𞤨𞤭 𞤬𞤮𞤼𞤢 𞤲𞤮𞤲. 𞤐𞤮𞤳𞥆𞤵𞥅𞤤𞤭 𞤲𞤣𞤭𞤴𞤢𞤥 𞤯𞤭𞤲 𞤩𞤫𞥅𞤩𞤭⹁ 𞤻𞤢𞥄𞤥𞤣𞤵 𞤧𞤢𞤯𞤭. 𞤉 𞤲𞤣𞤫𞤪 𞤯𞤵𞤥⹁ 𞤲𞤺𞤢𞤴𞤵𞥅𞤪𞤭 𞤲𞤣𞤭𞤲 𞤫 𞤶𞤢𞤱𞤪𞤫 𞤲𞤣𞤫𞤲 𞤢𞤪𞤭 𞤱𞤫𞥅𞤤𞤫𞥅𞤣𞤫⹁ 𞤳𞤮𞤲𞤮 𞤯𞤭 𞤸𞤢𞤩𞤢𞤼𞤢𞥄𞤲𞤮 𞤬𞤭𞥅 𞤳𞤮𞤣𞥆𞤵𞤲. 𞤁𞤭𞥅 𞤴𞤮 𞤯𞤭 𞤱𞤢𞤯𞤵 𞤯𞤵𞥅𞤲⹁ 𞤯𞤭 𞤯𞤢𞤩𞥆𞤭𞤣𞤢𞤴𞤲𞤮 𞤩𞤵𞤤𞥆𞤭 𞤲𞤣𞤭𞤴𞤢𞤥⹁ 𞤯𞤭 𞤧𞤫𞤲𞤣𞤮𞤣𞤢 𞤫 𞤯𞤫𞤴𞤢 𞤳𞤵𞤤𞥆𞤫 𞤸𞤵𞤲𞤷𞤢𞤲𞤯𞤫 𞤥𞤢𞤶𞥆𞤭.
𞤖𞤵𞥅𞤱𞤮𞤲𞥋𞤣𞤭𞤪𞤢𞤤 𞤥𞤢𞤶𞥆𞤭 𞤱𞤢𞤤𞥆𞤭𞤼𞤭𞥅 𞤯𞤫𞤴𞤢 𞤳𞤵𞤤𞥆𞤫 𞤱𞤵𞥅𞤪𞤵𞤺𞤮𞤤. 𞤐𞤺𞤢𞤴𞤵𞥅𞤪𞤭 𞤲𞤣𞤭𞤲 𞤫 𞤶𞤢𞤱𞤪𞤫 𞤲𞤣𞤫𞤲 𞤬𞤢𞤸𞤥𞤭 𞤱𞤮𞤲𞤣𞤫𞤥𞤢 𞤸𞤵𞥅𞤱𞤮𞤲𞥋𞤣𞤭𞤪𞤢𞤤 𞤥𞤢𞤶𞥆𞤭⹁ 𞤫 𞤼𞤫𞤣𞥆𞤵𞤲𞥋𞤺𞤢𞤤 𞤫 𞤧𞤫𞤲𞤣𞤮𞤣𞤢𞤤 𞤲𞤮 𞤸𞤭𞤼𞥆𞤢𞤲𞤭 𞤬𞤭𞥅 𞤸𞤫𞤩𞤼𞤢𞥄𞤪𞤫 𞤦𞤵𞤪𞤵𞥅𞤪𞤫 𞤲𞤣𞤫𞤲.
𞤇𞤢𞥄𞤱𞤮 𞤅𞤭𞤪𞤢 𞤬𞤭𞤤𞥆𞤢𞥄𞤣𞤫 𞤲𞤺𞤮𞥅𞤤 𞤨𞤫𞤰𞥆𞤮𞤤⹁ 𞤅𞤭𞤪𞤢 𞤬𞤫𞤱𞤼𞤭 𞤘𞤢𞤤𞤮 𞤫 𞤘𞤢𞤲𞤣𞤮⹁ 𞤸𞤮 𞤱𞤭𞤴𞤭 𞤩𞤫: “𞤏𞤢𞤲𞤮 𞤲𞤺𞤢𞤴𞤵𞥅𞤪𞤭 𞤲𞤣𞤭𞤲 𞤫 𞤶𞤢𞤱𞤪𞤫 𞤲𞤣𞤫𞤲 𞤲𞤮𞥅𞤲⹁ 𞤮𞤲 𞤧𞤫𞤲𞤣𞤮𞤣𞤢𞤴 𞤲𞤮𞤳𞥆𞤵𞥅𞤪𞤫 𞤲𞤣𞤫𞤲. 𞥟𞤍𞤮𞥅 𞤴𞤮 𞤮𞤲 𞤸𞤢𞤩𞤵𞤣𞤫⹁ 𞤸𞤢𞤯𞤭 𞤯𞤢𞤩𞥆𞤮𞤲 𞤬𞤫𞤸𞤪𞤫 𞤲𞤮 𞤸𞤵𞥅𞤱𞤮𞤲𞥋𞤣𞤭𞤪𞤭𞤪𞤮𞤲 𞤫 𞤲𞤮 𞤧𞤫𞤲𞤣𞤭𞤪𞤮𞤲 𞤦𞤮𞤼𞤫 𞤲𞤺𞤫𞤧𞤢 𞤲𞤦𞤢𞤲؟”
𞤏𞤮𞤪𞤩𞤫 𞤩𞤫𞤲 𞤯𞤭𞤯𞤮 𞤥𞤭𞥅𞤶𞤭𞤼𞤭𞥅 𞤸𞤮𞥅𞤪𞤫 𞤬𞤫𞤸𞤪𞤫 𞤅𞤭𞤪𞤢 𞤲𞤣𞤫𞤲. 𞤇𞤫 𞤲𞤣𞤢𞥄𞤪𞤭 𞤩𞤫 𞤼𞤢𞤱𞤭 𞤱𞤢𞤥𞤩𞤫 𞤯𞤭𞤯𞤮 𞤳𞤮 𞤩𞤫 𞤪𞤫𞤥𞤮𞥅𞤩𞤫 𞤳𞤫𞤤𞤯𞤵𞤩𞤫. 𞤇𞤫 𞤱𞤢𞥄𞤱𞤢𞤴 𞤸𞤢𞤱𞤼𞤭𞤲𞥋𞤣𞤭𞤪𞤣𞤫 𞤢𞤲𞤼𞤫 𞤫 𞤦𞤢𞥄𞤱𞤯𞤫 𞤱𞤢𞤩𞥆𞤫 𞤲𞤺𞤢𞤥 𞤪𞤫𞤥𞤭𞤣𞤵𞤺𞤮𞤤 𞤲𞤺𞤫𞤧𞤢 𞤲𞤦𞤢𞤲.
𞤘𞤢𞤤𞤮 𞤫 𞤘𞤢𞤲𞤣𞤮 𞤶𞤢𞤩𞤭 𞤬𞤫𞤸𞤪𞤫 𞤅𞤭𞤪𞤢 𞤲𞤣𞤫𞤲. 𞤇𞤫 𞤶𞤢𞤩𞤭 𞤱𞤮𞤲𞤣𞤫𞤥𞤢 𞤩𞤫 𞤣𞤮𞥅𞤤𞤲𞤭𞤣𞤢𞤴 𞤧𞤮 𞤩𞤫 𞤸𞤢𞤱𞤼𞤭𞥅 𞤩𞤵𞤼𞤭 𞤧𞤭 𞤥𞤮 𞤦𞤫𞥅 𞤱𞤮𞤲𞤭𞥅 𞤬𞤫𞥅𞤪𞤫. 𞤇𞤫 𞤧𞤢𞤤𞤥𞤮𞤲𞥋𞤣𞤭𞤪𞤭⹁ 𞤪𞤫𞤬𞤼𞤭 𞤩𞤫 𞤬𞤭𞤩𞤭 𞤺𞤮𞤤𞥆𞤭𞤣𞤵𞤺𞤮𞤤 𞤸𞤮𞥅𞤪𞤫 𞤤𞤢𞥄𞤩𞤢𞤤⹁ 𞤫 𞤧𞤫𞤲𞤣𞤮𞤣𞤢𞤤 𞤷𞤮𞤻𞤫 𞤯𞤫𞤲 𞤲𞤮 𞤬𞤮𞤼𞤭𞤪𞤭.
𞤖𞤮𞤯𞤮 𞤲𞤺𞤮𞤲 𞤬𞤮𞤬 𞤱𞤫𞤤𞤼𞤮𞤪𞤭 𞤷𞤢𞥄𞤸𞤵 𞤅𞤭𞤪𞤢 𞤲𞤺𞤵𞤲. 𞤇𞤫 𞤴𞤭𞤴𞤭 𞤲𞤮𞥅𞤲𞤫 𞤲𞤮 𞤸𞤮 𞤢𞤪𞤼𞤭𞤪𞤭 𞤩𞤵𞥅𞤩𞤼𞤵 𞤫 𞤲𞤵𞤲𞤯𞤢𞤤 𞤲𞤣𞤫𞤪 𞤸𞤮𞤯𞤮 𞤲𞤺𞤮𞤲. 𞤅𞤭𞤪𞤢 𞤶𞤮𞤳𞥆𞤭 𞤱𞤢𞤤𞥆𞤭𞤼𞤢𞤺𞤮𞤤 𞤳𞤮𞤯𞤣𞤭𞥅𞤩𞤫 𞤩𞤫𞤲 𞤶𞤭𞤩𞤼𞤭𞤪𞤺𞤮𞤤 𞤷𞤢𞤯𞤫𞥅𞤤𞤫 𞤯𞤫𞤲 𞤨𞤫𞤰𞥆𞤭 𞤫 𞤬𞤭𞥅𞤲𞤢𞤲𞤯𞤫 𞤷𞤢𞥄𞤸𞤵.
𞤑𞤮 𞤲𞤭𞥅 𞤅𞤭𞤪𞤢⹁ 𞤧𞤮𞤲𞥆𞤢𞥄𞤶𞤮 𞤲𞤢𞤴𞤫𞥅𞤶𞤮 𞤸𞤮𞥅𞤲 𞤤𞤮𞤤𞥆𞤭𞤪𞤭 𞤫 𞤶𞤢𞤲𞤺𞤭𞤲𞤺𞤮𞤤 𞤬𞤢𞤴𞤩𞤫 𞤫 𞤥𞤢𞤱𞤩𞤫 𞤩𞤫𞤲 𞤲𞤺𞤢𞤤𞤵 𞤲𞤵𞤲𞤯𞤢𞤤 𞤫 𞤬𞤮𞤼𞤢𞤤 𞤫 𞤲𞤣𞤫𞤪 𞤲𞤺𞤵𞥅𞤪𞤲𞤣𞤢𞤥 𞤻𞤢𞤤𞤲𞤣𞤫 𞤦𞤫𞥅.
𞤑𞤢𞤪𞤢𞤲𞤦𞤮𞤤 𞤕𞤫𞤪𞤲𞤮 𞤋𞤧𞤥𞤢𞥄𞤴𞤭𞥅𞤤𞤢 𞤔𞤢𞤤𞥆𞤮
𞤮𞤲 𞤶𞤢𞤪𞤲𞤢𞥄𞤥𞤢