𞤆𞤉𞤎𞥆𞤌𞤂 𞤐𞤄𞤓𞥅𞤍𞤋 𞤘𞤋𞤐𞤉 𞤉 𞤑𞤀 𞤄𞤋𞤅𞤋𞥅𞤘𞤋𞥅 𞤊𞤉𞤏𞤐𞤁𞤋𞥅

𞤑𞤮 𞤻𞤢𞤤𞤲𞤣𞤫 𞥑 𞤤𞤫𞤱𞤪𞤵 𞤲𞤦𞤮𞥅𞤴𞤮⹁ 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥖𞥐⹁ 𞤂𞤫𞤧𞤣𞤭 𞤘𞤭𞤲𞤫 𞤲𞤣𞤭𞤲 𞤧𞤭𞤲𞤷𞤢𞤲𞤭 𞤸𞤮𞥅𞤪𞤫 𞤥𞤵𞤲 𞤲𞤦𞤵𞥅𞤯𞤭 (𞤷𞤫𞥅𞤣𞤫). 𞤑𞤮 𞤸𞤢𞤲𞤳𞤭 𞤫 𞤺𞤮𞤮 𞤲𞤦𞤮𞥅𞤴𞤮 𞥒𞥐𞥒𞥐⹁ 𞤼𞤭𞤥𞥆𞤭 𞤣𞤵𞥅𞤩𞤭 𞥖𞥐 (𞤷𞤢𞤨𞥆𞤢𞤲𞤯𞤫 𞤶𞤫𞥅𞤺𞤮𞤮) 𞤺𞤭𞤤𞤢 𞤯𞤵𞤥 𞤱𞤢𞤯𞤭. 𞤂𞤢𞥄𞤥𞤵 𞤺𞤭𞤲𞤫 𞤲𞤺𞤵𞤲 𞤭𞤲𞥆𞤭 𞤯𞤭𞤲 𞤲𞤦𞤵𞥅𞤯𞤭 “𞤊𞤢𞤪𞤢𞤲 𞤘𞤭𞤲𞤫“. 𞤇𞤫 𞤴𞤫𞤪𞤭𞤲𞥋𞤣𞤭𞤪𞤭 𞤊𞤢𞤪𞤢𞤲 𞤘𞤭𞤲𞤫 𞤺𞤮𞥅𞤼𞤮 𞤉 𞤬𞤢𞤪𞤢𞤲 𞤅𞤫𞥅𞤬𞤢𞥄 𞤺𞤮𞥅𞤼𞤮 𞤥𞤢𞤤𞥆𞤢 𞤫 𞤬𞤫𞥅𞤷𞥆𞤫𞤪𞤫 𞤊𞤢𞤪𞤢𞤲 𞤊𞤢𞤪𞤢𞤲𞤧𞤭.  𞤑𞤮 𞤢𞤣𞤭𞥅 𞤯𞤭𞥅 𞤲𞤦𞤵𞥅𞤯𞤭 𞤧𞤭𞤲𞤷𞤫𞥅𞤲𞤣𞤫⹁ 𞤸𞤢𞤪𞤭 𞤘𞤭𞤲𞤫 𞤳𞤮 𞤊𞤢𞤪𞤢𞤲 𞤅𞤫𞥅𞤬𞤢𞥄 (FCFA) 𞤸𞤵𞥅𞤱𞤼𞤮𞤪𞤢𞤴𞤲𞤮𞥅 𞤱𞤢𞤲𞤮 𞤯𞤫𞤴𞤢 𞤤𞤫𞤴𞤯𞤫 𞤖𞤢𞥄𞤤𞤭-𞤬𞤢𞤪𞤢𞤲𞤧𞤫𞥅𞤶𞤫 𞤖𞤭𞤪𞤲𞤢 𞤀𞤬𞤪𞤭𞤳𞤢𞥄.

𞤊𞤭𞥅 𞤳𞤮 𞤣𞤢𞤱𞤪𞤢 𞤥𞤢𞤤𞥆𞤢 𞤳𞤮 𞤸𞤫𞤩𞥆𞤭𞤼𞤮𞥅 𞤯𞤭𞥅 𞤲𞤦𞤵𞥅𞤯𞤭 𞤧𞤭𞤲𞤷𞤢𞥄𞤯𞤭⹁ 𞤤𞤢𞥄𞤥𞤵 𞤲𞤺𞤵𞤲 𞤵𞤣𞥆𞤭𞤼𞤭 𞤃𞤢𞤲𞤳𞤭𞤪𞤺𞤢𞤤 𞤂𞤢𞤪𞤢𞤲𞤳𞤮𞤱𞤢𞤤 (Banque d’État). 𞤐𞤣𞤫𞤲⹁ 𞤩𞤫 𞤥𞤢𞤩𞥆𞤭 𞤥𞤢𞤲𞤳𞤭𞤪𞤯𞤫 𞤸𞤢𞤤𞤮𞤪𞤢𞤤𞤶𞤫 𞤯𞤫𞤲 𞤬𞤮𞤬 𞤫 𞤲𞤣𞤫𞤪 𞤘𞤭𞤲𞤫⹁ 𞤩𞤫 𞤼𞤮𞤽𞤭 𞤳𞤢𞤣𞤭 𞤵𞤣𞥆𞤵𞤼𞤵𞤺𞤮𞤤 𞤳𞤫𞤧𞤫 𞤺𞤮𞤮. 𞤑𞤮 𞤱𞤮𞤲𞤭 𞤥𞤢𞤲𞤳𞤭𞤪𞤯𞤫 𞤸𞤢𞤤𞤮𞤪𞤢𞤤𞤶𞤫⹁ 𞤳𞤮 𞤯𞤫𞤲 𞤯𞤫 𞤼𞤢𞤱𞤭 𞤤𞤢𞥄𞤥𞤵 𞤲𞤺𞤵𞤲 𞤶𞤫𞤴𞤢𞥄. 𞤘𞤭𞤤𞤢 𞤮𞤲𞤼𞤵𞤥𞤢⹁ 𞤤𞤢𞥄𞤥𞤵 𞤲𞤺𞤵𞤲 𞤲𞤫𞤱𞤭𞤲𞤢𞥄𞤤𞤭 𞤸𞤢𞤴 𞤺𞤮𞥅𞤼𞤮 𞤴𞤮 𞤵𞤣𞥆𞤵𞤼𞤵 𞤥𞤢𞤲𞤳𞤭𞤪𞤺𞤢𞤤 𞤫 𞤲𞤣𞤫𞤪 𞤤𞤫𞤧𞤣𞤭 𞤘𞤭𞤲𞤫 𞤲𞤣𞤭𞤲 𞤸𞤢𞥄  𞤲𞤣𞤫 𞤅𞤫𞥅𞤳𞤵 𞤚𞤵𞥅𞤪𞤫𞥅 𞤥𞤢𞥄𞤴𞤵𞤲𞤮𞥅.

𞤑𞤮𞤲𞤮 𞤯𞤭𞥅 𞤲𞤦𞤵𞥅𞤯𞤭 𞤳𞤫𞤧𞤭 𞤲𞤮 𞤱𞤮𞤲𞤣𞤵𞤲𞤮𞥅 𞤫 𞤷𞤢𞤯𞤫𞥅𞤤𞤫 𞤯𞤵𞥅𞤯𞤵𞤯𞤫. 𞤐𞤮 𞤶𞤫𞤴𞤢𞥄 𞤫 𞤯𞤫𞤲⹁ 𞤲𞤣𞤫 𞤼𞤢𞤱𞤵𞤲𞤮𞥅⹁ 𞤊𞤢𞤪𞤢𞤲 𞤘𞤭𞤲𞤫⹁ 𞤳𞤮 𞤫 𞤲𞤣𞤫𞤪 𞤤𞤫𞤧𞤣𞤭 𞤘𞤭𞤲𞤫 𞤲𞤣𞤭𞤲 𞤼𞤢𞤲 𞤸𞤵𞥅𞤱𞤼𞤫𞤪𞤼𞤫𞥅 𞤬𞤭𞥅 𞤧𞤵𞥅𞤣𞤵𞤺𞤮𞤤. 𞤑𞤮 𞤯𞤵𞤥 𞤱𞤮𞤲𞤵𞤲𞤮𞥅 𞤧𞤢𞤦𞤵 𞤸𞤢𞥄 𞤊𞤢𞤪𞤢𞤲𞤧𞤭𞥅𞤩𞤫 𞤫 𞤶𞤢𞤲𞤢𞤥𞤩𞤫 𞤸𞤫𞤣𞥆𞤭𞤲𞤮𞥅𞤩𞤫 𞤘𞤭𞤲𞤫 𞤩𞤢𞥄𞤱𞤮 𞤲𞤣𞤫 𞤤𞤫𞤧𞤣𞤭 𞤲𞤣𞤭𞤲 𞤸𞤫𞤩𞤼𞤵𞤲𞤮 𞤶𞤫𞤴𞤼𞤢𞥄𞤪𞤫 𞤥𞤵𞤲⹁ 𞤮𞤥𞤦𞤭 𞤸𞤢𞥄𞤶𞤵𞥅𞤶𞤭 𞤥𞤵𞤲⹁ 𞤪𞤵𞤼𞥆𞤭𞥅 𞤳𞤢 𞤥𞤢𞤩𞥆𞤫.  𞤊𞤢𞤢𞤪𞤢𞤲𞤧𞤭 𞤼𞤮𞤽𞤭 𞤳𞤢𞤣𞤭 𞤭𞤼𞥆𞤵𞤺𞤮𞤤 𞤨𞤭𞥅𞤶𞤭 𞤊𞤢𞤪𞤢𞤲𞤧𞤭 𞤢𞤣𞥆𞤢 𞤘𞤭𞤲𞤫 𞤥𞤢𞥄 𞤯𞤵𞤲 𞤭𞤼𞥆𞤵𞤺𞤮𞤤 𞤊𞤢𞤪𞤢𞤲𞤶𞤭 𞤊𞤢𞤪𞤢𞤲𞤧𞤭 𞤯𞤭𞤲 𞤲𞤢𞥄𞤣𞤢 𞤘𞤭𞤲𞤫. 𞤍𞤵𞤥 𞤱𞤮𞤲𞤭 𞤧𞤢𞤦𞤵 𞤸𞤢𞥄 𞤲𞤦𞤵𞥅𞤯𞤭 𞤶𞤢𞤲𞤢𞤲𞤭 𞤯𞤭𞤲 𞤧𞤢𞤯𞤭. 𞤉 𞤸𞤭𞤲𞤤𞤫 𞤳𞤮 𞤯𞤭𞤲 𞤴𞤭𞤥𞤩𞤫 𞤩𞤫𞤲 𞤸𞤢𞤼𞤮𞤲𞤶𞤭𞤣𞤭 𞤫 𞤥𞤵𞤲 𞤬𞤭𞥅 𞤧𞤮𞥅𞤣𞤮𞤴𞤺𞤮𞤤 𞤨𞤭𞥅𞤶𞤭 𞤳𞤢 𞤤𞤫𞤴𞤯𞤫 𞤶𞤢𞤲𞤢𞤲𞤫 𞤲𞤢𞥄𞤣𞤢 𞤘𞤭𞤲𞤫. 𞤐𞤣𞤫 𞤲𞤦𞤵𞥅𞤯𞤭 𞤶𞤢𞤲𞤢𞤲𞤭 𞤯𞤭𞤲 𞤧𞤢𞤯𞤵𞤲𞤮𞥅⹁ 𞤷𞤮𞤺𞥆𞤵 𞤥𞤢𞤶𞥆𞤭 𞤰𞤢𞤱𞤭⹁ 𞤯𞤵𞤥 𞤶𞤢𞥄𞤧𞤭𞤲𞤭 𞤊𞤢𞤪𞤢𞤲𞤶𞤭 𞤘𞤭𞤲𞤫 𞤯𞤭𞤲. 𞤈𞤫𞤬𞤼𞤭⹁ 𞤷𞤮𞤺𞥆𞤵 𞤲𞤺𞤵𞤲 𞤳𞤢𞤣𞤭 𞤰𞤢𞤱𞤭 𞤳𞤢 𞤤𞤵𞥅𞤥𞤮𞥅𞤶𞤭⹁ 𞤧𞤢𞤦𞤵 𞤧𞤢𞤯𞤵𞤺𞤮𞤤 𞤨𞤭𞥅𞤶𞤭⹁ 𞤲𞤦𞤵𞥅𞤯𞤭 𞤯𞤭𞤲 𞤩𞤫𞤴𞤣𞤭𞥅 𞤶𞤢𞥄𞤧𞤵𞤺𞤮𞤤. 𞤊𞤭𞥅 𞤲𞤮 𞤩𞤫 𞤸𞤫𞤩𞥆𞤭𞤼𞤮𞤪𞤢 𞤯𞤫𞤲 𞤷𞤢𞤯𞤫𞥅𞤤𞤫⹁𞤤𞤢𞥄𞤥𞤵 𞤲𞤺𞤵𞤲 𞤧𞤮𞤳𞤭 𞤳𞤫𞥅𞤪𞤭 𞤯𞤭𞤲. 𞤇𞤫 𞤼𞤮𞤽𞤢𞤲𞤭 𞤳𞤢𞤣𞤭 𞤴𞤭𞤥𞤩𞤫 𞤩𞤫𞤲 𞤴𞤫𞥅𞤴𞤵𞤺𞤮𞤤 𞤨𞤭𞥅𞤶𞤭 𞤸𞤫𞥅𞤱𞤵𞤯𞤭⹁ 𞤱𞤢𞤲𞤮 𞤥𞤢𞥄𞤪𞤮⹁ 𞤧𞤵𞤳𞥆𞤢𞤪 𞤫 𞤳𞤮 𞤲𞤢𞤲𞤣𞤭 𞤫 𞤯𞤵𞤥 𞤳𞤮 𞤼𞤢𞤱𞤭 𞤳𞤮 𞤳𞤢 𞤤𞤫𞤴𞤯𞤫 𞤶𞤢𞤲𞤢𞤲𞤫 𞤭𞤱𞤢𞤼𞤢.

𞤑𞤮 𞤻𞤢𞤤𞤲𞤣𞤫 𞥒 𞤒𞤢𞤪𞤳𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥗𞥒⹁ 𞤊𞤢𞤪𞤢𞤲 𞤘𞤭𞤲𞤫 𞤭𞤼𞥆𞤢𞥄⹁ 𞤯𞤭 𞤤𞤮𞤲𞤼𞤭𞤪𞤢𞥄 𞤅𞤭𞤤𞤭𞥅. 𞤊𞤢𞤪𞤢𞤲𞤶𞤭 𞤧𞤢𞤨𞥆𞤮⹁ 𞤤𞤮𞤲𞤼𞤭𞤲𞤭𞤪𞤢 𞤅𞤭𞤤𞤭𞥅𞤪𞤵 𞤱𞤮𞥅𞤼𞤵𞤪𞤵. 𞤅𞤭𞤤𞤭𞥅 𞥑 = 𞤊𞤢𞤪𞤢𞤲 𞤘𞤭𞤲𞤫 𞥑𞥐. 𞤑𞤮 𞤅𞤭𞤤𞤭𞥅 𞤤𞤢𞥄𞤼𞤭𞤲𞤮𞥅 𞤲𞤦𞤵𞥅𞤯𞤭 𞤥𞤢𞤤𞥆𞤢 𞤷𞤫𞥅𞤣𞤫 𞤘𞤭𞤲𞤫 𞤯𞤫𞤲 𞤸𞤢𞥄 𞤤𞤢𞥄𞤥𞤵 𞤅𞤫𞥅𞤳𞤵 𞤚𞤵𞥅𞤪𞤫𞥅 𞤲𞤺𞤵𞤲⹁ 𞤬𞤫𞤰𞥆𞤭. 𞤊𞤭𞥅 𞤳𞤢𞤤𞤢 𞤲𞤦𞤵𞥅𞤯𞤭 𞤯𞤭𞤲 𞤱𞤢𞤴𞤤𞤢𞤲𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥗𞥒⹁ 𞤯𞤵𞤥 𞤱𞤮𞤲𞤢𞥄𞤤𞤭 𞤧𞤢𞤦𞤵 𞤴𞤮 𞤳𞤫𞥅𞤪𞤭 𞤯𞤭𞤲 𞤧𞤮𞤳𞤼𞤫 𞤬𞤭𞥅 𞤲𞤺𞤫𞤴𞤺𞤵 𞤥𞤢𞥄 𞤴𞤮 𞤴𞤭𞤥𞤩𞤫 𞤩𞤫𞤲 𞤼𞤮𞤽𞤼𞤢𞤲𞤫 𞤵𞤣𞥆𞤭𞤼𞤵𞤺𞤮𞤤 𞤥𞤢𞤲𞤳𞤭𞤪𞤯𞤫 𞤥𞤢𞤤𞥆𞤢 𞤴𞤫𞥅𞤴𞤭𞤪𞤤𞤫 𞤥𞤢𞤱𞤯𞤫. 

𞤑𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥘𞥔⹁ 𞤷𞤢𞤺𞥆𞤢𞤤 𞤥𞤢𞤴𞤣𞤫 𞤅𞤫𞥅𞤳𞤵 𞤚𞤵𞥅𞤪𞤫𞥅⹁ 𞤲𞤣𞤫 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤰𞤫𞤼𞥆𞤵𞤲𞤮𞥅 𞤤𞤢𞥄𞤥𞤵 𞤲𞤺𞤵𞤲 ⹁ 𞤩𞤫 𞤼𞤮𞤽𞤼𞤭 𞤲𞤺𞤫𞤴𞤺𞤵 𞤫 𞤥𞤢𞤩𞥆𞤭𞤼𞤵𞤺𞤮𞤤 𞤥𞤢𞤲𞤳𞤭𞤪𞤯𞤫 𞤸𞤢𞤤𞤮𞤪𞤢𞤤𞤶𞤫.

𞤑𞤮 𞤯𞤵𞤥 𞤱𞤮𞤲𞤭 𞤧𞤢𞤦𞤵 𞤸𞤢𞥄 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥘𞥕⹁ 𞤥𞤢𞤲𞤳𞤭𞤪𞤺𞤢𞤤 𞤤𞤫𞤧𞤣𞤭 𞤊𞤢𞤪𞤢𞤲𞤧𞤭 𞤭𞤲𞥆𞤫𞤼𞤫𞥅𞤲𞤺𞤢𞤤 BNP Paribas 𞤴𞤮 𞤢𞤪𞤵  𞤵𞤣𞥆𞤭𞤼𞤢 𞤧𞤢𞤤𞤲𞤣𞤵 𞤫 𞤤𞤫𞤴𞤣𞤭 𞤘𞤭𞤲𞤫 𞤱𞤭𞤫𞤼𞤫𞥅𞤲𞤣𞤵 𞤄𞤭𞤧𞤭𞥅𞤺𞤭𞥅 (BICIGUI). 𞤘𞤭𞤲𞤫 𞤲𞤮 𞤥𞤢𞤪𞤭 𞤶𞤫𞤴𞤢𞤤 𞤫 𞤲𞤣𞤵𞤲 𞤧𞤢𞤤𞤲𞤣𞤵⹁ 𞤳𞤮𞤲𞤮 𞤳𞤮 BNP Paribas 𞤥𞤢𞤪𞤭 𞤶𞤫𞤴𞤢𞤤 𞤥𞤢𞤱𞤲𞤺𞤢𞤤 𞤲𞤺𞤢𞤤. 𞤉𞤩𞤫 𞤶𞤫𞤴𞤭 𞤳𞤮 𞤴𞤢𞤱𞤼𞤭 𞥕𞥕% (𞤼𞤫𞥅𞤥𞤫𞤣𞤫𞤪𞤢𞤤 𞥕𞥕). 𞤑𞤮 𞤍𞤵𞤥 𞤬𞤭𞤪𞤼𞤭⹁ 𞤫𞤩𞤫 𞤶𞤫𞤴𞤭 𞤳𞤮 𞤩𞤵𞤪𞤭 𞤬𞤫𞤷𞥆𞤫𞤪𞤫 𞤄𞤭𞤧𞤭𞥅𞤺𞤭𞥅. 𞤘𞤭𞤲𞤫 𞤳𞤮 𞥗% 𞤼𞤢𞤲 𞤶𞤫𞤴𞤭 𞤫 𞤄𞤭𞤧𞤭𞥅𞤺𞤭𞥅.

𞤘𞤭𞤤𞤢 𞤪𞤮𞤱𞤢𞤲𞤭 𞤲𞤮𞤲⹁ 𞤄𞤫𞥅-𞤉𞤲-𞤆𞤫𞥅 𞤆𞤢𞤪𞤭𞤦𞤢𞥄 (BNP Paribas)⹁ 𞤸𞤮𞤤𞥆𞤭𞥅 𞤬𞤢𞥄𞤤𞤫 𞤴𞤫𞥅𞤴𞤵𞤼𞤵𞤺𞤮𞤤 𞤲𞤣𞤵𞥅 𞤧𞤢𞤤𞤲𞤣𞤵 𞤥𞤢𞤩𞥆𞤫 𞤘𞤭𞤲𞤫 𞤳𞤢𞤻𞤵𞤲 𞤫 𞤷𞤢𞤤𞤯𞤭 𞤥𞤢𞤩𞥆𞤫 𞤱𞤮𞤲𞤯𞤭 𞤄𞤵𞤪𞤳𞤭𞤲𞤢 𞤫 𞤃𞤢𞤤𞥆𞤭. 𞤃𞤢𞤲𞤳𞤭𞤪𞤯𞤫 𞤯𞤭𞤯𞤭 𞤲𞤮 𞤬𞤢𞥄𞤤𞤢𞥄 𞤧𞤮𞥅𞤣𞤵𞤼𞤵𞤣𞤫 𞤄𞤭𞤧𞤭𞥅𞤺𞤭𞥅⹁ 𞤳𞤮𞤲𞤮 𞤀𞤤𞤬𞤢𞥄 𞤑𞤮𞤲𞤣𞤫 𞤫 BNP Paribas 𞤬𞤮𞤼𞥆𞤢𞥄𞤤𞤭 𞤫 𞤸𞤮𞥅𞤪𞤫 𞤸𞤵𞥅𞤲𞤣𞤫 𞤱𞤮𞥅𞤼𞤫𞤪𞤫. 𞤑𞤮 𞤄𞤵𞤪𞤳𞤭𞤲𞤢𞥄𞤶𞤮 𞤭𞤲𞥆𞤫𞤼𞤫𞥅𞤯𞤮 𞤅𞤭𞤥𞤮𞤲 𞤕𞤫𞤥𞤼𞤮𞤪𞤫⹁ 𞤶𞤫𞤴𞤯𞤮 𞤥𞤢𞤲𞤳𞤭𞤪𞤺𞤢𞤤 𞤭𞤲𞥆𞤫𞤼𞤫𞥅𞤲𞤺𞤢𞤤 𞤏𞤭𞤧𞤼𞤢 𞤄𞤢𞤲𞤳 (Vista Bank) 𞤱𞤮𞤲𞤭 𞤳𞤮 𞤀𞤤𞤬𞤢𞥄 𞤑𞤮𞤲𞤣𞤫 𞤧𞤵𞤩𞤭𞥅 𞤴𞤮 𞤰𞤫𞤼𞥆𞤵𞤼𞤵 𞤄𞤭𞤧𞤭𞥅𞤺𞤭𞥅. 𞤑𞤮𞤲𞤮 𞤫 𞤧𞤢𞤺𞤮 BNP Paribas⹁ 𞤳𞤮 𞤑𞤮𞤼𞤣𞤭𞤱𞤢𞤪𞤲𞤢𞥄𞤶𞤮 𞤭𞤲𞥆𞤫𞤼𞤫𞥅𞤯𞤮 𞤄𞤫𞤪𞤲𞤢𞥄𞤪 𞤁𞤮𞤧𞤮𞤲𞤺𞤭𞥅 𞤑𞤮𞤲𞤫⹁ 𞤶𞤫𞤴𞤯𞤮 𞤀𞤼𞤤𞤢𞤲𞤼𞤭𞤳 𞤊𞤢𞤲𞤢𞤧𞤭𞤴𞤮𞤤 𞤘𞤪𞤵𞤨 (Atlantic Financial Group) 𞤧𞤮𞥅𞤣𞤭𞤼𞤢𞤼𞤢𞥄 𞤧𞤢𞤤𞤲𞤣𞤵 𞤥𞤢𞤩𞥆𞤫 𞤲𞤣𞤵𞤲.

𞤑𞤮 𞤄𞤭𞤧𞤭𞥅𞤺𞤭𞥅 𞤱𞤮𞤲𞤭 𞤥𞤢𞤲𞤳𞤭𞤪𞤺𞤢𞤤 𞤩𞤵𞤪𞤵𞤲𞤺𞤢𞤤 𞤫 𞤶𞤢𞥄𞤤𞤢𞥄𞤣𞤫 𞤲𞤣𞤫𞤪 𞤘𞤭𞤲𞤫. 𞤅𞤭 𞤄𞤫𞥅-𞤉𞤲-𞤆𞤫𞥅 𞤴𞤫𞥅𞤴𞤭𞤼𞤭𞥅 𞤲𞤣𞤵𞥅 𞤧𞤢𞤤𞤲𞤣𞤵 𞤥𞤢𞤩𞥆𞤫⹁ 𞤦𞤵𞤴 𞤲𞤮 𞤶𞤭𞤩𞤭 𞤧𞤭 𞤄𞤭𞤧𞤭𞥅𞤺𞤭𞥅 𞤥𞤮𞤰𞥆𞤢𞤴 𞤥𞤢𞥄 𞤧𞤭 𞤴𞤫𞥅𞤦𞤮𞤼𞤮𞥅. 𞤚𞤫𞤲𞤼𞤭𞤲𞤭𞥅 𞤲𞤮𞤲⹁ 𞤤𞤢𞥄𞤥𞤵 𞤲𞤺𞤵𞤲 𞤵𞤳𞥆𞤭𞥅 𞤶𞤵𞥅𞤯𞤫 𞤫 𞤥𞤵𞤲.