𞤖𞤌𞥅𞤈𞤓𞤘𞤌𞤂 𞤐𞤌 𞤏𞤌𞤐𞤁𞤋 𞤉 𞤐𞤀𞤊𞤌𞥅𞤔𞤉

𞤐𞤢𞤬𞤮𞥅𞤶𞤫 𞤳𞤮𞥅𞤪𞤳𞤢 𞤯𞤫𞤲

𞤖𞤮𞥅𞤪𞤵𞤺𞤮𞤤 𞤲𞤮 𞤱𞤮𞤲𞤣𞤭  𞤫 𞤲𞤢𞤬𞤮𞥅𞤶𞤫 𞤸𞤫𞥅𞤱𞤵𞤯𞤫. 𞤖𞤢𞤳𞥆𞤫𞤪𞤫𞤲 𞤳𞤮𞥅𞤪𞤳𞤢 𞤲𞤮 𞤱𞤮𞤲𞤣𞤭 𞤫 𞤲𞤢𞤬𞤮𞥅𞤶𞤫⹁ 𞤱𞤮𞤲𞤢𞥄  𞤫 𞤶𞤵𞥅𞤤𞤩𞤫 𞤩𞤫𞤲 𞤼𞤵𞤲 𞤳𞤢 𞤱𞤢𞤯𞥆𞤭𞤲𞤢𞤲𞤮𞥅. 𞤀𞤣𞤮 𞤋𞤧𞤤𞤢𞥄𞤥𞤵⹁ 𞤸𞤢𞤪𞤭 𞤴𞤭𞤥𞤩𞤫 𞤩𞤫𞤲 𞤸𞤮𞥅𞤪𞤢𞤴𞤲𞤮. 𞤍𞤵𞤲 𞤳𞤮 𞤲𞤣𞤫 𞤼𞤢𞤱𞤲𞤮𞥅 𞤸𞤢𞤴 𞤧𞤭 𞤱𞤮𞤲𞤢𞥄 𞤧𞤫𞤲𞤺𞤮 𞤳𞤢 𞤣𞤫𞤱𞤢𞤤⹁ 𞤳𞤮𞥅𞤪𞤳𞤢 𞤲𞤮 𞤱𞤮𞤲𞤣𞤭 𞤫 𞤲𞤢𞤬𞤮𞥅𞤶𞤫  𞤯𞤵𞥅𞤯𞤵𞤯𞤫 𞤳𞤢 𞤦𞤢𞤽𞥆𞤫 𞤷𞤫𞤤𞥆𞤢𞤤 𞤥𞤢𞤤𞥆𞤢 𞤲𞤶𞤢𞤥𞤵.

𞤐𞤮 𞤯𞤮𞥅 𞤴𞤮𞤺𞤢 𞤫 𞤲𞤢𞤬𞤮𞥅𞤶𞤫 𞤳𞤮𞥅𞤪𞤳𞤢: 

𞤑𞤮𞥅𞤪𞤳𞤢  𞤶𞤵𞥅𞤼𞤭𞤲𞤢𞤴 𞤲𞤺𞤵𞥅𞤪𞤣𞤢𞤥 𞤲𞤫𞤯𞥆𞤮

𞤃𞤮 𞤲𞤢𞤲𞤭𞥅 𞤯𞤵𞤥⹁ 𞤮𞤲𞤼𞤭𞤺𞤭 𞤱𞤭𞤢𞤴  “𞤸𞤮𞤤 𞤲𞤮 𞤯𞤵𞤲 𞤱𞤮𞤲𞤭𞤪𞤭؟ 𞤐𞤣𞤫 𞤼𞤢𞤱𞤵𞤲𞤮𞥅 𞤳𞤮 𞤻𞤢𞥄𞤥𞤵𞤺𞤮𞤤 𞤱𞤵𞥅𞤪𞤲𞤢𞤼𞤢؟ 𞤃𞤮 𞤸𞤢𞤯𞤭𞤼𞤭𞤳𞤫 𞤲𞤮𞤲 𞤻𞤢𞥄𞤥𞤣𞤵⹁ 𞤸𞤮𞤤 𞤲𞤮 𞤮𞤲 𞤶𞤵𞥅𞤼𞤭𞤪𞤼𞤢 𞤲𞤺𞤵𞥅𞤪𞤣𞤢𞤥؟”  𞤐𞤮 𞤱𞤮𞥅𞤣𞤭 𞤸𞤫𞤲 𞤺𞤢𞤥𞥆𞤵𞥅𞤶𞤭 𞤥𞤢𞤤𞥆𞤢 𞤧𞤢𞤦𞤭 𞤳𞤫𞥅𞤱𞤵𞤯𞤭 𞤱𞤢𞤯𞤢𞤴𞤯𞤭 𞤳𞤮𞥅𞤪𞤳𞤢 𞤶𞤵𞥅𞤼𞤭𞤲𞤢 𞤲𞤺𞤵𞥅𞤪𞤣𞤢𞤥. 𞤑𞤮 𞤇𞤵𞤪𞤭 𞤫 𞤥𞤢𞤶𞥆𞤭 𞤼𞤫𞤲𞤼𞤵𞤣𞤫⹁ 𞤳𞤮 𞤴𞤢𞥄𞤱𞤲𞤵𞤺𞤮𞤤 𞤱𞤢𞤴𞤤𞤢𞤺𞤮𞤤 𞤻𞤢𞥄𞤥𞤣𞤵 𞤲𞤣𞤵𞤲 𞤳𞤢 𞤲𞤣𞤫𞤪 𞤩𞤢𞤤𞤲𞤣𞤵 𞤱𞤮𞤲𞤼𞤢 𞤳𞤵𞤧𞤫𞤤 𞤫 𞤰𞤭𞥅𞤰𞤢𞤲. 𞤑𞤮 𞤯𞤵𞤥 𞤩𞤫 𞤭𞤲𞥆𞤢𞤼𞤢 (𞤥𞤫𞤼𞤢𞤦𞤮𞤤𞤢𞥄𞤳𞤵) 𞤳𞤢 𞤲𞤺𞤵𞥅𞤪𞤲𞤣𞤢𞤲𞤳𞤮𞤱𞤢𞤤. 𞤑𞤮 𞤲𞤮 𞤲𞤫𞤯𞥆𞤮 𞤲𞤢𞤱𞤴𞤭𞤪𞤼𞤢 𞤲𞤮𞤲⹁ 𞤥𞤫𞤼𞤢𞤦𞤮𞤤𞤢𞥄𞤳𞤵 𞤥𞤢𞤳𞥆𞤮 𞤲𞤺𞤵𞤲 𞤵𞤧𞤼𞤮𞤪𞤼𞤢. 𞤅𞤮 𞤥𞤫𞤼𞤢𞤦𞤮𞤤𞤢𞥄𞤳𞤵 𞤲𞤺𞤵𞤲 𞤲𞤮 𞤵𞤧𞤼𞤢𞥄𞤣𞤫⹁ 𞤳𞤮 𞤲𞤮𞤲 𞤳𞤢𞤣𞤭 𞤳𞤵𞤷𞥆𞤫 𞤯𞤫𞤲 𞤥𞤢𞤤𞥆𞤢 𞤼𞤫𞥅𞤱𞤵 𞤲𞤺𞤵𞤲 𞤯𞤵𞤧𞤼𞤮𞤪𞤼𞤢 𞤳𞤢𞤣𞤭 𞤳𞤢 𞤩𞤢𞤤𞤲𞤣𞤵. 𞤑𞤮 𞤯𞤵𞤲 𞤱𞤢𞤯𞤭 𞤧𞤭 𞤩𞤢𞤤𞥆𞤭 𞤲𞤢𞤴𞤫𞥅𞤩𞤫 𞤩𞤫𞤲 𞤲𞤮 𞤴𞤮𞤲𞤺𞤭𞤼𞤭𞥅.

𞤑𞤮𞥅𞤪𞤳𞤢 𞤳𞤢𞤲 𞤲𞤮𞤲 𞤲𞤫𞥅𞤩𞤲𞤭𞤼𞤢𞤴 𞤴𞤮𞤲𞤺𞤭𞤼𞤢𞥄𞤪𞤫 𞤲𞤣𞤫𞤲⹁ 𞤲𞤺𞤢𞤥 𞤩𞤫𞤴𞤣𞤢𞤴 𞤥𞤫𞤼𞤢𞤦𞤮𞤤𞤢𞥄𞤳𞤵 𞤲𞤺𞤵𞤲. 𞤑𞤢𞤣𞤭⹁ 𞤲𞤮 𞤲𞤫𞤯𞥆𞤮 𞤲𞤢𞤱𞤴𞤭𞤪𞤼𞤢 𞤲𞤮𞤲⹁ 𞤳𞤮 𞤲𞤮𞤲 𞤳𞤢𞤣𞤭 𞤺𞤫𞥅𞤰𞤭 𞤩𞤢𞤤𞤲𞤣𞤵 𞤲𞤣𞤵𞤲 𞤲𞤢𞤱𞤴𞤭𞤪𞤼𞤢. 𞤐𞤣𞤫𞤲⹁ 𞤯𞤭𞤲 𞤺𞤫𞥅𞤰𞤭 𞤳𞤭𞤯𞥆𞤭 𞤧𞤮𞤱𞤮𞤲’𞤣𞤭𞤪𞤢 𞤳𞤢 𞤲𞤣𞤫𞤪 𞤩𞤢𞤤𞤲𞤣𞤵  𞤮𞤲𞤼𞤭𞤺𞤭. 𞤑𞤮𞥅𞤪𞤳𞤢 𞤳𞤢𞤲 𞤲𞤮𞤲 𞤱𞤢𞤤𞥆𞤢𞤴 𞤩𞤢𞤤𞤲𞤣𞤵 𞤲𞤣𞤵𞤲 𞤲𞤮 𞤧𞤫𞥅𞤣𞤭𞤪𞤢 𞤫 𞤯𞤭𞤲 𞤺𞤫𞥅𞤰𞤭 𞤳𞤭𞤯𞥆𞤭⹁ 𞤤𞤮𞤲𞤼𞤭𞤲𞤭𞤪𞤢 𞤯𞤭 𞤺𞤫𞥅𞤰𞤭 𞤳𞤫𞤧𞤭. 

𞤑𞤮𞥅𞤪𞤳𞤢 𞤳𞤢𞤣𞤭 𞤱𞤮𞤲𞤢𞤴 𞤧𞤢𞤦𞤵 𞤸𞤢𞥄 𞤲𞤺𞤢𞥄𞤲𞤣𞤭  𞤲𞤣𞤭𞤲 𞤴𞤢𞤥𞤭𞤪𞤢 𞤺𞤫𞥅𞤰𞤭 𞤯𞤭𞤲 𞤴𞤮 𞤯𞤭 𞤧𞤭𞤲𞤼𞤭𞤲 𞤳𞤢 𞤲𞤣𞤫𞤪  𞤩𞤢𞤤𞤲𞤣𞤵 𞤫𞤲𞤯𞤢𞤥 𞤥𞤢𞤤𞥆𞤢 𞤸𞤮𞤪𞤥𞤮𞥅𞤲𞤢𞥄𞤶𞤫 𞤧𞤫𞤥𞤦𞤭𞤲𞤢𞤴𞤯𞤫 𞤮𞤲𞤼𞤭𞤺𞤭. 𞤍𞤵𞤥 𞤲𞤮𞤲⹁ 𞤼𞤭𞥅𞤯𞤭𞤲𞤢𞤴 𞤳𞤢𞤣𞤭 𞤥𞤢𞤤𞥆𞤢 𞤧𞤢𞤼𞥆𞤭𞤲𞤢 𞤷𞤭𞤴𞤫 𞤯𞤫𞤲. 

𞤑𞤮 𞤯𞤭𞥅 𞤬𞤮𞥅𞤬 𞤱𞤮𞤲𞤭 𞤧𞤢𞤦𞤭 𞤷𞤫𞤤𞥆𞤢𞤤  𞤮𞤲𞤼𞤭𞤺𞤭 𞤲𞤺𞤢𞤤 𞤩𞤫𞤴𞤣𞤮𞥅⹁ 𞤲𞤺𞤵𞤪𞤣𞤢𞤥 𞤯𞤢𞤲 𞤶𞤵𞥅𞤼𞤢𞥄.

𞤑𞤮𞥅𞤪𞤳𞤢  𞤯𞤵𞤴𞤼𞤢𞤴 𞤼𞤮𞥅𞤳𞤫 𞤫 𞤲𞤣𞤫𞤪 𞤩𞤢𞤤𞤲𞤣𞤵 

𞤙𞤢𞤥𞤤𞤭 𞤳𞤫𞥅𞤱𞤵𞤯𞤭 𞤯𞤭 𞤻𞤢𞥄𞤥𞤫𞤼𞤫𞤲 𞤲𞤮 𞤱𞤮𞥅𞤲𞤣𞤭𞥅 𞤫 𞤼𞤮𞥅𞤳𞤫 𞤯𞤫 𞤥𞤮𞤰𞥆𞤢𞤲𞤢𞥄 𞤲𞤫𞤯𞥆𞤮. 𞤍𞤫𞤲 𞤼𞤮𞥅𞤳𞤫 𞤲𞤮 𞤭𞤱𞤢 𞤫 𞤻𞤮𞤤𞤵 𞤸𞤵𞥅𞤼𞤮𞤪𞤢𞥄𞤲𞤺𞤵 𞤲𞤺𞤵𞤲 𞤳𞤢 𞤣𞤫𞤥𞤢𞤤. 𞤉𞤯𞤫 𞤭𞤱𞤢 𞤳𞤢𞤣𞤭 𞤳𞤢 𞤻𞤢𞥄𞤥𞤤𞤭 𞤯𞤭𞤲 𞤥𞤮𞤰𞥆𞤭𞤲𞤼𞤫𞥅 𞤯𞤮𞤲 𞤥𞤢𞥄 𞤳𞤢 𞤯𞤭 𞤤𞤮𞥅𞤱𞤫𞤼𞤫𞥅 𞤯𞤮𞤲. 𞤅𞤭 𞤲𞤫𞤯𞥆𞤮 𞤸𞤮𞥅𞤪𞤭𞥅⹁ 𞤳𞤮 𞤸𞤫𞥅𞤱𞤭 𞤫 𞤯𞤫𞤲 𞤼𞤮𞥅𞤳𞤫 𞤴𞤢𞤤𞤼𞤢𞤴 𞤫 𞤲𞤣𞤫𞤪 𞤩𞤢𞤤𞤲𞤣𞤵 𞤲𞤣𞤵𞤲.

 𞤑𞤮𞥅𞤪𞤳𞤢  𞤯𞤵𞤴𞤼𞤢𞤴 𞤩𞤫𞤤𞥆𞤫𞤪𞤫 𞤫 𞤲𞤣𞤫𞤪 𞤩𞤢𞤤𞤲𞤣𞤵 

𞤅𞤭 𞤲𞤫𞤯𞥆𞤮 𞤻𞤢𞥄𞤥𞤭𞥅⁏ 𞤳𞤮 𞤮 𞤻𞤢𞥄𞤥𞤭 𞤳𞤮𞤲 𞤤𞤢𞥄𞤼𞤢𞤲𞤼𞤮 𞤩𞤢𞤤𞤣𞤵 𞤲𞤣𞤵𞤲 𞤧𞤵𞤥𞤮𞤶𞤢𞤲 𞤳𞤮 𞤲𞤣𞤵 𞤧𞤵𞤲𞥆𞤢. 𞤑𞤮𞤲𞤮 𞤧𞤭 𞤻𞤢𞥄𞤥𞤣𞤵 𞤲𞤣𞤵𞤲 𞤯𞤵𞥅𞤯𞤭𞥅 𞤩𞤵𞤪𞤭𞥅 𞤳𞤮 𞤩𞤢𞤤𞤲𞤣𞤵 𞤲𞤣𞤵𞤲 𞤸𞤢𞥄𞤲𞤣𞤭 𞤳𞤮𞤲 𞤫 𞤥𞤵𞥅𞤲⹁ 𞤳𞤮 𞤸𞤫𞤣𞥆𞤭𞥅 𞤳𞤮𞤲 𞤱𞤮𞤲𞤼𞤢𞤴 𞤩𞤫𞤤𞥆𞤫𞤪𞤫. 𞤐𞤣𞤫𞤲 𞤩𞤫𞤤𞥆𞤫𞤪𞤫 𞤥𞤢𞤪𞤮𞤼𞤮 𞤳𞤢 𞤲𞤣𞤫𞤪 𞤩𞤢𞤤𞤲𞤣𞤵 𞤸𞤢𞥄 𞤻𞤢𞤤𞤲𞤣𞤫 𞤩𞤢𞤤𞤲𞤣𞤵 𞤲𞤣𞤵𞤲 𞤸𞤢𞤼𞤮𞤲𞤶𞤭𞤲𞤭 𞤫 𞤥𞤵𞤲 𞤳𞤢𞤣𞤭. 𞤑𞤮𞤲𞤮 𞤧𞤮 𞤲𞤫𞤯𞥆𞤮 𞤮𞤲 𞤲𞤮 𞤸𞤮𞥅𞤪𞤭 𞤸𞤢𞤪𞤢𞤴 𞤱𞤮𞥅𞤣𞤢𞤼𞤢𞥄 𞤻𞤢𞤥𞤣𞤵 𞤳𞤮 𞤩𞤢𞤤𞤲𞤣𞤵 𞤲𞤣𞤵𞤲 𞤧𞤵𞤲𞥆𞤢. 𞤐𞤣𞤫𞤲 𞤧𞤢𞤴⹁ 𞤲𞤣𞤵 𞤬𞤵𞤯𞥆𞤮𞤼𞤮 𞤳𞤭𞤧𞤢𞤲 𞤧𞤵𞤲𞥆𞤵𞤣𞤫 𞤩𞤫𞤤𞥆𞤫𞤪𞤫 𞤥𞤢𞤪𞤭𞤲𞤮𞥅𞤲𞤣𞤫 𞤲𞤣𞤫𞤲 𞤫 𞤲𞤣𞤫𞤪 𞤲𞤫𞤯𞥆𞤮 𞤮𞤲.

𞤑𞤮𞥅𞤪𞤳𞤢  𞤬𞤭𞤲𞤣𞤭𞤲𞤢𞤴 𞤲𞤺𞤢𞥄𞤲𞤣𞤭 𞤩𞤫𞤴𞤣𞤢 𞤲𞤺𞤫𞥅𞤼𞤵 

𞤑𞤮𞥅𞤪𞤳𞤢 𞤳𞤢𞤲 𞤱𞤢𞤤𞥆𞤢𞤴 𞤲𞤫𞤯𞥆𞤮 𞤣𞤢𞤯𞤵𞤺𞤮𞤤 𞤬𞤫𞥅𞤼𞤫𞤪𞤫 𞤫 𞤱𞤭𞤤𞤢𞥄𞤣𞤫 𞤫 𞤵𞤧𞤼𞤢𞥄𞤣𞤫 𞤲𞤺𞤫𞥅𞤼𞤵 𞤥𞤢𞤤𞥆𞤢 𞤸𞤢𞤹𞥆𞤭𞤤. 𞤅𞤢𞤦𞤵 𞤳𞤮𞥅𞤪𞤳𞤢 𞤳𞤢𞤲 𞤲𞤫𞥅𞤩𞤼𞤭𞤲𞤢𞤴 𞤴𞤫𞥅𞤦𞤢𞤺𞤮𞤤 𞤺𞤫𞥅𞤰𞤭 𞤲𞤺𞤢𞥄𞤲𞤣𞤭 𞤯𞤭𞤲. 𞤖𞤮𞥅𞤪𞤵𞤺𞤮𞤤 𞤱𞤮𞤲𞤢𞤴 𞤳𞤢𞤣𞤭 𞤧𞤢𞤦𞤵 𞤴𞤮 𞤺𞤫𞥅𞤰𞤭 𞤳𞤫𞤧𞤭 𞤩𞤫𞤴𞤣𞤮 𞤳𞤢 𞤲𞤺𞤢𞥄𞤲𞤣𞤭.  

 𞤑𞤮𞥅𞤪𞤳𞤢  𞤧𞤫𞤥𞤦𞤭𞤲𞤢𞤴 𞤣𞤢𞤯𞤭𞤼𞤮𞤪𞤯𞤫 𞤩𞤢𞤤𞤲𞤣𞤵 𞤲𞤣𞤵𞤲

 𞤌𞤯𞤮𞤲 𞤢𞤲𞤣𞤭 𞤸𞤮𞤤 𞤳𞤮 𞤱𞤢𞤯𞤭 𞤲𞤢𞤱𞤲𞤵𞤯𞤮 𞤴𞤭𞤯𞤢𞥄 𞤻𞤢𞥄𞤥𞤵𞤺𞤮𞤤؟ 𞤍𞤵𞤥 𞤳𞤮 𞤳𞤢 𞤲𞤺𞤢𞥄𞤲𞤣𞤭 𞤭𞤥𞥆𞤮𞤪𞤭. 𞤑𞤮 𞤳𞤢𞤲𞤣𞤭 𞤱𞤮𞤲𞤭 𞤴𞤢𞤥𞤭𞤪𞤣𞤫 𞤩𞤢𞤤𞤲𞤣𞤵 𞤲𞤣𞤵𞤲 𞤴𞤮 𞤲𞤣𞤵 𞤧𞤢𞤤𞤮 𞤻𞤢𞥄𞤥𞤣𞤵 𞤬𞤭𞥅 𞤴𞤮 𞤲𞤣𞤵 𞤸𞤭𞤤𞤲𞤮 𞤸𞤢𞤩𞤵𞤺𞤮𞤤 𞤲𞤢𞤱𞤲𞤢𞥄𞤪𞤫 𞤲𞤣𞤫𞤲. 𞤍𞤵𞤲 𞤳𞤮 𞤬𞤭𞥅 𞤱𞤮𞤼𞤢 𞤣𞤮𞥅𞤤𞤫 𞤩𞤢𞤤𞤲𞤣𞤵 𞤲𞤣𞤵𞤲 𞤧𞤫𞤲𞤣𞤭𞤼𞤮 𞤸𞤢𞤳𞤵𞤲’𞤣𞤫  𞤱𞤢𞤴𞤤𞤵𞤺𞤵𞤤 𞤻𞤢𞤥𞤣𞤵 𞤫 𞤸𞤢𞤩𞤵𞤺𞤮𞤤 𞤻𞤢𞤱𞤵. 𞤑𞤮 𞤼𞤢𞤰𞤭𞤪𞤺𞤮𞤤 𞤳𞤮𞥅𞤪𞤳𞤢 𞤳𞤢𞤲 𞤣𞤭𞤥𞤯𞤫 𞤤𞤫𞤯𞥆𞤫 𞤩𞤵𞤪𞤭 𞤱𞤮𞤲𞤣𞤵𞤣𞤫 𞤫 𞤲𞤢𞤬𞤮𞥅𞤪𞤫 .

𞤑𞤮𞥅𞤪𞤳𞤢  𞤸𞤫𞤷𞥆𞤭𞤲𞤯𞤭𞤲𞤢𞤴  𞤺𞤵𞤪𞤭𞤤 𞤫 𞤩𞤢𞤤𞤲𞤣𞤵

𞤐𞤣𞤫 𞤼𞤢𞤱𞤲𞤮𞥅 𞤳𞤮𞥅𞤪𞤳𞤢 𞤳𞤢𞤲 𞤱𞤢𞤤𞥆𞤢𞤴 𞤩𞤢𞤤𞤲𞤣𞤵 𞤲𞤣𞤵𞤲 𞤴𞤢𞤤𞤼𞤭𞤲𞤺𞤮𞤤 𞤼𞤮𞥅𞤳𞤫 𞤯𞤫𞤲 𞤳𞤢𞤻𞤵𞤲 𞤫 𞤸𞤫𞥅𞤯𞤭𞤲𞤼𞤭𞤲𞤺𞤮𞤤 𞤺𞤫𞥅𞤰𞤭 𞤯𞤭𞤲⹁ 𞤯𞤵𞤲 𞤱𞤢𞤤𞥆𞤢𞤴 𞤺𞤵𞤪𞤭𞤤 𞤲𞤺𞤭𞤤 𞤸𞤫𞤷𞥆𞤵𞤯𞤵𞤺𞤮𞤤.

 𞤑𞤮𞥅𞤪𞤳𞤢  𞤱𞤢𞤤𞥆𞤢𞤴 𞤲𞤫𞤯𞥆𞤮 𞤣𞤢𞤯𞤵𞤺𞤮𞤤 𞤻𞤢𞤦𞥆𞤭 𞤳𞤫𞥅𞤱𞤵𞤯𞤭 𞤱𞤢𞤲𞤮 𞤲𞤢𞤱𞤲𞤢𞥄𞤪𞤫 𞤤𞤫𞤱𞤻𞤵 𞤥𞤢𞥄 𞤩𞤵𞥅𞤪𞤭⹁ 𞤥𞤢𞥄 𞤳𞤢𞤲𞤧𞤫𞥅𞤪 𞤫 𞤲𞤢𞤱𞤲𞤢𞥄𞤶𞤫 𞤩𞤫𞤪𞤲𞤣𞤫.

𞤑𞤮𞥅𞤪𞤳𞤢 𞤲𞤮 𞤱𞤮𞥅𞤲𞤣𞤭 𞤫 𞤲𞤢𞤬𞤮𞥅𞤶𞤫 𞤳𞤫𞥅𞤱𞤵𞤯𞤫 𞤸𞤢𞤴 𞤯𞤫 𞤢𞤲𞤣𞤢𞥄𞤳𞤢 𞤬𞤭𞥅 𞤥𞤵𞤲 𞤼𞤢𞤸𞤮. 𞤃𞤮 𞤸𞤮𞥅𞤪𞤭 𞤲𞤮𞤲⹁ 𞤱𞤮𞤲𞤢𞥄 𞤴𞤮 𞤮𞤲𞤼𞤭𞤺𞤭 𞤬𞤢𞤲𞤼𞤭𞤲 𞤻𞤢𞥄𞤥𞤣𞤮 𞤲𞤣𞤵𞤲 𞤳𞤢 𞤼𞤢𞤰𞤵𞤺𞤮𞤤⹁ 𞤻𞤢𞥄𞤥𞤢 𞤲𞤣𞤫 𞤱𞤮𞥅𞤼𞤫𞤪𞤫 𞤳𞤮 𞤻𞤢𞥄𞤥𞤢𞤴𞤲𞤮𞥅 𞤳𞤮𞤲 𞤬𞤮𞤱 𞤻𞤢𞤤𞤮𞤪𞤥𞤢. 𞤑𞤮 𞤴𞤮 𞤮𞤲𞤼𞤭𞤺𞤭 𞤸𞤢𞤳𞤭𞤲𞤣𞤭𞤲 𞤻𞤢𞤥𞤣𞤵 𞤲𞤣𞤵𞤲⹁ 𞤯𞤵𞤯𞥆𞤭𞤲𞤮𞤪𞤢 𞤣𞤭𞤥𞤯𞤫 𞤤𞤫𞤯𞥆𞤫 𞤫 𞤳𞤫𞤷𞥆𞤭 𞤯𞤭𞤲⁏ 𞤪𞤫𞥅𞤲𞤮𞥅 𞤳𞤢𞤣𞤭 𞤫 𞤬𞤢𞤲𞤼𞤭𞤲𞤺𞤮𞤤 𞤤𞤢𞤥𞤯𞤢𞤲 𞤥𞤢𞥄 𞤧𞤵𞤳𞥆𞤢𞤪. 𞤍𞤵𞤲 𞤬𞤮𞤱 𞤳𞤮 𞤫 𞤴𞤵𞤪𞤥𞤫𞥅𞤲𞤣𞤫 𞤫 𞤣𞤵𞤽𞤢𞤴𞤫𞥅 𞤘𞤫𞤲𞤮 𞤅𞤫𞤲𞤭𞥅𞤯𞤮 𞤮𞤲.