𞤡𞤉𞤈𞤋𞥅𞤊 𞤄𞤀𞥄 𞤊𞤀𞤏𞤀𞥄𞤃𞤀 𞤐𞤀𞤐𞤘𞤉𞥅𞤁𞤉 𞤅𞤌𞤑𞤉𞥅

#𞤘𞤋𞤐𞤉 🇬🇳⚖️|•• 𞤋𞤄𞤈𞤀𞥄𞤖𞤋𞥅𞤃𞤀 𞤡𞤉𞤈𞤋𞤊 𞤄𞤀𞥄⹁ 𞤘𞤌𞤃𞤐𞤀𞥄𞤔𞤌 𞤑𞤋𞤍𞥆𞤌 𞤃𞤀𞤐𞤑𞤋𞤈𞤘𞤀𞤂 𞤂𞤀𞤈𞤀𞤐𞤑𞤌𞤏𞤀𞤂 𞤐𞤁𞤉𞤐𞤁𞤋 𞤘𞤋𞤐𞤉 𞤐𞤘𞤀𞤂 𞤊𞤀𞤏𞤀𞥄𞤃𞤀 𞤅𞤌𞤑𞤉𞥅𞤁𞤉

𞤖𞤢𞤲𞤳𞤭 𞤫 𞤃𞤢𞤱𞤦𞤢𞥄𞤪𞤫⹁ 𞥖 𞤁𞤵𞥅𞤶𞤮 𞥒𞥐𞥒𞥕⹁ 𞤙𞤢𞥄𞤱𞤭𞤪𞤣𞤵 𞤄𞤢𞤳𞤮𞤲𞤣𞤭𞤲𞤫 𞤳𞤢 𞤐𞤺𞤢𞤤𞤵 𞤫 𞤳𞤢 𞤔𞤢𞤱𞤤𞤉 (𞤙𞤄𞤐𞤘𞤔)⹁ 𞤸𞤮𞤤𞥆𞤭𞤼𞤭𞥅 𞤱𞤮𞤲𞤣𞤫𞤥𞤢 𞤋𞤦𞤪𞤢𞥄𞤸𞤭𞥅𞤥𞤢 𞤡𞤫𞤪𞤭𞥅𞤬 𞤄𞤢𞥄 𞤲𞤮 𞤬𞤢𞤺𞥆𞤭𞤼𞤭𞥅 𞤱𞤵𞤶𞥆𞤵𞤺𞤮𞤤 𞤶𞤢𞤱𞤤𞤫 𞤸𞤢𞤱𞤼𞤢𞥄𞤯𞤫⹁ 𞤱𞤮𞤲𞥆𞤫𞤪𞤫 𞤥𞤢𞤤𞥆𞤢 𞤦𞤮𞤲𞤢𞤲𞤣𞤫⹁ 𞤼𞤢𞤱𞤫𞤺𞤮𞤤⹁ 𞤢𞤤𞤯𞤭𞤲𞤮𞤪𞤺𞤮𞤤 𞤲𞤮 𞤸𞤢𞤪𞤥𞤭𞤪𞤭 𞤳𞤢𞤻𞤵𞤲 𞤫 𞤥𞤫𞤸𞤵𞤺𞤮𞤤 𞤭𞤱𞤣𞤭 𞤶𞤢𞤱𞤤𞤫. 𞤙𞤢𞥄𞤱𞤮𞥅𞤪𞤫 𞤲𞤣𞤫𞤲  𞤼𞤢𞤰𞤢𞥄𞤥𞤢 𞤸𞤮𞥅𞤪𞤫 𞤼𞤵𞤤𞤼𞤢𞤤 𞤱𞤢𞤲𞤳𞤮 𞤬𞤢𞤱𞤢𞥄𞤯𞤮 𞤮𞤲 𞤼𞤢𞤱𞤣𞤫 𞤱𞤮𞤥𞤮 𞤴𞤢𞤸𞤵𞤲𞤮𞥅 𞤁𞤂𞤀 (𞤁𞤫𞤲𞤼𞤢𞤤 𞤂𞤢𞤪𞤫 𞤀𞤥𞤫𞤪𞤭𞤳) 𞤻𞤢𞤱𞤲𞤣𞤢𞤺𞤮𞤤 𞤩𞤢𞥄𞤱𞤮 𞤱𞤮 𞤴𞤢𞤤𞤼𞤭𞤲𞤫𞥅𞤣𞤫 𞤳𞤢 𞤣𞤵𞤥𞤦𞤵𞤺𞤢𞤤 𞤥𞤢𞤱𞤲𞤺𞤢𞤤 𞤑𞤮𞤲𞤢𞥄𞤳𞤭𞤪𞤭 𞤷𞤢𞤺𞥆𞤢𞤤 𞤬𞤮𞤤𞥆𞤭𞥅𞤺𞤵 𞥕 𞤧𞤭𞤤𞤼𞤮 𞥒𞥐𞥒𞥑 𞤲𞤺𞤵𞤲.

𞤘𞤭𞤤𞤢 𞤲𞤦𞤮𞤱𞤼𞤮 𞥒𞥐𞥒𞥔⹁ 𞤷𞤵𞤳𞥆𞤮 𞤸𞤮𞥅𞤪𞤫𞥅𞤶𞤮 𞤬𞤫𞤣𞥆𞤫 𞤅𞤫𞤤𞥆𞤵 𞤁𞤢𞤤𞤫𞤲 𞤔𞤢𞤤𞥆𞤮 𞤲𞤣𞤫𞤲⹁ 𞤆𞤮𞤼𞥆𞤢𞤤 𞤁𞤮𞥅𞤤𞤫 𞤁𞤭𞥅𞤧𞤲𞤢𞤲𞤳𞤮𞥅𞤶𞤫 𞤘𞤭𞤲𞤫 𞤯𞤫𞤲 (𞤆𞤁𞤁𞤘)⹁ 𞤲𞤮 𞤻𞤢𞥄𞤱𞤭𞤪𞤫𞥅𞤣𞤫 𞤸𞤮𞥅𞤪𞤫 𞤼𞤵𞤤𞤼𞤢𞤤 𞤱𞤢𞤲𞤳𞤮 𞤬𞤢𞤱𞤢𞥄𞤯𞤮 𞤮𞤲 𞤬𞤭𞥅 𞤺𞤵𞤴𞤢𞥄𞤤𞤫 𞤶𞤢𞤱𞤤𞤭 𞤸𞤢𞤱𞤼𞤢𞥄𞤯𞤭⹁ 𞤱𞤮𞤲𞥆𞤢𞤲𞤣𞤫 𞤥𞤢𞤤𞥆𞤢 𞤦𞤮𞤲𞤢𞤲𞤣𞤫⹁ 𞤼𞤢𞤱𞤫𞤺𞤮𞤤⹁ 𞤢𞤤𞤯𞤭𞤲𞤮𞤪𞤺𞤮𞤤 𞤲𞤮 𞤸𞤢𞤪𞤥𞤭𞤪𞤭 𞤳𞤢𞤻𞤵𞤲 𞤫 𞤥𞤫𞤸𞤵𞤺𞤮𞤤 𞤭𞤱𞤣𞤭 𞤶𞤢𞤱𞤤𞤭.

𞤏𞤮𞤥𞤮 𞤼𞤵𞥅𞤥𞤭𞤪𞤢𞥄 𞤱𞤵𞤶𞥆𞤵𞤺𞤮𞤤 𞤳𞤮 𞤬𞤮𞤼𞤭 𞤣𞤵𞤦𞤵𞤲𞤫 𞤧𞤢𞤨𞥆𞤮 𞤣𞤢𞤤𞤢 (𞥑𞥐 𞥐𞥐𞥐 𞥐𞥐𞥐$).

𞤙𞤢𞥄𞤱𞤭𞤪𞤣𞤵 𞤲𞤣𞤵𞤲 𞤸𞤢𞤨𞥆𞤢𞤲𞤭𞥅 𞤥𞤮 𞤧𞤮𞤳𞤫𞥅𞤣𞤫 𞤣𞤵𞥅𞤩𞤭 𞤶𞤮𞤱𞤭 𞤸𞤮𞥅𞤪𞤫 𞤳𞤢𞤣𞤭 𞤫 𞤶𞤵𞤳𞥆𞤫𞤪𞤫 𞤴𞤮𞤩𞤵𞤺𞤮𞤤 𞤣𞤵𞤶𞤵𞤲𞤫 𞥕 𞤊𞤢𞤪𞤢𞤲 𞤘𞤭𞤲𞤫 𞤫 𞤴𞤮𞤩𞤵𞤺𞤮𞤤 𞤤𞤢𞥄𞤥𞤵 𞤲𞤺𞤵𞤲 𞤣𞤵𞤦𞤵𞤲𞤫 𞤧𞤢𞤨𞥆𞤮 𞤫 𞤺𞤵𞤤𞤵𞥅𞤶𞤫 𞤶𞤮𞤱𞤭 𞤣𞤢𞤤𞤢 (𞥑𞥐 𞥐𞥐𞥕 𞥐𞥐𞥐$) 𞤫 𞤣𞤵𞤶𞤵𞤲𞤫 𞥕 𞤊𞤢𞤪𞤢𞤲 𞤘𞤭𞤲𞤫 𞤬𞤭𞥅 𞤼𞤮𞤪𞥆𞤫 𞤯𞤫 𞤱𞤮 𞤱𞤢𞤯𞤭. 𞤈𞤫𞤬𞤼𞤭 𞤳𞤢𞤣𞤭⹁ 𞤲𞤣𞤵 𞤴𞤢𞤥𞤭𞤪𞤭 𞤶𞤢𞤩𞤭𞤼𞤵𞤺𞤮𞤤 𞤶𞤫𞤴𞤫 𞤱𞤢𞤳𞥆𞤮 𞤯𞤫𞤲 𞤬𞤮𞤨. 𞤲𞤮 𞤼𞤢𞤱𞤢𞥄 𞤫 𞤯𞤫𞥅𞤲 𞤧𞤵𞥅𞤣𞤵 𞤫 𞤼𞤵𞤥𞤦𞤫 𞤱𞤢𞤳𞥆𞤮 𞤱𞤮𞤲𞤯𞤫 𞤂𞤢𞤥𞤦𞤢𞤲𞤶𞤭 𞤫 𞤐𞤮𞤲𞤺𞤮 𞤚𞤢𞥄𞤣𞤭𞥅 𞤳𞤢𞤻𞤵𞤲 𞤫 𞤺𞤢𞤤𞥆𞤫𞥅𞤶𞤭⹁ 𞤫 𞤶𞤵𞤦𞤢𞤪𞤯𞤫 𞤱𞤮𞤲𞤼𞤭𞤪𞤯𞤫 𞤑𞤮𞥅𞤦𞤢𞥄. 𞤙𞤢𞥄𞤱𞤭𞤪𞤣𞤵 𞤲𞤣𞤵𞤲 𞤸𞤢𞥄𞤯𞤼𞤢𞥄𞤤𞤭 𞤯𞤮𞥅𞤲⹁ 𞤲𞤣𞤵 𞤴𞤢𞤥𞤭𞤪𞤭 𞤳𞤢𞤣𞤭 𞤴𞤮 𞤱𞤮 𞤲𞤢𞤲𞤺𞤫⹁ 𞤮 𞤢𞤪𞤼𞤭𞤪𞤫𞥅 𞤘𞤭𞤲𞤫 𞤬𞤭𞥅 𞤴𞤮 𞤮 𞤥𞤫𞥅𞤯𞤵 𞤼𞤢𞤤𞥆𞤢𞤤 𞤤𞤢𞤳𞥆𞤫 𞤳𞤵𞥅𞤱𞤯𞤫 𞤥𞤢𞤳𞥆𞤮.