𞤖𞤮𞥅𞤪𞤫𞥅𞤩𞤫 𞥔𞥐 𞤫 𞤳𞤮 𞤬𞤢𞤱𞤭 𞤢𞤬𞤪𞤭𞤳𞤢𞥄𞤩𞤫⹁ 𞤳𞤮 𞤩𞤫𞤲⹁ 𞤸𞤮𞥅𞤪𞤫𞥅𞤶𞤮 𞤈𞤮𞥅𞤧𞤭𞤴𞤢 𞤮𞤲 𞤼𞤮𞤤𞤲𞤭 𞤳𞤢 𞤤𞤫𞤴𞤣𞤭 𞤥𞤢𞤳𞥆𞤮 𞤬𞤭𞥅 𞤼𞤵𞤥𞤦𞤮𞤲’𞤣𞤭𞤪𞤢𞤤. 𞤑𞤮 𞤫 𞤧𞤢𞥄𞤪𞤫 𞤭𞤲𞥆𞤫𞤼𞤫𞥅𞤲𞤣𞤫 𞤅𞤮𞥅𞥃𞤭𞥅⹁ 𞤱𞤮𞤲𞤣𞤫 𞤼𞤢𞤳𞥆𞤮 𞤃𞤢𞥄𞤴𞤮 𞤇𞤢𞤤𞤫𞤱𞤮 𞤲𞤺𞤮𞤲⹁ 𞤼𞤵𞤥𞤦𞤮𞤲’𞤣𞤭𞤪𞤢𞤤 𞤤𞤢𞥄𞤼𞤭𞥅⹁ 𞤺𞤭𞤤𞤢 𞥒𞥓 𞤸𞤢𞥄 𞥒𞥓 𞤒𞤢𞤪𞤳𞤮 𞥒𞥐𞥑𞥙.

𞤊𞤢𞥄𞤲𞤣𞤢𞥄𞤪𞤫 𞤊𞤤𞤢𞤣𞤥𞤭𞥅𞤪 𞤆𞤵𞤼𞤭𞤲 𞤬𞤢𞥄 𞤲𞤺𞤢𞤤 𞤥𞤮𞤩𞤼𞤮𞤲𞤣𞤭𞤪𞤢𞤤 𞤳𞤮

𞤧𞤫𞤥𞤦𞤭𞤲𞤺𞤮𞤤 𞤫 𞤴𞤢𞥄𞤶𞤲𞤵𞤺𞤮𞤤 𞤸𞤵𞥅𞤱𞤮𞤲𞤣𞤭𞤪𞤢𞤤 𞤸𞤢𞤳𞥆𞤵𞤲’𞤣𞤫 𞤈𞤮𞥅𞤧𞤭𞤴𞤢 𞤫 𞤤𞤫𞤴𞤯𞤫 𞤀𞤬𞤪𞤭𞤳𞤢𞥄 𞤯𞤫𞤲. 𞤉 𞤲𞤣𞤫𞤪 𞤴𞤫𞤱𞤼𞤫𞤪𞤫 𞤥𞤢𞤳𞥆𞤮 𞤲𞤣𞤫𞤲⹁ 𞤆𞤵𞤼𞤭𞤲 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢⹁ 𞤶𞤮𞤲𞤼𞤢⹁ 𞤈𞤮𞥅𞤧𞤭𞤴𞤢 𞤲𞤮 𞤴𞤫𞥅𞤴𞤵𞤣𞤫 𞤫 𞤤𞤫𞤴𞤯𞤫 𞤀𞤬𞤪𞤭𞤳𞤢𞥄 𞤳𞤮 𞤴𞤱𞤢𞤼𞤭 𞤁𞤵𞤦𞤵𞤲𞤫 𞥒𞥕 𞤣𞤢𞤤𞤢 𞤫 𞤻𞤢𞥄𞤥𞤯𞤭 𞤫 𞤳𞤮 𞤴𞤢𞤱𞤼𞤭 𞤣𞤵𞤦𞤵𞤲𞤫 𞥑𞥕 𞤣𞤢𞤤𞤢 𞤫 𞤢𞥄𞤤𞤢𞥄𞤶𞤭 𞤳𞤮𞤲𞥆𞤭𞤪𞤯𞤭. 𞤊𞤢𞥄𞤤𞤫 𞤥𞤢𞤳𞤮 𞤲𞤮𞤲⹁ 𞤳𞤮 𞤲𞤣𞤫 𞤣𞤵𞥅𞤩𞤭 𞤶𞤮𞤱𞤭 𞤲𞤮 𞤼𞤭𞤥𞥆𞤢⹁ 𞤴𞤮 𞤼𞤢𞤱𞤵 𞤸𞤢𞤪𞤢𞤴 𞤈𞤮𞥅𞤧𞤭𞤴𞤢 𞤲𞤮 𞤴𞤫𞥅𞤴𞤵𞤣𞤫 𞤳𞤮 𞤴𞤢𞤱𞤼𞤭 𞤷𞤮𞤱𞤢𞤲𞤯𞤫 𞤯𞤭𞤯𞤭 𞤳𞤮 𞤩𞤫 𞤱𞤮𞤲𞤭 𞤫 𞤴𞤫𞥅𞤴𞤵𞤣𞤫 𞤳𞤮𞤲 𞤀𞤬𞤪𞤭𞤳𞤢𞥄 𞤸𞤢𞤲𞤣𞤫.

𞤊𞤢𞥄𞤲𞤣𞤢𞥄𞤪𞤫 𞤸𞤮𞥅𞤪𞤫𞥅𞤩𞤫 𞤢𞤬𞤪𞤭𞤳𞤢𞥄 𞤫 𞤲𞤮𞥅𞤼𞤢𞤺𞤮𞤤 𞤲𞤮𞤣𞥆𞤢𞤲𞤣𞤵 𞤆𞤵𞤼𞤭𞤲 𞤲𞤣𞤵𞤲⹁ 𞤳𞤮 𞤯𞤢𞤩𞥆𞤫𞤪𞤫 𞤦𞤢𞤤𞥆𞤢𞤤 𞤫 𞤬𞤢𞥄𞤦𞤮 𞤳𞤢𞤻𞤵𞤲 𞤫 𞤲𞤣𞤢𞥄𞤪𞤵𞤺𞤮𞤤 𞤢𞥄𞤤𞤢𞥄𞤶𞤭 𞤳𞤮𞤲𞥆𞤭𞤪𞤯𞤭 𞤳𞤫𞤧𞤭 𞤯𞤭 𞤩𞤫 𞤧𞤮𞥅𞤣𞤢. 𞤑𞤢𞤣𞤭⹁ 𞤳𞤮 𞤸𞤫𞥅𞤱𞤭 𞤫 𞤖𞤮𞥅𞤪𞤫𞥅𞤩𞤫 𞤀𞤬𞤪𞤭𞤳𞤢𞥄 𞤩𞤫𞤲 𞤲𞤮 𞤴𞤭𞤯𞤭 𞤸𞤵𞥅𞤱𞤮𞤲𞤣𞤭𞤪𞤺𞤮𞤤 𞤫 𞤈𞤮𞥅𞤧𞤭𞤴𞤢 𞤫 𞤕𞤢𞤴𞤲𞤢. 𞤑𞤮 𞤱𞤮𞤲𞤭 𞤧𞤢𞤦𞤵 𞤯𞤵𞤲⹁ 𞤳𞤮 𞤲𞤣𞤫 𞤼𞤢𞤱𞤲𞤮𞥅 𞤯𞤫𞤲 𞤤𞤫𞤴𞤯𞤫 𞤯𞤭𞤯𞤭⹁ 𞤧𞤢𞤪𞤼𞤭𞤲𞤭𞤪𞤼𞤢𞥄 𞤦𞤢𞤤𞥆𞤢𞤤 𞤥𞤢𞤩𞥆𞤫 𞤲𞤺𞤢𞤤⹁ 𞤲𞤵𞤲𞤯𞤢𞤤 𞤫 𞤼𞤮𞤼𞥆𞤵𞤺𞤮𞤤 𞤸𞤢𞤳𞥆𞤫𞥅𞤶𞤭 𞤺𞤫𞤲𞤣𞤭𞤴𞤢𞤲𞤳𞤮𞥅𞤩𞤫 𞤤𞤫𞤴𞤯𞤫 𞤢𞤬𞤪𞤭𞤳𞤢𞥄 𞤯𞤫𞤲.

𞤐𞤣𞤫 𞤼𞤢𞤱𞤲𞤮𞥅 𞤤𞤫𞤴𞤯𞤫 𞤀𞤬𞤪𞤭𞤳𞤢𞥄 𞤯𞤫𞤲⹁ 𞤢𞤤𞤢𞥄 𞤥𞤮𞤰𞥆𞤭𞤲𞤣𞤫 𞤨𞤭𞥅𞤶𞤭 𞤯𞤵𞥅𞤯𞤵𞤯𞤭 𞤳𞤮 𞤩𞤫 𞤴𞤫𞥅𞤴𞤢⹁ 𞤸𞤵𞥅𞤱𞤮𞤲’𞤣𞤭𞤪𞤢𞤤 𞤥𞤢𞤩𞥆𞤫 𞤫 𞤕𞤢𞤴𞤲𞤢 𞤥𞤢𞥄 𞤈𞤮𞥅𞤧𞤭𞤴𞤢𞥄 𞤱𞤮𞤲𞤣𞤢𞤲𞤢𞥄 𞤀𞤬𞤪𞤭𞤳𞤢𞥄 𞤫 𞤲𞤢𞤬𞤮𞥅𞤪𞤫. 𞤑𞤮 𞤯𞤫𞤲 𞤤𞤫𞤴𞤯𞤫 𞤶𞤢𞤲𞤢𞤲𞤫 𞤼𞤢𞤲 𞤲𞤢𞤬𞤭𞤼𞤮𞤪𞤼𞤢 𞤲𞤺𞤢𞤤 𞤸𞤵𞥅𞤱𞤮𞤲’𞤣𞤭𞤪𞤢𞤤. 𞤔𞤢𞤱𞤤𞤫 𞤲𞤣𞤫𞤪 𞤤𞤫𞤴𞤯𞤫 𞤥𞤫𞤲⹁ 𞤩𞤫 𞤢𞤧𞤢⹁ 𞤩𞤢 𞤢𞤣𞤢 𞤩𞤫 𞤱𞤢𞤴𞤤𞤢 𞤳𞤢 𞤤𞤫𞤴𞤯𞤫 𞤥𞤫𞤲. 𞤂𞤫𞤴𞤯𞤫 𞤀𞤬𞤪𞤭𞤳𞤢𞥄 𞤸𞤫𞤣𞥆𞤮𞤣𞤢 𞤫 𞤺𞤢𞤴𞤯𞤫 𞤫 𞤲𞤣𞤭𞤴𞤫 𞤼𞤮𞥅𞤳𞤢𞥄𞤯𞤫 𞤫 𞤦𞤵𞤪𞤵𞥅𞤶𞤫 𞤧𞤮𞤨𞥆𞤢𞥄𞤯𞤫.

𞤅𞤭 𞤈𞤮𞥅𞤧𞤭𞤴𞤢 𞤼𞤵𞤲 𞤲𞤮 𞤴𞤫𞥅𞤴𞤵𞤣𞤫 𞤫𞤲 𞤣𞤵𞤦𞤵𞤲𞤫 𞥕𞥐 𞤣𞤢𞤤𞤢 𞤫 𞤻𞤢𞤥𞤯𞤭 𞤥𞤢𞥄 𞤢𞥄𞤤𞤢𞥄𞤶𞤭⹁ 𞤫𞤲𞤫𞤲 𞤀𞤬𞤪𞤭𞤳𞤢𞥄⹁ 𞤸𞤮𞤤 𞤳𞤮 𞤬𞤮𞤼𞤭 𞤳𞤮 𞤱𞤮𞤲𞤯𞤫𞤲 𞤴𞤫𞥅𞤴𞤵𞤣𞤫 𞤈𞤮𞥅𞤧𞤭𞤴𞤢؟ 𞤐𞤣𞤫 𞤼𞤢𞤱𞤲𞤮𞥅 𞤀𞤬𞤪𞤭𞤳𞤢𞥄 𞤲𞤮 𞤸𞤫𞤷𞥆𞤭𞤯𞤭 𞤩𞤵𞤪𞤭 𞤈𞤮𞥅𞤧𞤭𞤴𞤢⹁ 𞤸𞤮𞤤 𞤲𞤮 𞤈𞤮𞥅𞤧𞤭𞤴𞤢𞥄⹁ 𞤤𞤫𞤴𞤣𞤭 𞤨𞤫𞥅𞤱𞤲𞤺𞤮𞤤⹁ 𞤴𞤫𞥅𞤴𞤭𞤪𞤼𞤢 𞤀𞤬𞤪𞤭𞤳𞤢𞥄 𞤣𞤢𞤤𞤢 𞤣𞤵𞤦𞤵𞤲𞤫 𞥒𞥕 𞤻𞤢𞤥𞤯𞤭؟

𞤖𞤮𞤷𞥆𞤭𞤼𞤢𞤺𞤮𞤤 𞤫 𞤼𞤮𞤪𞤢𞤺𞤮𞤤⹁ 𞤩𞤢𞤲𞤼𞤢𞤼𞤢𞥄 𞤤𞤫𞤴𞤯𞤫 𞤀𞤬𞤪𞤭𞤳𞤢𞥄. 𞤑𞤮 𞤺𞤮𞤤𞥆𞤫 𞤫 𞤤𞤢𞥄𞤥𞤩𞤫 𞤲𞤵𞤲𞤯𞤵𞤩𞤫⹁ 𞤳𞤮 𞤯𞤵𞤲 𞤩𞤢𞤲𞤼𞤢𞤼𞤢 𞤀𞤬𞤪𞤭𞤳𞤢𞥄.