𞤑𞤮 𞤩𞤵𞤪𞤭 𞤘𞤭𞤲𞤫𞤲𞤢𞥄𞤩𞤫 𞤧𞤢𞤨𞥆𞤮 𞤲𞤮 𞤶𞤫𞤴𞤢𞥄𞤥𞤢 𞤫 𞤥𞤢𞥄𞤴𞤵𞤩𞤫 𞤩𞤫𞤲 𞤢𞤥𞤫𞤪𞤭𞤳𞤢𞥄 𞤧𞤢𞤦𞤵 𞤲𞤺𞤵𞥅 𞤻𞤢𞤱𞤵 𞤢𞤲𞤣𞤭𞤪𞤢𞥄𞤲𞤺𞤵 𞤳𞤮𞤾𞤭𞤣-𞥑𞥙. 𞤖𞤫𞥅𞤱𞤵𞤩𞤫 𞤫 𞤩𞤫𞥅 𞤳𞤮 𞤄𞤵𞤪𞤳𞤤𞤭𞤲 𞤫 𞤦𞤮𞤪𞤮𞤲𞤳𞤧 𞤱𞤮𞤲𞤭 𞤳𞤮 𞤩𞤫 𞤸𞤮𞤯𞤭.

𞤘𞤭𞤤𞤢 𞤲𞤺𞤵𞥅 𞤻𞤢𞤱𞤵 𞤬𞤫𞥅𞤻𞤭 𞤀𞤥𞤫𞤪𞤭𞤳𞤢𞥄⹁ 𞤲𞤺𞤵 𞤪𞤢𞥄𞤩𞤭𞥅 𞤳𞤮 𞤩𞤢𞤣𞤭𞥅 𞤴𞤭𞤥𞤩𞤫 𞤵𞤶𞤵𞤲𞤫 𞤼𞤫𞥅𞤥𞤫𞤯𞥆𞤫 𞤲𞤢𞤴𞤭 (𞥔𞥐𞥐 𞥐𞥐𞥐). 𞤐𞤺𞤵 𞤱𞤢𞤪𞤭𞥅 𞤳𞤢𞤣𞤭 𞤳𞤮 𞤩𞤢𞤣𞤭𞥅 𞤵𞤶𞤵𞤲𞤫 𞤧𞤢𞤨𞥆𞤮-𞤫-𞤼𞤢𞤼𞤭 (𞥑𞥓 𞥐𞥐𞥐). 𞤑𞤮𞤲𞤮 𞤳𞤮 𞤢𞤧𞤼𞤵𞤦𞤢𞥄𞤳𞤮𞥅𞤩𞤫 𞤩𞤫𞤲  (𞤩𞤫𞥅 𞤱𞤮𞤲𞤢𞥄 𞤼𞤵𞤦𞤵𞥅𞤳𞤮)  𞤲𞤺𞤵  𞤩𞤵𞤪𞤭 𞤪𞤢𞥄𞤩𞤵𞤣𞤫⹁ 𞤳𞤮 𞤩𞤫𞤲 𞤳𞤢𞤣𞤭 𞤲𞤺𞤵 𞤩𞤵𞤪𞤭 𞤱𞤢𞤪𞤵𞤣𞤫. 𞤚𞤫𞤲𞤼𞤭𞤲𞤭𞥅 𞤲𞤮𞤲 𞤩𞤢𞤤𞤫𞥅𞤩𞤫 𞤩𞤫𞤲.

𞤉 𞤲𞤣𞤫𞤪 𞤷𞤢𞤫 𞤥𞤢𞤤𞥆𞤢 𞤺𞤢𞤤𞥆𞤵𞥅𞤶𞤫 𞤀𞤥𞤫𞤪𞤭𞤳𞤢𞥄 𞤥𞤢𞤱𞤯𞤫⹁ 𞤯𞤫 𞤶𞤭𞤤𞥆𞤮𞥅𞤣𞤭 𞤤𞤫𞤰𞥆𞤭 𞤻𞤢𞤱𞤵𞤩𞤫 𞤥𞤵𞤲 𞤢𞤲𞤣𞤭𞥅 𞤼𞤢𞤸𞤮⹁ 𞤳𞤮 𞤩𞤢𞤤𞤫𞥅𞤩𞤫 𞤩𞤫𞤲 𞤑𞤮𞤾𞤭𞤣-𞥑𞥙 𞤩𞤵𞤪𞤭 𞤪𞤢𞥄𞤩𞤵𞤣𞤫. 𞤖𞤢𞤴 𞤲𞤮𞤲 𞤧𞤮 𞤼𞤢𞤱𞤭𞥅 𞤱𞤮𞤲𞤢𞥄 𞤳𞤢𞤥𞤩𞤫 𞤩𞤵𞤪𞤭 𞤯𞤵𞥅𞤯𞤵𞤣𞤫 𞤫 𞤯𞤫𞤲 𞤷𞤢𞤫. 𞤅𞤭𞤳𞤢𞤺𞤮𞥅⹁ 𞤁𞤫𞤼𞤮𞤪𞤮𞥅𞤴⹁ 𞤐𞤫𞤱-𞤒𞤮𞤪𞤳𞤵⹁ 𞤫 𞤯𞤫𞥅 𞤷𞤢𞤫 𞤯𞤮𞥅 𞤼𞤢𞤼𞤭⹁ 𞤲𞤮 𞤼𞤵𞥅𞤥𞤢𞥄  𞤳𞤮 𞤩𞤢𞤤𞤫𞥅𞤩𞤫 𞤩𞤫𞤲 𞤩𞤵𞤪𞤭 𞤥𞤢𞥄𞤴𞤵𞤣𞤫.

𞤚𞤮 𞤧𞤢𞥄𞤪𞤫 𞤅𞤭𞤳𞤢𞤺𞤮𞥅⹁ 𞤫 𞤲𞤣𞤫𞤪 𞤧𞤢𞤨𞥆𞤮 𞤥𞤢𞥄𞤴𞤵𞤩𞤫⹁ 𞤲𞤶𞤫𞥅𞤯𞤭𞤯𞤮𞥅𞤩𞤫 𞤩𞤫𞤲 𞤳𞤮 𞤩𞤢𞤤𞤫𞥅𞤩𞤫⹁ 𞤸𞤢𞤪𞤢 𞤤𞤫 𞤩𞤢𞤤𞤫𞥅𞤩𞤫 𞤩𞤫 𞤳𞤮 𞤼𞤢𞤼𞤢𞤩𞤢𞤤 𞤨𞤫𞤼 𞤴𞤭𞤥𞤩𞤫 𞤧𞤢𞥄𞤪𞤫 𞤲𞤣𞤫𞤲. 𞤑𞤮 𞤱𞤢𞤲𞤮𞤲𞤭𞥅 𞤳𞤢𞤣𞤭 𞤫 𞤷𞤢𞤫 𞤂𞤵𞤱𞤭𞤧𞤭𞤴𞤢𞤲𞤢𞥄 𞤳𞤢𞤻𞤵𞤲 𞤫 𞤏𞤭𞤧𞤳𞤮𞤲𞤧𞤭𞤲.

𞤐𞤮 𞤼𞤢𞤱𞤢𞥄 𞤳𞤮 𞤱𞤮𞤲𞤭 𞤧𞤢𞤦𞤵 𞤯𞤵𞤯𞤵𞤺𞤮𞤤 𞤥𞤢𞥄𞤴𞤩𞤫 𞤩𞤫𞤲 𞤳𞤢 𞤩𞤢𞤤𞤫𞥅𞤩𞤫⹁ 𞤢𞤲𞤺𞤢𞤤 𞤱𞤫𞥅𞤩𞤵𞤺𞤮𞤤 𞤳𞤢 𞤻𞤢𞤱𞤲𞤣𞤫𞤼𞤫𞥅 𞤫 𞤲𞤣𞤫𞤪 𞤳𞤢𞤱𞤼𞤫 𞤥𞤢𞤩𞥆𞤫 𞤯𞤫𞤲. 𞤐𞤮 𞤼𞤢𞤱𞤢𞥄 𞤫 𞤧𞤢𞤦𞤵𞥅𞤶𞤭 𞤯𞤭𞤲 𞤳𞤢𞤣𞤭⹁  𞤲𞤮𞥅𞤲𞤫 𞤺𞤮𞤤𞥆𞤫 𞤯𞤫 𞤩𞤢𞤤𞤫𞥅𞤩𞤫 𞤩𞤫𞤲 𞤱𞤮𞤲𞤭 𞤫 𞤥𞤵𞤲. 𞤖𞤫𞥅𞤱𞤵𞤩𞤫 𞤲𞤮 𞤺𞤮𞤤𞥆𞤢 𞤫 𞤲𞤮𞤳𞥆𞤵𞥅𞤶𞤫 𞤱𞤢𞤯𞥆𞤭𞤲𞤯𞤫 𞤶𞤭𞤤𞥆𞤮𞤲𞥋𞤣𞤭𞤪𞤺𞤮𞤤 𞤫 𞤶𞤢𞤥𞤢𞥄𞤶𞤭 𞤥𞤢𞤤𞥆𞤢 𞤸𞤵𞥅𞤱𞤮𞤲𞥋𞤣𞤭𞤪𞤺𞤮𞤤 𞤫 𞤴𞤭𞤥𞤩𞤫 𞤧𞤫𞤪𞤼𞤵𞤩𞤫⹁ 𞤱𞤢𞤲𞤮 𞤣𞤮𞤺𞤭𞤲𞤺𞤮𞤤 𞤼𞤢𞤳𞤧𞤭𞥅⹁ 𞤥𞤢𞤤𞥆𞤢 𞤺𞤮𞤤𞥆𞤵𞤺𞤮𞤤 𞤳𞤢 𞤻𞤢𞤥𞤯𞤭 𞤴𞤫𞥅𞤼𞤫𞤼𞤫𞥅 𞤥𞤢𞥄 𞤳𞤢 𞤥𞤢𞤪𞤫𞤼𞤫𞥅.  𞤏𞤮𞥅𞤣𞤭𞥅 𞤳𞤢𞤣𞤭 𞤩𞤢𞤤𞤫𞥅𞤩𞤫 𞤦𞤵𞤴 𞤧𞤭𞤳𞥆𞤵𞤲𞤮𞥅𞤩𞤫 𞤱𞤮𞤲𞤣𞤫 𞤲𞤺𞤵𞥅 𞤻𞤢𞤱𞤵 𞤪𞤢𞥄𞤩𞤢𞤼𞤢𞥄 𞤩𞤢𞤤𞤫𞥅𞤶𞤮. 𞤑𞤮 𞤯𞤵𞤥 𞤱𞤮𞤲𞤭 𞤧𞤢𞤦𞤵 𞤸𞤢𞥄 𞤦𞤵𞤴 𞤫 𞤥𞤢𞤩𞥆𞤫 𞤱𞤫𞤤𞤧𞤭𞤲𞥋𞤣𞤭𞥅 𞤫 𞤪𞤫𞥅𞤲𞤼𞤮𞤪𞤯𞤫 𞤯𞤫𞤲.

𞤐𞤺𞤵𞥅 𞤻𞤢𞤱𞤵 𞤢𞤤𞤢𞥄 𞤤𞤫𞤳𞥆𞤭. 𞤃𞤮 𞤳𞤢𞤤𞤢 𞤲𞤮 𞤸𞤢𞥄𞤲𞤭 𞤱𞤢𞤯𞤼𞤢𞤲𞤣𞤫 𞤸𞤭𞥅𞤤𞤢 𞤫 𞤴𞤢𞤥𞤭𞤪𞤮𞥅𞤶𞤫 𞤯𞤫𞤲. 𞤃𞤮 𞤧𞤮𞤺𞤭𞤼𞤭𞤳𞤫 𞤲𞤮 𞤲𞤢𞤱𞤲𞤭⹁ 𞤴𞤮 𞤮𞤲𞤼𞤭𞤺𞤭 𞤲𞤮𞤣𞥆𞤵 𞤳𞤭𞤧𞤢𞤲 𞤧𞤢𞤬𞤪𞤮𞤪𞤯𞤫 𞤥𞤢𞤤𞥆𞤢 𞤤𞤢𞤦𞤵𞤼𞤢𞥄𞤲𞤫 𞤢𞤣𞤮 𞤴𞤮 𞤻𞤢𞤱𞤵 𞤲𞤺𞤵𞤲 𞤼𞤭𞥅𞤯𞤵.