𞤁𞤢𞤱𞤪𞤮 𞤫 𞤩𞤢𞥄𞤱𞤮 𞤣𞤢𞤱𞤪𞤮𞥅𞤩𞤫
𞤏𞤮𞤼𞤢 𞤮𞤲 𞤶𞤭𞤳𞥆𞤭𞤲𞤮𞤪 𞤬𞤮𞤼𞤢 𞤩𞤫𞤲 𞤱𞤢𞤯𞤵𞤩𞤫 𞤣𞤢𞤱𞤪𞤮 𞤲𞤺𞤮𞤲 𞤥𞤫𞤷𞥆𞤫 𞤥𞤵𞤲. 𞤅𞤮 𞤼𞤢𞤱𞤭𞥅 𞤳𞤮 𞤫 𞤯𞤵𞤲 𞤩𞤫 𞤱𞤵𞥅𞤪𞤭⹁ 𞤩𞤫 𞤺𞤫𞤪𞤢𞤴 𞤺𞤫𞤪𞤣𞤫𞤼𞤫𞥅𞤯𞤫 𞤬𞤮𞤨⹁ 𞤩𞤫 𞤪𞤫𞤱𞤢 𞤤𞤢𞥄𞤱𞤭 𞤯𞤭𞤲 𞤬𞤮𞤬 𞤲𞤮 𞤩𞤫 𞤸𞤭𞤧𞤭𞤲𞤭𞤪𞤢 𞤲𞤺𞤵𞥅𞤪𞤫𞥅 𞤥𞤢𞤩𞥆𞤫. 𞤀𞤲𞥆𞤣𞤫𞥅𞤶𞤭 𞤥𞤮𞤲 𞤱𞤮𞤲𞤢𞤼𞤢𞥄 𞤸𞤢𞥄𞤶𞤵 𞤥𞤢𞤩𞥆𞤫. 
𞤐𞤮 𞤱𞤮𞥅𞤣𞤭 𞤳𞤢 𞤥𞤫𞤲 𞤴𞤭𞤥𞤩𞤫⹁ 𞤩𞤫 𞤼𞤢𞤱𞤢𞤼𞤢 𞤧𞤮 𞤱𞤮𞤲𞤢𞥄𞤲𞤮 𞤲𞤺𞤮𞥅 𞤣𞤢𞤱𞤪𞤮⹁ 𞤩𞤫 𞤸𞤫𞤩𞤢𞤼𞤢𞥄𞤲𞤮 𞤳𞤮 𞤩𞤫 𞤸𞤵𞥅𞤱𞤢. 𞤀 𞤼𞤢𞤱𞤢𞤴 𞤳𞤮 𞤲𞤢𞥄𞤣𞤭 𞤩𞤫𞤲 𞤫 𞤣𞤢𞤱𞤪𞤮⹁ 𞤳𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤩𞤫 𞤴𞤢𞤤𞤼𞤭𞤲𞤢𞥄𞤥𞤢 𞤫 𞤺𞤮𞤤𞥆𞤫 𞤥𞤢𞤤𞥆𞤢 𞤫𞤩𞤫 𞤯𞤢𞤩𞥆𞤵𞤣𞤫 𞤺𞤮𞤤𞥆𞤫. 𞤃𞤢𞥄𞤲𞤣𞤫 𞤥𞤢𞤩𞥆𞤫 𞤥𞤢𞤱𞤲𞤣𞤫 𞤲𞤣𞤫𞤲⹁ 𞤳𞤮 𞤱𞤢𞥄𞤧𞤫𞥅𞤣𞤫 𞤧𞤫𞤤𞥆𞤵𞤺𞤮𞤤 𞤬𞤭𞤲𞤣𞤫. 𞤑𞤮 𞤳𞤢 𞤸𞤢𞥄𞤶𞤵 𞤥𞤢𞤩𞥆𞤫 𞤺𞤢𞤧𞤢𞤼𞤢 𞤱𞤮𞥅⹁ 𞤳𞤮 𞤯𞤮𞤲 𞤩𞤫 𞤴𞤢𞤸𞤪𞤢𞤼𞤢. 𞤏𞤮𞤲𞤢𞥄 𞤲𞤣𞤭𞤥𞤵⹁ 𞤱𞤮𞤲𞤢𞥄 𞤳𞤮𞤲𞤺𞤮𞤤 𞤱𞤮𞥅𞤣𞤭 𞤳𞤮 𞤩𞤫 𞤣𞤢𞤪𞤢𞤲𞤭𞥅. 𞤏𞤮𞤲𞤢𞥄 𞤳𞤮 𞤐𞤢𞤬𞤢𞤼𞤢 𞤶𞤢𞤥𞤢𞥄 𞤮𞤲 𞤢𞥄𞤲𞤭𞤲𞤼𞤢 𞤩𞤫. 𞤒𞤭𞤥𞤩𞤫 𞤩𞤫𞤲 𞤤𞤢𞥄𞤼𞤢𞥄𞤲𞤢𞥄𞤳𞤭 𞤩𞤫⹁ 𞤧𞤮 𞤱𞤮𞤲𞤢𞥄 𞤳𞤮 𞤩𞤫 𞤸𞤵𞥅𞤱𞤼𞤮𞤪𞤢 𞤬𞤭𞥅 𞤲𞤮 𞤩𞤫 𞤸𞤫𞤬𞤼𞤭𞤪𞤢 𞤬𞤢𞥄𞤤𞤫 𞤥𞤢𞤩𞥆𞤫. 𞤇𞤫 𞤢𞥄𞤥𞤢𞤼𞤢𞥄 𞤸𞤢𞤴 𞤭𞤼𞥆𞤵𞤣𞤫 𞤴𞤭𞤥𞤩𞤫 𞤩𞤫𞤲 𞤧𞤢𞤣𞤢𞤳𞤢 𞤬𞤭𞥅 𞤲𞤮 𞤴𞤫𞤤𞤢 𞤥𞤢𞤩𞥆𞤫 𞤤𞤢𞥄𞤼𞤮𞤪𞤢. 𞤑𞤮 𞤩𞤫𞥅 𞤴𞤫𞥅𞤦𞤭 𞤭𞤲𞤣𞤫 𞤣𞤢𞤱𞤪𞤮 𞤸𞤢𞥄 𞤳𞤢 𞤼𞤢𞤱𞤢𞤼𞤢⹁ 𞤴𞤭𞤥𞤩𞤫 𞤲𞤵𞤲𞤯𞤵𞤩𞤫 𞤴𞤭𞤯𞤢𞥄 𞤸𞤢𞤴 𞤩𞤢𞤣𞤢𞤺𞤮𞤤 𞤣𞤢𞤱𞤪𞤮 𞤲𞤺𞤮𞤲 𞤶𞤮𞥅𞤲𞤭.
𞤉 𞤸𞤭𞤲𞤤𞤫⹁ 𞤣𞤢𞤱𞤪𞤮 𞤳𞤮 𞤯𞤢𞤩𞥆𞤭𞤪𞤲𞤺𞤮 𞤫 𞤸𞤵𞤩𞤲𞤭𞤪𞤲𞤺𞤮 𞤤𞤢𞥄𞤥𞤵⹁ 𞤬𞤭𞥅 𞤲𞤮 𞤮𞤲𞤼𞤭𞤺𞤭 𞤱𞤢𞤤𞥆𞤭𞤪𞤢 𞤴𞤭𞤥𞤩𞤫 𞤩𞤫𞤲. 𞤑𞤮 𞤯𞤵𞤲 𞤱𞤢𞤯𞤭⹁ 𞤧𞤭 𞤣𞤢𞤱𞤪𞤮 𞤱𞤮𞤲𞤢𞥄 𞤥𞤫𞤷𞥆𞤫. 𞤐𞤣𞤫 𞤼𞤢𞤱𞤵𞤲𞤮𞥅 𞤥𞤫𞤷𞥆𞤫 𞤯𞤫𞤲 𞤬𞤮𞤨 𞤲𞤮 𞤺𞤢𞤧𞤢 𞤸𞤵𞥅𞤱𞤼𞤮𞤪𞤫𞥅𞤣𞤫 𞤫 𞤣𞤢𞤱𞤪𞤮. 𞤑𞤢𞤤𞤢 𞤳𞤢𞤣𞤭 𞤴𞤭𞤯𞤵𞤯𞤮⹁ 𞤲𞤮 𞤱𞤢𞥄𞤱𞤭 𞤵𞤳𞥆𞤢𞤣𞤫 𞤫 𞤣𞤢𞤱𞤪𞤮.
𞤏𞤮𞤲𞤭 𞤧𞤭 𞤳𞤮 𞤮𞤲 𞤻𞤢𞤱𞤲𞤣𞤮𞥅𞤩𞤫 𞤥𞤢𞤤𞥆𞤢 𞤤𞤢𞤦𞥆𞤮𞥅𞤩𞤫 𞤥𞤢𞥄 𞤸𞤫𞤩𞥆𞤭𞤼𞤮𞤼𞤮𞥅𞤩𞤫 𞤥𞤢𞥄𞤴𞤩𞤫⹁ 𞤧𞤭 𞤼𞤢𞤱𞤭𞥅 𞤼𞤵𞤲 𞤮𞤯𞤮𞤲 𞤶𞤮𞤺𞤭𞥅 𞤨𞤫𞤸𞤫 𞤫 𞤥𞤭𞥅𞤶𞤮 𞤳𞤮 𞤢𞤪𞤣𞤭𞤲𞤮𞤲⁏ 𞤮𞤯𞤮𞤲 𞤱𞤢𞥄𞤱𞤭 𞤱𞤢𞤯𞤵𞤣𞤫 𞤣𞤢𞤱𞤪𞤮. 𞤑𞤮𞤲𞤮 𞤧𞤭 𞤴𞤭𞤥𞤩𞤫 𞤩𞤫𞤲 𞤶𞤢𞤩𞤢𞤲𞤢𞥄𞤤𞤭 𞤮𞤲 𞤨𞤫𞤸𞤫 𞤥𞤮𞤲⹁ 𞤩𞤫 𞤧𞤵𞤩𞤭𞤳𞤫 𞤨𞤫𞤸𞤫 𞤱𞤮𞥅𞤼𞤩𞤫⹁ 𞤲𞤣𞤫𞤲 𞤳𞤮 𞤴𞤮 𞤮𞤲 𞤪𞤵𞤼𞥆𞤮 𞤫 𞤺𞤮𞤤𞥆𞤫 𞤥𞤮𞤲 𞤯𞤫 𞤱𞤮𞥅𞤱𞤵 𞤯𞤮𞤲 𞤸𞤵𞥅𞤱𞤵𞤣𞤫.
𞤑𞤮 𞤦𞤮𞤲𞥆𞤢𞤲𞤭 𞤀𞤬𞤪𞤭𞤳𞤭⹁ 𞤳𞤮 𞤲𞤣𞤫 𞤼𞤢𞤱𞤲𞤮𞥅⹁ 𞤲𞤮 𞤸𞤫𞤲 𞤴𞤭𞤥𞤩𞤫⹁ 𞤩𞤫 𞤢𞤤𞤢𞥄 𞤸𞤢𞤴 𞤸𞤵𞥅𞤲𞤣𞤫 𞤳𞤮 𞤩𞤫 𞤸𞤵𞥅𞤱𞤢. 𞤏𞤮𞤲𞤢𞥄 𞤨𞤫𞤸𞤫 𞤯𞤫 𞤩𞤫 𞤸𞤵𞤲𞤮𞥅⹁ 𞤱𞤮𞤲𞤢𞥄 𞤲𞤦𞤢𞤱𞤳𞤭 𞤳𞤭 𞤩𞤫 𞤱𞤫𞥅𞤩𞤭𞤼𞤢 𞤦𞤢𞤲𞤽𞤫 𞤺𞤮𞥅. 𞤑𞤮 𞤧𞤢𞤦𞤵 𞤯𞤵𞤲 𞤧𞤮 𞤩𞤫 𞤸𞤢𞤩𞥆𞤭𞤼𞤮𞤪𞤭 𞤫 𞤣𞤢𞤱𞤪𞤮. 𞤑𞤮 𞤯𞤵𞤲 𞤱𞤢𞤯𞤭 𞤫𞤩𞤫 𞤭𞤲𞥆𞤭𞤼𞤮𞥅 “𞤣𞤢𞤱𞤪𞤮𞥅𞤩𞤫”. 𞤐𞤣𞤫 𞤼𞤢𞤱𞤲𞤮𞥅 𞤳𞤮 𞤫 𞤯𞤵𞤲⹁ 𞤩𞤫 𞤸𞤫𞤩𞤢𞤼𞤢𞥄 𞤲𞤺𞤵𞥅𞤪𞤫𞥅 𞤥𞤢𞤩𞥆𞤫.
𞤐𞤮 𞤫 𞤥𞤢𞤩𞥆𞤫 𞤳𞤢𞤣𞤭⹁ 𞤴𞤭𞤥𞤩𞤫 𞤲𞤵𞤲𞥆𞤢𞤴𞤩𞤫 𞤬𞤫𞤸𞤪𞤫 𞤦𞤭𞤥𞤦𞤭⹁ 𞤬𞤭𞥅𞤤𞤮𞥅 𞤤𞤭𞤣𞥆𞤵 𞤲𞤣𞤫𞤲 𞤬𞤫𞤸𞤪𞤫 𞤳𞤭𞥅𞤳𞤭𞥅𞤯𞤫. 𞤖𞤢𞤲𞤣𞤫⹁ 𞤫𞤩𞤫 𞤣𞤢𞤪𞤼𞤮𞥅 𞤤𞤢𞥄𞤥𞤵⹁ 𞤶𞤢𞤲𞤺𞤮 𞤫𞤩𞤫 𞤴𞤭𞤤𞤼𞤢𞤲𞤢 𞤲𞤺𞤵𞤲 𞤤𞤢𞥄𞤥𞤵 𞤨𞤢𞤯𞤫. 𞤇𞤫 𞤧𞤢𞤯𞤲𞤢𞤼𞤢𞥄 𞤳𞤮 𞤩𞤫 𞤤𞤢𞥄𞤥𞤭𞤼𞤮𞤪𞤢 𞤬𞤭𞥅 𞤱𞤫𞥅𞤥𞤫𞤪𞤫 𞤥𞤢𞥄 𞤧𞤢𞤲𞤧𞤢𞤲𞤼𞤵𞤺𞤮𞤤 𞤥𞤢𞤩𞥆𞤫. 𞤐𞤮 𞤫 𞤥𞤢𞤩𞥆𞤫 𞤳𞤢𞤣𞤭⹁ 𞤱𞤮𞥅𞤼𞤩𞤫 𞤥𞤢𞤲𞤼𞤮𞤪𞤢𞤴𞤩𞤫 𞤣𞤵𞥅𞤩𞤭 𞤷𞤢𞤨𞥆𞤢𞤲𞤯𞤫⹁ 𞤯𞤭 𞤩𞤫 𞤬𞤫𞤰𞥆𞤭𞤲𞤭 𞤫𞤩𞤫 𞤱𞤫𞤥𞤦𞤭𞤪𞤢 𞤴𞤭𞤥𞤩𞤫 𞤩𞤫𞤲 𞤨𞤫𞤸𞤫 𞤥𞤫𞤸𞤫.
𞤈𞤫𞥅𞤲𞤮 𞤯𞤫𞤲 𞤫 𞤩𞤫𞤲 𞤱𞤢𞤯𞤵𞤩𞤫 𞤣𞤢𞤱𞤪𞤮 𞤥𞤫𞤷𞥆𞤫 𞤥𞤵𞤲.
𞤀 𞤶 𞤄𞤢𞤪𞤭
𞤃𞤭 𞤬𞤵𞤯𞥆𞤭𞤳𞤫 𞤶𞤢𞤲𞤺𞤵𞤲’𞤺𞤮𞤤 𞤥𞤭 𞤤𞤢𞤲𞥆𞤭𞤲𞤼𞤭𞤲𞤢𞥄𞤳𞤭 𞤼𞤢𞤱𞤮. 𞤑𞤮𞤲𞤮 𞤥𞤭 𞤊𞤢𞤤𞤼𞤢𞥄𞤳𞤭 𞤳𞤮 𞤱𞤮𞤲𞤭 𞤣𞤢𞤱𞤪𞤮