𞤑𞤮 𞤬𞤵𞤯𞥆𞤮𞤪𞤲𞤮𞥅 𞤣𞤢𞤪𞤭𞥅𞤩𞤫 𞥒𞥙 (𞤲𞤮𞥅𞤺𞤢𞤴 𞤫 𞤶𞤫𞥅𞤲𞤢𞤴𞤮) 𞤲𞤺𞤢𞤥 𞤣𞤢𞤪𞤢𞤲𞤢𞤺𞤮𞤤 𞤊𞤫𞤣𞥆𞤫 𞤁𞤫𞤥𞤮𞤳𞤢𞤪𞤢𞤲𞤳𞤮𞥅𞤩𞤫 𞤩𞤫𞤲⹁ 𞤸𞤢𞤲𞤣𞤫 𞤳𞤮 𞤼𞤢𞤼𞤮 𞤼𞤢𞤲 𞤸𞤫𞤣𞥆𞤭𞥅. 𞤇𞤫𞤲 𞤼𞤢𞤼𞤮 𞤳𞤮 𞤔𞤮𞥅 𞤄𞤢𞤴𞤣𞤫𞤲⹁ 𞤄𞤫𞤪𞤲𞤭𞥅 𞤅𞤢𞤲𞤣𞤫𞤪𞤧 𞤳𞤢𞤻𞤵𞤲 𞤫 𞤚𞤵𞤤𞤧𞤭𞥅 𞤘𞤢𞤦𞤢𞥄𞤪𞤣.

𞤇𞤫𞤴𞤢 𞤳𞤢𞤲 𞤬𞤮𞤨 𞤧𞤢𞥄𞤥𞤭𞤪𞤭𞥅𞤲𞤮 𞤺𞤮𞥅𞤼𞤮 𞤺𞤮𞥅𞤼𞤮⹁ 𞤼𞤫𞤲𞤼𞤭𞤲𞤭𞥅 𞤩𞤢𞥄𞤱𞤮 𞤧𞤵𞤩𞤮 𞤲𞤺𞤮𞤲 𞤑𞤢𞥄𞤪𞤮𞤤𞤭𞥅𞤲𞤢 𞤸𞤮𞤪𞤣𞤮𞥅𞤪𞤫(𞤙𞤢𞥄𞤥𞤲𞤢𞥄𞤲𞤺𞤫)⹁ 𞤻𞤢𞤤𞤲𞤣𞤫 𞥒𞥙 (𞤲𞤮𞥅𞤺𞤢𞤴 𞤫 𞤶𞤫𞥅𞤲𞤢𞤴𞤭) 𞤕𞤮𞤤𞤼𞤮 𞥒𞥐𞥒𞥐. 

𞤑𞤮 𞤷𞤢𞤺𞥆𞤢𞤤 𞤲𞤺𞤮𞤲 𞤧𞤵𞤩𞤮 𞤩𞤢𞤲𞤺𞤢𞤲𞤭 𞤴𞤮𞤺𞤢 𞤫 𞤩𞤫𞥅 𞤸𞤫𞤣𞥆𞤭𞤲𞤮𞥅𞤩𞤫 𞤳𞤢 𞤬𞤮𞥅𞤤𞤮𞤼𞤭𞤪𞤮⹁ 𞤱𞤮𞤲𞤣𞤫 𞤩𞤫 𞤢𞤤𞤢𞥄 𞤤𞤢𞥄𞤱𞤮𞤤 𞤲𞤮 𞤩𞤫 𞤬𞤮𞥅𞤤𞤭𞤪𞤢. 𞤑𞤮 𞤫 𞤲𞤺𞤮𞤲 𞤅𞤵𞤩𞤮 𞤱𞤢𞤯𞤵𞤲𞤮𞥅 𞤲𞤺𞤮 𞤑𞤢𞥄𞤪𞤮𞤤𞤭𞥅𞤲𞤢 𞤖𞤮𞤪𞤣𞤮𞥅𞤪𞤫⹁ 𞤔𞤮𞥅 𞤄𞤢𞤴𞤣𞤫𞤲 𞤸𞤫𞤩𞤼𞤭 𞤸𞤮𞥅𞤪𞤫 𞤬𞤮𞥅𞤤𞤮𞤼𞤭𞤪𞤮 𞤲𞤺𞤮𞤲. 𞤅𞤢𞤦𞤵 𞤢𞤣𞤮 𞤲𞤣𞤫𞤲 𞤻𞤢𞤤𞤲𞤣𞤫⹁ 𞤦𞤵𞤴 𞤧𞤭𞤳𞥆𞤭𞥅 𞤸𞤢𞤪𞤭 𞤮 𞤬𞤵𞤳𞥆𞤭𞤳𞤫 𞤬𞤵𞤳𞥆𞤢𞤲𞤣𞤫⹁ 𞤲𞤣𞤫 𞤮 𞤱𞤢𞥄𞤱𞤢𞤼𞤢𞥄 𞤭𞤥𞥆𞤢𞥄𞤣𞤫 𞤫 𞤥𞤵𞤲. 

𞤑𞤮𞤲𞤮 𞤦𞤢𞤯𞤼𞤢𞤲𞤫 𞤯𞤵𞤥⹁ 𞤮 𞤬𞤮𞥅𞤤𞤵𞤲𞤮 𞤳𞤢𞤣𞤭 𞤫 𞤧𞤵𞤩𞤮 𞤃𞤢𞤱𞤦𞤢𞥄𞤪𞤫 𞤃𞤢𞤱𞤲𞤣𞤫 𞤲𞤣𞤫𞤲 (Super Tuesday). 𞤐𞤣𞤫𞤲 𞤻𞤢𞤤𞤲𞤣𞤫 𞤳𞤮 𞤫 𞤤𞤢𞤪𞤫 𞥑𞥕 (𞤧𞤢𞤨𞥆𞤮-𞤫-𞤶𞤮𞤱𞤭) 𞤧𞤵𞤩𞤮 𞤱𞤢𞤯𞤭 𞤫 𞤥𞤵𞤲. 𞤔𞤮𞥅 𞤄𞤢𞤴𞤣𞤫𞤲 𞤬𞤮𞥅𞤤𞤭 𞤫 𞤤𞤢𞤪𞤫 𞤧𞤢𞤨𞥆𞤮⹁ 𞤄𞤫𞤪𞤲𞤭𞥅 𞤅𞤢𞤲𞤣𞤫𞥅𞤪𞤧 𞤰𞤫𞤼𞥆𞤭 𞤤𞤢𞤪𞤫 𞤲𞤢𞤴𞤭. 𞤂𞤢𞤪𞤢𞤤 𞤸𞤫𞤣𞥆𞤭𞥅𞤲𞤺𞤢𞤤 𞤲𞤺𞤢𞤤 𞤴𞤢𞤸𞤢𞤲𞤭 𞤃𞤢𞤴𞤳𞤫𞤤 𞤄𞤤𞤵𞤥𞤦𞤫𞤪𞤺. 𞤑𞤮𞤲𞤮 𞤩𞤢𞥄𞤱𞤮 𞤯𞤵𞤥⹁ 𞤑𞤢𞤲𞤳𞤮 𞤄𞤤𞤵𞤥𞤦𞤫𞤪𞤺 𞤮 𞤴𞤢𞤤𞤼𞤵𞤲𞤮 𞤫 𞤬𞤮𞥅𞤤𞤮𞤼𞤭𞤪𞤮 𞤲𞤺𞤮𞤲. 𞤔𞤮𞥅𞤲𞤭 𞤳𞤮 𞤔𞤮𞥅 𞤄𞤢𞤴𞤣𞤫𞤲 𞤮 𞤱𞤮𞤲𞤢𞤲𞤭.

𞤑𞤮 𞤖𞤢𞤲𞤣𞤫 𞤳𞤢𞤣𞤭⹁ 𞤫 𞤃𞤢𞤱𞤦𞤢𞥄𞤪𞤫 𞤻𞤢𞤤𞤲𞤣𞤫 𞥑𞥐 𞤐𞤦𞤮𞥅𞤴𞤮⹁ 𞤼𞤢𞤼𞤮𞥅𞤩𞤫 𞤸𞤫𞤣𞥆𞤭𞥅𞤩𞤫 𞤩𞤫𞤲 𞤬𞤮𞥅𞤤𞤮𞤼𞤭𞤪𞤼𞤢 𞤫 𞤤𞤢𞤪𞤫 𞤥𞤢𞤤𞥆𞤢 𞤣𞤭𞥅𞤱𞤫 𞤶𞤫𞥅𞤺𞤮𞤮 (𞥖). 𞤅𞤭 𞤔𞤮𞥅 𞤄𞤢𞤴𞤣𞤫𞤲 𞤬𞤮𞥅𞤤𞤭𞥅 𞤳𞤢𞤣𞤭 𞤫 𞤯𞤫𞥅 𞤤𞤢𞤪𞤫 𞤸𞤢𞤲𞤣𞤫⹁ 𞤸𞤢𞤪𞤢𞤴 𞤼𞤵𞥅𞤥𞤢𞥄𞤳𞤢 𞤳𞤢 𞤄𞤫𞤪𞤲𞤭𞥅 𞤅𞤢𞤲𞤣𞤫𞤪𞤧 𞤸𞤫𞤱𞤼𞤭𞤼𞤮𞥅 𞤥𞤮. 𞤄𞤀𞤴𞤣𞤫𞤲 𞤸𞤫𞤩𞤭𞥅 𞤼𞤢𞤸𞤮 𞤲𞤺𞤢𞤳𞥆𞤭𞤤𞤢𞥄𞤩𞤫 𞤥𞤢𞤤𞥆𞤢 𞤣𞤫𞤤𞤫𞤺𞤢𞥄𞤩𞤫 𞥖𞥗𞥐 (𞤼𞤫𞥅𞤥𞤫𞤯𞥆𞤫 𞤶𞤫𞥅𞤺𞤮𞤮 𞤫 𞤷𞤢𞤨𞥆𞤢𞤲𞤯𞤫 𞤶𞤫𞥅𞤯𞤭𞤯𞤭)⹁ 𞤄𞤫𞤪𞤲𞤭𞥅 𞤅𞤢𞤲𞤣𞤫𞤪𞤧 𞤲𞤮 𞤥𞤢𞤪𞤭 𞥕𞥗𞥔 (𞤼𞤫𞥅𞤥𞤫𞤯𞥆𞤫 𞤶𞤮𞤱𞤭 𞤫 𞤷𞤢𞤨𞥆𞤢𞤲𞤯𞤫 𞤶𞤫𞥅𞤯𞤭𞤯𞤭 𞤫 𞤲𞤢𞤴𞤭). 𞤚𞤵𞤤𞤧𞤢𞥄 𞤘𞤢𞤦𞤢𞤪𞤣 𞤸𞤫𞤩𞤢𞥄𞤤𞤭 𞤧𞤮 𞤱𞤮𞤲𞤢𞥄 𞤲𞤺𞤢𞤳𞥆𞤭𞤤𞤢𞥄𞤩𞤫 𞤯𞤭𞤯𞤮 𞤨𞤫𞤼 𞤼𞤢𞤸𞤮.

𞤑𞤮 𞤬𞤮𞥅𞤤𞤵𞤯𞤮 𞤱𞤮𞥅 𞤫 𞤩𞤫𞥅 𞤯𞤮𞤮 𞤼𞤢𞤼𞤮⹁ 𞤣𞤢𞤪𞤼𞤮𞤼𞤮𞥅 𞤁𞤮𞤲𞤢𞤤 𞤚𞤪𞤮𞤥𞤨 𞤳𞤢 𞤧𞤵𞤩𞤮 𞤥𞤢𞤱𞤲𞤺𞤮. 𞤑𞤮 𞤳𞤢𞤲𞤳𞤮 𞤁𞤮𞤲𞤢𞤤 𞤚𞤪𞤮𞤥𞤨 𞤱𞤮𞤲𞤭 𞤳𞤮 𞤣𞤢𞤪𞤮𞤴𞤼𞤮𞥅 𞤫 𞤭𞤲𞤣𞤫 𞤬𞤫𞤣𞥆𞤫 𞤈𞤫𞤨𞤭𞤦𞤤𞤭𞤲𞤳𞤮𞥅𞤩𞤫 𞤩𞤫𞤲. 𞤑𞤮 𞤨𞤫𞤣𞤤𞤫 𞤥𞤢𞤱𞤯𞤫 𞤯𞤭𞤯𞤭 𞤬𞤮𞥅𞤤𞤮𞤼𞤭𞤪𞤼𞤢 𞤬𞤭𞥅 𞤤𞤢𞥄𞤥𞤢𞤺𞤮𞤤 𞤀𞤥𞤫𞤪𞤭𞤳. 𞤍𞤫𞤲 𞤳𞤮 𞤬𞤫𞤣𞥆𞤫 𞤈𞤫𞤨𞤭𞤦𞤤𞤭𞤲𞤳𞤮𞥅𞤩𞤫 𞤩𞤫𞤲 𞤳𞤢𞤻𞤵𞤲 𞤫 𞤬𞤫𞤣𞥆𞤫 𞤣𞤫𞤥𞤮𞤳𞤢𞤲𞤳𞤮𞥅𞤩𞤫 𞤩𞤫𞤲.

𞤖𞤮𞤤 𞤲𞤮 𞤣𞤢𞤪𞤮𞤼𞤮𞥅𞤯𞤮 𞤮𞤲 𞤫 𞤭𞤲𞤣𞤫 𞤬𞤫𞤣𞥆𞤫 𞤣𞤫𞤥𞤮𞤳𞤢𞤪𞤢𞤲𞤳𞤮𞥅𞤩𞤫 𞤩𞤫𞤲 𞤧𞤵𞤩𞤭𞤪𞤼𞤫𞥅؟

𞤐𞤮 𞤺𞤮𞤼𞤯𞤮 𞤣𞤢𞤪𞤼𞤮𞤪𞤢 𞤁𞤮𞤲𞤢𞤤 𞤚𞤪𞤮𞤥𞤨 𞤫 𞤭𞤲𞤣𞤫 𞤬𞤫𞤣𞥆𞤫 𞤣𞤫𞤥𞤮𞤳𞤢𞤪𞤢𞤲𞤳𞤮𞥅𞤩𞤫 𞤩𞤫𞤲⹁ 𞤮𞤲𞤼𞤭𞤺𞤭 𞤲𞤮 𞤸𞤢𞥄𞤲𞤣𞤭 𞤫 𞤲𞤺𞤢𞤳𞥆𞤭𞤤𞤢𞥄𞤩𞤫 𞥑𞥙𞥙𞥑 (𞤵𞤶𞤵𞤲𞤫𞤪𞤫 𞤫 𞤼𞤫𞥅𞤥𞤫𞤯𞥆𞤫 𞤶𞤫𞥅𞤲𞤢𞤴𞤭 𞤫 𞤷𞤢𞤨𞥆𞤢𞤲𞤯𞤫 𞤶𞤫𞥅𞤲𞤢𞤴𞤭 𞤫 𞤺𞤮𞤮). 𞤑𞤮 𞤭𞤼𞥆𞤭𞤪𞤭 𞤲𞤮 𞤤𞤢𞤪𞤢𞤤 𞤥𞤢𞤪𞤭𞤪𞤭 𞤱𞤮𞥅 𞤴𞤭𞤥𞤩𞤫⹁ 𞤲𞤺𞤢𞤤 𞤥𞤢𞤪𞤭𞤪𞤭 𞤲𞤺𞤢𞤳𞥆𞤭𞤤𞤢𞥄𞤩𞤫. 𞤑𞤮 𞤤𞤢𞤪𞤢𞤤 𞤑𞤢𞤤𞤭𞤬𞤮𞤪𞤲𞤭𞤴𞤢𞥄 𞤲𞤺𞤢𞤤 𞤩𞤵𞤪𞤭 𞤸𞤫𞥅𞤱𞤵𞤣𞤫 𞤲𞤺𞤢𞤳𞥆𞤭𞤤𞤢𞥄𞤩𞤫. 𞤑𞤢𞤲𞤺𞤢𞤤 𞤼𞤵𞤲⹁ 𞤳𞤮 𞤲𞤺𞤢𞤳𞥆𞤭𞤤𞤢𞥄𞤩𞤫 𞥔𞥙𞥔 (𞤼𞤫𞥅𞤥𞤫𞤯𞥆𞤫 𞤲𞤢𞤴𞤭 𞤫 𞤷𞤢𞤨𞥆𞤢𞤲𞤯𞤫 𞤶𞤫𞥅𞤲𞤢𞤴𞤭 𞤫 𞤲𞤢𞤴𞤭) 𞤲𞤺𞤢𞤤 𞤥𞤢𞤪𞤭. 𞤐𞤮 𞤸𞤭𞤳𞥆𞤭𞥅 𞤲𞤺𞤢𞤤⹁ 𞤐𞤫𞤱-𞤒𞤮𞤪𞤳 𞤫 𞤲𞤺𞤢𞤳𞥆𞤭𞤤𞤢𞥄𞤩𞤫 𞥓𞥒𞥐 (𞤼𞤫𞥅𞤥𞤫𞤯𞥆𞤫 𞤼𞤢𞤼𞤭 𞤫 𞤲𞤮𞥅𞤺𞤢𞤴)⹁ 𞤲𞤮 𞤸𞤭𞤳𞥆𞤭𞤼𞤭𞥅 𞤯𞤮𞤲 𞤳𞤢𞤣𞤭 𞤤𞤢𞤪𞤢𞤤 𞤚𞤫𞤳𞤧𞤢𞥄𞤧 𞤫 𞤲𞤺𞤢𞤳𞥆𞤭𞤤𞤢𞥄𞤩𞤫 𞥒𞥖𞥑 (𞤼𞤫𞥅𞤥𞤫𞤯𞥆𞤫 𞤯𞤭𞤯𞤮 𞤫 𞤷𞤢𞤨𞥆𞤢𞤲𞤯𞤫 𞤶𞤫𞥅𞤺𞤮𞥅 𞤫 𞤺𞤮𞤮). 

𞤑𞤮 𞤻𞤢𞤤𞤲𞤣𞤫 𞥖 𞤑𞤮𞤪𞤧𞤮 𞥒𞥐𞥒𞥐⹁ 𞤧𞤵𞤩𞤮 𞤲𞤺𞤮𞤲 𞤬𞤮𞤨 𞤸𞤮𞤥𞤦𞤢𞤼𞤢 𞤳𞤢 𞤣𞤫𞤥𞤮𞤳𞤢𞤪𞤢𞤲𞤳𞤮𞥅𞤩𞤫 𞤩𞤫𞤲. 𞤑𞤮 𞤳𞤢 𞤼𞤵𞤲𞤦𞤮𞤲’𞤣𞤭𞤪𞤢𞤤 𞤥𞤢𞤩𞥆𞤫 𞤥𞤢𞤱𞤲𞤺𞤢𞤤 𞤱𞤢𞤯𞤮𞤴𞤢𞤴 𞤲𞤺𞤢𞤤 𞤺𞤭𞤤𞤢 𞥑𞥓 𞤃𞤮𞤪𞤧𞤮 𞤸𞤢𞥄 𞤫 𞥑𞥖 𞤃𞤮𞤪𞤧𞤮⹁ 𞤲𞤺𞤢𞤳𞥆𞤭𞤤𞤢𞥄𞤩𞤫 𞤩𞤫𞤲 𞤼𞤢𞤦𞤭𞤲𞤼𞤭𞤲𞤼𞤢 𞤣𞤢𞤪𞤮𞤼𞤮𞥅𞤯𞤮 𞤮𞤲 𞤫 𞤭𞤲𞤣𞤫 𞤬𞤫𞤣𞥆𞤫 𞤣𞤫𞤥𞤮𞤳𞤢𞤪𞤢𞤲𞤳𞤮𞥅𞤩𞤫 𞤩𞤫𞤲 𞤳𞤢 𞤧𞤵𞤩𞤵 𞤥𞤢𞤱𞤲𞤺𞤮. 𞤐𞤺𞤮𞤲 𞤧𞤵𞤩𞤮 𞤥𞤢𞤱𞤲𞤺𞤮⹁ 𞤳𞤮 𞤫 𞤃𞤢𞤱𞤦𞤢𞥄𞤪𞤫 𞤻𞤢𞤤𞤲𞤣𞤫 𞥓 𞤔𞤮𞤤𞤮 𞥒𞥐𞥒𞥐 𞤲𞤺𞤮 𞤧𞤢𞥄𞤼𞤭𞤲𞤢𞥄. 𞤑𞤮 𞤫 𞤲𞤣𞤫𞤲 𞤻𞤢𞤤𞤢𞥄𞤲𞤣𞤫 𞤢𞤲𞤣𞤮𞤴𞤼𞤫𞥅 𞤧𞤭 𞤁𞤮𞤲𞤢𞤤 𞤚𞤪𞤮𞤥𞤨 𞤬𞤮𞥅𞤤𞤫𞤼𞤫 𞤥𞤢𞥄 𞤧𞤭 𞤮 𞤤𞤮𞤲𞤼𞤭𞤼𞤮𞤼𞤮 𞤸𞤮𞥅𞤪𞤫 𞤥𞤢𞤳𞥆𞤮 𞤬𞤭𞥅 𞤣𞤵𞥅𞤩𞤭 𞤲𞤢𞤴 𞤳𞤢𞤣𞤭.