𞤔𞤢𞥄𞤳 𞤅𞤭𞤪𞤢𞥄𞤳 𞤊𞤫𞤰𞥆𞤭𞤲𞤭𞥅
𞤔𞤢𞤳 𞤅𞤭𞤪𞤢𞥄𞤳⹁ 𞤸𞤮𞥅𞤪𞤫𞥅𞤶𞤮 𞤳𞤭𞤯𞥆𞤮 𞤤𞤫𞤴𞤣𞤭 𞤊𞤢𞤪𞤢𞤲𞤧𞤭 𞤲𞤣𞤭𞤲⹁ 𞤬𞤫𞤰𞥆𞤭𞤲𞤭𞥅 𞤸𞤢𞤲𞤣𞤫 𞤐𞤢𞥄𞤧𞤢𞥄𞤲𞤣𞤫⹁ 𞥒𞥖 𞤅𞤭𞤤𞤼𞤮 𞥒𞥐𞥑𞥙. 𞤑𞤮 𞤣𞤵𞥅𞤩𞤭 𞥘𞥖 𞤮 𞤬𞤫𞤰𞥆𞤭𞤲𞤭𞤪𞤭.
𞤀𞤣𞤮 𞤮 𞤰𞤢𞤱𞤵𞤣𞤫 𞤳𞤢 𞤶𞤵𞤤𞥆𞤫𞤪𞤫 𞤤𞤢𞥄𞤥𞤵 𞤊𞤢𞤪𞤢𞤲𞤧𞤭⹁ 𞤮 𞤤𞤢𞥄𞤼𞤭𞤲𞤮 𞤢𞤪𞤣𞤮 𞤤𞤢𞥄𞤥𞤵 𞤜𞤢𞤤𞤫𞤪𞤭𞥅 𞤔𞤭𞤧𞤳𞤢𞥄𞤪 𞤁𞤫𞤧𞤼𞤫𞤲 𞤸𞤢𞤳𞥆𞤵𞤲’𞤣𞤫 𞥑𞥙𞥗𞥔 𞤫 𞥑𞥙𞥗𞥖. 𞤇𞤢𞤱𞤼𞤭 𞤯𞤵𞤲⹁ 𞤮 𞤱𞤮𞤲𞤭 𞤳𞤢𞤣𞤭 𞤢𞤪𞤣𞤮 𞤤𞤢𞥄𞤥𞤵 𞤊𞤢𞤪𞤢𞤲𞤧𞤵𞤱𞤢𞥄 𞤃𞤭𞤼𞤫𞤪𞤢𞤲 𞤲𞤺𞤵𞤲 𞤸𞤢𞤳𞥆𞤵𞤲’𞤣𞤫 𞥑𞥙𞥘𞥖 𞤫 𞥑𞥙𞥘𞥘. 𞤑𞤮 𞤣𞤵𞥅𞤩𞤭 𞤶𞤫𞥅𞤯𞤭𞤯𞤭 𞤩𞤢𞤱𞤮 𞤯𞤵𞤲⹁ 𞤳𞤢𞤲𞤳𞤮 𞤳𞤢𞤣𞤭 𞤮 𞤰𞤢𞤱𞤭 𞤳𞤢 𞤤𞤢𞥄𞤥𞤵 𞤊𞤢𞤪𞤢𞤲𞤧𞤭 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥙𞥕. 𞤑𞤮 𞤫 𞥒𞥐𞥐𞥗 𞤮 𞤭𞤱𞤭 𞤫 𞤤𞤢𞥄𞤥𞤵. 𞤘𞤭𞤤𞤢 𞤲𞤣𞤫𞤲 𞤼𞤵𞤥𞤢𞥄𞤪𞤫⹁ 𞤮 𞤼𞤭𞤥𞥆𞤭𞤲𞤢𞥄 𞤷𞤫𞤤𞥆𞤢𞥄𞤤.
𞤑𞤮 𞤤𞤢𞥄𞤥𞤵 𞤥𞤢𞤳𞥆𞤮 𞤲𞤺𞤵𞤲 𞤩𞤵𞤪𞤢𞥄 𞤥𞤢𞥄𞤲𞤣𞤮𞤪𞤫𞥅𞤣𞤫⹁ 𞤳𞤮 𞤲𞤣𞤫 𞤮 𞤣𞤢𞤪𞤼𞤭𞤲𞤮𞥅 𞤔𞤮𞤪𞤶 𞤄𞤵𞥅𞤧⹁ 𞤸𞤮𞥅𞤪𞤫𞥅𞤶𞤮 𞤀𞤥𞤫𞤪𞤭𞤳 𞤮𞤲⹁ 𞤲𞤣𞤫 𞤮𞤲 𞤸𞤢𞤥𞥆𞤢𞤲𞤮𞥅 𞤸𞤢𞤩𞤵𞤺𞤮𞤤 𞤅𞤢𞤣𞥆𞤢𞥄𞤥 𞤖𞤵𞤧𞤢𞤴𞤲 𞤫 𞤤𞤫𞤴𞤣𞤭 𞤋𞤪𞤢𞥄𞤳 𞤲𞤣𞤭𞤲. 𞤅𞤭𞤪𞤢𞥄𞤳 𞤤𞤭𞤣𞥆𞤭𞤲𞤮 𞤀𞤥𞤫𞤪𞤭𞤳 𞤳𞤮 𞤼𞤭𞥅𞤯𞤭 𞤬𞤢𞥄𞤣𞤫 𞤫 𞤳𞤮𞤲𞥆𞤵𞤺𞤮𞤤 𞤋𞤪𞤢𞥄𞤳. 𞤑𞤮 𞤮 𞤲𞤶𞤫𞤪𞤼𞤭𞤲𞤭𞤪𞤲𞤮𞥅𞤩𞤫 𞤳𞤮𞤲 𞤬𞤮𞤬⹁ 𞤤𞤢𞥄𞤼𞤮𞤪𞤭 𞤲𞤮𞤲.
𞤑𞤮𞤳𞤢 𞤳𞤢𞤣𞤭 𞤱𞤮𞤲𞤭 𞤢𞤪𞤢𞤲𞤮 𞤫 𞤸𞤮𞥅𞤪𞤫𞥅𞤩𞤫 𞤊𞤢𞤪𞤢𞤲𞤧⹁ 𞤹𞤭𞤪𞥆𞤭𞤼𞤭𞥅𞤯𞤮 𞤱𞤮𞤲𞤣𞤫 𞤳𞤮 𞤊𞤢𞤪𞤢𞤲𞤧 𞤶𞤵𞤳𞥆𞤭𞤲𞤭 𞤤𞤫𞤴𞤯𞤫 𞤀𞤬𞤪𞤭𞤳 𞤳𞤫𞥅𞤱𞤵𞤯𞤫⹁ 𞤱𞤵𞤶𞥆𞤭 𞤶𞤢𞤱𞤤𞤫 𞤫 𞤩𞤭𞤩𞥆𞤫 𞤀𞤬𞤪𞤭𞤳⹁ 𞤴𞤫𞥅𞤦𞤭𞤪𞤭 𞤳𞤢𞤣𞤭 𞤨𞤭𞤲𞤫 𞤀𞤬𞤪𞤭𞤳 𞤣𞤭𞥅𞤲𞤢 𞤥𞤢𞥄𞤩𞥆𞤫 𞤳𞤢𞤲. 𞤑𞤮 𞤫 𞤦𞤫𞤲𞤧𞤮𞤲’𞤣𞤭𞤪𞤢𞤤 𞤲𞤺𞤢𞤤 𞤮 𞤧𞤢𞤳𞥆𞤭𞤼𞤭𞥅 𞤼𞤢𞤱𞤫𞥅𞤣𞤫 𞤫 𞤥𞤵𞤲⹁ 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥐𞥗⹁ 𞤮 𞤸𞤢𞥄𞤤𞤭 𞤯𞤵𞤲. 𞤑𞤮𞤲𞤮 𞤳𞤮 𞤮 𞤸𞤢𞥄𞤤𞤭𞤪𞤲𞤮𞥅 𞤯𞤵𞤲⹁ 𞤳𞤮 𞤩𞤢𞤴𞤼𞤭 𞤸𞤮𞥅𞤪𞤫𞥅𞤩𞤫 𞤣𞤭𞥅𞤲𞤢 𞤩𞤫𞤲 𞤊𞤢𞤪𞤢𞤲𞤧𞤭 𞤼𞤮𞤪𞤭𞤳𞤫 𞤤𞤢𞥄𞤥𞤵 𞤊𞤢𞤪𞤢𞤲𞤧𞤭 𞤲𞤺𞤵𞤲⹁ 𞤴𞤮 𞤲𞤺𞤵 𞤸𞤢𞤯𞤼𞤮 𞤫 𞤦𞤢𞤥𞤦𞤢𞤥𞤺𞤮𞤤 𞤤𞤢𞥄𞤥𞤮𞤪𞤩𞤫 𞤲𞤶𞤢𞤺𞥆𞤵⹁ 𞤼𞤮𞥅𞤻𞤫 𞤫 𞤲𞤺𞤵𞤴𞤳𞤢 𞤲𞤣𞤫𞤪 𞤀𞤬𞤪𞤭𞤳. 𞤅𞤢𞤦𞤵 𞤳𞤮 𞤯𞤵𞤲 𞤱𞤮𞤲𞥆𞤮𞥅 𞤨𞤫𞤱𞤶𞤫 𞤊𞤢𞤪𞤢𞤧𞤭 𞤯𞤫𞤲 𞤀𞤬𞤪𞤭𞤳.
𞤅𞤭𞤪𞤢𞥄𞤳 𞤲𞤮 𞤢𞤲𞤣𞤭𞤪𞤢𞤲𞤮𞥅 𞤳𞤢𞤣𞤭 𞤱𞤢𞥄𞤱𞤵𞤺𞤮𞤤 𞤸𞤢𞥄𞤤𞤢.
𞤌𞤲 𞤱𞤫𞤤𞤼𞤢𞤲𞤢𞥄 𞤥𞤮𞤰𞥆𞤢 𞤷𞤫𞤪𞤲𞤮𞥅𞤩𞤫