𞤅𞤵𞤩𞤮 𞤲𞤺𞤮𞤲 𞤘𞤭𞤲𞤫 𞤣𞤭𞤪𞤼𞤭𞤲𞤢𞥄𞤥𞤢

𞤕𞤵𞤩𞤫 𞤯𞤫 𞤤𞤢𞥄𞤥𞤵 𞤘𞤭𞤲𞤫 𞤲𞤺𞤵𞤲 𞤧𞤢𞥄𞤼𞤭𞤲𞥆𞤮 𞤫 𞤈𞤫𞤬𞤦𞤭𞤪𞥆𞤫⹁ 𞤻𞤢𞤤𞤲𞤣𞤫 𞥑 𞤐𞤦𞤮𞥅𞤴𞤮𞥅⹁ 𞤣𞤭𞤪𞤼𞤭𞤲𞤢𞥄𞤥𞤢.

𞤑𞤮 𞤀𞤤𞤬𞤢𞥄 𞤑𞤮𞤲𞤣𞤫⹁ 𞤸𞤮𞥅𞤪𞤫𞥅𞤶𞤮 𞤘𞤭𞤲𞤫 𞤮𞤲⹁ 𞤫 𞤴𞤫𞤱𞤼𞤫𞤪𞤫 𞤲𞤣𞤫 𞤮 𞤱𞤢𞤯𞤭 𞤸𞤢𞤲𞤳𞤭 (𞤳𞤫𞥅𞤻𞤢) 𞤶𞤫𞤥𞥆𞤢 𞤳𞤢 𞤰𞤫𞥅𞤱𞤤𞤮 (TV) 𞤫 𞤳𞤢 𞤳𞤭𞤦𞤭𞤪𞤺𞤢𞤤 𞤲𞤺𞤫𞤲𞤣𞤭𞤴𞤢𞤲𞤳𞤫 𞤸𞤮𞤤𞥆𞤭𞤼𞤭 𞤯𞤵𞤥.

𞤑𞤮 𞤱𞤮𞤲𞤭 𞤧𞤢𞤦𞤵 𞤮 𞤣𞤭𞤪𞤼𞤭𞤲𞤭 𞤯𞤫𞥅 𞤷𞤵𞤩𞤫 (𞤱𞤮𞥅𞤼𞤫)⹁ 𞤳𞤮 𞤸𞤮𞥅𞤪𞤫𞥅𞤩𞤫 𞤯𞤫𞥅 𞤤𞤫𞤴𞤯𞤫 𞤳𞤢𞤱𞤼𞤢𞤤𞤶𞤫 𞤘𞤭𞤲𞤫⹁ 𞤱𞤮𞤲𞤭 𞤳𞤮 𞤩𞤭𞤯𞤭 𞤥𞤢𞤤𞥆𞤢 𞤻𞤮𞤰𞥆𞤭 𞤥𞤮. 𞤚𞤫𞤲𞤼𞤭𞤲𞤭𞥅 𞤃𞤵𞤸𞤢𞤥𞥆𞤢𞤣𞤵 𞤄𞤵𞤸𞤢𞥄𞤪𞤭⹁ 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤐𞤢𞤶𞤫𞥅𞤪𞤭𞤴𞤢𞥄 𞤫 𞤃𞤵𞤸𞤢𞤥𞥆𞤢𞤣𞤵 𞤒𞤵𞥅𞤧𞤵𞤬𞤵⹁ 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤐𞤭𞥅𞤶𞤫𞤪. 𞤑𞤮 𞤮𞥅 𞤸𞤮𞥅𞤪𞤫𞥅𞤶𞤮 𞤐𞤭𞥅𞤶𞤫𞤪 𞤱𞤮𞤲𞤭 𞤳𞤮 𞤢𞤪𞤣𞤭𞤲𞤢𞥄 𞤸𞤮𞥅𞤪𞤫 𞤑𞤢𞤱𞤪𞤢𞤤 𞤐𞤘𞤢𞤤𞤵𞤲𞤳𞤫𞤱𞤢𞤤 𞤂𞤢𞤪𞤫 𞤖𞤭𞤪𞤲𞤢 𞤀𞤬𞤪𞤭𞥅𞤳𞤢 (ECOWAS) 𞤲𞤺𞤢𞤤 𞤘𞤭𞤲𞤫 𞤼𞤢𞤱𞤢𞥄 𞤫 𞤥𞤵𞤲.

𞤀𞤤𞤬𞤢𞥄 𞤳𞤮𞤲𞤣𞤫 𞤸𞤮𞤤𞥆𞤭𞥅 𞤱𞤮𞤲𞤣𞤫 𞤳𞤮 𞤮 𞤣𞤭𞤪𞤼𞤭𞤲𞤭𞤪𞤢𞤲𞤭⹁ 𞤳𞤮 𞤼𞤫𞤣𞥆𞤭𞤲𞤺𞤮𞤤 𞤩𞤫𞤲 𞤯𞤮𞤲⹁ 𞤱𞤮𞤲𞤢𞥄 𞤣𞤮𞥅 𞤳𞤵𞤤𞤮𞤤 𞤂𞤭𞤣𞥆𞤭𞥅𞤩𞤫 𞤩𞤫𞤲 𞤨𞤫𞤸𞤫 𞤥𞤢𞤳𞥆𞤮 𞤯𞤫𞤲. 𞤇𞤫𞤲 𞤤𞤭𞤣𞥆𞤭𞥅𞤩𞤫 𞤥𞤮⹁𞤫𞤩𞤫 𞤥𞤮𞤩𞤼𞤮𞤲’𞤣𞤭𞤪𞤭 𞤫 𞤥𞤮𞤶𞤮𞤦𞤫𞤪𞤫 𞤱𞤭𞤫𞤼𞤫𞥅𞤲𞤣𞤫 (FNDC). 𞤇𞤫 𞤸𞤮𞤤𞥆𞤭𞥅𞤲𞤮 𞤸𞤢𞤪𞤭 𞤱𞤮𞤲𞤣𞤫 𞤫𞤩𞤫 𞤸𞤫𞤦𞤭𞤤𞤢𞤲𞤭𞥅 𞤣𞤢𞤪𞤼𞤢𞤺𞤮𞤤 𞤫 𞤼𞤵𞤤𞤼𞤭𞤲𞤺𞤮𞤤 𞤯𞤫𞥅 𞤷𞤵𞤩𞤫 (𞤱𞤮𞤼𞤫) 𞤯𞤫 𞤀𞤤𞤬𞤢𞥄 𞤳𞤮𞤲𞤣𞤫 𞤧𞤢𞥄𞤼𞤭𞤲𞤭. 𞤚𞤫𞤲𞤼𞤭𞤲𞤭𞥅 𞤲𞤮𞤲 𞤲𞤣𞤫𞥅 𞤫𞤩𞥆𞤮𞥅𞤪𞤫 𞤥𞤢𞤳𞥆𞤮 𞤴𞤮𞤱𞤭𞤼𞤭𞥅𞤲𞤣𞤫 𞤫 𞤱𞤢𞤴𞤤𞤵𞤺𞤮𞤤 𞤣𞤮𞤧𞤼𞤢𞤤 𞤘𞤭𞤲𞤫 𞤲𞤺𞤢𞤤.

𞤘𞤭𞤤𞤢 𞤀𞤤𞤬𞤢𞥄 𞤑𞤮𞤲𞤣𞤫 𞤩𞤢𞤲𞤺𞤭𞤲𞤭 𞤬𞤢𞥄𞤤𞤫 𞤶𞤮𞥅𞤯𞤭𞤼𞤢𞤺𞤮𞤤 𞤳𞤢 𞤤𞤢𞥄𞤥𞤵⹁ 𞤳𞤮 𞤩𞤢𞤣𞤭𞥅 𞤴𞤭𞤥𞤩𞤫 𞥔𞥐 (𞤷𞤢𞤨𞥆𞤢𞤲𞤯𞤫 𞤲𞤢𞤴𞤭) 𞤑𞤮𞤲𞤢𞥄𞤳𞤭𞤪𞤭⹁ 𞤳𞤢 𞤤𞤢𞥄𞤥𞤮𞤪𞤣𞤫 𞤘𞤭𞤲𞤫. 𞤒𞤭𞤥𞤩𞤫 𞤳𞤢𞤣𞤭 𞤱𞤢𞤪𞤢𞥄𞤥𞤢 𞤳𞤢 𞤣𞤮𞤱𞤵𞥅𞤪𞤭. 𞤂𞤢𞤦𞤫⹁ 𞤃𞤢𞥄𞤥𞤵𞤲⹁ 𞤑𞤭𞤲𞤣𞤭𞤴𞤢𞥄 𞤫 𞤟𞤫𞤪𞤫𞤳𞤮𞤪𞤫⹁ 𞤯𞤫𞥅 𞤷𞤢𞤸𞤫 𞤬𞤮𞤨 𞤱𞤢𞤪𞤢𞤲𞤢𞥄𞤥𞤢 𞤧𞤵𞤳𞤢𞥄𞤩𞤫. 𞤖𞤫𞥅𞤱𞤵𞤩𞤫 𞤳𞤢𞤣𞤭 𞤦𞤢𞤪𞤥𞤭𞤲𞤢𞥄𞤥𞤢⹁ 𞤦𞤵𞤴 𞤲𞤮 𞤧𞤮𞤳𞤢𞥄 𞤳𞤢𞤣𞤭 𞤧𞤢𞤦𞤵 𞤣𞤢𞤪𞤼𞤢𞤺𞤮𞤤 𞤲𞤣𞤫𞥅 𞤫𞤩𞥆𞤮𞥅𞤪𞤫 𞤀𞤤𞤬𞤢𞥄 𞤑𞤮𞤲𞤣𞤫 𞤤𞤵𞤲𞤣𞤭𞥅𞤲𞤣𞤫 𞤁𞤮𞤧𞤼𞤢𞤤 𞤘𞤭𞤲𞤫 𞤲𞤺𞤢𞤤.

𞤀𞤤𞤬𞤢𞥄 𞤑𞤮𞤲𞤣𞤫 𞤱𞤭𞤭 𞤱𞤮𞥅 𞤳𞤮 𞤬𞤭𞥅 𞤦𞤢𞤤𞤯𞤫 𞤧𞤫𞥅𞤯𞤢𞥄𞤶𞤫 𞤼𞤵𞤲 𞤮 𞤣𞤭𞤪𞤼𞤭𞤲𞤭 𞤧𞤵𞤩𞤮 𞤲𞤺𞤮𞤲. 𞤌 𞤸𞤮𞤤𞥆𞤭 𞤳𞤢𞤣𞤭 𞤱𞤮𞤲𞤣𞤫 𞤨𞤫𞤣𞤤𞤫 (𞤨𞤢𞤪𞤼𞤭𞥅)⹁ 𞤯𞤫 𞤱𞤭𞤲𞤣𞤢𞤲𞤮𞥅𞤳𞤭 𞤯𞤫𞤲 𞤺𞤭𞤤𞤢 𞤤𞤢𞤱 𞤬𞤭𞥅 𞤧𞤵𞤩𞤮 𞤲𞤺𞤮𞤲 𞤼𞤢𞤱𞤭𞤲𞤫𞤼𞤢𞥄𞤳𞤫 𞤬𞤭𞥅 𞤳𞤢𞤤𞤢 𞤻𞤢𞤤𞤢𞥄𞤲𞤣𞤫 𞤲𞤣𞤫𞤲 𞤣𞤭𞤪𞤼𞤭𞤲𞤢𞥄𞤥𞤢.

𞤔𞤮𞥅𞤲𞤭 𞤮𞤥𞤮 𞤸𞤫𞤯𞤢𞥄.