𞤀𞤐𞤁𞤋𞤐𞤌𞥅𞤏𞤌 𞤐𞤌 𞤅𞤌𞤑𞥆𞤀𞥄 𞤊𞤋𞥅 𞤌𞤃𞤌 𞤛𞤋𞤙𞤋 𞤔𞤓𞤐𞥆𞤋𞤚𞤀𞤂 𞤃𞤀𞤂𞤋 𞤐𞤘𞤀𞤂

𞤀𞤲𞤣𞤭𞤲𞤮𞥅𞤱𞤮 𞤬𞤢𞤺𞥆𞤵𞤣𞤵𞤴𞤢𞤲𞤳𞤫𞥅𞤶𞤮 𞤼𞤫𞤣𞥆𞤵𞤯𞤮 𞤥𞤮 𞤤𞤫𞤧𞤣𞤭 𞤃𞤢𞤤𞤭⹁ 𞤲𞤮 𞤬𞤢𞤱𞤢𞥄 𞤧𞤮𞤳𞤫𞥅𞤣𞤫 𞤣𞤵𞥅𞤩𞤭 𞤯𞤭𞤯𞤭⹁ 𞤱𞤮𞤲𞤣𞤵𞤣𞤫 𞤫 𞤱𞤮𞥅𞤼𞤵𞤪𞤵 𞤴𞤢𞥄𞤬𞤫𞤼𞤫𞥅𞤲𞤣𞤵⹁ 𞤧𞤢𞤦𞤵 𞤮𞤥𞤮 𞤸𞤭𞥅𞤻𞤭 𞤶𞤵𞤲𞥆𞤭𞤼𞤢𞤤 𞤳𞤮𞤲𞤵𞤲𞤳𞤮𞤱𞤢𞤤 𞤲𞤺𞤢𞤤. 𞤖𞤮𞥅𞤪𞤫 𞤯𞤵𞤲 𞤳𞤢𞤣𞤭⹁ 𞤉𞤼𞤭𞤴𞤫𞥅𞤲 𞤊𞤢𞤳𞤢𞤦𞤢𞥄 𞤅𞤭𞥅𞤧𞤮𞤳𞤮⹁ 𞤳𞤮 𞤲𞤮𞤲 𞤮 𞤭𞤲𞥆𞤫𞤼𞤫𞥅⹁ 𞤮 𞤴𞤢𞤥𞤭𞤪𞤢𞥄𞤥𞤢 𞤳𞤢𞤣𞤭 𞤴𞤮𞤩𞤵𞤺𞤮𞤤 𞤸𞤢𞤶𞤢𞤥𞤫 (𞤣𞤵𞤦𞤵𞤲𞤫) 𞤼𞤢𞤼𞤭 𞤅𞤫𞥅𞤊𞤀.

𞤌𞥅 𞤶𞤢𞥄𞤩𞤭𞤴𞤢𞤲𞤳𞤫𞥅𞤶𞤮 𞤥𞤮 𞤣𞤵𞥅𞤩𞤭 𞥔𞥑 𞤧𞤮𞤳𞤢𞥄𞤯𞤮 𞤺𞤭𞤦𞤭 𞤐𞤦𞤮𞥅𞤴𞤮 𞤲𞤮 𞤬𞤢𞤱𞤢𞥄 𞤧𞤢𞥄𞤳𞤭𞤼𞤵𞤺𞤮𞤤 𞤳𞤵𞤥𞤨𞤭𞤼𞤫 𞤬𞤫𞤬𞤭𞤲𞥋𞤣𞤢𞥄𞤯𞤫 𞤬𞤭𞥅 𞤢𞤴𞤦𞤭𞤲𞤺𞤮𞤤 𞤫 𞤦𞤮𞤲𞥆𞤵𞤺𞤮𞤤 𞤭𞤲𞤣𞤫 𞤤𞤢𞥄𞤥𞤵 𞤲𞤺𞤵𞤲. 𞤍𞤫𞥅 𞤨𞤢𞤱𞤫 𞤲𞤮 𞤸𞤵𞤥𞤮𞥅𞤲𞥋𞤣𞤭𞤪𞤭 𞤫 𞤣𞤫𞤬𞤼𞤫𞤪𞤫 𞤲𞤣𞤫 𞤮 𞤴𞤢𞤤𞤼𞤭𞤲𞤭 𞤪𞤮𞤱𞤢𞤲𞤭. 𞤆𞤢𞤱𞤫 𞤯𞤫 𞤮 𞤣𞤵𞤻𞤭𞤼𞤭𞤪𞤭 𞤱𞤭𞤴𞤵𞤺𞤮𞤤 𞤱𞤮𞤲𞤣𞤫𞤥𞤢 𞤺𞤮𞤤𞥆𞤫 𞤥𞤢𞤳𞥆𞤮 𞤯𞤫𞤲 𞤳𞤮 𞤫 𞤺𞤮𞥅𞤲𞤺𞤢 𞤼𞤵𞥅𞤺𞤭𞥅.
𞤁𞤫𞤲𞤼𞤫 𞤬𞤭𞥅 𞤸𞤢𞥄𞤲𞤤𞤫 𞤲𞤫𞤯𞥆𞤢𞤲𞤳𞤫 𞤲𞤮 𞤱𞤭𞤴𞤭 𞤱𞤮𞤲𞤣𞤫𞤥𞤢⹁ 𞤳𞤮 𞤬𞤭𞤴𞤢𞥄𞤳𞤵 𞤮𞥅 𞤯𞤮𞥅 𞤲𞤺𞤵𞤲 𞤱𞤮𞤲𞤭 𞤧𞤢𞤳𞥆𞤭𞤼𞤮𞤪𞤵𞤲 𞤫 𞤲𞤶𞤢𞤺𞥆𞤵 𞤸𞤮𞥅𞤪𞤫 𞤬𞤫𞤤𞤮𞥅𞤩𞤫 𞤫 𞤤𞤭𞤣𞥆𞤭𞥅𞤩𞤫 𞤤𞤢𞥄𞤥𞤩𞤫 𞤧𞤮𞥅𞤪𞤭 𞤩𞤫𞤲.
𞤑𞤮 𞤫 𞤔𞤵𞤳𞤮 𞥒𞥐𞥒𞥐 𞤩𞤫𞥅 𞤰𞤢𞤱𞤭 𞤳𞤢 𞤤𞤢𞥄𞤥𞤵 𞤲𞤣𞤫 𞤋𞤦𞤪𞤢𞥄𞤸𞤭𞥅𞤥𞤢 𞤄𞤵𞥅𞤦𞤢𞤳𞤢𞤪 𞤑𞤫𞤴𞤼𞤢⹁ 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲 𞤮𞤲𞤼𞤵𞤥𞤢⹁ 𞤬𞤮𞤤𞥆𞤢𞤲𞤮𞥅 𞤩𞤢𞥄𞤱𞤮 𞤧𞤫𞤨𞥆𞤵𞤪𞤵𞥅𞤶𞤭 𞤤𞤭𞤣𞥆𞤵–𞤤𞤢𞥄𞤥𞤵𞥅𞤶𞤭 𞤼𞤭𞥅𞤯𞤵𞤯𞤭 𞤱𞤢𞤯𞤭𞤪𞤭 𞤧𞤢𞤦𞤵 𞤲𞤮 𞤮 𞤱𞤮𞤲𞤵𞤲𞤮𞥅 𞤸𞤫𞤩𞥆𞤭𞤼𞤮𞤪𞤣𞤫 𞤥𞤵𞤪𞤼𞤢𞤤 𞤶𞤭𞤸𞤢𞥄𞤣𞤮𞥅𞤩𞤫 𞤩𞤫𞤲.
𞤋𞤦𞤪𞤢𞥄𞤸𞤭𞥅𞤥𞤢 𞤃𞤢𞤪𞤸𞤵𞥅𞤬 𞤅𞤢𞥄𞤳𞤮⹁ 𞤼𞤉𞤬𞤢𞤲𞤮𞥅𞤱𞤮 𞤅𞤭𞥅𞤧𞤮𞤳𞤮 𞤮𞤲⹁ 𞤱𞤭𞤴𞤭 𞤳𞤭𞥅𞤼𞤮𞥅𞤪𞤫 𞤲𞤣𞤫𞤲 𞤶𞤵𞤸𞤢𞥄𞤤𞤭 𞤥𞤮⹁ 𞤳𞤢𞤣𞤭 𞤮 𞤱𞤵𞤤𞥆𞤭𞤼𞤮𞤼𞤮.
𞤌𞥅 𞤢𞤲𞤣𞤭𞤲𞤮𞥅𞤱𞤮 𞤳𞤢 𞤔𞤢𞥄𞤩𞤭𞥅𞤪𞤫 𞤄𞤢𞤥𞤢𞤳𞤮⹁ 𞤤𞤢𞥄𞤼𞤭𞤲𞤮 𞤧𞤢𞥄𞤴𞤭 𞤺𞤮𞥅 𞤣𞤭𞥅𞤧𞤭𞤲𞤫𞤼𞤫𞥅𞤯𞤮 𞤑𞤫𞤴𞤼𞤢𞥄 𞤮𞤲⹁ 𞤪𞤫𞤬𞤼𞤭 𞤮 𞤱𞤢𞤯𞤭 𞤤𞤫𞤦𞥆𞤭 𞤯𞤵𞥅𞤯𞤵𞤯𞤫 𞤮𞤥𞤮 𞤧𞤮𞤳𞤭𞥅 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥒𞥒.
𞤏𞤢𞤤𞥆𞤭𞤬𞤢𞤲𞤣𞤫 𞤤𞤢𞥄𞤼𞤭𞥅𞤲𞤣𞤫 𞤧𞤢𞤦𞤵 𞤮 𞤲𞤢𞤲𞤺𞤭𞤼𞤫𞥅𞤣𞤫 𞤳𞤫𞤧𞤵𞤲 𞤲𞤮 𞤭𞤲𞥆𞤫𞥅: 𞤃𞤢𞤦𞥆𞤭𞤲𞤮⹁ 𞤔𞤢𞤱𞤯𞤭𞤲𞤮 𞤫 𞤇𞤭𞤯𞤼𞤭𞤲𞤮 – 𞤑𞤵𞤥𞤨𞤭𞤼𞤢𞤤 𞤔𞤢𞥄𞤺𞤮𞤪𞤢𞤤 𞤬𞤫𞤱𞤲𞤣𞤮 𞤤𞤵𞤥𞤦𞤭𞤲𞤢𞤤 𞤲𞤺𞤢𞤤 𞤃𞤢𞤤𞤭.
𞤐𞤣𞤫𞥅 𞤱𞤢𞤤𞥆𞤭𞤬𞤢𞤲𞤣𞤫 𞤲𞤮 𞤼𞤵𞥅𞤥𞤭 𞤶𞤵𞤲𞥆𞤭𞤼𞤢𞤤 𞤲𞤺𞤢𞤤 𞤸𞤵𞥅𞤱𞤼𞤮𞤪𞤺𞤮𞤤 𞤶𞤢𞤥𞤬𞤢⹁ “𞤸𞤢𞤴 𞤨𞤫𞤲𞤢𞥄𞤤𞤫” 𞤬𞤭𞥅 𞤴𞤭𞥅𞤤𞤵𞤺𞤮𞤤 𞤥𞤭𞥅𞤶𞤮𞥅𞤶𞤭 𞤴𞤭𞤥𞤩𞤫 𞤩𞤫𞤲 𞤦𞤢𞤽𞥆𞤫 𞤥𞤢𞤩𞥆𞤫.
𞤀𞤣𞤮 𞤮 𞤲𞤢𞤲𞤺𞤫𞥅𞤣𞤫⹁ 𞤅𞤭𞥅𞤧𞤮𞤳𞤮 𞤴𞤢𞤤𞤼𞤭𞤲𞥆𞤮 𞤱𞤫𞤲𞤺𞤢𞤲𞤣𞤫 𞤳𞤢 𞤊𞤫𞤧𞤦𞤵𞤳 𞤳𞤢 𞤮 𞤤𞤢𞤲𞤣𞤭𞥅 𞤴𞤮 𞤧𞤵𞤩𞤲𞤺𞤮 𞤲𞤺𞤮𞤤 𞤤𞤢𞥄𞤼𞤭𞤲𞤫.
𞤔𞤵𞤲𞥆𞤭𞤼𞤢𞤤 𞤲𞤺𞤢𞤤 𞤴𞤭𞤴𞤭𞥅 𞤽𞤭𞤻𞤫𞥅𞤣𞤫 𞤧𞤢𞤦𞤵 𞤬𞤭𞤪𞤼𞤵𞤺𞤮𞤤 𞤥𞤢𞤩𞥆𞤫 𞤷𞤢𞤨𞥆𞤢𞤳𞤵𞤪𞤵 (𞤻𞤢𞤤𞤯𞤭𞤥𞤫𞤪𞤫) 𞤸𞤢𞥄𞤤𞤣𞤢𞥄𞤲𞤣𞤵 𞤲𞤣𞤵𞤲 𞤬𞤭𞥅 𞤤𞤵𞤥𞤦𞤭𞤲𞤮 𞤫 𞤤𞤢𞥄𞤥𞤵 𞤣𞤫𞤥𞤮𞤳𞤢𞤪𞤢𞥄𞤳𞤵 𞤦𞤫𞤯𞥆𞤭𞤴𞤢𞤲𞤳𞤮𞤱𞤵. 𞤕𞤵𞤩𞤤𞤫 𞤧𞤢𞥄𞤼𞤭𞤲𞤢𞤲𞤮𞥅𞤯𞤫 𞤯𞤫𞤲 𞤫 𞤕𞤮𞤤𞤼𞤮 𞤬𞤢𞤩𞥆𞤭𞤲𞤢𞤲𞤮𞥅𞤥𞤢 𞤬𞤢𞥄𞤸𞤭𞤲.
𞤉 𞤦𞤢𞤺𞥆𞤫 𞤲𞤣𞤵𞥅 𞤤𞤫𞤱𞤪𞤵 𞤯𞤮𞥅⹁ 𞤼𞤢𞤱𞤣𞤢𞥄𞤩𞤫 𞤫 𞤳𞤮 𞤭𞤲𞥆𞤢𞥄 “𞤒𞤫𞤱𞤼𞤭𞤣𞤢𞤤 𞤺𞤫𞤲𞤣𞤭𞤴𞤢𞤲𞤳𞤮𞤱𞤢𞤤” 𞤼𞤮𞤪𞤭𞤳𞤫 𞤲𞤫𞥅𞤩𞤲𞤭𞤼𞤭𞤪𞤺𞤮𞤤 𞤸𞤢𞤨𞥆𞤵 𞤤𞤵𞤥𞤦𞤭𞤲𞤢𞤤 𞤲𞤺𞤢𞤤 𞤫𞤥𞤦𞤫𞤪𞤫 𞤣𞤵𞥅𞤩𞤭 𞤼𞤢𞤼𞤭 𞤳𞤢𞤣𞤭.
𞤍𞤵𞥅𞤯𞤵𞤩𞤫 𞤫 𞤬𞤫𞤤𞤮𞥅𞤩𞤫 𞤶𞤵𞤲𞥆𞤭𞤼𞤢𞤤 𞤲𞤺𞤢𞤤 𞤧𞤮𞤳𞤢𞥄𞤥𞤢 𞤫 𞤲𞤣𞤫𞥅 𞤸𞤭𞤼𞤢𞥄𞤲𞤣𞤫 𞤧𞤢𞥄𞤤𞤭𞥅𞤲𞤣𞤫. 𞤐𞤮 𞤼𞤢𞤱𞤢𞥄 𞤫 𞤩𞤫𞤲 𞤈𞤮𞤳𞤭𞤴𞤢 𞤁𞤵𞤥𞤦𞤵𞤴𞤢⹁ 𞤥𞤵𞤤𞤼𞤮𞥅𞤱𞤮 𞤳𞤢 𞤲𞤶𞤵𞤩𞥆𞤵𞤤𞤫 𞤶𞤮𞤳𞥆𞤮𞤲𞥋𞤣𞤭𞤪𞤢𞤤⹁ 𞤳𞤢𞤻𞤵𞤲 𞤫 𞤮𞥅 𞤧𞤮𞤬𞤼𞤵𞤯𞤮 𞤤𞤮𞤤𞥆𞤵𞤯𞤮 𞤭𞤲𞥆𞤫𞤼𞤫𞥅𞤯𞤮 𞤀𞥄𞤣𞤢𞤥𞤢 𞤄𞤫𞥅𞤲 𞤔𞤢𞤪𞤢𞥄.
𞤑𞤢𞤣𞤭⹁ 𞤫 𞤅𞤫𞥅𞤯𞤼𞤮⹁ 𞤶𞤵𞤲𞥆𞤭𞤼𞤢𞤤 𞤲𞤺𞤢𞤤 𞤣𞤢𞤪𞤼𞤭𞤲𞤭 𞤳𞤢𞤤𞤢 𞤺𞤮𞤤𞥆𞤫 𞤣𞤢𞤱𞤪𞤮𞤴𞤢𞤲𞤳𞤫𞥅𞤶𞤫⹁ 𞤪𞤫𞤬𞤼𞤭 𞤲𞤺𞤢𞤤 𞤱𞤢𞤯𞥆𞤭𞤲𞤭 𞤳𞤭𞤦𞤭𞤪𞤮 𞤥𞤫𞤸𞤮 𞤸𞤮𞥅𞤪𞤫 𞤳𞤵𞤥𞤨𞤭𞤼𞤫 𞤣𞤢𞤱𞤪𞤮𞤴𞤢𞤲𞤳𞤫𞥅𞤶𞤫 𞤯𞤫𞤲.

𞤉𞤺𞥆𞤢𞥄 BBC