𞤏𞤵𞥅𞤪𞤵𞤺𞤮𞤤 𞤯𞤫𞤲𞤺𞤢𞤤

𞤐𞤫𞤯𞥆𞤢𞤲𞤳𞤫 𞤳𞤢𞤤𞤢⹁ 𞤲𞤮𞤳𞥆𞤵 𞤳𞤢 𞤮 𞤱𞤮𞤲𞤭𞤪𞤭 𞤱𞤮𞥅 𞤫 𞤲𞤮𞥅𞤲𞤫 𞤲𞤮 𞤮 𞤧𞤭𞤬𞤮𞤪𞤭 𞤳𞤢𞤤𞤢⹁ 𞤧𞤫𞤴 𞤮 𞤸𞤵𞥅𞤱𞤮𞤣𞤭𞤪𞤢 𞤫 𞤩𞤫 𞤮 𞤱𞤵𞥅𞤪𞤭𞤣𞤭 𞤩𞤫𞤲. 

𞤐’𞤺𞤢𞤤 𞤸𞤵𞥅𞤱𞤮𞤣𞤭𞤪𞤢𞤤 𞤲𞤮𞤲⹁ 𞤲𞤺𞤢𞤤 𞤤𞤢𞥄𞤼𞤮𞤼𞤢𞥄𞤳𞤮 𞤧𞤭 𞤱𞤮𞤲𞤢𞥄 𞤫 𞤼𞤮𞤲𞤼𞤮𞤣𞤭𞤪𞤢𞤤. 𞤐𞤺𞤢𞤤 𞤯𞤮𞥅 𞤳𞤢𞤣𞤭 𞤳𞤮 𞤫 𞤴𞤫𞤱𞤼𞤵𞤺𞤮𞤤 𞤲𞤢𞤲𞤮𞤣𞤭𞤪𞤢⹁ 𞤬𞤢𞤸𞤥𞤮𞤣𞤭𞤪𞤢 𞤴𞤮𞤱𞤭𞤼𞤭𞥅. 𞤑𞤮 𞤯𞤵𞤥 𞤱𞤢𞤯𞤭 𞤧𞤭 𞤳𞤮𞤲𞤺𞤵𞤯𞤭 𞤫 𞤬𞤮𞤼𞥆𞤢𞤲𞤢𞥄𞤯𞤭 𞤸𞤭𞤼𞤮 𞤲𞤮 𞤤𞤢𞥄𞤼𞤭𞥅 𞤯𞤫𞤲𞤺𞤢𞤤 𞤳𞤢𞤬𞤵. 

𞤍𞤫𞤲𞤯𞤭𞤲𞤳𞤮𞥅𞤩𞤫 𞤩𞤫𞤲 𞤲𞤮 𞤱𞤭𞤭 𞤱𞤮𞤲𞤣𞤫 𞤳𞤮 𞤯𞤫𞤲𞤯𞤫 𞥗𞥐𞥐𞥐 (𞤵𞤶𞤵𞤲𞤫 𞤶𞤫𞥅𞤯𞤭𞤯𞤭) 𞤱𞤮𞤲𞤭 𞤳𞤢 𞤢𞤣𞤵𞤲𞤢𞥄𞤪𞤵 𞤣𞤵𞤲. 𞤉 𞤣𞤫𞤪 𞤯𞤫𞤲 𞤯𞤮𞤲⹁𞤳𞤮 𞤴𞤢𞤱𞤼𞤭 𞤯𞤫𞤲𞤯𞤫 𞥒𞥐𞥐𞥐 (𞤺𞤵𞤤𞤵𞥅𞤶𞤫 𞤯𞤭𞤯𞤭) 𞤱𞤭𞤲𞥆𞤵𞤯𞤫  𞤫 𞤲𞤣𞤫𞤪 𞤀𞤬𞤪𞤭𞤳𞤢.

𞤍𞤫𞤲𞤯𞤭𞤲𞤳𞤮𞥅𞤩𞤫 𞤳𞤢 “𞤉𞤣 𞤫 𞤀𞤳𞤧𞤭𞤴𞤮𞤲” (aide&action) 𞤲𞤮 𞤱𞤭𞤭: “𞤫 𞤲𞤣𞤫𞤪 𞤶𞤮𞤲𞤼𞤫 𞤯𞤭𞤯𞤭 𞤳𞤢𞤤𞤢⹁ 𞤯𞤫𞤲𞤺𞤢𞤤 𞤲𞤮 𞤥𞤵𞤤𞤢𞤴 𞤳𞤢 𞤸𞤮𞥅𞤪𞤫 𞤤𞤫𞤴𞤣𞤭 𞤯𞤮𞥅”.

𞤃𞤵𞤼𞤵𞤺𞤮𞤤 𞤱𞤢𞤤𞥆𞤢 𞤥𞤵𞤤𞤵𞤺𞤮𞤤 𞤯𞤫𞤲𞤺𞤢𞤤 𞤳𞤮 𞤸𞤢𞤴𞤪𞤫𞤪𞤫 𞤥𞤢𞤱𞤲𞤣𞤫 𞤱𞤮𞤲𞤢𞤲𞤣𞤫 𞤨𞤭𞤲𞤫 𞤩𞤭𞥅 𞤢𞥄𞤣𞤢𞤥𞤢 𞤯𞤫𞤲. 𞤍𞤵𞤥 𞤳𞤮 𞤴𞤫𞥅𞤦𞤢𞤺𞤮𞤤 𞤲𞤺𞤢𞤤𞤵 𞤱𞤮𞤲𞤢𞤲𞤣𞤫 𞤱𞤭𞤲𞤣𞤫𞤪𞤫 𞤲𞤣𞤫𞤲. 𞤇𞤢𞤴⹁ 𞤲𞤣𞤫 𞤯𞤫𞤲𞤺𞤢𞤤 𞤥𞤵𞤤𞤭 𞤱𞤮𞥅⹁ 𞤲𞤺𞤢𞤤 𞤥𞤵𞤤𞤭𞤣𞤢𞤴 𞤫 𞤳𞤢𞤤𞤢 𞤳𞤮 𞤧𞤮𞥅𞤥𞤭𞥅 𞤫 𞤥𞤢𞤺𞥆𞤢𞤤 𞤫 𞤺𞤢𞤲𞤣𞤫⹁ 𞤨𞤭𞤲𞤫⹁ 𞤬𞤢𞤸𞤥𞤵⹁ 𞤼𞤢𞤧𞤢𞤳𞤵𞤴𞤫𞥅𞤶𞤭 ….𞤯𞤭 𞤱𞤮𞤱𞤤𞤢𞤴𞤲𞤮𞥅𞤩𞤫 𞤲𞤺𞤢𞤤 𞤥𞤢𞤪𞤵𞤲𞤮𞥅⹁ 𞤼𞤢𞤱𞤢 𞤯𞤭 𞤱𞤢𞥄𞤱𞤢𞤼𞤢𞥄 𞤫𞤺𞥆𞤭𞤲𞤫𞥅𞤣𞤫 𞤫 𞤯𞤫𞤲𞤺𞤢𞤤 𞤺𞤮𞤮.

𞤖𞤮𞤤 𞤯𞤵𞤥 𞤱𞤮𞤲𞤭 𞤳𞤮 𞤥𞤵𞤤𞤲𞤢𞤼𞤢 𞤯𞤫𞤲𞤺𞤢𞤤؟

𞤑𞤮 𞤢𞤲𞤺𞤢𞤤 𞤸𞤵𞤱𞤼𞤮𞤪𞤫𞥅𞤣𞤫 𞤢𞤣𞥆𞤢𞤼𞤢 𞤥𞤵𞤤𞤵𞤺𞤮𞤤 𞤯𞤫𞤲𞤺𞤢𞤤. 𞤚𞤵𞤥𞤢 𞤼𞤢𞤱𞤭 𞤶𞤫𞤴𞤩𞤫 𞤯𞤫𞤲𞤺𞤢𞤤 𞤢𞤷𞥆𞤭𞤼𞤭𞥅 𞤸𞤢𞥄𞤤𞤵𞤣𞤫 𞤲𞤺𞤢𞤤⹁ 𞤸𞤫𞤣𞥆𞤭𞥅𞤩𞤫 𞤩𞤫𞤲 𞤴𞤭𞤢𞤼𞤢𞥄 𞤲𞤢𞤬𞤮𞥅𞤪𞤫  𞤫 𞤸𞤢𞥄𞤤𞤵𞤺𞤮𞤤 𞤲𞤺𞤢𞤤⹁ 𞤲𞤣𞤫𞤲⹁ 𞤲’𞤺𞤢𞤤 𞤥𞤢𞤶𞥆𞤢𞤴. 

𞤖𞤮𞤤 𞤲𞤮 𞤯𞤫𞤲𞤺𞤢𞤤 𞤱𞤵𞥅𞤪𞤭𞤪𞤼𞤢؟

𞤍𞤫𞤲𞤺𞤢𞤤 𞤲𞤮 𞤱𞤢𞤭 𞤱𞤢 𞤼𞤫𞤪𞤢𞤤⹁ 𞤧𞤭 𞤲𞤺𞤢𞤤 𞤺𞤮𞤤𞥆𞤭𞤼𞤭𞤪𞤢𞥄𞤳𞤢⹁ 𞤲𞤺𞤢𞤤 𞤤𞤮𞤢𞤴⹁ 𞤲𞤺𞤢𞤤 𞤥𞤢𞥄𞤴𞤢…𞤲𞤣𞤫𞤲 𞤧𞤢𞤴 𞤱𞤭𞤫𞥅: 𞤲’𞤺𞤢𞤤 𞤥𞤵𞤤𞤭𞥅. 𞤊𞤭𞥅 𞤲𞤮𞤲 𞤴𞤮 𞤲𞤺𞤢𞤤 𞤱𞤵𞥅𞤪𞤵𞥅⹁ 𞤲𞤺𞤢𞤤 𞤸𞤭𞤧𞤢⹁ 𞤱𞤢𞤤𞥆𞤢 𞤲𞤺𞤢𞤤 𞤣𞤢𞤯𞤢 𞤥𞤵𞤤𞤵𞤺𞤮𞤤⹁ 𞤸𞤭𞤲𞤮 𞤤𞤫𞤴 𞤯𞤮𞤮 𞤴𞤮𞤺𞤢 𞤉 𞤳𞤮 𞤸𞤢𞥄𞤲𞤢𞥄 𞤱𞤢𞤯𞤼𞤢𞤲𞤫𞥅𞤣𞤫 𞤸𞤭𞥅𞤤𞤭 𞤫 𞤥𞤵𞤲:

𞥑- 𞤑𞤮 𞤢𞤣𞤭𞥅𞤳𞤮𞤲 𞤬𞤮𞤱⹁ 𞤧𞤫𞤴 𞤲𞤮𞤣𞥆𞤭𞤼𞤮𞤪𞤩𞤫 𞤤𞤫𞤻𞤮𞤤 𞤥𞤢𞤺𞥆𞤢𞤤 𞤱𞤮𞤱𞤤𞤢 𞤲𞤺𞤢𞤤⁏ 𞤯𞤵𞤥 𞤲𞤮𞤲 𞤳𞤮 𞤬𞤮𞤯𞥆𞤭𞥅 𞤳𞤮 𞤺𞤭𞤤𞤢 𞤳𞤢 𞤩𞤫𞤴𞤺𞤵𞥅𞤪𞤫𞥅𞤶𞤭. 𞤑𞤮 𞤴𞤮 𞤩𞤭𞤯𞤩𞤫 𞤩𞤫𞤲 𞤸𞤢𞥄𞤤𞤢𞤲𞤫 𞤫 𞤥𞤢𞤺𞥆𞤢𞤤⹁ 𞤩𞤫 𞤱𞤮𞥅𞤱𞤢 𞤲𞤢𞤲𞤵𞤺𞤮𞤤 𞤲𞤺𞤢𞤤 𞤸𞤢𞥄 𞤩𞤫 𞤱𞤢𞥄𞤱𞤢 𞤱𞤮𞤱𞤤𞤵𞤣𞤫. 𞤅𞤢𞤦𞤵 𞤦𞤮𞥅𞤦𞤮 𞤲𞤮 𞤱𞤢𞤭 𞤱𞤢 𞤯𞤫𞤪𞤮𞤤 𞤥𞤫𞤸𞤮𞤤⹁ 𞤳𞤮 𞤳𞤢𞤤𞤢 𞤳𞤮 𞤥𞤢𞤱𞤩𞤫 𞤥𞤢𞤳𞥆𞤮 𞤩𞤫𞤲 𞤱𞤭𞤲𞤣𞤭 𞤫 𞤥𞤢𞤺𞥆𞤮𞤤 𞤴𞤭𞤥𞤩𞤫 𞤩𞤫𞤲 𞤶𞤢𞤲𞤺𞤢𞤼𞤢. 𞤑𞤮 𞤯𞤵𞤥 𞤱𞤮𞤲𞤭 𞤳𞤮 𞤴𞤮 𞤩𞤭𞤯𞤩𞤫 𞤲𞤫𞤭𞤪𞤫 𞤯𞤫𞤲𞤺𞤢𞤤 𞤲𞤺𞤢𞤤. 

𞥒- 𞤱𞤮𞥅𞤱𞤭𞤲𞤮𞥅 𞤱𞤮𞤱𞤤𞤵𞤺𞤮𞤤 𞤯𞤫𞤲𞤺𞤢𞤤 𞤥𞤵𞤲 𞤳𞤢 𞤺𞤢𞤤𞥆𞤫𞥅𞤶𞤭⹁ 𞤴𞤫𞤱𞤼𞤭𞤣𞤢 𞤫 𞤩𞤫𞤴𞤺𞤵 𞤥𞤵𞤲 𞤱𞤢𞤤𞥆𞤢 𞤥𞤮𞥅𞤣𞤭 𞤥𞤵𞤲 𞤳𞤢 𞤯𞤫𞤲𞤺𞤢𞤤 𞤥𞤵𞤲. 𞤉𞤼𞤮𞥅 𞤳𞤢𞤣𞤭 𞤸𞤢𞤪𞤢 𞤳𞤢𞤤𞤢 𞤥𞤮 𞤶𞤫𞤴𞤢𞥄𞤳𞤢 𞤫 𞤤𞤫𞤻𞤮𞤤 𞤲𞤺𞤮𞤤⹁ 𞤧𞤭 𞤼𞤢𞤱𞤭𞥅 𞤼𞤵𞤲 𞤳𞤮 𞤮 𞤸𞤮𞤯𞤣𞤢𞥄𞤯𞤮⹁ 𞤮 𞤸𞤵𞤱𞤼𞤮𞤪𞤢 𞤯𞤫𞤲𞤺𞤢𞤤 𞤶𞤮𞤥 𞤺𞤢𞤤𞥆𞤫 𞤯𞤫𞤲. 𞤊𞤮𞤼𞤭 𞤮𞤲𞤼𞤭𞤺𞤭 𞤳𞤮 𞤦𞤢𞤤𞥆𞤮⹁ 𞤱𞤢𞤤𞥆𞤢 𞤸𞤭𞤱𞤮𞥅𞤱𞤮⹁  𞤥𞤢𞥄 𞤣𞤫𞤬𞤮𞥅𞤱𞤮⹁ 𞤥𞤢𞥄 𞤣𞤮𞤺𞤭𞤲𞤮𞥅𞤱𞤮….𞤫 𞤳𞤲𞤯.

𞥓- 𞤴𞤫𞥅𞤴𞤭𞤪𞤢⹁ 𞤧𞤮𞥅𞤣𞤭𞤪𞤢 𞤯𞤫𞤲𞤺𞤢𞤤 𞤲𞤺𞤢𞤤⹁ 𞤧𞤢𞤦𞤵 𞤳𞤮 𞤺𞤭𞤤𞤢 𞤳𞤢 𞤤𞤵𞥅𞤥𞤮 𞤯𞤫𞤲𞤺𞤢𞤤 𞤩𞤵𞤪𞤢𞤼𞤢 𞤶𞤢𞥄𞤤𞤮𞤪𞤣𞤫 𞤫 𞤧𞤢𞥄𞤪𞤫 𞤱𞤢𞤤𞥆𞤢 𞤫 𞤤𞤫𞤴𞤣𞤭. 𞤑𞤢𞤤𞤢 𞤴𞤭𞤯𞤵𞤯𞤮 𞤴𞤮 𞤸𞤢𞥄𞤤𞤢 𞤥𞤵𞤲 𞤴𞤢𞥄𞤶𞤵  ⹁ 𞤮𞤲𞤼𞤭𞤺𞤭 𞤪𞤫𞥅𞤲𞤮𞤼𞤮 𞤫 𞤸𞤵𞤱𞤼𞤮𞤪𞤺𞤮𞤤 𞤯𞤫𞤲𞤺𞤢𞤤 𞤶𞤢𞤲𞤢𞤲𞤢 𞤳𞤢 𞤧𞤮𞥅𞤣𞤢-𞤴𞤫𞥅𞤴𞤢.

𞥔- 𞤳𞤢 𞤴𞤭𞥅𞤤𞤭𞤲𞤭𞤪𞤯𞤫 𞤳𞤢𞤣𞤭⹁ 𞤧𞤭 𞤯𞤫𞤲𞤺𞤢𞤤 𞤬𞤫𞤽𞤭𞤳𞤫 𞤫 𞤸𞤵𞤲𞤣𞤮𞤳𞤮 𞤣𞤮𞤺𞤭𞤲𞤢𞤴𞤩𞤫 𞤳𞤢𞤻𞤵𞤲 𞤫 𞤣𞤫𞤲𞤣𞤢𞥄𞤺𞤢𞤤 𞤶𞤮𞤳𞥆𞤭𞥅𞤩𞤫 𞤩𞤫 𞤩𞤫𞤲 𞤳𞤢 𞤴𞤭𞥅𞤤𞤭𞤲𞤭𞤪𞤯𞤫⹁ 𞤸𞤢𞤪𞤢𞤴 𞤲’𞤺𞤢𞤤 𞤯𞤮𞤲 𞤼𞤢𞤦𞤭𞤼𞤢𞤴 𞤫 𞤲𞤣𞤫𞤲 𞤼𞤵𞤯𞥆𞤫𞤪𞤫 𞤯𞤮𞤲.

𞥕- 𞤶𞤢𞤲𞤺𞤭𞤪𞤢⹁ 𞤶𞤢𞤲𞤺𞤭𞤲𞤭𞤪𞤢 𞤍𞤫𞤲𞤺𞤢𞤤 𞤲𞤺𞤢𞤤: 𞤧𞤭 𞤣𞤵𞤯𞤫 𞤯𞤫𞤲 𞤧𞤵𞤩𞤭𞤳𞤫 𞤯𞤫𞤲𞤺𞤢𞤤⹁ 𞤯𞤫 𞤤𞤮𞤲𞤺𞤭𞤲𞤭𞤪𞤭𞥅 𞤲𞤺𞤢𞤤 𞤳𞤢𞤤𞤢 𞤶𞤢𞤲𞤺𞤢𞤲𞤢𞥄𞤳𞤵𞥅𞤶𞤮 𞤺𞤢𞤲𞤣𞤢𞤤⹁ 𞤸𞤢𞤪𞤢𞤴 𞤲’𞤺𞤢𞤤 𞤣𞤢𞤯𞤭𞥅 𞤥𞤵𞤤𞤵𞤺𞤮𞤤.

𞥖- 𞤀𞥄𞤤𞤢𞥄𞤶𞤭𞤭 𞤳𞤵𞤥𞤨𞤭𞤼𞤫 𞤯𞤫𞤲 𞤧𞤭 𞤸𞤵𞤱𞤼𞤮𞤪𞤭𞥅 𞤍𞤫𞤲𞤺𞤢𞤤⹁ 𞤲𞤺𞤢𞤤 𞤶𞤢𞥄𞤤𞤮𞤼𞤮. 𞤅𞤭 𞤼𞤢𞤱𞤭𞥅 𞤳𞤭𞤦𞤭𞤪𞤯𞤫 𞤯𞤫𞤲 (radios) 𞤰𞤫𞤱𞤤𞤫 𞤯𞤫𞤲 (TV)⹁ 𞤸𞤫𞤧𞤤𞤫 …. 𞤉 𞤳𞤲𞤯 𞤱𞤭𞤲𞤣𞤭𞥅⹁ 𞤱𞤮𞤱𞤤𞤭𞥅⹁ 𞤸𞤮𞤤𞥆𞤭𞥅 𞤯𞤫𞤲𞤺𞤢𞤤⹁ 𞤲𞤺𞤢𞤤 𞤯𞤮𞤲 𞤣𞤮𞤤𞤲𞤢𞤴.

𞥗- 𞤇𞤫 𞤭𞤲𞤣𞤫 𞤥𞤵𞤲 𞤤𞤮𞤤𞥆𞤭𞤪𞤭 𞤺𞤢𞤲𞤣𞤢𞤤⹁ 𞤶𞤢𞤱𞤣𞤭⹁ 𞤤𞤢𞥄𞤥𞤵⹁ 𞤻𞤫𞥅𞤻𞤢𞤤⹁ 𞤯𞤢𞤪𞤼𞤮…..𞤧𞤭 𞤩𞤫𞥅 𞤸𞤢𞥄𞤤𞤭𞥅 𞤯𞤫𞤲𞤺𞤢𞤤⹁ 𞤯𞤵𞤥 𞤲𞤮 𞤩𞤫𞤴𞤣𞤢 𞤸𞤭𞤥𞥆𞤫 𞤫 𞤱𞤮𞤱𞤤𞤵𞤺𞤮𞤤 𞤯𞤫𞤲𞤺𞤢𞤤 𞤲𞤺𞤢𞤤 𞤱𞤢𞤤𞥆𞤢 𞤶𞤢𞤲𞤺𞤵𞤲𞤺𞤮𞤤 𞤲𞤺𞤢𞤤.

𞤍𞤫𞤲𞤺𞤢𞤤 𞤆𞤵𞤤𞤢𞤪 𞤲𞤺𞤢𞤤

𞤍𞤫𞤲𞤺𞤢𞤤 𞤨𞤵𞤤𞤢𞤪 𞤲𞤮 𞤼𞤢𞤱𞤢𞥄 𞤫 𞤯𞤫𞤲𞤯𞤫 𞤯𞤫 𞤲𞤢𞤱𞤢𞥄𞤪𞤫 𞤤𞤮𞤵𞤺𞤮𞤤 𞤫 𞤥𞤵𞤤𞤵𞤺𞤮𞤤 𞤬𞤫𞤱𞤼𞤭. 𞤱𞤮𞤲𞤢𞥄 𞤬𞤭𞥅 𞤊𞤵𞤤𞤩𞤫 𞤩𞤫𞤲 𞤲𞤮 𞤯𞤵𞥅𞤯𞤭 𞤼𞤢𞤲 𞤸𞤢𞤯𞤢𞤼𞤢𞥄 𞤨𞤵𞤤𞤢𞤪 𞤴𞤮 𞤥𞤵𞤤𞤵. 𞤐𞤺𞤢𞤤 𞤣𞤢𞤯𞤭𞥅 𞤱𞤮𞥅⹁ 𞤧𞤭 𞤩𞤫 𞤱𞤢𞤳𞥆𞤭𞤤𞤭𞤳𞤫 𞤱𞤮𞤱𞤤𞤵𞤺𞤮𞤤 𞤨𞤵𞤤𞤢𞤪⹁ 𞤩𞤫 𞤢𞤷𞥆𞤭𞥅 𞤸𞤫𞤪𞤧𞤭𞤪𞤺𞤮𞤤 𞤯𞤫𞤲𞤺𞤢𞤤 𞤥𞤢𞤩𞥆𞤫⹁ 𞤩𞤫 𞤸𞤢𞤯𞤭𞤼𞤮𞥅 𞤫 𞤩𞤵𞤪𞤲𞤵𞤺𞤮𞤤 𞤯𞤫𞤴𞤢 𞤯𞤫𞤲𞤯𞤫 𞤫 𞤣𞤮𞤱 𞤨𞤵𞤤𞤢𞤪 𞤲𞤺𞤢𞤤.

𞤅𞤭 𞤫𞤲 𞤼𞤢𞤧𞤳𞤭𞤳𞤫 𞤧𞤫𞥅𞤯𞤢⹁ 𞤫𞤲 𞤼𞤢𞤱𞤢𞤴 𞤊𞤵𞤤𞤩𞤫 𞤩𞤫𞤲 𞤵𞤧𞤼𞤮𞤪𞤢𞥄𞤥𞤢 𞤸𞤢𞥄𞤤𞤢𞤴𞤩𞤫 𞤨𞤵𞤤𞤢𞤪. 𞤄𞤵𞤴⹁ 𞤯𞤫𞤲𞤺𞤢𞤤 𞤲𞤺𞤢𞤤 𞤥𞤢𞤶𞥆𞤭𞤪𞤭𞥅 𞤯𞤵𞤥.  𞤐𞤮 𞤫 𞤩𞤫𞤲: 

-𞤊𞤵𞤤𞤩𞤫 𞤱𞤢𞥄𞤧𞤮𞤤𞤮𞤲 𞤶𞤫𞤴𞤢𞥄𞤩𞤫 𞤸𞤢𞤳𞥆𞤵𞤲’𞤣𞤫 𞤘𞤭𞤲𞤫⹁ 𞤳𞤮𞤣𞥆𞤭𞤾𞤢𞥄𞤪 𞤫 𞤃𞤢𞥄𞤤𞤭. 𞤆𞤵𞤤𞤢𞤪 𞤥𞤢𞤶𞥆𞤭𞤪𞤭𞥅 𞤩𞤫⹁ 𞤶𞤮𞤲𞤼𞤢 𞤳𞤢𞤲⹁ 𞤳𞤮 𞤥𞤢𞤲𞤣𞤭𞤲𞤳𞤮𞥅𞤪𞤫 𞤲𞤣𞤫𞤲 𞤼𞤢𞤲 𞤩𞤫 𞤸𞤢𞥄𞤤𞤢𞤼𞤢. 

-𞤊𞤵𞤤𞤩𞤫 𞤅𞤫𞤲𞤫𞤺𞤢𞥄𞤤⹁ 𞤥𞤢𞤯𞥆𞤭𞥅𞤩𞤫 𞤶𞤮𞤤𞤬𞤮𞥅𞤪𞤫

-𞤊𞤵𞤤𞤩𞤫 𞤐𞤢𞤶𞤫𞤪𞤭𞤴𞤢𞥄 𞤫 𞤐𞤭𞥅𞤶𞤫𞥅𞤪 𞤼𞤢𞤱𞤼𞤵𞤩𞤫 𞤸𞤢𞤱𞤧𞤢𞥄𞤩𞤫…

– 𞤊𞤵𞤤𞤩𞤫 𞤕𞤢𞥄𞤣𞤭 𞤫 𞤅𞤵𞤣𞤢𞤲 𞤭𞤲𞥆𞤭𞤼𞤮𞤪𞤩𞤫 𞤢𞥄𞤪𞤢𞤦𞤵.

-𞤑𞤢𞥄𞤧𞤮𞤲𞤳𞤫𞥅𞤩𞤫 𞤃𞤢𞥄𞤤𞤭⹁ 𞤸𞤢𞥄𞤤𞤮𞥅𞤩𞤫 𞤦𞤢𞤥𞤦𞤢𞤪𞤢…

𞤐𞤮 𞤸𞤢𞥄𞤲𞤭 𞤲𞤣𞤫 𞤊𞤵𞤤𞤩𞤫 𞤩𞤫𞤲 𞤱𞤢𞤯𞤼𞤢𞤲𞤼𞤢 𞤸𞤭𞥅𞤤𞤢 𞤫 𞤯𞤫𞤲𞤺𞤢𞤤 𞤥𞤢𞤩𞥆𞤫⹁ 𞤲𞤺𞤢𞤤 𞤩𞤫 𞤪𞤮𞤲𞤭 𞤥𞤢𞤱𞤩𞤫 𞤥𞤢𞤩𞥆𞤫⹁ 𞤲𞤺𞤢𞤥 𞤴𞤮 𞤱𞤢𞥄𞤱𞤵 𞤪𞤮𞤲𞤵𞤣𞤫 𞤲𞤺𞤢𞤤 𞤩𞤫𞤧𞤺𞤮 𞤥𞤢𞤩𞥆𞤫.

 𞤊𞤫𞤱𞤣𞤮 𞤸𞤢𞤲𞤣𞤫⹁ 𞤯𞤫𞤲𞤺𞤢𞤤 𞤆𞤵𞤤𞤢𞤪 𞤸𞤫𞤩𞤭𞥅 𞤳𞤮 𞤱𞤵𞥅𞤪𞤭𞤲𞤢 𞤲𞤺𞤢𞤤. 𞤍𞤵𞤥⹁ 𞤳𞤮 𞤢𞤪𞤵𞤺𞤮𞤤 𞤦𞤭𞤲𞤣𞤮𞤤 𞤀𞤁𞤂𞤃⹁ 𞤲𞤺𞤮𞤤 𞤲𞤮 𞤱𞤫𞥅𞤩𞤭𞤪𞤢 𞤧𞤢𞤦𞤵 𞤥𞤵𞤲⹁ 𞤶𞤢𞤲𞤺𞤵𞤺𞤮𞤤 𞤫 𞤶𞤢𞤲𞤺𞤭𞤲𞤺𞤮𞤤 𞤆𞤵𞤤𞤢𞤪⹁ 𞤸𞤵𞤩𞤭𞤲’𞤣𞤮𞥅⹁ 𞤸𞤭𞤱𞤢 𞤨𞤭𞤲𞤫 𞤫 𞤦𞤮𞤱𞤳𞤢 𞤊𞤵𞤤𞤩𞤫 𞤲𞤮 𞤲𞤫𞤱𞤮𞤪𞤭 𞤲𞤮 𞤤𞤢𞥄𞤩𞤭𞤪𞤭. 

“𞤏𞤭𞤲𞤣𞤫𞤲 𞤶𞤢𞤲𞤺𞤫𞤲 𞤯𞤫𞤲𞤺𞤢𞤤 𞤥𞤫𞤲 𞤢𞤣𞤤𞤥 𞤳𞤮 𞤦𞤭𞤲𞤣𞤮𞤤 𞤥𞤫𞤲” 𞤱𞤢𞤲𞤮 𞤧𞤮𞤲𞥆𞤢 𞤀𞤴𞤧𞤢𞤼𞤵 𞤅𞤮𞥅 𞤱𞤮𞥅𞤱𞤭𞤪𞤭 𞤸𞤮𞤥𞤦𞤭𞤪𞤣𞤫 𞤶𞤫𞤱𞤼𞤫 𞤸𞤢𞤳𞥆𞤮 .

𞤂𞤀𞤃𞤀𞤈𞤀𞥄𞤐𞤀 𞤔𞤀𞤂𞥆𞤌

𞤀𞤄𞤋𞤔𞤀𞤐 𞤑. 𞤜𞤢𞥄𞤪