𞤖𞤮𞤤 𞤲𞤮 𞤧𞤵𞤩𞤮𞤪𞤼𞤮𞤲 𞤺𞤫𞤲𞤣𞤭𞤪𞤢𞥄𞤱𞤮 𞤥𞤮𞤲 𞤮𞤲 ؟

𞤔𞤭𞤱𞤮 𞤧𞤭 𞤬𞤫𞤱𞤣𞤭𞤳𞤫 𞤶𞤮𞥅𞤥𞤦𞤫𞥅𞤣𞤫⹁ 𞤲𞤮 𞤸𞤢𞤧𞤭𞥅 𞤳𞤢 𞤱𞤮𞤪𞤩𞤫 𞤦𞤵𞤴 𞤬𞤢𞥄𞤤𞤫𞥅 𞤰𞤢𞤥𞤵𞤣𞤫 𞤥𞤮. 𞤑𞤮𞤲𞤮 𞤳𞤮 𞤢𞤪𞤣𞤭𞤲𞤺𞤮𞤤 𞤸𞤢𞤳𞥆𞤭𞤤⹁ 𞤢𞤲𞤣𞤢 𞤳𞤮 𞤸𞤮𞤥𞤦𞤮 𞤮𞤲𞤼𞤭𞤺𞤭 𞤸𞤢𞥄𞤲𞤭𞤣𞤭 𞤫 𞤥𞤵𞤲. 𞤁𞤫𞤱𞤺𞤢𞤤 𞤱𞤮𞤲𞤢𞥄 𞤬𞤭𞥅 𞤻𞤢𞤤𞤲𞤣𞤫 𞤨𞤫𞥅𞤪𞤢 𞤥𞤢𞤤𞥆𞤢 𞤦𞤭𞤥𞤦𞤭 𞤨𞤫𞥅𞤪𞤢 𞤼𞤵𞤲. 𞤑𞤮 𞤬𞤭𞥅 𞤲𞤺𞤵𞥅𞤪𞤣𞤢𞤥. 𞤖𞤢𞤪𞤢𞤴 𞤳𞤮 𞤶𞤮𞤪𞤼𞤢𞥄⹁ 𞤥𞤮 𞤮𞤲𞤼𞤭𞤺𞤭 𞤪𞤫𞤧𞤭𞤲’𞤣𞤭𞤪𞤼𞤢 𞤮𞤲 𞤫 𞤥𞤵𞤲⹁ 𞤳𞤮 𞤥𞤮 𞤮𞤲𞤼𞤭𞤺𞤭 𞤱𞤢𞥄𞤱𞤢𞤼𞤢 𞤱𞤮𞤲𞤣𞤵𞤣𞤫 𞤫 𞤥𞤵𞤲 𞤦𞤭𞤲𞥆𞤢𞤥𞤢𞥄 𞤲𞤮 𞤱𞤵𞥅𞤪𞤭. 

𞤑𞤮 𞤢𞤣𞤭𞥅 𞤳𞤮𞤲⹁ 𞤱𞤮𞤼𞤢 𞤶𞤢𞤱𞤣𞤭⹁ 𞤥𞤢𞥄 𞤣𞤢𞤪𞤲𞤣𞤫⹁ 𞤥𞤢𞥄 𞤽𞤢𞤪𞤭 𞤱𞤮𞤲𞤵 𞤳𞤮 𞤣𞤫𞤦𞥆𞤮 𞤮𞤲 𞤩𞤵𞤪𞤭 𞤫 𞤼𞤫𞤲𞤼𞤭𞤲𞤣𞤫 𞤳𞤢 𞤧𞤵𞤩𞤢𞤺𞤮𞤤 𞤺𞤫𞤲𞤣𞤮 𞤸𞤢𞤳𞥆𞤮. 𞤅𞤢𞤦𞤵 𞤯𞤭𞥅 𞤬𞤮𞤬 𞤲𞤮 𞤤𞤢𞤲𞥆𞤢 𞤥𞤢𞤤𞥆𞤢 𞤴𞤫𞥅𞤦𞤮𞥅⹁ 𞤺𞤮𞤪𞤳𞤮 𞤮𞤲 𞤫 𞤣𞤫𞤦𞥆𞤮 𞤮𞤲 𞤤𞤵𞤼𞥆𞤭𞤣𞤢 𞤧𞤮 𞤼𞤢𞤱𞤭𞥅 𞤺𞤭𞤯𞤺𞤮𞤤⹁ 𞤫 𞤼𞤫𞤣𞥆𞤵𞤲’𞤺𞤢𞤤 𞤫 𞤩𞤵𞤼𞥆𞤵 𞤩𞤫𞤪𞤲𞤣𞤫 𞤲𞤮 𞤸𞤫𞤣𞥆𞤭𞥅.

𞤖𞤢𞤪𞤢𞤴 𞤲𞤮 𞤯𞤮𞥅⹁ 𞤼𞤮𞤩𞥆𞤫 𞤶𞤮𞤱𞤭 𞤯𞤫 𞤣𞤫𞤦𞥆𞤮 𞤸𞤢𞥄𞤲𞤭 𞤱𞤢𞤯𞤼𞤢𞤲𞤣𞤫 𞤸𞤭𞤤𞤲𞤢 𞤫 𞤥𞤵𞤲. 𞤖𞤢𞤴 𞤺𞤮𞤪𞤳𞤮 𞤲𞤮 𞤸𞤢𞥄𞤲𞤭 𞤲𞤣𞤢𞤪𞤼𞤢𞤲𞤣𞤫 𞤯𞤫𞥅 𞤼𞤮𞤩𞥆𞤫 𞤲𞤣𞤫 𞤮𞤥𞤮 𞤰𞤢𞤥𞤢 𞤣𞤫𞤦𞥆𞤮. 𞤍𞤫𞤲 𞤼𞤮𞤩𞥆𞤫⹁ 𞤳𞤮:

𞥑- 𞤚𞤭𞥅𞤯𞤲𞤢𞥄𞤪𞤫 𞤺𞤮𞤪𞤳𞤮 𞤮𞤲 𞤳𞤢 𞤣𞤭𞤲𞤢𞥄

𞤅𞤭 𞤣𞤫𞤦𞥆𞤮 𞤮𞤲 𞤧𞤵𞤩𞤮𞤪𞤭𞥅 𞤺𞤫𞤲𞤣𞤭𞤪𞤢𞥄𞤱𞤮 𞤥𞤵𞤲 𞤮𞤲⹁ 𞤧𞤢𞤦𞤵 𞤼𞤭𞥅𞤯𞤲𞤢𞥄𞤪𞤫 𞤮𞤲𞤼𞤭𞤺𞤭 𞤲𞤣𞤫𞤲 𞤳𞤢 𞤣𞤭𞥅𞤲𞤢⹁ 𞤸𞤢𞤪𞤢𞤴 𞤸𞤮 𞤧𞤵𞤩𞤢𞤲𞤭𞥅 𞤩𞤭𞤯𞤩𞤫 𞤸𞤢𞤳𞥆𞤮 𞤩𞤫𞤲 𞤥𞤮𞤰𞥆𞤫𞤪𞤫 𞤸𞤢𞤲𞤣𞤫 𞤫 𞤶𞤢𞤲𞤺𞤮. 𞤅𞤭 𞤼𞤢𞤱𞤭𞥅 𞤺𞤮𞤪𞤳𞤮 𞤮𞤲 𞤳𞤮 𞤸𞤵𞤤𞤮𞥅𞤱𞤮 𞤀𞤤𞤤𞤢⹁ 𞤮 𞤪𞤫𞥅𞤲𞤮𞤼𞤮 𞤫 𞤦𞤮𞤢𞤲𞤢𞤺𞤮𞤤 𞤳𞤢𞤻𞤵𞤲 𞤫 𞤼𞤢𞤥𞤨𞤭𞤲𞤺𞤮𞤤 𞤣𞤫𞤦𞥆𞤮 𞤮𞤲 𞤳𞤢 𞤣𞤫𞤱𞤺𞤢𞤤 𞤥𞤢𞤩𞥆𞤫. 𞤌 𞤴𞤭𞤯𞤭𞤪𞤢𞤴 𞤥𞤮 𞤬𞤭𞥅 𞤀𞤤𞤤𞤢. 𞤐𞤮 𞤸𞤢𞤧𞥆𞤭 𞤳𞤢𞤣𞤭 𞤲𞤣𞤫 𞤮 𞤱𞤢𞤤𞥆𞤭𞤪𞤢 𞤥𞤮⹁ 𞤲𞤮 𞤸𞤮 𞤧𞤫𞤥𞤦𞤭𞤪𞤢𞥄 𞤳𞤢 𞤣𞤭𞤲𞤢𞥄. 𞤅𞤭 𞤼𞤢𞤱𞤭𞥅 𞤣𞤫𞤦𞥆𞤮 𞤮𞤲 𞤥𞤵𞥅𞤼𞤢𞥄𞤳𞤭 𞤫 𞤺𞤣𞤢𞤲𞤣𞤢𞤤⹁ 𞤺𞤮𞤪𞤳𞤮 𞤮𞤲 𞤱𞤢𞤤𞥆𞤢𞤴 𞤥𞤮 𞤲𞤮 𞤸𞤮 𞤶𞤢𞤲𞤺𞤭𞤪𞤢 𞤥𞤢𞥄 𞤲𞤮 𞤸𞤮 𞤩𞤫𞤴𞤣𞤮𞤪𞤢 𞤬𞤢𞤸𞤥𞤵𞤺𞤮𞤲𞤤 𞤣𞤭𞥅𞤲𞤢 𞤳𞤢𞤲.

𞥒- 𞤘𞤮𞤪𞤳𞤮 𞤴𞤵𞤪𞤥𞤫𞤼𞤫𞥅𞤯𞤮

𞤘𞤮𞤪𞤳𞤮 𞤴𞤵𞤪𞤥𞤫𞤼𞤫𞥅𞤯𞤮 𞤩𞤫𞤴𞤲𞤺𞤵 𞤥𞤵𞤲 𞤸𞤵𞤤𞤢𞤴 𞤼𞤮𞥅𞤻𞤵𞤺𞤮𞤤 𞤥𞤢𞤤𞥆𞤢 𞤶𞤢𞤲𞤬𞤢𞤺𞤮𞤤 𞤥𞤮. 𞤌 𞤢𞤷𞥆𞤢𞤼𞤢𞥄 𞤩𞤫𞤴𞤺𞤵 𞤥𞤢𞤳𞥆𞤮 𞤫 𞤱𞤵𞤤𞤢𞥄⹁ 𞤫 𞤩𞤭𞤯𞤼𞤢𞥄𞤪𞤫 𞤥𞤢𞥄 𞤼𞤭𞤤𞤬𞤢𞥄𞤪𞤫. 𞤌 𞤱𞤢𞤤𞥆𞤭𞤼𞤮𞤼𞤮 𞤩𞤫𞤴𞤺𞤵 𞤥𞤢𞤳𞥆𞤮 𞤲𞤮 𞤸𞤮𞤲 𞤶𞤮𞤳𞥆𞤭𞤪𞤢 𞤳𞤮 𞤸𞤮 𞤴𞤭𞤯𞤭. 𞤌 𞤱𞤢𞤤𞥆𞤭𞤼𞤮𞤼𞤮 𞤥𞤮 𞤳𞤢𞤣𞤭 𞤳𞤢 𞤧𞤵𞥅𞤣𞤵 𞤫 𞤣𞤢𞤲𞤳𞤢𞤺𞤮𞤤 𞤬𞤢𞤴𞤩𞤫 𞤩𞤫𞤲⹁ 𞤳𞤢𞤻𞤵𞤲 𞤫 𞤸𞤫𞤩𞥆𞤭𞤼𞤢𞤺𞤮𞤤 𞤬𞤭𞤴𞤢𞤳𞤵𞥅𞤶𞤭 𞤲𞤣𞤫𞤪 𞤧𞤵𞥅𞤣𞤵. 𞤘𞤮𞤪𞤳𞤮 𞤴𞤵𞤪𞤥𞤫𞤼𞤫𞥅𞤯𞤮⹁ 𞤱𞤮𞤲𞤢𞥄 𞤸𞤵𞤲𞤰𞤵𞤯𞤮⹁ 𞤸𞤮𞥅𞤤𞤮𞤪𞤯𞤮 𞤨𞤭𞤺𞥆𞤢𞤤. 𞤅𞤭 𞤼𞤢𞤱𞤭𞥅 𞤮𞤥𞤮 𞤴𞤵𞤪𞤥𞤫𞥅⹁ 𞤮𞤥𞤮 𞤪𞤫𞥅𞤲𞤮𞥅 𞤫 𞤤𞤫𞤼𞥆𞤵𞤺𞤮𞤤 𞤸𞤢𞤴 𞤳𞤮𞤤𞥆𞤫 𞤯𞤫𞤲⹁ 𞤮𞤲 𞤯𞤮𞤲 𞤪𞤫𞥅𞤲𞤮𞤼𞤮𞥅 𞤫 𞤤𞤫𞤼𞥆𞤵𞤺𞤮𞤤 𞤩𞤫𞤴𞤲𞤺𞤵𞥅𞤪𞤫 𞤥𞤵𞤲 𞤲𞤣𞤫𞤲.

𞥓- 𞤷𞤵𞥅𞤷𞤢𞤤 𞤫 𞤱𞤵𞥅𞤪𞤵𞤺𞤮𞤤 𞤩𞤫𞤪𞤲𞤣𞤫

𞤘𞤮𞤪𞤳𞤮 𞤧𞤵𞥅𞤧𞤵𞤯𞤮⹁ 𞤱𞤵𞥅𞤪𞤵𞤯𞤮 𞤩𞤫𞤪𞤲𞤣𞤫⹁ 𞤱𞤢𞤯𞤢𞤴 𞤳𞤢𞤤𞤢 𞤳𞤮 𞤮 𞤸𞤢𞥄𞤲𞤭 𞤱𞤢𞤯𞤵𞤣𞤫 𞤲𞤮 𞤮 𞤣𞤢𞤲𞤳𞤮𞤪𞤢 𞤩𞤫𞤴𞤺𞤵𞥅𞤪𞤫 𞤥𞤢𞤳𞥆𞤮 𞤲𞤣𞤫𞤲. 𞤌 𞤢𞤷𞥆𞤢𞤼𞤢𞥄 𞤳𞤢𞤣𞤭 𞤳𞤮 𞤦𞤮𞤲𞤭 𞤥𞤢𞥄 𞤴𞤢𞤱𞤪𞤫 𞤸𞤫𞤩𞤢 𞤩𞤫𞤴𞤲𞤺𞤵𞥅𞤪𞤫 𞤥𞤢𞤳𞥆𞤮 𞤲𞤣𞤫𞤲. 𞤘𞤮𞥅𞤪𞤳𞤮 𞤷𞤵𞥅𞤷𞤮⹁ 𞤱𞤵𞥅𞤪𞤵𞤯𞤮 𞤩𞤫𞤪𞤲𞤣𞤫⹁  𞤸𞤭𞤳𞥆𞤭𞤲𞤢𞤴 𞤩𞤫𞤴𞤲𞤺𞤵𞥅𞤪𞤫 𞤥𞤵𞤲 𞤲𞤣𞤫𞤲 𞤴𞤫𞥅𞤧𞤮 𞤸𞤢𞤴 𞤧𞤭 𞤱𞤫𞤤𞤣𞤭𞥅𞤩𞥆𞤫 𞤥𞤢𞤳𞥆𞤮 𞤩𞤫𞤲𞤶𞤢𞤤𞤳𞤭𞤼𞤭𞤪𞤢𞤴 𞤥𞤮 𞤯𞤵𞤲. 𞤐𞤮 𞤱𞤮𞥅𞤣𞤭 𞤱𞤮𞥅𞤪𞤩𞤫 𞤩𞤫 𞤲𞤺𞤮𞤪𞤺𞤵 𞤥𞤵𞤲 𞤬𞤫𞥅𞤻𞤢𞤼𞤢𞥄 𞤴𞤢𞥄𞤧𞤭. 𞤇𞤫 𞤸𞤮𞤤𞥆𞤭𞥅 𞤲𞤺𞤵𞤪𞤺𞤵 𞤥𞤢𞤩𞥆𞤫 𞤲𞤺𞤵𞤲 𞤱𞤮𞥅⹁ 𞤫 𞤩𞤫𞤴𞤺𞤵𞥅𞤪𞤫 𞤥𞤢𞤩𞥆𞤫 𞤲𞤣𞤫𞤲. 𞤁𞤫𞤦𞥆𞤮 𞤲𞤮 𞤸𞤢𞥄𞤲𞤭 𞤪𞤫𞤲𞤢𞥄𞤣𞤫 𞤫 𞤩𞤫𞤲 𞤸𞤢𞤴 𞤧𞤭 𞤼𞤢𞤱𞤭𞥅 𞤫𞤩𞤫 𞤥𞤢𞤪𞤭 𞤶𞤢𞤱𞤣𞤭 𞤫 𞤣𞤢𞤪𞤲𞤣𞤫.    

𞥔- 𞤂𞤢𞥄𞤩𞤢𞤤 𞤲𞤮𞤳𞥆𞤵 𞤫 𞤤𞤢𞥄𞤩𞤢𞤤 𞤪𞤫𞥅𞤣𞤵

𞤘𞤮𞤪𞤳𞤮 𞤴𞤭𞤯𞤮𞤯𞤮 𞤤𞤢𞥄𞤩𞤢𞤤⹁ 𞤧𞤵𞤩𞤢𞤴 𞤳𞤢 𞤸𞤮𞤯𞤲𞤢 𞤩𞤫𞤴𞤲𞤺𞤵𞥅𞤪𞤫 𞤥𞤵𞤲. 𞤘𞤮𞤪𞤳𞤮 𞤤𞤢𞥄𞤩𞤵𞤯𞤮 𞤳𞤢𞤣𞤭 𞤱𞤢𞤯𞤼𞤢𞤲𞤢𞤴 𞤸𞤭𞥅𞤤𞤢 𞤫 𞤳𞤮𞤤𞤼𞤵 𞤳𞤢𞤻𞤵𞤲 𞤫 𞤻𞤢𞥄𞤥𞤣𞤵 𞤩𞤫𞤴𞤲𞤺𞤮𞥅𞤪𞤫 𞤥𞤢𞤳𞥆𞤮. 𞤌 𞤺𞤫𞤪𞤢𞤴 𞤲𞤮 𞤩𞤫 𞤸𞤮𞤯𞤭𞤪𞤢 𞤳𞤢 𞤤𞤢𞥄𞤩𞤭⹁ 𞤩𞤫 𞤩𞤮𞤪𞤲𞤮𞥅 𞤳𞤮 𞤤𞤢𞥄𞤩𞤭⹁ 𞤩𞤫 𞤻𞤢𞥄𞤥𞤢𞥄 𞤳𞤮 𞤤𞤢𞥄𞤩𞤭⹁ 𞤸𞤢𞤴 𞤧𞤭 𞤼𞤢𞤱𞤭𞥅 𞤮 𞤴𞤢𞥄𞤶𞤢𞥄 𞤬𞤫𞤸𞤪𞤫. 

𞤘𞤮𞤪𞤳𞤮 𞤤𞤢𞥄𞤩𞤵𞤯𞤮 𞤪𞤫𞥅𞤣𞤵 𞤪𞤫𞥅𞤲𞤮𞤼𞤮𞥅 𞤫 𞤬𞤫𞤲𞤢𞥄𞤲𞤣𞤫. 𞤌 𞤸𞤢𞤤𞤬𞤭𞤲𞤮𞤼𞤮 𞤳𞤢𞤣𞤭 𞤫 𞤩𞤫𞤴𞤲𞤺𞤵𞥅𞤪𞤫 𞤥𞤢𞤳𞥆𞤮 𞤲𞤣𞤫𞤲⹁ 𞤮 𞤸𞤢𞥄𞤤𞤢 𞤺𞤮𞥅𞤲𞤺𞤢. 𞤌 𞤢𞤻𞤢𞤲𞤼𞤢𞥄𞤩𞤫 𞤳𞤢𞤣𞤭.  𞤑𞤮 𞤢𞤲𞤣𞤵𞤯𞤮 𞤱𞤮𞤲𞤣𞤫 𞤶𞤢𞤱𞤣𞤭 𞤳𞤮 𞤣𞤢𞤲𞤳𞤮𞤪𞤯𞤵𞤲 𞤩𞤫𞤴𞤲𞤺𞤵𞥅𞤪𞤫 𞤥𞤵𞤲⹁ 𞤱𞤮𞤲𞤢𞥄 𞤴𞤢𞤲𞤺𞤭𞤪𞤯𞤵𞤲 𞤩𞤫𞤴𞤲𞤺𞤵𞥅𞤪𞤫 𞤥𞤵𞤲. 𞤘𞤮𞤪𞤳𞤮 𞤤𞤢𞥄𞤩𞤵𞤯𞤮 𞤪𞤫𞥅𞤣𞤵 𞤳𞤢𞤣𞤭⹁ 𞤳𞤮 𞤥𞤢𞤪𞤮𞥅𞤱𞤮 𞤺𞤵𞤲𞤣𞤮𞥅 𞤩𞤫𞤴𞤲𞤺𞤵𞥅𞤪𞤫 𞤥𞤢𞤳𞥆𞤮⹁ 𞤸𞤢𞤪𞤢 𞤮 𞤱𞤭𞤪𞤼𞤭𞤼𞤢𞥄𞤳𞤭 𞤫 𞤶𞤢𞤲𞤢𞤲𞤩𞤫 𞤩𞤫𞤲 𞤥𞤢𞥄 𞤮 𞤱𞤭𞤪𞤼𞤢 𞤩𞤫𞤴𞤲𞤺𞤵𞥅𞤪𞤫 𞤥𞤢𞤳𞥆𞤮 𞤲𞤣𞤫𞤲 𞤫 𞤥𞤢𞤩𞥆𞤫. 𞤅𞤭 𞤩𞤫𞤴𞤲𞤺𞤵 𞤥𞤢𞤳𞥆𞤮 𞤸𞤢𞤤𞤬𞤭𞤲𞤭𞤳𞤫 𞤫 𞤥𞤢𞤳𞥆𞤮⹁ 𞤮 𞤥𞤢𞤪𞤢𞤴⹁ 𞤮 𞤶𞤢𞤲𞤬𞤮𞤼𞤢𞥄𞤳𞤮 𞤥𞤮. 𞤅𞤭 𞤮 𞤬𞤮𞤣𞤭𞥅 𞤳𞤢𞤣𞤭⹁ 𞤮 𞤸𞤵𞤩𞤲𞤢𞤴. 𞤅𞤭 𞤣𞤫𞤦𞥆𞤮 𞤴𞤫𞤱𞤼𞤭𞤣𞤭𞥅 𞤫 𞤺𞤮𞤪𞤳𞤮 𞤢𞤴𞤦𞤭𞤲𞤢𞤴 𞤯𞤮 𞤴𞤭𞤥𞤩𞤫 𞤩𞤵𞤥⹁ 𞤥𞤢𞤤𞥆𞤢 𞤱𞤫𞤤𞤣𞤭𞥅𞤩𞤫 𞤥𞤵𞤲⹁ 𞤱𞤭𞤪𞤼𞤢 𞤩𞤫 𞤫 𞤮𞤲𞤼𞤭𞤺𞤭⹁ 𞤸𞤢𞤪𞤢𞤴 𞤣𞤫𞤦𞥆𞤮 𞤮𞤲 𞤴𞤮 𞤮 𞤢𞤲𞤣𞤵 𞤱𞤮𞤲𞤣𞤫 𞤮𞤲 𞤺𞤮𞤪𞤳𞤮 𞤢𞤤𞤣𞤢𞥄 𞤫 𞤸𞤮𞥅𞤤𞤢𞥄𞤪𞤫.

𞥕- 𞤶𞤮𞤺𞤢𞤺𞤮𞤤 𞤼𞤫𞤣𞥆𞤵𞤲’𞤺𞤢𞤤 𞤫 𞤥𞤮𞤰𞥆𞤫𞤪𞤫 𞤲𞤺𞤭𞤳𞥆𞤵

 𞤅𞤭 𞤺𞤮𞤪𞤳𞤮 𞤲𞤮 𞤱𞤮𞤲𞤣𞤭 𞤫 𞤼𞤫𞤣𞥆𞤵𞤲’𞤺𞤢𞤤⹁ 𞤮 𞤴𞤫𞤲𞥆𞤢𞤼𞤢𞥄 𞤥𞤢⹁ 𞤮 𞤨𞤭𞤴𞤢𞤼𞤢𞥄 𞤥𞤢⹁ 𞤮 𞤸𞤫𞤪𞤧𞤭𞤲𞤼𞤢𞥄𞤥𞤢 𞤳𞤢𞤣𞤭⹁ 𞤼𞤫𞤲𞤼𞤭𞤲𞤭𞥅 𞤴𞤫𞥅𞤧𞤮 𞤶𞤢𞤲𞤢𞤲𞤩𞤫 𞤩𞤫𞤲 𞤥𞤢𞥄 𞤴𞤫𞥅𞤧𞤮 𞤩𞤭𞤯𞤩𞤫 𞤥𞤢𞥄 𞤩𞤫𞤲.  𞤌 𞤼𞤫𞤣𞥆𞤭𞤲𞤢𞤴 𞤥𞤢𞤱𞤩𞤫 𞤥𞤢𞥄 𞤩𞤫𞤲⹁ 𞤱𞤢𞤲𞤮 𞤮 𞤼𞤫𞤣𞥆𞤭𞤲𞤭𞤪𞤭 𞤲𞤮𞤲 𞤥𞤢𞤱𞤩𞤫 𞤥𞤢𞤳𞥆𞤮 𞤩𞤫𞤲. 𞤙𞤢𞤤𞤲𞤣𞤫 𞤺𞤮𞥅 𞤲𞤫𞥅𞤲𞤭𞤪𞤢𞥄𞤸𞤮 𞤢𞤲 𞤴𞤫𞥅𞤼𞤭𞤲𞤮 𞤤𞤢𞤲⹁ 𞤱𞤮𞤲𞤣𞤫 𞤧𞤭 𞤥𞤭𞤯𞤮 𞤬𞤢𞥄𞤤𞤢𞥄 𞤢𞤲𞤣𞤵𞤣𞤫 𞤲𞤮 𞤺𞤮𞤪𞤳𞤮 𞤣𞤢𞤲𞤳𞤮𞤪𞤮𞤴𞤼𞤮𞥅 𞤤𞤢𞤲⹁ 𞤴𞤮 𞤥𞤭 𞤲𞤣𞤢𞥄𞤪𞤵 𞤲𞤮 𞤮 𞤶𞤮𞤺𞤮𞤪𞤭 𞤴𞤵𞤥𞥆𞤢 𞤥𞤢𞤳𞥆𞤮 𞤥𞤢𞤤𞥆𞤢 𞤦𞤢𞤲𞤣𞤭𞤪𞤢𞥄𞤩𞤫 𞤥𞤢𞤳𞥆𞤮 𞤪𞤫𞤱𞤩𞤫 𞤩𞤫𞤲. 𞤘𞤮𞤪𞤳𞤮 𞤱𞤮𞤲𞤣𞤵𞤯𞤮 𞤫 𞤼𞤫𞤣𞥆𞤵𞤲’𞤺𞤢𞤤 𞤲𞤮 𞤸𞤫𞤼𞥆𞤢𞤲𞤭𞥅 𞤩𞤫𞤴𞤲𞤺𞤵𞥅𞤪𞤫 𞤥𞤵𞤲 𞤲𞤣𞤫𞤲⹁ 𞤮𞤥𞤮 𞤥𞤢𞤪𞤢𞤲𞤭 𞤩𞤫 𞤧𞤢𞥄𞤭 𞤥𞤢𞤤𞥆𞤢 𞤸𞤢𞤨𞥆𞤵. 𞤘𞤮𞤪𞤳𞤮 𞤼𞤫𞤣𞥆𞤭𞤲𞤯𞤮 𞤩𞤫𞤴𞤲𞤺𞤵 𞤥𞤵𞤲⹁ 𞤱𞤫𞤤𞤧𞤭𞤲’𞤣𞤮𞤼𞤢𞥄𞤳𞤮 𞤫 𞤥𞤢𞤳𞥆𞤮⹁ 𞤮 𞤸𞤫𞤯𞤮𞤼𞤮 𞤥𞤮⹁ 𞤮 𞤱𞤢𞤯𞤢 𞤸𞤢𞤳𞥆𞤭𞤤 𞤫 𞤮𞤲𞤼𞤭𞤺𞤭.

𞤅𞤭 𞤣𞤫𞤦𞥆𞤮 𞤸𞤢𞤱𞤪𞤮𞤣𞤭𞤪𞤭𞥅 𞤫 𞤺𞤮𞤪𞤳𞤮 𞤱𞤮𞤲𞤣𞤵𞤯𞤮 𞤫 𞤯𞤭𞥅 𞤺𞤭𞤳𞥆𞤵𞥅𞤶𞤭⹁ 𞤸𞤢𞤪𞤢𞤴 𞤱𞤮𞤼𞤢 𞤸𞤮 𞤢𞤷𞥆𞤵 𞤥𞤮. 𞤅𞤢𞤦𞤵 𞤳𞤮 𞤀𞤤𞤤𞤢 𞤼𞤢𞤲 𞤫 𞤲𞤦𞤢𞤱𞤳𞤭 𞤥𞤵𞤲 𞤱𞤢𞥄𞤱𞤢𞤼𞤢 𞤸𞤢𞤱𞤪𞤭𞤲𞤣𞤭𞤲𞤣𞤫 𞤮𞤲𞤼𞤭𞤺𞤭 𞤫 𞤺𞤮𞤪𞤳𞤮 𞤱𞤮𞤲𞤣𞤵𞤯𞤮 𞤫 𞤯𞤭𞥅 𞤧𞤭𞤬𞤢𞥄𞤶𞤭.

𞤁𞤫𞤦𞥆𞤮 𞤮𞤲 𞤴𞤮 𞤢𞤲𞤣𞤵⹁ 𞤳𞤢𞤲𞤳𞤮 𞤳𞤢𞤣𞤭⹁ 𞤸𞤮𞤥𞤮 𞤼𞤭𞤶𞥆𞤮𞤪𞤢𞥄 𞤲𞤺𞤭𞤳𞥆𞤵𞥅𞤤𞤭 𞤥𞤮𞤰𞥆𞤭. 𞤒𞤮 𞤸𞤮 𞤼𞤭𞥅𞤯𞤭𞤲𞤮𞤪 𞤸𞤫𞤯𞤭𞤼𞤢𞤺𞤮𞤤 𞤴𞤵𞤥𞥆𞤢 𞤸𞤢𞤳𞥆𞤮⹁ 𞤧𞤢𞤦𞤵 𞤩𞤫𞤲 𞤲𞤮 𞤢𞤲𞤣𞤭 𞤨𞤭𞥅𞤶𞤭 𞤸𞤫𞥅𞤱𞤵𞤯𞤭 𞤳𞤮 𞤶𞤭𞤱𞤮 𞤥𞤮 𞤶𞤮𞤥𞤦𞤢𞥄𞤳𞤢 𞤼𞤢𞤸𞤮 𞤢𞤲𞤣𞤢𞥄. 𞤐𞤣𞤫 𞤼𞤢𞤱𞤵𞤲𞤮𞥅 𞤳𞤢𞤣𞤭⹁ 𞤢𞤤𞤢𞥄 𞤩𞤵𞤪𞤯𞤮 𞤬𞤢𞤤𞤢𞤲𞤫𞥅𞤣𞤫 𞤶𞤭𞤱𞤮 𞤣𞤫𞤱𞤺𞤢𞤤 𞤥𞤮𞤰𞥆𞤢𞤤  𞤸𞤫𞤱𞤼𞤭 𞤴𞤵𞤥𞥆𞤢 𞤮𞤲𞤼𞤭𞤺𞤭.

𞤒𞤮 𞤘𞤫𞤲𞤮 𞤮𞤲 𞤪𞤮𞤳𞥆𞤵 𞤳𞤢𞤤𞤢 𞤣𞤫𞤱𞤺𞤢𞤤 𞤥𞤮𞤰𞥆𞤢𞤤⹁ 𞤱𞤮𞤲𞤣𞤵𞤲’𞤺𞤢𞤤 𞤫 𞤲𞤢𞤬𞤢 𞤫 𞤩𞤵𞤼𞥆𞤵 𞤩𞤫𞤪𞤲𞤣𞤫.

𞤑𞤵𞤯𞤮𞤤: 𞤀𞤴𞥃𞤢 𞤅𞤮𞥅