𞤘𞤋𞤚𞤉 𞤔𞤋𞤐𞥆𞤀 𞤄𞤌𞤍𞤉 𞤏𞤌𞤔𞥆𞤋𞤐𞤀𞤐𞤌 𞤕𞤌𞤅 𞤖𞤀𞤐𞤁𞤉 𞤑𞤀𞤚𞤀𞤈

𞤔𞤢𞤳𞤢 𞤐𞤺𞤢𞤴𞤵 𞤲𞤮 𞤱𞤢𞥄𞤱𞤭 𞤨𞤭𞤴𞤭𞤵𞤣𞤫 𞤔𞤭𞤲𞥆𞤢 𞤦𞤮𞤯𞤫.
𞤑𞤮 𞤸𞤮𞤥𞤦𞤮 𞤸𞤮𞥅𞤤𞤮𞤼𞤮𞥅 𞤯𞤵𞤲؟ 𞤑𞤮𞤲𞤮 𞤢𞤣𞤮 𞤫𞤲 𞤴𞤫𞤱𞤼𞤵𞤣𞤫 𞤬𞤭𞥅 𞤳𞤢 𞤺𞤭𞤼𞤫 𞤶𞤭𞤲𞥆𞤢 𞤦𞤮𞤯𞤫 𞤱𞤮𞤶𞥆𞤭𞤲𞤢𞥄⹁ 𞤬𞤵𞤯𞥆𞤮𞤪𞤫𞤲 𞤳𞤮 𞤬𞤫𞤰𞥆𞤭 𞤸𞤢𞤳𞥆𞤵𞤲’𞤣𞤫 𞤔𞤢𞤨𞤢𞤲 𞤫 𞤑𞤮𞤧𞤼𞤢 𞤈𞤭𞤳𞤢.

𞤔𞤀𞤆𞤀𞤐🇯🇵 𞥐 – 𞥑 🇨🇷 𞤑𞤌𞤅𞤚𞤀 𞤈𞤋𞤑𞤀
𞤇𞤢𞥄𞤱𞤮 𞤐𞤭𞤨𞤮𞤲𞤢𞥄𞤩𞤫 𞤩𞤫𞤲 𞤨𞤭𞤴𞤵𞤣𞤫 𞤁𞤮𞤴𞤧𞤤𞤫𞤴𞤣𞤭 (𞤀𞤤𞤥𞤢𞤲) 𞤯𞤵𞥅𞤯𞤵𞤩𞤫 𞤲𞤮 𞤸𞤢𞤦𞥆𞤭𞤲𞤮𞥅 𞤳𞤢 𞤩𞤫 𞤱𞤢𞤯𞤢 𞤑𞤮𞤧𞤼𞤢 𞤈𞤭𞤳𞤢 𞤧𞤢𞤴𞤪𞤫 𞤱𞤮𞥅𞤼𞤫𞤪𞤫. 𞤑𞤮𞤲𞤮 𞤩𞤫 𞤼𞤢𞤱𞤵𞤲𞤮 𞤳𞤭𞤨𞥆𞤮𞤤 𞤑𞤮𞤧𞤼𞤢 𞤈𞤭𞤳𞤢 𞤲𞤺𞤮𞤤 𞤲𞤮 𞤣𞤢𞤣𞤭𞤼𞤭𞥅 𞤸𞤢𞤦𞥆𞤭𞥅. 𞤑𞤮 𞤳𞤢 𞤬𞤭𞤶𞤮 𞤲𞤺𞤮𞤲 𞤼𞤭𞤥𞥆𞤢𞤼𞤢 𞤯𞤮𞤲⹁ 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥘𞥑⹁ 𞤑𞤫𞤴𞥃𞤫𞤪 𞤊𞤵𞤤𞤫𞤪 𞤥𞤵𞤺𞤭 𞤔𞤢𞤨𞤢𞤲 𞤧𞤢𞤦𞤵 𞤬𞤢𞤤𞤶𞤫𞤪𞤫 𞤲𞤣𞤫 𞤩𞤢𞥄𞤱𞤮𞥅𞤶𞤮 𞤶𞤢𞤨𞤢𞤲 𞤮𞤲 𞤱𞤢𞤯𞤭. 𞤚𞤫𞤸𞤫𞤣𞤢 𞤸𞤮𞤷𞥆𞤭 𞤥𞤵𞤤𞥆𞤫𞤪𞤫 𞤲𞤣𞤫𞤲 𞤬𞤫𞤰𞥆𞤭𞤲𞤢𞤲𞤭 𞤊𞤵𞤤𞤫𞤪. 𞤌𞤲 𞤯𞤮𞤲 𞤱𞤢𞤯𞤭 𞤲𞤣𞤫 𞤬𞤮𞤤𞥆𞤫𞤪𞤫⹁ 𞤮 𞤴𞤢𞤪𞤲𞤭 𞤲𞤣𞤫 𞤸𞤭𞤱𞤮𞥅𞤱𞤮 𞤔𞤢𞤨𞤢𞤲 𞤮𞤲.

𞤑𞤮𞤲𞤮 𞤳𞤢 𞤣𞤫𞤲𞤼𞤢𞤤 𞤥𞤢𞤩𞥆𞤫⹁ 𞤸𞤢𞥄 𞤶𞤮𞥅𞤲𞤭 𞤳𞤮 𞤔𞤢𞤨𞤢𞤲 𞤱𞤮𞤲𞤭 𞤯𞤭𞤯𞤢𞤩𞤮. 𞤂𞤵𞤥𞤦𞤮𞥅𞤩𞤫 𞤩𞤫𞤲 𞤢𞤲𞤣𞤭𞤳𞤫 𞤱𞤮𞥅 𞤲𞤣𞤫 𞤬𞤭𞤶𞤮 𞤼𞤢𞤼𞤢𞤩𞤮 𞤲𞤺𞤮𞤲 𞤱𞤢𞤯𞤭.

𞤄𞤉𞤂𞤅𞤋𞤑🇧🇪 𞥐 – 𞥒 🇲🇦 𞤃𞤀𞤈𞤌𞤑
𞤀𞤱𞤢 𞤶𞤮𞥅𞤲𞤭 𞤢𞤪𞤼𞤫𞤲 𞤳𞤢 𞤔𞤭𞤲𞥆𞤢 𞤄𞤮𞤯𞤫 𞤥𞤵𞥅𞤯𞤭𞤲𞤢𞥄 𞤤𞤢𞤷𞥆𞤭𞤪𞤭 𞤲𞤶𞤢𞥄𞤪𞤫 𞤲𞤣𞤫 𞤐𞤺𞤢𞤴𞤵𞥅𞤶𞤭 𞤀𞤼𞤤𞤢𞤧 𞤃𞤢𞤪𞤮𞤳 𞤯𞤭𞤲 𞤬𞤮𞤼𞥆𞤵𞤲𞤮𞥅 𞤫 𞤔𞤭𞤲𞥆𞤢𞥄𞤸𞤮𞤴 𞤄𞤫𞤤𞤧𞤭𞤳 𞤳𞤮𞤴.

𞤔𞤢𞤳𞤢 𞤥𞤮𞤲𞤮 𞤬𞤮𞤳𞥆𞤭𞤼𞤭 𞤨𞤭𞤴𞤪𞤵𞤣𞤵𞤺𞤮𞤤 𞤫 𞤶𞤭𞤲𞥆𞤢 𞤦𞤮𞤯𞤫⹁ 𞤴𞤮 𞤮𞤲𞤼𞤭𞤺𞤭 𞤴𞤮𞥅𞤩𞤮 𞤲𞤺𞤢𞤴𞤵 𞤫 𞤤𞤢𞤷𞥆𞤭𞤪𞤭. 𞤀𞤲𞤣𞤭𞤳𞤫 𞤸𞤢𞤲𞤣𞤫 𞤱𞤮𞤲𞤣𞤫𞤥𞤢 𞤶𞤭𞤲𞥆𞤢 𞤧𞤵𞥅𞤧𞤢𞤼𞤢𞥄 𞤲𞤺𞤢𞤴𞤵⹁ 𞤧𞤢𞤦𞤵𞤲𞤢 𞤃𞤢𞤪𞤮𞤳 𞤨𞤭𞤴𞤵𞤲𞤮 𞤄𞤫𞤤𞤧𞤭𞤳 𞤲𞤺𞤢𞤤 𞤩𞤫 𞤴𞤫𞤶𞥆𞤭𞤼𞤢𞤼𞤢𞥄. 𞤇𞤫 𞤱𞤢𞤯𞤭 𞤩𞤫 𞤳𞤵𞥅𞤤𞤫 𞤯𞤭𞤯𞤭 𞤼𞤭𞤥𞥆𞤵𞤯𞤫 𞤼𞤭𞤧. 𞤑𞤮 𞤃𞤢𞤪𞤮𞤳 𞤱𞤮𞤲𞤭 𞤤𞤫𞤴𞤣𞤭 𞤯𞤭𞤯𞤢𞤩𞤭𞤪𞤭 𞤲𞤣𞤭𞤲 𞤫 𞤤𞤫𞤴𞤯𞤫 𞤀𞤬𞤪𞤭𞤳 𞤯𞤫𞤲 𞤫 𞤬𞤮𞥅𞤤𞤵𞤣𞤫 𞤺𞤭𞤤𞤢 𞤬𞤮𞥅𞤤𞤮𞤼𞤭𞤪𞤢𞤤 𞤲𞤺𞤢𞤤 𞤬𞤵𞤯𞥆𞤭 𞤑𞤢𞤼𞤢𞤪.

𞤳𞤭𞤨𞥆𞤮𞤤 𞤀𞥃𞤪𞤢𞥄𞤬 𞤖𞤢𞤳𞤭𞥅𞤥𞤭𞥅 𞤲𞤺𞤮𞤤 𞤨𞤭𞤴𞤭𞤲𞤮 𞤶𞤭𞤲𞥆𞤢𞤸𞤮𞤴 𞤄𞤫𞤤𞤧𞤭𞤳 𞤳𞤮𞤴 𞤑𞤵𞥅𞤤𞤫 𞤯𞤭𞤯𞤭. 𞤑𞤮 𞤀𞤦𞤣𞤵𞤤 𞤖𞤢𞤥𞤭𞥅𞤣 𞤅𞤢𞤦𞤭𞥅𞤪𞤭𞥅 𞤲𞤢𞥄𞤣𞤭 𞤳𞤵𞥅𞤤𞤢𞤤 𞤢𞤪𞤢𞤲𞤢𞤤 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥗𞥓⹁ 𞤧𞤭 𞤟𞤢𞤳𞤢𞤪𞤭𞤴𞤢𞥄 𞤀𞤦𞤵𞥅𞤿𞤤𞤢𞤤 𞤩𞤫𞤴𞤣𞤭𞤼𞤭 𞤳𞤢𞤣𞤭 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥙𞥒.
𞤔𞤮𞥅𞤲𞤭 𞤐𞤺𞤢𞤴𞤵𞥅𞤶𞤭 𞤀𞤼𞤤𞤢𞤧 𞤯𞤭𞤲 𞤲𞤮 𞤥𞤢𞤪𞤭 𞤼𞤮𞤩𞥆𞤫 𞥔. 𞤅𞤭 𞤩𞤫 𞤨𞤭𞤴𞤢𞥄𞤳𞤢 𞤫 𞤬𞤭𞤶𞤮 𞤢𞤪𞤮𞥅𞤱𞤮 𞤲𞤺𞤮𞤲⹁ 𞤸𞤢𞤪𞤢𞤴 𞤩𞤫 𞤼𞤢𞤱𞤮𞤴𞤼𞤫 𞤫 𞥑𞥖 𞤧𞤢𞤳𞥆𞤭𞤼𞤭𞥅𞤩𞤫 𞤩𞤫𞤲.

𞤑𞤌𞤈𞤌𞤏𞤀𞤅𞤋𞤒𞤀 🇭🇷 𞥔 – 𞥑 🇨🇦 𞤑𞤀𞤐𞤀𞤁𞤀
𞤇𞤢𞥄𞤱𞤮 𞤨𞤭𞤺𞥆𞤢𞤤 𞤲𞤺𞤢𞤤 𞤩𞤫 𞤬𞤢𞤱𞤢𞤲𞤮𞥅 𞤲𞤣𞤫𞤴𞤢 𞤻𞤢𞤤𞤲𞤣𞤫 𞤫 𞤤𞤫𞤴 𞤳𞤮𞤴𞤯𞤫 𞤄𞤫𞤤𞤧𞤭𞤳⹁ 𞤑𞤢𞤲𞤢𞤣𞤢 𞤬𞤮𞤼𞥆𞤵𞤲𞤮 𞤸𞤢𞤲𞤣𞤫 𞤫 𞤳𞤭𞤨𞥆𞤮𞤤 𞤑𞤮𞤪𞤮𞤱𞤢𞤧𞤭 𞤣𞤢𞤪𞤭𞥅𞤲𞤺𞤮𞤤 𞤱𞤢𞤳𞥆𞤭𞤤𞤭𞥅 𞤲𞤺𞤮𞤤. 𞤐𞤺𞤮𞤤 𞤱𞤢𞤯𞤭 𞤑𞤢𞤲𞤢𞤣𞤢 𞤳𞤵𞥅𞤤𞤫 𞥔 𞤬𞤭𞥅 𞤳𞤢𞤤𞤢 𞤳𞤮 𞤳𞤢𞤥𞤩𞤫 𞤳𞤢𞤲𞤢𞤣𞤢𞥄𞤩𞤫 𞤩𞤫𞤲 𞤢𞤣𞤭𞥅 𞤲𞤢𞥄𞤣𞤵𞤣𞤫 𞤳𞤵𞥅𞤤𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞤯𞤭𞤯𞤢𞤩𞤫𞤪𞤫 𞤸𞤢𞤪𞤭 𞤸𞤢𞤴 𞤱𞤵𞤤𞤮 𞤱𞤵𞤤𞤢𞥄𞤤𞤭. 𞤑𞤮𞤲𞤮 𞤢 𞤱𞤭𞤴𞤢𞤴 𞤲𞤺𞤢𞤤 𞤳𞤵𞥅𞤤𞤢𞤤 𞤢𞤪𞤣𞤢𞤲 𞤩𞤫 𞤫 𞤳𞤢𞤼𞤢𞥄. 𞤅𞤢𞤦𞤵𞤲𞤢 𞤳𞤮 𞤩𞤢𞥄𞤱𞤮 𞤥𞤢𞤺𞥆𞤢𞤤 𞤑𞤮𞤪𞤮𞤱𞤢𞤧𞤭 𞤱𞤢𞤯𞤭 𞤩𞤫 𞤳𞤵𞥅𞤤𞤫 𞤲𞤢𞤴𞤭.

𞤑𞤮 𞤀𞤲𞤣𞤪𞤫 𞤑𞤢𞤪𞤢𞤥𞤢𞤪𞤭𞤷 𞤲𞤢𞥄𞤣𞤢𞤲𞤭 𞤑𞤮𞤪𞤮𞤱𞤢𞤧𞤭 𞤳𞤵𞥅𞤤𞤫 𞤯𞤭𞤯𞤭⹁ 𞤳𞤢 𞤸𞤮𞤶𞤮𞤥𞤢𞥄𞤶𞤫 𞥓𞥖 𞤫 𞥗𞥐. 𞤑𞤮𞤲𞤮 𞤸𞤢𞤳𞥆𞤵𞤲’𞤣𞤫 𞤯𞤫𞤲 𞤯𞤭𞤯𞤭⹁ 𞤃𞤢𞤪𞤳𞤮 𞤤𞤭𞤾𞤢𞤶𞤢 𞤲𞤢𞥄𞤣𞤵𞤲𞤮 𞤳𞤵𞥅𞤤𞤢𞤤 𞤺𞤮𞥅𞤼𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥔𞥔. 𞤑𞤮 𞤂𞤮𞤱𞤪𞤮 𞤃𞤢𞤴𞤫𞤪 𞤼𞤭𞤥𞥆𞤭𞤲𞤭 𞤳𞤵𞥅𞤤𞤫 𞤯𞤫𞤲 𞤲𞤢𞤴𞤭 𞤳𞤢 𞤬𞤭𞤶𞤮 𞤲𞤺𞤮𞤲 𞤸𞤮𞤥𞤦𞤢𞤼𞤢 𞤯𞤮𞤲.

𞤑𞤢𞤲𞤢𞤣𞤢 𞤼𞤢𞤱𞤼𞤭𞥅 𞤑𞤢𞤼𞤢𞤪 𞤫 𞤴𞤢𞤤𞤼𞤵𞤩𞤫 𞤩𞤫𞤲. 𞤒𞤮 𞤩𞤫 𞤥𞤮𞥅𞤩𞤵 𞤨𞤢𞤱𞤤𞤫 𞤥𞤢𞤩𞥆𞤫 𞤩𞤫 𞤸𞤫𞤦𞤤𞤢𞤲𞤮𞥅 𞤪𞤵𞤼𞥆𞤢𞤺𞤮𞤤 𞤫 𞤶𞤢𞥄𞤲𞤺𞤮𞤤 𞤥𞤢𞤩𞥆𞤫. 𞤐𞤢𞤲𞤣𞤭 𞤩𞤫 𞤧𞤵𞥅𞤧𞤢𞤼𞤢𞥄 𞤲𞤺𞤵𞤤𞤫𞥅𞤲𞤣𞤭⹁ 𞤳𞤮 𞤯𞤵𞤥 𞤸𞤢𞤱𞤶𞤭𞤲𞤭 𞤩𞤫 𞤸𞤮𞥅𞤼𞤵𞤺𞤮𞤤. 𞤔𞤮𞥅𞤲𞤭 𞤳𞤮 𞤑𞤵𞤪𞤵𞤱𞤢𞤧𞤭 𞤱𞤮𞤲𞤭 𞤸𞤮𞥅𞤪𞤫 𞤣𞤫𞤲𞤼𞤢𞤤 𞤥𞤢𞤩𞥆𞤫 𞤲𞤺𞤢𞤤. 𞤐𞤮 𞤸𞤭𞤳𞥆𞤭𞥅 𞤩𞤫⹁ 𞤃𞤢𞤪𞤮𞤳.

𞤉𞤅𞤆𞤀𞤙 🇪🇸 𞥑 – 𞥑 🇩🇪 𞤁𞤌𞤒𞤅𞤂𞤉𞤒𞤁𞤋                                                 (𞤀𞤤𞤥𞤢𞤲)
𞤑𞤮 𞤬𞤭𞤶𞤮 𞤱𞤵𞤤𞤵𞤲’𞤺𞤮 𞤳𞤢𞤼 𞤸𞤮𞤥𞤦𞤭 𞤻𞤢𞤤𞥆𞤢𞤤 𞤲𞤺𞤢𞤤 𞤸𞤢𞤲𞤣𞤫 𞤸𞤢𞤳𞥆𞤵𞤲’𞤣𞤫 𞤉𞤧𞤨𞤢𞤻 𞤫 𞤁𞤮𞤴𞤧𞤤𞤫𞤴𞤣𞤭. 𞤃𞤮 𞤳𞤢𞤤𞤢 𞤫 𞤥𞤢𞤩𞥆𞤫 𞤲𞤢𞥄𞤣𞤭 𞤳𞤵𞥅𞤤𞤢𞤤 𞤳𞤢 𞤬𞤫𞤷𞥆𞤫𞤪𞤫 𞤯𞤭𞤯𞤢𞤩𞤫𞤪𞤫. 𞤑𞤮 𞤉𞤧𞤨𞤢𞤻 𞤢𞤣𞤭𞥅 𞤲𞤢𞥄𞤣𞤵𞤣𞤫 𞤳𞤵𞥅𞤤𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥖𞥒 𞤫 𞤤𞤫𞤴 𞤳𞤮𞤴𞤲𞤺𞤢𞤤 𞤀𞤤𞤾𞤢𞤪𞤮 𞤃𞤮𞤪𞤢𞤼𞤢. 𞤁𞤮𞤴𞤧𞤩𞤫 𞤩𞤫𞤲 𞤱𞤢𞤳𞥆𞤭𞤤𞤭𞥅 𞤸𞤢𞥄 𞤭𞤼𞥆𞤭 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥘𞥓 𞤧𞤢𞤦𞤵 𞤐𞤭𞤳𞤤𞤢𞤧 𞤊𞤵𞤤𞤳𞤪𞤵𞤺.

𞤇𞤢𞥄𞤱𞤮 𞤀𞤤𞤥𞤢𞤲𞤩𞤫 𞤩𞤫𞤲 𞤧𞤢𞤲𞤳𞤫𞥅𞤣𞤫 𞤲𞤣𞤫𞤴𞤢 𞤻𞤢𞤤𞤲𞤣𞤫 𞤫 𞤤𞤫𞤴 𞤳𞤮𞤴𞤯𞤫 𞤔𞤢𞤨𞤢𞤲⹁ 𞤧𞤭 𞤩𞤫 𞤨𞤭𞤴𞤢𞤲𞤮 𞤸𞤢𞤲𞤣𞤫 𞤳𞤢𞤣𞤭⹁ 𞤸𞤢𞤪𞤢𞤴𞤲𞤮 𞤩𞤫 𞤩𞤢𞤣𞤭𞤳𞤫 𞤣𞤢𞤥𞤢𞤤 𞤴𞤢𞤤𞤼𞤭𞤪𞤺𞤢𞤤 𞤲𞤺𞤢𞤤. 𞤑𞤮𞤲𞤮 𞤶𞤮𞥅𞤲𞤭 𞤼𞤢𞤥𞤰𞤭𞤲𞤢𞥄𞤪𞤫 𞤲𞤮 𞤸𞤫𞤣𞥆𞤢𞤲𞤭𞥅 𞤩𞤫 𞤧𞤫𞥅𞤯𞤢. 𞤑𞤮𞤲𞤮 𞤳𞤮 𞤦𞤫𞥅 𞤩𞤫 𞤨𞤭𞤴𞤢 𞤑𞤮𞤧𞤼𞤢 𞤈𞤭𞤳𞤢 𞤸𞤢𞤪𞤢 𞤲𞤮𞤲 𞤔𞤢𞤨𞤢𞤲 𞤨𞤭𞤴𞤢𞥄𞤤𞤭 𞤉𞤧𞤨𞤢𞤻. 𞤅𞤭 𞤱𞤮𞤲𞤢𞥄 𞤯𞤵𞤥 𞤸𞤢𞤴 𞤧𞤭 𞤨𞤭𞤴𞤭𞥅 𞤑𞤮𞤧𞤼𞤢 𞤈𞤭𞤳𞤢 𞤸𞤢𞤪𞤢𞤴 𞤩𞤫 𞤴𞤢𞤤𞤼𞤭 𞤧𞤭 𞤱𞤮𞤲𞤢𞥄 𞤸𞤢𞤪𞤢 𞤩𞤫 𞤨𞤭𞤴𞤭𞤪 𞤩𞤫 𞤳𞤵𞥅𞤤𞤫 𞥘. 𞤑𞤮 𞤯𞤵𞤥 𞤱𞤮𞤲𞤭 𞤲𞤣𞤢𞤲𞤺𞤵 𞤲𞤮 𞤱𞤫𞤲𞤺𞤭𞤤𞤭𞥅 𞤁𞤮𞤴𞤧𞤤𞤫𞤴𞤣𞤭.

𞤙𞤮𞤺𞥆𞤢𞤲𞤣𞤫 𞤀𞤴𞥃𞤢 𞤅𞤮𞥅. 𞤋𞤥𞥆𞤭𞤲𞤢𞥄𞤯𞤮 𞤫 𞤭𞤲𞤣𞤫 𞤤𞤮𞤱𞤪𞤫 𞤚𞤢𞤦𞤢𞤤𞤣𞤫 𞤲𞤣𞤫𞤲 𞤬𞤭𞥅 𞤸𞤵𞤥𞤨𞤭𞤼𞤵𞤺𞤮𞤤 𞤮𞤲 𞤳𞤮 𞤱𞤮𞤲𞤭 𞤫 𞤬𞤫𞤰𞥆𞤵𞤣𞤫 𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤑𞤢𞤼𞤢𞤪.