𞤉𞤪𞤣𞤮𞤺𞤢𞥄𞤲 𞤚𞤵𞤥𞤦𞤮’𞤣𞤭𞤪𞤢𞤤 𞤘𞤫𞤲𞤯𞤭 𞤘𞤮𞤼𞥆𞤵𞤯𞤭
𞤉𞤪𞤣𞤮𞤺𞤢𞥄𞤲 𞤸𞤫𞤪𞤧𞤭𞤪𞤢𞥄𞤤𞤭 𞤳𞤮𞤲𞤺𞤵𞤯𞤭 𞤥𞤵𞤲 𞤯𞤭𞤲
𞤃𞤮𞤪𞤧𞤭𞥅⹁ 𞤫 𞤳𞤢𞤧𞤮𞥅𞤶𞤭⹁ 𞤫 𞤈𞤮𞤸𞤭𞤲𞤺𞤢𞥄⹁ 𞤫 𞤆𞤢𞤤𞤫𞤧𞤼𞤭𞥅𞤲⹁ 𞤫 𞤳𞤢𞤧𞤥𞤭𞥅𞤪⹁ 𞤳𞤮 𞤯𞤭𞥅 𞤱𞤮𞤲𞥆𞤮𞥅 𞤼𞤭𞥅𞤼𞤮𞥅𞤯𞤫 𞤴𞤫𞤱𞤼𞤫𞤪𞤫 𞤉𞤪𞤣𞤮𞤺𞤢𞥄𞤲 𞤲𞤣𞤫𞤲 𞤼𞤮 𞤥𞤮𞥅𞤩𞤼𞤮𞤲’𞤣𞤭𞤪𞤢𞤤 𞤘𞤫𞤲𞤯𞤭 𞤆𞤮𞤼𞥆𞤵𞤯𞤭.(𞤐𞤭𞤱𞤴𞤮𞤪𞤳)
𞤂𞤢𞥄𞤥𞤯𞤮 𞤚𞤵𞤪𞤳𞤭𞥅 𞤮𞤲⹁ 𞤈𞤢𞤶𞤢𞤦 𞤚𞤢𞤴𞥆𞤭𞤦 𞤉𞤪𞤣𞤮𞤺𞤢𞥄𞤲 𞤱𞤫𞤪𞤤𞤭𞤳𞤫 𞤳𞤮𞤲𞤺𞤵𞤯𞤭 𞤳𞤢 𞤥𞤮𞥅𞤩𞤼𞤮𞤲’𞤣𞤭𞤪𞤢𞤤 𞤘𞤫𞤲𞤯𞤭 𞤆𞤮𞤼𞥆𞤵𞤯𞤭⹁ 𞤫 𞤬𞤫𞥅 𞤺𞤫𞤩𞤫 𞤸𞤫𞥅𞤱𞤵𞤯𞤫 𞤴𞤮𞤱𞤮𞤲’𞤣𞤭𞤪𞤯𞤫 𞤫 𞤭𞤧𞤤𞤢𞥄𞤥 𞤲𞤣𞤫𞤪 𞤱𞤭𞤲𞤣𞤫𞤪𞤫 𞤲𞤣𞤫𞤲. 𞤑𞤮 𞤱𞤢 𞤲𞤮𞤲 𞤳𞤢𞤣𞤭⹁ 𞤫 𞤨𞤮𞤤𞤺𞤢𞤤 𞤥𞤢𞤱𞤲𞤺𞤢𞤤 𞤱𞤮𞤲𞤵𞤲’𞤺𞤢𞤤 𞤣𞤮𞤱 𞤤𞤫𞤴𞤯𞤫 𞤳𞤫𞥅𞤪𞤭𞤲𞤢𞥄𞤯𞤫 𞤱𞤮𞤲𞤢𞤲𞤣𞤫 𞤲𞤶𞤵𞤩𞥆𞤵𞤣𞤭 𞤱𞤭𞤲𞤣𞤫𞤪𞤫𞤴𞤢𞤲𞤳𞤮𞥅𞤪𞤭 𞤲𞤣𞤭𞤲.
𞤂𞤢𞥄𞤥𞤯𞤮 𞤚𞤵𞤪𞤳𞤭𞥅 𞤮𞤲⹁ 𞤮 𞤫𞤱𞤲𞤭𞤳𞤫 𞤢𞤣𞤵𞤲𞤢 𞤮𞤲 𞤬𞤮𞤱 𞤲𞤣𞤫 𞤩𞤫 𞤰𞤫𞤼𞥆𞤢𞤼𞤢 𞤨𞤫𞤸𞤫 𞤪𞤫𞤢𞤴𞤯𞤫 𞤶𞤭𞥅𞤩𞤮𞤤𞤣𞤵 𞤲𞤫𞤯𞥆𞤢𞥄𞤳𞤵 𞤱𞤮𞤲𞤵 𞤲𞤺𞤵 𞤅𞤵𞥅𞤪𞤭𞤴𞤢 𞤲𞤺𞤵𞤲. 𞤌𞤲 𞤫𞥅𞤱𞤭𞤳𞤫 𞤳𞤢𞤣𞤭 𞤪𞤫𞤲𞤣𞤮 𞤢𞤣𞤵𞤲𞤢𞤴𞤢𞤲𞤳𞤫𞥅𞤱𞤮 𞤲𞤺𞤮𞤲⹁ 𞤲𞤣𞤫 𞤲𞤺𞤮 𞤻𞤭𞥅𞤩𞤭𞤲𞤼𞤢 𞤳𞤭𞤧𞤢𞤤 𞤫 𞤧𞤢𞤸𞤪𞤫 𞤋𞤣𞤤𞤭𞥅𞤦⹁ 𞤲𞤣𞤫𞤪 𞤅𞤵𞥅𞤪𞤭𞤴𞤢.
“𞤉𞤲 𞤱𞤢𞥄𞤱𞤢𞤼𞤢𞥄 𞤣𞤢𞤻𞤢𞤲𞤣𞤫 𞤷𞤢𞤯𞤫𞥅𞤤𞤫 𞤱𞤮𞤲𞤯𞤫 𞤅𞤵𞥅𞤪𞤭𞤴𞤢 𞤯𞤫𞤲 𞤬𞤫𞤸𞤪𞤫 𞤻𞤭𞥅𞤩𞤢𞤴𞤲𞤣𞤫⹁ 𞤧𞤭 𞤱𞤮𞤲𞤢𞥄 𞤲𞤣𞤫 𞤣𞤢𞤯𞤼𞤮𞤪𞤯𞤫𞤲 𞤳𞤮𞤲𞤺𞤮𞤤 𞤺𞤮𞥅𞤼𞤮𞤤 𞤫 𞤬𞤫𞥅 𞤨𞤫𞤤𞥆𞤫 𞤮𞤱𞤲𞤮𞥅𞤶𞤫”⹁(organisation terroriste). 𞤑𞤮 𞤯𞤵𞤲 𞤱𞤮𞤲𞤭 𞤳𞤮 𞤉𞤪𞤣𞤮𞤺𞤢𞥄𞤲 𞤸𞤮𞤤𞥆𞤭.
𞤌 𞤽𞤢𞤼𞤭𞥅𞤳𞤫 𞤫 𞤸𞤭𞤥𞥆𞤫𞤪𞤫 𞤪𞤫𞤵𞤺𞤮𞤤 𞤣𞤫𞤲𞤼𞤫 𞤺𞤮𞤤𞥆𞤮𞥅𞤩𞤫 𞤑𞤭𞤪𞤣𞤭𞤧𞤼𞤢𞤲𞤩𞤫 𞤱𞤮𞤲𞤭𞤪𞤩𞤫 𞤬𞤵𞤯𞤲𞤢𞥄𞤲𞤺𞤫 𞤊𞤢𞤪𞤢𞤼 𞤅𞤵𞥅𞤪𞤭𞤴𞤢 𞤩𞤫𞤲 .
𞤌 𞤶𞤮𞥅𞤨𞤭𞥅 𞤳𞤢𞤣𞤭 𞤱𞤮𞤲𞤣𞤫 𞤚𞤵𞤪𞤳𞤭𞥅 𞤣𞤢𞤲𞤣𞤭𞥅 𞥓𞥒𞥐𞥐𞥐 𞤼𞤵𞤽𞤢𞤪𞤢𞤲𞤳𞤫𞥅𞤩𞤫 𞤢𞤧𞤳𞤢𞤴𞤣𞤭𞤴𞤢𞤲𞤳𞤮𞥅𞤩𞤫 𞤴𞤮𞥅𞤤𞤢𞥄𞤣𞤫 𞤳𞤢 𞤥𞤢𞥄𞤴𞤮 𞤫 𞤲𞤣𞤫𞥅 𞤸𞤭𞤼𞤢𞥄𞤲𞤣𞤫” 𞤫 𞤥𞤫𞤲 𞤲𞤢𞤩𞤼𞤭𞥅 𞤼𞤵𞤽𞤢𞤪𞤢𞤲𞤳𞤫𞥅𞤩𞤫 𞥕𞥘𞥐𞥐𞥐 𞤩𞤫 𞤱𞤮𞤲𞤢𞥄 𞤅𞤵𞥅𞤪𞤭𞤴𞤢𞤲𞤢𞥄𞤩𞤫 𞤳𞤢 𞤤𞤫𞤴𞤯𞤫 𞤥𞤢𞤩𞥆𞤫”.
𞤉𞤪𞤣𞤮𞤺𞤢𞥄𞤲 𞤲𞤮 𞤲𞤭𞤥𞤧𞤭⹁ 𞤼𞤢𞤱𞤣𞤫 𞤯𞤵𞤲 𞤫 𞤴𞤢𞥄𞤱𞤵𞤣𞤫 𞤢𞤣𞤵𞤲𞤢 𞤮𞤲 𞤴𞤫𞤶𞥆𞤭𞤼𞤭𞥅 𞤨𞤢𞤴𞤳𞤵𞤲 𞤅𞤵𞥅𞤪𞤭𞤴𞤢⹁ 𞤋𞤤𞤢𞤲 𞤑𞤵𞤪𞤣𞤭𞥅⹁ 𞤥𞤢𞥄𞤴𞤭𞤪𞤲𞤮𞥅𞤳𞤵𞤲 𞤴𞤮𞥅𞤤𞤢𞥄𞤪𞤫 𞤳𞤢 𞤥𞤢𞥄𞤴𞤮 𞤫 𞤤𞤢𞥄𞤱𞤮𞤤 𞤉𞤪𞤮𞤨.” 𞤏𞤮𞤼𞤢 𞤮𞤲 𞤴𞤫𞤶𞥆𞤭𞤼𞤵⹁ 𞤴𞤮𞤲𞤼𞤢 𞤮𞤲 𞤲𞤮 𞤱𞤢𞥄𞤱𞤭 𞤴𞤭𞥅𞤤𞤢𞥄𞤣𞤫 𞤸𞤢𞤪𞤢 𞤮𞤲𞤮𞤲 𞤳𞤢𞤣𞤭⹁ 𞤮𞤯𞤮𞤲 𞤫 𞤧𞤭𞤬𞤢 𞤮𞤲 𞤢𞤤𞤸𞤢𞥄𞤤𞤭”⹁ 𞤳𞤮 𞤯𞤵𞤲 𞤮 𞤸𞤮𞤤𞥆𞤭.
𞤗𞤵𞤣𞤵𞤧 𞤫 𞤑𞤢𞤧𞤥𞤭𞥅𞤪
𞤑𞤮 𞤴𞤮𞤱𞤭𞤼𞤭𞥅 𞤫 𞤆𞤢𞤤𞤫𞤧𞤼𞤭𞥅𞤲 𞤳𞤮𞤲⹁ 𞤤𞤢𞥄𞤥𞤯𞤮 𞤚𞤵𞤪𞤳𞤭𞥅 𞤮𞤲 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢⹁ 𞤔𞤵𞤩𞥆𞤵𞤣𞤭 𞤘𞤫𞤲𞤯𞤭 𞤆𞤮𞤼𞥆𞤵𞤯𞤭 𞤲𞤮 𞤸𞤢𞥄𞤲𞤭 𞤱𞤢𞤤𞥆𞤭𞤪𞤣𞤫 𞤆𞤢𞤤𞤫𞤧𞤼𞤭𞥅𞤲 𞤳𞤮 𞤩𞤵𞤪𞤭 𞤬𞤮𞤣𞤮𞥅𞤶𞤫.
𞤌 𞤩𞤫𞤴𞤣𞤭⹁ “𞤅𞤭 𞤦𞤫𞥅𞤤𞤮𞤤 𞤥𞤫𞤲 𞤲𞤺𞤮𞤤 𞤥𞤫𞤥𞥆𞤭𞤲𞤢𞤲𞤢𞥄𞤳𞤭 𞤲𞤣𞤫𞥅 𞤥𞤢𞤴𞤣𞤫 𞤮𞥅 𞤣𞤫𞤦𞥆𞤮 𞤨𞤢𞤤𞤫𞤧𞤼𞤭𞤲𞥆𞤢𞥄𞤶𞤮 𞤼𞤮𞥅𞤻𞤢𞥄𞤯𞤮 𞤥𞤮 𞤩𞤫𞥅 𞤳𞤮𞤲𞥆𞤮𞥅𞤩𞤫 𞤋𞤧𞤪𞤢𞥄𞤴𞤭𞥅𞤤𞤢 𞤱𞤢𞤪𞤭⹁ 𞤸𞤢𞤪𞤢𞤴 𞤸𞤢𞤲𞤣𞤫 𞤳𞤢𞤣𞤭⹁ 𞤸𞤢𞥄𞤤𞤢 𞤳𞤢𞤲 𞤢𞤤𞤢𞥄 𞤥𞤢𞥄𞤲𞤢𞥄”.
𞤌 𞤶𞤢𞤲𞤼𞤭𞤳𞤫 𞤱𞤮𞤲𞤣𞤫𞤥𞤢 𞤶𞤮𞤲𞤣𞤫 𞤸𞤭𞤱𞤢𞥄𞤪𞤫 𞤔𞤵𞤩𞥆𞤵𞤣𞤭 𞤘𞤫𞤲𞤯𞤭 𞤆𞤮𞤼𞥆𞤵𞤯𞤭 𞤼𞤢𞤦𞤭𞤲𞤼𞤭𞤲𞤢𞥄𞤤𞤭 𞤣𞤢𞤣𞤭𞤼𞤢𞥄𞤶𞤫 (résolutions) 𞤯𞤫𞤲 𞤣𞤮𞤱 𞤋𞤧𞤪𞤢𞥄𞤭𞥅𞤤𞤢. 𞤌 𞤤𞤢𞤲𞤣𞤭𞤼𞤭𞥅⹁ 𞤸𞤮𞤤 𞤳𞤮 𞤱𞤮𞤲𞤭 𞤲𞤢𞤬𞤮𞥅𞤪𞤫 𞤲𞤣𞤭𞥅 𞤔𞤵𞤩𞥆𞤵𞤣𞤭 𞤘𞤫𞤲𞤯𞤭 𞤆𞤮𞤼𞥆𞤵𞤯𞤭⹁ 𞤧𞤭 𞤨𞤫𞤱𞤶𞤫 𞤥𞤫𞤲 𞤯𞤫𞤲 𞤦𞤢𞤯𞤼𞤭𞤲𞤼𞤢𞥄 𞤫 𞤥𞤫𞤲؟ 𞤑𞤮 𞤸𞤮𞤲𞤼𞤮 𞤲𞤵𞤲𞤯𞤢𞤤 𞤲𞤺𞤢𞤤 𞤣𞤢𞤻𞤫𞤼𞤫𞥅؟
“𞤑𞤵𞤲𞤼𞤢𞤤 𞤲𞤺𞤢𞤤 𞤳𞤮 𞤶𞤮𞤯𞥆𞤭𞤲𞤺𞤮𞤤 𞤳𞤭𞤧𞤢𞤲 𞤤𞤢𞥄𞤥𞤵 𞤆𞤢𞤤𞤫𞤧𞤼𞤭𞥅𞤲 𞤲𞤺𞤵𞤲 𞤲𞤮 𞤲𞤫𞤱𞤮𞤪𞤭 𞤳𞤢𞤤𞤢. 𞤂𞤢𞤪𞤢𞤤 𞤣𞤭𞤥𞤢𞤤 𞤫 𞤳𞤫𞥅𞤪𞤭 𞤯𞤭𞤲 𞥑𞥙𞥖𞥗 𞤱𞤮𞤲𞤣𞤵𞤣𞤫 𞤫 𞤤𞤢𞥄𞤥𞤮𞤪𞤣𞤫 𞤱𞤮𞤲𞤣𞤫 𞤬𞤵𞤯𞤲𞤢𞥄𞤲𞤺𞤫 𞤔𞤫𞤪𞤵𞤧𞤢𞤤𞤫𞤥”. 𞤍𞤵𞤥 𞤱𞤮𞤲𞤭 𞤳𞤮 𞤌 𞤸𞤮𞤤𞥆𞤭.
𞤂𞤢𞥄𞤥𞤯𞤮 𞤚𞤵𞤪𞤳𞤭𞥅 𞤮𞤲 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤼𞤵𞤬𞤵𞤲𞤣𞤫 𞤑𞤢𞤧𞤥𞤭𞥅𞤪 𞤲𞤣𞤫𞤲 𞤲𞤮 𞤥𞤵𞥅𞤧𞤫𞥅𞤣𞤫 𞤬𞤢𞤴𞤣𞤢 𞤬𞤢𞤤𞥆𞤫𞤪𞤫 𞤥𞤢𞤱𞤲𞤣𞤫 𞤫 𞤸𞤮𞥅𞤪𞤫 𞤣𞤢𞤣𞤭𞤼𞤢𞥄𞤶𞤫 𞤶𞤮𞤲𞤣𞤫 𞤳𞤭𞤧𞤢𞤤 𞤘𞤫𞤲𞤯𞤭 𞤆𞤮𞤼𞥆𞤵𞤯𞤭 ( conseil de sécurité des nations unies). 𞤑𞤢𞤣𞤭⹁ 𞤮 𞤧𞤭𞤬𞤼𞤭𞤲𞤭𞥅 𞤦𞤢𞤯𞤼𞤢𞤲𞤫 𞤴𞤵𞤪𞤥𞤵𞤯𞤫 𞤯𞤫 𞤼𞤵𞥅𞤽𞤢𞤪𞤢𞤲𞤳𞤫𞥅𞤩𞤫 𞤈𞤮𞤸𞤭𞤲𞤶𞤢𞥄 𞤱𞤮𞤲𞤭 𞤫 𞤥𞤵𞤲.
𞤂𞤢𞥄𞤥𞤭𞤯𞤮 𞤼𞤵𞤪𞤳𞤭𞤲𞥆𞤢𞥄𞤩𞤫 𞤮𞤲 𞤬𞤮𞤣𞤭 𞤱𞤫𞥅𞤩𞤭𞤼𞤵𞤺𞤮𞤤 𞤳𞤵𞤥𞤨𞤭𞤼𞤫 𞤫 𞤬𞤫𞥅 𞤥𞤢𞤴𞤣𞤫 𞤸𞤫𞤧𞤤𞤮𞥅𞤱𞤮𞤅𞤢𞤱𞤵𞥅𞤣𞤭𞥅 𞤭𞤲𞥆𞤫𞤼𞤫𞥅𞤯𞤮 𞤔𞤢𞤥𞤢𞤤 𞤑𞤢𞥄𞤧𞤮𞤺𞤭𞥅. 𞤑𞤮 𞤮𞥅 𞤬𞤵𞤪𞤫𞥅 𞤥𞤵𞤥 𞤴𞤭𞥅𞤼𞤢𞤲𞤮𞥅 𞤳𞤢 𞤳𞤮𞤲𞤧𞤭𞤤𞤢𞥄 𞤅𞤢𞤱𞤵𞤣𞤭𞥅 𞤲𞤣𞤫𞤪 𞤋𞤧𞤼𞤢𞤲𞤦𞤵𞥅𞤤. 𞤑𞤮 𞤱𞤢 𞤲𞤮𞤲 𞤳𞤢𞤣𞤭⹁ 𞤫 𞤲𞤦𞤢𞥄𞤣𞤭 𞤥𞤢𞥄𞤴𞤣𞤫 𞤤𞤢𞥄𞤥𞤯𞤮 𞤃𞤭𞤧𞤪𞤢 𞤳𞤭𞤯𞥆𞤮 𞤮𞤲 𞤃𞤢𞤥𞥆𞤢𞤣𞤵 𞤃𞤮𞤪𞤧𞤭𞥅⹁ 𞤧𞤢𞤦𞤵 𞤥𞤢𞥄𞤴𞤣𞤫 𞤥𞤢𞤳𞥆𞤮 𞤲𞤣𞤫𞤲 𞤳𞤮 𞤥𞤢𞥄𞤴𞤣𞤫 𞤩𞤢𞤧𞤭𞤲𞤣𞤫.
𞤔𞤮𞤺𞤢𞤤 𞤲𞤵𞤳𞤭𞤤𞤫𞥅𞤪
𞤉 𞤬𞤮𞤲𞤺𞤮 𞤺𞤮𞥅⹁ 𞤉𞤪𞤣𞤮𞤺𞤢𞥄𞤲 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤣𞤮𞥅𞤤𞤫 𞤲𞤵𞤳𞤭𞤤𞤫𞥅𞤪 𞤯𞤫𞤲 𞤳𞤮 𞤴𞤮 𞤯𞤫 𞤣𞤵𞤽𞤢𞤲𞤫 𞤬𞤮𞤱 𞤱𞤢𞤤𞥆𞤢 𞤯𞤫 𞤼𞤮𞤽𞤢𞤲𞤫𞥅 𞤤𞤫𞤴𞤯𞤫 𞤯𞤫𞤲 𞤬𞤮𞤬⹁ 𞤫 𞤸𞤢𞥄𞤶𞤢𞤲𞤣𞤫. “𞤀𞤧𞤬𞤮𞤼𞤲𞤵𞤺𞤮𞤤” 𞤸𞤢𞤳𞥆𞤵𞤲𞤣𞤫 𞤤𞤫𞤴𞤯𞤫 𞤯𞤫𞤲 𞤫 𞤲𞤣𞤫𞥅 𞤼𞤮𞤩𞥆𞤫𞤪𞤫 𞤤𞤭𞥅𞤰𞤢𞤴 𞤬𞤵𞤳𞥆𞤭𞤲𞤢 𞤲𞤢𞤲𞤮𞤲’𞤣𞤭𞤪𞤢𞤤 𞤱𞤭𞤲𞤣𞤫𞤪𞤴𞤢𞤲𞤳𞤮𞤱𞤢𞤤 𞤲𞤺𞤢𞤤.
“𞤁𞤢𞤪𞤲𞤣𞤫 𞤥𞤢𞤳𞥆𞤮 𞤲𞤣𞤫𞤲 𞤫 𞤬𞤫𞥅 𞤣𞤮𞥅𞤤𞤫 𞤲𞤵𞤳𞤭𞤤𞤫𞥅𞤪⹁ 𞤳𞤮 𞤴𞤮 𞤼𞤮𞤽𞤢𞤲𞤫 𞤬𞤮𞤬 𞤱𞤢𞤤𞥆𞤢 𞤣𞤵𞤽𞤢𞤲𞤫𞥅 𞤬𞤮𞤨”⹁ 𞤳𞤮 𞤯𞤵𞤲 𞤱𞤮𞤲𞤭 𞤳𞤮 𞤮 𞤸𞤮𞤤𞥆𞤭 𞤳𞤢 𞤥𞤮𞥅𞤩𞤼𞤮𞤲’𞤣𞤭𞤪𞤢𞤤 𞤘𞤫𞤲𞤯𞤭 𞤆𞤮𞤼𞥆𞤵𞤯𞤭.
𞤑𞤮 𞤴𞤮𞤱𞤮𞤲𞤣𞤭𞤪𞤭 𞤫 𞤶𞤮𞤺𞤢𞤤𞤶𞤭 𞤥𞤵𞤲𞤷𞤢𞤴𞤯𞤭 𞤸𞤵𞥅𞤩𞤵𞤯𞤭⹁ ” 𞤮 𞤸𞤮𞤤𞥆𞤭𞥅: 𞤲𞤫𞤱𞤲𞤢 𞤲𞤮𞤲 𞤳𞤢𞤤𞤢 𞤤𞤫𞤴𞤣𞤭⹁ 𞤥𞤢𞥄𞤯𞤵𞤲 𞤼𞤮𞤽𞤢𞤲𞤮𞤲 𞤳𞤢𞤤𞤢 𞤤𞤫𞤴𞤣𞤭. 𞤍𞤮𞤲 𞤸𞤢𞤪𞤢𞤴 𞤫𞤤𞥆𞤢 𞤮𞤲 𞤻𞤢𞤱𞤲𞤣𞤭𞤪𞤢𞥄𞤥𞤢 𞤲𞤵𞤲𞤯𞤢𞤤”.
𞤉 𞤬𞤭𞥅 𞤲𞤶𞤵𞤩𞥆𞤵𞤣𞤭 𞤱𞤭𞤲𞤣𞤫𞤪𞤫𞤴𞤢𞤲𞤳𞤮𞥅𞤪𞤭 𞤲𞤣𞤭𞤲⹁ 𞤥𞤮𞥅𞤣𞤭 𞤉𞤪𞤣𞤮𞤺𞤢𞥄𞤲 𞤸𞤮𞤤𞥆𞤭𞥅: 𞤱𞤮𞤲𞤣𞤫 𞤬𞤭𞥅 𞤳𞤭𞤧𞤢𞤤 𞤲𞤺𞤢𞤤 𞤲𞤮 𞤸𞤢𞤼𞤮𞤲𞤶𞤭𞤲𞤭 𞤫 𞤬𞤫𞤱𞤲𞤭𞤼𞤫𞥅𞤣𞤫 𞤲𞤮 𞤼𞤫𞤲𞤼𞤭𞤪𞤭”⹁ 𞤮 𞤩𞤫𞤴𞤣𞤭 𞤳𞤢𞤣𞤭: ” 𞤃𞤫𞤲 𞤱𞤢𞤯𞤭𞥅 𞤥𞤮𞥅𞤣𞤭 𞤊𞤵𞤤𞤳𞤢𞤲 𞤄𞤮𞤶𞤳𞤫𞤪 𞤳𞤢 𞤢𞤪𞤣𞤢𞤺𞤮𞤤 𞤶𞤮𞥅𞤯𞤢𞤲𞤣𞤫 𞤲𞤦𞤢𞤼𞤭𞤪𞤣𞤵 𞤑𞤵𞥅𞤩𞤢𞤤 𞤘𞤫𞤲𞤯𞤭 𞤨𞤮𞤼𞥆𞤵𞤯𞤭.
𞤌𞤥𞤮 𞤼𞤢𞤥𞤰𞤭𞤲𞤭𞥅 𞤳𞤢𞤣𞤭 𞤳𞤢 𞤬𞤭𞤴𞤢𞥄𞤳𞤫 𞤋𞤪𞤢𞤲 𞤮𞤲 𞤴𞤫𞤱𞤼𞤭𞤪𞤢𞥄 𞤳𞤫𞤱𞤼𞤵𞤺𞤮𞤤 𞤥𞤢𞤤𞥆𞤢 𞤸𞤢𞤳𞥆𞤭𞤤 𞤫 𞤸𞤢𞤨𞥆𞤵 𞤲𞤺𞤵 𞤱𞤮𞤯𞥆𞤢𞥄.
𞤉 𞤳𞤵𞤯𞤮𞤤: 𞤢𞤦𞤣𞤵𞤪𞤢𞤸𞤥𞤢𞥄𞤲 𞤥𞤮 𞤣𞤢𞥄𞤱𞤵𞥅𞤣𞤢 𞤶𞤢𞤤𞥆𞤮𞤉𞤪𞤣𞤮𞤺𞤢𞤲.
𞤄𞤭𞤧𞤢𞥄𞤱/ 𞤺𞤭𞤲𞤫.
𞤙𞤢𞤤𞤲𞤣𞤫 𞥒𞥕 𞤧𞤭𞤤𞤼𞤮 𞥒𞥐𞥑𞥙.
𞤌𞤲 𞤶𞤢𞥄𞤪𞤢𞥄𞤥𞤢