𞤏𞤌𞤚𞤀 𞤀 𞤅𞤓𞤐𞤌
𞤖𞤮𞤤 𞤑𞤮 𞤅𞤵𞤲𞤢𞤲𞤼𞤮𞤯𞤢𞥄
𞤀𞥄𞤲𞤣𞤫 𞤫 𞤥𞤢𞥄𞤨𞤢 𞤲𞤮 𞤸𞤵𞥅𞤩𞤭𞤼𞤭 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲 𞤸𞤢𞤲𞤣𞤫 𞤧𞤢𞤦𞤵 𞤲𞤺𞤵𞥅 𞤻𞤢𞤱𞤵 𞤑𞤮𞤪𞤮𞥅𞤲𞤢𞤾𞤭𞤪𞤭𞥅𞤧. 𞤑𞤮𞤲𞤮 𞤱𞤮𞤼𞤢 𞤢 𞤧𞤵𞤲𞤮⹁ 𞤴𞤫𞤼𞥆𞤵 𞤘𞤫𞤲𞤮 𞤦𞤭𞤲𞥆𞤢𞤥𞤢𞥄 𞤩𞤫𞤪𞤲𞤣𞤫 𞤥𞤢𞥄 𞤲𞤣𞤫𞤲 𞤲𞤮 𞤨𞤭𞤯𞥆𞤢𞥄𞤣𞤫. 
𞥑. 𞤏𞤮𞤼𞤢 𞤢 𞤧𞤵𞤲𞤮 𞤬𞤫𞤧⹁ 𞤧𞤢𞤦𞤵 𞤧𞤵𞤲𞤮 𞤤𞤮𞤭𞤲𞤢𞤴 𞤣𞤫𞤱𞤢𞤤 𞤥𞤢𞥄⹁ 𞤢𞤷𞥆𞤭𞤲𞤼𞤭𞤲𞤫 𞤳𞤵𞥅𞤱𞤯𞤫 𞤥𞤮𞤰𞥆𞤫⹁ 𞤨𞤮𞥅𞤯𞤫 𞤫 𞤧𞤭𞤳𞥆𞤫 𞤦𞤮𞤲𞤯𞤫⹁ 𞤪𞤫𞤬𞤼𞤭 𞤲𞤺𞤮 𞤴𞤮𞤤𞥆𞤫 𞤫 𞤼𞤢𞤰𞤢𞥄𞤪𞤫 𞤫 𞤴𞤫𞤤𞤢𞥄𞤶𞤭 𞤦𞤮𞤲𞤯𞤭.
𞥒. 𞤏𞤮𞤼𞤢 𞤢 𞤧𞤵𞤲𞤮 𞤲𞤣𞤫 𞤼𞤢𞤱𞤲𞤮𞥅 𞤧𞤵𞤲𞤮 𞤫 𞤢𞥄𞤲𞤣𞤫⹁ 𞤯𞤭𞥅 𞤳𞤮 𞤻𞤢𞤦𞥆𞤫𞥅𞤤𞤭 𞤱𞤮𞤲𞤳𞤭𞤸𞤭 𞤫 𞤩𞤵𞤤𞥆𞤭 𞤥𞤵𞥅𞤧𞤫𞥅𞤲𞤣𞤭 𞤩𞤢𞤤𞤲𞤣𞤵 𞤫 𞤥𞤢𞥄𞤨𞤢𞥄𞤪𞤫.
𞥓. 𞤏𞤮𞤼𞤢 𞤢 𞤧𞤵𞤲𞤮 𞤬𞤫𞤧 𞤲𞤣𞤫 𞤼𞤢𞤱𞤲𞤮𞥅 𞤢𞤯𞤢 𞤱𞤮𞤲𞤣𞤭 𞤫 𞤗𞤵𞤪𞥇𞤢𞥄𞤲𞤢⹁ 𞤳𞤢𞤻𞤵𞤲 𞤫 𞤣𞤵𞤢𞥄𞤶𞤭⹁ 𞤫 𞤶𞤵𞥅𞤤𞤯𞤫. 𞤅𞤭 𞤧𞤵𞤲𞤮 𞤲𞤺𞤮𞤲 𞤼𞤫𞤣𞥆𞤭𞤪𞤭𞥅 𞤥𞤢⹁ 𞤢𞤯𞤢 𞤱𞤢𞥄𞤱𞤭 𞤵𞤴𞤼𞤭𞤪𞤣𞤫 𞤼𞤫𞤣𞥆𞤫𞥅𞤲𞤣𞤭 𞤥𞤢𞤺𞥆𞤮 𞤣𞤮𞤳𞥆𞤢𞤤⹁ 𞤣𞤢𞤲𞤳𞤭𞤼𞤢𞤺𞤮𞤤⹁ 𞤫 𞤳𞤵𞥅𞤱𞤯𞤫 𞤥𞤮𞤰𞥆𞤫 𞤱𞤮𞤲𞤣𞤵𞤯𞤫 𞤫 𞤲𞤢𞤬𞥆𞤮𞤪𞤫 𞤤𞤢𞤴𞤢𞤴𞤲𞤣𞤫.
𞥔. 𞤏𞤮𞤼𞤢 𞤢 𞤧𞤵𞤲𞤮 𞤬𞤫𞤧 𞤩𞤢𞤴𞤼𞤭 𞤳𞤮 𞤨𞤫𞤤𞥆𞤫𞤼 𞤢𞤯𞤢 𞤴𞤢𞤲𞤢𞤲𞤢𞥄 𞤢 𞤥𞤢𞥄𞤴𞤢𞤼𞤢𞥄 𞤢𞤣𞤮 𞤻𞤢𞤤𞤢𞥄𞤲𞤣𞤫 𞤲𞤣𞤫 𞤸𞤢𞤨𞥆𞤢𞤲𞤢𞤯𞤢𞥄 𞤲𞤣𞤫𞤲⹁ 𞤫 𞤸𞤭𞤲𞤤𞤫 𞤳𞤢𞤣𞤭 𞤢 𞤤𞤵𞤼𞥆𞤢𞤼𞤢𞥄 𞤱𞤵𞥅𞤪𞤵𞤣𞤫 𞤧𞤭 𞤦𞤢𞤤𞤯𞤫 𞤥𞤢𞥄 𞤯𞤫𞤲 𞤤𞤢𞤲𞥆𞤭𞥅. 𞤸𞤵𞥅𞤱𞤲𞤣𞤫 𞤱𞤢𞥄𞤱𞤢𞤼𞤢𞥄 𞤥𞤢 𞤸𞤫𞤩𞤵𞤣𞤫 𞤧𞤭 𞤱𞤮𞤲𞤢𞥄 𞤳𞤮 𞤢𞤤𞤤𞤢𞤸𞤵 𞤂𞤢𞥄𞤥𞤯𞤮 𞤮𞤲 𞤥𞤵𞥅𞤴𞤢𞤲 𞤥𞤢𞥄 𞤳𞤮𞤲.
𞥕. 𞤏𞤮𞤼𞤢 𞤢 𞤧𞤵𞤲𞤮 𞤬𞤫𞤧. 𞤀 𞤶𞤭𞤥𞥆𞤭𞤲𞤭𞤲𞤮 𞤸𞤢𞤲𞤳𞤭⹁ 𞤳𞤮𞤲𞤮 𞤯𞤵𞤥 𞤲𞤢𞤬𞤢𞥄𞤲𞤮 𞤥𞤢 𞤸𞤢𞤴 𞤧𞤫𞥅𞤯𞤢⹁ 𞤪𞤫𞤬𞤼𞤭 𞤲𞤣𞤫 𞤶𞤭𞤣𞤲𞤢𞥄𞤩𞤫 𞤥𞤢𞥄𞤯𞤢 𞤬𞤫𞤰𞥆𞤭𞤲𞥆𞤮𞥅 ⹁ 𞤴𞤮𞥅𞤥𞤵𞤯𞤢𞥄. 𞤒𞤢𞤤𞥆𞤭 𞤯𞤵𞤥 𞤪𞤵𞤼𞥆𞤵𞤲𞤮 𞤩𞤫 𞤫 𞤲𞤺𞤵𞥅𞤪𞤣𞤢𞤲؟ 𞤔𞤢𞤲𞤺𞤣𞤫 𞤥𞤢𞥄⹁ 𞤥𞤫𞤷𞥆𞤫 𞤥𞤢𞥄 𞤥𞤢𞤤𞥆𞤢 𞤲𞤺𞤫𞤴𞤺𞤵 𞤥𞤢𞥄𞤯𞤢 𞤴𞤫𞥅𞤦𞤭𞥅⹁ 𞤪𞤫𞤬𞤼𞤭 𞤴𞤮𞥅𞤥𞤵𞤯𞤢𞥄⹁ 𞤴𞤢𞤤𞥆𞤭 𞤯𞤵𞤥 𞤱𞤢𞤴𞤤𞤭𞤪𞤲𞤮 𞤴𞤮𞥅𞤥𞤫𞤪𞤫 𞤲𞤣𞤫𞤲 𞤥𞤢𞤤𞤢𞤤؟
𞥖. 𞤏𞤮𞤼𞤢 𞤢 𞤧𞤵𞤲𞤮 𞤳𞤢𞤣𞤭 𞤧𞤢𞤦𞤵 𞤲𞤣𞤫 𞤶𞤭𞤥𞥆𞤭𞤲𞤭𞤲𞤮𞤯𞤢𞥄⹁ 𞤴𞤮𞥅𞤥𞤫𞤪𞤫 𞤥𞤢𞥄 𞤲𞤣𞤫𞤲 𞤱𞤮𞤲𞤼𞤵𞤲𞤮 𞤳𞤵𞤧𞤵𞤦𞤵𞥅𞤶𞤭. 𞤅𞤵𞤲𞤭𞤯𞤢𞥄 𞤫 𞤦𞤢𞥄𞤧𞤢𞤤⹁ 𞤯𞤵𞤥 𞤩𞤫𞤴𞤣𞤢𞤲 𞤥𞤢𞥄 𞤼𞤢𞤥𞤨𞤫𞤪𞤫⁏ 𞤧𞤵𞤲𞤭𞤯𞤢𞥄 𞤫 𞤳𞤮𞤲𞤺𞤵𞤯𞤭⹁ 𞤢𞤴𞤩𞤫 𞤱𞤢𞤤𞥆𞤭𞤼𞤮𞤪𞤭 𞤯𞤵𞤥 𞤫 𞤸𞤮𞥅𞤪𞤫 𞤥𞤢𞥄𞤯𞤢⁏ 𞤧𞤵𞤲𞤭𞤯𞤢𞥄 𞤬𞤭𞥅 𞤸𞤵𞥅𞤱𞤵𞤺𞤮𞤤 𞤦𞤮𞤲𞤫 𞤯𞤵𞤥 𞤪𞤮𞤲𞤳𞤭 𞤱𞤢𞤯𞤵𞤣𞤫.
𞥗. 𞤏𞤮𞤼𞤢 𞤢 𞤧𞤵𞤲𞤮 𞤥𞤵𞤧𞤭𞤣𞤯𞤮. 𞤐𞤣𞤫 𞤼𞤢𞤱𞤲𞤮𞥅 𞤳𞤮 𞤨𞤫𞤤𞥆𞤫𞤼⹁ 𞤧𞤭 𞤢𞤯𞤢 𞤥𞤢𞤪𞤭 𞤺𞤢𞤤𞥆𞤫 𞤴𞤢𞥄𞤶𞤵𞤯𞤫 𞤤𞤢𞤦𞤢𞥄𞤯𞤫⹁ 𞤩𞤫𞤴𞤲𞤺𞤵 𞤥𞤮𞤰𞥆𞤮 𞤤𞤢𞤦𞤢𞥄𞤯𞤮⹁ 𞤶𞤢𞤱𞤣𞤭 𞤯𞤵𞥅𞤯𞤵𞤲’𞤣𞤭 𞤫 𞤩𞤭𞤯𞤩𞤫 𞤧𞤫𞤤𞥆𞤵𞤩𞤫 𞤤𞤢𞤦𞤢𞥄𞤩𞤫⹁ 𞤸𞤢𞤴 𞤺𞤮𞥅𞤼𞤵𞤲 𞤫 𞤯𞤭𞥅 𞤯𞤮𞤮 𞤲𞤢𞤬𞤢𞤼𞤢𞥄 𞤥𞤢 𞤧𞤮 𞤢𞤯𞤢 𞤶𞤭𞤥𞥆𞤭𞤲𞤭𞥅.
𞥘. 𞤏𞤮𞤼𞤢 𞤢 𞤧𞤵𞤲𞤮 𞤬𞤫𞤧 𞤧𞤢𞤦𞤵 𞤘𞤫𞤲𞤮 𞤲𞤮 𞤴𞤫𞤯𞤵𞤥𞤢𞥄 𞤲𞤫𞥅𞤥𞤢𞥄𞤶𞤭 𞤢𞤧𞤤𞤭𞤥𞤼𞤮𞤼𞤮𞥅𞤯𞤭⹁ 𞤯𞤭 𞤢 𞤢𞤤𞤢𞥄 𞤷𞤵𞤺𞥆𞤵 𞤥𞤵𞤲⹁ 𞤫 𞤯𞤭 𞤢 𞤱𞤢𞥄𞤱𞤢𞤼𞤢𞥄 𞤧𞤵𞥅𞤣𞤵𞤣𞤫 𞤸𞤢𞤴 𞤧𞤭 𞤢𞤯𞤢 𞤢𞤤𞤯𞤭: 𞤺𞤭𞤼𞤫 𞤯𞤭𞤯𞤭 𞤯𞤫𞥅 𞤴𞤭𞤭𞤪𞤢𞥄⹁ 𞤲𞤮𞤨𞥆𞤭 𞤯𞤭𞤯𞤭 𞤯𞤭 𞤲𞤢𞤲𞤭𞤪𞤢𞥄⹁ 𞤼𞤮𞤲𞤭 𞤯𞤭𞤯𞤭 𞤫 𞤯𞤫𞤲𞤺𞤢𞤤 𞤳𞤮 𞤸𞤢𞥄𞤤𞤭𞤪𞤢𞥄 𞤫 𞤳𞤮 𞤻𞤢𞥄𞤥𞤭𞤪𞤢𞥄 𞤫 𞤳𞤮 𞤧𞤮𞤭𞤪𞤢𞥄 𞤲𞤦𞤫𞤤𞤢𞤲⹁ 𞤶𞤵𞥅𞤯𞤫 𞤯𞤭𞤯𞤭 𞤯𞤫 𞤸𞤵𞥅𞤱𞤭𞤪𞤢𞥄 𞤫 𞤳𞤮𞤴𞤯𞤫 𞤯𞤭𞤯𞤭 𞤯𞤫 𞤴𞤢𞤸𞤭𞤪𞤢𞥄. 𞤘𞤫𞤲𞤮 𞤪𞤮𞤳𞥆𞤵 𞤥𞤢𞥄 𞤳𞤢𞤣𞤭 𞤳𞤭𞤲𞤢𞤤 𞤲𞤺𞤢𞤤 𞤬𞤮𞥅𞤬𞤭𞤪𞤢𞥄 𞤫 𞤲𞤺𞤢𞤤 𞤧𞤮𞤭𞤪𞤢𞥄 𞤵𞥅𞤪𞤲𞤺𞤮𞤤.
𞥐𞥑 . 𞤏𞤮𞤼𞤢 𞤢 𞤧𞤵𞤲𞤮 𞤬𞤫𞤧 𞤲𞤣𞤫 𞤱𞤮𞤲𞥆𞤮𞥅 𞤳𞤮 𞤢 𞤶𞤮𞥅𞤥𞤢 𞤣𞤭𞥅𞤲𞤢 𞤳𞤢 𞤬𞤭𞤩𞤵𞤯𞤢𞥄⹁ 𞤧𞤵𞥅𞤣𞤵 𞤳𞤢 𞤦𞤫𞤤𞤮𞤯𞤢𞥄⹁ 𞤻𞤢𞤥𞤣𞤵 𞤳𞤮 𞤬𞤢𞤺𞥆𞤭𞤼𞤮𞤪𞤢𞥄⹁ 𞤲𞤣𞤭𞤴𞤢𞤲 𞤳𞤮 𞤴𞤢𞤪𞤢𞥄⹁ 𞤷𞤮𞤲𞤷𞤭 𞤯𞤭 𞤩𞤮𞤪𞤲𞤮𞤯𞤢𞥄⹁ 𞤫 𞤺𞤫𞤲𞤣𞤮 𞤥𞤮 𞤣𞤫𞥅𞤰𞤭𞤪𞤢𞥄. 𞤒𞤢𞤤𞥆𞤭 𞤳𞤮 𞤧𞤵𞤲𞤭𞤲 𞤥𞤢𞥄 𞤴𞤮 𞤥𞤵𞤧𞤭𞤣𞤯𞤮 𞤢𞤲؟
𞥑𞥑 . 𞤃𞤵𞤧𞤭𞤣𞤯𞤮 𞤱𞤮𞤼𞤢 𞤢 𞤴𞤮𞥅𞤥𞤵 𞤬𞤫𞤧
𞤃𞤭𞤯𞤮 𞤱𞤢𞥄𞤶𞤮𞤥𞤢𞥄 𞤴𞤮 𞤢 𞤶𞤢𞤲𞤺𞤵 𞤯𞤫𞥅 𞤼𞤮𞤩𞥆𞤫 𞤲𞤮𞥅𞤺𞤢𞤴 𞤫 𞤶𞤫𞥅𞤼𞤢𞤼𞤭 𞤤𞤫𞤴 𞤯𞤮𞤮⹁ 𞤢𞤪𞤥𞤢 𞤲𞤣𞤫 𞤱𞤫𞤱𞤤𞤵𞤯𞤢𞥄.
𞤀)- 𞤺𞤮𞤥𞤯𞤭𞤲𞤢𞤤 𞤳𞤢𞤻𞤵𞤲 𞤫 𞤳𞤵𞥅𞤱𞤺𞤢𞤤 𞤥𞤮𞤰𞥆𞤢𞤤⹁ 𞤳𞤮 𞤯𞤭𞥅 𞤱𞤮𞤲𞤭 𞤺𞤵𞤲𞤣𞤮𞥊𞥅𞤶𞤭 𞤲𞤫𞤱𞤭𞤲𞤭𞤪𞤯𞤭 𞤲𞤺𞤵𞥅𞤪𞤲𞤣𞤢𞤲. 𞤀𞤱𞤢 𞤪𞤫𞤪𞤯𞤵 𞤫 𞤯𞤵𞤥 𞤬𞤭𞥅 𞤴𞤮 𞤢 𞤥𞤢𞤤𞤫.
𞤁)- 𞤯𞤢𞤩𞥆𞤵 𞤺𞤢𞤲𞤣𞤢𞤤 𞤫 𞤻𞤫𞤲𞤰𞤢𞤤⹁ 𞤪𞤫𞤬𞤼𞤭 𞤼𞤭𞥅𞤥𞤵 𞤣𞤫𞤬𞤼𞤫 𞤻𞤢𞤤𞤲𞤣𞤫 𞤱𞤮𞥅 𞤻𞤢𞤤𞤲𞤣𞤫⹁ 𞤧𞤢𞤦𞤵 𞤼𞤭𞥅𞤥𞤵𞤺𞤮𞤤 𞤣𞤫𞤬𞤼𞤫⹁ 𞤯𞤵𞤥 𞤲𞤮 𞤻𞤭𞤨𞥆𞤢 𞤧𞤵𞤲𞤮.
𞤂)- 𞤸𞤫𞤴𞤯𞤭𞤲𞤼𞤭𞤲 𞤼𞤵𞥅𞤦𞤵𞥅𞤦𞤵𞤴𞤫𞥅⹁ 𞤸𞤮𞥅𞤼𞤭 𞤯𞤵𞥅𞤪𞤮𞤯𞤢𞥄 𞤦𞤮𞤲𞤫⹁ 𞤧𞤢𞤦𞤵 𞤸𞤵𞥅𞤱𞤵𞤺𞤮𞤤 𞤦𞤮𞤲𞤫 𞤻𞤭𞤣𞥆𞤭𞤲𞤢𞤴 𞤲𞤺𞤵𞥅𞤪𞤣𞤢𞤲 𞤲𞤫𞤯𞥆𞤮. 𞤑𞤢𞤤𞤢 𞤯𞤵𞥅𞤯𞤵𞤯𞤮 𞤦𞤢𞤳𞥆𞤢𞤼𞤵𞥅𞤶𞤭 𞤥𞤢𞤤𞥆𞤢 𞤳𞤵𞥅𞤱𞤯𞤫 𞤦𞤮𞤲𞤯𞤫⹁ 𞤮𞤲 𞤣𞤢𞤻𞤢𞤼𞤢𞥄 𞤩𞤵𞤩𞤼𞤵 𞤩𞤫𞤪𞤲𞤣𞤫.
𞤃)- 𞤯𞤵𞤯𞥆𞤭𞤲𞤮𞤪 𞤶𞤢𞤲𞤺𞤵𞤺𞤮𞤤 𞤁𞤫𞤬𞤼𞤫𞤪𞤫 𞤀𞤤𞤤𞤢 𞤥𞤢𞤱𞤲𞤣𞤫 𞤲𞤣𞤫𞤲 𞤳𞤢𞤱𞤵𞤲 𞤫 𞤼𞤢𞤧𞤳𞤢𞤺𞤮𞤤 𞤲𞤣𞤫. 𞤇𞤫𞤴𞤣𞤵 𞤶𞤢𞤲𞤼𞤢𞤺𞤮𞤤 𞤭𞤲𞤣𞤫 𞤀𞤤𞤤𞤢𞥄𞤸𞤵 𞤲𞤣𞤫𞤲 𞤫 𞤳𞤢𞤤𞤢 𞤳𞤭𞤶𞤮𞥅𞤪𞤫 𞤥𞤢𞥄𞤯𞤵𞤲 𞤱𞤢𞤹𞤵𞤼𞤵 𞤲𞤺𞤵 𞤤𞤢𞥄𞤼𞤭𞤯𞤢𞥄 𞤫 𞤲𞤣𞤫𞤪 𞤲𞤺𞤵𞤪𞤣𞤢𞤲 𞤥𞤢𞥄 𞤯𞤢𞤲.
𞤄)- 𞤥𞤮𞤰𞥆𞤮 𞤫 𞤴𞤭𞤥𞤩𞤫 𞤩𞤫𞤲 𞤫𞤥𞤦𞤫𞤪𞤫 𞤲𞤦𞤢𞥄𞤱𞤣𞤭 𞤥𞤢𞥄𞤯𞤢⹁ 𞤧𞤢𞤦𞤵 𞤯𞤵𞤥 𞤸𞤫𞤲𞤼𞤭𞤲𞤢𞤴 𞤬𞤮𞤲𞤣𞤮 𞤥𞤢𞥄𞤯𞤢.
𞤅)- 𞤱𞤮𞤲𞤵 𞤶𞤮𞥅𞤥 𞤷𞥆𞤵𞤷𞤢𞤤⹁ 𞤱𞤮𞤼𞤢 𞤢 𞤤𞤢𞥄𞤼𞤮 𞤸𞤵𞤤𞤯𞤮 𞤪𞤫𞥅𞤣𞤵⹁ 𞤧𞤢𞤦𞤵 𞤲𞤫𞤯𞥆𞤮 𞤧𞤵𞥅𞤧𞤵𞤯𞤮 𞤪𞤫𞥅𞤣𞤵 𞤳𞤮 𞤲𞤫𞤯𞥆𞤮 𞤴𞤢𞥄𞤶𞤵𞤯𞤮 𞤬𞤮𞤲𞤣𞤮⹁ 𞤩𞤢𞤲𞤼𞤭𞥅𞤯𞤮 𞤣𞤢𞤪𞤲𞤣𞤫⹁ 𞤳𞤮 𞤮 𞤢𞥄𞤲𞤣𞤫 𞤱𞤮𞤲𞤢𞤲𞤣𞤫 𞤢𞤴𞤩𞤫 𞤥𞤢𞤳𞥆𞤮.
𞤆)- 𞤤𞤢𞤩𞥆𞤭𞤲 𞤩𞤫𞤪𞤲𞤣𞤫 𞤥𞤢𞥄 𞤲𞤣𞤫𞤲⹁ 𞤩𞤮𞥅𞤪𞤢𞥄 𞤲𞤺𞤢𞤴𞤲𞤺𞤵 𞤫 𞤥𞤢𞤴𞤪𞤫⹁ 𞤳𞤢𞤻𞤵𞤲 𞤫 𞤳𞤮𞤲𞥆𞤢𞥄𞤺𞤵⹁ 𞤸𞤮𞤣𞤮 𞤫 𞤳𞤢𞤤𞤢 𞤻𞤢𞤦𞥆𞤵𞥅𞤤𞤭 𞤬𞤮𞤲𞤣𞤮.
𞤇)- 𞤪𞤫𞥅𞤲𞤼𞤮 𞤫 𞤲𞤣𞤢𞥄𞤪𞤵𞤺𞤮𞤤 𞤳𞤮 𞤼𞤮𞤽𞤢𞥄⹁ 𞤫 𞤱𞤮𞤱𞤤𞤵𞤺𞤮𞤤 𞤳𞤮 𞤼𞤮𞤽𞤢𞥄⹁ 𞤫 𞤱𞤫𞤣𞥆𞤮𞤣𞤢𞤺𞤮𞤤 𞤫 𞤧𞤫𞤪𞤼𞤢𞥄𞤩𞤫 𞤳𞤢 𞤺𞤮𞤪𞤢𞥄𞤳𞤵 𞤥𞤢𞥄 𞤳𞤢 𞤣𞤫𞤱𞤢𞥄𞤳𞤵⹁ 𞤳𞤢𞤻𞤵𞤲 𞤫 𞤬𞤢𞤲𞤼𞤭𞤲𞤺𞤮𞤤 𞤻𞤢𞥄𞤥𞤲𞤣𞤵 𞤫 𞤯𞤮𞤴𞤲𞤺𞤮𞤤.
𞤈)- 𞤼𞤭𞥅𞤯𞤭𞤲𞤮⹁ 𞤣𞤢𞤪𞤢𞤲𞤮𞤯𞤢𞥄 𞤳𞤢𞤤𞤢 𞤺𞤮𞤤𞥆𞤫 𞤣𞤢𞤻𞤭𞤪𞤯𞤫 𞤲𞤢𞤬𞤮𞥅𞤪𞤫⹁ 𞤧𞤢𞤦𞤵 𞤯𞤵𞤥 𞤲𞤮 𞤴𞤫𞤶𞥆𞤭𞤲𞤼𞤭𞤲𞤢 𞤧𞤵𞤲𞤮.
𞤉)- 𞤱𞤵𞥅𞤪𞤵 𞤫𞤥𞤦𞤫𞤪𞤫 𞤻𞤢𞤤𞥆𞤢𞤤 𞤥𞤢𞥄 𞤲𞤺𞤢𞤤⹁ 𞤸𞤢𞤳𞤭𞤲𞤣𞤭𞤲𞤮𞤯𞤢𞥄 𞤫 𞤥𞤭𞥅𞤶𞤢𞤺𞤮𞤤 𞤬𞤭𞥅 𞤻𞤢𞤤𞤯𞤭 𞤱𞤵𞤤𞤭𞥅𞤯𞤭 𞤥𞤢𞤤𞥆𞤢 𞤧𞤢𞥄𞤼𞤭𞥅𞤯𞤭.
𞤊)- 𞤱𞤮𞤼𞤢 𞤫𞤩𞤭𞤲𞥋𞤣𞤭𞤪 𞤸𞤮𞥅𞤪𞤫 𞤥𞤢𞥄 𞤼𞤵𞤲 𞤫 𞤩𞤫𞤲 𞤩𞤵𞤪𞤵𞤩𞤫 𞤥𞤢. 𞤅𞤮 𞤢 𞤲𞤣𞤢𞥄𞤪𞤭𞥅 𞤧𞤫𞤪𞤢 𞤥𞤢𞥄⹁ 𞤢 𞤼𞤢𞤱𞤢𞤴 𞤲𞤮 𞤸𞤫𞤲 𞤩𞤫 𞤩𞤵𞤪𞤯𞤢𞥄 𞤲𞤦𞤢𞥄𞤣𞤭⹁ 𞤫 𞤴𞤢𞥄𞤶𞤵𞤣𞤫 𞤬𞤫𞥅𞤪𞤫⹁ 𞤫 𞤷𞤫𞤤𞥆𞤢𞤤 𞤫 𞤳𞤮 𞤲𞤢𞤲𞤣𞤭 𞤫 𞤯𞤵𞤥. 𞤄𞤫𞤤𞤢𞥄𞤶𞤮 𞤢 𞤴𞤫𞤼𞥆𞤢𞤴 𞤲𞤫𞥅𞤥𞤢𞥄𞤶𞤭 𞤀𞤤𞤤𞤢𞥄𞤸𞤵 𞤂𞤢𞥄𞤥𞤯𞤮 𞤅𞤫𞤲𞤭𞥅𞤯𞤮 𞤮𞤲.
𞤋)- 𞤱𞤮𞤼𞤢 𞤢 𞤱𞤮𞥅𞤱𞤼𞤭𞤲 𞤸𞤢𞤳𞥆𞤭𞤤𞥆𞤫 𞤥𞤢𞥄 𞤯𞤫𞤲 𞤥𞤭𞥅𞤶𞤢𞤺𞤮𞤤 𞤬𞤭𞥅 𞤢𞤧𞤤𞤢𞥄𞤼𞤮𞤼𞤮𞥅𞤯𞤭 𞤸𞤵𞤤𞤩𞤭𞤲𞤭𞥅𞤯𞤭 𞤫 𞤥𞤭𞥅𞤶𞤮𞥅𞤶𞤭 𞤦𞤮𞤲𞤯𞤭 𞤫 𞤻𞤢𞤤𞤯𞤮𞤴𞤯𞤭.
𞤌)- 𞤱𞤮𞤼𞤢 𞤢 𞤬𞤢𞤲𞤼𞤭𞤲 𞤼𞤭𞤳𞥆𞤫𞤪𞤫⁏ 𞤥𞤵𞤻𞥆𞤮⹁ 𞤪𞤫𞤬𞤼𞤭 𞤩𞤫𞤲𞤢𞥄 𞤼𞤭𞤳𞥆𞤫𞤪𞤫 𞤲𞤣𞤫𞤲⹁ 𞤴𞤢𞥄𞤬𞤮𞤯𞤢𞥄. 𞤑𞤮𞤪𞤭 𞤢𞤲𞤣𞤵 𞤲𞤺𞤵𞥅𞤪𞤲𞤣𞤢𞤲 𞤼𞤢𞤺𞤢𞥄𞤯𞤮 𞤲𞤮 𞤪𞤢𞤩𞥆𞤭𞤯𞤭.
𞤍)- 𞤱𞤮𞤼𞤢 𞤢 𞤬𞤫𞤤𞥆𞤵𞤼𞤵 𞤪𞤭𞥅𞤱𞤢𞤺𞤮𞤤 𞤥𞤮𞤰𞥆𞤫𞤪𞤫 𞤥𞤢𞤤𞥆𞤢 𞤼𞤭𞤨𞥆𞤢𞤺𞤮𞤤 𞤼𞤢𞤥𞤨𞤫𞤪𞤫 𞤫 𞤥𞤢𞥄𞤯𞤢. 𞤆𞤫𞤤𞥆𞤫𞤼⹁ 𞤳𞤮 𞤀𞤤𞤤𞤢𞥄𞤸𞤵 𞤂𞤢𞥄𞤥𞤯𞤮 𞤮𞤲 𞤱𞤮𞤲𞤭 𞤳𞤮 𞤸𞤢𞥄𞤲𞤵𞤯𞤢𞥄 𞤸𞤮𞥅𞤤𞤮𞤪𞤣𞤫.
𞤎)- 𞤶𞤮𞤲𞥆𞤵𞤼𞤵 𞤲𞤺𞤮𞤰𞤮 𞤲𞤺𞤮𞤲 𞤫𞤥𞤦𞤫𞤪𞤫 𞤥𞤢𞤺𞥆𞤮⹁ 𞤱𞤮𞤼𞤢 𞤢 𞤥𞤢𞤱𞤲𞤭𞤲 𞤶𞤭𞤩𞤭-𞤤𞤭𞤩𞤭 𞤳𞤮 𞤬𞤢𞤲𞤼𞤭.
𞤏)- 𞤸𞤫𞤲𞤼𞤭𞤲 𞤢𞤣𞤵𞤲𞤢𞥄𞤪𞤵 𞤥𞤢𞥄 𞤲𞤣𞤵𞤲⁏ 𞤱𞤮𞤯𞥆𞤭𞤼𞤮 𞤣𞤵𞤺𞤵𞤤𞤢𞤴𞤢𞥄𞤺𞤢𞤤⹁ 𞤼𞤵𞥅𞤲𞤣𞤭 𞤩𞤢𞤤𞤲𞤣𞤵 𞤫 𞤲𞤮𞤳𞥆𞤵𞥅𞤪𞤫⹁ 𞤸𞤭𞤲𞤮 𞤤𞤫𞤼𞥆𞤢 𞤱𞤮𞤲𞤳𞤭𞤸𞤭 𞤳𞤭𞤲 𞤧𞤢𞤲𞥆𞤫.
𞤐)- 𞤱𞤮𞤼𞤢 𞤣𞤵𞥅𞤥𞤭𞤲 𞤥𞤭𞥅𞤶𞤮 𞤫 𞤷𞤢𞤯𞤫𞥅𞤤𞤫 𞤼𞤵𞤲⹁ 𞤫𞤩𞥆𞤭𞤲𞥋𞤣𞤭𞤪 𞤼𞤢𞤥𞤨𞤫𞤪𞤫𞥅𞤶𞤭 𞤥𞤢𞥄𞤯𞤮 𞤫 𞤱𞤫𞤤𞤮-𞤱𞤫𞤤𞤮𞥅𞤶𞤭 𞤥𞤢𞥄𞤯𞤢. 𞤄𞤫𞤤𞤢𞥄𞤶𞤮𞥅 𞤢 𞤴𞤫𞤼𞥆𞤢𞤴 𞤘𞤫𞤲𞤮.
𞤑)- 𞤳𞤢𞤤𞤢 𞤳𞤮 𞤦𞤮𞤲𞤭 𞤳𞤮 𞤼𞤵𞥅𞤥𞤢𞤯𞤢𞥄 𞤤𞤮𞤪𞥆𞤢𞤼𞤢𞥄 𞤥𞤢𞥄 𞤬𞤫𞤧⁏ 𞤳𞤢 𞤤𞤭𞤣𞥆𞤵⹁ 𞤳𞤮 𞤼𞤵𞥅𞤥𞤵𞤯𞤮 𞤥𞤢 𞤮𞤲 𞤱𞤮𞤲𞤭 𞤳𞤮 𞤼𞤵𞥅𞤥𞤫𞤯𞤫𞤲 𞤤𞤮𞤪𞥆𞤢𞤼𞤢⹁ 𞤱𞤮𞤪𞤭𞤲 𞤱𞤮𞤼𞤢 𞤢 𞤥𞤭𞥅𞤶𞤮 𞤬𞤭𞥅 𞤯𞤵𞤥.
𞤒)- 𞤧𞤫𞤤𞥆𞤭𞤲 𞤴𞤫𞤤𞤢𞥄𞤶𞤭 𞤥𞤢𞥄 𞤯𞤭𞤲. 𞤒𞤫𞤤𞤮 𞤥𞤮𞤰𞥆𞤫𞤪𞤫⹁ 𞤣𞤢𞤯𞤢𞤤⹁ 𞤥𞤢𞤤𞤢𞤤 𞤫 𞤩𞤢𞤲𞤼𞤢𞤤.
𞤓)- 𞤱𞤮𞤼𞤢 𞤢 𞤼𞤢𞤥𞤰𞤭𞤲𞤮𞤪 𞤸𞤢𞤴 𞤺𞤮𞥅𞤼𞤮 𞤶𞤢𞤪𞤲𞤫𞥅𞤣𞤫⹁ 𞤩𞤢𞤴𞤪𞤵 𞤱𞤢𞤯𞥆𞤢𞥄𞤳𞤭 𞤸𞤢𞤴 𞤺𞤮𞥅𞤼𞤮 𞤶𞤢𞤪𞤲𞤵𞤺𞤮𞤤 𞤥𞤢⁏ 𞤸𞤵𞥅𞤱𞤭𞤪 𞤥𞤮𞤰𞥆𞤫𞤪𞤫 𞤬𞤭𞥅 𞤀𞤤𞤤𞤢𞥄𞤸𞤵 𞤂𞤢𞥄𞤥𞤯𞤮 𞤧𞤫𞤲𞤭𞥅𞤯𞤮 𞤮𞤲 𞤼𞤢𞤲. 𞤀𞤲𞤣𞤵𞤼𞤵 𞤳𞤮 𞤬𞤭𞥅 𞤃𞤢𞤳𞥆𞤮 𞤱𞤮𞤲𞤭 𞤳𞤮 𞤸𞤵𞥅𞤱𞤭𞤪𞤯𞤢𞥄 𞤳𞤢𞤤𞤢 𞤺𞤮𞤤𞥆𞤫.
𞤔)- 𞤱𞤢𞤯𞤵 𞤫𞤩𞥆𞤮𞥅𞤪𞤫 𞤲𞤢𞤬𞤢𞤴𞤲𞤣𞤫 𞤥𞤢⹁ 𞤪𞤫𞤬𞤼𞤭 𞤼𞤢𞤧𞤳𞤮𞤯𞤢𞥄 𞤲𞤣𞤫⹁ 𞤬𞤭𞥅 𞤴𞤮 𞤢 𞤴𞤫𞤶𞥆𞤵𞤼𞤵 𞤲𞤺𞤮𞤰𞤮𞥅𞤶𞤭 𞤥𞤢𞥄 𞤯𞤭𞤲.
𞤕)- 𞤱𞤮𞤼𞤢 𞤢 𞤲𞤢𞤩𞤼𞤭𞤪 𞤴𞤫𞥅𞤧𞤮 𞤳𞤮 𞤸𞤢𞥄𞤲𞤵 𞤯𞤢𞥄 𞤱𞤢𞤯𞤵𞤣𞤫 𞤸𞤢𞤲𞤣𞤫. 𞤏𞤮𞤼𞤢 𞤢 𞤧𞤢𞥄𞤼𞤭𞤲 𞤺𞤮𞤤𞥆𞤫 𞤥𞤢𞥄 𞤸𞤢𞤲𞤣𞤫𞥅𞤶𞤫 𞤯𞤫𞤲 𞤬𞤢𞥄 𞤶𞤢𞤲𞤺𞤮. 𞤖𞤵𞥅𞤱𞤵 𞤯𞤫 𞤳𞤭𞤧𞤢𞤲 𞤩𞤢𞤴𞤪𞤵 𞤢 𞤢𞤲𞤣𞤢𞥄 𞤳𞤮 𞤧𞤢𞥄𞤼𞤭𞥅 𞤥𞤢𞤤𞥆𞤢 𞤳𞤮 𞤢𞤪𞤢𞤼𞤢. 𞤀 𞤢𞤲𞤣𞤢𞥄 𞤳𞤢𞤣𞤭 𞤧𞤮 𞤢 𞤼𞤢𞤱𞤫𞤼𞤫 𞤶𞤢𞤲𞤺𞤮.
𞤖)- 𞤢𞤲𞤣𞤭𞤲𞤮 𞤺𞤮𞤤𞥆𞤫 𞤲𞤢𞤬𞤢𞤴𞤯𞤫 𞤯𞤫 𞤴𞤫𞤪𞤮𞤲’𞤣𞤭𞤪𞤯𞤢𞥄⹁ 𞤺𞤮𞤤𞥆𞤵 𞤺𞤮𞤤𞥆𞤫 𞤲𞤢𞤬𞤢𞤴𞤯𞤫 𞤯𞤫 𞤲𞤮 𞤬𞤮𞤱𞤼𞤭𞤲𞤫.
𞤗)- 𞤼𞤢𞤧𞤳𞤮 𞤥𞤮𞤰𞥆𞤫 𞤯𞤫 𞤀𞤤𞤤𞤢𞥄𞤸𞤵 𞤂𞤢𞥄𞤥𞤯𞤮 𞤮𞤲 𞤼𞤫𞤤𞥆𞤭𞤲𞤭 𞤫 𞤥𞤢𞥄⁏ 𞤱𞤢𞤧𞤮𞤪 𞤯𞤫⹁ 𞤩𞤢𞤴𞤪𞤵 𞤲𞤫𞤤𞤢𞥄𞤯𞤮 𞤥𞤮 𞤶𞤢𞤥 𞤫 𞤳𞤭𞤧𞤢𞤤 𞤱𞤮𞤲𞤭 𞤥𞤵𞤲 𞤲𞤮 𞤥𞤢𞥄𞤳𞤭 𞤱𞤮𞤲𞤣𞤫 𞤳𞤮 𞤨𞤫𞤤𞥆𞤫𞤼⹁ 𞤀𞤤𞤤𞤢𞥄𞤸𞤵 𞤤𞤢𞥄𞤥𞤯𞤮 𞤮𞤲 𞤲𞤮 𞤴𞤭𞤯𞤭 𞤲𞤣𞤫 𞤮 𞤴𞤭𞤢𞤼𞤢 𞤲𞤫𞥅𞤥𞤢𞥄𞤶𞤭 𞤥𞤢𞤳𞥆𞤮 𞤯𞤭𞤲 𞤲𞤮 𞤩𞤢𞤲𞤺𞤭 𞤫 𞤶𞤭𞤴𞤢𞥄𞤯𞤮 𞤥𞤢𞤳𞥆𞤮 𞤮𞤲. 𞤑𞤮𞤪𞤭⹁ 𞤶𞤢𞤪𞤲𞤵 𞤀𞤤𞤤𞤢𞥄𞤸𞤵 𞤴𞤫𞤯𞤵𞤯𞤮 𞤥𞤢 𞤯𞤭𞥅 𞤲𞤫𞥅𞤥𞤢𞥄𞤶𞤭 𞤸𞤫𞥅𞤱𞤵𞤯𞤭 𞤯𞤭 𞤤𞤭𞤥𞤼𞤮𞤼𞤢𞥄𞤳𞤮.
𞤘)- 𞤴𞤮𞤲𞤣𞤭𞤲𞤮𞤪 𞤳𞤮 𞤘𞤫𞤲𞤮 𞤪𞤮𞤳𞥆𞤵 𞤥𞤢𞥄 𞤳𞤮𞤲⹁ 𞤬𞤮𞤼𞤭 𞤳𞤮 𞤷𞤫𞤤𞥆𞤢𞤤⹁ 𞤶𞤢𞤱𞤣𞤭⹁ 𞤥𞤢𞤤𞥆𞤢 𞤩𞤫𞤴𞤲𞤺𞤵𞥅𞤪𞤫⹁ 𞤫 𞤼𞤫𞤣𞥆𞤵𞤺𞤢𞤤 𞤫 𞤳𞤮 𞤲𞤢𞤲𞤣𞤭 𞤫 𞤯𞤭𞥅.
𞤙)- 𞤳𞤢𞤤𞤢 𞤥𞤮 𞤸𞤵𞥅𞤱𞤮𞤲’𞤣𞤭𞤪𞤯𞤢𞥄 𞤫 𞤥𞤵𞤲⹁ 𞤸𞤫𞤦𞥆𞤭𞤲𞤮𞤪 𞤼𞤢𞤧𞤳𞤢𞤺𞤮𞤤 𞤥𞤮𞤰𞥆𞤵𞤯𞤭 𞤥𞤢𞤳𞥆𞤮 𞤯𞤭𞤲⹁ 𞤸𞤮𞥅𞤼𞤭 𞤧𞤮𞤪𞥆𞤢𞤲𞤢𞥄 𞤥𞤮 𞤫𞤤𞥆𞤢𞥄𞤶𞤭 𞤥𞤢𞤳𞥆𞤮 𞤯𞤭𞤲⹁ 𞤩𞤢𞤴𞤪𞤵 𞤲𞤫𞤯𞥆𞤮 𞤳𞤢𞤤𞤢 𞤲𞤮 𞤱𞤮𞤲𞤣𞤭 𞤫 𞤫𞤤𞥆𞤢𞤸𞤵𞤲 𞤥𞤵𞤲.
𞤚)- 𞤫𞤤𞤼𞤵 𞤥𞤢𞤤𞥆𞤢 𞤬𞤮𞤲𞤼𞤢𞥄 𞤩𞤢𞤤𞤲𞤣𞤵 𞤥𞤢𞥄 𞤲𞤣𞤵𞤲 𞤻𞤢𞤤𞤲𞤣𞤫 𞤱𞤮𞥅 𞤻𞤢𞤤𞤲𞤣𞤫. 𞤖𞤭𞤼𞥆𞤭𞤲 𞤬𞤭𞥅 𞤷𞤫𞤤𞥆𞤢𞤤 𞤥𞤢𞥄 𞤲𞤺𞤢𞤤⹁ 𞤩𞤢𞤴𞤪𞤵 𞤴𞤭𞥅𞤤𞤢 𞤸𞤭𞤧𞤵𞤳𞤢 𞤳𞤮 𞤫 𞤩𞤢𞤤𞤲𞤣𞤵 𞤧𞤫𞤤𞥆𞤵𞤲’𞤣𞤵 𞤱𞤮𞤲𞤭 𞤱𞤫𞥅𞤪𞤣𞤫 𞤥𞤵𞤲.
𞤛)- 𞤚𞤮𞤪𞤮 𞤘𞤫𞤲𞤮 𞤼𞤵𞤥𞤢 𞤳𞤢𞤤𞤢 𞤫 𞤲𞤣𞤫𞤪 𞤳𞤭𞤶𞤮𞥅𞤶𞤫 𞤲𞤺𞤵𞤪𞤣𞤢𞤲 𞤥𞤢𞥄 𞤯𞤢𞤲⹁ 𞤬𞤭𞥅 𞤴𞤮 𞤌 𞤴𞤢𞥄𞤬𞤮 𞤥𞤢⹁ 𞤌 𞤥𞤮𞤰𞥆𞤭𞤲𞤢 𞤬𞤭𞤴𞤢𞤳𞤵𞥅𞤶𞤭 𞤥𞤢𞥄𞤯𞤢 𞤯𞤭𞤲⹁ 𞤪𞤫𞤬𞤼𞤭 𞤌 𞤸𞤭𞤧𞤭𞤲𞤢 𞤥𞤢𞥄⹁ 𞤌 𞤩𞤢𞤲𞤼𞤢 𞤥𞤢𞥄.
𞤃𞤭𞤯𞤮 𞤸𞤢𞥄𞤯𞤢 𞤯𞤮𞥅 𞤳𞤮 𞤥𞤭 𞤼𞤮𞤪𞤭𞥅𞤯𞤮 𞤘𞤫𞤲𞤮 𞤥𞤫𞤲 𞤀𞤤𞤤𞤢𞥄𞤸𞤵 𞤚𞤮𞥅𞤱𞤵𞤯𞤮 𞤅𞤫𞤲𞤭𞥅𞤯𞤮 𞤌𞤲⹁ 𞤴𞤮 𞤌 𞤣𞤢𞤲𞤣𞤵 𞤫𞤲 𞤧𞤵𞤲𞤮 𞤸𞤢𞤲𞤣𞤫 𞤫 𞤶𞤢𞤲𞤺𞤮⹁ 𞤸𞤮𞥅𞤼𞤭 𞤌 𞤴𞤫𞤯𞤢 𞤫𞤲 𞤥𞤢𞤤𞤢𞤤 𞤫 𞤩𞤢𞤲𞤼𞤢𞤤 𞤀𞤣𞤤𞤢𞤥 𞤫 𞤆𞤵𞤤𞤢𞤤.
𞤑𞤵𞤯𞤮𞤤 𞤀𞤧𞤭𞤣𞥆𞤭𞥅𞤹𞤵 𞤊𞤵𞥅𞤼𞤢𞤲𞤳𞤫 𞤔𞤢𞤤𞥆𞤮
𞤅𞤢𞤱𞤵𞥅𞤣𞤭 𞤀𞤪𞤢𞤦𞤭𞤴𞤢𞥄_𞤃𞤢𞤣𞤭𞥅𞤲𞤢.
ــ𞤅𞤵𞤲𞤮 𞤩𞤵𞤲𞤣𞤵 𞤥𞤵𞥅𞤧𞤫𞥅𞤲𞤣𞤭ــ
𞤌𞤲 𞤶𞤢𞥄𞤪𞤢𞥄𞤥𞤢. 𞤐𞤺𞤮𞤤 𞤳𞤵𞤯𞤮𞤤 𞤲𞤮 𞤱𞤮𞤲𞤣𞤭 𞤫 𞤰𞤭𞤴𞤢𞤤
𞤌𞤲 𞤴𞤫𞤼𞥆𞤢𞥄𞤥𞤢 𞤕𞤉𞤈𞤐𞤌𞥅𞤇𞤉 𞤼𞤫𞤣𞥆𞤵𞤩𞤫⹁ 𞤢𞤤𞤤𞤢 𞤩𞤫𞤴𞤣𞤵 𞤱𞤢𞤤𞥆𞤵𞤣𞤫 𞤫𞤲⹁ 𞤸𞤮𞤳𞥆𞤢 𞤀𞤁𞤂𞤀𞤃 𞤦𞤭𞤲𞤣𞤭 𞤥𞤫𞤲 𞤼𞤮𞥅𞤱𞤢𞤤 𞤣𞤢𞤲𞥆𞤢 𞤤𞤫𞤻𞤮𞤤 𞤥𞤫𞤲 𞤲𞤺𞤮𞤤 𞤦𞤮𞤲𞤫𞥅𞤶𞤭….
𞤢𞤱𞤢 𞤮𞤲 𞤶𞤢𞥄𞤪𞤢𞥄𞤥𞤢 𞤴𞤮𞥅𞤯𞤭𞥅 𞤤𞤢𞤦𞤢𞥄𞤥𞤢 𞤴𞤮 𞤺𞤫𞤲𞤮 𞤩𞤫𞤴𞤣𞤵 𞤺𞤢𞤲𞤣𞤢𞤤