𞤑𞤌𞤜𞤋𞤁-𞥑𞥙 𞤖𞤉𞤏𞤚𞤋𞥅 𞤅𞤀𞤘𞤀𞤈𞤀 𞤘𞤌𞥅
𞤐𞤺𞤵𞥅 𞤻𞤢𞤱𞤵 𞤢𞤲𞤣𞤭𞤪𞤢𞥄𞤲𞤺𞤵 𞤑𞤮𞤾𞤭𞤣-𞥑𞥙 𞤸𞤫𞤱𞤼𞤭𞥅 𞤧𞤢𞤺𞤢 𞤧𞤢𞤺𞤢𞤪𞤢 𞤺𞤮𞥅.
𞤐𞤣𞤫 𞤱𞤢𞤪𞤭𞥅 𞤳𞤮 𞤴𞤢𞤱𞤼𞤭 𞤴𞤭𞤥𞤩𞤫 𞤵𞤶𞤵𞤲𞤫 𞤷𞤢𞤨𞥆𞤢𞤲𞤯𞤫 𞤲𞤢𞤴𞤭 𞤫 𞤵𞤶𞤵𞤲𞤫 𞤶𞤫𞥅𞤯𞤭𞤯𞤭 (𞥔𞥗 𞥐𞥐𞥐). 𞤑𞤮 𞤩𞤢𞤣𞤭𞥅 𞤴𞤭𞤥𞤩𞤫 𞤁𞤵𞤦𞤵𞥅𞤪𞤫 𞤱𞤮𞥅𞤼𞤫𞤪𞤫 (𞤥𞤭𞤤𞤭𞤴𞤮𞤲 𞤺𞤮𞥅𞤼𞤮) 𞤲𞤮 𞤱𞤮𞤲𞤣𞤭 𞤢 𞤲𞤣𞤫𞥅 𞤲𞤢𞤱𞤲𞤢𞥄𞤪𞤫 𞤧𞤫𞤲𞤣𞤭𞤼𞤭𞥅𞤩𞤫 𞤸𞤢𞤳𞥆𞤵𞤲𞥋𞤣𞤫 𞤤𞤫𞤧𞤯𞤫 𞤼𞤫𞥅𞤥𞤫𞤣𞤫𞤪𞤫 𞤫 𞤷𞤢𞤨𞥆𞤢𞤲𞤯𞤫 𞤶𞤫𞥅𞤼𞤢𞤼𞤭 (𞥑𞥘𞥓).
𞤑𞤮 𞤫 𞤲𞤣𞤫𞤪 𞤤𞤫𞤧𞤣𞤭 𞤀𞤥𞤫𞤪𞤭𞤳𞤢𞥄 𞤲𞤣𞤭𞤲 𞤲𞤺𞤵𞥅 𞤻𞤢𞤱𞤵 𞤩𞤵𞤪𞤭 𞤶𞤢𞥄𞤤𞤢𞥄𞤣𞤫 𞤸𞤢𞤲𞤣𞤫⹁ 𞤧𞤢𞤦𞤵 𞤻𞤢𞤱𞤵𞤩𞤫 𞤩𞤫𞤲 𞤑𞤮𞤾𞤭𞤣-𞥑𞥙 𞤫 𞤲𞤣𞤫𞤪 𞤀𞤥𞤫𞤪𞤭𞤳𞤢𞥄⹁ 𞤲𞤮 𞤩𞤢𞤣𞤲𞤭 𞤵𞤶𞤵𞤲𞤫 𞤼𞤫𞥅𞤥𞤫𞤯𞥆𞤫 𞤯𞤭𞤯𞤮 𞤫 𞤵𞤶𞤵𞤲𞤫 𞤶𞤫𞥅𞤯𞤭𞤯𞤭 (𞥒𞥑𞥗 𞥐𞥐𞥐). 𞤒𞤢𞤱𞤼𞤭𞥅 𞤳𞤢𞤣𞤭 𞤵𞤶𞤵𞤲𞤫 𞤶𞤮𞤱𞤭 (𞥕𞥐𞥐𞥐) 𞤳𞤮 𞤲𞤣𞤵 𞤱𞤢𞤪𞤭 𞤳𞤢 𞤤𞤫𞤧𞤣𞤭 𞤼𞤮𞤲.
𞤖𞤢𞤲 𞤶𞤮𞥅𞤲𞤭 𞤸𞤫𞤩𞤢𞥄𞤳𞤭 𞤤𞤫𞤳𞥆𞤭 𞤻𞤢𞤱𞤲𞤣𞤭𞤪𞤳𞤭 𞤥𞤢𞤤𞥆𞤢 𞤣𞤢𞤯𞤲𞤭𞤪𞤳𞤭 𞤪𞤢𞥄𞤩𞤫𞥅𞤣𞤫. 𞤑𞤮 𞤺𞤮𞥅𞤼𞤯𞤮 𞤱𞤢𞥄𞤱𞤭 𞤼𞤢𞤲 𞤳𞤮 𞤪𞤫𞤲𞤼𞤢𞤺𞤮𞤤 𞤫 𞤱𞤮𞤯𞥆𞤭𞤼𞤢𞤺𞤮𞤤 𞤳𞤢𞤤𞤢 𞤳𞤮 𞤪𞤢𞥄𞤩𞤭𞤲𞤼𞤢 𞤲𞤺𞤵𞥅 𞤻𞤢𞤱𞤵.
𞤃𞤮𞤲𞤮 𞤬𞤢𞥄𞤤𞤢 𞤪𞤫𞤲𞤼𞤢𞥄𞤣𞤫 𞤫 𞤲𞤺𞤵𞥅 𞤻𞤢𞤱𞤵⹁ 𞤴𞤮 𞤮𞤲𞤼𞤭𞤺𞤭 𞤻𞤫𞤲𞤼𞤭𞤲 𞤯𞤫𞥅 𞤼𞤮𞤩𞥆𞤫 𞤶𞤫𞥅𞤯𞤭 𞤯𞤮𞥅:
- 𞤱𞤮𞤼𞤢 𞤮𞤲 𞤧𞤢𞤤𞤥𞤭𞤲𞤭𞤪 𞤴𞤭𞤥𞤩𞤫 𞤩𞤫𞤲 𞤶𞤵𞥅𞤯𞤫 𞤯𞤫𞤲. 𞤅𞤮 𞤼𞤢𞤱𞤭𞥅 𞤮𞤲 𞤧𞤢𞤤𞤥𞤭𞤲𞤢𞤴 𞤺𞤮𞥅𞤼𞤯𞤮⹁ 𞤼𞤮𞤱𞤲𞤢𞤲𞤫𞤲 𞤮𞤲𞤼𞤭𞤺𞤭 𞤶𞤵𞥅𞤯𞤫 𞤯𞤫𞤲 𞤳𞤢 𞤱𞤮𞤯𞥆𞤭𞥅
- 𞤧𞤮𞥅𞤯𞤮𞤪𞤮𞤲 𞤲𞤣𞤭𞤴𞤢𞤲 𞤤𞤢𞥄𞤩𞤵𞤯𞤢𞤲 𞤫 𞤧𞤢𞥄𞤦𞤵𞤲𞤣𞤫 𞤧𞤮𞥅𞤲𞤮 𞤳𞤢𞤤𞤢
- 𞤪𞤫𞤲𞤼𞤮 𞤯𞤮𞤲 𞤫 𞤥𞤫𞥅𞤥𞤵𞤺𞤮𞤤 𞤴𞤫𞥅𞤧𞤮 𞤥𞤮𞤲 𞤲𞤺𞤮𞤲
- 𞤅𞤭 𞤮𞤲 𞤯𞤮𞤶𞥆𞤢𞤴 𞤥𞤢𞥄 𞤮𞤲 𞤭𞥅𞤤𞤢𞤴⹁ 𞤯𞤮𞤶𞥆𞤫𞥅 𞤥𞤢𞤤𞥆𞤢 𞤭𞥅𞤤𞤫𞥅 𞤳𞤢 𞤲𞤣𞤫𞤪 𞤧𞤮𞤩𞥆𞤵𞤲𞥋𞤺𞤮 𞤥𞤮𞤲. 𞤏𞤮𞤼𞤢 𞤮𞤲 𞤯𞤮𞤶𞥆𞤵⹁ 𞤼𞤮𞤱𞤢 𞤮𞤲 𞤭𞥅𞤤𞤵 𞤳𞤢 𞤲𞤣𞤫𞤪 𞤲𞤫𞤱𞤫 𞤥𞤮𞤲
- 𞤪𞤫𞤲𞤼𞤫𞥅 𞤳𞤢𞤣𞤭 𞤫 𞤴𞤢𞤸𞤵𞤺𞤮𞤤 𞤳𞤢 𞤴𞤭𞤥𞤩𞤫 𞤥𞤮𞥅𞤩𞤭𞥅⹁ 𞤱𞤢𞤲𞤮 𞤳𞤢 𞤤𞤵𞥅𞤥𞤮 𞤫 𞤳𞤢 𞤣𞤵𞤯𞤫.
- 𞤧𞤮 𞤼𞤢𞤱𞤭𞥅 𞤳𞤮 𞤦𞤫𞥅 𞤴𞤢𞤤𞤼𞤮𞤲⹁ 𞤢𞤷𞥆𞤫𞥅 𞤫𞤥𞤦𞤫𞤪𞤫 𞤼𞤫𞤨𞥆𞤫 𞤼𞤢𞤼𞤭 𞤸𞤢𞤳𞥆𞤵𞤲𞥋𞤣𞤫 𞤥𞤮𞤲 𞤫 𞤳𞤢𞤤𞤢 𞤱𞤮𞤲𞤯𞤮 𞤧𞤫𞤪𞤢 𞤥𞤮𞤲
- 𞤥𞤮 𞤧𞤮𞤺𞤭𞤼𞤭𞤳𞤫 𞤲𞤮 𞤱𞤮𞤲𞤣𞤭 𞤫 𞤻𞤢𞤱𞤵⹁ 𞤴𞤮 𞤤𞤵𞤼𞥆𞤵 𞤳𞤢 𞤧𞤵𞥅𞤣𞤵 𞤲𞤮𞤣𞥆𞤢 𞤪𞤢𞤽𞤢𞤥𞤫 𞤯𞤫 𞤶𞤮𞤲𞥆𞤢 𞤯𞤫𞤲 𞤯𞤫𞤲
𞤉 𞤬𞤮𞤣𞥆𞤫 𞤬𞤢𞥄𞤸𞤥𞤵 𞤢𞤲 𞤸𞤢𞤪𞤭 𞤢𞤣𞤵𞤲𞤢 𞤥𞤫𞤲 𞤮𞤲 𞤸𞤫𞤩𞤢𞥄𞤤𞤭 𞤻𞤢𞤱 𞤸𞤵𞤤𞤩𞤭𞤲𞤭𞥅𞤲𞤺𞤵 𞤴𞤢𞥄𞤱𞤵𞤲𞤺𞤵 𞤪𞤢𞥄𞤩𞤵𞤣𞤫 𞤱𞤢 𞤲𞤺𞤵𞥅 𞤲𞤺𞤭𞤤𞤳𞤵-𞤳𞤮𞥊𞥅𞤪𞤮𞥊𞥅𞤲𞤢𞥄⹁ 𞤴𞤮 𞤶𞤢𞤥𞤢𞥄 𞤮𞤲 𞤴𞤮 𞤱𞤢𞤯𞤼𞤢𞤲 𞤸𞤭𞥅𞤤𞤢 𞤫 𞤯𞤭𞥅 𞤱𞤢𞤤𞥆𞤭𞤼𞤮𞤪𞤯𞤭 𞤬𞤭𞥅 𞤣𞤢𞤯𞤵𞤺𞤮𞤤 𞤲𞤺𞤵𞥅 𞤻𞤢𞤱𞤵⹁ 𞤯𞤵𞤯𞥆𞤭𞤲𞤮𞤪𞤢 𞤣𞤫𞤱𞤢𞤤 𞤫 𞤣𞤵𞤢𞥄 𞤫 𞤧𞤢𞤣𞤢𞤳𞤢… 𞤒𞤮 𞤢𞤤𞤤𞤢𞥄𞤸𞤵 𞤮𞤲 𞤣𞤢𞤲𞤣𞤵 𞤫𞤲 𞤲𞤣𞤫𞥅 𞤲𞤢𞤱𞤲𞤢𞥄𞤪𞤫 𞤮 𞤣𞤢𞤲𞤣𞤢 𞤥𞤮 𞤳𞤢𞤤𞤢 𞤶𞤵𞤤𞤯𞤮 𞤫 𞤳𞤫𞥅𞤬𞤫𞥅𞤪𞤮.
𞤌𞤲 𞤶𞤢𞥄𞤪𞤢𞥄𞤥𞤢 𞤬𞤮𞤼𞤢.
𞤒𞤮 𞤢𞤤𞤤𞤢𞤸𞤵 𞤮𞤲 𞤣𞤢𞤲𞤣𞤵 𞤫𞤲 𞤲𞤣𞤫𞥅 𞤲𞤢𞤱𞤲𞤢𞥄𞤪𞤫