𞤑𞤌𞤜𞤋𞤁-𞥑𞥙 𞤏𞤌𞤐𞤋 𞤅𞤀𞤄𞤓 𞤖𞤌𞥅𞤈𞤉𞥅𞤔𞤌 𞤑𞤋𞤍𞥆𞤌 𞤑𞤌𞤐𞤘𞤌

𞤔𞤢𞤳 𞤔𞤮𞤱𞤢𞤳𞤭𞤥 𞤒𞤮𞤥𞤦𞤭-𞤌𞤨𞤢𞤲𞤺𞤮⹁ 𞤤𞤢𞥄𞤼𞤭𞤲𞤮𞥅𞤯𞤮 𞤸𞤮𞥅𞤪𞤫𞥅𞤶𞤮 𞤤𞤫𞤧𞤣𞤭 𞤑𞤮𞤲𞤺𞤮 (𞤄𞤢𞤪𞤢𞤧𞤢𞤾𞤭𞤤) 𞤲𞤣𞤭𞤲⹁ 𞤬𞤫𞤰𞥆𞤭𞤲𞤭𞥅 𞤆𞤢𞤪𞤭 𞤫 𞤲𞤣𞤫𞤪 𞤤𞤫𞤧𞤣𞤭 𞤊𞤢𞤪𞤢𞤲𞤧𞤭. 𞤍𞤵𞤥 𞤳𞤮 𞤸𞤢𞤲𞤳𞤭 (𞤳𞤫𞥅𞤻𞤢) 𞤫 𞤀𞥄𞤩𞤵𞤲𞤣𞤫⹁ 𞤻𞤢𞤤𞤲𞤣𞤫 𞥓𞥐 𞤐𞤦𞤮𞥅𞤴𞤮 𞤱𞤢𞤯𞤭. 𞤑𞤮 𞤣𞤵𞥅𞤩𞤭 𞤷𞤢𞤨𞥆𞤢𞤲𞤯𞤫 𞤶𞤫𞥅𞤼𞤢𞤼𞤭 𞤫 𞤺𞤮𞤮 (𞥘𞥑) 𞤮 𞤬𞤫𞤰𞥆𞤭𞤲𞤭𞤪𞤭. 𞤑𞤮 𞤻𞤢𞤱𞤵 𞤑𞤮𞤾𞤭𞤣-𞥑𞥙 𞤱𞤮𞤲𞤭 𞤧𞤢𞤦𞤵 𞤥𞤢𞥄𞤴𞤣𞤫 𞤥𞤢𞤳𞥆𞤮.

𞤒𞤮𞤥𞤦𞤭-𞤌𞤨𞤢𞤲𞤺𞤮 𞤤𞤢𞥄𞤥𞤭𞤲𞤮 𞤑𞤮𞤲𞤺𞤮 𞤲𞤣𞤭𞤺𞤢 𞥑𞥙𞥗𞥗 𞤬𞤢𞥄 𞤲𞤣𞤫 𞤁𞤫𞤲𞤭𞤧 𞤅𞤢𞤧𞤵 𞤐𞤺𞤫𞤧𞤮 𞤬𞤮𞤤𞥆𞤵𞤲𞤮𞥅𞤥𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥗𞥙. 𞤐𞤣𞤫𞤲𞤧𞤢𞤴 𞤮 𞤧𞤮𞤳𞤢𞥄 𞤣𞤵𞥅𞤩𞤭 𞤸𞤫𞥅𞤱𞤵𞤯𞤭⹁ 𞤺𞤢𞤤𞥆𞤫 𞤥𞤢𞤳𞥆𞤮 𞤶𞤢𞤩𞤼𞤢𞥄. 𞤑𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥘𞥔 𞤮 𞤢𞤷𞥆𞤭𞤼𞤢𞥄.

𞤑𞤮𞤲𞤮 𞤲𞤣𞤫 𞤮 𞤼𞤵𞥅𞤥𞤢𞤲𞤮𞥅 𞤬𞤢𞥄𞤤𞤫 𞤬𞤮𞤤𞥆𞤵𞤺𞤮𞤤 𞤅𞤢𞤧𞤵 𞤐𞤺𞤫𞤧𞤮⹁ 𞤮 𞤲𞤢𞤲𞤺𞤭𞤼𞤢𞥄⹁ 𞤮 𞤧𞤮𞤳𞤢𞥄 𞤳𞤢𞤣𞤭 𞤳𞤮 𞤴𞤢𞤱𞤼𞤭 𞤣𞤵𞥅𞤩𞤭 𞤼𞤢𞤼𞤭. 𞤍𞤵𞤥 𞤳𞤮 𞤺𞤭𞤤𞤢 𞥑𞥙𞥘𞥗 𞤸𞤢𞤲 𞥑𞥙𞥙𞥐. 𞤑𞤮 𞤲𞤣𞤫 𞤦𞤫𞤲𞤧𞤮𞤲𞥋𞤣𞤭𞤪𞤢𞤤 𞤺𞤫𞤲𞤣𞤭𞤲𞤳𞤮𞤱𞤢𞤤 (Conférence Nationale) 𞤧𞤢𞥄𞤼𞤭𞤲𞤢𞤲𞤮𞥅 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥙𞥑⹁ 𞤮 𞤢𞤷𞥆𞤭𞤼𞤢𞥄. 𞤕𞤢𞤺𞥆𞤢𞤤 𞤮 𞤢𞤷𞥆𞤭𞤼𞤫𞥅𞤣𞤫⹁ 𞤮 𞤧𞤭𞤲𞤷𞤭 𞤬𞤫𞤣𞥆𞤫 𞤱𞤭𞤫𞤼𞤫𞥅𞤲𞤣𞤫 𞤃𞤮𞤩𞤼𞤮𞤲𞥋𞤣𞤭𞤪𞤢𞤤 𞤬𞤭𞥅 𞤁𞤫𞤥𞤮𞤳𞤢𞤪𞤢𞥄𞤳𞤵 (Rassemblement pour la Démocratie). 𞤈𞤫𞤬𞤼𞤭⹁ 𞤮 𞤣𞤢𞤪𞤭𞥅 𞤬𞤭𞥅 𞤧𞤵𞤩𞤮 𞤱𞤢𞤯𞤵𞤲𞥋𞤺𞤮  𞤫 𞤸𞤭𞤼𞤢𞥄𞤲𞤣𞤫 𞥑𞥙𞥙𞥒⹁ 𞤳𞤮𞤲𞤮 𞤆𞤢𞤧𞤳𞤢𞤤 𞤂𞤭𞤧𞤵𞤦𞤢𞥄 𞤬𞤮𞥅𞤤𞤭⹁ 𞤳𞤢𞤲𞤳𞤮 𞤮 𞤱𞤮𞤲𞤭 𞤶𞤫𞥅𞤺𞤢𞤩𞤮.

𞤉 𞤸𞤭𞤼𞤢𞥄𞤲𞤣𞤫 𞥑𞥙𞥙𞥓⹁ 𞤮 𞤱𞤢𞤯𞤼𞤮𞤣𞤭 𞤫 𞤆𞤢𞤧𞤳𞤢𞤤 𞤂𞤭𞤧𞤵𞤦𞤢𞥄 𞤳𞤢 𞤧𞤵𞤩𞤮 𞤲𞤦𞤢𞤼𞤭𞤪𞤣𞤵. 𞤇𞤢𞥄𞤱𞤮 𞤯𞤵𞤥⹁ 𞤮𞤲 𞤯𞤮𞤲  𞤱𞤢𞤯𞤭 𞤥𞤮 𞤀𞤪𞤣𞤮 𞤺𞤮𞤥𞤲𞤢𞥄𞤳𞤵 𞤑𞤮𞤲𞤺𞤮 𞤲𞤺𞤵𞤲. 𞤐𞤣𞤫 𞤼𞤢𞤱𞤲𞤮𞥅 𞤲𞤮𞤲⹁ 𞤴𞤮𞤺𞤢 𞤫 𞤼𞤢𞤱𞤢𞥄𞤩𞤫 𞤩𞤫𞤲 𞤳𞤢 𞤬𞤫𞤣𞥆𞤫 𞤆𞤢𞤧𞤳𞤢𞤤 𞤂𞤭𞤧𞤵𞤦𞤢𞥄⹁ 𞤴𞤭𞤯𞤢𞥄 𞤳𞤮 𞤮 𞤱𞤮𞤲𞤭 𞤳𞤮𞤲 𞤢𞤪𞤣𞤮 𞤧𞤢𞤦𞤵 𞤶𞤫𞤴𞤫𞥅𞤣𞤫 𞤥𞤢𞤳𞥆𞤮 𞤫 𞤤𞤫𞤻𞤮𞤤 𞤬𞤫𞥅𞤪𞤫𞤱𞤮𞤤⹁ 𞤩𞤫 𞤤𞤢𞤲𞤣𞤭𞥅 𞤴𞤮 𞤮 𞤭𞤼𞥆𞤫. 𞤑𞤢𞤲𞤳𞤮 𞤳𞤢𞤣𞤭⹁ 𞤻𞤢𞤤𞤲𞤣𞤫 𞥒𞥓 𞤃𞤮𞤪𞤧𞤮 𞥑𞥙𞥙𞥖⹁ 𞤮 𞤴𞤢𞤤𞤼𞤭 𞤳𞤢 𞤺𞤮𞤥𞤲𞤢𞥄𞤳𞤵⹁ 𞤪𞤫𞤬𞤼𞤭 𞤮 𞤸𞤮𞥅𞤼𞤭 𞤳𞤢 𞤧𞤢𞤸𞤪𞤫 𞤥𞤢𞤳𞥆𞤮 𞤌𞤱𞤢𞤲𞤣𞤮 . 𞤄𞤢𞤯𞤼𞤢𞤲𞤫 𞤯𞤵𞤥⹁ 𞤸𞤮𞥅𞤪𞤫𞥅𞤶𞤮 𞤤𞤫𞤧𞤣𞤭 𞤲𞤣𞤭𞤲 𞤤𞤮𞤲𞤼𞤭𞤲𞤭𞤪𞤭 𞤥𞤮 𞤡𞤢𞤪𞤤 𞤁𞤢𞤾𞤭𞤣 𞤘𞤢𞤲𞤢𞤱𞤮 𞤻𞤢𞤤𞤲𞤣𞤫 𞥒𞥗 𞤃𞤮𞤪𞤧𞤮 𞥑𞥙𞥙𞥖.   

𞤉 𞤸𞤭𞤼𞤢𞥄𞤲𞤣𞤫 𞥑𞥙𞥙𞥗⹁ 𞤸𞤢𞤩𞤪𞤫 𞤥𞤢𞤱𞤲𞤣𞤫 𞤬𞤫𞤼𞥆𞤭 𞤑𞤮𞤲𞤺𞤮 𞤸𞤢𞤳𞥆𞤵𞤲𞥋𞤣𞤫 𞤁𞤫𞤲𞤭𞤧 𞤅𞤢𞤧𞤵 𞤐𞤺𞤫𞤧𞤮 𞤫 𞤆𞤢𞤧𞤳𞤢𞤤 𞤂𞤭𞤧𞤵𞤦𞤢𞥄⹁ 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲. 𞤇𞤢𞤴𞤼𞤭 𞤅𞤢𞤧𞤵 𞤐𞤺𞤫𞤧𞤮 𞤬𞤮𞥅𞤤𞤭𞥅⹁ 𞤒𞤮𞤥𞤦𞤭-𞤌𞤨𞤢𞤲𞤺𞤮 𞤣𞤮𞤺𞤭⹁ 𞤮 𞤴𞤢𞤸𞤭 𞤮 𞤥𞤮𞥅𞤤𞤭𞤲𞤮𞤴𞤭𞥅 𞤑𞤮𞤼𞤣𞤭𞤾𞤢𞥄𞤪 𞤫 𞤊𞤢𞤪𞤢𞤲𞤧𞤭.  𞤌 𞤪𞤵𞤼𞥆𞤢𞥄𞤣𞤫 𞤑𞤮𞤲𞤺𞤮 𞤱𞤮𞥅 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥐𞥗 𞤩𞤢𞥄𞤱𞤮 𞤁𞤫𞤲𞤭𞤧 𞤅𞤢𞤧𞤵 𞤐𞤺𞤫𞤧𞤮 𞤴𞤢𞥄𞤬𞤢𞥄𞤣𞤫 𞤥𞤮. 𞤐𞤣𞤫𞤲 𞤮 𞤱𞤮𞤲𞤭 𞤫 𞤴𞤭𞥅𞤤𞤢𞤺𞤮𞤤 𞤸𞤢𞤳𞥆𞤵𞤲𞥋𞤣𞤫 𞤑𞤮𞤲𞤺𞤮 𞤫 𞤊𞤢𞤪𞤢𞤲𞤧𞤭. 𞤑𞤮𞤲𞤮 𞤺𞤢𞥄𞤲𞤭𞤲𞤼𞤭𞤲 𞤺𞤢𞥄⹁ 𞤲𞤣𞤫 𞤷𞤫𞤤𞥆𞤢𞤤 𞤥𞤢𞤳𞥆𞤮 𞤵𞤴𞤼𞤭𞤲𞤮𞥅⹁ 𞤳𞤮 𞤊𞤢𞤪𞤢𞤲𞤧𞤭 𞤼𞤢𞤲 𞤮 𞤱𞤮𞤲𞥆𞤮𞥅 𞤸𞤢𞥄 𞤲𞤮 𞤮 𞤥𞤢𞥄𞤴𞤭𞤪𞤭 𞤲𞤭𞥅 𞤸𞤢𞤲𞤳𞤭.