𞤙𞤀𞤂𞤀𞥄𞤐𞤁𞤉 𞤅𞤓𞤇𞤐𞤘𞤌 𞤖𞤌𞥅𞤈𞤀𞥄𞤑𞤓 𞤚𞤌𞤍𞥆𞤀𞥄𞤃𞤀
𞤉 𞤳𞤮𞤤𞥆𞤭𞤼𞤢𞤤 𞤶𞤢𞤲𞤺𞤢𞥄𞤲𞤺𞤢𞤤 𞤳𞤢 𞤰𞤫𞤱𞤤𞤵 𞤺𞤫𞤲𞤣𞤭𞤱𞤵 𞤸𞤢𞤲𞤳𞤭 𞤫 𞤸𞤮𞥅𞤪𞤦𞤭𞤪𞥆𞤫⹁ 𞤻𞤢𞤤𞤲𞤣𞤫 𞥒𞥗 𞤅𞤭𞥅𞤤𞤼𞤮⹁ 𞤸𞤮𞥅𞤪𞤫𞥅𞤶𞤮 𞤔𞤵𞤲𞥆𞤭𞤼𞤢𞤤 𞤲𞤺𞤢𞤤 𞤬𞤭𞤩𞤭𞥅 𞤱𞤮𞤲𞤣𞤫𞤥𞤢 𞤳𞤮 𞤫 𞤪𞤫𞤬𞤦𞤭𞤪𞥆𞤫 (𞤢𞤤𞤼𞤭𞤲𞤫 -𞤼𞤫𞤲𞤫𞤲) 𞤻𞤢𞤤𞤲𞤣𞤫 𞥒𞥘 𞤄𞤮𞤱𞤼𞤮 𞥒𞥐𞥒𞥕 𞤱𞤮𞤲𞤭 𞤻𞤢𞤤𞤢𞥄𞤲𞤣𞤫 𞤷𞤵𞤬𞤼𞤢𞤤 𞤬𞤭𞥅 𞤸𞤮𞥅𞤪𞤢𞥄𞤳𞤵 𞤘𞤭𞤲𞤫 𞤲𞤺𞤵𞤲 𞤳𞤢𞤻𞤵𞤲 𞤫 𞤬𞤭𞥅 𞤧𞤢𞤪𞤯𞤮𞥅𞤩𞤫 𞤩𞤫𞤲.
𞤑𞤵𞤯𞤮𞤤 𞤯𞤭𞤯𞤢𞤩𞤮𞤤 𞤳𞤮𞤤𞥆𞤭𞤼𞤢𞤤 𞤲𞤺𞤢𞤤 𞤲𞤮 𞤸𞤮𞤤𞥆𞤭 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤶𞤢𞥄𞤺𞤮𞤪𞤺𞤢𞤤 𞤸𞤢𞤱𞤶𞤢𞤤 𞤤𞤫𞤴𞤣𞤭 𞤲𞤺𞤢𞤤⹁ 𞤫 𞤶𞤢𞥄𞤺𞤮𞤪𞤺𞤢𞤤 𞤥𞤵𞤪𞤢𞥄𞤯𞤭 𞤶𞤢𞤲𞤢𞤲𞤭 𞤯𞤭𞤲⹁ 𞤫 𞤶𞤢𞥄𞤺𞤮𞤪𞤺𞤢𞤤 𞤧𞤢𞤪𞤭𞤴𞤢 𞤲𞤺𞤢𞤤⹁ 𞤫 𞤶𞤢𞥄𞤺𞤮𞤪𞤺𞤢𞤤 𞤲𞤺𞤢𞤤 𞤳𞤢 𞤳𞤭𞤧𞤢𞤤 𞤫 𞤳𞤢 𞤲𞤣𞤫𞥅𞤲𞤳𞤢⹁ 𞤫 𞤶𞤢𞥄𞤺𞤮𞤪𞤺𞤢𞤤 𞤸𞤢𞤩𞤼𞤢𞤤 (𞤳𞤭𞤱𞤢𞤤) 𞤲𞤺𞤢𞤤⹁ 𞤫 𞤶𞤢𞥄𞤺𞤮𞤪𞤺𞤢𞤤 𞤬𞤢𞤺𞥆𞤵𞤣𞤵 𞤫 𞤲𞤺𞤢𞤤𞤵⹁ 𞤳𞤢𞤻𞤵𞤲 𞤫 𞤴𞤭𞥅𞤤𞤭𞤪𞤣𞤫 𞤥𞤢𞤱𞤲𞤣𞤫 𞤷𞤵𞤬𞤼𞤫 𞤯𞤫𞤲 𞤫 𞤀𞤴𞤲𞤭𞤪𞤺𞤢𞤤 𞤁𞤭𞤧𞤲𞤺𞤮 𞤲𞤺𞤮𞤲⹁ 𞤥𞤮 𞤳𞤢𞤤𞤢 𞤫 𞤧𞤫𞤲𞤺𞤮 𞤥𞤵𞤵𞤲 𞤲𞤮 𞤱𞤢𞤯𞥆𞤭𞤲𞤢𞥄 𞤻𞤭𞥅𞤩𞤲𞤵𞤺𞤮𞤤 𞤲𞤣𞤫𞥅 𞤴𞤢𞤥𞤭𞤪𞤮𞥅𞤪𞤫.
𞤐𞤣𞤫𞥅 𞤴𞤢𞤥𞤭𞤪𞤮𞥅𞤪𞤫 𞤲𞤮𞤲⹁ 𞤲𞤣𞤫 𞤤𞤵𞥅𞤼𞤲𞤣𞤭𞤳𞤫 𞤬𞤮𞤣𞤮𞥅𞤪𞤫 𞤲𞤣𞤫 𞤃𞤢𞤥𞤢𞤣𞤭 𞤁𞤵𞤥𞤦𞤵𞤴𞤢 𞤱𞤢𞤯𞤵𞤲𞤮𞥅⹁ 𞤬𞤫𞤱𞤲𞤣𞤮 𞤮 𞤸𞤢𞤩𞤭 𞤼𞤵𞤲 𞤤𞤢𞥄𞤥𞤢𞥄𞤣𞤫. 𞤐𞤣𞤫𞤲𞤧𞤢𞤴⹁ 𞤮 𞤱𞤭𞤴𞤵𞤲𞤮 𞤳𞤮 𞤷𞤵𞤬𞤼𞤫 𞤤𞤫𞤴𞤤𞤫𞤴𞤶𞤫 𞤯𞤫𞤲 𞤱𞤢𞤲𞤮 𞤧𞤵𞤩𞤢𞤺𞤮𞤤 𞤶𞤮𞤱𞤪𞤮𞥅𞤩𞤫 𞤩𞤫𞤲 𞤬𞤵𞤯𞥆𞤮𞤪𞤼𞤫𞥅⹁ 𞤧𞤢𞤳𞥆𞤭𞤼𞤮𞤪𞤢 𞤧𞤵𞤩𞤢𞤺𞤮𞤤 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤮𞤲.
𞤅𞤵𞤩𞤲𞤺𞤮 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤮𞤲 𞤫 𞤧𞤢𞤪𞤯𞤮𞥅𞤩𞤫 𞤩𞤫𞤲 𞤫𞤩𞥆𞤢𞥄𞤥𞤢 𞤩𞤢𞥄𞤱𞤮 𞤣𞤮𞤧𞤼𞤫𞤪𞤫 𞤸𞤫𞤧𞤫𞤪𞤫 𞤲𞤣𞤫𞤲 𞤼𞤢𞤦𞤭𞤲𞤼𞤭𞤲𞤫𞥅𞤣𞤫 𞤦𞤢𞤯𞤼𞤢𞤲𞤫 𞤣𞤭𞤧𞤲𞤺𞤮 𞤱𞤢𞤯𞤵𞤲𞤮𞥅𞤲𞤺𞤮 𞤲𞤺𞤮𞤲 𞤻𞤢𞤤𞤲𞤣𞤫 𞥒𞥑 𞤅𞤭𞤤𞤼𞤮 𞥒𞥐𞥒𞥕.
𞤑𞤮𞤲𞤮 𞤁𞤮𞤧𞤼𞤫𞤪𞤫 𞤸𞤫𞤧𞤫𞤪𞤫 𞤲𞤣𞤫𞤲 𞤼𞤢𞤱𞤲𞤮𞤪𞤢𞥄𞤤𞤭 𞤴𞤮𞤺𞤢 𞤫 𞤧𞤢𞤪𞤯𞤭 𞤬𞤭𞤩𞤢𞤲𞤮𞥅𞤯𞤭 𞤳𞤢 𞤧𞤢𞤪𞤭𞤴𞤢𞥄𞤶𞤭 𞤤𞤵𞤥𞤦𞤭𞤲𞤢𞤤. 𞤐𞤮 𞤼𞤢𞤱𞤢𞥄 𞤫 𞤯𞤭𞥅𞤲⹁ 𞤳𞤵𞤯𞤮𞤤 𞥔𞥗𞤩𞤮𞤤 𞤱𞤭𞤴𞤵𞤲𞤮𞥅𞤲𞤺𞤮𞤤 𞤱𞤮𞤲𞤣𞤫𞤥𞤢 𞤸𞤢𞤴 𞤺𞤮𞥅𞤼𞤮 𞤫 𞤼𞤢𞤱𞤢𞥄𞤩𞤫 𞤩𞤫𞤲 𞤳𞤢 𞤅𞤫-𞤉𞤲-𞤉𞤪-𞤁𞤫𞥅 𞤱𞤢𞥄𞤱𞤢𞤼𞤢𞥄 𞤣𞤵𞤪𞤱𞤢𞤲𞤣𞤫 𞤬𞤭𞥅 𞤤𞤢𞥄𞤥𞤵.
𞤏𞤮𞤨𞥆𞤫𞥅𞤣𞤫 𞤲𞤺𞤮𞥅𞤤 𞤳𞤵𞤯𞤮𞤤 𞥔𞥗𞤩𞤮𞤤 𞤵𞤣𞥆𞤭𞤼𞤢𞤲𞤭𞥅 𞤃𞤢𞤥𞤢𞤣𞤭 𞤁𞤵𞤥𞤦𞤵𞤴𞤢 𞤳𞤢𞤻𞤵𞤲 𞤫 𞤤𞤢𞥄𞤥𞤮𞤣𞤭𞥅𞤩𞤫 𞤥𞤢𞤳𞥆𞤮 𞤩𞤫𞤲⹁ 𞤤𞤢𞥄𞤱𞤮𞤤 𞤲𞤮 𞤩𞤫 𞤣𞤢𞤪𞤮𞤪𞤢 𞤬𞤭𞥅 𞤷𞤵𞤩𞤤𞤫 𞤧𞤢𞥄𞤼𞤭𞥅𞤯𞤫 𞤯𞤫𞤲.
𞤑𞤮𞤲𞤮 𞤤𞤫⹁ 𞤀𞤤𞤸𞤢𞤶𞥆𞤭 𞤅𞤫𞤤𞥆𞤵 𞤁𞤢𞤤𞤫𞤲 𞤱𞤢𞥄𞤱𞤢𞤼𞤢𞥄 𞤼𞤢𞤱𞤣𞤫𞥅𞤣𞤫 𞤫 𞤧𞤵𞤩𞤲𞤺𞤮 𞤲𞤺𞤮𞤲 𞤧𞤭 𞤳𞤮 𞤫𞤩𞥆𞤢𞥄 𞤳𞤮𞤲 𞤲𞤮 𞤼𞤢𞤦𞤭𞤼𞤭. 𞤘𞤮𞤮 𞤺𞤮𞤮⹁ 𞤀𞤤𞤸𞤢𞤶𞥆𞤭 𞤅𞤫𞤤𞥆𞤵 𞤁𞤢𞤤𞤫𞤲 𞤱𞤢𞥄𞤱𞤢𞥄𞤲𞤮 𞤱𞤭𞤲𞤣𞤭𞤼𞤢𞥄𞤣𞤫. 𞤌 𞤫𞤼𞤭𞤲𞤮 𞤱𞤭𞤲𞤣𞤭𞤼𞤮𞤪𞤺𞤮𞤤 𞤀𞤦𞤭𞤶𞤢𞤲⹁ 𞤳𞤮𞤲𞤮 𞤮 𞤬𞤢𞤣𞥆𞤢𞥄. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤋𞥅-𞤉𞤊-𞤁𞤫𞥅-𞤅𞤫𞥅⹁ 𞤯𞤵𞤥 𞤳𞤮 𞤬𞤫𞤣𞥆𞤫 𞤥𞤢𞤳𞥆𞤮 𞤲𞤣𞤫𞤲⹁ 𞤲𞤮 𞤼𞤮𞤽𞤢𞤲𞤢𞥄 𞤺𞤮𞤤𞥆𞤵𞤺𞤮𞤤 𞤫 𞤲𞤣𞤫𞤪 𞤤𞤫𞤦𞥆𞤭 𞤼𞤢𞤼𞤭. 𞤐𞤣𞤫 𞤯𞤵𞤥 𞤲𞤮 𞤼𞤮𞤽𞤼𞤫𞥅⹁ 𞤸𞤢𞤪𞤢𞤴 𞤧𞤵𞤩𞤲𞤺𞤮 𞤲𞤺𞤮𞤲 𞤤𞤢𞥄𞤱𞤭𞤳𞤫 𞤀𞤤𞤸𞤢𞤶𞥆𞤭 𞤅𞤫𞤤𞥆𞤵 𞤁𞤢𞤤𞤫𞤲 𞤫 𞤬𞤫𞤣𞥆𞤫 𞤥𞤵𞤵𞤲.
𞤳𞤮𞤲𞤭 𞤳𞤮 𞤤𞤢𞤱 𞤤𞤢𞥄𞤱𞤭𞥅⹁ 𞤥𞤮 𞤢𞤷𞥆𞤭𞥅 𞤸𞤢𞥄 𞤸𞤫𞤤𞤼𞤭𞥅 𞤮 𞤼𞤵𞤲𞤯𞤭𞥅⹁ 𞤳𞤮 𞤳𞤢𞤪𞤢𞤸𞤢𞤲.
𞤌𞤲 𞤶𞤢𞥄𞤪𞤢𞥄𞤥𞤢
𞤀𞤱𞤢𞥄 𞤮𞤲 𞤔𞤢𞥄𞤪𞤢𞥄𞤥𞤢 𞤷𞤫𞤪𞤲𞤮𞥅𞤩𞤫 𞤣𞤫𞤣𞥆𞤵𞤩𞤫
𞤒𞤮 𞤀𞤤𞤤𞤢 𞤷𞤫𞤲𞤭𞥅𞤯𞤮 𞤮𞤲 𞤸𞤮𞤳𞥆𞤵 𞤫𞤲 𞤤𞤢𞤥𞤩𞤫 𞤬𞤫𞥅𞤱𞤵𞤩𞤫 𞤴𞤵𞤪𞤥𞤮𞤼𞤮𞥅𞤩𞤫