𞤐𞤢𞤬𞤮𞥅𞤪𞤫 𞤘𞤢𞤲𞤣𞤢𞤤

𞤑𞤮 𞤧𞤫𞤲𞤣𞤭 𞤲𞤫𞤯𞥆𞤮 𞤮𞤲 𞤫 𞤳𞤵𞤤𞥆𞤫 𞤯𞤫𞤲⹁  𞤳𞤮 𞤸𞤢𞤹𞥆𞤭𞤤𞥆𞤫. 𞤅𞤭 𞤱𞤮𞤲𞥆𞤮 𞤩𞤭𞥅 𞤢𞥄𞤣𞤢𞤥𞤢 𞤫𞤲 𞤱𞤮𞤨𞥆𞤭𞥅 𞤸𞤵𞤱𞤼𞤮𞤪𞤺𞤮𞤤 𞤥𞤭𞥅𞤶𞤮 𞤫 𞤸𞤢𞤹𞥆𞤭𞤤 𞤩𞤫 𞤶𞤢𞥄𞤧𞤢𞤴𞤲𞤮⹁ 𞤩𞤫 𞤪𞤵𞤼𞥆𞤮𞥅 𞤫 𞤤𞤮𞤫𞤪𞤫 𞤫 𞤶𞤢𞥄𞤴𞤪.⹁ 𞤯𞤵𞤲 𞤱𞤮𞤲𞤢𞤴𞤲𞤮 𞤧𞤢𞤦𞤵 𞤩𞤫 𞤤𞤢𞥄𞤼𞤮𞥅 𞤺𞤢𞥄𞤲𞤭𞤲 𞤳𞤵𞤤𞥆𞤫 𞤯𞤫𞤲.

𞤑𞤵𞤤𞥆𞤵𞤲 𞤳𞤢𞤤𞤢 𞤲𞤮 𞤸𞤫𞥅𞤪𞤼𞤮𞤪𞤭 𞤣𞤮𞤳𞥆𞤢𞤤⹁ 𞤲𞤺𞤢𞤤 𞤲𞤮 𞤲𞤫𞤱𞤭𞤲𞤢𞤲𞤢 𞤳𞤵𞤲 𞤱𞤵𞥅𞤪𞤵𞤺𞤮𞤤 𞤧𞤢𞤦𞤵 𞤯𞤮𞤱𞤮𞤪𞤺𞤮𞤤 𞤲𞤺𞤢𞤤. 𞤉 𞤥𞤭𞤧𞤢𞤤: 𞤧𞤫𞤺𞤫𞤤𞤫𞥅𞤪𞤫 𞤳𞤮 𞤺𞤭𞥅𞤯𞤫 𞤸𞤫𞥅𞤪𞤼𞤮𞤪𞤭. 𞤐𞤮 𞤱𞤫𞥅𞤩𞤢𞤲𞤭 𞤲𞤣𞤫 𞤸𞤢𞤴𞤲𞤢𞤺𞤮𞤤 𞤲𞤮 𞤤𞤢𞥄𞤩𞤭𞤪𞤭 𞤨𞤮𞤴 𞤲𞤦𞤢𞤪𞤢𞤼𞤫𞥅𞤪𞤭 𞤥𞤢𞤴𞤪𞤫 𞤫 𞤲𞤮𞤳𞥆𞤵𞥅𞤪𞤫 𞤱𞤵𞤯𞥆𞤵𞤣𞤫.

𞤑𞤵𞤤𞥆𞤫 𞤺𞤮𞥅⹁ 𞤳𞤮 𞤴𞤭𞤵𞤺𞤮𞤤 𞤫 𞤲𞤭𞤱𞤪𞤫⹁ 𞤺𞤮𞥅𞤼𞤯𞤫 𞤳𞤮 𞤲𞤢𞤲𞤵𞤺𞤮𞤤 𞤳𞤢 𞤱𞤮𞤯𞥆𞤭⹁ 𞤲𞤮 𞤸𞤫𞤲 𞤳𞤢𞤣𞤭 𞤺𞤮𞥅𞤼𞤯𞤫 𞤳𞤮 𞤧𞤮𞤵𞤺𞤮𞤤…..𞤩𞤵𞤪𞤲𞤭𞤪𞤢𞥄.

𞤉𞤲𞤫𞤲 𞤲𞤫𞤯𞥆𞤢𞤲𞤳𞤫 𞤳𞤮 𞤩𞤵𞤪𞤲𞤭𞤪𞤢𞤯𞤫𞤲⹁ 𞤳𞤮 𞤸𞤢𞤹𞥆𞤭𞤤. 𞤀𞤣𞤭𞤲𞤮 𞤥𞤭𞥅𞤶𞤮⹁ 𞤤𞤵𞤺𞥆𞤭𞤲𞤮 𞤼𞤢𞤧𞤳𞤢𞥄𞤪𞤫⹁ 𞤸𞤫𞤦𞤭𞤤𞤢𞤲𞤢𞤺𞤮𞤤 𞤳𞤮 𞤶𞤮𞤪𞤼𞤢𞥄…𞤫 𞤳𞤲𞤯.

𞤑𞤮 𞤯𞤵𞤲 𞤱𞤢𞤯𞤭 𞤧𞤭 𞤲𞤮 𞤱𞤭𞤫𞥅 :”𞤳𞤮 𞤸𞤢𞤹𞥆𞤭𞤤 𞤱𞤮𞤲𞤭 𞤥𞤢𞥄𞤬𞤫 𞤩𞤢𞤤𞤲𞤣𞤵”⹁ 𞤯𞤵𞤲 𞤸𞤮𞤤𞥆𞤭𞥅 𞤱𞤮𞤲𞤢𞥄 𞤷𞤫𞤥𞤦𞤫 𞤯𞤫𞤲 𞤼𞤵𞤲 𞤱𞤵𞥅𞤪𞤲𞤢𞤼𞤢 𞤥𞤢𞤤𞥆𞤢 𞤲𞤫𞤱𞤭𞤲𞤢 𞤲𞤺𞤵𞥅𞤪𞤣𞤢𞤲 𞤲𞤫𞤯𞥆𞤮.

𞤖𞤮𞤤 𞤳𞤮 𞤥𞤢𞥄𞤬𞤢𞤼𞤢 𞤸𞤢𞤹𞥆𞤭𞤤؟

𞤅𞤭 𞤼𞤢𞤱𞤭𞥅 𞤳𞤮 𞤸𞤢𞤹𞥆𞤭𞤤𞥆𞤫 𞤯𞤫𞤲 𞤥𞤢𞥄𞤬𞤭𞥅 𞤩𞤢𞤤𞤲𞤣𞤵 𞤲𞤣𞤵𞤲⹁ 𞤳𞤢𞤲𞤯𞤫 𞤳𞤢𞤣𞤭 𞤳𞤮 “𞤘𞤀𞤐𞤁𞤀𞤂 ” 𞤥𞤢𞥄𞤬𞤢𞤼𞤢 𞤯𞤫. 𞤈𞤫𞤲𞤣𞤮 𞤬𞤮𞤱 𞤧𞤭 𞤩𞤢𞤲𞤼𞤮𞤼𞤮⹁ 𞤧𞤭 𞤴𞤭𞤥𞤩𞤫 𞤥𞤢𞤺𞥆𞤮 𞤩𞤵𞥅𞤩𞤼𞤭𞤲𞤢𞤴 𞤩𞤫 𞤱𞤵𞥅𞤪𞤢 𞤱𞤫𞤤𞤵𞤯𞤢𞤥 𞤳𞤮 𞤦𞤫𞥅 𞤺𞤢𞤲𞤣𞤢𞤤 𞤲𞤺𞤢𞤤 𞤢𞤣𞤭𞤲𞤫𞥅 𞤫 𞤲𞤮𞥅𞤲𞤫𞥅 𞤳𞤢𞤤𞤢 𞤫 𞤬𞤭𞤴𞤢𞤳𞤵𞥅𞤶𞤭 𞤥𞤢𞤩𞥆𞤫.

𞤖𞤮𞤤 𞤳𞤮 𞤱𞤮𞤲𞤭 𞤘𞤀𞤐𞤁𞤀𞤂؟

𞤳𞤮 𞤳𞤢𞤤𞤢 𞤳𞤮 𞤢𞤲𞤣𞤢𞥄⹁ 𞤬𞤢𞤸𞤥𞤢𞥄⹁ 𞤳𞤮 𞤸𞤢𞤹𞥆𞤭𞤤 𞤶𞤢𞤩𞤭⹁ 𞤳𞤮 𞤦𞤢𞤯𞤼𞤭𞤲𞤼𞤢 𞤲𞤮 𞤥𞤮𞤰𞥆𞤭𞤪𞤭 𞤫 𞤲𞤺𞤵𞤪𞤣𞤢𞤥 𞤴𞤭𞤲𞤥𞤩𞤫 𞤱𞤢𞤤𞥆𞤢 𞤳𞤵𞤤𞥆𞤫⹁ 𞤱𞤢𞤤𞥆𞤢 𞤨𞤭𞥅𞤶𞤭 𞤼𞤢𞤱𞤢 𞤸𞤭𞤲𞤮 𞤺𞤢𞤧𞤢 𞤳𞤢 𞤱𞤮𞤲𞤯𞤮 𞤱𞤮𞥅 𞤸𞤫𞤬𞤼𞤢 𞤳𞤫𞤩𞤢𞤤 𞤥𞤵𞤲.

𞤘𞤢𞤲𞤣𞤢𞤤 𞤸𞤫𞥅𞤪𞤼𞤢𞤲𞤢𞥄𞤳𞤭 𞤤𞤫𞤴𞤣𞤭⹁ 𞤤𞤫𞤻𞤮𞤤⹁ 𞤺𞤮𞤪𞤮𞤤⹁ 𞤺𞤭𞤪𞤢𞤤⹁ 𞤶𞤢𞤥𞤢𞥄𞤲𞤵 𞤱𞤢𞤤𞥆𞤢 𞤯𞤫𞤲𞤺𞤢𞤤. 𞤘𞤢𞤲𞤣𞤢𞤤 𞤲𞤮 𞤴𞤢𞤱𞤼𞤭 𞤯𞤭𞥅 𞤯𞤮𞤮 𞤬𞤮𞤱…

𞤖𞤮𞤤 𞤳𞤮 𞤶𞤢𞤲𞤺𞤢𞤲𞤼𞤫𞥅؟

𞤐𞤮 𞤱𞤮𞥅𞤣𞤭 𞤫 𞤥𞤫𞤲 𞤯𞤵𞥅𞤯𞤵𞤩𞤫 𞤸𞤢𞤪𞤢 𞤩𞤫 𞤸𞤮𞤥𞤨𞤭𞤼𞤢𞥄𞤳𞤭 𞤳𞤮 𞤯𞤢𞤩𞥆𞤢𞥄 𞤫 𞤶𞤢𞤲𞤺𞤵𞤺𞤮𞤤⹁ 𞤧𞤢𞤦𞤵 𞤧𞤭𞤳𞥆𞤵𞤺𞤮𞤤 𞤳𞤮 𞤳𞤫𞤩𞤢𞤤 𞤶𞤢𞤱𞤣𞤭⹁ 𞤶𞤢𞥄𞤸𞤵⹁ 𞤼𞤫𞤣𞥆𞤵𞤲’𞤺𞤢𞤤⹁ 𞤤𞤢𞥄𞤥𞤵…..𞤫 𞤳𞤲𞤯… 𞤱𞤮𞤲𞤭 𞤳𞤮 𞤯𞤢𞤩𞥆𞤢𞥄 𞤫 𞤺𞤢𞤲𞤣𞤢𞤤. 𞤑𞤮 𞤯𞤵𞤲 𞤱𞤢𞤯𞤭 𞤫𞤩𞤫 𞤧𞤭𞤳𞥆𞤢⹁ 𞤥𞤮 𞤶𞤢𞤲𞤺𞤭𞥅 𞤢𞤤𞤯𞤢𞥄𞤤𞤭 𞤸𞤢𞤪𞤢𞤴 𞤮 𞤸𞤢𞤴𞤪𞤭𞥅⹁ 𞤮 𞤴𞤫𞥅𞤦𞤭𞥅 𞤶𞤢𞤱𞤣𞤭. 𞤌 𞤨𞤵𞤴𞤯𞤭𞤪𞤭𞥅 𞤤𞤢𞥄𞤱𞤢𞥄𞤣𞤫 𞤫 𞤣𞤵𞥅𞤩𞤭 𞤯𞤭 𞤮 𞤶𞤢𞤲𞤺𞤭 𞤯𞤭𞤲 𞤫 𞤥𞤵𞤲.

𞤀𞤱𞤢 𞤢𞤲𞤣𞤫𞤲⹁ 𞤲𞤢𞤬𞤢 𞤺𞤢𞤲𞤣𞤢𞤤 𞤳𞤮 𞤸𞤵𞥅𞤲𞤣𞤫 𞤱𞤮𞥅𞤼𞤫𞤪𞤫.𞤐𞤣𞤫𞤲 𞤤𞤫 𞤳𞤮: ” 𞤸𞤢𞤯𞤵𞤺𞤮𞤤 𞤱𞤢𞤤𞥆𞤢 𞤣𞤢𞤯𞤲𞤵𞤺𞤮𞤤 𞤲𞤫𞤯𞥆𞤢𞤲𞤳𞤫 𞤸𞤵𞥅𞤱𞤼𞤮𞤪𞤺𞤮𞤤 -𞤃𞤀𞤔𞥆𞤉𞤈𞤉-“. 𞤅𞤭 𞤩𞤭𞥅-𞤢𞥄𞤣𞤢𞤥𞤢 𞤶𞤢𞤲𞤺𞤭𞥅⹁ 𞤮𞤥𞤮 𞤪𞤮𞤲𞤳𞤢 𞤺𞤮𞤤𞥆𞤭𞤼𞤭𞤪𞤣𞤫 𞤺𞤢𞤲𞤣𞤢𞤤 𞤥𞤢𞤳𞥆𞤮 𞤲𞤺𞤢𞤤⹁ 𞤱𞤢𞤲𞤵 𞤶𞤢𞤲𞤺𞤢𞤲𞤯𞤮 𞤻𞤢𞤱𞤲𞤣𞤭𞥅𞤺𞤵 𞤲𞤮 𞤱𞤢𞥄𞤧𞤢 𞤤𞤢𞥄𞤼𞤢𞥄𞤣𞤫 𞤻𞤢𞤱𞤣𞤮𞥅𞤱𞤮. 𞤑𞤮𞤲𞤮 𞤮 𞤱𞤵𞥅𞤪𞤭𞤪𞤼𞤢 𞤱𞤢 𞤥𞤢𞤶𞥆𞤵𞤯𞤮.

𞤑𞤮 𞤯𞤵𞤲 𞤱𞤢𞤯𞤭⹁ 𞤫𞤲 𞤱𞤭𞤢𞤴 “𞤲𞤮 𞤱𞤮𞥅𞤣𞤭 𞤶𞤢𞤲𞤺𞤵𞤯𞤮 𞤥𞤮 𞤺𞤮𞤤𞥆𞤭𞤼𞤭𞤪𞤢𞥄𞤤𞤭 𞤺𞤢𞤲𞤣𞤢𞤤 𞤥𞤵𞤲⹁ 𞤳𞤮𞤲𞤮 𞤢𞤤𞤢𞥄 𞤱𞤢𞤤𞥆𞤢 𞤺𞤢𞤧𞤢𞤼𞤢𞥄 𞤳𞤢 𞤥𞤢𞤶𞥆𞤵𞤯𞤮 𞤱𞤢𞥄𞤧𞤭 𞤸𞤵𞥅𞤱𞤼𞤮𞤪𞤣𞤫 𞤥𞤢𞤶𞥆𞤫𞤪𞤫 𞤥𞤵𞤲 𞤲𞤣𞤫𞤲”. 𞤑𞤢 𞤥𞤢𞤶𞥆𞤫𞤪𞤫 𞤪𞤫𞤱𞤭 𞤱𞤮𞥅 𞤲𞤣𞤫 𞤢𞤷𞥆𞤢𞤴 𞤦𞤢𞤯𞤼𞤫.

𞤃𞤭 𞤧𞤵𞤩𞤭𞤳𞤫 𞤺𞤢𞤲𞤣𞤢𞤤!… 𞤲𞤺𞤢𞤤 𞤺𞤢𞤲𞤣𞤢𞤤 𞤳𞤢𞤣𞤭 𞤸𞤫𞤩𞤮𞤼𞤢𞥄𞤳𞤮 𞤫 𞤩𞤢𞥄𞤱𞤮 𞤦𞤭𞤲𞤣𞤮𞤤⹁ 𞤲𞤺𞤮𞤤 𞤲𞤮 𞤥𞤮𞤬𞤼𞤢⹁ 𞤸𞤭𞤱𞤢⹁ 𞤥𞤢𞤪𞤢⹁ 𞤣𞤢𞤲𞤳𞤮𞥅 𞤲𞤺𞤢𞤤 𞤸𞤢𞥄 𞤲𞤺𞤢𞤤 𞤴𞤮𞤼𞥆𞤮𞤴𞤮𞥅 𞤫 𞤲𞤮𞤳𞥆𞤵𞥅𞤪𞤫 𞤫 𞤶𞤢𞤥𞤢𞥄𞤲𞤵 𞤺𞤮𞥅.

𞤉𞤲𞤫𞤲 𞤊𞤵𞤤𞤩𞤫 𞤬𞤫𞤱𞤲𞤣𞤮 𞤸𞤢𞤲𞤣𞤫⹁ 𞤢𞤲𞤣𞤭𞤼𞤫𞤲 𞤲𞤺𞤢𞤲𞤼𞤮 𞤢𞤤𞤢𞤲𞤢𞥄 𞤫𞤲 𞤸𞤢𞤲𞤣𞤫 𞤳𞤢𞤣𞤭 𞤩𞤢𞥄𞤱𞤮 𞤢𞤪𞤵𞤺𞤮𞤤 𞤲𞤺𞤮𞤤 𞤦𞤭𞤲𞤣𞤮𞤤 𞤀𞤁𞤂𞤃. 𞤏𞤮𞤼𞤢 𞤱𞤫𞤤𞤧𞤭𞤣𞤢𞥄𞤪𞤫 𞤥𞤫𞤲 𞤸𞤢𞤯𞤵 𞤫𞤲 𞤴𞤢𞤻𞥆𞤵𞤺𞤮𞤤 𞤤𞤮𞤱𞤫 𞤺𞤢𞤲𞤣𞤢𞤤 𞤯𞤫𞤲 𞤳𞤢 𞤪𞤫𞤲𞤣𞤮 𞤥𞤫𞤲 𞤫 𞤳𞤢 𞤩𞤫𞤴𞤺𞤵𞥅𞤪𞤫𞥅𞤶𞤭 𞤥𞤫𞤲 𞤸𞤢𞥄 𞤴𞤮𞤼𞥆𞤮𞥅 𞤳𞤢 𞤤𞤢𞤪𞤫 𞤥𞤫𞤲..

𞤑𞤵𞤯𞤮𞤤 : 𞤂𞤀𞤃𞤀𞤈𞤀𞥄𞤐𞤀 𞤔𞤀𞤂𞥆𞤌

            𞤀𞤄𞤋𞤔𞤀𞤐. 𞤑𞤮𞤼𞤣𞤭𞤾𞤢𞥄𞤪